Tag: خان پور

’’شعوروادراک‘‘ کا خاص شمارہ … حیدرقریشی گولڈن جوبلی نمبر
تبصرہ نگار : نعیم الرحمٰن (کراچی )

محمدیوسف وحیدنے ادبی مراکزسے دورخان پورکے چھوٹے شہرسے ’’شعوروادراک‘‘ کااجراکرکے بڑی ہمت کاثبوت دیا۔ادبی جریدے کانام علامہ اقبالؒ کے شعرسے اخذہے۔
حادثہ وہ جوابھی پردہ ٔ افلاک میں ہے
عکس اس کا مرے آئینہ ادراک میں ہے
یہ اُردو،سرائیکی اورپنجابی زبان کامجلہ ہے۔جوعلمی،ادبی اورسماجی شعورکے سفرکامقصدلیے منظرعام پرآیا۔سہ ماہی کتابی سلسلہ کاچوتھاشمارہ اکتوبرتادسمبر2020ء جرمنی میں مقیم’ حیدرقریشی گولڈن جوبلی نمبر‘ کے طورپرشائع ہواہے۔حیدرقریشی اُردوکے ہمہ جہت ادیب ہیں جنہوں نے شاعری اورنثرکی تمام اصفاف میں اپنے فن کولوہامنوایا۔ بہترین ادبی جریدہ’’جدیدادب ‘‘پہلے خان پوراورپھرجرمنی سے نکالتے رہے ۔ ملک سے دور رہ کربھی پاکستان اوربھارت میں ہونے والی ادبی پیش رفت سے آگاہ رہتے ہیں۔ان کے تجزیاتی سیاسی مضامین کی بنیاد پر پاکستان میں کئی معروف ٹی وی اینکرزاپنی دھاک بٹھانے کی کوشش کرتے ہیں اوران تجزیوں کواپنے نام سے پیش کرتے ہیں ۔حیدرقریشی کے ادبی دنیا میں پچاس سال مکمل ہونے پر’’شعوروادراک‘‘ نے انہیں خراجِ تحسین پیش کیاہے کہ حیدرقریشی کااپناتعلق بھی خان پورہی سے ہے۔

مدیرمحمدیوسف وحیدنے ’اپنی بات‘میں لکھاہے۔’’ شعوروادراک‘‘کاخاص شمارہ ’’حیدرقریشی گولڈن جوبلی نمبر‘‘ آپ کے ہاتھوں میں ہے۔ دسمبر2020 ء میں حیدرقریشی کی علمی ادبی خدمات کے پچاس سال مکمل ہورہے ہیں۔حیدرقریشی کے فن وشخصیت کے حوالے سے خصوصی گوشہ ترتیب دینے کے دوران علمی ادبی شخصیات کی طرف بھرپوراورعمدہ تحریروں کاخاصامواد جمع ہوگیا۔ان تحریروں کاحجم پانچ سوسے زائد صفحات سے زائد ہوگیا۔ان تحریروں کے حسنِ انتخاب کومدنظررکھتے ہوئے خصوصی گوشہ کوباقاعدہ خاص نمبر’’حیدرقریشی گولڈن جوبلی نمبر‘‘ شائع کیاگیاہے۔حتی المقدورکوشش اوروسائل کوبرائے کارلاتے ہوئے حیدرقریشی کے فن وشخصیت اورعلمی ادبی خدمات کابھرپور اعتراف کے ساتھ شمارہ کویادگارتحریروں سے سجاکرگلدستہ پیش کیاگیاہے۔‘‘
حیدرقریشی نے مدیر’شعوروادراک‘محمدیوسف وحیدکاشکریہ ادا کرتے ہوئے تحریرکیاہے۔’’ آج کی انٹرنیٹ سروسزکی جدیدترٹیکنالوجی نے زندگی کے دیگرشعبوں کی طرح علمی اورادبی ابلاغ کے وسیع تر راستے کھول دیے ہیں۔ ادبی کتب اوررسائل چھپ بھی رہے ہیں اورانٹرنیٹ پربھی دستیاب ہیں۔ سوشل میڈیاکی تمام ترحشرسامانیوں کے باوجودمیں ادبی رسالے کی اہمیت ،معیاراورقدروقیمت کا معترف ہوں ۔ معیاری ادبی رسائل ،اپنے لکھنے والوں کے لیے مستقل تربیت گاہ کادرجہ رکھتے ہیں۔خان پور سے ’جدید ادب‘ کااجراء میرے لیے عزت و اعزازکاموجب بنا۔یہ دیکھ کرخوشی ہوتی ہے کہ میں نے ’جدید ادب‘ کوخان پورمیں جہاں تک پہنچایاتھا،آج محمدیوسف وحیدنے’شعوروادرا ک‘ کاسفروہاں سے آگے شروع کررکھاہے۔یہ ادبی ارتقابھی ہے اورادبی رسالے کی اہمیت کااعلان بھی۔میرے لیے یہ امربجائے خود ایک اعزاز ہے کہ میرے شہرخان پورسے میرے ادبی کام کے اعتراف کے طورپرخاص نمبرچھاپنے کا پروگرام بن گیا۔پھراس نمبرکی اشاعت گولڈن جوبلی نمبربن جانامزیدخوش گوارحیرت کاموجب بنا۔ جب میری زندگی کی پہلی غزل چھپی تھی تومیں بچوں کی طرح خوش ہوا تھا۔آج جب ادبی زندگی کے پچاس سال مکمل ہونے پراپنے ہی شہرسے ایک اعلیٰ معیارکے رسالے کے گولڈن جوبلی نمبرکااعزازمل رہا ہے توآج بھی بچوں کی طرح خوش ہوں۔میں نے خود پرکوئی مصنوعی دانشوری طاری نہیں کی۔ہاں جی یہ میری نصف صدی کی خدمات کا صلہ ہے۔شعوروادراک کے مدیر محمدیوسف وحیدکاتہہ دل سے شکریہ اداکرتاہوں۔‘‘
ڈاکٹرعامرسہیل اورڈاکٹرعبدالرب استاد نے بیک پیچ پرحیدرقریشی کی ادبی خدمات کوخراجِ تحسین پیش کیاہے۔ڈاکٹرعامرسہیل کہتے ہیں۔ ’’ محمدیوسف وحیدکی انقلابی شخصیت نے’ شعوروادراک‘ جیسے اعلیٰ ادبی جریدے کی بنیادرکھی اوربہت کم عرصے میں اسے اعتباراورساکھ کے اعلیٰ مقام پرپہنچادیا۔ اس ادبی رسالے کی نمایاں خوبی یہ ہے کہ اس میں اردو کے علاوہ پنجابی اورسرائیکی ادبیات کوبھی شامل کیاجاتاہے۔یہ اپنی طرز کامنفرداوروقیع ادبی شمارہ ہے،خوشی کی بات ہے کہ ’شعوروادراک‘ کازیرِ نظرشمارہ حیدرقریشی کی ادبی خدمات کاجامع مطالعہ پیش کرتا ہے۔خان پورکی تاریخ میں حیدرقریشی کانام ہمیشہ سرِفہرست رہے گاکہ اس دھرتی پرانہوں نے جس ادبی پودے کولگایاتھاآج وہ پھل دار درخت بن چکاہے۔حیدرقریشی کوآج دنیائے ادب میں بھی بلندمقام حاصل ہے۔اردوماہیانگاری کی تحریک ہویا کوئی اورادبی معرکہ اس میں حیدرقریشی ہمیشہ فعال نظرآتے ہیں۔الوحیداکیڈمی خان پور نے اپنی دھرتی کے اہم ادیب کوخراجِ تحسین پیش کرکے ایک روشن مثال قائم کی ہے۔یہ نمبرحیدرقریشی کے بیشترادبی جہات کامتوازن جائزہ پیش کرتاہے اورآنے والے نئے محققین اورناقدین کی رہنمائی کامستند ذریعے بنے گا۔محمدیوسف وحیدبذات خودادب دوست شخصیت ہیں،جن کی ادبی بصیرت اورروشن خیالی کی بدولت یہ رسالہ معیاری تحریروں کامرکزبن گیاہے۔‘‘

