تبصرہ :۔ وہ در ختمِ نبوت کا

تبصرہ نگار:۔ سید حبدار قائم

قَالَ رَسُولَ اللہ اَنَا خَاتَمُ النَّبِیِین لَا نَبِیَّ بَعدی
( ترجمہ )
رسول اللہ نے فرمایا
میں آخری نبی ہوں میرے بعد کوئی نبی نہیں آئے گا

ہمارے پیارے نبی حضرت محمد صلى الله عليه واله وسلم آخری نبی ہیں جن کے بعد نبوت کا سلسلہ ختم ہو گیا اور قیامت تک آپ کی نبوت قائم رہے گی ہماری اذاں سے لے کر نماز تک میں اس بات کی شہادت ہے کہ آپ صلى الله عليه واله وسلم ہی آخری نبی ہیں ہم اذان میں جب حضور کی شہادت دیتے ہیں تو یہ بات دل کی اتھاہ گہرائیوں سے کہہ رہے ہوتے ہیں کہ

میں گواہی دیتا ہوں کہ حضرت محمد صلى الله عليه واله وسلم اللہ پاک کے رسول ہیں اگر بات یوں ہوتی کہ رسول تھے تو لوگ ہرزہ سرائی کرنے کی گنجائش نکال لیتے لیکن اس پر بھی قرآن اور حدیث نے مہر لگا دی ہے کیونکہ قرآن بھی آپ کو خاتم الانبیاء لکھتا ہے اور حدیث میں آپ خود فرماتے ہیں کہ
میں آخری نبی ہوں میرے بعد کوئی نبی نہیں آئے گا۔
جب بھی بات دفاعِ ختمِ نبوت کی کی جائے تو لوگ یوں محسوس کرتے ہیں کہ جیسے کوئی دہشت گرد تنظیم ہے جس کا مقصد جلاو گھیراو ہے اور حکومتی اداروں کو نقصان پہنچانا ہے حالانکہ ایسی کوئی بات نہیں دفاعِ ختمِ نبوت ایک امن کا درست راستہ اور سچا عقیدہ ہے جس پر ہر مسلمان کاربند ہے مجھے یہ بات کہتے ہوئے خوشی ہو رہی ہے کہ سوشل میڈیا پر بزمِ کھٹڑ میں دفاع ختم نبوت پر ایک طرح مصرع
”مسلماں جس پہ حاضر ہے وہ در ختمِ نبوت کا“
دیا گیا جس پر پاکستان کے ساتھ کشمیر اور انڈیا کے شعرا نے بھی ختمِ نبوت پر اشعار کہے کہیں کسی شعر میں یہ نہیں لگا کہ ہم کسی روڈ کو بند کروانے جا رہے ہیں یا آگ لگانے کے لیے نکلے ہیں کیونکہ ہمارا کام تو سیرتِ رسول محمد صلى الله عليه واله وسلم سے روشنی کشید کر کے محبتوں کو فروغ دینا ہے نہ کہ دہشت گردی اور حکومتی کاروائیوں میں دخل اندازی کرنا
سوشل میڈیا کے اس مشاعرے میں مہمان کے طور پر سید صابر حسین شاہ بخاری شریک تھے جن کی ختمِ نبوت کے لیے گرانقدر خدمات ہیں
قادیانی پوری دنیا میں اور خصوصاً ہمارے ملک میں اپنا نیٹ ورک مضبوط کر رہے ہیں آنے والے وقت میں ان کی جڑیں مزید پھیل جائیں گی کیوں کہ یہود و نصارٰی ان کی بھرپور پشت پناہی کر رہے ہیں
مسلمان ہوتے ہوئے ہمیں ختمِ نبوت کا دفاع کرنا چاہیے اور آنحضور صلى الله عليه واله وسلم کی کوئی شخص گستاخی کرے ہمیں برداشت نہیں کرنی چاہیے ہمیں اپنے بچوں کو ختمِ نبوت کے لیے ہر وقت تیار رکھنا چاہیے تا کہ وہ قادیانیوں کے پراپیگنڈے میں نہ آ جائیں کیوں کہ یہ ہمارے صبر کی آخری حد ہے سرکار کی عزت پر ہم ہمارے ماں باپ اور بیوی بچے سب قربان ہو جائیں تو بھی سرکار کی ختمِ نبوت کا حق ادا نہیں ہو سکتے

