Tag: شاعری

بھکر کا ادبی جائزہ 2025ء

حسب ِ روایت امسال بھی ضلع بھکر کے سالانہ ادبی جائزہ 2025 ء کے ہمراہ نیاز و عقیدت کے ساتھ آپ کا اپنا مقبول ذکی مقبول  ( بھکر )
٫٫ پیشِ خدمت جائزہ ہے سال کا ،،
سالِ رواں کی اگر بات کی جائے تو
استاد الشعرا سئیں نذیر احمد نذیر ڈھالہ خیلوی محلہ سردار بخش بھکر شہر میں رہائش پذیر ہیں ۔ آپ سرائیکی شاعر ہیں ۔ ایک ادارہ کی حیثیت رکھتے ہیں ۔ آپ کی رہائش گاہ ( ڈیرہ کاکا خیل ) بھکر میں آپ کی ادبی تنظیم بزمِ نذیر کے زیرِ اہتمام گزشتہ سال کی طرح سالِ رواں میں بھی آپ کے ہاں متعدد مشاعرے ، شامیں ، ادبی نشستیں ، کروا چکے ہیں ۔ اس کے علاوہ نوجوان شعرا کی حوصلہ افزائی بھی کرتے رہتے ہیں ۔ 12 اکتوبر 2025ء کو آپ کے دو بیٹوں کی شادی تھی اس موقع پر بھی آپ کے ڈیرہ پر کلام سننے اور سنانے کا سلسلہ جاری رہا ۔ راقم الحروف بھی موجود تھے ۔
بھکر شہر اور تھل یونی ورسٹی میں سالِ رواں میں ہونے والی ادبی تقریبات اور ادبی سرگرمیوں کی اگر بات کی جائے تو امسال کافی مشاعرے ہوئے ۔ کافی طلبہ و طالبات کے تحقیقی مقالہ جات مختلف رسائل و جرائد اور اخبارات میں شائع ہوئے ۔ علاوہ ازیں پروفیسر ڈاکٹر سرور عظیم قریشی کے مختلف آرٹیکلز بھی ریسرچ جنرل کی زینت بنے ۔ مجموعی طور پر ٫٫ تھل یونی ورسٹی ،، کی ادبی خدمات قابلِ ستائش اور حوصلہ افزا رہیں ۔

