Tag: اسلام

امریکہ کو اسرائیل کیوں پہلے ہے؟

امسال فروری کے آخری دن شروع ہونے والی جنگ کی امریکی ترجیحات اور اسمات سے واضح ہو گیا ہے کہ خطے میں امریکہ سب سے زیادہ کس ملک کو اہمیت دیتا ہے۔ اسرائیل پہلے بھی امریکہ کے لیئے دوچند تھا۔ 2026ء میں شروع ہونے والی اس بڑی جنگ سے واشگاف ہو گیا ہے کہ اسرائیل خطے میں دوسرا امریکہ ہے۔ اب تبصرے ہو رہے ہیں کہ امریکہ کے لیئے امریکہ کی بجائے "اسرائیل پہلے” ہے۔ آخر امریکہ خود سے بھی زیادہ فوقیت و اہمیت اسرائیل کو کیوں دیتا ہے؟ اس سوال کا جواب اسلامی دنیا کی دولت، ذرائع اور اس کے وجود سے ہے۔ اس بارے میں سابق یہودی نژاد امریکی سیکرٹری آف سٹیٹ اور وزیر خارجہ ہینری کسنجر کے ملفوظات اور سیاسی تصانیف کو ہی پڑھ لیں تو قاری کی آنکھیں کھل جاتی ہیں کہ امریکہ کے لیئے اسرائیل کیا چیز ہے۔ 

اس فیصلہ کن جنگ کے بعد اسلامی دنیا کو اب یہ نہیں سوچنا چایئے کہ امریکہ دنیا پر "شیطانی حکومت” قائم کرنا چاہتا ہے۔ دنیا کے ہر دوسرے آزاد اور خود مختار ملک کی طرح مسلم دنیا، اور خاص کر خلیجی اسلامی ممالک کو محتاط ہونے کی ضرورت ہے، اور ان کے لیئے سوچنے کا مقام ہے کہ امریکہ کی بجائے  "گریٹر اسرائیل” امریکہ کے لیئے کیوں ضروری ہے؟

یہ محض ایک سوال ہے جو پوری امہ کی آنکھیں کھولنے کے لیئے کافی ہونا چایئے کہ دنیا کی سپر پاور امریکہ ایک چھوٹے سے ملک اسرائیل کی حفاظت "مائی باپ” کی طرح کرنے پر کیوں مجبور ہے۔ سب سے پہلے کی یہ اصطلاح سب سے پہلے پاکستان کے صدر جنرل پرویز مشرف نے متعارف کروائی تھی، جب انہوں نے "سب سے پہلے پاکستان” کا نعرہ بلند کیا تھا۔ 9/11 کے زیادہ مابعد اثرات افغانستان کو بھگتنا پڑے تھے۔ پاکستان کو بھی "تورا بورا” بنانے کی دھمکیاں تو ملی تھیں لیکن پاکستان کے پاس ان دھمکیوں کا "ڈیٹیرنٹ” موجود ہے۔ اس کی طاقت کا اندازہ اس سے بھی لگایا جا سکتا ہے کہ افغانستان میں اپنے عہد کی دو بڑی طاقتیں روس اور امریکہ تو شکست کھا گئیں لیکن آج وہی افغانی بہادر جنگجو پاکستان کے سامنے ریت کی دیوار ثابت ہو رہے ہیں۔ یہ عرب ممالک کے لیئے بھی لمحہ فکریہ ہے کہ دنیا میں سلامتی اور بقا کی اصل  ضمانت سیاسی سفارت کاری اور "سٹریٹجک پاور” ہے۔ عربوں کے لیئے یہ سوچنا بنتا ہے کہ ان کے پاس دولت اور ذرائع ہیں تو وہ اسرائیل کی طرح نہیں تو کم سے کم اسرائیل جیسی اپنی طاقت و اہمیت میں اضافہ کریں۔ 

اس جنگ کے دوران ایرانی مسلح افواج کے ترجمان بریگیڈیئر جنرل ابو الفضل شکارچی نے اپنے ایک تازہ انٹرویو میں کہا ہے کہ خلیجی ممالک کی سالمیت اور خودمختاری پر ایران کبھی ضرب نہیں لگا سکتا اور ان پر ایران نے جو حملے کیئے ہیں وہ صرف امریکی اڈوں پر کیئے ہیں۔ ہمارا مقصد اپنے میزائل بھیج کر صرف امریکی اڈوں کو للکارنا تھا۔ اس کے باوجود ایران شرمندہ ہے اور معذرت خواہ ہے۔آئندہ ایران کی طرف سے ان غیر ملکی اڈوں پر بھی کوئی حملہ نہیں ہو گا۔” حالانکہ ایرانی ترجمان کے اس بیان کے بعد بھی خلیجی مسلم ممالک پر حملے ہو رہے ہیں۔ ایرانی ترجمان کے بقول تو ایران کا ٹارگٹ پورا ہو چکا ہے لیکن جنگ کا اصل کھیل ابھی باقی ہے۔ گزشتہ کئی دہائیوں میں جس قدر بے پناہ لاگت سے امریکہ نے یہ اڈے تعمیر کیئے، تباہی کے بعد امید ہے دوبارہ ان کی تعمیر کی کوشش بعید از قیاس متصور ہے۔ ایران مسلمان ملک ہے اور  خلیجی ممالک بھی مسلمان ہیں یعنی ایران خلیجی مسلمان بھائیوں پر بمباری کرتا رہا ہے۔ اس کی کیا مجبوری ہے اس کا تعلق اسرائیل اور "القدس” کے مقدس وجود سے ہے۔ بیت المقدس تمام مسلم ممالک کے لیئے برابر اہمیت رکھتا ہے جو اس وقت اسرائیل کے قبضے میں ہے۔ یہ خبریں بھی آئی ہیں کہ مسجد اقصی پر اب اسرائیلی اپنی عبادت گاہ تعمیر کرنا چاہتے ہیں۔ اب پوری امہ کو احساس ہو جانا چایئے کہ اسلام پوری امہ کی مشترکہ میراث ہے، اور یہ بھی سمجھ جانا چایئے کہ اپنا اپنا اور غیر غیر ہوتا ہے۔

اگر امریکہ اسرائیل کو اتنی اہمیت دیتا ہے تو پھر عرب بھائیوں کو بھی اپنے دوستوں کی چھانٹی پر غور کرنا چایئے۔ ایران  نے امریکی اور اسرائیلی سازش کے غبارے سے ہوا نکالتے ہوۓ یہ بھی کہہ دیا ہے کہ اس نے قبرص کے برطانوی اڈے، ترکی، آذربائجان اور سعودی عرب پر ایک بھی راکٹ نہیں داغا اور نہ کوئی ڈرون بھیجا ہے۔ یہ دراصل جارح حلیفوں کی پس پردہ کمینی جنگی حکمت عملی ہے تاکہ ان ممالک کو ایران سے الجھا کر جنگ کا دائرہ پھیلایا جاۓ۔ ایران سعودی عرب میں آئل ریفائنری پر ہونے والے حملے کی بھی تردید کی۔ اس مجوزہ حملے کے بارے یہ بھی انکشاف ہوا تھا کہ سعودی عرب پر یہ حملہ اسرائیل نے کیا تھا۔اس کا واحد مقصد عربوں کو آپس میں لڑانا اور پھر عرب و عجم کی تفریق اور نفرت کو فروغ دینا ہو سکتا ہے۔ جنگ کے آغاز سے پہلے اسرائیلی وزیر اعظم نے مسلمان ملکوں میں مسلکی اور فرقہ وارانہ فسادات پھیلانے کے منصوبے کا بھی اعلان کیا تھا۔ اس کے بعد برطانیہ نے بھی تصدیق کی کہ واقعی ہمیں اس ضمن میں ایرانی مداخلت کے کوئی شواہد نہیں ملے۔ سعودی عرب نے بھی اس توجیہہ کو تسلیم کیا ہے اور اپنے ہاں سے گرفتار موساد کے بعض ایجنٹوں کی تادیب کی اور اس دوران حقائق تک رسائی حاصل کر لی۔ ترکی اور آذربائیجان کا سٹانس بھی کچھ اسی قسم کا تھا۔ پہلے برطانوی سامراج "ڈیوائڈ اینڈ رول” (تقسیم کرو، لڑاو اور حکومت کرو) پر کاربند رہا۔ اب یہی حربہ اسرائیل کے ساتھ مل کر امریکہ استعمال کر رہا ہے۔ شمالی عراق کے نیم خودمختار کردستان ریجن میں بھی امریکہ یہی چال چلنے کی کوشش کر رہا ہے جہاں کی قیادت نے امریکہ و اسرائیل کی طرف سے شہہ دلانے پر دو ٹوک جواب دیا کہ ہم اس سے قبل بہت سی غلطیاں کر کے منہ کی کھا چکے ہیں اور آئندہ ہمیں مزید کوئی شوق نہیں ہے۔ امریکہ نے کبھی وفا نہیں کی۔ ہم ایران کے خلاف کسی قسم کی مدبھیڑ کے سخت خلاف ہیں۔ ہم بیٹھے بٹھائے خوامخواہ اڑتا تیر نہیں پکڑنا چاہتے ہیں، بلکہ ہم کردستانی علاقے سے کسی بھی غیر ملکی مداخلت کے خلاف شدید مزاحمت کریں گے۔ 