بزم کھٹڑ کے اس طرحی مصرع مشاعرے کے اختتام پر شعرا کو برقی اسناد سے بھی نوازا گیا ان کے کلام تزئین کیے گئے اور ان کو برقی شیڈ بھی عطا کی گئی
جن شعرا نے اس مشاعرے میں کلام لکھے ان میں سے ایک ایک شعر قارئین کی بصارتوں کی نذر کرتا ہوں ملاحظہ کیجیے:۔

تُو جا دہلیز پر اُس کی ، کرے گا تُجھ کو
پاکیزہ
کہ خود طیب ہے طاہر ہے وہ در ختمِ نبوّت
کا
حافظ محمد عبدالجلیل جنڈ

مجھے قرآن کی آیت سے یہ معلوم ہوتا ہے
جہاں کوثر کا ساغر ہے وہ در ختمِ نبوت کا

سید حبدار قاٸم آف غریب وال

جہاں آ کر گداگر بھی بنے دنیا کے ہیں سلطاں
زمانے بھر میں نادر ہے وہ در ختمِ نبوت کا
انعام الحق معصوم صابری ملتان

نہیں دنیا میں کوئی بھی جسے میں حال کہہ دیتا
جو حاضر اور ناظر ہے وہ در ختمِ نبوت کا
صدا کشمیری سرینگر انڈیا

کبھی تو غور یہ کر لیں کبھی تو راز یہ جانیں
یہ دنیا جس کی خاطر ہے وہ در ختم نبوت کا
یاسمین کنول پسرور

نہیں روئے زمیں پر در کوئی بھی ان کے در جیسا
جو ظاہر ہے جو برتر ہے وہ در ختمِ نبوت کا
الحاج نذیر شؔاکر

ہویدہ ہے مدینے کی فضا خوشبو سے احمدٌ کی
جہاں کوچہ بھی عاطر ، ہے وہ در ختمِ نبوت کا
ساحرہ نقوی

جہاں بھر میں ضیاء پھیلی ہدایت کی اسی در سے
کہ ہر شے میں جو ظاہر ہے وہ در ختم نبوت کا
سید مختارگیلانی قادری
ایراڑہ شریف، باغ آذاد کشمیر

خدا نے سب خزانے بھی رکھے دہلیزِ آقا پر
سخاوت پر جو قادر ہے وہ در ختم نبوت کا
مظہر علی کھٹڑ مہورہ فتح جنگ

بھلا کیا خوف ہو دل میں مصائب کے تلاطم کا
مرا جب حامی ، ناصر ہے وہ در ختمِ نبوت کا

ممتاز قادری نانپوری (انڈیا)

محمد ﷺکا پسینہ مشک و عنبر سے بھی ہے بڑھ کر
تبھی در جس کا عاطر،ہے وہ در ختم نبوت کا
آ نسہ مظہر ۔پنڈی گھیب

کہاں ممکن ہے ان کی شان لفظوں میں بیاں کرنا
قلم لکھنے سے قاصر ہے وہ در ختمِ نبوت کا
عباس انشال سرگودھا

خدا جو حکم دیتا ہے ، ہمیں اس کی خبر ہی کیا ؟
جہاں سے ہوتا صادر ہے ، وہ در ختمِ نبوت کا
خورشید عالم خورشید

ملے خیرات کلیوں کو، گلابوں اور پھولوں کو
پسینہ جن کا عاطِر ہے، وہ در ختمِ نبوت کا ﷺ
محمد شبیر شاؔہد مہروی رحمت آباد راجن پور پنجاب

