Tag: کشمیر

عاصم بخاری کی شاعری کا ایک عنوان گاؤں نورنگا

۔۔۔۔۔۔۔
تجزیہ
(راحت امیر نیازی میانوالی)

سادات اور نورنگا سے قلبی لگاؤ ، محبت اور احترام ہمارے اجداد سے ہمیں ورثے میں ملا ہے۔اس موضوع پر لکھنا فرض تھا سو الحمد للہ اس فرض کی تکمیل کی توفیق ہوئی۔میں نے اپنے دادا اور والد ِ گرامی مہر خان بلچ سے نورنگا اور سادات ِ نورنگا کے بارے بہت سے محبت و عقیدت بھرے واقعات سنے۔ ہمارے بزرگ ہیڈ ماسٹر عطا محمد شاہ کی بے لوث تعلمی خدمات سے بہت متاثر تھے۔جن کا ذکر و اعتراف محافل میں برملا کرتے تھے۔ عاصم بخاری سے رابطہ اور دہائیوں پر مشتمل تعلق ، اچھی رفاقت بھی سادات ِ نورنگا کی نسبت ایک کڑی ہے۔
اگر عاصم بخاری کی شاعری کے حوالے سے بات کروں تو میں نے عاصم بخاری کی شخصیت کا بہت ہی قریب سے مطالعہ کیا ہے ۔انہیں نیچر فطرت اور قدرت کے ساتھ ساتھ اپنی مٹی علاقہ اور دیس کے ساتھ پیار اور محبت ورغبت ملتی ہے۔آپ اسے مقامیت کانام دیں یا کوئی اور آپ پر چھوڑتے ہیں۔
گاؤں نورنگا شیر دریا ، دریائے سندھ کے مشرقی کنارے موچھ کے قریب واقع ہے یا تھا یہ بھی فیصلہ قاری اور ناظر نے کرنا ہے۔ منظوم توجیہہ کچھ ایسے دو اشعار کی صورت میں دیتے ہیں

دِل میں آباد آج بھی اس کے
چِھن گیا کب کا گر چہ "نورنگا
ایک اور شعر
۔۔۔۔۔۔۔۔۔۔۔۔
("اپنا نورنگا ” کے نام)

مَیں وہ ہوں جس نے ” اپنا نورنگا "
اپنی آنکھوں سے ڈوبتے دیکھا

اس گاوں سے تعلق اور عاصم کا کیا رشتہ ہے وہ ایک شعر کی صورت یوں بیان کرتے ہیں
ایک شعر
۔۔۔۔۔۔۔۔۔
(نورنگا کے نام)

گاؤں”ماں جی” کا ، ہے یہ آبائی
کیوں نہ بھائے ہمیں یہ "نورنگا”
۔۔۔۔۔۔۔
عاصم بخاری کی شاعری میں رومانویت کوٹ کوٹ کر بھری ہوئی ہے۔وہ روایت پرست بھی دکھائی دیتے ہیں۔اقدار کی پاس داری اور اس گاوں کی شرافت اور لیاقت و محنت کا پرچار و اعتراف بھی لازمی جانتے ہیں تاکہ ان اقدار پر زمانہ بھی عمل پیرا ہونے کی کوشش کرے۔
گاؤں نورنگا ۔۔۔۔میانوالی کے نام
۔۔۔۔۔۔۔۔
(معرّیٰ نظم)

میری پہچان ہے لیاقت میں
میری پہچان ہے شرافت میں
میری پہچان ہے زمانے میں
لب ِ دریا یہ گاؤں نورنگا