ادبی بیٹھک
بھکر میں نظر مارکیٹ ریلوے روڈ مدثر موبائل شاپ جو کہ جاوید دانش کے کاروبار کا ذریعہ ہے وہاں ایک ادبی بیٹھک کا درجہ بھی رکھتی ہے بھکر کے معروف شاعر جاوید دانش کے ہاں گزشتہ سال کی طرح 2025ء میں بھی آیا روز شعرا و ادباء آتے جاتے رہے ہیں ۔ وہاں علم و ادب کا ایک سما بندھا رہتا ہے ۔ راقم الحروف اور محمّد اقبال بالم کو 9 جون 2025ء میں وہاں جانے کا اتفاق ہوا کلام سننے اور سنانے کا موقع میسر آیا ۔
گورنمنٹ گریجویٹ کالج کلورکوٹ 26 فروری 2025 ء میں ایک عظیم الشان مشاعرہ منعقد ہوا جس کے سرپرست ڈاکٹر ملک محمّد اقبال اولکھ تھے ۔ ان کے شاندار مشاعرے میں بھکر شہر اور دُور دراز کے شعرا نے بھرپور شرکت کی اور شعراء کرام کو سامعین نے بھرپور داد سے نوازا ۔
جوئیہ سرائیکی ادبی سنگت کے زیرِ اہتمام 24 ستمبر 2025ء کو اکڑا کانجن ، کلورکوٹ میں ایک سرائیکی مشاعرہ منعقد ہوا ۔ بانیان میں میں ملک محمّد اشرف جوئیہ اور ملک غلام شبیر کانجن ہیں ۔
20 فروری 2025ء کو
لیّہ کے معروف شاعر و ادیب استاد الشعراء سئیں امان اللّٰہ کاظم کے ساتھ ایک شام وائٹ ہاؤس بھکر ( ڈاکٹر عتیق الرحمٰن قریشی کی رہائش گاہ ) خان سر روڈ پر منائی گئی اس شام میں محفل مشاعرہ منعقد ہوا سامعین میں محکمہ ہیلتھ کے ڈاکٹر صاحبان تھے بھرپور شرکت کی اور جن شعراء نے شرکت کی اُن میں نذیر احمد نذیر ڈھالہ خیلوی ، تنویر حسین فائز بخاری ، شاہد بخاری ، مضطر کاظمی اور مقبول ذکی مقبول شامل تھے ۔
تقدیسی ادب
حلقہ فروغِ ادب کے زیرِ اہتمام 22 جون 2025ء کو ارشد حسین بھٹی کی رہائش گاہ بھکر شہر میں ایک محفل مسالمہ منعقد ہوا جہاں شعرا کرام نے امام عالی مقام حضرت امام حسین علیہ السلام کو سلام پیش کیا وہاں نبی پاک حضرت محمّد مصطفیٰ صلی اللّٰہ علیہ وآلہ وسلّم کی شانِ اطہر میں نعتیہ کلام بھی پیش کیا گیا ۔
22 جون 2025 ء سالانہ محفل مسالمہ بر مکان پروفیسر قلب عباس عابس ، گلشنِ مدینہ بھکر ، شعراء کرام میں
حشمت رضا بہلول ، کاظم حسین کاظم ، علمدار حسین علمی ، علی عابد ، فیاض حسین بھڈا ، ناصر خیالی ، راحل بخاری اور شاہد مبشر نے شرکت کی ۔
عابد علیم سہو تحصیل بھکر کے چک نمبر 46 اڈا جہان خان سے تعلق رکھتے ہیں ۔ بزمِ رفیق کے بانی و صدر ہیں ۔ بزم رفیق نے 2025 ء کا پہلا پروگرام 12 جنوری 2025ء کو کتاب ٫٫ گونگے لوگ ،، کی تقریب پذیرائی اور مشاعرہ ہاشمی کلینک منڈی ٹاؤن بھکر میں منعقد ہوا دوسرا پروگرام سالانہ کتاب ایوارڈ تقریب 17 مئی 2025 ء کو سحر سٹوڈیو بھکر میں ہوا ۔
14 اگست 2025ء کو ایک مشاعرہ بمقام سحر اسٹوڈیو بھکر میں منعقد ہوا ۔ عابد علیم سہو کے ساتھ ایک شام نذیر ٹاؤن بھکر میں منائی گئی زیرِ اہتمام اصلاح معاشرہ بھکر
