کیا آپ لوگوں کے دلوں پر راج کرنا چاہتے ہیں؟

کسی کو یاد کرنے وجہ کچھ بھی نہیں ہوتی
جو دل پہ راج کرتے ہیں زبان پہ رقص کرتے ہیں

دنیا میں موجود ہر شخص پھر وہ خود چاہے کیسا ہی کیوں نہ ہو وہ یہ ضرور چاہتا ہے کہ معاشرے میں اس کی عزت ہو ، لوگ اس کا احترام کریں ، اس کے دوست ، ساتھی ، رشتہ دار ، ملازم یا مالک اس سے محبت کریں، اس کی قدر ہو ، لوگ اس سے مشورہ کریں ، اپنی پریشانیاں اس کے ساتھ شیئر کریں ، وہ محفلوں کی جان ہو اس کے بعد بھی اس کے تذکرے ہوں، لوگ اس کی کامیابیوں کو دل کھول کر بیان کریں ۔ اگر آپ بھی یہ مقام حاصل کرنا چاہتے ہیں تو یاد رکھیں دنیا میں کوئی بھی کام محنت کے بغیر حاصل نہیں ہوتا اس مقام تک پہنچنے کے لیے آپ کو پانچ کام کرنا بند کرنے ہوں گے

یہ پانچ اصول سیکھنے سے پہلے اپنے ذہن میں ایسا شخص لے کے آئے جو کامیاب ہے ، جس سے لوگ محبت کرتے ہیں جس کے ساتھ لوگ جڑنا چاہتے ہیں تو نیچے دیے گئے پانچ اصول آپ کو فائدہ دیں گے
پہلا اور سب سے اہم کام یہ ہے کہ تنقید کرنا بند کر دیں اور بلا وجہ کی تنقید نہ صرف کام بلکہ تعلقات خراب کرتی ہے ایسا کیوں نہیں ہوا ، یہ تو ہو ہی نہیں سکتا، ایسا تو کبھی سوچا ہی نہیں تھا اس کے بارے میں۔ تنقید سے کچھ نہیں ہوتا سوائے تنقید کرنے والا اپنا من جلاتا ہے اور لوگ اس سے نفرت کرتے ہیں اس لیے تنقید کرنے کی بجائے لوگوں کی مدد کیا کریں جس شعبے میں آپ کو تجربہ حاصل ہے تو بڑے ہی خوبصورت، میٹھے انداز سے اپنے سے جونیئرز کو خود سکھائیں تاکہ آپ سے لوگ محبت کریں
دوسرا اہم کام شکایت مت کریں خصوصا وہ اساتذہ جو چاہتے ہیں اپنے شاگردوں کے دل میں ان کا راج ہو ۔ وہ والدین اور پرنسپل کو دیکھتے ہی شکایات کا انبار نہ لگا دیا کریں دو ساتھیوں کی ایک ساتھ دو دن کی ڈیوٹی تھی خود ہی ایک صاحب نے یہ طے کیا کہ ایک ایک دن کر لیتے ہیں اب ایک دن اپنا کام کرنے کے بعد دوسرے دن پہلے صاحب کو صرف اس بات کا مسئلہ تھا کہ دوسرا ساتھی وہاں کیوں نہیں حالانکہ پہلے ساتھی پہ نظر رکھنا ان کی ڈیوٹی میں شامل نہیں تھا سارا وقت یہ شور مچائے رکھا کہ میں نے کام کیا ہے یہ کیوں نہیں کر رہے اس سے لوگ آپ سے نفرت کرتے شکایت کرنے کی بجائے اپنے کام میں خلوص پیدا کریں۔ دوسروں کی مدد کریں
تیسرا کام رونا رونا بند کر دیں آپ نے نہیں دیکھا ہوگا کہ کوئی روتلو محفلوں کی جان ہو، لوگ اس کا انتظار کریں اس کے برعکس لوگ ایسے شخص سے جان چھڑاتے ہیں اس لیے یہ لوگ اکثر ماضی میں رہتے ہیں پچھلا استاد اچھا تھا ، وہ والا مالک اچھا تھا، وہ دوست اچھا تھا اس لیے یہ آئیڈیل شخصیت کے مالک نہیں ہوتے حال میں رہیں خود بھی جیں دوسروں کو بھی جینے دیں کے اصول پر کام کریں آپ کی عزت بڑھ جائے گی