خلیجی ممالک نے حالیہ تلخ تجربے کے بعد امریکہ سے اپنے دفاعی اور کاروباری معاہدوں کی منسوخی کے بارے غور کرنا شروع کر دیا ہو گا بلکہ متحدہ امارات کے وزیر دفاع تو باقاعدہ اٹلی کے دورے پر گئے تاکہ ان سے ایئر ڈیفنس سسٹم کی خریداری کی جا سکے۔ عین ممکن ہے سعودی عرب اور متحدہ عرب امارات کے اختلافات بھی ختم ہونے کا امکان پیدا ہو جائے یا امارات بھی سعودی عرب کی طرح پاکستان کے ساتھ کوئی دفاعی معاہدہ کر لے۔ روس یوکرائن کی جنگ میں یورپی دفاعی نظام بری طرح ناکام رہا۔ پاکستان متحدہ عرب امارات کے لیئے بہتر ترجیح ثابت ہو سکتا ہے۔ امارات کے لیئے اٹلی کی بجائے چائنہ بھی ایک بہتر آپشن ہے، کیونکہ چینی جدید اسلحہ اور دفاعی نظام امریکی ٹکر کا ہے۔ اس کا واضح ثبوت پاک بھارت جنگ کے دوران دنیا بخوبی دیکھ چکی ہے۔ فرانسیسی رافیل کمپنی تو اب اپنے گاہکوں کو بھی یہی مشورہ دیتی نظر آ رہی ہے کہ جاو’ اور چین یاترا کرو۔

آبناۓ ہرمز کی بندش کے  بارے مستند خبر یہ ہے کہ صرف امریکی یا حلیف قوتوں کے لہے پابندی ہے باقی کسی بھی خیرخواہ ملک کے لیے کوئی خطرہ نہیں ہے۔ البتہ وہاں دونوں اطراف بحری ٹریفک جیم ہونے کے باعث راستہ نہیں نکل رہا ہے۔ کچھ دن لگیں گے معاملہ سلجھ جاۓ گا، لیکن اس ساری جنگ کے مابعد اثرات اور نتائج کا تعلق جنگ کے بعد عرب ممالک کی دفاعی ترجیحات پر ہے۔ جس طرح اپنے سامراجی و سیاسی مفادات کی خاطر اسرائیل کی اہمیت امریکہ کو عزیز ہے، اتنی اہمیت عرب ممالک کو اپنی سلامتی اور بقا کو بھی دینا ہو گی۔ گریٹر اسرائیل کا دوسرا مقصد اس منصوبے کے سوا کچھ نہیں ہے کہ امریکہ ایران کے پٹرول اور زرائع پر خود یا اسرائیل امریکہ نواز حکومت کو بٹھانا چاہتا ہے۔ یہ جنگ جیتنے اور ایران میں رجیم چینج کے لیئے امریکہ کچھ بھی کر سکتا ہے، چاہے اسے مذہب اور صلیب کا سہارا ہی کیوں نہ لینا پڑے۔

سندھ یونیورسٹی کا رنگیلا وائس چانسلر

ان کی جرات رندانہ پر میں انہیں داد دیئے بغیر نہیں رہ سکا ہوں۔ اسے قومی یکجہتی کا شاندار نمونہ قرار دیا جانا چایئے۔ میں سمجھتا ہوں کہ سندھ اسمبلی میں اقلیتی برادری کے ارکان نے جو مطالبہ کیا اور اس سے پہلے قومی اسمبلی میں بھی یہی مطالبہ ہوا تھا جہاں ایک ہندو رکن قومی اسمبلی نے شراب پر ایسی ہی پابندی کی بات کی تھی لیکن مسلمان اراکین اسمبلی کی اکثریت نے اس پابندی کی مخالفت کر دی تھی۔ یہ معاملہ یکے از دیگرے سپریم کورٹ میں بھی گیا تھا اور وہاں بھی معزز ججز صاحبان نے اسے قرار واقعی دعوی مسلمانی کے خلاف سمجھتے ہوئے شراب پر پابندی کی مخالفت کر دی تھی لیکن اب جو کام سندھ یونیورسٹی کے وائس چانسلر نے کیا ہے اس کا اتنا تو چرچا ہوا ہے کہ اس میں ہم فاقہ کش بھی خراج تحسین پیش کرنے کا کچھ حصہ ڈال لیتے ہیں تاکہ وائس چانسلر صاحب کی جرات رندانہ کو کچھ مزید رنگ چڑھ جائے۔

واقعہ یوں ہوا کہ جونہی غیر مسلم اقلیتی ارکان شراب پر پابندی کے لیئے کھڑے ہوئے مسلمان اراکین اسمبلی شراب پر پابندی نہ لگانے کے لیئے متحرک ہو گئے۔ شائد مسلمان اراکین کے خیال میں شراب پر پابندی اس اقلیتی طبقہ پر زیادتی ہے جن کے پاس شراب خریدنے اور شراب پینے کے "پرمٹس” ہیں حالانکہ مسلم معزز ممبران کو پتہ ہونا چایئے کہ ان پرمٹوں پر زیادہ شراب تو مسلمان ہی خریدتے ہیں بلکہ کچھ سچے مسلمانوں نے تو یہ پرمٹس اپنے نام پر بھی بنوا رکھے ہوں گے۔ ان پرمٹوں پر وہ شراب خرید کر پیتے ہوں گے یا پھر خرید کر اسے آگے بیچتے ہوں گے۔ لیکن شراب پر پابندی نہ لگائے کا صحیح چرچا اور حق صرف یونیورسٹی آف سندھ کے پرو وائس چانسلر نے ادا کیا جب وہ شراب کے نشے میں دھت ہو کر اگلے روز یونیورسٹی میں تشریف لے آئے۔ پہلے تو موصوف لڑکھڑاتی انگریزی میں اپنے سٹاف کو دھمکاتے رہے، اور جب انہیں معلوم ہوا کہ سٹاف اب قابو آ گیا ہے تو پھر انہوں نے یونیورسٹی کے طلباء کے ساتھ ڈانس کرنا شروع کر دیا لیکن اچھا ہوا کہ جونہی اس وائس چانسلر کی یہ ویڈیو سوشل میڈیا پر وائرل ہوئی تو انہیں فوری طور پر معطل کر دیا گیا۔

یہ ویڈیو دیکھنے کے بعد پاکستانیوں کی اکثریت کو معلوم ہوا کہ یونیورسٹی میں وائس چانسلر (وی سی) بھی اسی کو لگایا جاتا ہے جو داد و عیش کا عادی ہو۔ شائد شرابی ہونا وی سی لگنے کی بنیادی شرط بھی نہ بن جائے کہ اگر  ہمارے بچوں کا مستقبل ان شرابیوں کے ہاتھوں  میں ہو گا تبھی جا کر اس نوع کے ممبران تیار ہوں گے جو ایسے قوانین کی مخالفت میں پہل کریں گے، جو اسلام کے منافی ہوں اور ان میں اتنی دیدہ دلیری ہو کہ غیر مسلم تو ان کی مخالفت کریں مگر مسلمان ممبران کو ان کی مخالفت کرتے ہوئے کوئی شرم محسوس نہ ہو۔