ایک شعر
۔۔۔۔۔۔۔۔۔۔۔
بخاری کا مطالعہ وسیع اور مشاہدہ عمیق ہے۔اس شعر میں صنعت ِتلمیح کا استعمال کرتے ہوئے واقعاتی مماثلت کے ساتھ ساتھ ذو معنوی پیرائے میں بات کرنے کی خوب صورت انداز میں سعی کی ہے۔ چوں کہ موسم ِ گرما میں سیلاب کی زد میں اکثر و بیشتر یہ گاوں برباد ہوتا رہا۔اس کے نام نورنگا کی وجہء تسمیہ بھی یہی بتائی جاتی ہے کہ یہ نویں بار دریا کی بربادی کے بعد آباد ہونے پر نورنگا کہلایا۔
شعر
(دریا بُرد گاؤں نورنگا میانوالی کے نام)
۔۔۔۔۔۔۔
"نورنگا” کا دل ذکر کرے ذہن ہے کہتا
"سادات” کو راس آتے نہیں، "دریا کنارے”
۔۔۔۔۔۔۔۔
اسی مزاج کی ترجمانی کرتا ایک شعر جس میں حُب الوطنی ، جدائی کے اور دِلی کے جیسے بربادی کا ذکر کچھ اس انداز میں کرتے ہیں۔
شعر
دِلی کے جیسے وسیب کے اُجڑنے کے دُکھ کا اظہار یوں کرتے ہیں۔
شعر
دِل میں آباد آج بھی اس کے
چِھن گیا کب کا گر چہ "نورنگا”

ایک شعر اسی مزاج کا غماز
۔۔۔۔۔۔۔۔۔۔۔۔
("اپنا نورنگا ” کے نام)

مَیں وہ ہوں جس نے ” اپنا نورنگا "
اپنی آنکھوں سے ڈوبتے دیکھا
۔۔۔۔۔۔۔
ناسٹلجیا اور ماضی پرستی بھی عاصم بخاری کی شاعری میں پائی جاتی ہے۔اور یاد ِ ماضی انہیں پل پل ستاتی دکھائی دیتی ہے۔
"نورنگا "…. گاؤ ں کے نام
۔۔۔۔۔۔۔۔۔
(ایک نظم)
لے جاتے ہیں ماضی میں ہمیں دریا کنارے
اشعار بخاری ترے ، ” نورنگا ” کے بارے
۔۔۔۔۔
عاصم بخاری ایک حساس اور دھڑکنے والا دل رکھتے ہیں۔کسی کے دکھ درد پر ان کا دل کُڑھتا ہے۔ہر سال وطن ِ عزیز کی بربادی اور سیلابی صورت ِ حال بالعموم اور گاؤں نورنگا کی ہر سال سیلاب کے سبب بربادی بالخصوص انہیں بے چین کرتی ہے۔
ایک شعر دیکھیں۔

برسات کا موسم وہ ستمبر کا مہینہ
دریا کے کٹاؤ کے وہ دلدوز نظارے
۔۔۔۔۔
اگرچہ ناوسائلی کا دور دورہ تھا۔کوئی سہولت نہ تھی۔مگر اس گاؤں سے وابستہ اک ایک یاد انہیں تڑپاتی ہے۔
شعر
بجلی تھی نہ رستےتھے سکوں چین بڑا تھا
یاد آ تے ہیں رہ رہ کے وہی لمحے گزارے
۔۔۔۔
اہالیان ِ نورنگا کو دنیا گھومنے کا موقع ملا۔مگر میانوالی اور یہ گاوں کہیں نہیں بھولا۔یہ مٹی کی محبت اور حُب الوطنی کی دلیل ہے۔ایک اور شعر دیکھیں

دنیا کے کئی دیکھے ممالک میں رہے ہم
ہیں نقش مگر دل پہ ابھی تیرے نظارے
۔۔۔
دیس کے بھی ہرچھوٹے بڑے شہر میں ایک عرصہ رہنے کا اتفاق ہوا مگر گاؤں کی یادیں ہمراہ ہیں۔
شعر ملاحظہ ہو۔

لاہور کراچی میں ہے اک عمر گزاری
اترے نہیں منظر ترے اس دل سے پیارے
۔۔۔
شہروں میں رہنے کے باوجود اپنے گاؤں کی سی محبت سادگی اور خلوص نہیں ملا۔اپنے گاوں کا اخلاص اپنا تھا۔
شعر دیکھیں۔
ہم جولی وہ یاد آ تے ہیں ہم سائے بھی اکثر
کیا سادہ و مخلص وہ سبھی یار ہمارے
گاؤں نورنگا میں اگرچہ بجلی نہ تھی رستے کچے تھے گھر عارضی تھی۔گویا ضروریات زندگی بھی فراوانی سے میسر نہ تھیں مگر دل ہے کہ ان ہی یادوں کے سہارے جی رہا ہے۔وطن کے ساتھ یہی تو وطن کشمیر والی بات ہے۔کمال منظر کشی شعر میں ملاحظہ ہو۔
۔۔۔۔۔۔
چمنی بھی نہیں بھولی ابھی کچے مکاں بھی
اب جینا ہے عاصم جی انہی یادوں سہارے
۔۔۔۔۔۔۔۔۔

