Tag: ادب

پروفیسر عاصم بخاری — ایک تاثراتی خاکہ

(شہرِ خواب — صفدر علی حیدری)

پروفیسر عاصم بخاری کا نام میں عرصۂ دراز سے سنتا آ رہا تھا اور ان کے ادبی کام سے بھی کسی حد تک آگاہ بھی تھا، لیکن بالمشافہ ملاقات کا موقع کبھی نہ ملا تھا۔
پھر اچانک اور اتفاقاً ان سے ملاقات کی ایک صورت نکل آئی۔ یہ واقعہ تقریباً ساڑھے تین سال پرانا ہے۔ میں اُس وقت قائم پور میں سید مبارک علی شمسی کے ہاں مقیم تھا جب ان سے پہلی ملاقات ہوئی۔ یہ ملاقات میرے لیے ایک یادگار ادبی تجربہ ثابت ہوئی۔

اس شب گفتگو کا سلسلہ دیر تک جاری رہا۔ حیرت انگیز طور پر زیادہ تر میں ہی گفتگو کرتا رہا، یوں محسوس ہوتا تھا جیسے برسوں پرانا تعلق ہو۔ وہ بڑے اطمینان، تحمل اور شائستگی کے ساتھ سنتے رہے۔ کبھی مسکرا دیتے اور کبھی مختصر مگر بامعنی جملوں سے گفتگو کو آگے بڑھاتے رہے۔

ان کی شخصیت کا نمایاں پہلو ان کی سادگی، کم گوئی اور شگفتگی ہے۔ وہ محض سننے والے نہیں بلکہ "اچھا سننے والے” ہیں، اور یہ وصف ہر کسی میں نہیں ہوتا۔ مجھے ان کی یہی ادا اس لیے بھی متاثر کرتی ہے کہ میں خود نسبتاً زیادہ گفتگو کرنے والا آدمی ہوں، اور وہ خاموشی کو وقار کے ساتھ برتنے کا ہنر رکھتے ہیں۔

پروفیسر عاصم بخاری ایک ایسے صاحبِ قلم ہیں جن کے پاس بیس سے زائد کتب کا سرمایہ ہے، مگر ان کے انداز میں اظہار سے زیادہ احتیاط اور شائستگی نمایاں ہے۔ وہ کم بولتے ہیں مگر جب بولتے ہیں تو نپا تلا اور بامعنی کلام کرتے ہیں۔ ان کی خاموشی بھی ایک معنی خیز اظہار بن جاتی ہے۔

وہ استاد بھی ہیں، شاعر بھی اور ادیب بھی۔ فردیات اور قطعات میں بھی ان کی ایک الگ شناخت موجود ہے۔
ان کی نظم و نثر میں اختصار ، ہئیتی و مضوعاتی جدت اور اصنافی تنوع ان کی پہچان کا خاص حوالہ ہے۔
ہماری ملاقات سے قبل بھی ان کی بعض تحریریں افسانچے کے ذیل میں سامنے آ چکی تھیں، مگر اس صنف میں ان کی باقاعدہ شناخت بعد میں ابھری۔

نظم و نثر دونوں پر انہیں قدرت حاصل ہے۔ ہماری ملاقات کے بعد جب انہوں نے میرے افسانچے سنے تو ان کے اندر افسانچہ نگاری کی طرف ایک خاص دلچسپی پیدا ہوئی۔ اس کے بعد انہوں نے باقاعدگی سے لکھنا شروع کیا اور مختصر عرصے میں ان کی پہلی افسانچوں کی کتاب "اثاثہ” منظرِ عام پر آ گئی۔

اگر وہ اس ادبی رجحان کی تبدیلی کا کریڈٹ مجھے دیتے ہیں تو یہ ان کا حسنِ ظن اور انکسار ہے، ورنہ حقیقت یہ ہے کہ ادب ہمیشہ داخلی تحریک سے جنم لیتا ہے، البتہ بعض ملاقاتیں اس تحریک کو ایک واضح سمت ضرور دے دیتی ہیں۔