ڈاکٹرعبدالرب نے لکھاہے۔’’ اکیس ویں صدی کے اکیس ویں سال میں ’’شعوروادراک‘‘ خان پورکاحیدرقریشی نمبرکااجراء بیک وقت دونوں کے لیے قابل مبارک باد ہے۔حیدرقریشی کی نصف صدی پرمشتمل ادبی خدمات کااعتراف ادب کے قارئین کے لیے سوغات ہوگا۔ حفیظ جالندھری کاشعریاد آرہاہے۔
تشکیل وتکمیلِ فن میں جوبھی حفیظ کا حصہ ہے
نصف صدی کاقصہ ہے دوچاربرس کی بات نہیں
بلاشبہ حیدرقریشی کی نصف صدی پرمبنی خدمات کااعتراف اس رنگ میں ہوناتوازحدضروری تھا۔اس بارے میں حیدرقریشی کاایک حسبِ حال شعرپیش ہے۔
وہ جوحیدر میرے منکرتھے میرے ذکر پہ اب
چونک اٹھتے ہیں کسی سوچ میں پڑ جاتے ہیں
کولکتاکی عنبرشمیم نے ’’حیدرقریشی۔ایک نظرمیں‘‘ مختصراً حیدرقریشی کی ادبی حیات کی مکمل تفصیل پیش کردی ہے۔جس کے مطابق ان کاپورا نام غلام حیدرارشد قریشی او ر درست تاریخ پیدائش 13جنوری 1952ء ہے۔حیدرقریشی نے شاعری میں غزل،نظم،ماہیا میں دلچسپی لی جبکہ نثرمیں افسانہ، خاکہ، انشائیہ، سفرنامہ، یادنگاری، تحقیق وتنقید ، حالاتِ حاضرہ سارے میدانوں میںاپنی توفیق کے مطابق کام کیا۔ ارد و ماہیا کے حوالے سے حیدرقریشی کاکام تحقیقی اورتخلیقی ہرلحاظ سے بنیادی اہمیت کاحامل ہے۔ادبی معرکہ آرائیوںمیں تلخ حقائق پرمبنی حیدرقریشی کا کام ادب کی تاریخ میں محفوظ رکھنے والاہے۔ ان کی تخلیقات میں اپنے قریبی عزیزواقارب کاکثرت اوربڑی محبت سے ذکرملتاہے۔پی ایچ ڈی ،ایم فل اورایم اے کے گیارہ مقالات میں حیدرقریشی کے ادبی کام کے مختلف زاویوں سے اب تک لکھے جاچکے ہیں جبکہ چھ مقالات میں جزوی مگراہم ذکر ہے۔’جدیدادب‘ خان پوراورپھر’جدیدادب‘ جرمنی کااجرا، حیدرقریشی کی مدیرانہ حیثیت کاتعین کرتاہے۔1994ء سے جرمنی اپنی فیملی کے ساتھ آباد ہیں ۔ تصانیف اورتالیفات میں’’اباجی اورامی جی‘‘،’’حیات مبارک حیدر‘‘،’’مبارکہ محل‘‘شعری مجموعے ’’سلگتے خواب‘‘،’’ عمرِگریزاں ‘‘،’’ محبت کے پھول‘‘،’’ دُعائے دل‘‘،’’ ددردسمندر‘‘ ،’’زندگی‘‘ نثری مجموعے ۔’’روشنی کی بشارت‘‘،’’ قصے کہانیاں‘‘،’’میری محبتیں‘‘،’’ کھٹی میٹھی یادیں‘‘،’’ قربتیں،فاصلے‘‘،’’ سوئے حجاز‘‘،’’ ایک انوکھی کتاب ، بیماری یاروحانی تجربہ‘‘ ۔تحقیق وتنقید ’’حاصل ِ مطالعہ تاثرات‘‘،’’ مضامین اورتبصرے‘‘،’’ مضامین ومباحث ‘‘ ،’’ ستیہ پال آننددکی بودنی،نابودنی‘‘،’’ڈاکٹرگوپی چندنارنگ اورمابعدجدیدیت‘‘، ’’ڈاکٹروزیرآغا عہد ساز شخصیت‘‘۔ماہیاکے حوالے سے تحقیق وتنقید۔ ’’ارد و ماہیا نگا ری‘‘،’’اردوماہیے کی تحریک‘‘،’’ اردو ماہیے کے بانی ہمت رائے شرما‘‘،’’اردوماہیا‘‘،’’ ماہیے کے مباحث‘‘ حالات ِ حاضرہ۔’’منظراورپس منظر‘‘،’’ خبر نا مہ‘‘،’’ اِدھراُدھرسے‘‘،’’ چھوٹی سی دنیا‘‘۔حیدرقریشی نے اپنی کتب مختلف کلیات کی صورت بھی شائع کررکھی ہیں۔جوانٹرنیٹ پربھی دستیاب ہیں۔اس کے علاوہ پانچ شعری اورچھ نثری مجموعوں پرمشتمل منفرد مجموعہ’’عمرلاحاصل کاحاصل‘‘ بھی بھارت سے شائع ہوئی ہے۔حیدرقریشی کی شخصیت اورفن پرکئی کتابیں لکھی گئیںادبی کتابی سلسلہ ’عکاس‘ نے حیدرقریشی نمبرشائع کیا۔ پاک وہندکے کئی رسائل نے ان پر خصوصی گوشے مرتب کیے۔

