Blog

خون کا عطیہ

عظیم ہیں وہ لوگ جو بغیر کسی لالچ کے دوسروں کی زندگیاں بچانے کے لیئے خون کے عطیات پیش کر دیتے ہیں ایک طرف تو وہ خون دے کر دوسرے کی جان بچا رہے ھوتے ہیں جبکہ دوسری طرف ان کا یہ عمل ان کی اپنی صحت کی بہتری کے لیئے معاون ثابت ھوتا ھے ہر سال دنیا بھر میں 14 جون کو خون کے عطیہ کے حوالہ سے عالمی دن منایا جاتا یہ دن کارل لینڈ اسٹینر کی سالگرہ 14 جون کی مناسبت سے عالمی ادارہ صحت کی ہدایات کی روشنی میں منایا جانا ھے کارل لینڈ اسٹینر وہ طبی ماہر تھے جہنوں نے پہلی بار بلڈ گروپ سسٹم ایجاد کیا جس کی بدولت آج تک اسی سسٹم کے تحت محفوظ طریقہ سے ضرورت مند افراد کو خون منتقل کیا جا رہا ھے خون کے عطیہ کے حوالہ سے عالمی دن کا مقصد خون کے عطیات کی اہمیت کو اجاگر کرنا اور خون کے عطیات فراہم کرنے والے افراد کو خراج تحسین پیش کرنا ھے دنیا بھر میں سالانہ دس کروڑ افراد خون کا عطیہ دیتے ہیں مگر اس کے باوجود ھزاروں افراد بر وقت خون نہ ملنے سے موت کے منہ میں چلے جاتے ہیں صرف پاکستان میں سالانہ تیس لاکھ خون کے عطیات کی ضروریات ہیں۔ لیکن بد قسمتی سے ہمارے ملک میں خون کے عطیات بارے شعور بہت کم ھے نہ صرف عام باشندے بلکہ پڑھے لکھے صحت مند افراد بھی خون کا عطیہ دینے سے جان کتراتے ہیں۔ اپنے قریبی عزیزوں کو بستر مرگ پر پڑا چھوڑ کر بجائے اپنا خون عطیہ کرنے کے ان کے لیئے خون کے عطیات کی اپیل کرتے نظر آتے ہیں حالانکہ وہ یہ بھی بخوبی جانتے ہیں کہ خون دینے کے بہت ذیادہ فوائد ہیں۔

آج کل کے دور میں سوشل الیکڑانک و پرنٹ میڈیا پر اس بات کو خوب اجاگر کرنے کی ضرورت ھے کہ خون کے عطیات دینا صحت کے لیئے کسی طور پر بھی نقصان دہ نہیں طبی ماہرین کے مطابق خون دینے سے ذھنی صحت بہتر ھوتی ھے دل کی بیماری کا خطرہ کم ھوتا ھے خون کے نئے خلیوں کی پیدوار بڑھتیھے نظام دوران خون میں بہتری آتی ھے اور خون کے جمنے کے امکانات کم ھوتے ہیں جس کی وجہ سے شریانوں کی بندش کے خطرات کافی حد تک کم ھو جاتے ہیں جو لوگ رضاکارانہ بنیادوں پر خون کا عطیہ دیتے ہیں چند ہی ہفتوں میں ان کے جسم میں خون کی یہ کمی پوری ھو جاتی ھے ایسے افراد میں بیماریوں کا شکار ھو کر جلد طبی موت کے امکانات کم ھوتے ہیں۔ کیونکہ ایسے افراد میں کینسر اور ہارٹ اٹیک اور فالج کے امراض کم ھوتے ہیں عالمی ماہرین صحت کے مطابق خون کا عطیہ دینے کے کوئی نقصانات نہیں ہیں بعض اوقات جسم میں تھکاوٹ یا کمزوری محسوس ھوتی ھے جو خوراک کے ذریعے دور ھو جاتی ھے خون عطیہ کرنے کے بعد متوازن غذا اور پھلوں کا استعمال نئیے خلیوں کی تیزی سے نشوونماء کرتا ھے جس سے انسان اپنے آپ کو پہلے سے زیادہ صحت مند اور فریش محسوس کرتا ھے 17 سال عمر سے اوپر اور 60 سال تک کا صحت مند انسان ایک محفوظ عمل کے ذریعے اپنا خون اپنے ہی گروپ یا کسی بھی ایسے بلڈ گروپ جس کو اس کا خون لگ سکے خون منتقل کروا سکتا ھے جس مریض کو اس خون کی ضرورت ھو ایسے افراد اگر ایک بار خون عطیہ کر دیں تو ان کے تمام تحفظات دور ھو جاتے ہیں۔ روڈ ایکسیڈنٹ میں زخمی افراد زچگی کے دوران خواتین تھیلیسیمیاءکے مرض میں مبتلا بچوں اور دیگر کئی پیچیدہ امراض میں مبتلا مریضوں کی زندگیوں کا انحصار صحت مند خون پر ھوتا ھے 17 سال سے زائد اور 60 سال تک عمر کے صحت مند افراد اپنے بلڈ گروپ کے کسی بھی افراد کو خون عطیہ کر سکتے ہیں خدمت انسانیت ایک عظیم عبادت ھے ایک انسان کی جان بچانا پوری انسانیت کو بچانے کے مترادف قرار دیا گیا ھے راقم الحروف ذندگی میں متعدد مرتبہ خون کا عطیہ دے چکا ھے اور صحت پر کسی بھی قسم کے منفی اثرات مرتب نہیں ھوئے ضرورت مند مریضوں کو خون کے عطیات دینے میں پیچھے نہ رہیں

