Tag: ادب

ڈاکٹر عارفہ شہزاد کی کتاب "انگریزی میں اردو ادب کی تنقید” کا تجزیاتی مطالعہ

ڈاکٹر عارفہ شہزاد کی کتاب "انگریزی میں اردو ادب کی تنقید” انگریزی زبان کے دائرہ کار میں اردو ادب کے تنقیدی تجزیے کا احاطہ کرتی ہے۔ باریک بینی سے تحقیق کے ذریعے ڈاکٹر عارفہ شہزاد صاحبہ قارئین کو اردو ادبی تنقید کی مختلف جہتوں کے بارے میں ایک جامع معلومات پر مبنی تحقیقی کتاب فراہم کی ہے۔
کتاب کا آغاز ایک تفصیلی پیش لفظ سے ہوتا ہے، جس میں اس تحقیقی کتاب کو لکھنے کی وجہ بیان کی گئی ہے۔ کتاب میں شامل تمام مضامین کو ایک بہترین طریقہ کار سے ترتیب دیا گیا ہے، جس سے قارئین اردو ادبی تنقید کے مختلف پہلوؤں سے روشناس ہو سکتے ہیں۔ ڈاکٹر عارفہ شہزاد نے مجموعی طور پر ادبی مضامین کی چھان بین کرتے ہوئے بعد میں ہونے والی تحقیق کے لیے ایک فریم ورک تیار کیا ہے۔
کتاب کے قابل ذکر حصوں میں سے ایک اردو شاعری کا تنقیدی حصہ ہے، جہاں ڈاکٹر عارفہ شہزاد نے شاعرانہ اظہار کی باریکیوں کا فنی، فکری اور تنقیدی تجزیہ پیش کیا ہے اور خصوصی طور پر اردو ادب کے اندر شعری روایات کے ارتقا کا تفصیلی جائزہ لیا ہے۔ ادب کی کلاسیکی شکلوں سے لے کر عصری رجحانات تک ڈاکٹر عارفہ شہزاد نے اردو شاعری کا فنی و فکری جائزہ لیا ہے۔

کتاب میں نمایاں کیا گیا ایک اہم پہلو تنقیدی نقطہ نظر کے باہم مربوط ہونے اور ادبی تشریح پر ان کے اثرات کو اجاگر کرنے کی کوشش ہے۔ محتاط تجزیے کے ذریعے ڈاکٹر عارفہ شہزاد ادبی تنقید کی حرکیات کو واضح کرتے ہوئے ادبی گفتگو کی تشکیل میں اس کے کردار پر زور دیتی ہیں۔
مزید برآں یہ کتاب اقبالیات اور تنقیدی مطالعہ پر بھر پور روشنی ڈالتی ہے، جس میں علامہ اقبال کی تخلیقات اور ان کی فکری میراث کے تنقیدی استقبال اور تشریح کے بارے میں تحقیقی مضامین پیش کیے گئے ہیں۔ کتاب کا یہ حصہ اقبال کے افکار کی مستقل مطابقت اور اردو ادبی حلقوں میں ان کی مقبولیت کا منہ بولتا ثبوت ہے۔
ڈاکٹر عارفہ شہزاد نے اردو نثر کا بھی تفصیلی جائزہ لینے کے ساتھ ساتھ اردو نثری ادب میں بیانیہ تکنیکوں، موضوعاتی خدشات اور اسلوبیاتی اختراعات کی پیچیدگیوں سے پردہ اٹھانے کی بھر پور کوشش کی ہے۔ یہ خوش آئند بات ہے کہ کلاسیکی شاہکاروں سے لے کر عصری کاموں تک ڈاکٹر عارفہ شہزاد اردو نثری تنقید کا ایک جامع جائزہ پیش کرتے ہوئے نظر آتے ہیں۔