8 نومبر 2025 ہفتہ اور اتوار کے درمیانی شب ادبی تنظیم بہار ادب برکت۔۔۔۔۔ کے اراکین اعجاز رازم اور باسط رمضان باسط کے زیر اہتمام محفل مشاعرہ برموقع شادی خانہ آبادی حسنین سوہا ڈیرہ مولانا محمد رمضان سوہا پر منعقد کیا گیا جس میں پروفیسر قلب عباس عابس منور سعید۔ ضیاء اللہ ضیاء۔ صابر غمگین۔ اشفاق قیس بلال حیدر اور دیگر شعرا نے حصّہ لیا –
بھکر ڈیجیٹل نیٹ ورک کی تیسری سالگرہ پر نیشنل پیس کونسل کے اشتراک سے 31 مئی 2025ء کو امن مشاعرہ اور تقسیم ایوارڈز 2025 ء بمقام آنگن مار کی بھکر روڈ دریا خان میں منعقد ہوا ۔
تھل ادبی سرائیکی سنگت کا 20 واں سالانہ سرائیکی محفل مشاعرہ 11 اکتوبر 2025ء۔ کو جنجوں شریف میں منعقد ہوا ۔
تیسرا سالانہ محفل مشاعرہ بیاد نجیب اللّٰہ خان نیازی اور شاہ نواز ارشد جس کے بانی عبدالغفار نئیر اور احسن حیات مغل تھے ۔
ملک ذولفقار راقم ادبی تنظیم ٫٫ بزمِ پارت ،، کے بانی و صدر ہیں ۔ یہ تحصیل کلورکوٹ کے گاؤں غلاماں میں ہے اس بزم پارت کے زیرِ اہتمام سالِ نو کی پہلی ادبی نشست یکم جنوری 2025ء کو بر مکان ملک تنویر کانیہ آف مُوندی والا کلورکوٹ میں منعقد ہوئی ۔ یکم فروری 2025 ء کو ادبی نشست ملک ذوالفقار راقم کی رہائش گاہ غلاماں میں ہوئی ۔ پروفیسر ثناء اللّٰہ خان کے ساتھ 21 فروری 2025ء کو ایک شام کا اہتمام بھی کیا گیا جس میں بھرپور شعرا نے شرکت کی ۔ 2 شوال یکم اپریل 2025ء عید ملن مشاعرہ اور عبدالمجید آصف لودھرا کی سرائیکی کُتب ٫٫ بلانگ ،، اور ٫٫ کھیچل ،، کی تقریب رونمائی ہوئی ۔ تیسرا سالانہ مشاعرہ 18 اکتوبر 2025 ء کو غلاماں شہر میں منعقد ہوا جس میں شعرا کرام اور سامعین نے بھرپور شرکت کی ۔ عید الاضحیٰ کے تیسرے دن 9 جون 2025ء بیٹھک عید ملن مشاعرہ کا اہتمام بھی کیا گیا ۔
ادبی تنظیم بزمِ یاراں ، غلاماں ، کلورکوٹ اِس بزم کے روحِ رواں فاروق تھلہ فاروق ہیں ۔ جنوری 2025 ء اور فروری 2025 ء کو دو ادبی نشستیں ہوئی ہیں ۔ اِس کے علاوہ کوئی اور ادبی کام سامنے نہ آ سکا ۔
ادبی تنظیم بزمِ ٫٫ اوجِ ادب ،، یہ منکیرہ شہر میں ہے ۔ اس کے بانی و چیرمین مقبول ذکی مقبول ہیں ۔ اس بزم کے زیرِ اہتمام 12 فروری 2025ء کو ایک سرائیکی نعتیہ مشاعرہ منعقد ہوا جس میں شعراء پروفیسر کمال الدین خاکی ( خوشاب) محمد سلیم سعد ( خوشاب ) شہباز حسین ہادی اور دیگر نے شرکت کی ۔ 22 اگست 2025ء اور 16 جون 2025ء کو مرحومین شعرا کے ایصال ثواب کے لیے قرآن خوانی کا اہتمام کیا گیا مرحومین شعرا میں علی شاہ ، منکیرہ شاہنواز ارشد ، دُلے والا جمشید اقبال جمشید ، بھکر اس کے علاوہ 2025ء میں بزمِ اوجِ ادب کے زیرِ اہتمام تین کتابیں شائع ہوچکی ہیں ۔
مشاعرے
ادب تقریبات
تقسیم ایوارڈ تقریبات
تنقیدی نشستیں
مسالمے
نعتیہ مشاعرے
ناول
افسانے
ادبی انٹرویوز
امسال کوئی ناول منظر عام پر نہ آسکا ۔ چند افسانے لکھے
پچھلے سال کے مقابلے میں اس سال نثر سے زیادہ شاعری ہوئی ۔۔۔ کوئی ڈراما نہیں لکھا گیا انشائیہ اور خاکہ پر بھی طبع آزمائی نظر نہ آئی۔۔۔۔
حماد علی حادی ، منکیرہ شہر سے
ایک نیا قلم کار منظرِ عام پر آیا ہے ۔