بقول غالب ۔۔
رگوں میں دوڑنے پھیرنے کے ہم نہیں قائل
جب آنکھ ہی سے نہ ٹپکے تو پھر لہو کیا ھے

_{Title Image by Robert DeLaRosa from Pixabay}

موسم گرما کی تعطیلات اور سمر کیمپ

موسم گرما کی چھْٹیاں ہوتے ہی طلبا و طالبات کی خوشی کا کوئی ٹھکانہ نہیں رہتا،جبکہ خوشی کی بات یہ کہ عید الضحٰی موسم گرما کی چھٹیوں میں آرہی ہے، ان چھٹیوں کا لطف دوبالا کرنے کے لئے بچے مختلف پروگرام ترتیب دیتے ہیں اس موقع پر اپنے عزیزواقارب کے ہاں جانے کے پروگرام بنتے ہیں،معلومات میں اضافہ کرنے کے لئے تفریحی مقامات پر جایا جاتا ہے، شمالی علاقہ جات کی سیر کی جاتی ہے جبکہ بچوں کی اکثریت سمر کیمپ کو ترجیح دیتی ہے۔بہت سے سکول و کالجز بھی سمر کیمپ پروگرامز کا اعلان کردیتے ہیں اور بہت سے ایجوکیشنل اکیڈمیز یا کمیونٹیز بھی سمر پروگرامز کا انعقاد کرتی ہیں تاکہ بچوں کے قیمتی وقت کو ضائع ہونے سے بچایا جائے۔ اس ضمن میں بچوں کو ان کی دلچسپی کے مطابق پروگرام مرتب کرکے دیے جاسکتے ہیں۔