شائد سندھ میں حکومت بھی انہی ممبران کی ہے جو ایم پی اے ہوں یا ایم این اے ہوں وہ شراب پینے کے رسیا نہیں بھی ہیں تو وہ اس پر پابندی نہیں لگانا چاہتے ہیں۔ کیا سندھ اسمبلی میں پڑھے لکھے لوگوں کے لیئے کوئی جگہ نہیں ہے یا وہ سارے اسی یونیورسٹی سے پڑھ کر آئے ہیں جس کا وائس چانسلر شراب پیتا ہے اور پھر نشے ہی کی حالت میں یونیورسٹی بھی پہنچ جاتا ہے۔ یہ ہے آکسفورڈ کی تعلیم جو ہمارے ملک پر قابض ہے۔ جب ملک چلانے والے ہی شراب پر پابندی کی مخالفت کرتے ہیں تو ایک یونیورسٹی کا چانسلر پی کر یونیورسٹی آ گیا تو کیا ہوا۔ وطن عزیز ایسا تالاب بنتا جا رہا ہے جس میں سارے ننگے ہیں۔ دیکھنا اس وائس چانسلر کے خلاف کوئی بڑی کارروائی ہو گی اور نہ ہی اسے کوئی بڑی سزا ہی دی جائے گی کہ بس وہ تھوڑی سی پی کر ہی تو یونیورسٹی آیا تھا، اس نے کوئی ڈاکہ ڈالا تھا اور نہ ہی اس نے کوئی چوری کی تھی۔

آج پاکستان کی جو حالت ہے اب سمجھ آتی ہے کہ اس کی جڑیں ہمارا نظام تعلیم ہی کھوکھلی کر رہا ہے۔ ایک دن سندھ  اسمبلی میں اقلیتی ارکان   نے شراب پر پابندی کی پٹیشن جمع کروائی اور جونہی اسے مسلمان اسمبلی ممبران اور سید آل رسول کہلوانے والے وزیراعلی نے ریجیکٹ کر دیا تاکہ ایسے لوگوں کو سہولت ملے، اس کے اگلے روز ہی موصوف وائس چانسلر یونیورسٹی میں شراب پر کر آ گیا۔ یہ ہوتا ہے علم اور اسے کہتے ہیں تعلیم، جو ہماری یونیورسٹی میں طلباء کو دی جاتی ہے اور اس کا عملی مظاہرہ خود یونیورسٹی کا وائس چانسلر شراب پی کر کرتا ہے۔ اسی لیئے صدر مملکت آصف علی زرداری صاحب نے اپنی اولاد میں سے کسی کو اس یونیورسٹی میں تعلیم نہیں دلوائی۔ جس ملک میں شراب کی بوتل شہد بن جائے اس ملک کی کسی یونیورسٹی کا وائس چانسلر شراب پی کر یونیورسٹی میں آ جائے تو یہ کوئی بڑے اچھنبے کی بات نہیں ہے کہ، "بن کے ایک حادثہ بازار میں آ جائے گا،جو نہیں ہو گا وہ اخبار  میں آ جائے گا۔ چور اچکوں کی کرو قدر کہ معلوم نہیں کون کب کون سی سرکار  میں آ جائے گا۔” یہی وجہ ہے کہ سندھ کی حکومت شراب پر پابندی والے بل مسترد کر دیتی ہے۔

اس پر ایم کیو ایم کے اقلیتی رکن انیل کمار نے صحافیوں سے بات چیت کرتے ہوئے بتایا کہ اقلیت کے نام پر سندھ میں شراب کے اسٹور کھلے ہیں، شراب ایک معاشرتی برائی ہے، تمام مذاہب میں اسکی ممانعت ہے۔ انھوں نے کہا کہ کراچی میں شراب کی خریدو فروخت کا تمام کاروبار غیر قانونی ہے، شراب کی فروخت کے نام پر اقلیتوں کو بدنام کیا جا رہا ہے، عوام کیلئے میں یہ بھی بتانا چاہتا ہوں کہ کراچی میں چھوٹے بڑے 57 مندر ہیں لیکن کراچی میں شراب کے 80 اسٹور ہیں، یہ وائن اسٹور صرف مذہبی تہوار پر شراب فروخت کر سکتے ہیں لیکن ان پر خریدو فروخت 365 روز جاری رہتی ہے۔ شائد وائس چانسلر صاحب انہی سٹورز سے شراب خریدتے ہوں۔ آپ کے معیار تعلیم اور کردار کی عظمت کو سلام محترم وائس چانسلر صاحب! آپ کو رنگیلا وائس چانسلر نہ کہوں تو کیا کہوں، آپ اسم بامسمی ہیں جناب!!

صد افسوس کی بات ہے کہ جو پابندی ہمیں لگانی چایئے تھی اُس کا مطالبہ ہمارے اقلیتی اقلیتی بھائیوں نے کیا اور اس پر اپنا منہ کالا اس وائس چانسلر نے کیا۔ اس نے کس ڈھٹائی سے یہ کارنامہ انجام دیا کہ استادوں کا استاد ہونے کے باوجود وہ یونیورسٹی میں نشے کی حالت میں نمودار ہوا اور پھر ناچ ناچ کر پوری دنیا میں پاکستان کی جگ ہنسائی کروائی۔ حکومت سندھ نے سوشل میڈیا پر مبینہ متنازع ویڈیو سامنے آنے کے بعد سندھ یونیورسٹی کے دادو کیمپس میں تعینات جس پرو وائس چانسلر کو معطل کیا ان کا نام نامی "اظہر شاہ” ہے، جبکہ ان کا موقف ہے کہ یہ ویڈیو اے آئی سے تیار کی گئی تھی۔ ان کو نشے کی حالت میں بنفس نفیس دیکھنے والے طلباء حیران ہیں، خاموش ہیں اور لب بستہ ہیں!

ریاست کا مشترکہ اسلامی بیانیہ کہاں ہے؟

کالم نگار انصار عباسی نے اپنے ایک مضمون مطبوعہ 09 فروری 2026ء میں پاکستان کے ایک بنیادی اور اہم ترین مذہبی مسئلے کی طرف توجہ دلائی۔ ان کے اظہاریہ کا عنوان "اسلام کو آؤٹ سورس کرنے کی غلطی”، تھا، جس میں انہوں نے اس حقیقت سے پردہ اٹھانے کی کوشش کی کہ اس وقت ریاست کا اپنا کوئی واضح اور شفاف مذہبی  بیانیہ نہیں ہے۔ اس میں کوئی شک نہیں ہے کہ قیام پاکستان سے آج تک کسی بھی حکومت کی توجہ اس سنگین مسئلے کی طرف نہیں گئی ہے۔ کاش کہ ریاست کبھی یہ جاننے کی کوشش کرتی کہ پاکستان میں دین اسلام کا کونسا سرکاری فقہ یا مسلک رائج ہے؟ آج تک کسی بھی حکومت نے کبھی مشترکہ سرکاری مذہبی بیانیہ کا اعلان نہیں کیا ہے، جس کا نتیجہ یہ نکلا ہے کہ اب تک دین اسلام کی تشریح و تعبیر پر مختلف مسالک اور فرقہ جات ہی کا قبضہ رہا ہے، جو دین اسلام کی تشریح و تعبیر اپنے ہی مذہبی عقائد اور مفادات کے تحت کرتے چلے آ رہے ہیں!

پاکستان بیورو آف شماریات کی 2023ء کی جاری کردہ رپورٹ کے مطابق پاکستان میں 6 لاکھ 403 مساجد اور 36 ہزار 331 دینی مدرسے ہیں۔ سینٹ کے 2024ء کے ایک اجلاس میں پیش کی گئی دستاویزات کے مطابق پاکستان میں رجسٹرڈ مدارس کی تعداد 17ہزار 738 ہے جس میں رجسٹرڈ طلبا کی تعداد 22 لاکھ 49 ہزار 520 ہے۔ پنجاب میں  10ہزار 12رجسٹرڈ مدارس اور طلبا کی تعداد 6لاکھ 64ہزار 65 ہے۔ سندھ میں رجسٹرڈ مدارس 2416 ہیں اور طلبا کی تعداد 1لاکھ 88ہزار 182 ہے۔بلوچستان میں رجسٹرڈ مدارس کی تعداد 575 اور طلبا کی تعداد 71ہزار 815 ہے۔ کے پی کے میں رجسٹرڈ مدارس کی تعداد 4ہزار 5 اور طلبا کی کل تعداد 12لاکھ 83ہزار 24 ہے۔ آزاد کشمیر میں رجسٹرڈ مدارس کی تعداد 445 اور طلبا کی تعداد 26ہزار 787 ہے۔ وفاقی دارالحکومت اسلام آباد میں رجسٹرڈ مدارس کی تعداد 199اور طلبا کی تعداد 11ہزار 301 ہے۔