اسی مزاج کا حامل ایک اور شعر
۔۔۔۔۔۔۔۔۔۔
دریائے سندھ کنارے آ باد گاؤں۔۔۔”نورنگہ”کے نام

وہ جہاں بھی ، کہیں چلا جائے
دل میں بستا ہے، اس کے نور نگہ
عاصم بخاری نفسیات کا گہرا شعور بھی رکھتے ہیں ۔یہی وجہ کہ خود کلامی کے انداز میں نورنگا سے وابستگی کا اظہار ایک قطعہ کی صورت میں کرتے ہیں۔
۔۔۔۔۔۔۔۔۔
سندھ کنارے واقع گاؤ ں۔۔۔ "نورنگا” کے نام

ملتا ہے نفسیات ، میں یہ ہی
خاص کا نام ، لب پہ آ تا ہے
پیار "نورنگا” سے اسے عاصم
تذکرہ ہر گھڑی ، بتاتا ہے

عاصم بخاری میانوالی

"نورنگا "…. گاؤ ں کے نام
۔۔۔۔۔۔۔۔۔
اہالیان ِ نورنگا کے دلوں میں بھولی بسری یادوں کے تاروں کو کس خوب صورتی سے جھیڑ کر آج سے بہت سال پیچھے ماضی میں لے جاتے ہیں۔شعور کی رو کا کمال برتاؤ
ایک شعر میں

لے جاتے ہیں ماضی میں ہمیں دریا کنارے
اشعار بخاری ترے ، ” نورنگا ” کے بارے
۔۔۔۔۔۔۔۔
آخر میں ایک محاکاتی اور مجموعی تاثر قائم کرتی عاصم بخاری کی ایک خوب صورت نظم
اہالیان ِ نورنگا کے نام
۔۔۔۔۔۔۔۔

فخر ہے میرا مان ، نورنگا
میرا دل میری جان، نورنگا
۔۔۔۔۔
اہل ِدنیا کو کیسے سمجھاؤں
گاؤں کب اک جہان ، نورنگا
۔۔۔۔
ہرطرف جس کے پانی ہی پانی
دریا کے در میان ، نورنگا
۔۔۔۔۔
تیرے باسی کہاں ، کہاں پہنچے
تجھ کو دی رب نے شان نورنگا
۔۔۔
لائق ِ داد محنتی سچ تو
تیرا اک اک جوان نورنگا
۔۔۔۔۔
تیری شہرت کے چار سُو چرچے
تجھ پہ رب مہربان ، نورنگا
۔۔۔۔۔۔
تُو سبب ہے مرے تعارف کا
تُو ہی ہے میرا مان ، نورنگا
۔۔۔۔۔۔
دُھن کے عاصم بخاری پکے تھے
گو تھے کچے مکان ، نورنگا
۔۔۔۔۔
دُھن کے عاصم بخاری پکے تھے
گو تھے کچے مکان ، نورنگا
***

جاوید الحسن جاوید کی غزل اور عکسِ کشمیر

جاوید الحسن جاوید صاحب آزاد کشمیر کے شعری ادب میں اپنی منفرد پہچان رکھتے ہیں۔ان کی جنم بھومی تو پلندری ہے لیکن طویل عرصے سے مظفرآباد میں مقیم ہیں۔ انھوں نے عملی زندگی کا آزاد تو لیکچرر انگریزی کی حیثیت سے کیا لیکن جلد ہی آزاد کشمیر کی سول سروسز کے امتحان میں کام یاب ہو کر اس طرف آ گئے۔آج کل آزاد کشمیر حکومت میں سیکرٹری سیرا کی حیثیت سے خدمات سر انجام دے رہے ہیں۔ شاعری کا آغاز کالج دور سے کیا پہلا مجموعہ 2004ء میں شائع ہوا۔ جاوید الحسن جاوید کی شاعری کا چھٹا مجموعہ اسی سال 2025ء میں خواہشیں، آئینے، انگلیاں،کرچیاں کے نام سے روہی بکس فیصل آباد سے شائع ہوا۔ اس مجموعے کی اشاعت پر جاوید صاحب کو مبارک باد پیش کرتے ہیں۔ جاوید صاحب کے اس سے پہلے نعتیہ مجموعے "مہجورِ مدینہ”کا دیباچہ لکھنے کی سعادت حاصل ہوئی تھی۔ اب اس تازہ شعری مجموعے پر لکھنے کا شرف حاصل رہا۔ قارئین کے لیے وہ دیباچہ پیش کرتا ہوں جو مجموعے میں شامل ہے۔

