سجدہ دی حقیقی شاعری 

 ذاکر مشتاق حسین جعفری ، منکیرہ ( بھکر )

سب توں پہلے مقبول ذکی مقبول مبارک باد دے حق دار ہِن مبارک باد پیش کرینداں کیوں جو ایں اوکھے تے مصروف دور دے وچ اے جائیں کتاب ٫٫ سجدہ ،، لکھی ہے تے با ذوق لوگاں توں داد آفرین وی گدھی ہے بھئی اے اُو وقت ہے جو کہیں کُوں سر کھݨ دا ٹائم  وی کوئی نئیں مقبول ذکی اے کتاب ٫٫ سجدہ ،، لِکھ کے چھپا کے اے ثابت کیتائے جو منکیرہ دی سر زمین تے وی کوئی عاشقِ محمّد و آلِ محمّد صلی اللّٰہ علیہ وآلہ وسلّم موجود ہے ۔ پیاری شاعری ہے ۔ بلکہ اللّٰہ تعالیٰ دی اے عطا تھائی ہے ورنہ کوشش روز نال اے چیز نئیں ملدی ۔

کیڈا پیارا شعر لکھائے مقبول ۔

علی مرتضیٰ ؑ دا توں بچڑا امام اے

زمانہ بھجیندائے درود و سلام اے 

مقبول ذکی مقبول ہک اچھا ادیب تے اچھا انسان وی ہے ۔ منکیرہ ( بھکر ) دی پہچاݨ بݨ گئے ہِن شاعری دے حوالے نال میں بندہ حقیر ہک چھوٹا جیا مولا حضرت امام حسین علیہ السّلام دا ذاکر ہاں ہک مقام تے دوران مجلس میں مقبول ذکی مقبول دا اے شعر پڑھا ہے اچھی خاصی داد ملی ہے ۔

نال روضے دے بہہ نعت لکھدا راہواں 

ڈیھنہ او آوے دعائیں میں منگدا راہواں 

پاک محفل سجے عرشی فرشی آون 

میکوں رنگ لگ ونجن نعت پڑھدا راہواں 

اوں ویلے میڈے دل وچوں دُعا نکلی ہے اللّٰہ پاک قلم وچ ایں توں زیادہ اثر عطا کرے آمین 

دیکھو کتنی عقیدت و محبّت ہے اللّٰہ تعالیٰ تے اُوندے پاک رسول صلی اللّٰہ علیہ وآلہ وسلّم نال ۔ اہلیانِ  منکیرہ دے باذوق لوگاں دی اکھ کھُل گئی ہے جو ساڈی دھرتی تے وی ایجھیں ادیب لکھاری موجود ہِن ۔ حالانکہ پہلے وی بہوں سارے شاعر اتے ادیب ہِن جیوں سعید احمد حاشر ، محمّد اقبال بالم ، علی شاہ ( مرحوم ) میڈا پیو زوار سرفراز فقیر (  پیدائش 1933ء ۔  وفات 12 اگست 2008ء ) اووی شاعر و ادیب ہَن ۔ لیکن اُنہاں شاعراں اپنا کلام شائع نئیں کیتا اگر کیتا ہے تاں لوگاں کُوں کوئی خاص علم نئیں میں تاں اے چاہنداں ہاں ۔ اہلیانِ منکیرہ دے وچ زیادہ توں زیادہ شاعر پیدا ہون تاکہ عوام نِندر  کنوں بیدار تھیوے

جیویں جو علامہ ڈاکٹر محمّد اقبال رحمۃ اللّٰہ علیہ فرمائے گئے ہِن 

ہزاروں سال نرگس اپنی بے نوری پہ روتی ہے 

بڑی مشکل سے ہوتا ہے چمن میں دیدہ ور پیدا

اِسے شعر دے مصداق ہِن مقبول ذکی مقبول اللّٰہ کرے اے حوصلہ قائم و دائم رہوے اے کتاب ٫٫ سجدہ ،، سرائیکی رثائی ادب وچ اضافہ ہے حالانکہ ضلع بھکر ادب دی دھرتی ہے بہوں اچھے تے بزرگ قابلِ تعریف شاعر تھی گزرن جویں جو بابائے ذاکری بابا سید سید علی شاہ چھینوی ،  چھیناں والے ، سید غلام حسن شاہ تائب ، غلام سکندر خان غلام  موجودہ دور وچ سائیں نذیر احمد نذیر ڈھالہ خیلوی ، بئے وی کافی شاعر ہِن ۔

مذہبی شاعری مجموعہ ٫٫ سجدہ ،،

  دے وچ حمد ، نعت ، سلام ،، منقبت ، قصیدے ، مرثے ، ڈوہڑے ، اے ثابت کریندِن کہ مقبول ذکی مقبول ہک عظیم مذہبی عقیدت رکھڑ آلے امن پسند شاعر ہِن ایندے قلم و فکر وچ اللّٰہ پاک ہور برکت پاوے ۔

دیکھو قرآن کریم یعنی کلام اللّٰہ ہک مکمل ضابطہ حیات ہے اِس دے وچ کوئی شک و شبہ دی گنئش نئیں کیا خوب ( سُورۃ فیل) دی ترجمانی کیتی ہے ۔