مجموعی طور پر اس سال بھکر میں شاعری کا پڑا بھاری رہا جب کہ گذشہ سال نثر زیادہ لکھی گئی ۔
بھکر کے مقامی اخبارات میں روزنامہ ٫٫ بھکر ٹائمز ،، بھکر روزنامہ ٫٫ عوام کی عدالت ،، بھکر روزنامہ ٫٫ نوائے بھکر ،، بھکر روزنامہ ٫٫ سچائی ،، بھکر اِن اخبارات نے گزشتہ سال کی طرح سال 2025ء میں بھی شعرا ادباء کی بھرپور حوصلہ افزائی کی ان کی ادبی تحریروں کو شائع کیا اور ادبی خبریں بھی شائع کرتے رہے ہیں ۔
بھکر 2025ء میں جن قلم کاروں کی تحریریں رسائل و جرائد اور اخبارات میں شائع ہوتی رہی ہیں ۔ ان میں
پروفیسر ڈاکٹر محمّد اشرف کمال کی ادبی سرگرمیاں گزشتہ سال کی طرح 2025ء میں بھی اپنے عروج پر رہی ہیں ۔
پروفیسر جاوید عباس جاوید ، بھکر آج کل علیل ہیں ان کی صحت یابی کے لیے دُعاوں کی درخواست ہے ۔
پروفیسر ڈاکٹر ضیاء المصطفیٰ ، حسن خان
غزالہ کشور ملک ، زوار آباد
ملک نعمان حیدر حامی ، چاہ اسراں والا
مقبول ذکی مقبول ، منکیرہ

بھکر میں 2025ء کو منصہءِ شہود پر آنے والی ادبی کُتب کی تفصیل کچھ اس طرح سے ہے ۔
٫٫ شجرہ نسب ،، ( کلیات ) نیا ایڈیشن جنوری 2025ء کو منصہءِ شہود پر آیا ہے ۔ اس کے مصنّف : نجف علی شاہ بخاری ، محلہ سادات نذد سردار بخش روڈ بھکر شہر ۔