وہ طاہر ہے مطاہر ہے قراں میں بھی گواہی ہے
زبانِ وصف قاصر ہے وہ در ختمِ نبوت کا
حیدر عباس رضا سعودی عرب

مری کیا بات ہے لوگو میں اک ادنی گدا ہوں بس
جہاں جھکتا سکندر ہے وہ در ختمِِ نبوت کا
منظور نونہ مئ کولگام کشمیر

رکھے گا لاج وہ سب کی ، چلو سارے خطا کارو
بھرم رکھنے کا ماہر ہے ، وہ در ختمِ نَبُوَّت کا
علامہ اَلِماسُ عباسی لاڑکانہ سندھ

دیارِ شاہِ والا ﷺ کی حقیقت بس خدا جانے
بتاؤں کیا میں آخر ہے وہ در ختمِ نبوت کا
محمد حسان اعظمی
شہر۔ اعظم گڑھ یو پی انڈیا عارضی رہائش ۔ لکھنؤ

سوشل میڈیا پر منعقد ہونے والے اس مشاعرہ میں تمام شعرا کی محبتِ رسول محمد صلى الله عليه واله وسلم دیدنی تھی کئی اشعار توارد کا شکار ہوئے لیکن سچی بات یہ ہے کہ ہر کسی نے اپنی سوچ فکر اور بلاغت نظری سے کام کر کے اللہ و رسول کو راضی کرنے کی بھرپور کوشش کی ہے میری دعا ہے کہ اللہ رب العزت ہمارے الفاظ کو قبول فرمائے اور ہماری توفیقات میں اضافہ فرمائے ۔آمین

Title Image by ekrem from Pixabay

صریر خامہ

تحریر ۔فائزہ بشارت 

سابقہ طالبہ ڈھوک بڑھکی۔پنڈی گھیب

وہ جنون کے اولین دن تھے ۔ نیلی روشنائی پپوٹوں سے ہوتی ذہن کو منور کرتی تھی ۔ کتب کے اوراق کی خوشبو نتھنوں میں گھسے جاتی تھی۔یہ ہماری تعلیم کے آغاز کے دن تھے ۔ ٹپکتے چھت والا ایک کمرہ ، دیواروں سے اکھڑتا مٹی کا لیپ ، حبس زدہ ماحول _ یہ ہمارا مکتب تھا جس میں میرے سمیت میرے کئی بچے زیر تعلیم تھے ۔ اسکول کی کوئی باقاعدہ عمارت نہ تھی سو ان کھنڈروں سے ہی ہمارے خوبیداہ خیالوں کی بیداری کا آغاز ہوا ۔ کبھی اگر سحاب آسمان کو لپیٹ میں لیتے تو ہماری استانی صاحبہ سوچنے لگ جاتیں تھیں کہ اگر باران رحمت کا نزول ہوا تو اس جابجا ٹپکتی چھت کا کیا درماں کروں گی ؟ کڑکتی گرم دوپہریں اور لو ، ہم اور ہمارے اساتذہ ایک چھپر میں گزارتے تھے ۔میرے ذہن میں اب تک میری استانی کے ماتھے سے ٹپکتے پسینے کے قطرے ویسے ہی تروتازہ ہیں گویا کل کی بات ہو ۔ اس عمارت کا ہمارے اساتذہ کرایہ دیا کرتے تھے جو کسی کو مفت میں بھی عنایت کی جائے تو کوئی ایک دن نہ گزارے ۔ تعلیمی سفر میں بہت سی ہجرتیں ہمارا مقدر تھیں ۔ کبھی ایک چھپر سے دوسرے میں تو کبھی دوسرے کھنڈر سے تیسرے میں ۔ ان ہجرتوں کا پس منظر گاوں کے باسیوں کا وہ لسانی تطاول ہوتا تھا جو ہمارے اساتذہ کا سہنا  پڑتا تھا ۔ لیکن 