چوتھا کام بددعا مت دیں گے، ناکام، نامراد شخص ناپسندیدہ شخصیت، ایسا مالک، ایسا استاد، ایسا ٹیم لیڈر ہمیشہ لوگوں کی حقارت ، نفرت کا باعث بنتا ہے جو ہر وقت چھوٹی چھوٹی باتوں پہ ، جب بھی کام اس کی مرضی کے خلاف ہو فورا بد دعائیں دینے لگ جائے اکثر بزرگ جو چڑچڑے طبیعت کے مالک ہوتے ہیں یہاں تک کہ کئی والدین بھی بلا سوچے سمجھے اپنی اولادوں کو چھوٹی چھوٹی باتوں پر تنقید کرتے ہیں اور ان کو بد دعائیں دینا شروع کر دیتے ہیں ۔ تیرا کام کبھی نہ بنے ، تو ہمیشہ نامراد رہے ، تو ہمیشہ ناکام رہے ایسے لوگ قابل نفرت ہوتے ہیں یہ کبھی محفلوں کی جان نہیں بن سکتے ایک تو بات ذہن میں رکھیں بددعا دینے وقت کہ آپ کوئی ولی اللہ تو ہیں نہیں جو فورا ہی آپ کی بددعا لگ جائے الٹا آپ خود معاشرے میں، اس علاقے میں ، ارد گرد کے لوگوں کی نظر میں قابل نفرت شخصیت بن جائیں گے اگر آپ چاہتے ہیں کہ پسندیدہ شخصیت بنیں تو بددعا دینے کی بجائے دعا دینے کی کوشش کرے اللہ آپ کے لے آسانیاں کرے، اللہ آپ کو یہ کام کرنے کی توفیق دے ، اگر آپ میرے کام کا ذریعہ نہیں بن سکے اللہ آپ کو کسی اور کا ذریعہ بننے کی توفیق دے ۔ برداشت اور قوت کا مظاہرہ کریں تاکہ لوگ آپ سے محبت کر سکیں
پانچواں اور آخری کام اگر آپ یہ چاہتے ہیں کہ اپ لوگوں کے محبوب بن جائیں محفلوں کی جان بنیں اور لوگ اپ کا انتظار کریں آپ کی معمولی باتوں کو بھی سبق آموز لیں آپ کے رویے سے سیکھیں آپ کے اخلاق کو پسند کریں تو آپ موازنہ کبھی مت کریں ۔ موازنہ چاہے دو شاگردوں کے درمیان ہو یا کسی بھی جگہ پہ ہو موازنے کے مثبت نتائج کبھی بھی نہیں آتے اس کے مقابلے میں لوگوں کے ساتھ مل کے مقابلے کی عادت بنائیں اچھا استاد کبھی شاگرد کو نالائق نہیں سمجھتا دو لائک شاگردوں کے درمیان ایک نالائق کو بٹھا کر ان کو ایک ٹیم بنا کر ٹیم سے سوالات پوچھتا ہے تو جب وہ مل کے جواب دیتے ہیں تو ایوریج بندے کی بھی حوصلہ افزائی ہوتی ہے اسی طرح اکثر آپ نے دیکھا ہوگا محفلوں میں ناکام شخص کے سامنے جب کسی دوسرے کی تعریف ہونے لگتی ہے مثلاً کسی عورت کی خوبصورتی کی، کسی کے کھانوں کی، کسی استاد کی تعریف ہونے لگتی ہے تو وہ جلن محسوس کرتا ہے وہ اس کی تعریف کرے یا خوش ہو الٹا وہ اپنے قصیدے پڑھنا شروع کر دیتا ہے کہ میری یہ ڈش بہت اچھی ہے ، میں بھی تو خوبصورت ہوں ، میرا بھی یہ سبجیکٹ بہت اچھا ہے تو وہ چاہے کلاس کے شاگرد ہوں یا محفل میں بیٹھے ہوئے لوگ ہوں وہ فورا لوگوں کی نظروں سے گر جاتا ہے