گلگت بلتستان میں رجسٹرڈ مدارس کی تعداد 86 اور طلبا کی تعداد 4ہزار 346 ہے۔ ان تمام دینی مدارس اور مساجد میں ہر جگہ اپنے اپنے فقے، مسلک اور فرقے کی تبلیغ اور ترویج کی جاتی ہے، جبکہ پاکستان بھر کے تعلیمی اداروں اور تقریبا ہر مسلمان گھر میں اپنے الگ شیعہ، سنی، دیوبندی، وہابی، اہل حدیث، منکرین حدیث، حنفی وغیرہ (اور ناجانے کیا کیا) مسلک، فقہ اور فرقہ جات وغیرہ کے مطابق اسلام پر قائم رہنے اور عبادات کرنے کا درس دیا جاتا ہے، حالانکہ یہ پرائیویٹ اور منقسم قسم کا مذہبی بیانیہ دین اسلام کی حقیقی روح کے بلکل منافی ہے کیونکہ قرآن پاک کی سورة آل عمران  کی آیت نمبر 103 میں واشگاف الفاظ میں ارشاد ربانی ہے کہ، "تم سب (مسلمان) مل کر اللہ کی رسی کو مضبوطی سے تھامے رکھو اور تفرقوں (یعنی فرقوں اور مسالک وغیرہ) میں مت پڑو۔” جس کا مطلب و مفہوم یہ ہے کہ جدا جدا نہ ہو جاؤ جیسا کہ آج پورا پاکستان "دین اسلام” کی بجائے "زہر آلود مذہبیت” میں ڈوبا ہوا ہے۔ دین اسلام کی بھائی چارے، اتحاد اور اجتماعی فکر سے اس انحراف اور فرقہ واریت ہی کی وجہ سے پاکستان میں تسلسل کے ساتھ مذہبی منافرت پھیلی ہے جس کے نتیجے میں "خودکش” بم دھماکوں نے جنم لیا جس میں اسلام آباد کے علاقے ترلائی میں واقع امام بارگاہ و مسجد خدیجۃ الکبریٰ میں 07فروری کو نماز جمعہ کے دوران ہونے والا افسوسناک خودکش بم دھماکہ بھی شامل ہے کہ جس میں 32 افراد جاں بحق اور 150 سے زیادہ افراد زخمی ہوئے۔ 

اس سے قبل مذہبی جنونیت پر مبنی پاکستان میں صرف چند خودکش حملوں کا جائزہ لیں جن سے پورا ملک وقفے وقفے سے افسوس اور غم میں ڈوبتا رہا تو پتہ چلتا ہے کہ کس بے دردی سے مزہب کے نام پر ملک کو خون میں نہلایا جاتا رہا ہے۔ 4جولائی 2003ء کو کوئٹہ میں ایک امام بارگاہ میں دھماکہ ہوا جس میں 54افراد شہید ہوئے تھے۔ اس حملے میں خودکش حملہ آوروں کی تعداد 3 تھی۔ موجودہ حملہ میں خودکش حملہ آور دو تھے۔ 29فروری 2004ء کو راولپنڈی کے سیٹلائٹ ٹاؤن میں واقع ایک امام بارگاہ میں خودکش حملہ ہوا تھا جس میں خوش قسمتی سے کوئی جانی نقصان نہیں ہوا تھا البتہ 3افراد زخمی ضرور ہوئے تھے۔ مئی 2004ء میں کراچی میں دہشت گردی کے اعتبار سے افسوسناک تھا جب 7مئی 2004ء کو ایک بار پھر امام بارگاہ حیدری اور 31 مئی 2004  کو امام بارگاہ علی رضا میں ظہر اور مغرب کی نمازوں کے دوران بم دھماکے ہوئے، یہ دونوں حملے بھی خودکش تھے۔ امام بارگاہ حیدری کے واقعے میں 24افراد شہید اور 100زخمی ہوئے تھے جبکہ امام بارگاہ علی رضا میں خودکش حملے میں 23افراد شہید اور 40زخمی ہوئے تھے۔ یکم اکتوبر 2004ء کو سیالکوٹ کی امام بارگاہ میں بھی خودکش حملہ ہوا تھا جس میں 25افراد ہلاک اور 50زخمی ہوئے تھے۔ جبکہ 27مئی 2005ء کو اسلام آباد میں بری امام کے مزار میں مجلس عزا کے دوران بم دھماکے میں 28افراد ہلاک اور 67زخمی ہوئے تھے۔ 30مئی 2005 کو کراچی میں امام بارگاہ مدینتہ العلم پر خودکش حملے کی کوشش کی گئی تھی جس میں پولیس اہلکار کی جانب سے حملہ آور کو امام بارگاہ کے باہر ہی روک دینے پر زیادہ جانی نقصان نہیں ہوا تھا لیکن  اس حملے میں پھر بھی 3افراد شہید اور 23زخمی ہوئے تھے۔ ہنگو میں 9فروری 2006ء کو 10محرم کے جلوس میں خودکش حملہ ہوا جس میں 40افراد شہید اور 26زخمی ہوئے تھے، 

اور اس کے بعد آج تک جتنے بھی خودکش حملے ہوئے ہیں ان میں زیادہ تر امام بارگاہوں کو نشانہ بنایا گیا ہے جس سے ظاہر ہوتا ہے کہ ملک و مذہب دشمن عناصر پاکستان میں فرقہ واریت پھیلا کر خانہ جنگی کا ماحول پیدا کرنا چاہتے ہیں۔ آخر یہ کب تک ایسا ہوتا رہے گا؟ یہ واضح طور پر  دہشتگردی ہے جس کا دین اسلام سے ہرگز کوئی تعلق نہیں ہے لیکن حیرت انگیز طور پر وطن عزیز کے مسالک نے مل کر ان انسانیت کش واقعات کی کبھی کھل کر مذمت کی ہے اور نہ ہی اس کے خلاف کبھی کوئی مشترکہ فتوی جاری کیا ہے۔ یہ محض ایک اور سانحہ ہی نہیں بلکہ واقعی ایک گہرا سوالیہ نشان بھی ہے۔ بقول انصار عباسی، "یہ سوال صرف سیکورٹی کی ناکامی کا نہیں بلکہ ریاستی سمت، فکری الجھن اور تاریخی غلطیوں کا ہے۔” اس مذہبی دہشت گردی کے ناسور کی وجہ سے لگ بھگ ایک لاکھ قیمتی جانیں ضائع ہوئی ہیں اور ہزاروں کی تعداد میں زخمی ہوئے ہیں۔

پاکستان کا سرکاری اور قومی نام "اسلامی جمہوریہ پاکستان” ہے جو "پاکستان کا مطلب کیا لاالہ الا اللہ” کی اساس پر قائم ہوا۔ پاکستان کے آئین 1973ء میں بھی اسلام کو پاکستان کا سرکاری مذہب لکھا گیا ہے اور بانی پاکستان قائد اعظم محمد علی جناح کے فرمودات میں بھی پاکستان میں مسالک اور فرقہ پرستی کی ممانعت کی گئی ہے۔ قائدِاعظم فرقہ واریت، صوبائیت اور لسانی تعصب کے سخت مخالف تھے اور پاکستان کو ایک متحدہ قوم دیکھنا چاہتے تھے۔ انہوں نے 11 اگست 1947ء کی تاریخی تقریر میں واضح طور پر کہا تھا کہ پاکستان میں تمام شہری، چاہے ان کا تعلق کسی بھی مذہب، فرقے یا عقیدے سے ہو، ریاست کے سامنے برابر ہیں اور انہیں مکمل مذہبی آزادی حاصل ہو گی۔ ان کا ماننا تھا کہ فرقہ واریت ملک کی بنیادوں کو کمزور کرتی ہے۔

ملکی تاریخ میں پہلی مرتبہ عمران خان کے دور حکومت میں 2021ء میں کے پی کے میں امام مسجد کی تنخواہوں کا آغاز کیا گیا۔ پنجاب کی وزیراعلی مریم نواز نے بھی کچھ عرصہ پہلے پنجاب کی 65 ہزار مساجد کے اماموں کے لئے وظیفہ مقرر کرنے کا اعلان کا تھا اور سکیورٹی کے فول پروف انتظامات کو بھی یقینی بنانے کی ہدایت کی تھی۔ حکومت پنجاب نے آئمہ کرام کی ضروریات پوری کرنے کے لہے بھی باقاعدہ مالی مدد فراہم کرنے کی یقین دہانی کرائی تھی۔ اس دوران سرکاری خطبہ جاری کرنے کو بھی زیر غور لایا گیا تھا لیکن ابھی تک اس معاملے میں کوئی مفصل پیش رفت نہیں ہوئی ہے۔ اس نوع کا سرکاری مذہبی  بیانیہ تمام عرب ممالک میں رائج ہے جہاں فرقہ واریت نام کا کوئی ناسور پایا جاتا ہے اور نہ ہی پاکستان کی طرح مذہب کے نام پر کبھی خود کش بم دھماکوں جیسا کوئی واقعہ پیش آیا ہے۔ 