♡یہ ہجوم زندگی ہے ، کنکریاں بھی آئیں گی 

ہنس کے خون پی جانا ، ظرف کو بڑا رکھنا

چار پانچ جگہ کی نقل مکانی کے بعد بالآخر گاوں کے ایک بزرگ نے اسکول کی عمارت کے لیے زمین عطیہ کی ۔ اسکول کی عمارت تو تعمیر ہوگئی مگر جنون کے اس دو آتشے سفر میں ابھی بہت سی سنگ باری ہونی تھی ۔ بہ ہمراہ اساتذہ جب ہم اپنے اسکول میں پہنچے تو مٹی کے اونچے ٹیکوں نے ہمارا استقبال کیا اور پانی کی قلت نے ہمارا ماتھا چوما ۔ نہ پینے کا پانی دستیاب تھا ، نہ سایہ دار درخت ، نہ دیواروں پہ بیل بوٹےاور نہ جھولے جو ہم سب نے اپنے تصوراتی اسکول میں سوچ رکھے تھے ۔ پھر ہمارے اساتذہ نے دوڑ دھوپ کی ۔ صنف نازک ہوتے ہوئے ہماری استانی نے سر پہ پگڑی باندھی ۔ معاشرے کے مغلوب کردار یعنی کے مرد کا روپ دھار کر عملی میدان میں نکلیں کیوں کہ ابھی ہمارے طفلانہ ذہن کو مزید درشتیوں سے ہم کنار کرنا باقی تھا ۔ وہ ہمارے جوتوں پہ پڑی دھول کو شفقت سے دیکھا کرتی تھیں ۔ جب ہم تفریح کے بعد ہانپتے ہوئے ایک دوسرے سے پانی مانگتے تو ان کی نظر پانی کی گرم بوتلوں میں ابلتے پانی سے آر پار ہو رہی ہوتی تھی۔  اس جدوجہد میں ہم سب ساتھ تھے ۔ وہ ہماری مسیحا تھیں اور ہم ان کے خضر ۔ جیسے تیسے کر کے سرکار  سے فنڈز کی رقم لی گئی ۔ صحن کو پختہ کرایا گیا۔ ہماری استانی نے اپنے ہاتھوں سے کیاریاں بنائیں پھر ان میں پودے لگائے ۔ صحن کو گملوں سے مزین کیا گیا ۔ ٹاٹ کی جگہ ہمارے بیٹھنے لیے کرسیاں اور بینچ لائے گئے ۔ دیواروں پہ خوبصوت نقش نفاری کی گئی ۔ جھولوں کا انتظام کیا گیا ۔ صاف پانی کا انتظام ہوا ۔زیادہ کام ہمارے اساتذہ نے خود کیا ۔ کچھ کاموں میں ہم اور سرکار کا فنڈ آٹے میں نمک برابر شامل تھے ۔اپنی اجرت سے زیادہ خرچ انہوں نے اسکول کے درودیوار پہ کیا ۔ دیکھتے ہی دیکھتے اسکول دیکھنے والوں کو دم بخود کرنے کگا ۔ لیکن یہ کوئی آسان سفر نہ تھا ۔ یہ ایک دو دن کی محنت نہ تھی ۔ یہ سالوں پہ محیط ایک داستان ہے ۔ یہ مراحل ہیں ۔ بہت طویل مراحل ۔ 

کتنی ہی دفعہ ہماری استانی نے خود کو خود تھپکی لگائی ہو گی ۔ کتنی ہی دفعہ انہوں نے اپنے کندھوں پہ خود سر رکھا ہو گا ۔ کتنی ہی ایسی خندقیں ہونگیں کہ آنکھ بند کر کےبس قدم دھر دیا ہو گا ۔ کئی ایسے مناظر ہونگے جو ان کے ذہن کے پردوں میں اب تک ابھرتے ہونگے ۔ کتنی ہی دفعہ ان کی آنکھیں چھلکی ہونگیں ۔ کتنے ہی ایسے لمحے ہونگے جب اپنی انگشت سے رخساروں کی جانب آتے قطرے صاف کیے ہونگے ۔ کئی دفعہ ہمت ٹوٹی ہوں گی تو ہمارے ننھے ہاتھوں سے بیس روپے فیس وصول کرتے ہوئے دوبارہ ہمت مجتمع کہ ہوگی ۔ قارئین کو شاید یہ لفاظی لگے لیکن 