٫٫ شیتل ،، ( افسانوی مجموعہ )
٫٫ دِل من مسافر من ،، ( تحقیق و تنقید )
اِن کے مصنّف تحصیل بھکر کے گاؤں حسن خان سے پروفیسر ڈاکٹر محمّد ضیاء المصطفیٰ ، گورنمنٹ گریجویٹ کالج ، بھکر میں لیکچرار ہیں ۔

٫٫ بلانگ ،، (سرائیکی مجموعہ کلام )
٫٫ کھیچل ،، ( سرائیکی مجموعہ کلام )
٫٫ بُکَل ،، ( سرائیکی مجموعہ کلام )
٫٫ آبلہء جاں ،، ( اُردو مجموعہ کلام )
مصنّف : عبدالمجید آصف لودھرا ، غلاماں سے ان کا تعلق ہے پیشہ کے اعتبار سے ٹیچر ہیں ۔
٫٫ اُس پار ،، ( غزلیات )
مصنّف : عابد علیم سہو اِن کا تعلق چک نمبر 46 اڈا جہان خان سے ہے ۔
٫٫ عاصم بخاری : شخص اور شاعر ،، ( کیفِ منظوم )
٫٫ سید حُب دار قائم : جگمگاتا ستارہ ( شخصیات اور فن )
٫٫ حُسنِ بیان ،، ( مضامین اور تبصرے )
اِن کے
مصنّف : مقبول ذکی مقبول ہیں ۔ جن کا تعلق بستی شمالی منکیرہ شہر سے ہے ۔
٫٫ مقبول ذکی مقبول کی ادبی مقبولیت ،، ( مشاہیر کی نظر میں )
اِس کتاب کی مؤلفہ : ریحانہ بتول ہیں ۔ ان کا تعلق بستی شمالی وارڈ نمبر 8 محلہ چھینہ والا منکیرہ شہر سے ہے ۔
برین کالج بھکر میں سال 2025ء کی آخری تقریب 21 دسمبر کو ہوئی جس کے مہمانان خاص شاعر پروفیسر قلبِ عباس عابس اور سید مضطر کاظمی تھے ۔

پروین شاکر: خوشبو کی شاعرہ

(24 نومبر یوم ییدائیش پر خصوصی تحریر)
ڈاکٹر رحمت عزیز خان چترالی*

اردو شاعری کی تاریخ میں وہ خواتین شاعرہ بہت کم ہیں جنہوں نے کم وقت میں اپنی پہچان اس شدت سے قائم کی کہ ان کے بعد آنے والی نسلیں انہیں ایک عہد کی علامت سمجھنے لگیں۔ پروین شاکر انہی میں سے ایک بہترین شاعرہ تھیں۔ وہ صرف شاعرہ ہی نہیں تھیں، بلکہ ایک پوری سماجی، فکری اور نسائی روایت کی نئی تشکیل کا ذریعہ بھی بنیں۔ ان کی شاعری نے اردو غزل کے لہجے کو نئی سمت دی اور عورت کی داخلی خیالات کو پہلی بار اس کھلے پن، نرمی اور بے ساختگی کے ساتھ بیان کیا جس کی مثال جدید اردو شاعری میں کم ملتی ہے۔
پروین شاکر 24 نومبر 1952 کو کراچی میں ایک علمی اور ادبی گھرانے میں پیدا ہوئیں۔ ان کے والد شاکر حسین ثاقب خود بھی شاعر تھے، جس نے پرویز شاکر کی ادبی شخصیت کی تشکیل میں بنیادی کردار ادا کیا۔ تقسیمِ ہند کے بعد نئے وطن مملکت خداداد پاکستان میں شناخت کی تلاش، شہری زندگی کی بنتی بگڑتی صورت حال اور متوسط طبقے کے مسائل یہ ساری فضا پروین کی شخصیت کے ساتھ ساتھ ان کی شاعری میں بھی رچی بسی نظر آتی ہے۔
ان کی تعلیم نہایت متنوع رہی۔ انگریزی ادب، لسانیات، انتظامی علوم اور بعد میں ہارورڈ سے ماسٹرز کی ڈگری یہ سفر بتاتا ہے کہ وہ محض جذبے کی ہی شاعرہ نہیں تھیں بلکہ ایک گہری فکری بنیاد بھی رکھتی تھیں۔
سن ستر کی دہائی اردو غزل کے لیے ایک نئے تجرباتی دور کا آغاز تھی۔ فیض، جمیل الدین عالی، جون ایلیا، احمد مشتاق اور قتیل شفائی جیسے شعرا اپنی اپنی آوازوں کے ساتھ موجود تھے۔ اس منظرنامے میں ایک نئی نوجوان شاعرہ کا آنا آسان نہیں تھا۔ لیکن ان کی کتاب خوشبو (1976) نے منظر ہی بدل دیا۔
اس مجموعے نے یہ واضح کر دیا کہ ایک نرم لہجے میں کہی گئی بات کبھی کبھی سب سے زیادہ مؤثر ہوتی ہے۔ عورت کا احساس، عورت کی زبان اور عورت کی داخلی بے چینی کو پہلی بار اتنی سادگی اور نفاست سے بیان کیا گیا کہ پوری نسل نے اس کی طرف توجہ کی۔
پروین شاکر کی غزل روایت اور احساس کا نیا امتزاج بھی جابجا ملتا ہے۔ پروین شاکر کی غزل کلاسیکی روایت سے جڑی ہوئی ہے، لیکن اس میں ایک نیا لہجہ ہے۔ استعارے وہی ہیں مثلاً چاند، پھول، خوشبو، بارش، تتلی وغیرہ لیکن ان کے معنی بدل گئے۔ محبوب کے بجائے محبوبہ کی داخلی کیفیات موضوع بن گئیں۔
ان کی غزل کا سب سے بڑا کمال یہ ہے کہ وہ عورت کو موضوع نہیں بناتیں بلکہ اسے خود مصنف بھی بناتی ہیں۔
نسائی ضمیر کا براہِ راست استعمال، نرمی کے ساتھ احتجاج اور جذبات کے اظہار میں جھجھک سے انکار یہ وہ خصوصیات ہیں جو پروین شاکر کی غزل کو ممتاز بناتی ہیں۔