سمر کیمپ ایسا ہونا چاہئے جہاں طا لبِ علموں کی ذہنی آبیاری ہو،کھیلوں کاسامان ہو۔وسیع وعریض گراؤنڈز ہوں،تقریری مقابلے ہوں، پینٹگز کے مقابلے ہوں،غرضیکہ بچوں کی دلچسپی کے ہرقسم کے پروگرامزشامل ہونے چاہئیں ۔ یوں تو تعلیمی اداروں میں تقریباً سارا سال بچوں کے لئے نصابی و غیرنصابی گرمیوں کا سلسلہ جاری رہتا ہے لیکن موسم گرما کی چھٹیوں میں خاص طور پرسمر کیمپ کا اہتمام کیا جاتا ہے،جہاں بچے خوب لطف اندوز ہوتے ہیں ۔ سمر کیمپ میں مختلف موضوعات پر تقریبات ہوتی ہیں اس لئے کہ طلبہ و طالبات کی ذہنی و اخلاقی تربیت کے ساتھ ساتھ ان کی ذہنی آبیاری اور معلومات میں بھی اضافہ ہواور وہ بڑے ہو کر معاشرے کے کارآمد شہری بن سکیں۔ مختلف تقاریب منعقد کی جاتی ہیں۔ طلبہ وطالبات ان تقاریب سے لطف اندوز ہوتے ہیں۔ نئی نسل کو باصلاحیت بنانے کی کوشش کی جاتی ہے ، مختلف مقابلوں میں نمایاں پوزیشنیں حاصل کرنے والے طلبا و طالبات کو انعامات سے نوازا جاتا ہے۔ بچے مختلف زبانوں میں ملی نغمے اور ترانے پیش کر تے ہیں۔ اس کے علاوہ سمر کیمپس میں طلبہ و طالبات کو عملی کام سکھانے کا اہتمام بھی کیا جا تا ہے۔ کئی ایسے سمر کیمپ ہیں جہاں طلبہ و طالبات کو کوکنگ و بیکنگ کے کورسز کرائے جاتے ہیں۔آج کل لڑکیاں ہی نہیں ، لڑکے بھی کھانے پکانے میں دلچسپی لیتے ہیں تو،انہیں ایسے سمر کیمپ میں بھیجا جاسکتا ہے جہاں بچوں سے ہی پوچھ کر ڈش کا انتخاب کیا جاتاہے اور اس کی تیاری کرتے ہوئے بچوں کو تمام چیزوں کے بارے میں بتایا جاتاہے اور چھوٹے چھوٹے کام بچوں سے بھی کروائے جاتے ہیں۔
طالبِ علموں کو باغبانی بھی سکھائی جاتی ہے۔ بچے روزانہ کیاری کی دیکھ بھال کرنے اور پودوں کو بڑھتادیکھ کر بہت خوش ہوتے ہیں۔ اس سے بچوں میں اپنا کام خود کرنے کا جذبہ پیدا ہوتا ہے۔ پکنک اور مختلف تفریحی و مطالعاتی دوروں کا اہتمام کیا جاتا ہے ، خاص طور پر تاریخی مقامات کی سیر کرائی جاتی ہے۔
آرٹ اینڈ کرافٹ سمر کیمپ کا خا ص حصہ ہو تے ہیں۔ بچوں کو پینٹنگ کرنے کے لیے بڑی شیٹ اور پینٹ دیا جاتاہے لیکن یہ کام کرنے سے پہلے فرش پر اخبار یا پلاسٹک بچھوائیں پھر اس پر شیٹ رکھ کر ان سے پینٹنگ کروائیں۔ بچے اپنی پسند کی چیزیں بنانے میں انجوائے کریں گے۔ جب وہ اپنا کام کر چکیں تو تمام چیزیں سمیٹنے کی ہدایت کریں اور جگہ کو صاف کروائیں۔