* بندہ پرور جو ہم پہ گزری ہے 

        ہم سنائیں تو کیا تماشہ ہو ؟

ابھی ان اسکولوں کی نجکاری ہو رہی ہے ۔ یہ ایک اسکول کی کہانی نہیں ، کم و بیش بہت سے مکاتب اور اساتذہ کی آپ بیتی ہے ۔ حکومت کے ایوانوں میں تو بس درودیوار کا ٹھیکہ لگ رہا ہے لیکن اسمبلی میں براجمان بیوروکریٹس کو کیا معلوم کہ یہ عمارتیں نہیں داستانیں ہیں ۔ سیمنٹ اینٹ کی دیواریں نہیں ہمارے اساتذہ کی جوانیاں ہیں ۔ انہوں نے فقط اقتدار کی بدبودار ہولی کھیلی ہے مگر کچے صحن سے اڑتی گرد کا انہیں کیا ادراک ؟ ان کے ہاتھ میں الہ دین کا چراغ ہے مگرانہوں نے کسی صنف نازک کو الہ دین بنتےنہیں دیکھا ۔ ہم نے دیکھا ہے ہماری طفلانہ آنکھوں اور کچے حافظے میں سب محفوظ ہے ۔ 

بجائے اس کے کہ ان مکاتب میں نئے اساتذہ تعینات کیے جاتے ، مزید مرمت کی جاتی ، بقا کے لیے فنڈز دیے جاتے ۔ ان کی بھی سستے داموں بولیاں لگائی جا رہی ہیں ۔ سونے پہ سہاگہ یہ بات ہے کہ "یہ نجکاری ملک کے بجٹ پہ پڑتے بوجھ کو کم کرے گی ” مگر  *من خوب می شناسم پیران پارسارا*

ان چٹانوں سے ابھی پھوٹتے چشمے پیارے 

تو نے دیکھے ہیں نہیں میرے کرشمے پیارے 

یہ تو خود پہ ہے بیتی تو احساس ہوا 

ویسے سن رکھے تھے تیرے رحم کے چرچے پیارے 

کیسے میں نے اک جنوں کی ہولی میں اڑائے 

وہ میری عمر سجیلی ، میرے لمحے پیارے 

جیسے تو نے انہیں بازار میں نیلام کیا 

اتنے ارزاں تو نہ تھے پیشانی کے قطرے پیارے !!