مثال کے طور پر “وہ تو خوشبو ہے” والا شعر محض رومانی کیفیت ہی نہیں، بلکہ جذباتی تعلق میں طاقت کے عدم توازن کی نشاندہی بھی ہے۔
اگر غزل ان کی پہچان ہے تو آزاد نظم ان کا اصل تجربہ گاہ ہے۔ یہاں انہیں کسی عروضی پابندی نے محدود نہیں کیا۔ اسی لئے ان کی آزاد نظموں میں موضوعات نہایت وسیع ہیں جن میں سماجی نابرابری، عورت پر معاشرتی دباؤ، جنسی استحصال، معاشی ظلم، سیاسی اور طبقاتی منافقت، جدید شہری زندگی کی بے حسی وغیرہ وغیرہ شامل ہیں۔
"اسٹیل ملز ورکر” جیسی نظمیں صرف ادب نہیں بلکہ ایک سماجی دستاویز بھی ہیں۔ یہاں محبت کی نہیں، پسینہ بہاتے عام آدمی کی بات کی گئی ہے جو ترقی کے نام پر قربان ہو جاتا ہے۔

اسی طرح "وی آر آل ڈاکٹر فاسٹس” میں طاقت اور دولت کے کھیل کو بے نقاب کیا گیا ہے۔
پروین شاکر نے انگریزی الفاظ کا استعمال بھی بے جھجک کیا، جسے بعض ناقدین نے انہیں اعتراض کا نشانہ بنایا، لیکن ان کا اصرار تھا کہ شہری عورت کی زندگی انہی الفاظ کے ساتھ جڑی ہوئی ہے۔ انہوں نے زبان کو حقیقت سے جوڑ کر پیش کیا، نہ کہ روایت کی خاطر اسے جامد رکھا۔
ان کی شاعری میں جہاں محبت کا ذکر ملتا ہے وہاں عورت اور سماج کا بھی زکر ملتا ہے۔ پروین شاکر شاعری کے موضوعات کی تہہ داری سب سے منفرد ہے۔ پروین شاکر کی شاعری کا سب سے بنیادی پہلو عورت کے احساسات کی صداقت ہے۔ وہ محبت کو رومانیت کے پردے میں چھپاتی نہیں، بلکہ اس کی تکلیف، اس کی فوری کیفیت اور اس کی سماجی قیمت دونوں کو ساتھ لے کر چلتی ہیں۔
ان کی شاعری میں تین واضح محور دکھائی دیتے ہیں جن میں سرفہرست عورت کی داخلی دنیا ہے۔ محبت، بے وفائی، تنہائی، انتظار، خوف، امید یہ سارے جذبات پروین شاکر کی شاعری کا بنیادی حصہ ہیں۔ وہ ان احساسات کو پوری ایمانداری کے ساتھ لکھتی ہیں۔
ان کی شاعری میں عورت کا سماجی مقام بھی واضح کرنے کی کوشش کی گئی ہے۔ طلاق، تنہائی، معاشرتی عدم اعتماد، اور مردانہ معاشرے کا جبر یہ سارے موضوعات اس شدت کے ساتھ پہلی بار کسی شاعرہ نے اٹھائے وہ پروین شاکر ہیں۔
انہوں نے جدید شہری زندگی کی پیچیدگیاں بھی بیان کی ہیں۔ دفتر، کارپوریشن، مہنگائی، تھکن، رش اور سیاسی بے چینی یہ سب کچھ پروین شاکر کی نظموں میں دکھائی دیتا ہے۔ وہ عورت کو صرف محبت کرنے والی ہستی کے طور پر پیش نہیں کرتیں، بلکہ ایک مکمل سماجی وجود کے طور پر پیش کرتی ہیں۔
پروین شاکر کے اسلوب میں چند بنیادی خصوصیات نمایاں ہیں جن میں نرم، پُرتاثیر اور شگفتہ لہجہ، استعاروں کا تخلیقی استعمال، اشاریت اور علامتوں کی تہہ دار
جذبات کی براہِ راست ترجمانی،زبان کی سادگی جو گہری معنویت رکھتی ہے، شہری زند گی کے جدید حوالوں کا استعمال وغیرہ وغیرہ۔ ان کے ہاں جذبات کبھی غیر ضروری پھیلاؤ کا شکار نہیں ہوتے۔ مختصر مصرع، سادہ ترکیب اور پُراثر تصویر یہی ان کا فنی اصول ہے۔
اردو تنقید نے پروین شاکر کو ہمیشہ سنجیدگی سے لیا۔ ان کے بارے میں تین بڑے نقطۂ نظر ملتے ہیں جن میں وہ جدید اردو غزل میں نسائی آواز کی سب سے مضبوط نمائندہ ہیں۔
ان کی غزل میں جذباتیت کہیں کہیں زیادہ ہے، لیکن اس کی صداقت سے انکار ممکن نہیں۔
آزاد نظم میں ان کی فکری گہرائی زیادہ نمایاں ہے بنسبت غزل کے۔