مختلف سائز کے موتی اور تار بچوں کو دیں اور انھیں جیولری بنانے میں مصروف کریں۔ یہ کام چھوٹے بچے بھی کرسکتے ہیں۔ بچے جیولری بنانے میں بہت دلچسپی لیں گے اور اپنی بنائی ہوئی جیولری پہننے میں انھیں بھی بہت ہی اچھا لگے گا۔
بچوں کو لائبریری لے جایا جاتا ہے۔ جہاں بچوں کو دلچسپ معلوماتی اور کہانیوں کی کتابیں دی جاتی ہیں تاکہ کورس کی کتابوں کے علاوہ بچے مختلف موضوعات پر کتابیں پڑھیں ۔کتابیں پڑھنے کا الگ ہی مزہ ہے۔ پڑھنے سے انہیں ، لکھنے کا شوق ہوگا اور ان کا تخیل مزید پروان چڑھے گا۔
بہت سے سمر کیمپ کمیپوٹر کورسز پر مشتمل ہوتے ہیں ، جہاں بچے بنیادی تعلیم سے لے کر گرافک ڈیزائننگ بھی سیکھتے ہیں اور پروگرامنگ میں بھی صلاحیتوں کا اظہار کررہے ہوتے ہیں۔
اگر بچہ انگلش بولنے ، سمجھنے یا سمجھانے میں مشکلات کا شکار ہے تو یہی موقع ہے کہ اسے انگلش لینگویج کورس کروائیں ،اگر اس کی انگلش اچھی ہے تو پھر دیگرزبانیں جیسے فرینچ یا چائنیز لینگویج بھی سیکھنے بھیجا جاسکتاہے۔
تحقیق سے معلوم ہوا ہے کہ غیر نصابی سرگرمیوں میں حصہ لینے والے بچے ایک سے زیادہ چیزوں میں مہارت حاصل کرنے میں کامیاب ہوتے ہیں۔ یہاں تک کہ غیر نصابی سرگرمیاں شخصیات ابھارنے میں بھی معاون ثابت ہوتی ہیں۔ المیہ یہ ہے کہ موجودہ وقت میں غیرنصابی سرگرمیوں پر توجہ بہت ہی کم دی جا رہی ہے۔ بیالوجی، سائیکلولوجی اور نیورولوجی میں ہونے والی جدید تحقیق نے بھی کھیلوں کی اس غیرنصابی سرگرمی کی لازمی ضرورت کو ثابت کیا ہے۔عموماََ بچے پانچ ماہ کی عمر میں دستیاب چیزوں کے ساتھ کھیلنے کی ابتدا کرتے ہیں۔ ماہرین کا کہنا ہے کہ بچے ننھے منے سائنسدان ہوتے ہیں۔ بچے تجربے کرکے چیزوں کی خصوصیات جان لیتے ہیں۔ مثلاً یہ کام کیسے کرتی ہیں؟ ان کے ساتھ ہم کیا کرسکتے ہیں؟ پھر ان سے ملتی جلتی اشیاء پر بھی یہی تجربات کرکے دیکھتے ہیں۔ چیزوں کو توڑنے جوڑنے کی کوشش میں جو مشکلات انہیں درپیش ہوتی ہیں، ان پر اپنی عقل کے مطابق قابو پانے کی کوشش کرتے ہیں۔ یہ وہ عمل ہے جس سے بچوں نئے نیورل کنکشن قائم کرتے ہیں اور بچوں میں ذہنی نشوونما پروان چڑھتی ہے، جو انہیں اپنے اردگرد کے ماحول سے جڑے رہنے اور دوسروں کے جذبات کو سمجھنے کی صلاحیت پیدا کرتے ہیں۔