ممکن ہے کہ اس نوع کے دہشت گردی کے خودکش حملوں کے پیچھے امریکی مفادات کیلئے پاکستان کی طرف سے لڑی جانے والی جنگیں، افغانستان اور بھارت کی سازشیں وغیرہ کے عوامل شامل ہوں لیکن اس کی تلخ اور اصل حقیقت یہ ہے کہ ہم عقیدے کی بنیاد پر بطور مسلمان متحد امہ نہیں بن سکے ہیں۔ ریاست دہشت گردی کے مقابلےکے لیئے بارہا عسکری اقدامات اٹھا چکی ہے، آپریشنز ہوئے، دہشت گرد مارے گئے اور نیٹ ورکس توڑے گئے لیکن نتیجہ یہ نکلا ہے کہ گزشتہ کئی دہائیوں سے جاری یہ دہشت گردی آج بھی جوں کی توں قائم ہے۔ قرآن پاک ایک معصوم جان کے قتل کو پوری انسانیت کا قتل قرار دیتا ہے تو پھر ایک خودکش مذہبی بمبار بھلا جنت میں کیوں کر جا سکتا ہے۔ یہ صرف مذہبی انتہاء پسندی ہے جو دہشت گردوں کی "برین واشنگ” کر کے انہیں یہ اقدامات اٹھانے پر قائل کر لیتی ہے۔ دہشتگردی کا یہ ملک گیر سنگین مسئلہ صرف بندوق سے حل نہیں ہو گا۔ جتنے مرضی نیشنل ایکشن پلان بنا لیں جب تک دین اسلام کے عقائد اور تعلیمات کے مطابق تمام مسالک کو حکومت کے ایک "مشترکہ اسلامی بیانیہ” پر اکٹھا نہیں کیا جاتا ہے، یہ مسئلہ حل نہیں ہو گا۔

میرا بھی یہی خیال ہے کہ معاشرے میں مزہب کے نام پر پھیلے ان فرقوں کو اسلام کی من مرضی کی غیر منطقی اور غیر سائنسی تعبیر پیش کرنے کی اجازت دینا اسلام کو ریاستی سطح پر واقعی "آوٹ سورس” کرنے کے مترادف ہے۔ دین اسلام کو فرقہ پرستوں کے حوالے کرنا اسلام کی روح کو مسخ کرنے جیسا عمل ہے۔ اگر پاکستان اسلام کے نام پر بنا ہے اور آئین پاکستان بھی واضح طور پر کہتا ہے کہ پاکستان اسلامی جمہوریہ ہے، جس کو قرآن و سنت کے مطابق چلایا جانا چاہیئے تو پھر عملی طور پر ریاست نے ہمیشہ سے دین اسلام سے یہ دوری کیوں قائم کر رکھی ہے؟ اس خلا کی وجہ سے پاکستان میں نہ صرف خودکش دہشت گردی نے جنم لیا ہے بلکہ اس سے پاکستان کو لبرل اور سیکولر بنانے پر بھی زور دیا جاتا رہا ہے یعنی لبرل بننے کے چکر میں اسلام ہی کو آؤٹ سورس کر دیا گیا ہے۔ یوں دین کی تشریح، تعلیم اور تبلیغ مکمل طور پر انہی گروہوں، فرقوں اور مفاد پرست عناصر کے ہاتھوں میں ہے۔ اسی آوٹ سورسنگ کا نتیجہ یہ نکلا ہے کہ دین اسلام کو ایک تو دنیا سے نکال کر آخرت تک محدود کیا گیا ہے دوسرا اس میں دہشت گردی جیسی لعنت کو بھی شامل کر دیا گیا ہے۔ آج اسلام کے نام پر مسلمان مسلمان کا دشمن ہے۔ ہر فرقہ دوسرے سے الگ تھلگ ایک اپنا ہی اسلام پیش کرتا ہے، ہر مذہبی گروہ نے اپنے نظریئے کو حق اور باقی سب کو باطل قرار دے رکھا ہے۔ حتی کہ ایک ہی شہر اور گاؤں میں ہر فرقے کی الگ مسجد ہے، یہ فلاں کی مسجد ہے اور وہ فلاں کی ہے، اور بعض فرقے تو اس قدر نفرت سے بھرے ہوئے ہیں کہ دوسرے کی مسجد میں داخل ہونے والے کو دائرہ اسلام ہی سے خارج قرار دینے سے باز نہیں آتے ہیں۔ پاکستان میں کافر کافر کے یہ فتوے کب تک دیئے جاتے رہیں گے؟ یہ صورتحال نہ صرف مذہبی انتشار اور نفرت کو جنم دیتی ہے بلکہ خودکش دہشت گردی جیسی انتہاپسندی کے لیئے بھی زمین ہموار کرتی ہے۔ 

اگر ریاست کا اپنا کوئی اسلامی بیانیہ نہیں ہے تو پھر یہ دینی مدارس اور ان کے طلباء ہی وہ کھیپ ہیں جو اس خلا کو یونہی پر کرتے رہیں گے۔ دین اسلام کو اس طرح چوں چوں کا مربہ نہیں بنایا جانا چایئے۔ حکومت اپنے اسلامی بیانیہ کی کوئی رٹ قائم نہیں کرتی تو یہ دہشت گردی پہلے ختم ہوئی اور نہ کبھی آئیندہ ختم ہو گی۔ ہمارے پیارے ملک میں مدت سے جاری دہشت گردی کی فکری جڑیں اسی خلا میں پنپ رہی ہیں جسے ان غیر اسلامی فرقوں کی بجائے حکومت کو پر کرنا چایئے۔ نوجوان نسل کی ذہنی زمین میں ماحول جو بیج بوئے گا وہی پھلے پھولے گا۔ اگر ان کو یہ معلوم ہی نہ ہو کہ ریاست کا متفقہ، مستند اور ذمہ دار اسلامی بیانیہ کیا ہے، تو وہ آسانی سے کسی بھی شدت پسند نعرے کے ہتھے چڑھ سکتی ہے۔ انصار عباسی صاحب لکھتے ہیں، "یہ صرف مدرسوں کا مسئلہ نہیں، یہ پورے معاشرتی بیانیے کا مسئلہ ہے۔” ریاست کو اپنا اسلامی  بیانیہ قائم کرنے کا فریضہ فوری طور پر انجام دینا چایئے۔ "دیر آید درست آید” ریاست کو پاکستان کے قیام اور آئین پاکستان کا لحاظ رکھتے ہوئے یہ کام کرنے میں دیر نہیں کرنی چایئے۔ ریاست کا خود کو دینی تعلیم، خطباتِ جمعہ، مدارس، مساجد اور گھروں میں قائم مذہبی نظام سے یوں علیحدہ رکھنے کا چلن درست نہیں ہے، اسے اپنی سوچ کو بدلنا ہو گا ورنہ معصوم جانوں کا خون یونہی بہتا رہے گا۔

سورہ مائدہ ⁦‪5:32‬⁩ میں ارشاد باری تعالی ہے کہ  ‏“جس نے ایک انسان کو ناحق قتل کیا گویا اس نے پوری انسانیت کو قتل کیا۔” ‏نبی مکرم ﷺ نے فرمایا: ‏“مسلمان کا خون، مال اور عزت ایک دوسرے پر حرام ہیں”

‏(صحیح مسلم)۔ ‏“دنیا کی تباہی اللہ کے نزدیک اس سے ہلکی ہے کہ کسی مسلمان کا خون ناحق بہایا جائے” ‏(سنن نسائی)۔

_{Title Image by Ahmed Sabry from Pixabay}

اسلامی تعلیمات اور جدید دور کے تقاضے

اسلام واقعی ایک آفاقی نظام عمل ہے تو اس کے عقائد اور تعلیمات کو ہر عہد کے تقاضوں اور ضروریات پر پورا اترنا چاہئیے۔ اسلام کے مطابق کامیاب زندگی گزارنے کے لیئے قرآن پاک دین اسلام اور اہل ایمان کا پہلا الہامی زریعہ ہے جس کی آیات مبارکہ اس مجوزہ معیار پر مکمل طور پر پورا اترتی ہیں جبکہ اسلامی تعلیمات کا دوسرا بڑا منبع احادیث نبوی ﷺ ہیں جو کئی ہزار کی تعداد میں ہو سکتی ہیں لیکن احادیث کی کل تعداد کا صحیح اندازہ کرنا مشکل ہے کیونکہ ان میں محدثین کے مختلف اقوال بھی شامل ہیں۔ محدثین کی اصطلاح میں صرف آپ ﷺ کے ارشادات کو حدیث نہیں کہا جاتا، بلکہ آپ ﷺ کے افعال، اخلاق، احوال اور آپ کی موجودگی میں لوگوں کے کئے ہوئے وہ کام جن پر آپ نے گرفت نہیں فرمائی، اور اس کے ساتھ صحابہ کے اقوال، ان کے مفتیوں کے فتاویٰ، زمانۂ خلافت میں ان کی عدالتوں کے فیصلے، بلکہ تابعین کے فتاویٰ اور جج ہونے کی حیثیت میں ان کے فیصلے، اور قرآنی آیات پر تشریحی نوٹس بھی احادیث میں شمار کئے گئے ہیں۔

