غیرت کے نام پر بے غیرتی کی کہانی
ڈاکٹر رحمت عزیز خان چترالی
بلوچستان میں حالیہ دنوں سوشل میڈیا پر وائرل ہونے والی ایک دل دہلا دینے والی ویڈیو نے پورے ملک کو لرزا کر رکھ دیا ہے، جس میں مبینہ طور پر پسند کی شادی کرنے والے ایک جوڑے کو سرعام گولیاں مار کر قتل کرتے ہوئے دکھایا گیا ہے۔ یہ ویڈیو نہ صرف انسانیت کے وقار کو مجروح کرتی ہے بلکہ یہ ریاستی، قانونی، مذہبی اور قبائلی اقدار کے پیچیدہ تصادم کو بھی اجاگر کرتی ہے۔
پاکستان کے قبائلی اور نیم قبائلی علاقوں میں "غیرت کے نام پر قتل” ایک دیرینہ سماجی المیہ ہے، جو نوآبادیاتی دور سے لے کر موجودہ جدید ریاستی نظام تک کسی نہ کسی صورت میں موجود رہا ہے۔ انگریز دور میں بھی قتلِ غیرت کو بعض قبائلی علاقوں میں "روایتی انصاف” کا حصہ تصور کیا جاتا رہا، اور ریاستی ادارے اکثر ان معاملات سے صرفِ نظر کرتے رہے۔ آزادی کے بعد بھی ان علاقوں میں ریاست کی گرفت کمزور رہی اور مقامی جرگے، روایتی پنچایتیں اور سردارانہ نظام ایسے جرائم کو "جائز” یا "روایتی عدل” کے نام پر تحفظ دیتے رہے۔
اس ویڈیو میں جو بات انتہائی افسوسناک اور علامتی ہے، وہ یہ کہ مقتولہ لڑکی مکمل حجاب میں ملبوس ہے اور اپنے ہاتھوں میں قرآن پاک تھامے ہوئے ہے ،گویا وہ اپنی جان کے تحفظ کے لیے آخری روحانی اور اخلاقی حربہ استعمال کر رہی ہے۔ اس کے باوجود، بیس سے زائد مسلح افراد کے ہجوم میں کسی ایک دل میں بھی رحم نہیں جاگا اور لڑکی کو بےدردی سے گولیوں سے چھلنی کردیا گیا۔ اس کے بعد اسی بےرحمی سے لڑکے کو بھی قتل کر دیا گیا۔
وزیراعلیٰ بلوچستان سردار سرفراز بگٹی نے اس واقعے پر شدید ردعمل دیتے ہوئے اعلان کیا کہ ریاست کی مدعیت میں دہشت گردی کا مقدمہ درج کیا جا چکا ہے اور گیارہ ملزمان کو گرفتار کر لیا گیا ہے۔ لیکن تاریخ کا تلخ سبق یہ ہے کہ ایسے کیسز اکثر عدالتی موشگافیوں یا قبائلی دباؤ کی نذر ہو جاتے ہیں اور مظلوم کو انصاف نہیں ملتا۔
غیرت کے نام پر قتل کا اسلامی شریعت سے کوئی تعلق نہیں۔ ممتاز دینی اداروں، بشمول مفتیانِ کرام، کا واضح فتویٰ ہے کہ اگر ایک عاقل و بالغ مسلمان لڑکی اپنی مرضی سے شادی کرنا چاہے تو اسے شرعی اجازت حاصل ہے، اگرچہ خاندانی رضا کو اہمیت دی جاتی ہے۔ اسی طرح اگر کسی پر ناجائز تعلقات کا شبہ ہو بھی، تو اس کی سزا صرف مجاز عدالت ہی دے سکتی ہے، نہ کہ کوئی فرد، جرگہ یا قبیلہ۔ قرآن و سنت کے مطابق کسی کی جان لینا بغیر عدالتی فیصلہ ایک ناقابلِ معافی گناہ ہے۔
پاکستانی قانون خاص طور پر "غیرت کے نام پر قتل کی روک تھام کا ایکٹ 2016” ایسے جرائم کو ناقابلِ راضی نامہ جرم قرار دیتا ہے، لیکن اس قانون کے مؤثر نفاذ میں ریاستی کمزوری، عدالتی پیچیدگیاں اور قبائلی دباؤ بڑی رکاوٹ ہیں۔