               جاوید الحسن جاوید کے غزلوں میں کشمیر ایک اہم موضوع رہا ہے۔ ان کی شاعری میں کشمیر کے استعارے، جذباتی تعلقات اور آزادی کی آرزو کا گہرا عکس ملتا ہے۔ جاوید الحسن جاوید کی غزلیں نہ صرف کشمیر کے جغرافیائی اور ثقافتی پہلوؤں کو اجاگرکرتی ہیں بل کہ وہ کشمیر کے درد،جدوجہد اور آزادی کی خواہش کو بھی اپنی غزلوں میں دل کی گہرائیوں سے بیان کرتے ہیں۔ان کی غزلوں میں کشمیر کا دکھ اور اس کی مظلومیت کو ایک جذباتی استعارے کے طور پر پیش کیاگیا ہے۔ وہ کشمیر میں نہ صرف ایک جغرافیائی مقام کے طور پر بل کہ ایک زخم خوردہ زمین کے طور پر دیکھتے ہیں، جہاں پر خون اور غم کی لکیریں موجود ہیں۔

       ان کے اشعار میں کشمیر کے دکھوں اور وہاں کی حالتِ زار  کو جس کرب اور مہارت سے بیان کیا گیا ہے وہ جاوید الحسن جاوید ہی کا خاصہ ہے۔ جاوید الحسن جاوید کشمیر کو ایک ایسی سرزمین کے طور پر پیش کرتے ہیں جہاں خواب اور امیدیں دھندلا گئی ہیں اور حقیقت میں کم یاب ہو گئی ہیں۔ شعر دیکھیے:

آنکھیں بھی رہیں بند،رہے خاک میں سر بھی

 جلتا رہے  کشمیر  میں ایسا تو  نہیں  تھا

 آتا ہی نہیں حرفِ دعا میرے لبوں پر

 جس درجہ ہوں دل گیر، میں ایسا تو نہیں تھا 

کشمیر کے ساتھ جاوید الحسن جاوید کی محبت کا ایک خاص رشتہ ہے۔ ان کی غزلوں میں کشمیر ایک محبوب کی طرح نظر آتا ہے جس کی یادیں اور درد انسان کی روح میں گہرے ہیں۔ یہاں کشمیر کو ایک دل کی دھڑکن اور ایک جذباتی وابستگی کے طور پر دکھایا گیا ہے۔

درد اترا ہے یہاں آہ و فغاں ٹھہری ہے

 سات عشروں سے مرے گھر میں خزاں ٹھہری ہے

 کس طرح میرے مقابل پہ عدو ٹھہرے گا 

میں تو ٹھہرا ہوں وہاں،موت جہاں ٹھہری ہے 

         یہاں کشمیر کی فضاؤں میں آزادی کی کمی اور درد کی گونج کو بیان کیا گیا ہے جو غم اور درد کے استعارہ بن کر دل میں گونجتی ہے۔ یہ اشعار کشمیر کی سرزمین سے جذباتی تعلق کو ظاہر کرتے ہیں۔

        جاوید الحسن جاوید کی غزلوں میں کشمیر کی آزادی  کی خواہش ایک مستقل تھیم رہی ہے۔ وہ کشمیر کو ایک ایسی سرزمین کے طور پر دیکھتے ہیں جسے آزادی کی ضرورت ہے اور جو کئی سال سے ظلم و جبر کا شکار رہی ہے۔

        ان کے اشعار کشمیر کی آزادی کے خواب کو پیش کرتے ہیں جو ابھی تک مکمل نہیں ہو سکا لیکن ایک دن ضرور حقیقت بنے گا۔ یہ ایک امید کا استعارہ ہےجو کشمیر کی مظلومیت اور آزادی کی آرزو کی نمائندگی کرتا ہے۔