اس کتاب کے ذریعے مصنف تحقیقی و تخلیقی دائرہ کار کو اردو ادبی تنقید کے متفرق جہتوں تک پھیلانے کی بھر پور کوشش کی ہے، جس میں مختلف مضامین جیسے بچوں کا ادب، تنقیدی یادداشتیں، اور تنقیدی کاموں کے اردو سے انگریزی میں تراجم اور دیگر موضوعات شامل ہیں۔ یہ انتخابی نقطہ نظر مختلف اصناف اور ذرائع میں اردو ادبی تنقید کے تنوع اور بھرپوریت کو واضح کرتا ہے۔
کتاب کے آخری صفحات کے ضمیمہ کے حصے میں ڈاکٹر عارفہ شہزاد 2011 سے 2015 کے دوران شائع ہونے والی کتابوں کا انتخاب بھی پیش کرنے کے ساتھ ساتھ وہ غیر دستیاب کتابوں اور شاہکار کتابوں کی تالیف اور قارئین کو مزید تلاش کے لیے قیمتی حوالہ جات فراہم کرنے کے لیے مستند حوالے بھی کتاب میں شامل کیے ہیں۔
خلاصہ کلام یہ ہے کہ ڈاکٹر عارفہ شہزاد کی تحقیق پر مبنی کتاب "انگریزی میں اردو ادب کی تنقید” انگریزی زبان کے دائرہ کار میں اردو ادبی تنقید کے لیے ایک اہم تحقیقی حوالے کی مستند کتاب کے طور پر ہمارے سامنے ہے۔ یہ کتاب اردو ادب اور اس کے تنقیدی گفتگو کے بارے میں ان قارئین اور محققین کی سمجھ اور علم کو مزید تقویت بخشنے کے ساتھ ساتھ اسے اہل علم، محققین اور شائقین کے لیے ایک ناگزیر وسیلہ اور بہترین حوالہ بناتی ہے۔ کتاب کی فہرست کے مطابق مندرجہ ذیل موضوعات کو شامل کیا گیا ہے:-
اردو ادب کی بحیثیت مجموعی تنقید، اردو شاعری کی تنقید، تنقید به سلسله غالبیات، تنقید به سلسله اقبالیات، اردو نثر کی تنقید، متفرق جہتیں، اردو ادب کے جزوی مطالعات پر مبنی کتب، چند متفرق موضوعات، (1) بچوں کا ادب، (ب) تنقید نگاروں پر کتب، (ج) یادگاری کتب، غیر ملکی زبانوں سے انگریزی زبان میں مترجمہ تنقیدی کتب،اردو سے انگریزی زبان میں مترجمہ تنقیدی کتب، محاکمہ، ضمیمه، ۲۰۱۱ء سے ۲۰۱۵ء کے دوران میں شائع ہونے والی کتب، (ب) دستیاب نہ ہو سکنے والی کتب اور آخر میں ماخذ و مصادر شامل کیے گئے ہیں۔

ارشاد ڈیروی کی عَلم توں قَلم تک

تبصرہ کتاب:۔ عَلم توں قَلم تک
تبصرہ نگار:۔ سید حبدار قاٸم

صوتی ترنگ سے آشنا ارشاد ڈیروی نہ صرف بہترین شاعر ہیں بل کہ ایک اچھے نثر نگار بھی ہیں جن کی نثر نگاری شوقِ مطالعہ کو فروغ دیتی ہے اور قاری کو کتاب بینی کی طرف ماٸل کرتی ہے
آپ محلہ نورنگ آباد بلاک 52 ڈیرہ غازی خان میں 1967 کو پیدا ہوٸے آپ نے چوداں کتابیں تصنیف کیں جن میں دو کتابیں نثر کی جب کہ بارہ کتابیں شاعری کی ہیں بارہ کتابوں میں آٹھ کتابیں کربلاٸی ادب پر محیط ہیں جو ان کی رسول صلی اللہ علیہ وآلہ وسلم کی اہل بیت سے مودت کا بہترین اظہاریہ ہیں
علم و ادب سے 1985 میں منسلک ہوٸے تو آپ کو ادب میں جناب عزتِ مآب واحد علوی مرحوم جیسے بلند پایہ استاد ملے جنہوں نے آپ کو ایسا تراشا کہ آپ گوہرِ نایاب ہوٸے آپ لفظ آشنا ہیں اور ماں بولی زباں کی ترویج میں اہم کردار ادا کر رہے ہیں

آپ کی نثر نگاری بہت رواں دواں اور پختہ ہے الفاظ انتہاٸی سلیقے سے برتتے ہیں جن سے ادب کا معیار بڑھتا ہے اور قاری کی آگہی بڑھتی ہے ہر مضمون میں آپ کا رنگ جدا ہے آپ کا تنقیدی مضمون اس چیز کا ثبوت ہے کہ آپ حق گوٸی و بے باکی کے علمدار بھی ہیں میں نے جب بھی آپ سے بات چیت کی بہت لطف محسوس کیا کیونکہ آپ شیریں سخن ہیں دوستوں کے دوست ہیں اور محبت بھی بے لوث کرتے ہیں انسانیت کا درد رکھنے والے ہیں اور سُچے موتی کی طرح ہیں آپ جیسے لوگ نایاب ہوتے ہیں
آپ کی کتاب "عَلم توں قلم تک” میں جن ارباب علم و دانش نے مضامین لکھے ہیں ان میں پروفیسر مرید عباس عارف ڈاکٹر سید مشتاق مہدی ڈاکٹر محمد ایوب معظمہ نقوی اور پروفیسر سید عاصم بخاری شامل ہیں جن سب نے آپ کی نثر کو بھی سراہا ہے
ارشاد ڈیروی صاحب سے میری ملاقات سوشل میڈیا پر ہوٸی اور بعد میں شہزاد افق کے ایوارڈ شو میں روبرو ملاقات ہوٸی جس میں انہوں نے مجھے اپنی کتابوں کے گراں قدر تحفہ سے نوازا جنہیں پڑھ کر ان کی ادبی خدمات کا پتہ چلا دوستوں میں مفت کتابیں دینے والے ادیب ہیں جو کہ ادب پروری اور فروغِ ادب کی عمدہ مثال ہے دنیا میں ایسے درویش لوگوں کی کمی ہیں اور مزے کی بات یہ ہے کہ آلِ رسول ﷺ کا جتنا احترام آپ کرتے ہیں میں نے دوسرے ادبا میں کم ہی دیکھا ہے شہد آگیں مزاج ارشاد ڈیروی دلوں میں بستے ہیں ان کا میں دل سے احترام کرتا ہوں اور ان کی میٹھی گفتگو سن کر میرے آنسو آ جاتے ہیں