خصوصی شمارے کاپہلاحصہ’’ فن وشخصیت ‘‘ہے۔جس میں انتالیس مضامین،خاکے، انٹرویوزاور حیدر قریشی کی کتابوں کاجائزے شامل ہیں ۔جس میں ڈاکٹرنذرخلیق ’’انٹرنیٹ کے ذریعے مکالمہ‘‘ میں حیدر قریشی نے اپنی شاعری،نثر،ماہیاکے فروغ کے لیے کام اورنائن الیون کے بعدکالم نگاری کے بارے میں سوالات کے جواب دیے ہیں۔اس انٹرویوسے حیدرقریشی شخصیت اورفن کی تفہیم ہوتی ہے۔مرحوم ڈاکٹر انور سدیدکامضمون’’جرمنی میں پاکستان کاادبی اور تہذیبی سفیر،حیدرقریشی‘‘قیام جرمنی کے دوران حیدر قریشی کی علمی وادبی سرگرمیوں اور وطن سے دوررہ کربھی کس طرح پاکستان سے منسلک رہے،اس کاتفصیلی ذکرکیاہے۔نذیراحمدبزمی’’نصف صدی کاقصہ‘‘ میں لکھتے ہیں۔ ’’حیدرقریشی کی پچاس سالہ ادبی خدمات کے حوالے سے مجھ ناچیزطفل مکتب کاکچھ لکھنا سورج کوچراغ دکھانے کے مترادف ہے،مگراس کے باوجود اپنے شہرکے قابلِ فخرسپوت چندٹوٹے پھوٹے الفاظ لکھ کرگویاانگلی کٹاکرشہیدوں میں شامل ہونے کی سعی لاحاصل کررہا ہوں۔ عمومی مشاہدہ کے مطابق اللہ بہت کم خوش نصیب لوگ ہوتے ہیں جن کواللہ تعالیٰ نے ہرفن مولابنادیاہے۔بہت سے نامورشعراایسے ہیں جو نثر کی ایک لائن لکھنے کی صلاحیت سے بھی محروم ہیں ، اسی طرح بیشترنثرنگارشاعری کی سدھ بدھ سے کوسوں دورہوتے ہیں مگرحیدرقریشی وہ خوش نصیب شخص ہے جس نے بیک وقت بطورشاعر،ادیب،افسانہ نگار،انشائیہ نگار،خاکہ نگار،مضمون نگار، محقق ، نقاد ، دانشور اور ماہیا نگار کے طورپرنقادان فن سے اپنی صلاحیتوں کالوہامنوایاہے۔ان کاقلم آج بھی اسی رفتار سے رواں دواں ہے جیساکہ ان کے ادبی سفرکے آغاز کے وقت تھا، پچا س کے آنے والی معاشی، معاشرتی ، سیاسی ،سماجی اورجغرافیائی تبدیلیوں نے ان کے قلم کی جولائی کومتاثرنہیں کیابلکہ مہمیز بخشی ہے جس کی وجہ سے آج بھی ان کی تحریروں میں شگفتگی،روانی ،فصاحت وبلاغت،ندرت خیال،معاشرتی عکس ،بلند خیالی اورباریک بینی جیسی خوبیاں بدرجہ اتم موجود ہیں جیسی اول روزتھیں،اب فنی پختگی کے سبب یہ خوبیاں بدرجہ کمال کوپہنچ چکی ہیں۔‘‘
منزہ یاسمین نے حیدرقریشی کی مختصرسوانح حیات میں ان نے آباواجداد،والدین،بہن بھائیوں،بیوی ،بچوں اوران کی تصانیف کی تفصیلات بیان کی ہیں۔بیوی ،بیٹے،بہو اوردوستوںکے حیدرقریشی کی شخصیت اورمزاج کے بارے میں تاثرات بھی مضمون نگارنے پیش کرکے تحریر کی دلچسپی میں اضافہ کیاہے۔ حیدر قریشی کے دوست خورشیداقبال کی رائے ہے۔’’حیدرقریشی کی شخصیت کامنفردپہلوہی ان کے فن کے منفرد پہلوکاذمہ دارہے۔وہ ہے بیباکی اورصاف گوئی۔ان کی غزلوں،نظموں ،ماہیوں،افسانوں اور خاکوں میں سے اگران کی بیبا کی نکال کی جائے توان کے فن کاساراحسن ماند پڑجائے ۔سارے رنگ پھیکے پرجائیں گے۔‘‘
مدیر’’شعوروادراک‘‘محمدیوسف وحیدنے ’’حیدرقریشی کاگلشنِ ادب‘‘ میں تحریرکیاہے۔’’ پچاس سال علم وادب کی ترویج واشاعت کے لیے وقت کرنے والے اردو،سرائیکی کے معروف شاعر،نقاد، محقق ، ادیب ومدیرحیدرقریشی کوامسال اپنی ادبی زندگی کے پچاس سال پورے ہونے پرتہہ دل سے مبارکباد پیش کرتے ہیں۔کسے خبرتھی کہ ایک عام سی غزل سے ادبی دنیامیں داخل ہونے والے نوآموزجوان غلام حیدر ارشدجواپنی مستقل مزاجی ،غیرمتزلزل طبیعت اورسچے جذبے ولگن کے ساتھ ترقی کی منازل طے کرتے ہوئے ادبی دنیامیں حیدرقریشی کے نام سے معروف ومتعارف ہوں گے۔‘‘ یوسف وحید نے حیدر قریشی کی ادبی زندگی کے مختلف مراحل کا جائزہ پیش کیاہے۔معروف شاعراورٹی وی پروڈیوسرایوب خاور کے مضمون کاعنوان’’حیدرقریشی کے نام‘‘ ہے۔’’حیدرقریشی سے میراتعارف دراصل محترم وزیرآغاکے موقرجریدے’’اوراق‘‘ کے صفحات پرچھپنے والی اس کی غزلوں اورنظموں نے کروایاتھا اورمیں نے اسے خان پورسے بلالیا۔ حیدر قریشی کی شخصیت نے مجھے موہ لیا۔سوٹیلی وژن پرایک نئے شاعر اوریک نئے پروڈیوسرڈائریکٹرکایہ عارضی رشتہ پرخلوص دوستی میں ایسے ڈھلا کے جیسے جیسے وقت گزرتاگیایہ اور گہرا ہوتا چلا گیا۔حیدرقریشی کا’جدیدادب‘ اسی کی دہائی کی زندہ نشانی ہے جسے حیدرنے خان پور کی آب وہوامیں جیسے تیسے زندہ رکھااورپھروہ کب جرمنی چلاگیامجھے معلوم نہیں۔ابھی ایک سال پہلے حیدرکے ٹیلی فون نے مجھے چونکادیا۔ آوازمیں وہی تازگی،پہچان،دوستانہ اورتعلقِ خاطر۔حیدرنے اپنانام لیاتومیں ششدررہ گیااورہمارے بیچ میں سے ستائیس اٹھائیس سال چپکے سے سرک کرایک طرف کوہوگئے۔میں سمجھاحیدر خان پورہی سے بول رہاہے مگروہ توجرمنی سے فون کررہاتھا۔چندمنٹ میں تیرہ انچ کے موٹے شیشے کی دیواردھڑام سے ہمارے درمیان دوبارہ کھڑی ہوگئی فاصلے کااحساس بھی کتناخوف ناک ہوتاہے۔‘‘
معروف ادیب وشاعراکبرحمیدی نے ’’حیدرقریشی،پوراآدمی‘‘ کے نام اورنذیرفتح پوری نے’’لفظوں کامسیحا‘‘ کے عنوان سے حیدرقریشی کے خاکے تحریرکیے ہیں۔اکبرحمیدی نے لکھاہے۔’’ حیدرقریشی کاشمار ان لوگوں میںہوتاہے جن کی قسمت میں سوائے کامیابی کے کچھ اورلکھاہی نہیں جاتا۔حیدرقریشی نے کامیابی کی شہرادی کووقت کے بہت بڑے دیوکی قیدسے نکال کرحاصل کیاہے۔میں اسے گزشتہ کم سے کم پچیس برسوں سے یاشایداس سے بھی زیادہ عرصہ سے جانتاہوں،پہچانتاہوں بلکہ اس کی دوستی کے اس حلقے میں داخل ہوں جہاں کسی پردہ داری کی ضرورت باقی نہیں رہتی ۔ہم دونوںبڑے اعتماد اورتسلی کے ساتھ دوسرے کے بارے میں جس قسم کی باتیں کرناچاہتے ہیں،کرلیتے ہیں ۔ وہ متوسط قامت کاکھلتے ہوئے گندمی رنگ کا،بھرے بھرے جسم والاآدمی ہے۔کبھی اس کے چہرے پرداڑھی نمابال ہوتے تھے جواب مرورایام کے ساتھ باقی نہیں رہے اوراب ان کی ضرورت بھی نہیں رہی کیونکہ اب وہ پاکستان میں نہیں رہتا،جرمنی میں رہائش اختیارکرچکا ہے۔اس کے مزاج میں ایک بات میں نے حیران کن حدتک دیکھی ہے،وہ عام طورپربے حدجذباتی ہے۔مگردوستوں کے ساتھ متحمل مزاج ۔یہی وجہ ہے کہ اس کے جھگڑے ہمیشہ دوسرے لوگوں سے ہوئے ہیں،دوستوں سے نہیں۔دوستوں کے ساتھ اس نے بعض اوقات زود رنج ہونے کامظاہرہ توکیاہے مگرناراضی کانہیں۔اس کے مزاج میں حسن پرستی کارنگ شروع سے ہی اچھاخاصاہے جواس کی غزلوں میں بھی نمایاں ہوتاہے۔یہی حسن پرستی کاجذبہ ہے جس نے ایک زمانے میں اسے کوچہ عشق کی سیربھی کروادی تھی،مگرکچھ اس طرح کہ وہ اس گلی میں ایک طرف سے داخل ہوا،اوردوسری طرف سے بخیروعافیت نکل آیااپنی خیروعافیت کے ساتھ بھی اوردوسرے فریق کی خیرو عافیت کے ساتھ بھی ۔میرصاحب کی طرح اس نے بھی یہاں عزت داروں کی عزت کاپاس کیاہے۔یہی وجہ ہے کہ دشت وصحراکی خاک اڑانے سے بچ کرجرمنی پہنچنے میں کامیاب ہوگیا۔‘‘
بھارتی قلمکارنذیرفتح پوری اپنے خاکے میں لکھتے ہیں۔’’ کچھ لوگ محض مشکلیں پیداکرنے کے لیے ہی عالم ِ وجود میں آتے ہیں،لیکن حیدر قریشی کی خوبی ہے کہ وہ جتنی مشکلیں پیداکرتے ہیںان سے کہیں زیادہ ان مشکلوں کاحل بھی فراہم کردیتے ہیں۔خوشی کی بات ہے کہ وہ محض ادبی میدان ہی میں مشکلیں پیدا کرتے ہیں۔ادب بھی کس زبان کا؟اردوزبان کا۔استادہدہدگلشن آبادی فرماتے ہیں کہ اردوکے پرستاروں ، جانثاروں اورتنخواہ خواروںکے طفیل اردو کے لیے پہلے ہی کیامشکلیں کم تھیں کہ حیدرقریشی نے اس میں ماہیے کی دیوارکھڑی کردی۔اتناہی نہیں بلکہ اپنی تائیدوہم رکابی کے لیے ایک لشکرتیارکرکے ادب کے عالمی میدان میں جنگ کااعلان کردیا۔لاکھ سمجھایاکہ بھائی! تخلیقی ادب کا سمندرترقی پسندیت اور جدیدیت کے بعدتھک تھکاکرسویاہواہے اسے کچھ دنوں آرام کی سخت ضرورت ہے۔ابھی ایک دہائی پہلے مظہرامام نے آزاد غزل کاپتھرمارکراس خوابیدہ سمندرمیں طوفان اٹھانے کی کوشش ضرور کی تھی لیکن کچھ دنوں تک موجیں اچھال کرسمندرپھرسوگیا۔کبھی کبھی توایسالگتاہے کہ حیدرقریشی کسی طلسماتی شخصیت کانام ہے۔جہاں دیکھو وہاں موجود،جب سوچوتب حاضر،اردوکے بیشتررسائل اور اخبارات پروہ آسمان کی طرح چھائے ہوئے ہیں۔جرمنی میں رہتے ہیں لیکن ادب کاریموٹ کنٹرول ان کے ہاتھ میں ہوتاہے،جس کا استعمال وہ تخریب کے لیے ہرگزنہیں کرتے۔البتہ ماہیے کی تحریک میں رکاوٹ پیداکرنے والوں کووہ اپنے ریموٹ کنٹرول سے خوفزدہ ضرور کرتے رہتے ہیں۔ریموٹ کنٹرول کے درست استعمال کووہ ماہیے کے درست وزن کی تحریک کے ساتھ ساتھ چلاتے ہیں اوراپنی ہنر مندی کی داد پاتے ہیں۔‘‘
ان دونوں خاکوں سے حیدرقریشی کی شخصیت وفن کے کئی گوشے قارئین کے سامنے روشن ہوتے ہیں۔حیدرقریشی کے فن وشخصیت پردیگر مضامین میں سہ ماہی عکاس کے مدیرارشدخالدکا’’حیدرقریشی کی ادبی تیزرفتاری‘‘،فرزانہ یاسمین کاانٹرویو’’حیدرقریشی کاتصورِ محبوب۔ایک مکالمہ‘‘ ڈاکٹرعامر سہیل کا ’’حیدر قریشی کی یادنگاری‘‘ ڈاکٹرہردے ناتھ بھانوپرتاب کا’’حیدرقریشی کی نظم نگاری کاخصوصی مطالعہ‘‘ ،ڈاکٹر منا ظرعاشق ہرگانوی کا’’حیدرقریشی کاماہیانگاری کاسفر‘‘، ڈاکٹررضینہ خان کا’’حیدرقریشی کی انشائیہ نگاری‘‘،خاوراعجاز کا’’حیدرقریشی کے انشا ئیے‘‘،یوسف وحیدکا’’حیدرقریشی کی اردوماہیانگاری‘‘، ناصرعباس نیرکا’’حیدرقریشی کی غزلیہ شاعری۔ایک تجزیہ‘‘ پروفیسرجیلانی کامران کا’’حیدرقریشی کی افسانہ نگاری‘‘ ،ڈاکٹرعامرسہیل کا’’حاصل ِ تحقیق‘‘ فرحت نوازکا’’حیدرقریشی کی کتابوں کی ایک جھلک‘‘ ،منزہ یاسمین کا’’حیدرقریشی کی مرتب کردہ کتب ‘‘ ،اسحاق ساجدکا’’حیدرقریشی میری نظرمیں‘‘ ڈاکٹررمیشا قمر کا’’ہیں خواب میں ہنوز‘‘،یعقوب نظامی کا ’’ حیدرقریشی کاسفرنامہ۔سوئے حجاز‘‘،ڈاکٹررشیدامجد کا ’’حیدرقریشی کی افسانہ نگاری‘‘، نصرت ظہیرکا’’حیدربھائی پرایک ادھورامضمون‘‘ افتخار عارف کا’’ حیدر قریشی اورجدیدادب‘‘ مظہرامام کا’’عمرِگریزاں کی شاعری‘‘ ، ہارون الرشیدکا’’ غزلیں ،نظمیں،ماہیے ایک مطالعہ‘‘ نعیم الرحمٰن کا’’عمرلاحاصل کاحاصل‘‘ عبداللہ جاوید کا’’عمرلاحاصل میں شامل افسانے‘‘ منشایاد کا’’میری محبتیں‘‘ محمود ہاشمی کا’’ بنام حیدر قریشی‘‘ اکبرحمیدی کا’’ سوئے حجاز‘‘ نصرت بخاری کاانٹرویو ’’حیدرقریشی کاتخلیقی سفر‘‘ ڈاکٹرالطاف یوسف زئی کا’’ہماراادبی منظرنامہ کامطالعہ‘‘ اور شہنازخانم عابدی کا ’’مضامین ومباحث کی ایک جھلک‘‘ شامل ہیں۔ان تمام مضامین میں حیدرقریشی کے فکروفن کی تمام جہتوں کو تفصیلی طور پرپیش کیاگیاہے اوران کی مختلف کتب کابھی جائزہ لیاگیاہے۔اس طرح ان کی شخصیت وفن کاکوئی گوشہ قاری کی نظرسے پوشیدہ نہیں رہتا اورقاری اس سے اجمالی طورپرہی صحیح آشناضرور ہوجاتا ہے ۔اس کاوش پرمدیر ’شعو ر و ادراک‘محمدیوسف وحید بھرپورمبارک باد اورتحسین کے حقدارہیں۔
مضامین کے بعد تقریباً چھبیس صفحات پرحیدرقریشی کی غزلوں،نظموں اورماہیے کاانتخاب شامل کیاگیاہے۔جس سے ان کی مختلف اصناف میں شاعری کامعیارقاری کی نظرمیں آجاتاہے۔اگلاحصہ ’’تخلیقات‘‘ کے عنوان سے ہے ،جسے سعدیہ وحید نے مرتب کیاہے۔جس میں حیدر قریشی کے تین نمائندہ افسانے’’غریب بادشاہ‘‘،’’ گھٹن کااحساس‘‘ اور’’ اپنے وقت سے تھوڑاپہلے‘‘ شامل ہیں۔مصنف کے تحریرکردہ چھ خاکے’’ڈاچی والیاموڑ مہاروے‘‘،’’ مصری کی مٹھاس اورکالی مرچ کاذائقہ‘‘،’’ برگدکاپیڑ‘‘،’’ مائے نی میں کنوںآکھاں‘‘،’’پسلی کی ٹیڑھ ‘‘ ،’’پسلی کی ٹیڑھ دوسراحصہ‘‘منتخب کیے گئے ہیں۔ان کی یادوں پرمشتمل دلچسپ کتاب’’ کٹھی مٹھی یادیں‘‘ کے تین طویل اقتباسات دو انشائیے’’ اطاعت گزار‘‘ اور’’ فاصلے ،قربتیں‘‘ اوران سفرنامہ حج ’’سوئے حجاز‘‘ کاابتدائیہ بھی اس انتخاب میں شامل ہے۔مرتب نے بہت ذہانت سے یہ انتخاب کیاہے۔جس سے حیدرقریشی کے نثری ادب کاہرپہلوواضح ہوجاتاہے۔
’’حیدرقریشی گولڈن جوبلی نمبر‘‘ کاآخری حصہ’’ مضامین‘‘کاہے۔جس میں حیدرقریشی کے چار مضامین’’ اردوادب اورالیکٹرونک میڈیا‘‘، ’’ ہرمن ہیسے کاناول سدہارتھ‘‘،’’ میراجی‘‘اور’’ماہیے کاجواز‘‘ شامل ہیں۔خالدیزدانی نے ’’نظرے خوش گزرے‘‘اورحیدرقریشی کے چند انٹرویوزکوجگہ دی گئی ہے۔
اس طرح ’’شعوروادراک ‘‘ کا’’حیدرقریشی گولڈن جوبلی نمبر‘‘ اپنے موضوع کے اعتبارسے ایک بہت عمدہ اوربھرپورشمارہ ہے۔جس میں حیدر قریشی کی شخصیت وفن کاہرپہلو اورہرگوشہ ایک ہی شمارے میں پیش کردیاگیاہے اوریہ نمبرمستقبل میں حیدرقریشی پرکام کرنے والے محققین کے کام آئے گا۔ادب کی ایک ہمہ جہت شخصیت پراتناعمدہ نمبرمرتب کرنے پرمدیرمحمدیوسف وحید کودلی مبارک باد۔شعوروادراک کے اگلے شماروں کاانتظاررہے گا۔
(بحوالہ : شعوروادراک ۔ شمارہ نمبر 4۔اکتوبر تا دسمبر 2020ء، ’’حیدر قریشی گولڈن جوبلی نمبر ‘‘ ، مدیر: محمد یوسف وحید ، ناشر: الوحید ادبی اکیڈمی خان پور ،ص:132)
٭٭٭