 جاوید الحسن جاوید نے کشمیر کے لوگوں کی جدوجہد کو بھی اپنی غزلوں کا حصہ بنایا  ہے۔وہ کشمیر کے عوام کے درد اور قربانیوں کو اجاگر کرتے ہیں جنھوں نے اپنے حقوق اور آزادی کے لیے قربانیاں دیں۔

          جاوید الحسن جاوید کے غزلیہ اشعار جا بہ جا کشمیر کے لوگوں کی قربانیوں اور جدوجہد کی عکاسی کرتے ہیں۔ ان کے خواب اور امیدیں کشمیر کی آزادی کے ساتھ جڑی ہوئی ہیں اور جاوید الحسن جاوید ان کی ہمت کو سراہتے ہیں۔اشعار دیکھیے:

 عجب کچھ بھی نہیں جہدِ مسلسل رنگ لے آئے 

جہاں برفاب کی سِل تھی وہیں لشکر نکل آئے 

سلام ان کی عزیمت پر،سلام ان کی شجاعت پر 

وطن کی اک صدا پر گھر سے جو باہر نکل آئے 

جاوید الحسن جاوید کی غزلوں میں کشمیر ایک استعارہ رہ بن کر سامنے آتا ہے جو نہ صرف دکھ اور درد کی علامت ہے بل کہ آزادی ،محبت اور قربانی کی خواہش کا بھی گہرا اظہار ہے۔ ان کی شاعری میں کشمیر ایک ایسا مقام بن چکا ہے جہاں انسانی جذبات، دکھ، جدوجہد اور آزادی کے خواب ایک دوسرے سے جڑ کر ایک نیا رنگ لیتے ہیں۔ جاوید الحسن جاوید کی شاعری میں کشمیر کے استعارہ مختلف حوالوں سے آیا ہے۔ان کے شاعری میں کشمیر کو دکھوں کا نشان اور آزادی کے آرزو کے طور پر پیش کیا گیا ہے۔

   جاوید الحسن جاوید  آزاد کشمیر میں تحریکِ آزادئ کشمیر  کے حوالے سے ایک معروف شاعر ہیں۔ قبل ازیں اپ کا مجموعہ "ابھی نظمیں ادھوری ہیں”  شہرت حاصل کر چکا ہے۔ تاہم زیرِ مطالعہ مجموعہ غزلیات پر مشتمل ہے لیکن ان غزلوں میں اپ کا محبوب اپ کا وطن کشمیر ہے۔ جاوید االحسن جاوید کی شاعری میں کشمیر کی فطری خوب صورتی، یہاں کے لوگوں کی تکالیف، ان کے خواب اور ان کی آزادی کی جدوجہد کی بھرپور عکاسی ملتی ہے۔ان کی شاعری میں کشمیر کی تصویر کشی ایک اہم مقام رکھتی ہے۔ کشمیر کی سرسبز وادیاں، بلند پہاڑ،نیلے آسمان،جھیلیں اور برف پوش مناظران کی شاعری میں زندہ دکھائی دیتے ہیں۔

            جاوید الحسن جاوید کشمیر کی فطری خوب صورتی کو نہ صرف الفاظ کی صورت میں پیش کرتے ہیں بل کہ اس کے ذریعے سے انسانی جذبات کی عکاسی بھی کرتے ہیں۔ وہ کشمیر کے حسن اور یہاں کے شہیدوں کوان  الفاظ میں اپنی شاعری میں سموتے ہیں:

تم نے دیکھا نہیں کشمیر کی دھرتی کو میاں 

سرخ پھولوں میں شہیدوں کو کفن بولتا ہے

 جاوید الحسن جاوید کی شاعری میں کشمیر کے لوگوں کی سیاسی اور سماجی حالت بھی اہم موضوع ہے۔کشمیر میں ہونے والے تشویش ناک حالات، کشمیری عوام کا ظلم و ستم کے خلاف احتجاج اور آزادی کی جدوجہد کی نظموں میں نمایاں طور پر دکھائی دیتی ہے۔ جاوید الحسن جاوید کی شاعری کشمیر کے عوام کے دکھوں، ان کے خوابوں اور آزادی کے لیے کی جانے والی جدوجہد کی مکمل عکاسی کرتی ہے۔