جو بھی شخص دلوں پر راج کرنا چاہتا ہے کہ چاہے وہ ایک اچھا ٹیم لیڈر ہو ، چاہے وہ استاد ہو ، چاہے کسی خاندان کا سربراہ ہو یا معاشرے کے کسے بھی شعبے سے تعلق رکھتا ہو۔ اس کوچاہے کہ تنقید,شکایت رونا رونے ، بددعا اور موازنہ کرنے کی بجاے تعریف کرے ،حقائق کے مطابق اور مثبت گفتگوکرے ،لوگوں کہ زندگی میں مداخلت بند کر دے، دعائیں دے کر حوالہ بڑھاے ،مل کر مقابلہ کرنے کی صلاحیت اپناے
ہمیشہ کی طرح یہی کہوں گا کہ ذرا نہیں مکمل غور کریں تجربہ شرط ہے

_{Title Image by Microsoft Designer}

آنریری کیپٹن راجہ ارشاد حسین

ضلع چکوال کو غازیوں ، شہیدوں اور کھلاڑیوں کی سر زمین ہونے کا اعزاز حاصل ہے اس خطہ میں ایسے بے شمار نوجوان منظر عام پر آئے جنہوں نے عسکری خدمات کے ساتھ ساتھ کھیل کے میدان میں بھی قومی اور بین الاقوامی سطح پر ملک و قوم کا نام روشن کیا ان میں سے ایک ضلع چکوال کے نامور ایتھلیٹ اور قومی ٹیم کے کوچ آنریری کیپٹن راجہ ارشاد حسین ہے انہوں نے ایتھلیٹکس کے میدان میں کامیابیاں حاصل کرنے کے علاوہ کوچنگ کے شعبہ میں بھی ملکی سطح پر گراں قدر خدمات انجام دین ان کی عمدہ کوچنگ کی بدولت وطن عزیز میں کئی ایسے کھلاڑی منظر عام پر آئے جنہوں نے نیشنل انٹرنیشنل سطح پر ملک و قوم کا نام روشن کیا۔

آنریری کیپٹن ارشاد حسین 15 ستمبر 1938ء کو تحصیل و ضلع چکوال کے گاؤں تاسہ موہڑہ میں پیدا ہوئے ان کے والد محترم کا اسم گرامی راجہ فرمان علی ہے ارشاد حسین نے ملازمت کا اغاز 15 دسمبر 1953ء کو پاکستان آرمی آرٹلری سینٹر اٹک سے کیا انٹر سروسز ایتھلیٹکس مقابلوں میں کامیابی کے بعد قومی ٹیم کے چناؤ کے لئے گائے گئے تربیتی کیمپ کے لیے منتخب ہوئے 1952ء میں قومی سطح کے مقابلوں میں کامیابیوں کا آغاز کیا 1958 میں نیشنل ایتھلیٹکس مقابلے پشاور میں منعقد ہوئے جن میں محمد ارشاد 110 میٹر ہرڈلز دوڑ کے ایونٹ میں سلور میڈل جیتنے میں کامیاب رہے 1958ء میں ہی انٹرنیشنل ایتھلیٹکس مقابلوں کا انعقاد ہانگ کانگ میں ہوا جن میں ارشاد حسین نے 110 میٹر ہرڈلز دوڑ کے ایونٹ میں سلور میڈل کا اعزاز حاصل کیا ارشاد حسین نے 1965ء اور 1971ء کی پاک بھارت جنگوں میں عسکری خدمات بھی انجام دیں جرآت و بہادری کے ساتھ وطن عزیز کا دفاع کرنے پر ارشاد حسین کو حکومت پاکستان کی طرف سے 13 اپریل 1971ء کو تمغہء ستارہ جرآت سے نوازا گیا اور 23 مارچ 1975ء میں پاکستان آرمی کی طرف سے تمغہء خدمت ملٹری درجہ دوم عطا کیا گیا انہیں پاکستان آرمی کی طرف سے بطور بیسٹ سپورٹس مین حج بیت اللہ کی سعادت نصیب ہوئی 1999ء میں آٹھویں سیف گیمز نیپال کے شہر کھٹمنڈو میں منعقد ہوئیں جن میں ان سے تربیت حاصل کرنے والے ایتھلیٹ مقصود احمد (ٹمن تلہ گنگ) نے 200 میٹر دوڑ کے ایونٹ میں گولڈ میڈل جیتنے کے علاوہ نیا قومی ریکارڈ بنانے کا اعزاز بھی حاصل کیا 1991ء میں سیف گیمز کا انعقاد سری لنکا کے شہر کولمبو میں ہوا جن میں ارشاد حسین کی عمدہ کوچنگ کی بدولت ہی مسسز شبانہ اختر نے 100+4 میٹر ریلے دوڑ اور 400+ 4 میٹر ریلے دو ڑ کے ایونٹ میں دو بروز میڈل حاصل کئے 1995ء میں سیف گیمز انڈیا کے شہر مدراس میں منعقد ہوئیں جن میں شبانہ اختر 100+4 میٹر ریلے دوڑ ، 400+4 میٹر ریلے دوڑ کے ایونٹ میں برونز میڈل اور لانگ جمپ کے ایونٹ میں گولڈ میڈل جیتنے میں کامیاب رہیں ۔ شبانہ اختر 100 ، 200 میٹر ، ٹرپل جمپ ، ہائی جمپ ، لانگ جمپ اور HEC LAN کے ایونٹ میں قومی چیمپین اور ریکارڈ ہولڈر رہ چکیں ہیں۔