نعیم الرحمٰن

کراچی

شعوروادراک کا خصوصی شمارہ …’’حفیظ شاہد نمبر ‘‘
تبصرہ نگار: ڈاکٹر ایف ایچ فاروقی ، لاہور

گزشتہ ماہ خان پور سے برادرم محمد یوسف وحید نے کمال محبت اور نہایت شفقت آمیز لہجے میں مجھ سے فون پر رابطہ کیا کہ وہ مجھے اپنا ادبی مجلہ ’’ شعوروادراک‘‘ کا تازہ شمارہ ’’حفیظ شاہد نمبر‘‘ ارسال کر رہے ہیں۔ یہ جان کر مجھے بے حد خوشی ہوئی ۔ یہ میری بدقسمتی یا لاعلمی ہے کہ مذکورہ مجلے کا اس سے قبل کوئی شمارہ میری نظر سے نہیں گزرا ۔ حالانکہ الوحید ادبی اکیڈمی 2004ء میں قائم ہوچکی ہے ۔
دو چار دن کے بعد بذریعہ ڈاک ’’شعوروادراک‘‘ کا تازہ شمارہ موصول ہوگیا ۔ کم و بیش 300صفحات پر مشتمل خصوصی شمارہ ’’حفیظ شاہد نمبر‘‘ کو دیکھ کر حیرانی ہوئی ۔ میرے نزدیک یہ ادبی تخلیقات پر مشتمل مجلہ نہایت اہمیت کا حامل ہے ۔ تحریروں کا معیار اور حُسنِ ترتیب لاجواب اور بے مثال ہے ۔
میں محمد یوسف وحید اور اُن کی پوری ٹیم کو تہہ دل سے مبارک باد پیش کرتا ہوں ۔ اور اللہ ربّ العزت کے حضور سب کی کامیابی اور مزید ترقی و خوشحالی کے لیے دُعا گو ہوں ۔

ایک بات جونہایت اہم ہے کہ ’’شعوروادراک‘‘ کا مجلہ دیکھ کر مجھے حیرانی ہوئی کہ خان پور شہر ‘پاکستان کے دوسرے شہروں کے مقابلے میں ایک چھوٹا شہر ہے اور اس چھوٹے شہر میں علمی وادبی تنظیم الوحید ادبی اکیڈمی کا قیام اورپھر اسی تنظیم کے زیرِ اہتمام ادبی مجلہ ’’شعوروادراک‘‘ کے پلیٹ فارم سے اہلِ قلم کی عمدہ تخلیقات کو ملک بھر میں متعارف کرانا ‘ایک جہاد سے کم نہیں ۔
آج کے دَور میں نوجوان نسل کا قلم و کتاب سے رشتہ تقریباً منقطع ہوچکا ہے ۔ ایسے میں علمی و ادبی شخصیات کو نئی نسل سے متعارف کرانا یقینا صد لائقِ تحسین ہے ۔ علمی ،ادبی اور ثقافتی مجلہ ’’شعوروادراک‘ ‘ جو بیک وقت تین زبانوں اُردو ، پنجابی اور سرائیکی زبان میں علم وادب ، تاریخ و تحقیق کے موضوع پر مضامین ، افسانے ،تنقید کے ساتھ ساتھ دیگر اصنافِ سُخن کی بہترین تخلیقات شائع کر رہا ہے ۔ یہ قابلِ فخر بات ہے ۔
ایم فل اور پی ایچ ڈی کرنے والے طلبا و طالبات اکثر و بیشتر کسی مناسب موضوع کے انتخاب اور اہلِ قلم شاعر و ادیب کی تلاش و جستجو کرتے ہیں کہ جن پر تحقیق کی جاسکے ۔ میرے خیال میں ادبی تخلیقات کا مرقع ’’شعوروادراک‘‘ اور دیگر ایسے ادبی مجلات ان طالب علموں کی بہترین رہنمائی کر سکتے ہیں ۔ علاوہ ازیں نئے اور پرانے لکھنے والے اہلِ قلم کے لیے بھی بہت سود مند ثابت ہوسکتے ہیں ۔ نئے لکھنے والے لکھاری اپنی تحقیق و تحریر ’’شعوروادراک‘‘ میں ارسال کرکے اپنی اصلاح کر سکتے ہیں اور بہت کچھ سیکھنے ، پڑھنے اور لکھنے کے مختلف طریقوں سے آگاہی بھی حاصل کر سکتے ہیں ۔
میں ایک مرتبہ پھرمدیرمجلہ ’’شعوروادراک‘‘ محمد یوسف وحید کو خراجِ عقیدت پیش کرتا ہوں اور دُعا گو ہوں کہ اللہ اُن کی کاوشوں کو مزید چار چاند لگائے ۔ اللہ کریم قدم قدم پر کامیابیاں اور کامرانیاں نصیب فرمائے ۔ آمین
٭٭٭

ڈاکٹر ایف ایچ فاروقی

لاہور

محمد یوسف وحید کی عمدہ تحقیقی پیش رفت …’’خان پور کا اَدب ‘‘
تبصرہ :یاور عظیم (خان پور)

برادرِ عزیز یوسف وحید سے شناسائی قریباً2004 ء میں ہوئی۔ جب ہم ترقیِ تعلیم کالج (خانپور)میں زیرِ تعلیم سمجھے جاتے تھے۔ یوسف وحید اس وقت ایک اسکول میں پڑھاتے تھے۔ ہماری شام کے وقت سیٹلائٹ ٹائون خانپور کے گراونڈ میںنشستیں ہوتیں۔ ان نشستوں میں مرزا حبیب، اظہر عروجؔ، اور کبھی کبھار جام عرفان (جو کامرس کالج میں پڑھاتے ہیں) وغیرہ شریک ہوتے۔ جب دوست شام کو جمع ہوتے تو روٹین کی گپ شپ کے ساتھ اپنی غزلیں، نظمیں، شعر یا نثری تخلیقات دوستوں سے شیئر کرتے۔ ان پہ جہاں داد و تحسین ملتی وہیں کُھل کر تنقید کا سامنا بھی ہوتا۔
خان پور ی ادیبوں کی اس محفل میں اپنی ایک الگ سوچ رکھنے والے محمد یوسف وحیداس شہر کی ادبی اور تہذیبی فضا کو بحال کرنا چاہتے تھے۔ وہ رفتگاں کی عظمت کے اعتراف اور موجودگاں کی قدر دانی کے ساتھ آئندگاں کی ایک کھیپ تیار کرنا چاہتے تھے۔ انھوں نے اپنے لیے ایک ایسا راستہ چننے کی تیاری کر لی تھی جو محض ذاتی تشخص کو اُجاگر نہیں کرتا بلکہ اس کا اختتام غمِ ملت اور غمِ معاشرہ کی منزل پہ ہوتا ہے۔ وہ اقبال کے اس شعر کی عملی تصویر بننے چلے تھے :
فرد قائم ربطِ ملت سے ہے ، تنہا کچھ نہیں
موج ہے دریا میں اور بیرونِ دریا کچھ نہیں