ہر روز اجڑتا ہوں کہ تقدیر یہی ہے 

سرحد پہ بسے گاؤں کی توقیر یہی ہے

 آبا  کو مبارک، مرے بچوں کو مبارک

 زنجیر یہی اور یہ کشمیر یہی ہے

 اترا ہی نہیں مجھ سے منافقت کا لبادہ

 آزادئ کشمیر میں تاخیر یہی ہے

           یہ اشعار کشمیر کی موجودہ سیاسی صورت ِحال اور عوام کی قربانیوں کو ظاہر کرتے ہیں۔ ان اشعار میں  کشمیری عوام کی تکالیف اور ان کی جدوجہد کو دکھایا گیاہے  جہاں ہر فرد آزادی کے لیے اپنی جان ہتھیلی پر رکھے ہوئے ہے۔ جہاں شاعر نے کشمیری عوام کی قربانیوں کو بیان کیا ہے وہیں کشمیر کی آزادی میں حائل سیاسی رکاوٹوں پر بھی طنز کیا ہے۔

     جاوید الحسن جاوید نے کشمیر کی عوام کی آزادی کے لیے کی جانے والی جدوجہد کوبڑے درد اور حقیقت پسندی سے پیش کیا ہے۔وہ کشمیر کے لوگوں کی ہمت، ان کے خوابوں،ان کی قربانیوں کا احترام کرتے ہیں اور ان کے لیے آواز بلند کرتے ہیں۔

   جاوید الحسن جاوید کی شاعری میں کشمیری عوام کی حالتِ زار، ان کے جذبات اور ان کی آزادی کے لیے کی جانے والی قربانیاں  ان کی نظموں کا حصہ بنتی ہیں۔ کشمیر میں خون ریزی ،جنگ اور سیاسی مشکلات نے کشمیری عوام کو بے شمار دکھوں میں مبتلا کیا ہے اور جاوید الحسن جاوید نے ان سب کو اپنی شاعری کے ذریعے سے بیان کیا ہے۔ جاوید الحسن جاوید کشمیر کے عوام کے دکھوں اور ان کے سوالات کی گہرائی کو محسوس کرتے ہیں اپنی شاعری میں اس درد کو اجاگر کرتے ہیں۔

      جاوید الحسن جاوید کی شاعری میں کشمیر کی ثقافت اور تاریخ کا  بھی گہرا اثر ہے۔ کشمیر ایک قدیم ثقافت اور تاریخ کا حامل خطہ ہے جس میں مختلف قوموں اور مذاہب کا میل جول رہا ہے۔ جاوید الحسن جاوید نے اپنی شاعری میں کشمیر کی تاریخی اہمیت اور یہاں کی ثقافت کو اجاگر کیا ہے۔ جاوید الحسن جاوید کی شاعری میں کشمیر کا عکس ایک وسیع اور گہرے دائرے میں پھیلا ہو ہے۔ ان کی شاعری میں کشمیر کی فطری خوب صورتی، عوام کا درد،آزادی کی جدوجہد  اور کشمیر کی تاریخی اور ثقافتی اہمیت کو اس طرح پیش کیا گیا ہے کہ قاری ان اشعار کے ذریعے سے کشمیر کی حقیقت کو بہ آسانی جان سکتا ہے۔ جاوید الحسن جاوید کی شاعری کشمیر کی آواز بن کر اس کے دکھوں اور خوابوں کو دنیا  کے سامنے پیش کرتی ہے۔ان کی تخلیقات  میں کشمیر کی روح اور اس کے عوام کی حالتِ زار کی سچی عکاسی موجود ہے جو نہ صرف کشمیری عوام بل کہ پورے عالم کو اس خطے کے مسائل کے بارے میں آگاہی فراہم کرتی ہے۔میں سمجھتا ہوں کشمیر جاوید الحسن جاوید کی رگوں میں لہو بن کر دوڑ رہا ہے۔ وہ اپنی شاعری(نظم وغزل )میں اس کا اظہار کرتے ہیں۔ ان کا زیرِ مطالعہ مجموعہ "خواہشیں، آئینے،انگلیاں، کرچیاں) یقیناً ان کے سابقہ مجموعوں کی طرح قارئین  میں مقبولیت حاصل کرے گا۔ دعا ہے ان کا قلم یونھی رواں دواں رہے۔

15جنوری 2025ء