آنریری کیپٹن ارشاد حسین کو متعدد ممالک میں ایتھلیٹکس ٹیم کے ساتھ بطور کوچ اور آفیشل جانے کا موقع ملا 1989ء میں سیف گیمز اسلام اباد میں منعقد ہوئیں جن میں انہوں نے بطور آفیشل اور قومی خواتین ایتھلیٹکس ٹیم کوچ کی حیثیت سے شرکت کی تمام تر کامیابیوں کے بعد ارشاد حسین کو 15 اکتوبر 1982ء کو پاکستان آرمی سے ریٹائرڈ ہو گئے ریٹائرمنٹ کے بعد کئی سال تک پنجاب سپورٹس بورڈ میں کوچنگ کے شعبہ سے وابستہ رہے 1997ء میں اہلیان علاقہ نے آنریری کیپٹن راجہ ارشاد حسین کو بلدیاتی انتخابات میں ممبر ضلع کونسل چکوال منتخب کیا اس کے علاوہ وہ ممبر ضلعی عشرو زکوٰۃ کمیٹی رہے آنریری کیپٹن ارشاد حسین 20 اگست 2014ء کو حرکت قلب بند ہونے کی وجہ سے اس جہاں فانی سے رخصت ہو گئے ان کی نماز جنازہ علاقہ کی روحانی شخصیت سید غلام علی شاہ صاحب گدی نشین دربار عالیہ چھبر سیداں نے پڑھائی نماز جنازہ میں عوام الناس کے علاوہ ضلع چکوال کی اہم سیاسی و سماجی شخصیات نے شرکت کی انہیں فوجی اعزاز کے ساتھ ابائی گاؤں میں سپرد خاک کر دیا گیا دعا ہے کہ اللہ تعالٰی انہیں جنت الفردوس میں اعلی مقام عطا فرمائے امین ۔

یونان میں گرفتار پاکستانی صحافی کی قونصلر تک رسائی

بین الاقوامی تعلقات اور سفارتی قواعد و ضوابط کی تاریخ میں قونصلر رسائی ہمیشہ سے ایک اہم موضوع رہا ہے۔ ویانا کنونشن 1963ء کے تحت، جب کسی ملک کا شہری کسی دوسرے ملک میں گرفتار ہوتا ہے تو اسے قونصلر رسائی کا حق حاصل ہوتا ہے۔ قونصلر رسائی کا مقصد یہ ہوتا ہے کہ کسی بھی فرد کے قانونی حقوق محفوظ رہیں اور اسے مناسب مدد فراہم کی جائے۔