اپنی کتاب "عَلَم توں قَلم تک” کے پہلے مضمون "سانجھا ڈکھ ہے کربلا کا” میں جس قرینے سے کربلا کا منظر دکھایا ہے وہ ایک مدلل اور بہترین انداز ہے مضمون پڑھ کر آپ کی علمی بصیرت اور آگہی کو سلام کرنے کو جی چاہتا ہے اس میں بہت ساری کتابوں کے حوالہ جات پڑھ کر آپ کے وسیع مطالعہ کی داد دینی پڑتی ہیں حالانکہ اِس دور میں محقق اور ادیب سنی سناٸی بات لکھ دیتے ہیں جو کٸی معاسرتی اور مذہبی مساٸل کو جنم دیتی ہے لیکن ارشاد ڈیروی کا علم اور تحقیق ایسا نہیں کرتی بل کہ وہ ہر جملہ تاریخ سے پڑھ کر اپنے الفاظ میں بیاں کرتے ہیں کربلا کی تاریخ لہو لہو ہے دسویں محرم کے بعد جو پتھر زمین سے اٹھاتے تھے اس کے نیچے سے ابلتا ہوا لہو نکلتا تھا شام کے وقت افق کی سرخی دسویں کے شام سے پہلے کسی نے نہ دیکھی تھی یہ سب علم ارشاد ڈیروی نے تاریخ کی کتابوں سے کشید کر کے ایک مضمون میں سمو دیا ہے جس میں حضرت زعفر جن کا واقعہ بھی شامل ہے
دوسرا مضمون ” حضرت امام جعفر صادق علیہ السلام اور فن شاعری” بھی ارشاد صاحب کے وسیع مطالعہ کی دلیل ہے جو مختلف کتابوں سے اکھٹا کیا گیا ہے اور جو مودت اہل بیت عظام سے عقیدتوں کا مظہر ہے حضرت امام جعفر صادق علیہ السلام ان شعرا کے لیے مسند چھوڑ دیتے جو کربلا کا غم لکھتے تھے آپ حضرت امام حسین علیہ السلام کا مرثیہ سن کر زارو قطار روتے تھے اور ایسے اشعار سنانے والوں کے لیے بڑے اجر کا وعدہ کرتے تھے
ارشاد ڈیروی اس مضمون میں لکھتے ہیں
” امام نے ارشاد فرمایا
جس شخص نے حضرت امام حسین کی شان میں شعر کہا اور اگر اس کا شعر سن کر ایک بھی شخص رو پڑا تو اس کا صلہ جنت ہے”
تیسرا مضمون حضرت امام رضا علیہ السلام اور مجلس شہدا ٕ کربلا پر مشتمل ہے جس میں علامہ مجلسی کی بحار الانوار کے حوالے سے یہ تحریر ہے کہ جب شاعر اہل بیت حضرت دعبل خزاعیؒ شعر بیاں فرماتے تو حضرت امام رضا علیہ السلام کس طرح گریہ فرماتے اور کیسے اس کو مجلس کی صورت میں بدل دیتے تھے امام نے یہ بھی فرمایا کہ جو شخص ایسی مجالس میں بیٹھے گا جہاں ہمارا ذکر ہو گا اس کا دل کبھی مردہ نہیں ہو گا

تیسرا مضمون ” امام رضا کی مدح سراٸی اور دعبل خزاعی” ہے جس میں حضرت امام رضا علی السلام شاعرِ اہلبیت دعبل خزاعی سے کیسے پیار کرتے تھے جناب دعبل نے سرکار سے کہا کہ میں نے آپ کی شان میں ایک سو بیس اشعار پر مشتمل ایک قصیدہ لکھا ہے اور میری تمنا ہے کہ میں اسے سب سے پہلے حضور آپ کو سناوں تو سرکار نے کہا کہ سناو جناب دعبل نے قصیدہ پڑھا تو امام رضا نے انعام کے طور پر ایک سو اشرفی کی تھیلی اسے عطا فرماٸی لیکن دعبل شاعر نے آپ کے اترے ہوٸے پرانے کپڑے کا ٹکڑا تبرک کے طور پر لینا پسند کیا حضرت امام رضا علیہ السلام نے کپڑا بھی دے دیا اور رقم بھی دوبارہ عنایت فرماٸی اور اس قصیدے میں اپنی طرف سے ایک شعر کا اضافہ بھی کیا جس میں آپ نے اپنی شہادت اور قبر کے متعلق پیش گوٸی فرماٸی تھی
یہ واقعہ تاریخ نے محفوظ کیا جسے ہم تک جناب ارشاد ڈیروی نے دو اشعار کے ساتھ پہنچایا ہے جسے پڑھ کر ہمارا مودت اہل بیت کا شجر مزید گھنا اور مضبوط ہو گیا ہے ارشاد صاحب کی تاریخ بینی بھی کربلا کے لہو سے معطر ہے جس کی خوشبو سفر کرتے ہوٸے ہم تک پہنچ رہی ہے اور روح کی تقویت کا باعث بن رہی ہے
چوتھا مضمون ” مدرسے دی سنجان” ہے جس میں کربلا کا واقعہ نوحے کی صورت میں لکھنے والے وسیب کے شاعر حسین گوہر کا ذکر ہے ارشاد ڈیروی نے حسین گوہر کو مدرسے کی سنجان قرار دے کر ان کا مان بڑھایا ہے
پانچواں مضمون ” تقریظ و تحقیق” جس میں ارشاد ڈیروی صاحب نے معروف شاعر محقق کالم نگار اور صحافی سید مبارک علی شمسی کی نعت گوٸی پر جامع مضمون لکھا ہے شاہ جی ایک شعر میں کہتے ہیں:۔