_{Title Image by Designer}

شندور پولو فیسٹیول: چترال اور گلگت بلتستان کا فری اسٹائل کھیل

ڈاکٹر رحمت عزیز خان چترالی٭
(ورلڈ ریکارڈ ہولڈر)
rachitrali@gmail.com

شندور پولو فیسٹیول چترال اور گلگت بلتستان کا ایک مشہور سالانہ تقریب ہے جو دنیا کے بلند ترین پولو گراونڈ شندور میں ہر سال 7 جولائی سے 9 جولائی تک منعقد ہوتا تھا لیکن اب یہ فیسٹول 28 جون سے 30 جون تک منعقد ہوگا۔ شندور پولوگراونڈ جو کہ خیبر پختونخوا، پاکستان کی بالائی چترال کی وادی لاسپور سے منسلک سیاحتی مقام شندور میں واقع ہے۔ یہ علاقہ "دنیا کی چھت” کے نام سے جانا جاتا ہے، شندور دنیا کا بلند ترین پولو گراؤنڈ ہے، جو سطح سمندر سے 3,700 میٹر (12,139 فٹ) کی بلندی پر واقع ہے۔ چترال کا یہ تہوار جسے اکثر "کھیلوں کا بادشاہ” بھی کہا جاتا ہے، 20ویں صدی کے اوائل کا ہے اور یہ اب ایک اہم ثقافتی تقریب میں تبدیل ہوا ہے جو فری اسٹائل پولو کے روایتی کھیل میں تبدیل ہوگیا ہے۔تفصیلات کے مطابق وزیراعلی خیبرپختونخوا علی امین گنڈاپور نے اپر چترال کی وادی لاسپور سے منسلک شندور میں منعقد ہونے والے سالانہ شندور پولو فیسٹیول کی تاریخ کا اعلان کرتے ہوئے 28 جون سے منعقد کرنے کی منظوری دیدی ہے۔

وزیراعلی خیبرپختونخوا علی امین گنڈاپور نے ہدایات جاری کرتے ہوئے کہا ہے کہ فیسٹیول کیلئے تمام تیاریوں کو فی الفور حتمی شکل دی جائے۔ انہوں نے کہا کہ فیسٹیول کا انعقاد بہترین طریقے سے کیا جائے اور سیاحوں کو ہر ممکن سہولیات کی فراہمی یقینی بنائی جائے۔ مشیر سیاحت و ثقافت زاہد چن زیب نے وزیراعلی خیبرپختونخوا کی ہدایات کے مطابق تمام سٹیک ہولڈرز کو شندور پولو فیسٹیول کیلئے کی جانیوالی تیاریوں کو جلد مکمل کرنے کی ہدایت کرتے ہوئے کہا ہے کہ فیسٹیول کا کامیابی سے انعقاد اور آگاہی مہم ابھی سے چلائی جائے۔ انٹرنیشنل سطح پر مشہور اس فیسٹیول میں ہر سال کثیر تعداد میں سیاح شندور وادی کا رخ کرتے ہیں۔
شندور پولو فیسٹیول کی ابتدا کا ذکر چترال اور گلگت بلتستان کی مقامی داستانوں اور روایات سے ہوتی ہے۔ پولو جسے کھوار زبان میں "استور غاڑ” (گھوڑوں کا کھیل) اور "باچھانن اشٹوک” (بادشاہوں کا کھیل) کہا جاتا ہے، یہ کھیل صدیوں سے اس خطے میں کھیلا جاتا رہا ہے، قدیم دور سے ہی شندور پاس علامتی میدان جنگ بن گیا جہاں چترال اور گلگت بلتستان کی ٹیمیں اپنی بالادستی کے لیے مقابلہ کرتی ہیں۔ جدید پولو کے برعکس، جس میں سخت اصول و ضوابط ہیں، شندور میں کھیلا جانے والا ورژن فری اسٹائل ہے، جو اپنی روایتی جڑوں پر قائم ہے۔ پولو کی یہ شکل زیادہ سخت اور جسمانی طور پر محنت اور سختی زیادہ مانگتی ہے، جو مقامی کھوؤ، بلتی اور شین ثقافتوں کی لچک اور برداشت کی عکاسی کرتی ہے۔
یہ میلہ نہ صرف شرکاء کی تعداد کے لحاظ سے بلکہ اس کے تماشائیوں کے تنوع کے لحاظ سے بھی برسوں کے دوران پروان چڑھا ہے۔ اب یہ بین الاقوامی سیاحوں، ثقافتی شائقین، اور میڈیا کوریج کی ایک قابل ذکر تعداد کو اپنی طرف متوجہ کرتا ہے، جو ایک ثقافتی اور سیاحتی تقریب کے طور پر اس کی اہمیت کو اجاگر کرتا ہے۔
2024 کے لیے شندور پولو فیسٹیول 28 جون سے 30 جون تک منعقد ہونے والا ہے۔ یہ اعلان گزشتہ دنوں وزیر اعلیٰ خیبر پختونخوا علی امین گنڈا پور نے کیا، جنہوں نے سیاحوں کی آمد کے لیے محتاط تیاری اور سہولیات کی فراہمی کی ضرورت پر زور دیا ہے، مشیر برائے سیاحت و ثقافت، زاہد چن زیب کو حتمی تیاریوں کی نگرانی کا کام سونپا گیا ہے، اس تاریخی فیسٹول کے دوران اس بات کو یقینی بنایا جائے گا کہ تمام اسٹیک ہولڈرز ایک کامیاب تقریب کے لیے مؤثر طریقے سے ایک دوسرے کے ساتھ تعاون کریں۔