اگر بچوں کو غیرنصابی سرگرمیوں سے دور رکھا جائے تو وہ نیورل کنکشن قائم کرنے میں ناکام ہوجاتے ہیں، جس کی وجہ سے وہ نصابی سرگرمیوں میں بہ نسبت دوسرے بچوں کے پیچھے رہ جاتے ہیں۔ اس طرح ان کے سمجھنے کی صلاحیت میں ایک حد تک خلل واقع ہوجاتا ہے۔ ایسے بچوں کے لیے ذہنی صلاحیتوں کو پروان چڑھانا ناممکن ہوتا ہے۔ ہماری سوسائٹی میں سکول میں پڑھائی کے اوقات میں اضافہ اور بے جا ٹیسٹ کی وجہ سے بچے ہر وقت پڑھائی میں مشغول رہتے ہیں، جس کی وجہ سے ان کی غیرنصابی سرگرمیاں متاثر ہو رہی ہیں، جو بچوں کی ذہنی وجسمانی صلاحیتوں پر اثرانداز ہوتے ہیں۔ سکول میں دیا جانے والا ہوم ورک اور ٹیوشن ورک سے بچہ ہر وقت اسکول کے ماحول سے جڑا رہتا ہے۔ اسے غیر نصابی سرگرمیوں میں حصہ لینے کا وقت ہی نہیں ملتا۔ جن بچوں کو کھیل کے مواقع فراہم نہیں کیے جاتے ایسے بچوں کے دماغ میں نقص رہ جاتا ہے۔ بڑھوتری کے مطابق جو بچے نہیں کھیلتے یا جن کو کھیلنے کے مواقع نہیں ملتے ان کے غیر معمولی حد تک متاثر ہونے کے امکانات بڑھ جاتے ہیں۔ آج صورت حال یکسر بدل چکی ہے۔ میدان ویران پڑے ہیں۔ بگڑتے حالات کی وجہ سے بچے آزادی سے کھیل نہیں سکتے۔ بچے اسکول کے بعد ذہنی طور پر اس قدر تھک چکے ہوتے ہیں کہ وہ کھیلنے کے بجائے گھر پر بیٹھنے کو ہی ترجیح دیتے ہیں اور گھر گھر میں موجود انٹرنیٹ کی سہولت ان کے لیے مزید مسئلہ بن چکی ہے۔ پڑھائی کے بعد وہ اپنا وقت انٹرنیٹ کو ہی دینا پسند کرتے ہیں۔ کھیلوں کے میدان آباد رکھنے کے لیے اور بچوں میں غیر نصابی سرگرمیوں کو اجاگر کرنے کے لیے اسکول وکالج انتظامیہ کو مل کر کردار ادا کرنا ہوگا۔