محمد یوسف وحید نے خانپور کی ادبی زمین کی آب یاری کاآغاز علمی، ادبی اور تعلیمی رسالہ ’’بچے من کے سچے ‘‘ کے اجرا سے کیا۔ اس رسالے کی مجلسِ ادارت و مشاورت میں اگرچہ مجھ سمیت مذکورہ بالا احباب کی شمولیت تھی۔ البتہ یہ آئیڈیا خالص یوسف وحید کا تھا۔ کچھ احباب دامے، درمے،سخنے اس رسالے کی ترویج و اشاعت میں حصہ لیتے رہے اور یہ سلسلہ کم و بیش آج بھی جاری ہے۔

2004ء سے لے کر2020ء تک خانپور کی ادبی فضا میں کئی خوش گوار تبدیلیاں ہوئیں۔ اس شہر کی ادبی تاریخ میں بہت سے اہم موڑ آئے۔ ہم یہاں ان واقعات کی جھلکیاں پیش کر رہے ہیں۔ تاکہ آپ کے سامنے ایک دفعہ اس تسلسل کو لایا جا سکے جس کی تازہ کڑی خان پور کی ادبی تاریخ پر مشتمل یہ کتاب ’’خان پور کا اَدب ‘‘ بھی ہے۔
۱۔خان پور میں جہاں الوحید ادبی اکیڈمی،بزمِ راز (کچاری)، بزمِ ادراک،تانگھ اَدبی سنگت، ارشد اَدبی سنگت اور عالم اَدبی فورم و دیگر جیسی نئی ادبی تنظیموں کا قیام عمل میں لایا گیا، وہیں کچھ پرانی تنظیموں کو جیسے ’’معارف‘‘ وغیرہ کواز سرِ نو فعال کیا گیا۔
۲۔ مشاعروں اور ادبی نشستوں کی تعداد میں خاطر خواہ اضافہ ہوا۔ ان میں دوسرے شہروں سے آئے ہوئے معزز مہمانوں نے بھی شرکت کی۔
۳۔ بچوں میں کتابیں اور رسائل خرید کر پڑھنے اور تحریریں لکھنے کے رجحان میں اضافہ ہوا۔
۴۔ اس دوران انفرادی حیثیت میں نیز مختلف پلیٹ فارمز سے رسا ئل، کتابیں چھاپی گئیں اور ان کی رونمائی و ترسیل کا اہتمام کیا گیا۔
۵۔ سرکاری تعلیمی اداروں اور تحصیل انتظامیہ میں کچھ ادب ناشناس لوگوں کی اَجارہ داری تھی۔ یہ جوہرِ سخن سے بے بہرہ، شرارتی اور متعصب لوگ سالہاسال سے اپنی رکاکت کا مظاہرہ کرتے آئے تھے۔ مذکورہ بالا خوش گوار تبدیلیوں کا اثر اُن افرادپر بھی ہوا۔ ان میں سے کچھ تخریبی عناصر راہِ راست پہ آنے لگے۔ اور کچھ ریٹائر ہو کر ہماری جان چھوڑ گئے۔
۶۔ اس دوران خان پور اور قرب وجوارکے کچھ سپوت تعلیمی وتحقیقی میدان میں آگے بڑھے۔ خان پور کی علمی و ادبی شخصیات اور ادبی تاریخ پہ جو مقالے لکھے گئے، ان کی تفصیل یہ ہے:
1۔خانپور میں اُردو غزل کی روایت، از:نذیراحمد بزمی(2017)
2۔خانپور میں اُردو نعت گوئی،از: رانا نصر اللہ (2017)
3۔ خورشید ٹمی کی افسانہ نگاری،از:امجد علی ڈھلوں(2017)
4۔ عبد الرحمن آزاد کے کلام کی تدوین، از:زبیر جہانگیر(2019)
5۔مجاہد جتوئی کے تحقیقی کام کا تقابلی جائزہ،از: شہباز نیرؔ(رحیم یار خان)
6۔ خانپور میں غزل کے نمائندہ شاعر،حفیظ شاہد کے فن و شخصیت پہ مظہر عباس نے مقالہ2007ء میں لکھا، لیکن یہ مقامی نہیں تھے۔
۷۔خانپور سے ادبی رسائل اور کتابوں کی اشاعت، ادبی تنظیموں کے قیام، ماہانہ اور سالانہ نشستوں اور مشاعروں کے انعقاد، ایم فل اور دیگر مقالوں کی تکمیل، تعصب کو بالائے طاق رکھ کر فروغِ ادب کی کوششیں، یہ سب وہ عوامل تھے جن سے ایک مدت بعد بڑے بڑے ادبی مراکز کی چمک دمک میں ہمارے شہر کا کھویا اور دھندلایا ہوا ادبی تشخص بڑی حد تک بحال ہوا۔
۸۔ اس دوران مجاہد جتوئی نے ’’دیوانِ فرید بالتحقیق، سیفل نامہ بالتحقیق اور گلزارِ خرم‘‘ کی تکمیل و اشاعت سے تحقیق و تدوین میںایک نئے باب کا اضافہ کیا۔
یہ سب تبدیلیاں خانپور کی ادبی فضا کو اس نہج پر لے آئی تھیں کہ اب اس بات کی ضرورت محسوس کی جانے لگی کہ خانپور کی غزل، نعت اور کچھ شخصیات پہ الگ الگ کام ہو جانے کے بعد ایک ایسا کام کیا جائے جس میں خانپور کی مجموعی ادبی تاریخ بالخصوص خانپور میں نثری ادب کی تاریخ پہ کام سامنے لایا جائے۔ یہ بیڑا اُٹھایا ہمارے حوصلہ مند دوست محمد یوسف وحید نے، جو ’’خانپور کی مختصر ادبی تاریخ‘‘ کے نام سے اپنا یہ کام رجسٹر کرانے میں کامیاب ہوئے ہیں۔ ادھر بے ساختہ الطاف حسین حالی کا شعر یاد آ رہا ہے۔
یارانِ تیز گام نے منزل کو جا لیا
ہم محوِ نالۂ جرسِ کارواں رہے
محمد یوسف وحید کی یہ تحقیقی کاوش جہاں اُن کی صلاحیتوں کا ایک نیا رُخ سامنے لے کر آتی ہے‘ وہیں اس بات کی غمازی بھی کرتی ہے کہ ہم مستقبل میں اُن سے اس حوالے سے مؤثر اور مبسوط تحقیقی کام کی توقع کر سکتے ہیں۔ ان کی زیرِ نظر کتاب میں خانپور کی ادبی تاریخ میں شامل سینکڑوں ناموں تک رسائی ملتی ہے۔ ان کی کتابوں اور ادبی کارناموں سے آگاہ ہونے کاموقع ملتا ہے۔ ادبی ماحول کی آبیاری میں خانقاہوں کا مؤثر کردار نظر آتا ہے۔ اس کتاب سے ہمیں یہ علم ہوتا ہے کہ بہت سے ایسے باہمت ادیب تھے جو ادبی مراکز سے دور اس چھوٹے سے شہر میں بڑی جانفشانی سے علم و ادب کے چراغ روشن کر رہے تھے۔ پاکستان بننے کے بعد کتنے ہی ایسے لوگ تھے جومختلف قومی زبانوں سے تعلق ہوتے ہوئے اُردو زبان و ادب کی پرورش اور پرداخت میں اہم کردار ادا کرتے رہے۔

اس کتاب کے مطالعے سے ہمیں معلوم ہوتا ہے کہ ماضی میں یہ علاقہ لسانی اورتہذیبی حوالے سے کتنا غیر متعصب رہا ہے۔ خواجہ فریدؒ کے بھائی خواجہ فخر جہاں ؒنے فارسی میں شاعری کی۔ خواجہ فرید ؒ نے سرائیکی کے ساتھ اُردو میں بھی شاعری کی۔علامہ سیّد محمد فاروق القادری (مرحوم) نے مذہب، اخلاق اور الہٰیات پہ گراں قدر نثری تصانیف چھوڑی ہیں۔ حفیظ شاہد ؔ اگرچہ پنجابی تھے مگر انھوں نے اُردو غزل کی نمائندگی کی اور ایک ضخیم کلیات ’’ختمِ سفر سے پہلے‘‘اپنے پرستاروں کو دان کر گئے۔ موجودہ عہد میں خواجہ غلام قطب الدین فریدی، مجاہد جتوئی، مرزا حبیب گو کہ سرائیکی ہیں لیکن ان کی اُردو میں خدمات کو نظر انداز نہیں کیا جا سکتا۔ کہنے کا مقصد یہ ہے کہ ہمارے علاقے میں امن و آشتی، بھائی چارے اور باہمی ہمدردی کی فضا تھی۔ اس فضا کو بنانے میں یہاں کی خانقاہوں کا اہم کردار رہا۔ یہاں کے لوگ بھی عموما ً ًملنسار اور محبت کرنے والے ہیں۔ چند متعصب اور تہذیب کُش لوگوں سے قطعِ نظر یہ علاقہ محبت کرنے والوں کا ہے۔
جہاں یہ کتاب یوسف وحید کی ادبی زندگی اور خانپور کی ادبی تاریخ میں ایک اہم سنگِ میل کی حیثیت رکھتی ہے وہیں اس میں کچھ تحقیقی فروگزاشتیںاور کوتاہیاں بھی دکھائی دیتی ہیں۔ کہیں سنونِ پیدائش غائب ہیں تو کہیں سنونِ وفات کانشاں نہیں ملتا، اور کہیں دونوں ہی ندارد ہیں۔ کسی جگہ تصنیف شدہ کتب میں تراجم کو شامل کر دیا گیا ہے تو کہیں تراجم میں کسی کی تصنیف شامل ہو گئی ہے۔ بعض مصنفین کی مکمل کتابوں کی تعداد اور اسماء کا ذکر نہیں ملتا۔ ایک نووارد ِ ادب کے بارے میں لکھا گیا ہے کہ انھوں نے پندرہ غزلیں کہی ہیں۔ کسی سے اصلاح نہیں لی اور تُک بندی تک محدود ہیں۔ ان کے کلام کا نمونہ بھی دیا گیا ہے۔ ہمارے نزدیک اس نووارد ِادب کا تذکرہ اور اس کا نمونہ ء کلام تمام تر شفقت اور ہم دردی کے باوجود اس قابل نہ تھا کہ کتاب کا حصہ بنایا جاتا۔