اس میلے کا اہتمام خیبرپختونخوا ٹورازم اتھارٹی نے پاکستان آرمی، لوئر اور اپر چترال کی ضلعی انتظامیہ اور چترال سکاؤٹس کے اشتراک سے کیا ہے۔ یہ کثیر جہتی تعاون اس تہوار کی اہمیت اور اس کے ہموار عمل کو یقینی بنانے کے لیے کی جانے والی کوششوں کو واضح کرتا ہے۔اس فیسٹول کے منعقد کرانے میں کچھ چیلنجز بھی ہیں ان کے حل کے چند سفارشات پیش خدمت ہیں:
1۔ بنیادی ڈھانچہ اور رسائی:
موجودہ صورتحال: ناہموار علاقے اور محدود انفراسٹرکچر شرکاء اور تماشائیوں دونوں کے لیے اہم چیلنجز کا باعث ہیں۔ شندور درہ تک رسائی بنیادی طور پر تنگ اور اکثر دشوار گزار پہاڑی سڑکوں سے ہوتی ہے۔ انفراسٹرکچر میں سرمایہ کاری بہت ضروری ہے۔ اپر چترال اور گلگت سائیڈ سے آنے والے سیاحوں کے لیے سڑکوں کے حالات کو بہتر بنانا بہت ضروری ہے، نقل و حمل کی زیادہ قابل اعتماد سہولیات کی تعمیر، اور باقاعدہ دیکھ بھال کو یقینی بناکر شندور تک رسائی کو بڑھایا جاسکتا ہے۔ مزید برآں، راستے میں ہنگامی طبی سہولیات کا قیام مسافروں کی حفاظت کو یقینی بنائے گا۔
2۔ رہائش اور سہولیات:
موجودہ صورتحال:ہر سال ملکی اور بین الاقوامی سیاحوں کی بڑھتی ہوئی تعداد چترال، گلگت بلتستان اور شندور کا وزٹ کرتی ہے، شندور پولو فیسٹول کے موقع پر ان کے لیے رہائش کی طلب اکثر سپلائی سے بڑھ جاتی ہے۔ یہاں کے پہاڑی علاقوں میں بنیادی سہولیات جیسے صاف پانی، صفائی ستھرائی، اور کھانے پینے کی خدمات بھی انتہائی تشویش کا باعث ہیں۔
اس صورت حال کو کنٹرول کرنے کے لیے ماحول دوست کیمپ سائٹس اور چھوٹے گیسٹ ہاؤس جیسے پائیدار رہائش کی سہولیات کو تیار کرنا ماحول کو نقصان پہنچائے بغیر سیاحوں کو مناسب رہائش فراہم کر سکتا ہے۔ مقامی کاروباری اداروں کے ساتھ شراکت داری کے ذریعے بنیادی سہولیات کو بڑھایا جائے اور سیاحوں کے لیے مجموعی تجربے کو بہتر بنایا جائے تاکہ وہ ہر سال شندور پولو فیسٹول دیکھنے کے چترال کا رخ کرسکیں۔
3۔ ماحولیاتی پائیداری:
اس فیسٹول کے دوران ہزاروں کی تعداد میں سیاحوں کی چترال اور گلگت بلتستان آمد شندور کے ساتھ ساتھ چترال اور دیگر شمالی پاکستان کی وادیوں کے نازک ماحولیاتی نظام پر دباؤ ڈالتی ہے۔