_{Title Image by Rosy / Bad Homburg / Germany from Pixabay}

کیپٹن فراز الیاس کی شہادت

کیپٹن فراز الیاس کی نماز جنازہ چونیاں میں ان کے آبائی گاؤں میں ادا کی گئی، جس میں وزیراعظم  میاں شہباز شریف سمیت اعلیٰ عسکری اور سیاسی قیادت نے شرکت کی۔ شہید کو مکمل فوجی اعزاز کے ساتھ سپرد خاک کیا گیا۔ یہ موقع نہ صرف غمگین تھا بلکہ اس میں وطن کے لیے جان نچھاور کرنے والوں کی عظیم قربانیوں کا بھی اعتراف کیا گیا۔

پاکستان ایک طویل عرصے سے دہشتگردی کے خلاف جنگ لڑ رہا ہے۔ 2001ء میں 9/11 کے بعد سے پاکستان نے دہشتگردی کے خلاف جنگ میں اہم کردار ادا کیا ہے۔ ہزاروں فوجی جوانوں نے اپنی جانیں قربان کیں اور متعدد دہشتگرد حملوں کا سامنا کیا۔ کیپٹن فراز الیاس کی شہادت بھی اسی جنگ کا حصہ ہے۔ لکی مروت میں دہشتگرد حملے میں ان کی شہادت قوم کے لیے ایک یاد دہانی ہے کہ ابھی بھی یہ جنگ ختم نہیں ہوئی۔

کیپٹن فراز الیاس کی شہادت ایک جانب وطن کی حفاظت کے عزم کا اظہار ہے تو دوسری جانب اس بات کا اشارہ ہے کہ دہشتگردی کے خلاف جنگ میں ابھی بہت کچھ کیا جانا باقی ہے۔ وزیراعظم شہباز شریف کی نماز جنازہ میں شرکت اور ان کے بیانات کافی حوصلہ افزا تھے انہوں نے اس بات پر زور دیا کہ حکومت اور فوج شہداء کی قربانیوں کو کبھی فراموش نہیں کریں گے۔ ان کا کہنا تھا کہ "اللہ تعالیٰ کسی کسی کو یہ عظیم مقام بخشتا ہے، قرآن مجید میں ارشاد باری تعالیٰ ہے کہ شہید کو مردہ مت کہو یہ زندہ ہیں۔”

اگرچہ حکومت نے کیپٹن فراز الیاس کے گاؤں کا نام ان کے نام سے منسوب کر کے ایک اچھا قدم اٹھایا ہے، لیکن یہ صرف ایک علامتی اقدام ہے۔ حکومت کو چاہئے کہ وہ عملی اقدامات بھی کرے تاکہ دہشتگردی کے خلاف جنگ میں شہداء کی قربانیوں کا حق ادا ہو سکے۔ مثال کے طور پر، شہید کے خاندان کی بھرپور مالی معاونت اور ان کے بچوں کی تعلیم و تربیت کے ساتھ ساتھ ان کے بچوں کو بالغ ہونے بطور کیپٹن فوج میں بھرتی کو یقینی بنانا چاہئے۔ اس سلسلے میں چند سفارشات ہیں جو کہ مندرجہ ذیل ہیں:

پائیدار امن کے قیام کے لیے اقدامات: حکومت کو چاہئے کہ وہ دہشتگردی کے خلاف پائیدار امن کے قیام کے لئے جامع حکمت عملی اپنائے۔

شہداء کے خاندانوں کی مدد: شہداء کے خاندانوں کی مالی معاونت اور ان کے بچوں کی تعلیم و تربیت کے لئے خصوصی پیکجز فراہم کئے جائیں۔

عوامی شعور میں اضافہ: عوام میں دہشتگردی کے خلاف شعور بیدار کرنے کے لئے خصوصی مہمات چلائی جائیں۔

فوجی اعزازات: فوجی جوانوں کو ان کی خدمات کے اعتراف میں مزید اعزازات سے نوازا جائے تاکہ ان کی حوصلہ افزائی ہو۔

 خلاصہ کلام یہ ہے کہ کیپٹن فراز الیاس کی شہادت نے ایک بار پھر اس بات کو واضح کیا ہے کہ پاکستان کو دہشتگردی کے خلاف جنگ میں ابھی بھی کئی چیلنجز کا سامنا ہے۔ گوکہ حکومت اور فوج کی جانب سے اٹھائے گئے اقدامات قابل تعریف ہیں، لیکن انہیں مزید مستحکم کرنے کی ضرورت ہے۔ شہداء کی قربانیوں کو یاد رکھنا اور ان کے خاندانوں کی دیکھ بھال کرنا ہمارا قومی فرض ہے۔ اس سے نہ صرف شہداء کے خاندانوں کو سہارا ملے گا بلکہ قوم میں حب الوطنی کا جذبہ بھی مضبوط ہوگا۔