بات کچھ یہیں ختم نہیں ہو جاتی یوسف وحید نے اس کتاب میں کچھ معروف ناموں کے نمونہ ء کلام میں ایسے اشعار شامل کیے ہیں جو ہمارے نزدیک اس تُک بندی سے زیادہ حیثیت نہیں رکھتے جس کا ہم نے اوپر تذکرہ کیا ہے۔ یہ (نام نہاد) اشعار ایسے ہیں کہ ان میںنہ صرف وزن کے مسائل ہیں بلکہ معنی بھی کچھ اخذ نہیں ہوتا۔ اب اس کی دو وجہیں ہو سکتی ہیں یا تو وہ معروف نام ہی اس قبیل کی شاعری فرماتے ہیں جسے عروضی بندش سے کوئی سروکار نہیں یا یوسف وحید نے ان کا انتخاب و اندراج کرتے ہوئے ان کو عروضی کسوٹی پر نہیں پرکھا۔یعنی فراہم کردہ درست اشعار کو غلط لکھ دیا، یا کمپوزر نے اگر ایسا کیا تو اس کی اصلاح نہ کی جا سکی۔
ہم جانتے اور مانتے ہیں کہ ہر محقق کا ماہرِ علمِ عروض ہونا ضروری نہیں۔ تاہم اگر ہو تو اچھا ہے۔ خاص کر جب آپ کے تحقیقی کام میں جابجا ایسے موڑ آتے ہوں کہ آپ کو شعر کے اَوزان اور اس کی خوبیوں سے واسطہ پڑتا ہو۔ اگر آپ عروض نہیں بھی جانتے تو آپ کو چاہیے کہ اپنی تحقیق کے ان حصوں میں کسی کی مدد لیں۔ ایسا تو نہ ہو کہ کوئی شخص جو سرے سے شاعر ہی نہیں اس کو آپ صرف اس کے کہے پر شاعر مان کر ادبی تاریخ کا حصہ بنا دیں۔ میں یہاں کچھ معروف ناموں کا ذکر کر سکتا ہوں لیکن اس سے ایک طولانی بحث شروع سکتی ہے جس کا متحمل کوئی شاعر نہیں ہو سکتا۔ لہٰذا یہ کام محققین ہی کے لیے رہنے دیتے ہیں۔
خیر یہ کچھ باتیں برادرِ عزیز، یوسف وحید کی توجہ مبذول کرانے کے لیے کر دی ہیں۔ہمارے اس دوست میں کچھ کر گزرنے کا جذبہ تو اوائلِ عمر سے ہی تھا۔وہ اپنی صلاحیتوں کووقت کے ساتھ ساتھ بروئے کار لاتے رہے ہیں۔ الوحید ادبی اکیڈمی کا قیام، بچوں کے لیے مجلّہ ’’بچے من کے سچے‘‘کی متواتر اشاعت، حال ہی میں رسالہ’’شعور و ادراک‘‘ کا اجرا، بہاولپور کے نثری و شعری ادب پر مشتمل کتاب ’’ گلدستہ ٔ ادب ‘‘ ، قائدِ اعظم کے فرامین اور قائد کوئز، اور پھر ’’خانپور کی مختصر ادبی تاریخ‘‘ یہ ہمارے شہر کے اس سپوت کی گوناگوں ادبی جہات کا اشاریہ بھی ہے اور مستقبل میں ان سے بڑھ کر موقر اور مبسوط کاموں کی بشارت بھی۔ ویسے بھی ہم میں سے کچھ لوگ ایسی پرفیکشنسٹ اپروچ کے مالک ہوتے ہیں کہ ساری زندگی ان کی ایک کتاب منظرِ عام پر نہیں آتی۔محمد یوسف وحید معیار اور مقدار دونوں کو ساتھ لے کر چلنے کی کوشش کر رہے ہیں۔ ان کی شخصیت کا مثبت اور طاقتور پہلو یہ ہے کہ وہ کم سے کم وسائل میں، کم سے کم وقت میں بہتر کام کرنے کا عزم رکھتے ہیں۔ میں ایک دوست، ایک شاعر، اور ایک استاد کی حیثیت سے خانپور کی ادبی فضا میں نئے رنگ بکھیرنے والی اس کتاب کا خیر مقدم کرتا ہوں اور برادرِ عزیز، یوسف وحید کو اس کتاب کی اشاعت پر مبارک باد پیش کرتا ہوں۔ ایک برجستہ شعر ان کی نذر کرتا چلوں:
ریت میں پھول کھلانے کا ہنر جانتے ہیں
یہ مرے شہر کے کچھ اہلِ ہنر جانتے ہیں
٭
(بحوالہ :’’خان پور کا اَدب‘‘ ۔ تحقیق وتالیف : محمد یوسف وحید ، ناشر: الوحید ادبی اکیڈمی خان پور ، 2021ء )
٭٭٭

یاور عظیم

مدیر:شعوروادراک ، محمد یوسف وحید کی تازہ تحقیقی پیش رفت ’’خان پور کا ادب ‘‘
ادب کا تابندہ ستارہ …محمد یوسف وحید
تبصرہ : پروفیسر سراج احمد قریشی (خان پور )

چند سال قبل محترم محمد یوسف وحیدمیرے گھر آئے ، اپنا تعارف کرایا اور آنے کا مقصد بتا یا کہ وہ خان پور سے تعلق رکھنے والے اہلِ علم و ادب کے بارے میں ایک کتاب لکھنا چاہتے ہیں اور اس سلسلے میں اُنہیں میرے بارے میں بھی کچھ معلومات درکا ر ہیں ۔
میں نے اُنہیں مطلوبہ معلومات دیں ۔ اپنی مطبوعہ اور غیر مطبوعہ کتابوں کے نام بتائے ۔ محمد یوسف وحید کچھ دیر بیٹھے اور اُس کے بعد چلے گئے ۔ یہ ان کے ساتھ میری پہلی ملاقات تھی ۔ میں حیران و پریشان تھا کہ یہ نو جوان اتنا مشکل کام کیسے کر پائے گا؟
خیر بات آئی گئی ہوگئی اورمیں اس بات کو بھول گیا ۔ پھر کوئی تقریباً چار سال کے بعد حالیہ ماہِ رمضا ن میں محمد یوسف وحید کا فون آیا ، انہوں نے گذشتہ ملاقات کا حوالہ دیا ۔ پہلے تو مجھے یاد نہیں آیا ۔ پھر ذہن پر زور دیا تو دھندلا سا خیال آیا کہ ہاں ایک صاحب ماضی قریب میں میرے پاس تشریف لائے تھے ۔

محمد یوسف وحید میرے گھر آئے اور اپنی تازہ تحقیق کتاب خان پور کی ۱۲۰ سالہ علمی و ادبی تحقیق بعنوان ’’ خان پو رکا اَدب‘‘ مجھے تحفتاً دی ۔ مجھے خوش گوارحیرت ہوئی ۔ کتاب کی اشاعت پر اُنہیں مبارک باد دی ۔ اس ملاقات میں معلوم ہوا کہ موصوف کافی عرصے سے مختلف علمی و ادبی سرگرمیوں اور زبان و ادب کی ترویج و اشاعت کے لیے سرگرمِ عمل ہیں ۔
بہر کیف اپنی نئی کتاب ’’ خان پور کا اَدب ‘‘ کے حوالے سے فرمائش کی کہ کتاب پڑھ کر اپنے تاثرات عنایت فرمائیں ۔ چنانچہ عید الفطر کے بعد کتاب کا مطالعہ کیا ۔ مطالعہ کے آغاز سے ہی جو پہلی بات مجھے بالخصوص محسوس ہوئی کہ فاضل مؤلفکی اپنے شہر خان پور سے چاہت و محبت ہے ۔
ہر غیور اور باحمیت شخص کو اس جگہ سے پیار ہوتا ہے ۔ جہاں وہ پیدا ہوا ۔ جن فضائوں میں وہ پھلا پھولا ۔ جن گلیوں اور کوچوں میں وہ کھیلا کودا ۔ اُموی دور کا مشہور شاعر ابو تمام اسی حقیقت کو یوں بیان کرتا ہے ۔
نقلِ فؤ ادکَ حَیثُ شِٔتَ مِنَ الھَوی
ٰ ما الحبُّ للحبیب اَلُاوّل
کَم منزِلاً فِی الارضِ یَا لِفُہُ الفتَی
وَحَنِینُہ اَبداً لِاَوَّلَ منزل
ترجمہ: اے انسان تو اپنے قلبی میلان کو جہاں چاہے ۔ (۱) منتقل کرتا رہ مگر تیر ی اصل محبت پہلے محبوب سے جد ا نہیں ہوسکتی ۔ آدمی دنیا میں نجانے کہاں کہاں پھرتا ہے مگر اس کا دل ہمیشہ سے اصلی وطن کیلئے تڑپتا رہتا ہے ۔
سو فاضل مؤلف نے اسی فطری محبت کے زیرِ اثر اپنے شہر کی ادبی داستان لکھی ہے ۔ کتاب کا ایک ایک صفحہ گواہی دے رہا ہے کہ محمد یوسف وحید کو اپنی دھرتی سے پیار ہے ۔ یہاں کے باسیوں سے پیار ہے ۔ یہاں کے ہمعصر علم دوستوں سے پیار ہے اور علم وا دب کے ان ستاروں سے پیار ہے ۔ جو اپنی شب عمر گزار کر ڈھل گئے ۔ مگر آسمانِ حیات پر اپنے آثار چھوڑ گئے ۔ محمد یوسف وحید نے عرق محنت اور نورِ محبت سے ان دھندلے اور پھیکے آثار کو نمایاں اور منور کیا ہے ۔
اپنے ہم عصر احباب کے احوال جمع کرنا ہی کم مشکل نہیں چہ جائیکہ اُن لوگوں کے حالات و واقعات کو جمع کرنا جواب دینا میں نہیں رہے ۔ اور وہ بھی کوئی دو چار کی تعداد میں نہیں بلکہ ان کی تعداد سینکڑوں تک پہنچے مگر
ارادے جن کے پختہ ہوں ، نظر جن کی خدا پر ہو
طلاطم خیز موجوں میں وہ گھبرایا نہیں کرتے
آفرین ہے فاضل مؤلف پر کہ انہوں نے یقینِ محکم اور عملِ پیہم کی دولت خداداد کے سہارے اس کام کا بیڑا اُٹھایا اور اسے کامیابی سے ہمکنا رکیا ۔ ہم شاید اندازہ نہ لگا سکیں کہ اپنے مقصد کے حصول کیلئے اُنہوں نے کیا کیا پاپڑ بیلنے ہوں گے ، کہاں کہاں کی خاک چھانی ہوگی ، ایک ایک در کے کتنے کتنے چکر لگائے ہوں گے اور کیا کیا سُننا پڑی ہوگی ۔ مگر وہ جانتے تھے کہ منزل پر پہنچنے کیلئے ان دشوار گھا ٹیوں سے گزرنا شرط ہے ۔
سُرخرو ہوتا ہے انسان ٹھوکریں کھانے کے بعد
رنگ لاتی ہے حِنا پتھر پہ گھِس جانے کے بعد
کتاب ’’ خان پور کا اَدب ‘‘ کا اُسلوبِ بیان سادہ و شیریں ہے ۔ ماہرین نے میعاری ادب کی ایک خوبی یہ بتلائی ہے کہ وہ سادہ اور فہم ہوتا ہے ۔ تاکہ زیادہ سے زیادہ لوگ اس سے مستفید ہوسکیں ۔
کتاب ہذا خان پور کی کوئی باقاعدہ ادبی تاریخ نہیں ہے ۔ بلکہ یہ ایک سو بیس سال کے شاعروں اور نثر نگاروں کے تعارف اور مختصر احوال پر مشتمل ہے ۔ مگر جو کچھ ہے یہ حال اور مستقبل کے لکھاریوں کیلئے مستند حوالہ ہے ۔ اور آئندہ کی تحقیق کیلئے عمارت کا بنیادی پتھر ہے ۔

