معمارِ حرف: جہانگیر بخاری 

کچھ لوگ عہدوں سے بڑے ہوتے ہیں اور کچھ عہدے لوگوں سے پہچانے جاتے ہیں۔ آغا جہانگیر بخاری صاحب کا شمار انہی شخصیات میں ہوتا ہے جن کی پہچان محض چیف ایگزیکٹو یا مدیر کے منصب سے نہیں بلکہ ان کے فکری وقار، ادبی ظرف اور انسان دوست رویے سے ہوتی ہے۔ آئی اٹک ڈاٹ کام ان کے لیے محض ایک ویب میگزین نہیں بلکہ ایک ذمہ داری اور ایک عہد ہے اپنی مٹی، اپنی تاریخ اور اپنے لوگوں کے ساتھ۔

میرا تعارف آغا جہانگیر بخاری صاحب سے کچھ سال قبل سوشل میڈیا کے توسل سے ہوا۔ یہ تعارف بہ ظاہر ایک معمولی رابطہ تھا مگر جلد ہی ایک بامعنی ادبی رشتے میں ڈھل گیا۔ میں نے اٹک ڈاٹ کام کے لیے اپنی تحاریر برائے اشاعت بھجوانا شروع کیں تو آغا صاحب نے کمال شفقت، توجہ اور اخلاص کے ساتھ نہ صرف انھیں شائع کیا بلکہ حوصلہ افزائی کے ایسے الفاظ عطا کیے جو ایک لکھنے والے کے لیے سرمایۂ عمر بن جاتے ہیں۔ ان کی جانب سے ملنے والا اعتماد محض تعریف نہ تھا بلکہ مزید لکھنے، بہتر لکھنے اور ذمہ داری کے ساتھ لکھنے کی تحریک تھا۔

آغا جہانگیر بخاری صاحب بہ حیثیتِ مدیر اس حقیقت پر کامل یقین رکھتے ہیں کہ لفظ محض اظہار کا ذریعہ نہیں بلکہ امانت ہوتا ہے۔ شاید اسی لیے آئی اٹک ڈاٹ کام پر شائع ہونے والی تحریروں میں سطحیت نہیں، سنجیدگی ہے،شور نہیں، ٹھہراؤ ہے، وقتی چکاچوند نہیں، دیرپا روشنی ہے۔ تاریخ کے آثار و احوال ہوں، جغرافیے کی خاموش صدائیں ہوں، گاؤں اور قصبوں کی گم ہوتی شناخت ہو یا شخصیات کی بے آواز خدمات،یہ سب ان کی مدیرانہ بصیرت کے سبب محفوظ ہو رہی ہیں۔

آغا صاحب کا کمال یہ ہے کہ وہ خبر کی تیز رفتاری کے اس دور میں بھی علم کی آہستہ روی کو ترجیح دیتے ہیں۔ وہ جانتے ہیں کہ خبر آج کی ہوتی ہےمگر تاریخ صدیوں کا بوجھ اٹھاتی ہے۔ اسی لیے آئی اٹک ڈاٹ کام میں تحقیق، دستاویز اور حوالہ بنیادی قدر ہیں۔ تاہم وہ اس سماجی شعور سے بھی غافل نہیں کہ بعض معقول خبریں معاشرے کے فکری افق کو روشن کر سکتی ہیں چناں چہ توازن ان کے مدیرانہ مزاج کی نمایاں خصوصیت ہے۔

شخصیات کے تعارف میں آغا جہانگیر بخاری صاحب کا رویہ نہایت محتاط اور باوقار ہے۔ اساتذہ ہوں یا اولیا، ادیب ہوں یا شاعر، علما ہوں یا سیاست دان، طبیب ہوں یا فن کار سب کو ان کے اصل سماجی کردار اور عملی خدمات کے آئینے میں دیکھا جاتا ہے۔ یہاں شخصیت پرستی نہیں کردار شناسی ہوتی ہے اور یہی فرق آئی اٹک ڈاٹ کام کو ایک سنجیدہ علمی پلیٹ فارم بناتا ہے۔