اس کے باوجود کہ احادیث کی کل تعداد متعین نہیں ہے تاہم، احادیث کی مشہور کتب میں صحیح بخاری (بشمول تکرار) 9086 اور صحیح مسلم میں 7275 احادیث شامل ہیں۔ غیر مکرر احادیث کی تعداد بخاری میں 2,600 اور مسلم میں تقریباً 4,000 ہے۔ جبکہ قرآن مجید میں کل سورتوں اور آیات کی تعداد مخصوص ہے جس میں 114 سورتیں ہیں جن میں 86 مکی اور 28 مدنی سورتیں سرفہرست ہیں جبکہ  قرآن مجید میں کل آیات کی مشہور تعداد 6666 ہے، جبکہ محققین اور ماہرینِ قرآنیات کے مطابق صحیح تعداد 6236 ہے۔ یہ اختلاف آیات کو الگ الگ یا ملا کر گننے کی وجہ سے ہے، تاہم قرآنی متن اور پیغام میں کوئی تبدیلی نہیں ہے۔ چونکہ قرآن فرقان آخری نبی محمد الرسول اللہ ﷺ پر اترا اور نبی مکرم ﷺ کے بعد نبوت کے دروازے بند ہو گئے ہیں تو اب یہ اسلامی علمائے عظام، مفسرین، فقہاء، محدثین و مفکرین اور خاص طور پر مجددین کی ذمہ داری ہے کہ وہ اللہ ﷻ اور رسول اللہ ﷺ کی تعلیمات کی تشریح و تعبیر ہر عہد کے جدید سے جدید ترین علوم اور پیمانوں کی زبان اور معیار کے مطابق پیش کریں تاکہ جہاں اسلام کو آسانی سے سمجھا جا سکے وہاں اسے روزمرہ زندگی پر لاگو کرنا بھی آسان ہو جائے۔

الہامی پیغام اور تعلیمات و عقائد غیرمتبدل اور ہر عہد کا علم اور حالات متبدل ہوتے ہیں جن کے درمیان توازن قائم نہ کیا جائے یا اس کے تقاضوں کا لحاظ نہ رکھا جائے تو مذہبی علوم اور عقائد کے قدیم (آوٹ ڈیٹڈ) ہو جانے کا امکان پیدا ہو جاتا ہے جیسا کہ آج کی ترقی یافتہ دنیا اسلام اور مسلمانوں پر "دقیانوسی” اور "جہلا” وغیرہ کے الزامات لگانے کی کوشش کرتے ہیں۔ اس خلا کو پر کرنے کے لیئے محدثین اور مجددین اسلامی تعلیمات اور عقائد کا احیاء کرتے ہیں تاکہ "اسلامی ضابطہ حیات” جدید ذہن کی سمجھ میں آ سکے۔ اگر ایسا نہ کیا جائے یعنی اسلامی تعلیمات اور عقائد کے نئے مفاہیم اور مطالب کو عام نہ کیا جائے تو اسلام کا مکمل ادراک اور اسے ہر عہد میں عملی زندگی کا حصہ بنانا ناممکن نہیں تو تقریبا مشکل ہو جاتا ہے۔ اس کا بنیادی حل علماء اسلام، مسلم فقہاء، مفسرین، شارع اور مترجمین پیش کر سکتے ہیں جن کے ذہن کی رسائی جدید علوم مثلا کوانٹم سائنس، نفسیات اور مائنڈ سائنسز پر بھی ہو۔ جہاں ان سائنسی علماء کا مشاہدہ تیز ہو وہاں وہ مستقبل کے جدید علوم پر بھی نظر رکھ سکیں کہ انسان ان کے ذریعے کس بلندی تک ترقی کا سفر طے کر سکتا ہے اور اس میں دین اسلام کیا کردار ادا کر سکتا ہے مثال کے طور پر پاکستان کے قومی شاعر، مفکر اور فلسفی ڈاکٹر علامہ اقبال کا واقعہ معراج کے بارے یہ شعر ملاحظہ کریں، جس میں وہ فرماتے ہیں،
"سبق ملا ہے یہ معراج مصطفی سے مجھے
کہ عالم بشریت کی زد میں ہے گردوں ” 

واقعہ معراج کی ایک تشریح وہ ہے جو علمائے دین اللہ تعالی ﷻ سے نبی کریم ﷺ کی ملاقات اور دیدار کے حوالے سے کرتے ہیں اور دوسری وہ ہے جو علامہ اقبال کی نظر میں آسمان کی بلندیوں تک سائنسی علوم کی ترقی کے ذریعے ہے جس کی زد میں سات آسمان (گردوں) آتے ہیں۔ اس مد میں حضرت مجدد الف ثانی رحمتہ علیہ کی تعلیمات میں جدید اسلامی فکر کے نمایاں پہلو ملتے ہیں جبکہ مولانا مودودیؒ نے بھی اس میدان میں بے مثال خدمات انجام دیں۔ دور جدید سائنسی عروج کا عہد ہے اور نت نئی ایجادات نے قدیم انسانی تہذیب کے نمایاں عناصر کے بخیئے ادھیڑ دیئے ہیں۔

مولانا مودودیؒ اسلامی فکر کو ترویج دینے کے قائل تھے۔ انہوں نے اسلامی فکر کے مسلسل ارتقاء میں رہنے کا جو نظریہ دیا وہ قابل تعریف ہے اور یہی مسلمانوں میں علمی تعطل کا واحد حل بھی ہے۔   امام مودودیؒ فرماتے ہیں کہ، "مدینہ سے مماثلت پیدا کرنے کا مفہوم کہیں یہ نہ سمجھ لیا جائے کہ ہم ظاہری اشکال میں مماثلت پیدا کرنا چاہتے ہیں اور دنیا اس وقت تمدن کے جس مرتبے پر قائم ہے اس سے رجعت کر کے اس تمدنی مرتبے پر واپس جانے کے خواہش مند ہیں جو عرب میں ساڑھے تیرہ سو برس پہلے تھا۔ اتباع رسول صلی اللہ علیہ وآلہ وسلم و اصحابؓ کا یہ مفہوم سرے سے غلط ہے اور اکثر دین دار لوگ غلطی سے اس کا یہی مفہوم لیتے ہیں۔ ان کے نزدیک سلف صالح کی پیروی اس کا نام ہے کہ جیسا لباس وہ پہنتے تھے ویسا ہی ہم پہنیں جس قسم کے کھانے وہ کھاتے تھے اسی قسم کے کھانے ہم بھی کھائیں جیسا طرز معاشرت ان کے گھروں میں تھا بعینہٖ وہی طرز معاشرت ہمارے گھروں میں بھی ہو۔ تمدن و حضارت کی جو حالت ان کے عہد میں تھی اس کو ہم بلکل متحجر صورت میں قیامت تک باقی رکھنے کی کوشش کریں اور ہمارے اس ماحول سے باہر کی دنیا میں جو تغیرات واقع ہو رہے ہیں ان سب سے آنکھیں بند کر کے ہم اپنے دماغ اور اپنی زندگی کے اردگرد ایک حصار کھینچ لیں جس کی سرحد میں وقت کی حرکت اور زمانے کے تغیر کو داخل ہونے کی اجازت نہ ہو۔” 

دراصل وقت کی ضروریات اور تقاضوں کے مطابق اسلامی تعلیمات کا یہ جدید نقشہ پیش کرنا ان مجددین کا کام ہے جو اسلام کی تشریح ان جدید علوم کی روشنی میں کر سکیں جو درحقیقت ہر عہد کے جدید علوم کے معیار پر عین پورا اترتی ہیں۔ مولانا مودودیؒ اس مد میں فرماتے ہیں جس کا خلاصہ یہ ہے کہ اتباع کا یہ تصور جو دور انحطاط کی کئی صدیوں سے دین دار مسلمانوں کے دماغوں پر مسلط رہا ہے درحقیقت روح اسلام کے بالکل منافی ہے کیونکہ اسلام ایک مکمل ضابطہ حیات ہے جو وقت کے تقاضوں کے مطابق ہمیشہ متحرک رہتا ہے۔