پت جھڑ میں کشمیر کی سیر: تجزیاتی مطالعہ

ڈاکٹر فرہاد احمد فگار ، مظفرآباد

سرفراز بزمی اردو شاعری کے اُن دردمند اور باوقار شعرا میں سے ہیں جنھوں نے مشرقی احساس، روحانی گہرائی اور عصری شعور کو یک جا کر کے اپنے اظہار کو ایک منفرد رنگ دیا ہے۔ ان کے ہاں لفظ صرف اظہار کا وسیلہ نہیں بلکہ تہذیبی شعور اور انسانی ضمیر کا آئینہ ہے۔سرفراز بزمی کی شاعری میں حضرت اقبال کا واضح پرتو ملتا ہے۔ میرا بزمی صاحب سے تعارف ان کے ایک مشہور قطعے کے ذریعے سے ہوا۔ وہی قطعہ جو اکثر غلطی سے علامہ اقبالؒ سے منسوب کر دیا جاتا ہے۔
اللہ سے کرے دور تو تعلیم بھی فتنہ
املاک بھی، اولاد بھی، جاگیر بھی فتنہ
ناحق کے لیے اٹھے تو شمشیر بھی فتنہ
شمشیر ہی کیا نعرۂ تکبیر بھی فتنہ
یہ قطعہ ان کے فکری مزاج کی جھلک پیش کرتا ہے ۔ ۔ بزمی صاحب کےاس ضرب المثل قطعے کے حوالے سے میں ایک مضمون کچھ سال قبل ضبط تحریر میں لا بھی چکا ہوں۔ جو ایکسپریس سمیت کئی اہم اخبارات اور ویب سائٹس پر شائع بھی ہو چکا ہے۔ سرفراز بزمی صاحب نے اپنی ایک تحریر میں اس بات کا برملا اظہار بھی کچھ یوں کیا:
"آج مجھے اپنی شاعری کے ابتدائی ایام کا اپنا ایک قطعہ جسے نادان احباب نے فکری اور لسانی ہم آہنگی کی بناپر علامہ اقبال سے منسوب کرنے کی غلطی کردی یہاں تک کہ پڑوسی ملک کی نیشنل اسمبلی میں بھی ایک باوقار رکن نے اسے علامہ سے منسوب کرتے ہوئے سنایا جس کے بعد یہ موضوع بحث بنا اور جستجو ہوئی کہ آخر یہ کس کی تخلیق ہے۔اور بالآخر مظفرآباد یونیورسٹی کے محقق ڈاکٹر فرہاد فگار نے اس بابت مجھ سے رابطہ کیا
پھر ایک تحقیقی مضمون قلم بند کیا جس کے بعد اور بھی کئی احباب نے اس پر مضامین لکھے
خیر میں عرض یہ کرنا چاہ رہا تھا کہ میرے اس قطعے کے بابت مظفر نگر یوپی کے مشہور شاعر جناب ریاض ساغر صاحب نے آج مجھ سے رابطہ کیا اور ایک فیس بک پوسٹ پر چل رہی ایک بحث کا حوالہ دیتے ہوئے کہا کہ یہ علامہ کا قطعہ ہے جسے بعض لوگ آپ سے منسوب کر رہے ہیں مجھے بڑی تکلیف ہوئی کہ ایسے بڑے اصحاب ادب بھی اسے آج تک علامہ کا سمجھ رہے ہیں ۔
(سرفراز بزمی سوائی مادھوپور راجستھان انڈیا)”
وہ شاعر جو علم و دولت کی اصل قدر کو روحانی ربط سے ناپتا ہے۔ سرفراز بزمی کی شاعری کی انھی معنوی بلندیوں کا تسلسل ہمیں ان کی نظم "پت جھڑ میں کشمیر کی سیر” میں ملتا ہے۔ یہ نظم انھوں نے 28اکتوبر 2024ء کو تخلیق کی اور وٹس ایپ کے ذریعے سے 27 اکتوبر 2025ء کو مجھے ارسال کی جب بزمی صاحب نے یہ نظم ارسال کی تو مجھے اتنی پسند آئی کہ میں نے فوراً اپنے محسن ومربی شوکت اقبال صاحب کی خدمت میں ارسال کی۔ انھوں نے نظم مکمل انہماک سے پڑھی اور یہ جواب دیا:”بھر پور تاثراتی نظم ہے اس پر مکمل تنقیدی کالم بنتا ہے۔”