اپݨے گھر دی مالک تئیں تاں آپ حفاظت کیتی ہے 

چھوٹے چھوٹے پکھواں کولوں ہاتھیاں کُوں مروایا ہے 

اے ہݨ دیکھو کیا سوہݨی گاہل لِکھی میں اے آدھا ہاں واقعی مقبول مقبول ہے میں ہک مجلس وچ اے حمد پڑھڑی ہے وڈی داد ملی ہے تاں میکوں اندازہ تھی گئے جو مقبول ذکی مقبول دی شاعری وچ وزن ہے ۔ وَل جڈاں میں سجدہ پڑھئے 

نظم سجدہ 

سجدے دے وچ ربّ دا عاشق 

خنجر گل تے رکھا فاسق 

سارا عالم ویݨ کریندائے

ہائے ہائے ساڈا رہبر صادق 

عرشی ، فرشی کُل نبیاں ؑ نے 

بیا ڈِٹھا سجدہ خالق 

نیزے تے وی پاک تلاوت 

اصلی اے قرآنِ ناطق 

ڈیکھ شہادت رنگ بدلا گئے 

کربل ، سورج ، مغرب ، مشرق 

شعر لکھاں میں آلِ نبی ؐ تے 

اللّٰہ میکوں کر چا لائق 

چوڈاں ؑ دا بس نپ گھِن دامن 

توں مقبول جو تھی ونج حاذق

اتھاں میں ہُݨ مجبور ہاں جو کیوں میں اِس کلام دی تعریف نہ کراں تاریخِ اسلام میڈے سامݨے ہے ۔ بابے آدم علیہ السّلام توں گھِن کے حضرت عیسیٰ علیہ السّلام تک کہیں نبی ( صہ) نہ ایجھاں سجدہ ڈتئے نہ وَل قیامت تک کوئی ڈیسی ذکی جویں جو اے سلام پاک حسین علیہ السّلام تے لکھائے ۔

سلام 

دینِ حق کوں عظمت بخشی مولا پاک حسین ؑ ہیں توں 

محشر توڑیں روشن راہسی مولا پاک حسین ؑ ہیں توں 

پاک نبی ؐ دی پگ اطہر ہے آقا تیڈے سر اطہر تے 

دینِ حق دا توں ہیں بانی مولا پاک حسین ؑ ہیں توں 

کیتا کل سنسار معطر تیڈے پاک لہو اے مولا 

خوشبو محشر توڑیں آسی مولا پاک حسینؑ ہیں توں 

قاسم ، اکبر ، اصغر بچڑے کُس گئے سارے کربل آخر 

تیڈے صبر دی شان نرالی مولا پاک حسین ؑ ہیں توں 

اوکھا سجدہ کربل تیڈا سجداں دی او شان بݨا گئے 

جگ دے سجدے بچ گئے باقی مولا پاک حسین ؑ ہیں توں 

دامن تیڈا جئیں ہے نپیا اُس دا بیڑا پار ہے مولا 

حوضِ کوثر تے او ویسی مولا پاک حسینؑ ہیں توں 

تیڈی پاک کریمی ایجھئیں حُر ؑ   کوں تئیں ہے بخشی عظمت 

جگ تے اوندی شان ہے بݨ گئی مولا پاک حسین ؑ ہیں توں 

کفر دا ملیا میٹ تئیں کیتا کل ایمان دا بچڑا توں ایں 

تیڈی عظمت ہے لاثانی مولا پاک حسینؑ ہیں توں 

کیا خوب صورت سلام تُساں ملاحظہ کیتئے  شاعر آلِ محمّد صلی اللّٰہ علیہ وآلہ وسلّم ، مقبول ذکی مقبول تے ایہا عقیدت ہے جہڑی سینہ چیر کے باہر نکل آندی ہے گاہل خق اے جو حق کوں جتنا دبایا ونجے اُتنا ہی ابھردائے ۔

میں اپݨے پاروں ہک شعر لِکھداں مقبول ذکی مقبول واسطے 

مقبول  دی  شاعری  پڑھ  کرائیں 

گونگے کوں وی بولݨ دا ڈھنگ آونجے

قارئین کتاب ٫٫ سجدہ ،، کوں پڑھݨ دی  میڈے سنگتیاں  خواہش ظاہر کیتی ہے جیندے وچ سید نیاز عباس شاہ اُنہاں پڑھݨ دا شوق ظاہر کیتئے بیا کافی لوگ ہِن ۔ جہڑے اے گاہل آ دھے پئے ہن تے میں وی سݨا ہے جو مقبول ذکی بہوں اچھے شاعر ہِن بندہ وی عظیم ہے اچھا اخلاق وی ہے حالانکہ او صحت دے شعبہ نال وابستہ تھی کے ڈُکھی لوگاں دی مرہم پٹی کریندے ہے تے او بیا شاعری دے ذریعے ڈُکھی  انساناں دے روحاں دی وی دوا وی کریندے ہے اے بہوں وڈا شرف ہے وڈی عزت ہے آلِ محمّد صلی اللّٰہ علیہ وآلہ وسلّم دے دربار پاک وچ اے کتاب ٫٫ سجدہ ،، لِکھ کے اُنہاں اپݨی تے اپݨے سنگتیاں دی آخرت سنواری ہے ۔ سرائیکی ادب دی دُنیا وچ بہوں وڈا اضافہ کیتائے ہے ۔ اللّٰہ پاک اپݨی بارگاہ وچ قبول فرمائے آمین