الفاظ میڈے سامنے ہتھ بدھ کے کھڑے ہن
شمسی ہے میڈی نعت دا عنوان مدینہ
اس مضمون میں سید مبارک شمسی کی نعت گوٸی کی اسلوبیاتی صباحت اور محاسن پر بات چیت ہے اور انہیں وسیب کی نعت گوٸی کا گلستان سیراب کرنے پر حرف تحسین سے نوازا گیا ہے
چھٹا مضمون آفتابِ سخن ہے جس میں حاجی فقیر اثر انصاری کو سراٸیکی میں قرآن کا ترجمہ لکھنے پر خراجِ عقیدت پیش کیا گیا ہے
ساتواں مضمون تلمیحات دی خوشبو ہے آٹھواں معراج عقیدت دا ادراک اور نواں مضمون بیاض محسن ہے جس میں محسن نقوی کی ادبی خدمات کو سراہا گیا ہے اور انہیں اپنے وسیب کی پہچان کہا گیا ہے دسواں مضمون لکھن دا سنہپ ہے گیارہواں مضمون کربلا دے پچھوکڑ ہے بارہواں مضمون دعوٰی ہے تیرہواں خیانت دار شاعر چودہواں علامہ صاٸم چشتی اور عشق علی پندرہواں اہل تشیع کا قومی ترانہ اور آخری حسینی قلندر ہے اگر سب کی تفصیل لکھوں تو مجھے طوالت کا خوف دامن گیر ہے اس لیے یہاں پر تبصرہ ختم کرتا ہوں ارشاد ڈیروی صاحب ایک ادب پرور شخصیت ہیں جو نہ صرف شاعر ہیں بل کہ اچھے نثر نگار بھی ہیں میں اللہ کی بارگاہ میں ان کے لیے دعا گو ہوں کہ وہ اسی طرح ادب کی خدمت کرتے رہیں اور اپنے وسیب کی شان بڑھاتے رہیں۔آمین

میاں وہمی

تبصرہ نگار : اظہر عباس (کوئٹہ)

شدید دھند کا فائدہ اٹھاتے ہوئے ہم نے دفتر سے چھٹی ماری اور گھر بیٹھے مطالعہ میں مصروف ہو گئے۔ باہر دروازے پر دستک ہوئی تو بیٹی بولی ،”بابا جان، باہر شائد رائڈر روٹیاں لایا ہو”

ہم نے دروازہ کھولا تو سامنے ایک عجیب و غریب حلیہ میں شخص کھڑے تھے۔ ہمیں دیکھ کر موصوف ہکالاتے ہوئے بولے جناب اظہر صاحب کا گھر ہے۔
جی محترم بندہ ناچیز کو اظہر عباس کہتے ہیں۔ ہم تو موصوف کا حلیہ دیکھ کر حیران ہو رہے تھے کہ یہ کس دنیا کی مخلوق ہیں۔ شدید سردی میں بھی سفید کرتہ اور دھوتی زیب تن کئے ساتھ چھبتے سبز رنگ کا کوٹ پہنے، بغیر جراب کے نسواری بوٹ، سر پر سرخ ترکی ٹوپی اور ہاتھ چھڑی لئے موٹی گول شیشوں والی عینک لگائےاور ہاتھ میں ایک پیکٹ کھڑے ہمارا نام دوبارہ کنفرم کرتے ہوئے بولے اظہر عباس کوئٹہ والے!
جی محترم اظہرعباس کوئٹہ والے۔
مگر باہر تو مجیٹھا ہاوس لکھا ہے۔
جی ہمارے اباواجداد مجیٹھا امرتسر سے ہجرت کر کے کوئٹہ گئے تھے اس لئے گھر کا نام اپنےبزرگوں کے گاوں کے نام کی مناسبت سے رکھا ہے۔
تو جناب آگے بڑھیں اور گلے لگ کر فخر محسوس کیجئے کیونکہ آپ کسی عام شخصیت سے نہیں محمد توصیف ملک کی جانب سے بھیجے گئے میاں وہمی صاحب سے مل رہے ہیں۔ آپ خوش نصیب ہیں کہ پیکٹ میں موجود کتاب میں خود لے کر حاضر ہوا ہوں۔ مجھے ڈاکیہ پر اعتبار نہیں تھا۔ اور آپ کے وہم و گمان میں بھی نہ ہوگا کہ ہم میاں وہمی بقلم خود آپ کے پاس چل کر آئیں گے۔