حال ہی میں یونان میں پاکستانی صحافی اور میراتھن رنر مونا خان کی گرفتاری کا معاملہ خبروں کی زینت بنا ہوا ہے۔ ان پر الزام ہے کہ انہوں نے یونان میں پاکستان کا قومی پرچم لہرانے کی کوشش کی تھی۔ یہ واقعہ اس وقت پیش آیا جب مونا خان ہائیکنگ کے لیے یونان گئی تھیں اور پولیس نے ان کا فون بھی ضبط کر لیا تھا۔ ان کے کوچ محمد یوسف نے ان کی گرفتاری کی تصدیق کرتے ہوئے بتایا کہ گرفتاری سے ایک گھنٹہ قبل ان کا مونا خان سے آخری بار رابطہ ہوا تھا۔
پاکستانی وزارت خارجہ نے یونانی حکام سے فوری طور پر صحافی مونا خان کے لیے قونصلر رسائی کی درخواست کی تھی، جو کہ بالآخر منظور کر لی گئی ہے۔ قونصلر رسائی کی فراہمی اس بات کی نشاندہی کرتی ہے کہ بین الاقوامی قوانین اور اصولوں کی پاسداری کی جا رہی ہے۔ قونصلر رسائی کی بدولت پاکستانی حکام کو یہ موقع ملے گا کہ وہ مونا خان کے کیس کی تحقیقات کریں اور ان کی قانونی مدد کو یقینی بنائیں۔
یہ واقعہ کئی پہلوؤں سے قابل غور ہے:
سفارتی آداب اور قانونی حقوق: مونا خان کی گرفتاری نے سفارتی آداب اور قانونی حقوق کے بارے میں کئی سوالات اٹھائے ہیں۔ کیا یونانی پولیس کا رویہ مناسب تھا؟ کیا مونا خان کے قانونی حقوق کا احترام کیا گیا یا نہیں؟
قومی پرچم کا احترام: قومی پرچم کا لہرانا کسی بھی شہری کا حق ہے اور اس کے ذریعے اپنی قومی شناخت کا اظہار کیا جاتا ہے۔ مونا خان کی گرفتاری سے یہ سوال پیدا ہوتا ہے کہ آیا ان کا یہ اقدام غیر قانونی تھا یا نہیں۔
میڈیا اور عوامی ردعمل: مونا خان کی گرفتاری کے اس ناخوشگوار واقعے نے پاکستانی میڈیا اور عوام میں بڑی ہلچل مچائی ہے۔ پاکستانی حکومت اور عوام نے اس معاملے پر شدید ردعمل ظاہر کیا ہے، جس سے پتہ چلتا ہے کہ قومی وقار اور شہریوں کے حقوق کے تحفظ کو کتنی اہمیت دی جاتی ہے۔
صحافی مونا خان کی آزادی کے لیے چند تجاویز نیچے دیئے گئے ہیں جن پر عمل کرکے ان کو آزاد کرایا جاسکتا ہے:
قانونی معاونت: پاکستانی حکومت کو مونا خان کی قانونی معاونت کے لیے بہترین وکلاء فراہم کرنے چاہئیں تاکہ ان کے حقوق کی حفاظت ہو سکے اور وہ جلد از جلد رہائی حاصل کر سکیں۔
سفارتی رابطے: یونانی حکومت کے ساتھ سفارتی سطح پر مضبوط روابط قائم کرنے کی ضرورت ہے تاکہ مستقبل میں ایسے واقعات کی روک تھام کی جا سکے۔
میڈیا کے کردار کا تعین: میڈیا کو اس معاملے میں ذمہ داری کا مظاہرہ کرتے ہوئے حقائق پر مبنی رپورٹنگ کرنی چاہئے تاکہ عوام میں درست معلومات پہنچ سکیں۔

عوامی آگاہی: پاکستانی عوام کو بین الاقوامی قوانین اور ان کے حقوق کے بارے میں آگاہی فراہم کرنے کی ضرورت ہے تاکہ بیرون ملک سفر کرتے وقت وہ اپنے حقوق اور ذمہ داریوں سے آگاہ ہوں۔
صحافی و ایتھلیٹ مونا خان کی گرفتاری کا واقعہ ایک یاد دہانی کے طور ہمارے سامنے ہے وہ یہ کہ بین الاقوامی قوانین اور سفارتی آداب کی پاسداری کس قدر اہم ہے۔ قونصلر رسائی کی فراہمی سے یہ امید کی جا سکتی ہے کہ مونا خان کو جلد انصاف ملے گا اور ان کی قانونی حقوق کا تحفظ یقینی بنایا جائے گا۔ پاکستان اور یونان کے درمیان سفارتی تعلقات کو مزید مضبوط بنا کر ایسے واقعات کی روک تھام کی جا سکتی ہے۔