باغبانی,ایک زبردست مشغلہ

فیصل جنجوعہ

باغبانی ایک زبردست مشغلہ ہے جو انسان کی جسمانی، روحانی اور ذہنی صحت پر اثر انداز ہوتا ہے۔ یہ عمدہ جسمانی ورزش ہے جو وزن گھٹاتی اور صحت بڑھاتی ہے۔ وزن کی زیادتی بذاتِ خود کئی بیماریوں کا پیش خیمہ ہوتی ہے۔ گھر میں اُگنے والی بہت سی سبزیاں انسان کی کئی غذائی ضروریات پوری کرتی ہیں۔ عالمی ادارۂ صحت کے مطابق ترقی پذیر ممالک میں پچاس فیصد سے زیادہ حاملہ خواتین فولاد کی کمی کے باعث خون کی کمی کا شکار ہوتی ہیں جبکہ فولاد سبزیوں میں وافر مقدار میں پایا جاتا ہے۔ گھریلو باغیچہ غذائی کمی کے مسئلے کا بہترین حل ہے۔ علاوہ ازیں رنگ برنگی سبزیوں کے پودے گھروں کی آرائش، ماحول کی خوبصورتی اور ذہنی سکون میں اضافہ کرتے ہیں۔

قدرت نے بہت سے ایسے پودے پیدا کئے ہیں جن سے مختلف زرعی اور ماحولیاتی فوائد حاصل کئے جاسکتے ہیں اور جدید تحقیق کے مطابق انہیں گھریلو باغیچے میں بآسانی اگایا جاسکتا ہے مثلاً پودینہ جو کئی اقسام کے کیڑے مکوڑوں سے نجات کےلئے بے مثال ہے۔ پودینہ کھانے کے جہاں کئی فوائد ہیں، وہیں اس کی خوشبو مکھی، مچھر کو بھگانے میں کارآمد ہے۔ جس کمرے میں اس کا گملا رکھا ہو مچھر وہاں سے بھاگ جائے گا اور انسان ملیریا اور ڈینگو جیسے امراض سے بچ سکتا ہے۔ علاوہ ازیں پودے فضا میں آکسیجن خارج کرتے ہیں اور کاربن ڈائی آکسائیڈ یعنی بری ہوا کو جذب کرکے ہمارے گھروں کو فضائی آلودگی سے پاک کرنے میں اہم کردار ادا کرتے ہیں۔ درختوں کی کمی سے ماحول میں بڑھتی گرمی جہاں ایک طرف خشک سالی کا باعث ہے، وہیں دوسری طرف شدید بارش، سیلاب اور طوفانوں سے تباہیوں کا باعث رہی ہے۔ ماہرین کا ماننا ہے کہ اگر لوگ اپنے گھر وں میں اونچی زمین پر زیادہ سے زیادہ مختلف اقسام کے پھل اور سبزیاں اگائیں اور مرغیاں رکھیں، تو کم سے کم وہ غذا کی کمی کا شکار نہ ہوں گے۔
بچت کرنے اور آمدنی کا ذریعہ
ایک طرف گھریلو باغیچے سے بچت بھی ممکن ہے۔ ہمارے گھروں میں آمدنی کا بڑا حصہ کچن کی اشیا خریدنے کے کام آتا ہے۔ جب روزانہ کی سبزی گھر ہی سے مل جائے تو یہ رقم بچ جائے گی۔ اور سبزیوں کو مختلف گھریلو ٹوٹکوں میں استعمال کرکے بھی بچت ممکن ہے۔دوسری طرف زائد پودوں اور سبزیوں کا کاروبار آمدنی بڑھانے کا ذریعہ بھی ہے۔ یہ پودے مختلف نرسریوں اور اداروں کو سپلائی کئے جاسکتے ہیں، جبکہ گھر کی تازہ، کیمیکل سے پاک اور صاف پانی میں اُگنے والی نامیاتی سبزیاں آج کل ناپید ہیں اور بڑے شہروں میں بہت مہنگی ہیں۔ ان سبزیوں کا کاروبار نفع بخش ہے۔ سبزیوں سے مختلف بیوٹی مصنوعات گھر پر تیار کرکے ان کا کاروبار بھی فائدہ مند ہوسکتا ہے
ٹیکنالوجی کے اس دور میں انسان کےپاس چند لمحوں کی بھی فرصت نہیں ہے۔ وہ اکثر بازار میں دستیاب سبزیاں اور پھل خرید لیتا ہے، اور انہیں اچھی طریقے سے دھو کر کھا بھی لیتا ہے۔ بیشتر لوگ اس حقیقت سے واقف ہوں گے کہ آج تکنالوجی کی مدد سے کئی سبزیاں اور پھل تیار کئے جارہے ہیں جس کے اثرات انسانی صحت پر مختلف بیماریوں کی صورت میں نظر بھی آرہے ہیں۔ اب بازار میں ایسی سبزیوں اور پھلوں کی تعداد بہت کم ہوگئی ہے جو قدرتی طریقے سے اگائے جاتے ہیں۔ ایسے میں گھریلو باغیچے کے رجحان میں اضافہ ہورہا ہے۔ جن لوگوں کے گھر بڑے ہیں، وہ اپنے گھروں ہی میں سبزیاں اور پھل اگانے کو ترجیح دے رہے ہیں۔ ہر چندکہ بڑے پیمانے پر یہ ممکن نہیں ہے لیکن جہاں تک ممکن ہے وہ اس کے فوائد حاصل کرنے کی کوشش کررہے ہیں۔
صدیوں سے انسان اپنے گھروں میں پھل اور سبزیاں اگاتا آیا ہے تاکہ اپنی غذا کا بندوبست کرسکے۔ سبزیاں انسانی خوراک کا ایک اہم جزو ہیں اور اچھی صحت کا راز بھی۔ یہ تھوڑی سی زمین یا گملوں، ڈبوں، پلاسٹک کی بوتلوں اور لکڑی کے کریٹس میں کاشت کی جاسکتی ہیں۔ صحت کے حوالے سے گھریلو باغیچے کے کئی فوائد ہیں