ہم نے تو آپ کی مہمان نوازی کے قصے سن رکھے ہیں اور آپ ہیں کہ ہمیں اندر آنے کا بھی نہیں کہہ رہے۔ میاں وہمی کی یہ تعرف سن کر تو ہم سمجھ گئے کہ پیکٹ میں موجود کتاب محمد ملک توصیف نے نارووال سے بھیجی ہے مگر حیران تھے کہ بھیجی کس نمونے کے ہاتھ ہے۔

اسی دوران رایڈر بھی روٹیاں لے کر پہنچ گیا تھا، روٹیاں دیکھ کر میاں وہمی بولے کمال شخصیت ہے آپ کی ہمارے کھڑے کھڑے روٹیاں بھی منگوا لیں۔ آپ کی مہمان نوازی کا سن رکھا تھا آج دیکھ بھی لیا۔ نمونے نما میاں وہمی کی یہ بات سن کر نہ چاہتے ہوے بھی ہم نے انھیں اندر بلا کیا اور مہمان خانے میں بیٹھا دیا۔

گھر کے اندر داخل ہوے تو بیٹی بولی، بابا جان! روٹیاں آ گئیں کیا؟۔
جی بیٹی روٹیاں بھی آ گئیں اور بن بلائے مہمان بھی نازل ہو گئے ہیں۔محمد توصیف ملک کی کتاب لے کر میاں وہمی خود آن ٹپکے ہیں۔ آپ اور روٹیوں کا آرڈر کر دو اور مہمان خانے میں کھانا بھی بھیجوا دو۔

مہمان خانے میں میاں وہمی ہمارے کتابوں کے ریک کے پاس کھڑے فہیم عالم بھائی کی کتاب چچا تیز گام دیکھ رہے تھے۔ ہمیں دیکھ کر بولے عباس صاحب کھانے میں کیا ہے ہمیں تو دیسی کھانے پسند ہیں۔ یہ سن کر ہمیں غصہ بھی آیا کہ نا جان نا پہچان میں تیرا مہمان اور وہ بھی بے وبال جان منہ پھٹ مہمان۔

میاں جی آپ تشریف رکھیں جو پکا ہے وہ حاضر ہو جائے گا۔ اس گہما گہمی کے دور میں سردی اور دھند کے عالم میں محمد توصیف ملک نے آپ کو کیوں بھیجا ڈاکیہ بھی تو لا سکتا تھا یہ پارسل۔
جی عباس میاں وہ لا سکتا تھا مگر آپ کی مہمان نوازی سے لطف اندوز نہیں ہو سکتا تھا۔ مجھے تو شہباز اکبر الفت نے کہا تھا کہ جب کھانا کھا لو تو فوری کافی کا مطالبہ کرنا ان کے گھر کی کافی بہت اچھی ہوتی ہے۔ یہ سن کر ہمیں اور بھی غصہ آیا کہ یہ نمونے نما میاں وہمی تو سریش کی طرح چپکنے کا ارادہ رکھتے ہیں اور شدید غصے میں شہباز اکبر الفت کو دل ہی دل میں کوسنے لگے کہ اگر اب الفت اپنی کتاب "کہانی کار” لے کر آئے گا تو اس کو بغیر چائے کافی کے دروازے ہی سے رخصت کر دیا جائے گا۔ میاں جی آپ شہباز اکبر کو جانتے ہیں!جی عباس میاں وہ آنے سے پہلے میں نے فون پر ان سے آپ کے بارے میں پوچھا تھا۔

الفت تیری تو!!!! دل ہی دل میں ہم شہباز اکبر الفت کو کوسنے لگے۔
اتنے میں کھانا چن دیا گیا تھا اور میاں وہمی ہمارا انتظار کئے بغیر کھانے پر ٹوٹنے کے لئے تیار ہو چکے تھے۔

کھانا کھاتے ہوے میاں وہمی بولے میری تو وسیم کھوکھر ہیڈ مرالہ سے بھی بات ہوئی تھے۔ وسیم کہہ رہے تھے کہ آپ آنے والے مہمانوں کو بحریہ کی سیر کرائے بغیر نہیں آنے دیتے۔ اس لئے کھانے کے بعد آپ کو سیر بھی کرانی پڑے گی۔
یہ سن کے کر ہمارے غصے کی توپوں کا رخ اب وسیم کھوکھر کی جانب ہو گیا تھا۔ دل کیا کہ وسیم کو فون لگاوں اور ایک ہی سانس میں بہت ساری گالیاں اس کی خدمت میں پیش کروں۔

مجھے اس طرح دیکھ کر آپ کو خوشی تو ہوئی ہو گی کیونکہ آپ واحد ادیب ہیں جس کی خدمت میں میں ازخود حاضر ہوا ہوں۔ میاں وہمی کی باتیں سن کر ہمارے اندر غصے کا لاوا پک رہا تھا اور موصوف کہہ رہے تھے کہ ہمیں خوشی ہوئی ہو گی۔