یہ امر قابلِ ذکر ہے کہ انہوں نے اس سفر کو ادھورا نہیں چھوڑا۔ ان کی دوسری کتاب "وارث” اس تسلسل کا ثبوت ہے، جس کا مسودہ بھی سامنے آ چکا ہے۔ اس میں انہوں نے مختلف سماجی اور انسانی موضوعات پر افسانچے تحریر کیے ہیں۔

ان کے افسانچوں کی خاص بات یہ ہے کہ وہ اختصار کے باوجود زمین سے جڑے ہوئے ہیں۔ وہ اردگرد کے حقیقی ماحول اور معاشرتی کرداروں سے اخذ شدہ ہیں۔ چونکہ وہ خود ایک ملازمت پیشہ فرد ہیں، اس لیے ان کے ہاں اسی طبقے کے مسائل، کردار اور رویے زیادہ نمایاں نظر آتے ہیں۔

ان کا قلم ان چہروں سے نقاب اٹھاتا ہے جن کے ظاہر و باطن میں تضاد پایا جاتا ہے۔ معاشرتی منافقت جب ان کی نظر میں آتی ہے تو ان کا قلم خود بخود حرکت میں آ جاتا ہے، اور وہ مختصر مگر اثر انگیز افسانچے تخلیق کرتے چلے جاتے ہیں۔

گویا ان کے افسانچوں کا پہلا قاری بھی میں ہوں اور پہلا ناقد بھی۔ میں ہر تحریر پر دیانت داری کے ساتھ اپنی رائے دینے کی کوشش کرتا ہوں، کیونکہ ادبی رشتہ صرف تحسین نہیں بلکہ رہنمائی کا بھی متقاضی ہوتا ہے۔

مجھے ابتدا میں ان سے یہ شکوہ رہا کہ وہ زیادہ تر بیانیہ انداز اختیار کرتے تھے، جس سے افسانچے کی شدت کم ہو جاتی تھی۔ تاہم وقت کے ساتھ ساتھ اور مسلسل مکالمے کے نتیجے میں ان کے اسلوب میں واضح بہتری آئی ہے، جو ان کی موجودہ تحریروں میں محسوس کی جا سکتی ہے۔

افسانچہ ایک نہایت نازک، مشکل اور حساس صنفِ ادب ہے۔ اسے محض مختصر تحریر سمجھ لینا ایک عام غلط فہمی ہے۔ اس میں وحدتِ تاثر، برجستگی اور مؤثر اختتام بنیادی عناصر ہیں۔ اس کا اصل حسن کم لفظوں میں زیادہ معنویت پیدا کرنا ہے۔

ان کے افسانچوں میں یہ خوبیاں نمایاں طور پر موجود ہیں۔ وہ مختصر دائرے میں ایک مکمل فکری جھٹکا پیدا کرنے کا ہنر رکھتے ہیں۔

میں افسانچہ نگار کو ایک ماہر نشانہ باز کی طرح دیکھتا ہوں جو لمحوں میں ہدف کو درست نشانے پر لگاتا ہے۔ اگر نشانہ درست ہو تو اثر بھی دیرپا ہوتا ہے۔

عاصم بخاری کے افسانچے بھی قاری کے ذہن میں ایک ہلکی سی چبھن، ایک سوال اور ایک فکری ارتعاش چھوڑ جاتے ہیں، اور یہی کسی بھی تخلیق کی کامیابی ہے۔

مجھے امید ہے کہ وہ اسی تسلسل کے ساتھ اس صنف میں مزید آگے بڑھیں گے اور اپنی ادبی پہچان کو مزید مستحکم کریں گے۔

اللہ کرے ان کا قلم اسی طرح نکھرتا رہے اور ان کی تحریر مزید حسن و معنویت سے مزین ہوتی جائے۔