شوکت صاحب کے حکم کی تعمیل میں یہ جسارت کرنے چلا ہوں۔سرفراز بزمی صاحب کی یہ نظم”پت جھڑ میں کشمیر کی سیر” بہ ظاہر کشمیر کے مناظرِ فطرت کی سیر ہے مگر درحقیقت کشمیر کے دکھ، انسانی بے بسی اور امیدِ نو کی ایک علامتی داستان ہے۔
نظم کا آغاز ایک دل گرفتہ منظر سے ہوتا ہے ڈل جھیل کے کنارے ایک محافظ کھڑا ہے فولادی لباس میں ملبوس مگر آنکھوں میں خوف کی چمک لیے ہوئے۔ یہ منظر محض ایک سپاہی کی موجودگی نہیں بلکہ اس خوف، جبر اور غیر یقینی فَضا کی علامت ہے جو پورے کشمیر پر طاری ہے۔ شاعر کی نگاہ سطحی نہیں بلکہ باطنی ہے اور یہی بزمی صاحب کی شاعری کی شناخت بھی ہے۔ وہ فولاد میں لپٹے بدن کے پیچھے ایک لرزتے ہوئے انسان کو دیکھ لیتا ہے۔
ڈل جھیل کا میلا پانی، شکستہ شکارے اور بجھا بجھا سا بزرگ مانجھی یہ سب تصویریں کشمیر کی اداسی اور ماند پڑتی ہوئی زندگی کی عکاس ہیں۔ شاعر کے بیان میں ایک ٹھہرا ہوا درد ہے جو نہ چیخ بن کر ابھرتا ہے نہ خاموشی میں گم ہوتا ہے۔ یہ درد دراصل ایک اجتماعی المیے کا استعارہ ہے۔ شاعر کی نگاہ جہاں بھی جاتی ہے وہاں بارود کی مہک، لہو کی تازگی اور تباہی کی چاپ سنائی دیتی ہے مگر اس تباہی میں بھی وہ جمال کی جھلک دیکھنے سے باز نہیں رہتا۔
نظم کے ایک حصے میں شاعر سوال اٹھاتا ہے:
“جو دیوداروں سے پوچھتا ہے چنار میں آگ کیوں لگی ہے؟”
یہ سوال علامتی ہے۔ درخت فطرت کی صدیوں پرانی خاموش گواہیاں ہیں اور ان سے پوچھنا گویا وقت سے بازپرس کرنا ہے۔ چنار کی آگ صرف درخت کی نہیں بلکہ کشمیر کی روح کی آگ ہے ۔ چنار کشمیر میں ایک خاص استعارہ ہے جس سے آگ اگلتی ہوئی محسوس ہوتی ہے۔ وہ آگ جو ظلم، جدائی اور بے بسی نے بھڑکائی ہے۔
لیکن سرفراز بزمی مایوسی کے شاعر نہیں۔ وہ خزاں کے زرد پتوں میں بھی بہار کی جھلک دیکھ لیتے ہیں۔ ان کی نظم کا سب سے درخشاں لمحہ وہ ہے جب وہ کہتے ہیں:
“بجھی بجھی کانگڑی میں لیکن ابھی شرارے دہک رہے ہیں”
یہ بات نظم کی فکری روح ہے۔ “کانگڑی” کشمیر کی روایتی حرارت ہے اور “شرارے” انسانی ارادے اور ضمیر کی علامت۔ کانگڑی کشمیر کی ثقافت کا وہ حسین چہرہ ہے جس کی مٹھی بھر آگ یخ بستہ موسم میں بھی حرارت دیتی ہے۔ وہ کم زور سی آگ برف میں بھی سردی کو شکست ریخت کرنے کی طاقت رکھتی ہے۔ شاعر کا بھی یقین ہے کہ ظلمتوں کے باوجود انسان کے باطن میں امید کی چنگاری زندہ ہے۔ یہ وہ لمحہ ہے جہاں نظم محض بیان سے نکل کر فلسفے میں بدل جاتی ہے۔
پھر منظر بدلتا ہے۔ برف پوش پہاڑ، پہلگام کی سفید چوٹیاں، آبشاروں کی شوخ سرگم سب امید، بقا اور تجدیدِ حیات کی علامت بن جاتے ہیں۔ شاعر کہتا ہے کہ خزاں کا موسم عارضی ہے، زخم مندمل ہوں گے اور بہارِ نو پھر سے لوٹے گی۔ یہ ایمان دراصل زندگی کے ابدی اصولِ تغیر پر مبنی ہے۔یہ فکر ہر کشمیری مفکر کی ہے ،ہر شاعر کی اور ہر قلم کار کی لیکن اس کے ساتھ ساتھ ہر اس زندہ انسان کی جس کا خمیر تو کشمیر کی مٹی سے نہیں اٹھا تاہم وہ کشمیر کے درد سے مکمل طور پر آشنا ہے۔ سرفراز بزمی کا تعلق بھی مؤخر الذکر قبیل سے ہے۔
نظم کے اختتام پر لہجہ درویشانہ اور روحانی ہو جاتا ہے۔ شاعر دعا دیتا ہے:
“خدا تمھیں قوتِ نمو دے، وقارِ غیرت رہے سلامت، تمھیں محبت کی آبرو دے۔”
یہ دعا کشمیر کے لیے ہے مگر اس کی معنویت عالمی ہے۔ یہ دراصل انسانیت، آزادی اور محبت کے بقا کی دعا ہے۔ شاعر چاہتا ہے کہ زمین پر حسن صرف فطرت سے نہیں بلکہ انسان کے ضمیر سے بھی جنم لے۔
اگر اس نظم کو تنقیدی زاویے سے دیکھا جائے تو اس میں تین بنیادی سطحیں واضح طور پر محسوس ہوتی ہیں۔ جمالیاتی سطح پر بزمی صاحب نے فطرت کی منظرکشی کو نہایت باریک حِسّی مشاہدے کے ساتھ پیش کیا ہے۔ ڈل جھیل کا نیلگوں پانی، جلے درختوں کی بو، چنار کے زرد پتے یہ سب تصویری ترکیبیں قاری کے ذہن میں متحرک منظر بنا دیتی ہیں۔ فکری سطح پر نظم حسن و جبر، خوف و امید اور خزاں و بہار کے تضاد پر قائم ہے۔ شاعر کے نزدیک مایوسی محض وقتی کیفیت ہے جب کہ امید اور تجدید انسان کی اصل شناخت ہے۔ علامتی سطح پر خزاں زوال اور جبر کی علامت ہے، بہار تجدید و آزادی کی اور شرارے انسانی حوصلے اور بےدار ضمیر کے پیام بر۔
یہ نظم صرف کشمیر کی روداد نہیں بلکہ انسان کی ابدی جستجو اور مزاحمت کا استعارہ ہے۔ اس میں فطرت، تاریخ اور انسان ایک ہی بیانیے میں ضم ہو گئے ہیں۔ شاعر نے فطرت کے حسن میں چھپا ہوا کرب دکھایا ہے اور کرب میں چھپی ہوئی امید کو جاوداں کیا ہے۔
“پت جھڑ میں کشمیر کی سیر” محض مناظرِ فطرت کی نظم نہیں، بلکہ ایک عہد کی روح کا بیان ہے۔ اس میں خزاں کی سرد ہوا کے ساتھ امید کی حرارت بہتی ہے اور شاعر کے الفاظ دل پر یوں نقش ہو جاتے ہیں جیسے چنار کے پتوں پر اترتی دھوپ۔ یہ نظم کشمیر کا نوحہ بھی ہے اور انسان کی جاودانی امید کا اعلان بھی کہ اندھیروں کے باوجود چراغِ ہمت جلا ہوا ہے۔

_{Title Image background by Joe from Pixabay}