ایک مدیر کا اصل امتحان نئے لکھنے والوں کے ساتھ اس کا رویہ ہوتا ہے۔ آغا جہانگیر بخاری اس امتحان میں سرخ رو نظر آتے ہیں۔ وہ قلم کار کو محض مواد فراہم کرنے والا نہیں سمجھتے بلکہ اسے فکری سفر کا ہم سفر جانتے ہیں۔ رہنمائی، اصلاح، حوصلہ افزائی اور اعتماد یہ سب ان کے مدیرانہ اوصاف میں شامل ہے۔ ان کی سرپرستی میں بہت سے گم نام لوگ پہچان پا رہے ہیں اور بہت سے کم زور قلم مضبوط ہو رہے ہیں۔

یوں محسوس ہوتا ہے کہ آغا جہانگیر بخاری صاحب وقت کی تیز دھارا کے سامنے چراغ رکھے کھڑے ہیں اس یقین کے ساتھ کہ روشنی اگر خلوص سے جلائی جائے تو ہوا کا رخ بھی بدل سکتی ہے۔ آئی اٹک ڈاٹ کام اسی چراغ کی لو ہے جو زمین، زندگی اور زمانے کو ایک لڑی میں پرو کر آنے والی نسلوں کے لیے محفوظ کر رہی ہے۔

یہ تحریر محض خراجِ تحسین نہیں بلکہ ایک اعتراف ہے اس مدیر کے لیے جو خاموشی سے تاریخ لکھ رہا ہے بغیر کسی شور کے، بغیر کسی دعوے کے۔ اگر اٹک کی مٹی بولتی ہے، اگر اس کی تاریخ سانس لیتی ہے، اگر اس کے لوگ یاد رکھے جا رہے ہیں تو اس میں آغا جہانگیر بخاری صاحب کے قلمی وژن اور ادبی اخلاص کا حصہ ضرور شامل ہے۔دعا ہے آغا صاحب اسی لگن سے اپنے مشن کو جاری و ساری رکھیں۔ آمین

ڈاکٹر فرہاد احمد فگار

ڈاکٹر فرہاد احمد فگار کا تعلق آزاد کشمیر کے ضلع مظفرآباد(لوئر چھتر )سے ہے۔ نمل سے اردواملا اور تلفظ کے مباحث:لسانی محققین کی آرا کا تنقیدی تقابلی جائزہ کے موضوع پر ڈاکٹر شفیق انجم کی زیر نگرانی پی ایچ ڈی کا مقالہ لکھ کر ڈاکٹریٹ کی سند حاصل کی۔کئی کتب کے مصنف ہیں۔ آپ بہ طور کالم نگار، محقق اور شاعر ادبی حلقوں میں پہچانے جاتے ہیں۔ لسانیات آپ کا خاص میدان ہے‌۔ آزاد کشمیر کے شعبہ تعلیم میں بہ طور اردو لیکچرر خدمات سر انجام دے رہے ہیں‌‌۔ کالج میگزین بساط اور فن تراش کے مدیر ہیں اور ایک نجی اسکول کے مجلے کاوش کے اعزازی مدیر بھی ہیں۔ اپنی ادبی سرگرمیوں کے اعتراف میں کئی اعزازات اور ایوارڈز حاصل کر چکے ہیں۔آپ کی تحریر سادہ بامعنی ہوتی ہے‌.فرہاد احمد فگار کے تحقیقی مضامین پر پشاور یونی ورسٹی سے بی ایس کی سطح کا تحقیقی مقالہ بھی لکھا جا چکا ہے جب کہ فرہاد احمد فگار شخصیت و فن کے نام سے ملک عظیم ناشاد اعوان نے ایک کتاب بھی ترتیب دے کر شائع کی ہے۔