کھانا کھاتے ہوئے اچانک بولے عباس صاحب میٹھے میں کیا ہے؟۔ ان کی اس بے تکلفی پر ہمارے غصہ میں مزید اضافہ ہو گیا۔ مگر مہمان تو اللہ کی رحمت ہوتے ہیں یہ میری ماں نے مجھے سمجھایا تھا،” وہ کہتی تھیں کہ آنے والا مہمان تمہارا کھانے نہیں آتا بلکہ تمہارا رزق لے کر آتا ہے۔ یہ سوچ کر ہمارا غصہ یک دم ختم ہو گیا۔

کھانا کھانے کے بعد میاں وہمی بولے ہمیں شام تک واپس لوٹنا ہے، دھند کا موسم ہے شکرگڑھ کی گاڑی نہیں ملے گی۔ آپ مجھے بحریہ ٹاون کی سیر کروائیں ہم واپسی پر آپ سے کافی پیئں گے اور واپس لوٹ جائیں گے۔ اب آپ ہمیں رات ٹھہرنے کی ضد مت کیجئے گا۔

کھانا کھانے کے بعد ہم نے گاڑی نکالی اور میاں وہمی کو ساتھ لے کر بحریہ ٹاون کی سیر کو نکل گئے۔ سب سے پہلے ہم نے ٹرایفلگار سفاری ویلاز کا رخ کیا۔ میاں وہمی کو یہ جگہ بہت پسند آئی کالے شیروں والی اس جگہ پر میاں وہمی مختلف پوز بنا بنا کر تصاویر بنوانے کی درخواست کرتے رہے۔ ایک ہی طرح کے تعمیر شدہ مکانات دیکھ کر میاں وہمی حیران ہونے لگے۔ اور بولے عباس صاحب یہاں گھروں کے دروازے نظر نہیں آ رہے۔
جی وہمی میاں یہاں سیکورٹی کا بہترین نظام ہے اس لئے گھروں کے دروازے نہیں ہوتے یہاں۔ وہاں سے نکل کر ہم چڑیا گھر پہنچ گئے۔ اس چھوٹے سے چڑیاں گھر میں شیر، بندر، مارخور، ہرن، شترمرغ کے علاوہ مور اور دیگر پرندوں کو دیکھ کر میاں جی بہت خوش ہو رہے تھے اور سلفیوں پے سلفیاں لیے جا رہے تھے اور ساتھ ہی ساتھ ہمیں بھی تصاویر لینے کی درخواست کئے جا رہے تھے۔

ہم نے گھڑی دیکھی تو میاں جی کو بتایا کہ جناب جلدی کیجئے یہاں موسم سرد ہو رہا ہے اور جلد اندھیرا ہو جائے گا۔ وہاں سے ہم نکلے تو الیگزینڈریا جا پہنچے۔ اہرام مصر کی تہذیب کو دیکھ کر میاں وہمی پرجوش ہو رہے تھے۔ فرعون کے مجسمے ۔۔۔۔ بڑی بڑی بلیاں اور مجسمے دیکھ کر ان کی خوشی دیدنی تھی۔ یہاں بھی مکانات ایک ہی طرز کے بنے ہوے تھے۔ تصاویر کا تقاضہ یہاں بھی جاری رہا۔ ہم وہاں سے نکلے تودنیا کی ساتویں بڑی مسجد پہنچے، خوبصورت مسجد دیکھ کر میاں وہمی کا ایمان تازہ ہو گیا، قرآن اکیڈمی میں نایاب قرآن مجید کے نسخے دیکھ کر بہت مطمئن نظر آ رہے تھے۔ وہاں سے نکلے تو سیدھا ایفل ٹاور پیرس پہنچ گئے۔ اتنا اونچا ٹاور دیکھتے ہوے وہمی میاں کی ترکی ٹوپی گرتے گرتے بچی۔ یہاں وہمی میاں کہنے لگے کہ ہماری ویڈیو بنائیں ہم نے ٹک ٹاک پر لگانی ہے۔ میاں وہمی کی خواہش کو دیکھتے ہوے ہم نے ان کی ویڈیوز بھی بنائیں اور تصاویر بھی۔

بحریہ ٹاون کی سیر کرتے ہوئے میاں وہمی بہت خوش تھے ۔ آلودگی سے پاک صاف ستھرا ماحول دیکھ کر میاں وہمی بولے کہ کیا واقعی ہم پاکستان میں گھوم رہے ہیں۔ یقین نہیں اتا، اتنی صفائی کسی اور جگہ نہیں دیکھی۔ اس سے پہلے کہ شام کے سائے گہرے ہوتے میاں وہمی بولے عباس صاحب چلیں اب گھر چلتے ہیں کافی پی کر واپس ناروال چلتا ہوں۔