اُردو ادیبوں اور شاعروں کے علاوہ اس میں پنجابی ، سرائیکی ، فارسی اور ہندی لکھاریوں کے تعارف و احوال بھی شامل کیے گئے ہیں ۔ اسی طرح شعر و نثر کے ساتھ مصوّروں ، خطاط ، علمائے دین ، صحافی ، سماجی اور فکر و فن سے وابستہ مرد و خواتین کے مکمل حالات بھی اس کتاب کی زینت ہیں ۔
گویا یہ کتاب مختلف زبانوں اور فنونِ لطیفہ کے مختلف اجزا پر مشتمل ایک علم و ادب کا ایک حسین گلدستہ ہے ۔
کتاب کی دیگر خوبیوں کے ساتھ ایک خوبی یہ ہے کہ اس میں نامور ، جید اُدبا ء و شعرا ء کے اَحوال ہی نہیںسموئے گئے بلکہ مجھ جیسے عامیوں کو بھی جگہ دی گئی ہے ۔ یہ بات عام لکھاریوں کیلئے اور ہمت وحوصلہ کا باعث ہے ۔
اشخاص کو ابجدی حروف کی ترتیب سے پیش کیا گیا ہے ۔ میرے خیال میں انہیں تاریخی ترتیب سے پیش کیا جاتا تو بہتر تھا ۔ کیوں کہ کسی شعبہ یا فن کی تاریخ لکھتے ہوئے یہ اَمر ملحوظ رکھا جاتا ہے کہ ماضی سے حال اور دور سے قریب کی طرف آنے والے اَحوال کو تسلسل کے ساتھ پیش کیا جائے ۔
تقاریظ کی بھر مار ہے ۔ کم و بیش کتاب کا پچیس فیصد حِصّہ ناقدین و ماہرین کے تاثر ات پر مبنی ہے ۔ یہ ضرورت سے زیادہ لگتا ہے ۔ ’’خیر الامور اوسطھا‘‘ کے مطابق ہر کام میں اعتدال اس کے حُسن کو بڑھا دیتا ہے ۔
حُسن جس رنگ میں جہاں ہوتا ہے
اہلِ دل کیلئے سرمایۂ جاں ہوتا ہے
قِصّہ مختصر زیرِ نظر کتاب مجموعی طور پر بہت مفید اور بہت سی خوبیوں سے مالا مال ہے ۔ یہ فاضل مؤلف کی ادب سے محبت و مہارت کا منہ بولتا ثبوت ہے ۔ سچی بات یہ ہے کہ اس قبیل کی کتاب لکھنا اکیلے آدمی کے بس کا روگ نہیں ۔ محمد یوسف وحید نے وہ کام جس کیلئے ایک جماعت اور ٹیم کا ہونا ناگزیر ہوتا تھا ، اکیلے ہی کرڈالا ۔
اس کتاب کے علاوہ بھی علم و ادب کی دنیا میں ان کی بہت سی مختلف جہتوں پر مشتمل خدمات قابلِ تعریف ہیں ۔ مختلف ادبی تنظیموں الوحید ادبی اکیڈمی میں بطور جنرل سیکرٹری ، بزمِ ادراک کے فعال اور بانی ممبر او ربزمِ رازو دیگرکے وابستگی ۔ قومی اور علاقائی سطح پر جرائد میں سینکڑوں کی تعداد میں مضامین اور مختلف تحریروں کی اشاعت ، گزشتہ چودہ سال سے جنوبی پنجاب میں ادبِ اطفال کی نمائندگی کرنے والا بچوں اور بڑوں میں مقبول مجلہ ’’ بچے من کے سچے ‘‘ اور سنجیدہ علمی ادبی اور ثقافتی سرگرمیوں کا ترجمان ادبی مجلہ سلسلہ وار ’’ شعوروادراک ‘‘جیسے رسائل کے ادارتی اُمور کو سر انجام دینا ان تمام کامیاب علمی وا دبی کاوشوں کی بنیاد محمد یوسف وحید گویا ڈنکے کی چوٹ پر کہہ رہے ہیں ۔
دکھائوں گا تماشا دی اگر فرصت زمانے دی
میرا ہر داغِ دل اک تخم ہے سر و چراغاں کا
٭٭٭
(بشکریہ مجلہ شعوروادراک ، شمارہ نمبر ۵ ، جنوری تا مارچ ۲۰۲۱ء ، ناشر: الوحید ادبی اکیڈمی خان پور)

محمد یوسف وحید کی کتاب ’’ قائد ؒنے فرمایا ‘‘ پر خصوصی تبصرہ
قائدؒ کے سنگ سنگ …محمد یوسف وحید
تبصرہ : صادق جاوید ( گڑھی اختیا ر خان )