یہ واقعہ اس امر کا غماز ہے کہ آٹھ دہائیوں میں ہم ایک ایسی سماج نہ بنا سکے جو فرد کی آزادی، انسانی وقار اور خواتین کے بنیادی حقوق کی ضمانت دے سکے۔ معاشرتی ترقی صرف عمارتیں بنانے یا ٹیکنالوجی میں آگے بڑھنے سے نہیں ہوتی، بلکہ انفرادی آزادیوں کے تحفظ اور پسماندہ رسوم کے خاتمے سے ہوتی ہے۔
اس سلسلے میں چند گزارشات پیش خدمت ہیں۔ قانون کا سخت اور غیر جانبدارانہ اطلاق کیا جائے تاکہ کوئی بھی قبائلی، سرداری یا مذہبی دباؤ انصاف کے تقاضوں میں رکاوٹ نہ بن سکے۔
اسلامی نظریاتی کونسل اور دیگر دینی ادارے عوامی سطح پر واضح طور پر یہ پیغام دیں کہ غیرت کے نام پر قتل سراسر حرام، مجرمانہ اور غیر اسلامی عمل ہے۔
قبائلی و نیم قبائلی علاقوں میں سماجی شعور کی مہمات چلائی جائیں تاکہ عوام کو اپنے اور دوسروں کے بنیادی حقوق کا شعور حاصل ہو۔
تعلیم، میڈیا اور نصاب کے ذریعے نوجوان نسل کو سماجی انصاف اور قانون کی بالادستی کا شعور دیا جائے۔
بلوچستان کا یہ سانحہ ایک آزمائش بھی ہے اور ایک موقع بھی، آزمائش ہمارے ضمیر، ریاستی اداروں اور سماجی ڈھانچے کی؛ اور موقع اس ظلم کے خلاف قانون و اقدار کی بنیاد پر ایک ایسی فکری اور قانونی جنگ چھیڑنے کا ہے، جس سے نہ صرف متاثرین کو انصاف ملے بلکہ آنے والی نسلوں کو ایسے واقعات سے بچایا جا سکے۔
Title Image Devils by Mike Singleton from Pixabay
رحمت عزیز خان چترالی کا تعلق چترال خیبرپختونخوا سے ہے، اردو، کھوار اور انگریزی میں لکھتے ہیں۔ آپ کا اردو ناول ”کافرستان”، اردو سفرنامہ ”ہندوکش سے ہمالیہ تک”، افسانہ ”تلاش” خودنوشت سوانح عمری ”چترال کہانی”، پھوپھوکان اقبال (بچوں کا اقبال) اور فکر اقبال (کھوار) شمالی پاکستان کے اردو منظر نامے میں بڑی اہمیت رکھتے ہیں، کھوار ویکیپیڈیا کے بانی اور منتظم ہیں، آپ پاکستانی اخبارارت، رسائل و جرائد میں حالات حاضرہ، ادب، ثقافت، اقبالیات، قانون، جرائم، انسانی حقوق، نقد و تبصرہ اور بچوں کے ادب پر پر تواتر سے لکھ رہے ہیں، آپ کی شاندار خدمات کے اعتراف میں آپ کو بے شمار ملکی و بین الاقوامی اعزازات، طلائی تمغوں اور اسناد سے نوازا جا چکا ہے۔کھوار زبان سمیت پاکستان کی چالیس سے زائد زبانوں کے لیے ہفت پلیٹ فارمی کلیدی تختیوں کا کیبورڈ سافٹویئر بنا کر عالمی ریکارڈ قائم کرکے پاکستان کا نام عالمی سطح پر روشن کرنے والے پہلے پاکستانی ہیں۔ آپ کی کھوار زبان میں شاعری کا اردو، انگریزی اور گوجری زبان میں تراجم کیے گئے ہیں ۔
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
کیا آپ بھی لکھاری ہیں؟اپنی تحریریں ہمیں بھیجیں، ہم نئے لکھنے والوں کی حوصلہ افزائی کرتے ہیں۔ |