تحقیق کی دنیا کا روشن نام

از: ڈاکٹر صائمہ خان
موجودہ معاشرہ جہاں ادب و کتاب سے بہ تدریج دور ہوتا جا رہا ہے وہیں کچھ ایسے باصلاحیت اور علم دوست انسان بھی موجود ہیں جن کی وابستگی اس زوال پذیر روایت کے لیے باعثِ اطمینان ہے۔ یہ امید کی کرن ہیں کہ مستقبل میں یہی افراد علم و ادب کی شمع کو روشن رکھنے کا فریضہ خلوص اور ذمہ داری کے ساتھ سرانجام دیتے رہیں گے۔ انہی روشن ناموں میں ایک نمایاں نام ڈاکٹر فرہاد احمد فگار کا ہے جو اب تحقیق و ادب کی دنیا میں ایک معتبر حوالہ بن چکے ہیں۔
ڈاکٹر فرہاد احمد فگار آزاد کشمیر شعبۂ تعلیمِ کالجز میں بہ طور لیکچرر خدمات سرانجام دے رہے ہیں۔ انھوں نے اپنی اعلا تعلیم نیشنل یونی ورسٹی آف ماڈرن لینگویجز، اسلام آباد سے حاصل کی، جہاں سے ایم۔اے اور ایم۔فل کے بعد انھوں نے پی۔ایچ۔ڈی کی ڈگری بھی حاصل کی۔ ان کا تحقیقی موضوع “اردو میں املا اور تلفظ کے مباحث: لسانی محققین کا تنقیدی و تقابلی مطالعہ” تھا۔یہ مقالہ اردو لسانیات کے ایک نہایت اہم اور بنیادی پہلو پر ایک وقیع اضافہ ہے۔
علمی و ادبی خدمات کے میدان میں ڈاکٹر فگار نہایت متحرک کردار ادا کر رہے ہیں۔ وہ گورنمنٹ کالج میرپورہ ، نیلم کے ادبی مجلے “بساط” کے مدیرِ اعلا اور گرین ایرا ہائی اسکول مظفرآباد کے مجلے “کاوش” کے اعزازی مدیرِ اعلا کی ذمہ داریاں بھی احسن طریقے سے نبھا چکے ہیں۔ علاوہ ازیں گورنمنٹ بوائز انٹر کالج ٹھیریاں مظفرآباد کے رسالے فن تراش کی ادارت بھی انہی کی ذمے داری ہے۔ضلع نیلم کی تاریخ کا پہلا کالج میگزین”بساط” ان ہی کی محنت اور کاوشوں کا نتیجہ ہے جو ان کی ادبی بصیرت کا روشن ثبوت ہے۔
ڈاکٹر فرہاد احمد فگار کا تعلق ادب کے اس قبیلے سے ہے جس کے لیے اردو زبان محض ایک ذریعۂ اظہار نہیں بلکہ ایک طرزِ حیات ہے۔ انھوں نے اردو زبان و ادب کے فروغ کو اپنا نصب العین بنا رکھا ہےاور یہی وجہ ہے کہ ملک کے نام ور ادیب اور شعرا بھی ان کی کاوشوں کے معترف ہیں۔ اگر انھیں اردو کا سچا عاشق کہا جائے تو یہ ہرگز مبالغہ نہ ہوگا۔ وہ علم و ادب کا ایسا دریا ہیں جو تشنگانِ علم کو سیراب کر رہا ہے۔
اگرچہ ڈاکٹر فگار بہ یک وقت شاعر، ادیب، کالم نگار، نقاد اور محقق ہیں مگر ان کی اصل پہچان ایک محقق کی حیثیت سے قائم ہوئی ہے۔ وہ تحقیق میں غیر معمولی احتیاط اور دیانت داری کا مظاہرہ کرتے ہیں۔ کسی بھی لفظ یا شعر کی تصدیق کے لیے مختلف مآخذ تک رسائی حاصل کرنا، ہر پہلو کا باریک بینی سے جائزہ لینا اور مستند نتائج تک پہنچنا ان کا خاصہ ہے۔ اگر کوئی مشتبہ شعر یا متن ان کی نظر سے گزر جائے تو وہ اس وقت تک مطمئن نہیں ہوتے جب تک اس کی حقیقت تک نہ پہنچ جائیں خواہ اس کے لیے انھیں طویل مسافت ہی کیوں نہ طے کرنی پڑے۔