ہم نے بھی شکر ادا کیا کہ چلو وہمی میاں سے جان چھوٹے گی۔ اس کے بعد ہم گھر لوٹ آئے۔ کافی پہلے سے تیار تھی۔ کافی پیتے ہوئے۔ میاں وہمی بولے کافی تو واقعی مزےدار ہے۔شہباز اکبر الفت نے جیسا کہا تھا ویسا ہی پایا آپ کو بحریہ ٹاون دیکھ کر دل بہت خوش ہوا مگر افسوس بھی ہوا۔

یااللہ خیر! اب وہمی میاں کو افسوس کس بات کا ہوا ہے۔ ہم نے تو پوری توجہ اور وقت دیا ہے محمد توصیف ملک کے مہمان کو۔

میاں جی دکھ کس بات کا۔۔۔۔!
عباس میاں یہاں ترتیب سے بنے خوبصورت طرز تعمیر کےمکانات دیکھے جگہ جگہ پارک دیکھے۔ صاف ستھری سڑکیں دیکھیں خوبصورت پلازہ اور شاپنگ مال دیکھے۔ لندن ، مصر اور پیرس دیکھا۔ دنیا کی ساتویں بڑی مسجد دیکھی، خوبصورت چوراہے اور فاونٹئن دیکھے بچوں کو پارکوں میں کھیلتے دیکھا۔ بزرگوں کو گپ شپ کرتے دیکھا۔ سب کچھ دیکھا مگر افسوس یہاں پبلک لائبریری نہیں دیکھی۔ کاش بحریہ ٹاون میں لائبریری بھی ہوتی۔ پارکوں میں چھوٹے کہانی گھر بھی بنائے جا سکتے ہیں۔ ان گوشہ کہانی میں لوگ بچوں کو کہانیاں سنا سکتے ہیں۔ کیوں عباس صاحب میں غلط کہہ رہا ہوں کیا؟۔

یہ سن کر ہمیں ہمیں لگا کہ میاں وہمی کچھ کچھ حقیقی بھی ہیں۔ ہم ان کی بات پر ابھی توجہ کر ہی رہے تھے کہ میاں وہمی بولے گاڑی آ رہی ہے اور ہم آپ سے رخصت چاہیں گے۔ آپ کے ساتھ گزرا وقت اچھا رہا۔ محمد توصیف ملک کے لئے کوئی پیغام۔
میاں جی آپ کی آمد کا شکریہ محمد توصیف ملک کی بھیجی کتاب کا شکریہ ادا کیجئے گا اور ان سے کہنا کہ، "اگر وہ چاہتا ہے کہ ان کا کردار امر ہو جائے اپنے کردار میاں وہمی کو ڈرامہ اور انیمیشن کی صورت میں بھی بچوں تک پہنچائے۔”

اتنے میں وہمی میاں کی گاڑی آ چکی تھی وہ ہم سے رخصت ہوئے تو ہم دیر تک سوچتے رہے جسے ہم نمونہ کہہ رہے تھے وہ تو کافی دلچسپ کردار کے مالک ہیں۔ ان کے جانے کے بعد ہم کافی دیر تک ان کے بارے میں سوچتے رہے۔ پھر خیال آیا کہ محمد توصیف ملک کی جانب سے بھیجا گیا تحفہ کھول کر تو دیکھا جائے۔
خوبصورت سرورق کی حامل کتاب میاں وہمی جس میں تیس کہانیاں شامل ہیں ہمارے ہاتھ میں موجود تھی۔ جو خوبصورت مزاح سے بھرپور کردار ان کی تحریروں میں تھا ہم اس سے بالمشافہ مل چکے تھے اور وہ بلکل ویسا ہی تھا جیسا محمد توصیف ملک نے تخلیق کیا ہے۔ کتاب آٹو گراف کے ساتھ ہمیں ملی جس پر محمد توصیف ملک کا شکریہ۔ بچوں کا کتاب گھر نے بہت اہتمام سے شایع کیا اس کتاب کو۔ کتاب انتساب سے لے کر اختتام تک دلچسپ اورمزاح سے بھرپور ہے۔ نذیر انبالوی بھائی نے ادب اطفال کے اس ستارہ کے بارے میں ایک جملہ لکھا ہے،”میاں وہمی آغاز سفر ہے، ابھی محمد توصیف ملک نے اگے،بہت آگے جانا ہے”۔
دلی خواہش ہوگی کہ یہ کردار ڈرامہ اور انیمیشن کی صورت بھی دنیا تک پہنچے۔