Title Image by Ekaterina Ershova from Pixabay

امریکی ٹیم سے پاکستانی کرکٹ ٹیم کی بدترین شکست: ذمہ دار کون؟

ٹی 20 ورلڈ کپ کرکٹ کے حالیہ مقابلوں میں امریکہ کی غیر معروف ٹیم نے سابق عالمی چیمپئن پاکستان کو حیرت انگیز شکست سے دوچار کیا، جس نے پوری پاکستانی قوم کو ہلا کر رکھ دیا ہے۔ یہ شکست خاص طور پر چونکا دینے والی ہے کیونکہ پاکستانی ٹیم کا شمار دنیا کی بہترین ٹیموں میں ہوتا ہے اور اس کی شکست ایک ناتجربہ کار امریکی ٹیم کے ہاتھوں ہوئی، جو کہ زیادہ تر مختلف ممالک سے آئے ہوئے آباد کار نوجوانوں پر مشتمل تھی، اس شکست کا ذمہ دار کون ہے؟۔

تاریخی لحاظ سے دیکھا جائے تو پتہ چلتا ہے کہ پاکستانی کرکٹ ٹیم کا ماضی روشن اور بے داغ ہے۔ اس نے سابق وزیر اعظم پاکستان عمران خان کی قیادت میں 1992 کا ورلڈ کپ جیتا اور 2009 میں ٹی 20 ورلڈ کپ میں بھی فتح حاصل کی۔ پاکستان کرکٹ بورڈ (PCB) اور اس کی انتظامیہ کی کئی سالوں کی محنت اور لگن نے ٹیم کو اس مقام تک پہنچایا جہاں ساری دنیا اس کی عزت کرتی ہے۔ تاہم حالیہ سالوں میں پاکستان کرکٹ ٹیم کو کچھ مشکلات کا بھی سامنا کرنا پڑا، جن میں ٹیم کی کارکردگی میں اتار چڑھاؤ، انتظامی مسائل، اور کھلاڑیوں کی فارم میں کمی شامل ہیں۔
حالیہ ٹی ٹونٹی میچ کی تفصیلات کے مطابق جمعرات کو ڈیلاس میں ہونے والے گروپ میچ میں امریکہ کی غیر معروف ٹیم نے ٹاس جیت کر پاکستان کو پہلے بیٹنگ کی دعوت دی۔ پاکستانی ٹیم سات وکٹوں کے نقصان پر 159 رنز بنانے میں کامیاب ہوئی، جو کہ ایک معقول سکور تھا۔ لیکن امریکی ٹیم نے اپنی مضبوط بیٹنگ کے ذریعے صرف تین وکٹوں کے نقصان پر یہ سکور برابر کردیا اور میچ کو سپر اوور تک پہنچا دیا۔ سپر اوور میں محمد عامر کی گیند بازی میں 18 رنز دیئے گئے، جس میں 8 زائد رنز بھی شامل تھے۔ پاکستان کی ٹیم صرف 13 رنز بناسکی اور یوں امریکہ پانچ رنز سے جیت گیا۔
یہ ہماری بدقسمتی ہے کہ اس شکست نے پاکستان کے سپر ایٹ مرحلے تک پہنچنے کو مشکل بنا دیا ہے۔ پاکستانی ٹیم کی بیٹنگ، بولنگ، اور فیلڈنگ سب ہی میں کمی نظر آئی۔ خاص طور پر اہم میچ میں محمد عامر جیسے تجربہ کار بولر کا سپر اوور میں کنٹرول کھونا تشویشناک صورت حال ہے اس کی انکوائری ہونی چاہئیے کہ پاکستان کو کیوں شکست سے دوچار کیا گیا۔
پاکستانی ٹیم کی حالیہ کارکردگی پر تنقید کرنے والوں کا کہنا ہے کہ ٹیم میں اہلیت کے بجائے سفارش کی بنیاد پر کھلاڑی شامل کئے جا رہے ہیں، جس سے ٹیم کی مجموعی کارکردگی متاثر ہو رہی ہے۔ کوچنگ سٹاف اور انتظامیہ کو بھی اپنی حکمت عملی پر نظر ثانی کرنے کی ضرورت ہے تاکہ آئندہ میچز میں بہتر نتائج حاصل کئے جا سکیں۔ اس سلسلے میں مستقبل کے میچز کے لیے مندرجہ ذیل تجاویز پر سختی سے عمل کیا جائے:
ٹیم سلیکشن میں اہلیت کو ترجیح دیں: سفارشی کھلاڑیوں کو نکال کر صرف ان کھلاڑیوں کو منتخب کیا جائے جو واقعی قابلیت رکھتے ہیں۔
فیلڈنگ اور بولنگ پر توجہ: پاکستانی ٹیم کو اپنی فیلڈنگ اور بولنگ کی خامیوں کو دور کرنے کے لیے مزید محنت کرنی ہوگی۔
نئی حکمت عملی ترتیب دیں: آئندہ میچوں کے لیے جدید اور مؤثر حکمت عملی تیار کریں۔
ماضی کی غلطیوں سے سیکھیں: حالیہ شکستوں سے سبق لیتے ہوئے، ماضی کی غلطیوں کو نہ دہرائیں اور ان غلطیوں سے سبق سے سیکھیں۔
کرکٹ پاکستانی قوم کے لیے قومی وقار کا مسئلہ ہے ،کرکٹ پاکستان کا مقبول ترین کھیل ہے اور اس میں کسی بھی چھوٹی ٹیم سے شکست قوم کے لیے شرمندگی کا باعث بنتی ہے۔ پاکستانی ٹیم کو اگلے میچز میں بہترین کارکردگی دکھا کر قوم کی امیدوں پر پورا اترنا ہوگا۔

خلاصہ کلام یہ ہے کہ پاکستانی ٹیم کی امریکہ کی غیرمعروف ٹیم سے حالیہ شکست نے اس کی کارکردگی اور ٹیم سلیکشن پر سوالات اٹھا دیے ہیں۔ اس نازک مسئلے کے حل کے لیے ٹیم اور اس کی انتظامیہ کو نہایت سنجیدگی سے اپنی خامیوں پر غور کرنا ہوگا اور فوری اقدامات اٹھانے ہوں گے تاکہ آئندہ مقابلوں میں بہتر نتائج حاصل کئے جا سکیں۔یہ صرف ایک کرکٹ کا میچ نہیں ہے بلکہ یہ پاکستانی قوم کے قومی وقار کا مسئلہ ہے، اس پر کسی قسم کا سمجھوتہ نہیں ہونا چاہئے، امید ہے کہ پاکستان کرکٹ بورڈ کے اعلیٰ حکام اس قومی مسئلے پر خود کو جھنجوڑنے کی زحمت گوارا کریں گے

_{Title Image by PDPics from Pixabay}