اس سلسلے میں تجویز ہے کہ ماحولیاتی رہنما خطوط پر سختی سے عمل درآمد کیا جائے، ماحول دوست طرز عمل کو فروغ دیا جائے، اور ماحولیاتی تحفظ کے بارے میں آگاہی مہم چلانے سے منفی اثرات کو کم کیا جا سکتا ہے۔ منتظمین کو چترال اور شندور کی قدرتی خوبصورتی کو برقرار رکھنے کے لیے ویسٹ مینجمنٹ پروٹوکول کو بھی نافذ کرنا چاہیے تاکہ ماحولی آلودگی سے بچا جاسکے۔
4۔ ثقافتی تحفظ:
اگرچہ یہ تہوار چترال اور گلگت بلتستان کی مقامی ثقافت کو فروغ دیتا ہے، لیکن مقامی کھوؤ اور شمالی ثقافت کے روایتی پہلوؤں کو کمزور کرنے کا خطرہ بھی ہے۔اس بات کو یقینی بنایا جائے کہ مقامی کمیونٹیز تنظیم میں فعال طور پر شامل ہوں اور میلے کو انجام دینے سے اس کی ثقافتی سالمیت کو برقرار رکھنے میں مدد مل سکتی ہے۔ اس تہوار کی تاریخی اور ثقافتی اہمیت کو اجاگر کرنے والے آگاہی پروگراموں کو ایونٹ میں شامل کیا جانا چاہیے۔
5۔ مارکیٹنگ اور فروغ:
گو کہ یہ میلہ چترال اور گلگت بلتستان میں مقامی طور پر مشہور ہے لیکن اس میں زیادہ بین الاقوامی سیاحوں کو راغب کرنے کی صلاحیت بھی موجود ہے۔
اس سلسلے میں تجویز ہے کہ مارکیٹنگ کی ایک مضبوط حکمت عملی جس میں سوشل میڈیا مہمات، بین الاقوامی سیاحتی بورڈز کے ساتھ شراکت داری، اور بڑے شہروں میں پروموشنل ایونٹس شامل ہیں اس فیسٹول کی مقبولیت کو بڑھا سکتے ہیں۔ میلے کے منفرد پہلوؤں کو ٹی وی، ریڈیو، اخبارات اور سوشل میڈیا پلیٹ فارمز پر اجاگر کیا جائے، اونچائی پر کھیلے جانے والے پولو میچز اور شاندار قدرتی مناظر، وسیع تر سیاحوں کو اپنی طرف متوجہ کر سکتے ہیں۔

شندور پولو فیسٹیول نہ صرف چترال اور گلگت بلتستان کے کھیلوں کی تقریب ہے بلکہ یہ ایک ثقافتی جشن بھی ہے۔ اس کھیل کے فروع اور سیاحوں کو پاکستان کی طرف راغب کرنے کے لیے بنیادی ڈھانچے، رہائش، ماحولیاتی پائیداری، ثقافتی تحفظ، اور مارکیٹنگ کے چیلنجوں سے نمٹنا ضروری ہوگا۔ خیبرپختونخوا حکومت ان سفارشات پر عمل درآمد کرتے ہوئے اس تہوار کی مدد سے ملکی اور بین الاقوامی سیاحوں سے زر مبادلہ کمانے کے ساتھ ساتھ اپنے صوبے کو معاشی مشکلات سے نکال سکتا ہے، اس بات کو یقینی بنایا جائے کہ شندور پولو فیسٹول اپنی منفرد روایات اور قدرتی خوبصورتی کو برقرار رکھتے ہوئے بین الاقوامی سطح پر ایک اہم ثقافتی تقریب بھی بنے اور سیاح جوق در جوق چترال، وادی کالاش اور گلگت بلتستان کا رخ کر سکیں۔