میرے رائے میں بھی اسلام کی یہ تعلیم ہرگز نہیں ہے کہ ہم جیتے جاگتے آثار قدیمہ بن کر رہیں اور اپنی زندگی کو قدیم تمدن کا ایک تاریخی ڈرامہ بنائے رکھیں۔ اسلامی فکر ہمیں رہبانیت اور قدامت پرستی نہیں سکھاتی ہے۔ اسلامی ضابطہ اور جدید تعلیمات کا مقصد دنیا میں ایک ایسی قوم پیدا کرنا نہیں ہے جو تغیر و ارتقا کی راہ میں رکاوٹ بن جائے، بلکہ اسلام کا مطلب و مقصود اس کے بالکل برعکس ہے اور اسلام مسلمانوں کو ایک ایسی قوم بنانا چاہتا ہے جو تغیر و ارتقا کو غلط راستوں سے پھیر کر صحیح راستے پر چلانے کی کوشش کرے یعنی جدید علوم کا حصول ممکن بنا کر خود بھی ترقی کرے اور دوسری اقوام کو بھی کروائے۔

دین اسلام میں "امامت” کا مفہوم دوسروں کے لیئے خیر کا باعث بننا ہے۔ ایک حدیث نبوی ﷺ کا مفہوم یہ ہے کہ، "تم میں سے بہترین انسان وہ ہے جو دوسروں کے لیئے منافع بخش ہو۔” اسلام کا اجتماعی درس بھی یہی ہے کہ جو امت کو قالب نہیں دیتا بلکہ روح دیتا ہے اور چاہتا ہے کہ زمان و مکان کے تغیرات سے زندگی کے جتنے بھی مختلف قالب قیامت تک پیدا ہوں ان سب میں امت مسلمہ یہی روح بھرتی چلی جائے۔ مسلمان ہونے کی حیثیت سے دنیا میں امت نبوی ﷺ کا مشن یہ ہے کہ مسلمان "امت خیر” بنے رہیں، جنہیں اس لیئے پیدا کیا گیا ہے کہ وہ ارتقاء کے راستے پر چلیں اور اس سلسلے میں وہ دوسروں کی بھی امامت اور رہنمائی کرتے چلے جائیں۔

نڈر سپہ سالار خالد بن ولید

اسلامی تاریخ کامیاب جنگجوو’ں اور بے خوف سپہ سالاروں کی تاریخ ہے۔ انہوں نے جنگی میدانوں میں داد و شجاعت کے وہ جوہر دکھائے کہ عیسائی دنیا آج بھی مسلمان جہادیوں سے دبکتی ہے۔ خلیفہ دوئم حضرت عمر رضی اللہ تعالٰی عنہ کا شمار اولین مسلم کمانڈروں میں ہوتا ہے، جن کے بارے میں کہا جاتا ہے کہ، "اگر دنیا میں ایک اور عمر رضی اللہ تعالیٰ عنہ پیدا ہو جاتے تو آج پوری دنیا پر مسلمانوں کی حکومت ہوتی۔” ان کے علاوہ جو مسلم فاتحین شہرت کے آسمان پر چمکے ان میں خالد بن ولید، محمد بن قاسم، طارق بن زیاد، یوسف بن تاشقین اور صلاح الدین ایوبی وغیرہ سرفہرست ہیں۔ یوسف بن تاشقین پر اس سے پہلے ایک اظہاریہ لکھا تھا جسے قارئین نے بہت پسند کیا. آج کی تحریر میں مختصرا ان دیگر مسلم فاتحین میں سے حضرت خالد بن ولید رضی اللہ تعالٰی عنہ کی بہادری اور فتوحات کا جائزہ لیتے ہیں جنہوں نے جہادی معرکوں میں کارہائے نمایاں سر انجام دیئے۔

ابتدائے اسلام میں خالد بن ولید نے مسلمانوں کی فتوحات کا دبنگ آغاز کیا۔ خالد بن ولید رضی اللہ تعالٰی عنہ صدر اسلام کے جنگی افسروں میں سے ایک تھے جنہوں نے اسلام قبول کرنے سے قبل بدر، احد اور احزاب کی جنگوں میں مسلمانوں کے خلاف حصہ لیا اور فتح مکہ سے قبل اسلام قبول کیا۔ اسلام قبول کرنے کے بعد، انہوں نے جنگ موتہ، فتح مکہ، اور جنگ حنین میں بہادری کے جوہر دکھائے۔

خالد بن ولید عرب کے نامور سپہ سالار اور صحابی رسول حضرت محمد ﷺ تھے۔ حضرت خالد بن ولید ابن مغیرہ رضی اللہ تعالٰی عنہ خاندان قریش کے بہت ہی نامور اشراف میں سے تھے۔ ان کی والدہ حضرت بی بی لبابۂ صغری رضی اللہ تعالیٰ عنہا ام المؤمنین حضرت بی بی میمونہ رضی اللہ تعالیٰ عنہا کی بہن تھیں۔ آپ بہادری اور فن سپہ گری و تدابیر جنگ کے اعتبار سے تمام صحابہ کرام رضی اللہ تعالیٰ عنہم میں ایک خصوصی امتیاز رکھتے تھے۔ اسلام قبول کرنے سے پہلے ان کی اور ان کے باپ ولید کی اسلام دشمنی مشہور تھی۔ یہی وجہ ہے کہ جنگ بدر اور جنگ احد کی لڑائیوں میں یہ کفار کے ساتھ تھے اور ان سے مسلمانوں کو بہت زیادہ جانی نقصان پہنچا مگر ناگہاں ان کے دل میں اسلام کی صداقت کا ایسا آفتاب طلوع ہوا کہ 7 ہجری میں یہ خود بخود مکہ سے مدینہ جا کر دربار رسالت ﷺ میں حاضر ہو گئے اور دامن اسلام میں آ گئے۔

صلح حدیبیہ کو اللہ تعالیٰ نے ’’فتح مبین‘‘ قرار دیا ہے، لیکن یہ اجسام کی نہیں قلوب کی فتح و تسخیر کا معاملہ تھا. اس مرحلہ پر اسلام کو اپنی دعوت کی اشاعت کے لئے امن درکار تھا جو اس صلح سے حاصل ہو گیا. دعوتِ توحید کی وسعت کو دیکھ کر خود قریش یہ سمجھنے لگے تھے کہ یہ ہماری شکست اور جناب محمد رسول اللہ ﷺ کی فتح ہے. صلح حدیبیہ سے قبل قریش اور اہل ایمان کے مابین ہونے والے معرکوں میں قریش کی صفوں میں ایک جنگجو اور باصلاحیت شہسوار کی حیثیت سے خالد بن ولیدؓ کا نام ممتاز نظر آتا تھا. جنگ کے دوران گھڑ سوار دستوں کی قیادت انہی کے سپرد رہتی تھی. غزوۂ احد کے موقع پر ان ہی کی تدبیر سے قریش کی شکست فتح میں بدل گئی تھی اور مسلمانوں کو شدید نقصان اٹھانا پڑا تھا. حدیبیہ کے موقع پر بھی قریش نے گھڑ سواروں کا ایک دستہ ان کی زیر کمان نبی اکرمﷺ کا راستہ روکنے کے لئے بھیجا تھا. آپ ﷺ کو اطلاع مل گئی اور آپ ﷺ نے راستہ بدل لیا، ورنہ خالد بن ولیدؓ تو حضور ﷺ کا راستہ روکنے کے لئے رابغ سے بھی آگے نکل گئے تھے. حضورﷺ نے مسلمانوں کے ساتھ حدیبیہ کے مقام پر قیام کیا. صحابہ کرام ؓ نے جگہ جگہ پڑاؤ ڈال رکھے تھے. خالد بن ولید ؓ کو جب پتہ چلا تو وہ بھی اپنے گھڑ سواروں کے دستہ کے ساتھ پلٹ کر حدیبیہ پہنچ گئے.