دھوکے بازوں سے بچیے

کیا آپ کا یہ مسئلہ ہے کہ آپ اپنے دوستوں ، رشتہ داروں اور جاننے والوں سے دھوکہ کھا جاتے ہیں اور یہی نہیں بلکہ ایک دفعہ دھوکہ کھانے کے بعد دوبارہ ان پہ اعتماد کر لیتے ہیں اور وہ پھر آپ کو اسانی سے دھوکہ دے جاتے ہیں اگر آپ کا واقعی یہ مسئلہ ہے تو یہ تحریر آپ کے لیے ہے

ہم اپنے کاروباری ساتھیوں سے لے کر سیاسی لیڈروں سے دھوکہ کھا جاتے ہیں ۔ مایوس نہ ہو ہر انسان زندگی میں کبھی نہ کبھی دھوکا کھاتا ہے سمجھدار وہ ہے جو اس سے سبق سیکھے وہ کسی دانا کا قول ہے
عقل بادام کھانے سے نہیں بلکہ دھوکہ کھانے سے آتی ہے۔
اسی سلسلے میں ہمارے نبی اکرم صلی اللہ علیہ وآلہ وسلم جو تمام انسانیت کی رہنمائی کا ذریعہ ہیں آپ کا ارشاد مبارک ہے کہ "جس نے دھوکہ دیا وہ ہم میں سے نہیں”
انسان کے دھوکہ کھانے کی چار بنیادی وجوہات ہیں ان کا سد باب کر کے قوی امکان ہے کہ بڑے نقصان سے بچ سکتے ہیں ۔ پہلی وجہ یہ ہے کہ آپ انتہائی سادہ ہیں آپ سادہ کپڑے پہنتے ہیں سادہ زندگی تو یہ ایک اچھی بات ہے یہاں سادگی سے مراد میری یہ ہے کہ آپ معاملہ فہم نہیں ہے اپ لوگوں کی باتوں اور چاپلوسی کو اچھی طرح نہیں سمجھ پاتے ۔ عام طور پر لوگوں کی تین قسمیں ہوتی ہیں
ایک جو دوسروں کی ہر بات کو ہی سچ سمجھ لیتے ہیں اکثر دھوکہ کھا جاتے ہیں ۔ دوسرا وہ جو ہر بات کو شک کی نظر سے دیکھتے ہیں کسی بات پر بھی اعتبار نہیں کرتے یہ لوگ بھی آئیڈیل نہیں ہوتے ہر وقت الجھاؤ کا شکار رہتے ہیں تیسرا وہ لوگ جو نہ ہر بات کو شک کی نظر سے دیکھتے ہیں اور نہ ہر بات پہ آنکھیں بند کر کے یقین کر لیتے ہیں ، بلکہ ہر معاملے پر تحقیق کر کے اس پر اعتماد کرتے ہیں۔ ان لوگوں کو دھوکہ دینا آسان نہیں ہوتا
دھوکہ کھانے کی دوسری وجہ ہے لالچ آپ نے سنا ہوگا کہ
ٹھگ نہیں مر سکتے جب تک لالچی زندہ ہے
اس کی مثال عام ہے ایک شخص کو کال آتی ہے کہ آپ کی گاڑی نکلی ہے اور اس کو آپ تک پہنچانے کے لیے اتنے پیسے درکار ہیں یا بے نظیر انکم پروگرام میں آپ کے اتنے پیسے نکلے ہیں وغیرہ وغیرہ یا سوشل میڈیا پر ویڈیو کے شروع میں لکھا ہوتا ہے یہ صرف ایک شربت ایک ہفتہ پینے سے آپ پتلے ہو جائیں گے آپ اس ویڈیو کو فورا دیکھتے ہیں حیرانگی کی بات یہ ہے کہ ایسے لوگ بھی ویڈیو دیکھ رہے ہوتے ہیں جن کے جسم پر بوٹی کا نام و نشان نہیں ہوتا اب وہ اس بات میں اپنا دماغ استعمال نہیں کرتے کہ اگر ایک شربت پینے سے کوئی شخص پتلا ہو سکتا ہے تو دنیا میں کوئی شخص موٹا ہی نہ ہوتا اور اگر جس کمپنی نے لاکھوں روپے کی گاڑی آپ کو دی ہے تو وہ اب گاڑی آپ تک پہنچانے کے لیے آپ سے کچھ پیسے کیوں مانگ رہے ہیں اس لیے اپنے آپ کو لالچ سے بچائیں پھر آپ کو کوئی دھوکہ نہیں دے سکے گا۔
دھوکہ کھانے کی تیسری وجہ آپ کے ارد گرد شاطر لوگ ہیں جو اپ کو اپنی گھٹیا چالوں میں پھنسا لیتے ہیں جیسے آپ کو نئے کاروبار کے لیے کسی کو ملنے جانا ہے تو وہ بندہ اپ کے سامنے فقیر کو 10 روپے کی بجائے 100 روپے دے دیتا ہے یا رشتے کے لیے آنے والے مہمانوں کے سامنے لوگ خود کو دیندار بنا کر پیش کرتے ہیں لیکن ایک دفعہ دھوکہ تو کوئی بھی دے سکتا ہے لیکن اگر آپ بار بار دھوکہ کھاتے ہیں تو قصور آپ کا اپنا ہے آپ اناڑی ہیں آپ کو معاملہ فہمی نہیں آتی ۔ یہاں آپ کو لوگوں سے فورا متاثر ہونے کی عادت ہو چھوڑنا ہوگا