سید نصرت بخاری

شعورو ادراک حیدر قریشی نمبر

ہزار کام مزے کے ہیں داغ الفت میں

جو لوگ کچھ نہیں کرتے کمال کرتے ہیں

آج کل عام تاثر یہی ہے کہ رسالے کی اشاعت گھاٹے کا سودا ہے۔لیکن یہ رائے قائم کرنے والوں کو عشق کی وہ کہکشاں دکھائی نہیں دیتی جو رسالہ چھاپنے والا دیکھ رہا ہوتا ہے۔اگر اپنی جیب سے خرچ کر کے چند موضوعات  و شخصیات کو صدیوں تک محفوظ کر لینا گھاٹے کا سودا ہے تو پھر دوسروں کی جیب کاٹ لینے کو یقیناََ فائدہ مند سمجھا جائے گا۔میں نے اپنے ضلع کی صحافت پر ایک تحقیقی کتاب”ضلع اٹک کے اخبارات و رسائل "لکھی ہے؛اس کتاب کو مرتب کرتے ہوئے مجھے بار بار یہ خیال آتا رہا کہ اخلاص اور محبت سے کیا گیا کام ضائع نہیں جاتا؛جس نے اخلاص سے کسی اخبار یا رسالے کی ایک بھی اشاعت چھاپی ہو ،اہل انظر اور اہل دل کے ہاں اسے شرف قبولیت حاصل ہوتا ہے۔میں چونکہ خود ایک رسالے”ذوق”کا مدیر ہوں ،اس لیے غیر منافع بخش ہوتے ہوئے بھی رسالے کی اشاعت کے ان مفیدمخفی پہلوئوں سے آگاہ ہوں جو سطحی نظر رکھنے والے کو دکھائی نہیں دیتے؛جن میں سب سے بڑا فائدہ”تسکین”ہے؛لیکن اس کے لیے ایک شرط ہے؛وہ یہ کہ مدیر میں”انتخاب "کی صلاحیت اور شعوربہ درجہ اتم ہونے چاہیے۔یہی وہ خوبی ہے جو کسی رسالے کی قدروقیمت کی ضمانت ہے۔”نقوش” کےمحمد طفیل،”فنون” کے احمد ندیم قاسمی اور "اوراق” کے ڈاکٹر وزیر آغا اس کی مثالیں ہیں۔

شعورو دراک کے مدیر محمد یوسف وحید غالباََ ان مفید مخفی پہلوئوں سےآگاہ ہیں ، تب ہی تو ان کے حوصلے نہ صرف بلند ہیں بلکہ وہ "شعوروادراک”کو مزید ترقی دینے کے لیے ہیں۔وہ چاہتے ہیں کہ "شعوروادارک”کی علمی خدمات کو "ہائیر ایجوکیشن کمیشن "تسلیم کرے۔”شعور و ادارک”کے”حیدر قریشی: گولڈن جوبلی نمبر”کا مطالعہ کر کے میں اس نتیجے پر پہنچا ہوں کہ محمد یوسف وحید اپنے اس مقصد کو حاصل کرنے میں کامیاب ہو جائیں گے۔

حیدر قریشی صاحب سے میری دوستی سات آٹھ سال پرانی ہے۔میں ان کی تمام کتب کا مطالعہ کر چکا ہوں۔میں انھیں ان ادیبوں میں شمار کرتا ہوں جو حق سچ بیان کرنے میں پس و پیش نہیں کرتے ۔”ماہیا "کے حوالےسے ان کا کام بہت وقیع ہےجس کا اعتراف "شعور وادراک”کی انتظامیہ نے بھی کیا ہے۔مندرجہ بالا سطور میں میں نے کہیں لکھا تھا کہ مدیر کو تخلیقی،تنقیدی اور تحقیقی موضوعات کے انتخاب کا شعور ہونا چاہیے؛”شعورواداراک”میں شامل موضوعات مدیر کے باشعور ہونے کی دلیل ہیں۔مشمولہ انتخاب نہ صرف حیدر قریشی کی ادبی حیثیت کا اعتراف ہے بلکہ ادب کی دیگر اصناف پر کام کرنے والوں کے لیے بھی بہت مفید ہے۔مثلاََ:دیار غیر میں اردو پر تحقیق کرنے والوں کے لیے ڈاکٹر انورسدید کا مضمون "جرمنی میں پاکستان کا ادبی اور تہذیبی سفیر:حیدر قریشی”بہت کار آمد ہو گا۔روداد نویسی،نظم نگاری اور انشائیہ جیسے موضوعات پر لکھنے والوں کے لیے بھی اس شمارہ میں بہت کچھ ہے۔”اردو ادب اور الیکٹرونک میڈیا”ایسا مضمون ہے جس کی اہمیت اور افادیت میں کبھی کمی نہیں آئے گی کیونکہ اس میں ادب کے اس ارتقا کے متعلق وہ گفتگو کی گئی ہے،جو اس سے پہلے کسی نے نہیں کی۔

حیدر قریشی کے خطوط کے حوالے سے تشنگی کا احساس ہوتا ہے۔”بنام حیدر قریشی”: محمود ہاشمی کا اپنا خط ہے،اس سے حیدر قریشی کے فن، شخصیت  اور اسلوب  کا کوئی تعلق نہیں۔رسالے میں انٹرویو منتشر صورت میں ہیں۔بہتر ہوتا اگرانٹرویو کا باب قائم کر کے تمام مکالموں کو اس باب میں رکھا جاتا ؛بہر حال محمدیوسف وحیدداد کے مستحق ہیں کیونکہ  مدیر ایک ہوتا ہے اور پڑھنے والے سیکڑوں ہوتے ہیں،ہر ایک کی خواہشات کی تکمیل مدیر کے لیے ممکن ہی نہیں ہوتی۔