یہاں پہنچ کر خالد بن ولیدؓ کی طرف سے ایک انوکھے طرز عمل کا مظاہرہ ہوا. یہ ایک ایسے پڑاؤ پر پہنچ گئے جہاں صحابہ کرامؓ میں سے دو اڑھائی سو کی نفری فروکش تھی. خالد بن ولید  ؓ نے انتہائی کوشش کی کہ کسی طرح یہ اہل ایمان مشتعل ہو جائیں اور کسی مسلمان کا ایک مرتبہ ذرا ہاتھ اُٹھ جائے. قریش کی کچھ روایات تھیں جن سے انحراف خالدؓ بن ولید کے لئے ممکن نہ تھا. چونکہ نبی اکرم ﷺ اور صحابہ کرام ؓ احرام کی حالت میں تھے اور ان کی قدیم روایات چلی آ رہی تھیں کہ مُحرِم پر ہاتھ نہ اٹھایا جائے، اس لئے خالد بن ولیدؓ جنگ کی پہل نہیں کرنا چاہتے تھے. لیکن انہوں نے اشتعال انگیزی کی حتی الامکان کوشش کی. وہ اپنے گھوڑے لے کر بار بار صحابہ ؓ کی اس جماعت پر ایسے چڑھ چڑھ کر آئے جیسے ان کو گھوڑوں کے سموں سے کچل دیں گے. انہوں نے کئی بار اس عمل کو دہرایا، لیکن جو حکم تھا جناب محمد رسول اللہ ﷺ کا صحابہ کرام ؓ اس پر کار بند رہے. نہ کوئی ہراساں ہوا، نہ کوئی بھاگا اور نہ ہی کسی نے مدافعت کے لئے ہاتھ اٹھایا. نظم و ضبط کے اس مشاہدہ کا خالد بن ولیدؓ پر اتنا گہرا اثر ہو چکا تھا کہ وہ زیادہ دیر تک مزاحمت نہیں کر سکے اور ان کا گھائل دل بالآخر مُسَخّر ہو گیا، جس کا ظہور صلح حدیبیہ کے بعد ہوا اور وہ مشرف بہ ایمان ہونے کے لئے عازمِ مدینہ ہوئے.

حضرت خالد بن ولیدؓ جب سوئے مدینہ چلے تو راستہ میں حضرت عمرو بن العاصؓ مل گئے جو قریش کے ایک اعلیٰ مدبر، شجاع و دلیر اور فنون حرب کے بہت ماہر تسلیم کئے جاتے تھے. یہی وہ صاحب تھے جن کو 5 ہجری نبوی میں حبشہ ہجرت کر جانے والے مہاجرین کی بازیابی کے لئے قریش نے سفیر بنا کر جناب نجاشی ؒ کے دربار میں حبشہ بھیجا تھا. حضرت خالدؓ نے دریافت کیا کہ کہاں کا قصد ہے؟ بولے اسلام قبول کرنے کے لئے مدینہ جا رہا ہوں. میرے دل نے تسلیم کر لیا ہے کہ محمد ﷺ اللہ کے رسول برحق ہیں اور اسلام اللہ کا نازل کردہ دین ہے. حضرت خالدؓ نے کہا اپنا بھی یہی حال ہے. چنانچہ قریش کے یہ دونوں مایہ ناز اور جلیل القدر فرزند بارگاہِ نبوی (علیٰ صاحبہا الصلوٰۃ والسلام) میں حاضر ہوئے اور دولت ایمان سے مشرف ہوئے.

اس طرح وہ جوہر جو اُس وقت تک اسلام کی مخالفت میں صرف ہو رہا تھا، اب اسلام کی محبت اور اس کی اشاعت و توسیع میں صرف ہونے لگا. حضرت خالد بن ولیدؓ اور حضرت عمرو بن العاص ؓ نے دورِ نبوت اور بعد ازاں دورِ خلافت صدیقی و فاروقی میں وہ کارہائے نمایاں انجام دئیے کہ رہتی دنیا تک بھلائے نہیں جا سکتے. اول الذکر کا دنیا کے عظیم ترین جرنیلوں میں شمار ہوتا ہے. دورِ صدیقی میں فتنہ ارتداد کی سرکوبی میں انہوں نے ہی فیصلہ کن کردار ادا کیا تھا. اسی طرح کسریٰ پر ابتدائی کاری ضرب انہیؓ کے ہاتھوں لگی اور انہیؓ کے ہاتھوں قیصر کی سلطنت میں سے شام کا ملک اسلامی قلمرو میں شامل ہوا اور آخر الذکر مصر کے فاتح ہوئے. ہم یہ کہہ سکتے ہیں کہ ان دو عظیم انسانوں کا قبول اسلام دراصل صلح حدیبیہ ہی کے ثمرات کا مظہر تھا.

مشرف بہ اسلام ہونے کے بعد حضرت خالد بن ولید رضی اللہ تعالٰی عنہ نے یہ عہد کر لیا کہ اب زندگی بھر میری تلوار کفار سے لڑنے کے لئے بے نیام رہے گی۔ چنانچہ اس کے بعد ہر جنگ میں انتہائی مجاہدانہ جاہ وجلال کے ساتھ کفار کے مقابلہ میں شمشیر بکف رہے۔ یہاں تک کہ 8 ہجری میں جنگ موتہ میں جب حضرت زید بن حارثہ و حضرت جعفر بن ابی طالب و حضرت عبداللہ بن رواحہ رضی اللہ تعالیٰ عنہم تینوں سپہ سالاروں نے یکے بعد دیگرے جام شہادت نوش کر لیا تو اسلامی فوج نے ان کو اپنا سپہ سالار منتخب کیا اور انھوں نے ایسی جاں بازی کے ساتھ جنگ کی کہ مسلمانوں کو "فتح مبین” حاصل ہو گئی۔ اسی موقع پر جب یہ جنگ میں مصروف تھے تو حضور اکرم ﷺ
نے مدینہ منورہ میں صحابہ رضی اللہ تعالیٰ عنہم کی ایک جماعت کے سامنے ان کو ”سیف اللہ” (اللہ کی تلوار) کے خطاب سے سرفراز فرمایا۔

امیرالمؤمنین حضرت ابوبکر صدیق رضی اللہ تعالیٰ عنہ کے دور خلافت میں جب "فتنہ ارتداد” نے سر اٹھایا تو حضرت خالد بن ولید رضی اللہ تعالٰی عنہ نے ان معرکوں میں بھی خصوصاً جنگ یمامہ میں مسلمان فوجوں کی سپہ سالاری کی ذمہ داری قبول کی اور ہر محاذ پر فتح حاصل کی۔ پھر امیر المؤمنین حضرت عمر رضی اللہ تعالیٰ عنہ کی خلافت کے دوران رومیوں کی جنگوں میں بھی انھوں نے اسلامی فوجوں کی کمان سنبھالی جس سے بہت زیادہ فتوحات حاصل ہوئیں۔ موتہ کی جنگ کے دوران، حضرت خالد بن ولید رضی اللہ تعالٰی عنہ نے بازنطینیوں کے خلاف مسلم فوجوں کی قیادت کی۔ انھوں نے 629-630ء میں مکہ میں مسلمانوں کی فتح اور 630ء میں حنین کی جنگ کے دوران مسلم فوج کے تحت بدویوں کی قیادت کی۔ حضرت خالد بن ولید رضی اللہ تعالٰی عنہ کو نجد اور یمامہ میں کمانڈر مقرر کیا گیا تھا تاکہ ان عرب قبائل کو دبایا جائے جو نوزائیدہ مسلم ریاست کے مخالف تھے۔ اس مہم کا اختتام بالترتیب 632 میں جنگ بزاخہ اور 633ء میں یمامہ کی جنگ میں عرب باغی رہنماؤں طلیحہ بن خویلد اور مسیلمہ کذاب پر خالدبن ولید کی فتح پر ہوا۔

انھیں عام طور پر مورخین ابتدائی اسلامی دور کے سب سے تجربہ کار اور کامیاب ترین جرنیلوں میں سے ایک تصور کرتے ہیں۔ اسلامی روایت خالد بن ولید رضی اللہ تعالٰی عنہ کو ان کی جنگی حکمت عملیوں اور مسلمانوں کی فتوحات کی موثر قیادت کا سہرا دیتی ہے۔ ابو سلیمان خالد بن ولید رضی اللہ تعالٰی عنہ تاریخ کے ان چند فوجی کمانڈروں میں سے ایک ہیں جنھوں نے ساری زندگی جنگ میں شکست نہیں کھائی۔ خالد بن ولید رضی اللہ تعالٰی عنہ بازنطینی رومی سلطنت، فارسی ساسانی سلطنت اور ان کے اتحادیوں کی اعلیٰ افواج کے خلاف 100 سے زائد لڑائیوں میں ناقابل شکست رہے۔
کہا جاتا ہے کہ آپ کے جسم پر 70 سے زیادہ زخموں کے نشان تھے۔ ان کی خواہش تھی کی انہیں میدان جنگ میں شہادت نصیب ہو لیکن خدا کا کرنا ایسا ہوا کہ چند دن بیمار رہ کر ان کا طبعی انتقال مدینہ منورہ (یا حمص) میں 22 ہجری کو ہوا۔

_{Title Image by Stefan Schweihofer from Pixabay}