ان کی یہی تحقیق پسندی اور ادب دوستی انھیں اہلِ علم کے حلقوں میں ممتاز بناتی ہے۔سن کی تحقیقی خدمات پر پشاور یونی ورسٹی سے تحقیقی مقالہ "فرہاد احمد فگار بہ طور محقق” کے عنوان سے لکھا جا چکا ہے۔ انھوں نے بڑے نام ور ادبا اور شعرا سے فیض حاصل کیا اور اپنی علمی بنیادوں کو مضبوط کیا۔ ان کی شخصیت کا ایک اہم پہلو زبان کی اصلاح اور دفاع کا جذبہ بھی ہےجو ان کے تحقیقی موضوع سے بہ خوبی ظاہر ہوتا ہے۔
تحقیق کے ساتھ ساتھ ڈاکٹر فگار ایک عمدہ شاعر بھی ہیں۔ ان کی شاعری میں فکری گہرائی، سماجی شعور اور جذباتی سچائی نمایاں ہے۔ وہ ہر حال میں شعر کہنے کا ذوق رکھتے ہیں۔ شہدائے اسلام کے حوالے سے ان کا یہ شعر خاص طور پر مقبول ہے:
شمعِ اسلام جس سے فروزاں ہوئی
وہ لہو مصطفیٰ کے گھرانے کا ہے
اسی طرح معاشرتی ناہمواریوں پر ان کی تنقیدی نظر بھی قابلِ داد ہے:
مزدوروں کے نام پہ اب کے بھی
کچھ لوگوں نے صرف سیاست کی
اگرچہ ان کا شعری سفر ابھی جاری ہے، تاہم اس میں روشن امکانات واضح طور پر دکھائی دیتے ہیں۔ ان کی صلاحیتوں کا اعتراف علمی و ادبی حلقوں میں کیا جا رہا ہے۔
تحقیق ایک بحرِ بے کراں ہے، جس میں اتر کر اس کی گہرائی تک پہنچنا ہر کسی کے بس کی بات نہیں۔ ایک سچا محقق وہی ہے جو اس سمندر کی تِہ تک جا کر نایاب موتیوں کو تلاش کرے اور انھیں اہلِ ادب کے سامنے پیش کرے۔ ڈاکٹر فرہاد احمد فگار اس کٹھن سفر کو جس عزم، محنت اور خلوص سے طے کر رہے ہیں وہ قابلِ تحسین ہے۔
ان کی شائع شدہ تصانیف “احمد عطا اللہ کی غزل گوئی” اور “بزمِ فگار” ان کی تحقیقی کاوشوں کا منہ بولتا ثبوت ہیں، جب کہ ڈاکٹر افتخار مغل کی کتاب “آزاد کشمیر میں اردو شاعری” کو مرتب اور شائع کروانا بھی ان کا اہم کارنامہ ہے۔ ان کی شاعری میں تحقیق کا رنگ ملاحظہ ہو:
تحقیق کس جگہ ہوئی اور کس جگہ نہیں
اس باب میں بھی تھوڑی تحقیق ہو نہ جائے
اسی طرح بیٹیوں سے محبت اور گھریلو فضا کی خوب صورت ترجمانی ان کے اس شعر میں جھلکتی ہے:
اداسیوں سے اٹے ہوں گے سب در و دیوار
جو آنگنوں میں ہمارے نہ بیٹیاں بولیں
ڈاکٹر فرہاد احمد فگار ایک ایسے تخلیق کار ہیں جو اپنی دھن میں مگن رہتے ہیں۔ ان کی شخصیت میں عجز، انکساری اور سادگی نمایاں ہے، جو ان کے علمی وقار کو مزید جِلا بخشتی ہے۔
بلاشبہ ڈاکٹر فرہاد احمد فگار تحقیق کی دنیا کا ایک روشن نام ہیں اور اردو زبان کی بقا و ترقی کی ایک مضبوط امید بھی۔