بھیڑا

        اساں ہیلا ای اٹی ڈنا کھیڈنے واسے جھر کھٹی    ہئی تے اتوں روفا موٹا آ گیا۔آنیا نال آکھنا ” میں بی کھیڈساں” میں ، قاضی طارق تے بوبا چپ کر کے بہہ گئے جس نا مطلب روفا موٹا سمجھ گیا جے اسی اساں نال نہ کھڈانے آں ۔ اساں تے اکھیاں کڈیانس تے آکھن لگا ” نہ کھیڈساں تے نہ کھیڈن دیساں” روفا موٹا نالے اساں توں وڈا ایا تے اتوں وڈوکھر بی۔سچی گل اے اسی سارے اس کولوں بہوں خشکنے ہئے آں۔ جس نال بھڑنا ہئیا اس نے تھن گھڑ دینا ہئیا۔پچھے ہک دیہاڑے وارثے کھبے آں اتنیاں لمیانس جے اساں ناس آ گئی۔       دوئے دوئیں سنگی تاں ساہ چھک کے بہہ گئین پر مینڈے کولوں صبر نئیں ہوئیا۔میں آکھیا “یرا اساں کھیڈن دے نئیں تے میں بدوا دیسائیں نالے وڈے لالے آں ونج کے دسناں” اگوں لا کوڑیچ ہو گیا ۔ آکڑ کے آکھنا” جل اوئے بدوا دیساں ۔ وڈا آئیاں توں پیر فقیر ۔ تے لالے نا ڈراوا مانہہ وت نہ دیوویں۔ اساں بی میں سیانڑناں واں” سچی دساں نیں میں ایاں بی بہوں ماڑا جیہا ۔ ہن اس سودھرے نال کونڑ بھڑے۔ اوہ تاں دھنگیوں بکے پینا ایا۔اساں سنگیاں اٹی ڈنا چائیا تے چپ چپیتے کن ڈھا کے دوئے پاسے ٹر پئے۔۔۔۔۔       

rear view of a silhouette man in window

       پچھلے مہینے مینڈا سکا ماماں مر گیا ترے چار دیہاڑے نیہڑو گراں وینڑاں پیا۔وینیا تاں میں توڑے آلے گڈی تے وینا ایاں پر مڑنیاں اڈے تونڑیں ٹر کے آنا ایاں۔ٹرنا اس واسے ایاں جے راہے تے دادکا قبرستان ایا۔ اتھے  سوہنادعا شا کیتی تے وت اگاں ٹر پیا۔نالے اوہ راہ سکولے آں وینا ایا جتھے میں چوتھی جماعتاں تونڑیں پڑھنا ریاں۔جناں آلے کھوئے کول ذرا اگیرے جبی نیں وگنے پانی نال منہ ہتھ دھونیاں اوہ ویلا یاد آیا جس ویلے سائی نیاں کھیڑیاں پا کے تے ہک پتلی جئی چادر نی گلگتی بنھ کے مگھرے پوہے چ ٹھرنیا سکول وینا ایاں۔ نہ سویٹریاں ایاں تے نہ ای غریب جراباں جوگے ہونے ائے۔۔۔۔۔۔   

           مامے نا تریہا کر کے میں ہیلا جبی چوں لنگھیاں تے اگوں ہک بندہ کھوتی تے آٹا لدھ کے آنیا پیا ایا۔مانہہ ویکھنیاں نال سیانڑ گدھاس تے مینڈا ناں گھن کے آکھن لگا ” توں ثقلین شاہ ویں نا جیہڑا حمد”میرے مولا میرے داتا” بہوں سراں نال پڑھنا ہئیا” وت آکھنا ” میں ریاض آں تینڈے وڈے بھراؤ سجاد شاہ نا جماعتی۔فوج نی نوکری پوری کر آئیاں تے اج کل ذمداری کرنا پیاں” خیر میں اس نا حال شال پچھیا۔ پرانے سنگیاں جماعتیاں نا پچھیا۔روفے موٹے نا بی پچھیا۔ اگوں آکھنا ” اس نی نہ پچھو شاہ جی۔اس سال کھنڑ پہلے ہک پٹی نیں رپھڑے چ بندہ مار چھوڑیا۔موت نی سزا ہوئی پئیس۔ہی کرونا نہ آوے تاں چروکڑاں پھاہی لگ گیا ہووے آ” میں اس نی گل سنڑ کے کنبھ گیاں۔۔۔۔

ثقلین انجم
سیّد ثقلین انجمؔ

ثقلین انجم

Next Post

کیمبل پور سے اٹک تک - 3

جمعہ جنوری 29 , 2021
ذکر ہورہا تھا تولہ رام بلڈنگ کا ، جو اس شھر کے ماتھے کا جھومر ہے ۔ جب بھی کیمبل پور جاتا ہوں ، آتے جاتے ، فن تعمیر کا یہ شاھکار مجھے
campbellpore-to-attock-