دھوکہ کھانے کی چوتھی اور سب سے بڑی وجہ یہ ہے کہ آپ خود کو نہیں جانتے آپ اپنے بارے میں لوگوں کی رائے پر بھروسہ کرتے ہیں جیسے آپ عام خدوخال کے مالک ہوں اور خود کو بہت خوبصورت سمجھتے ہو دوسرا آپ کی اس کمزوری کا فائدہ اٹھائے گا اور اپ کو یہ یقین دلے گا کہ آپ بہت خوبصورت ہیں اور اس کے ساتھ ساتھ بہت سی دوسری باتوں پر یقین دلا کر اپنا کام نکال لیتا ہے اور آپ دھوکہ کھا جاتے ہیں اس لیے اپ کو چاہیے کہ ہر ایک کی بات پر فورا یقین نہ کریں ، خود کو لالچ سے کوسو دور رکھیں ، لوگوں سے جلد اور بلا وجہ متاثر نہ ہوں اور اپنے بارے میں خود جانے اور اپنی رائے خود بنائیں اس کے برعکس جب کوئی آپ کو پھنسانے کے لیے کوشش کرے گا تو حقیقت پسندی کا مظاہرہ کریں کوئی آپ کو دھوکہ نہیں دے پائے گا ذرا نہیں مکمل غور کریں

