ولادت با سعادت حضرت امام حسن ؑ ( سرائیکی نظم )

شاعر : مقبول ذکی مقبول ( بھکر )

صبح سویرے نفیس شبنم گلاب تے آ حسن ؑ لکھا ہے

نبی ﷺ دے منبر دا ڈو جھا وارث امیر شاہِ وطن لکھا ہے

ہے آہدا قرآن اِیکوں لَو لَو تے ھَل تائے زَمن لکھا ہے

امام ابنِ امام حق دا امن وی اِیکو اَمن لکھا ہے

حسن ؑ دے حُب دار دا تاں بیڑا جہان دُنیا توں پار تھیسی

حسن ؑ دا دشمݨ خدا دا دشمݨ خوار تھیسی

                         ***

کریم خالق ہے خلق کیتا قلم وی اعلیٰ تے خلق اعلیٰ

اے چن ستارے وی خوش نظر دِن اے کم وی اعلیٰ تے خلق اعلیٰ

ہے صوم ہر ماہ توں عین افضل حکم وی اعلیٰ تے خلق اعلیٰ

کرم حسن ؑ دا جہان جگ تے کرم وی اعلیٰ تے خلق اعلیٰ

ذکی و زاہد تے شان و شاکر حبیبِ اکبر ﷺ نے چم کے چایا

تمام القاب پاک مولا ہے عرشِ اعظم توں گھِن کے آیا

                      ***

خدا دے اپݨے ایں نُور وچوں حسن ؑ دا ظاہر آ نُور ہویا

تھیا منور مدینہ سارا حجت دا جگ تے ظہور ہویا

آباد بی بی دی جھولی ہوئی تے خوش محمّد ﷺ حضور ہویا

گلاب طاہر تے پاک اطہر تُوں جِس ازلاں تُوں دور ہویا

آواز گونجی جہان اندر معصوم چوتھی ایہا لڑی ہے

جلی سخی توں ہے جئیں وی پنݨاں قبولیت دی ایہا گھڑی ہے

                      ***

اے آیا ملکِ امن دا حاکم علی ؑ دی پگ دا جناب وارث

کلامِ ربّی تے دینِ حق دا حضور عزت مآب وارث

تمام جاگیرِ مصطفٰی ﷺ دا علی ؑ دا بچڑا نواب وارث

اِیں حُسنِ کِائنات داوی بے شک ہے مجتبیٰ ؑ دا شباب وارث

علومِ نبوی ﷺ دے در دی چاہت اے قمرِ ہاشم جہان سچا

قرآنِ ناطق قرآنِ طاہر قرآن دا اے قرآن سچا

                     ***

فلک توں لیہہ کے ملائیکہ وی رسول ﷺ کُوں آ ڈِتی مبارک

تے ربِ اکبر وی بھیج چھوڑی نبی ﷺ ، علی ؑ کوں ملی مبارک

تے رنگ برنگی ہے دُنیا آئی جہان دے منہ سجی مبارک

تمام مرسل دی صف لگی ہے خوشی مبارک خوشی مبارک

ہے نُور چمکا علی ؑ دے گھر وچ شعاع وی ارض و سما تے گئی ہے

جنابِ زہرا ؓ دی جھولی دے وچ تے دید عرشِ اُلا تے گئی ہے

                    ***

کریسی پرچم بلند حق دا اے پاک بچڑا ہے مرتضیٰ ؑ دا

مقام رتبہ بلند اِیندا ہے حکم معبُودِ کبریا دا

ڈوہاں جہاناں تے ایندی شاہی اے ناز اللّٰہ تے مصطفٰی ﷺ دا

اے مرگیاں کوں کرے چا زندہ جہاں تے احسان مجتبیٰ ؑ دا

ہے شاہِ خلدِ برین مولا حدیث آقا ﷺ دی بس گواہ ہے

حسن ؑ دی الفت جے ہو سی مقبول ملسی ساکوں وی خلد جھا ہے

                       ***