_{Title Image by Mohamed Hassan from Pixabay}

ٹیکے والا تربوز

گرمی وطن عزیز پر اپنے عروج پر ہے ۔ ہر شخص اپنے آپ اور اپنے اہل خانہ کو اس کے اثرات سے بچانے کی کوشش کر رہا ہے ویسے ایک بات آپ لوگوں کی خدمت میں عرض کر دوں کہ گرمی تخ ملنگا، زیرہ، سونف، آلو بخارا سے کم صرف ہمارے ہی ملک میں ہوتی ہے باقی دنیا اس راز سے شاید لا علم ہے جو درخت لگا رہی ہے بہرحال اس موسم میں تربوز کسی نعمت عظیم سے کم نہیں یہ ہمیں سورج کی شعاعوں سے محفوظ رکھتا ہے ۔ اس کے ساتھ ساتھ دل ، آنکھوں اور جلد کے لیے مفید ہے ۔ بلڈ شوگر جسم میں بڑھنے نہیں دیتا ۔ جسم کو پانی کی کمی سے بھی بچاتا ہے تربوز میں اینٹی آکسائیڈنٹس ،غذائی اجزاء اور فائبر وافر مقدار میں موجود ہوتے ہیں جو جسم کو صحت مند رکھنے کے ساتھ ساتھ وزن میں کمی کا سبب بنتے ہیں اس کا لال رنگ دیکھنے سے ہی راحت محسوس ہوتی ہے پر سوشل میڈیا کے دانشوروں کا کیا کریں جو بلا تحقیق کچھ بھی کہہ دیتے ہیں ہے اور اس کا زیادہ تر نشانہ غریب لوگ ہوتے ہیں ۔ یہ لوگ صرف اپنے ویوز بڑھانے کے لیے کسی بھی مفید چیز بلا وجہ تنقید کرتے ہیں ان میں سے اکثریت کم علم لوگوں کی ہوتی ہے جن کو سمجھدار لوگ نظر انداز کر دیا کرتے ہیں لیکن حال ہی میں کسی نے ویڈیو میں مبینہ طور پر دعوی کیا کہ تربوز کو انجیکشن لگایا جاتا ہے جب کسانوں سے پوچھا گیا کہ کیا آپ نے تربوز کو کبھی انجکشن لگاتے دیکھا ہے ؟ انہوں نے جواب دیا کہ ہماری ساری زندگیاں کھیتوں میں گزر گئی ایسا تو ہم نے دیکھا نہ سنا ۔ اکثر کہتا ہوں کہ ہمارا رویہ ہی غیر پڑھا لکھا ہے . اگر یہ واقعہ کسی ترقی یافتہ ملک میں ہوا ہوتا تو فورا اس بندے کو عدالت میں اپنے بیان کو ثابت کرنے کے لیے کہا جاتا ۔

حیرانی کی بات ہے کہ دیہاتوں سے تعلق رکھنے والے سیاست دانوں نے بھی توجہ نہ دی جو ان خود ساختہ دانشوروں کو روکنے کے لیے عملی اقدامات کرتے ۔ الیکٹرانک میڈیا ماہرین کو بھی عوام کی آنکھیں کھولنے کی زحمت نہیں ہوئی کسانوں کا نقصان ہوتا رہا ان کی محنت پر پانی پھر گیا اور یہ عوام کے اتنے ہی خیر خواہ ہیں تو بجلی کے بل کم کروا دیں، کھاد کی قیمت کم کروائیں، دوائیوں کی قیمت کم کروائیں لیکن پتہ ہے نا وہاں مافیا ہے اس لیے لے دے کے تربوز ہی نظر آیا ۔ سوشل میڈیا کے بارے میں عوام کو سمجھنا چاہیے کہ یہ دانشور اس چوہے کی طرح ہے جو بند میں سوراخ کرتے ہوئے یہ نہیں سوچتا کہ اس کی صرف اس ایک حرکت سے گاؤں کے گاؤں ڈوب جائیں گے ۔ اسی طرح کا ایک دانشور ایک گاؤں میں رہتا تھا ایک دن ایک شخص ایک بڑی اونچی جگہ پر چڑھ گیا یہاں سے اترنا ممکن نہیں تھا تو اس دانشور نے رسی پھینکی اور بولا کے کمر پہ باندھ لو اور نوجوان لڑکوں کو بولا زور سے کھینچو جیسے ہی لڑکوں نے زور لگایا وہ دھڑام سے زمین پہ آ گرا اور جان سے ہاتھ دھو بیٹھا ۔ دانشور شرمندہ نہیں ہوا بلکہ بولا کہ اس کی قسمت میں لکھا تھا میں نے تو اسی طرح کئی لوگ کنویں سے باہر نکالے ہیں۔ عوام میں ذی شعور لوگ جیسے اساتذہ، علماء وکلا اور ایماندار صحافی ان کو اپنا کردار ادا کرنا چاہیے عوام سوشل میڈیا پہ ٹرینڈ کو فالو نہ کریں اور تربوز اور اس طرح کے دوسرے پھلوں کو کھا کر اپنی صحت بڑھائیں کیونکہ ماہرین کے مطابق تربوز کو ٹیکہ نہیں لگایا جا سکتا بلکہ یہ لوگ عوام کو ٹیکہ لگا کر بیوقوف بناتے ہیں اور مال کماتے ہیں اسی لیے ان سے دور رہیں ۔ کھائیں پئیں اور خوش رہیں

_{Title Image by Microsoft Designer}