اے شوق مرے دل میں کبھی یوں بھی اُترنا
بن جائوں میں تعمیر کی تدبیر کا جھرنا
حالات کے دلدل میں سے کنول تلاشنے اور بشری چمن کے بھنوروں کو بھینی ،مدُھر اور من موہنی مہکاروں سے مزین کردینے کے خوگر و ماہر شاعر نعیم اظہر نے مندرجہ بالا شعر جن باوصف بندگانِ خد ا کے لیے کہا تھا‘ ہمارے ممدوحِ محترم محمد یوسف وحید یقینا اُن ہی میں سے ایک ہیں ۔ رخت ِ سفر بہتوں نے باندھا ہوگا ، چند قدم چلنے والے کافی ہوں گے ، بیچ سفر میں پیچھے مڑنے والے بھی ملیں گے مگر اَیسے نایاب عمرانی یاقوت کم ہی ملے ہوں گے جنہیں نہ بادِ مخالف کے تند و تیز جھکڑ روک سکے نہ سر د جنگوں کی سرا سِیمگی ان کے قدموں کی مٹی کو مرتعش کر سکی بلکہ انہوں نے عز م و استقلال کے بابوں میں جذبِ دروں کی قوتِ لازمہ کو بابِ جدید کے طور پر شامل کروالیا ۔ اِقبالؒ ؒنے نظم خضرِ راہ میں ایسے ہی لوگوں کے لیے یہ شعرکہا ہے :
اپنی دنیا آپ پیدا کر اگر زندوں میں ہے
سر آدم ہے ضمیر کن فکاں ہے زندگی
خیر اس دور جاتی بات کو مضمون کے آخری حِصے کے لیے مختص کرتے ہوئے اپنی اس وقت کی جنبشِ قلم کے اَصل محرک اور اس کارنامہ کی طرف آتے ہیں جو کتاب ’’ قائدؒ نے فرمایا ‘‘ کے عنوان سے محمد یوسف وحید کے ہاتھوں سر انجام پاکر حق ، سچ ، عزم و استقلال ،جمالِ فردیت ،بے باک صلاحیت ، دانش و حکمت ، جذبِ نموگر ، ذوقِ فزوں تراور ادب کی شمعِ خوشتر کے پروانوں کو ایک ضو مزید دان کر دی ہے ۔ بلاشبہ محمد یوسف وحید کا یہ کارنامہ جہانِ ادب میں وہی قدرومنزلت رکھتا ہے جو کسی صاحبِ اُسلوب اور ماہرِ فنِ عمرانی گیت نگار کے سدا بہار گیت کو حاصل ہوتی ہے ۔ بقولِ شاعر:
بُنتا جائوں پل پل اپنی پیار کتھا کو گیتوں میں
سوچ رہا ہوں میں ہی آخر کیوں اس پر مامور ہوا
جس طرح مندرجہ بالاشعر میں تخلیقی کردار کے عروج ، ارتقا اور تسلسل کی بات کی گئی ہے اس کی عملی شکل محمد یوسف وحید ہیں جو نہ صرف جہد ِ مسلسل بلکہ اَن تھک محنت ، پُر کار شخصیت اور مثبت طرزِ فکر کے بل بوتے پر ’’ آگیا اور چھا گیا ‘‘ والے بیانیے کو حرف بہ حرف سچ ثابت کر چکے ہیں ۔ آئیے کتابِ عمل میںایک اور باب رقم کرنے والی محمد یوسف وحید کی مرتب کردہ تازہ ترین اور سدا بہار کتاب ’’قائد ؒنے فرمایا‘‘ کا جائزہ لیتے چلیں تاکہ اس بات کی تصدیق ہوجائے۔بقول مرزا غالب:
دیکھنا تقریر کی لذت کہ جو اس نے کہا
میںنے یہ جانا کہ گویا یہ بھی میرے دل میں ہے
دامنِ گل چیں کی طرح محمد یوسف وحیدکا ظرف ِ خیال بھی قلزمِ ادب کے تہہ نشیں لعل و جواہر سے بھرا رہتا ہے ۔ موضوعات کا انتخاب بھی اسے خوب آتا ہے ۔ اعما ل‘ تعلیم و تربیت کا منفرد اور مؤثر ذریعہ ہیں ۔ فکر و فرمودات کے بغیر اعمال کا باب ہمیشہ تشنہ ٔ تکمیل رہتا ہے ۔ کوئی مدّرس ، مبلغ یا پیامی جب اپنا پیغام دور رَس اور دیرپا بنانے کے لیے جذبات پر توجہ دیتا ہے توسب سے زیادہ جو چیز اُسے نمایاں، معاون اور یقینی ہو کر ملتی ہے ، وہ ہے فرمودات ۔ہر فرد ، قوم یا گروہ کا ایک آئیڈیل ضرور ہوتا ہے اور اس کے حوالے سے کہی بات تو دل میں اُترنے میں وقت لیتی ہے نہ گھر کرنے میں ۔ بہ ایں وجوہ بِسر نے یا اُترنے کا شائبہ تک نہیں رہتا ۔ بقولِ شاعر :
میں اس کی مانوں لازم نہ تھا
میں تیری نسبت سے مانا ہوں
بانی ٔ پاکستان قائد ِ اعظم محمد علی جناح کا نام اور کام قیامت تک سدا بہار رہے گا ۔ پرنٹ میڈیا ہویا جدید میڈیا فرامینِ قائد محفوظ بھی ہیںاور میسر بھی ۔ مگر ان کی حالت کسی شاعر کے کمرے میں موجود چیزوں جیسی ہی ہے ۔بقولِ شاعر:
کہیں بکھری ہیں کتابیں کہیں میلے کپڑے
گھر کی حالت ہی عجب ہم نے بنا رکھی ہے
اپنے وحشت زد ہ کمرے کی اک الماری میں
تیری تصویر عقیدت سے سجا رکھی ہے
بے شک ہمارے شعوری ارتقا اور افعالِ زیست کے لیے بہترین، کامل ترین اور یکتائے روزگار نمونہ محبوبِ ربّ العالمین ، رحمت للعالمین ، رفقا ٔ و اعدا میں مسلّم صادق و امین ، وجۂ وجودِ کائنات حضرت محمد ِ مصطفی احمد مجتبیٰ ہی کی ذاتِ گرامی ہے اور باقیوں میں جو جتنا نسبت یافتہ ہے‘ اتنا مستند و معتبر ہے ۔میرے ذاتی خیال کے مطابق محمد علی جناح کے ساتھ لفظ قائدِ اعظم قبول اور زبانِ زدِ عام ہوا ہی اس اَٹل، پکی سچی ، غیر متزلزل ، اظہر و اخلص محبت کی وجہ سے تھا ۔ جس کی کئی مثالیں بانی وطنِ عزیز قائدِ اعظم محمد علی جناح کے عمل ، گفتار اور کردار میں متعدد بیّن اور اظہر و اَرفع ملتی ہیں ۔ جس میں وہ زبانِ حال سے یہ اعلان کرتے ہوئے محسوس کیے جاسکتے ہیں کہ
اک میں ہی نہیں ان پر قربان زمانہ ہے
جو ربِّ دوعالم کا محبوب یگانہ ہے
کتاب ’’ قائد ؒنے فرمایا ‘‘ کی صورت میں محمد یوسف وحید کے توسط سے ہم جس عظیم انسان سے ملتے ہیں اور اس سے جڑے جن حقائق سے آشنا ہوتے ہیں وہ اپنی جگہ پر اٹل ،تاریخی و قدیمی تھے ، ہیں اور رہیں گے مگر ان سے وا قفیت کے لیے جتنی لائبریریوں ، کتب و جرائد او ر اخبارات علیٰ ہذا القیاس معاون مواد کے لیے مختلف مقاما ت کا سفر ، رسائی حُصول اور اس قبیل کی کٹھنائیوں کا حل جس بہترین انداز میں الوحید ادبی اکیڈمی کی طرف سے اس کتاب کے ذریعے پیش کیا گیا ہے ، واقعی قابلِ صد ستائش ہے۔ یقینا اس اَحسن عمل کی بصد خوبی ٔ تکمیل کا سہرا محمد یوسف وحید کے سَر سجتا ہے ۔ اگر ان کی رفتار عمل کو اپنے تصوّر کا معاون کیا جائے تو بات بر محل اور دل کو لگتی محسوس ہوتی ہے کہ
ہزاروں سال نرگس اپنی بے نوری پہ روتی ہے
بڑی مشکل سے ہوتا ہے چمن میںدیدہ وَر پیدا
خیر بات ہورہی تھی قائد ِ اعظم محمد علی جناح کے فرمودات اور فردی محاسن کے مختصر ترین جائزہ کی تو ہم نذر ِ قارئین کرتے ہیں مضمون بین السطور آپ اپنے ذوق اور خُوئے مطالعہ سے اَخذ فرماتے جائیے ۔
٭ قائدِ اعظم اللہ اور رسول اللہ صلی اللہ علیہ وسلم سے دِلی ربط رکھتے تھے ۔
٭ ہر اچھے مسلمان کی طرح جناح صاحب بھی حضرت محمد مصطفی احمد ِ مجتبیٰ ؐ ہی کو اپنا قائد اور آئیڈیل مانتے تھے ۔
٭ ایفائے عہد میں قائد کا کوئی ثانی نہ تھا ۔
٭ اظہارِ رئے کا حق ہر کسی کو دیتے تھے حتّٰی کہ ملازم بھی آپ کی سرزنش کر لیتے تو آپ فرماتے یہ ان کا حق ہے ۔
٭ ذات پر قوم کو ترجیح دیتے تھے ۔
٭ عدلیہ کی برتری کے حق میں تھے اور اپنے عمل سے یہ بات ثابت بھی کرتے تھے ۔
٭ سیاسی حکمت عملی کے ماہرِ اعظم تھے ۔
٭ خود اعتمادی کے مدرّس تھے اور اس کی قوت کے زبردست معترف بھی ۔
٭ خو دبھی دستور پر پابندی کے قائل تھے اور دوسروں سے بھی یہی تقاضہ فرماتے تھے ۔
٭ عہد ہ اور انسانیت دونوں کے تقاضے بخوبی نبھاتے تھے ۔
حالات و واقعات اور دفتری اُمور کا نہایت عمیق جائزہ لینے کے خوگر تھے ۔
٭ ایک روپے کی رسید لکھنا بھی فخر سمجھتے تھے اوراسے بھی ایک دستاویز کا درجہ دیتے تھے ۔
٭ آدابِ محفل کے مشاق عامل تھے اور اس پر اظہارِ مسرت بھی فرماتے تھے ۔
٭ امانت کی پاسداری ، خیانت سے بیزاری فرماتے تھے ۔ اپنے لیے اعزازات کے کبھی خواہاں نہیں رہے ۔
٭ بریشم کی طرح نرم تھے اور فولاد کی طرح مضبوط بھی ۔
٭ قانون کی بالادستی ہر حال میں اور ہرفرد کے لیے قائل عامل اور مبلغ تھے ۔
٭ کسی پر بوجھ بننا پسند نہ فرماتے تھے بلکہ کئی دفعہ میزبانوں پر سبقت لیتے ہوئے مکمل بل بھی ادا کر دیتے تھے ۔
٭ اعلیٰ اسلامی اَقدار و روایات کے عامل تھے ۔ سلام میں پہل بھی ان کا خاصہ تھا ۔
٭ لین دین میں انصاف آپ کی نمایاں خوبیوں میں سے ایک تھا ۔
٭آپ ؒ نہایت فتین ، عمیق بین اور صاف گو تھے ۔
٭ نہ جھکتے تھے نہ بکتے تھے ۔
٭بہت اعلیٰ گفت گو کرتے تھے اور گفت گو ہی میں مسائل کا حل تلاشنے کے رَوادار تھے ۔
٭ ساری قوم آپ پر بھروسہ کرتی تھی ۔
٭ عوام و خواص کا اس بات پر ایمان تھا کہ جناح نہ بک سکتا ہے نہ جھک سکتا ہے اور وقت نے یہ ثابت بھی کیا ۔
٭ آپ بڑے مدبّرتھے اور عیاری کے پیچھے چھپے حقائق کا بہت جلد ادراک کر لیتے تھے ۔
٭ محنت کی عظمت کا انہیں جتنا یقین تھا شاید و باید ۔
٭ کسی بھی حال میں مقاصد کے حصول پر سمجھوتہ نہیں کیا بلکہ بیماری کو بھی خاطر میں نہ لائے ۔
٭آپ کی قوتِ فکر دوسروں کی بہ نسبت بہت تیز تھی ۔ آپ کے فرمودات سے لوگوں کو تحفظات ہوا کرتے تھے لیکن جلد ہی آپؒ کی بات سچ ثابت ہوجایاکرتی تھی ۔
٭ان کی نظر میں قائد کی سیرت کا شیشے کی طرح صاف ہونا ضروری تھا ۔
٭ حُب الوطنی کو اوّلیت دیتے تھے اور طبقاتی تقسیم کے خلاف ۔
اس کے ساتھ ساتھ خاص خاص تاریخیں اور اقوالِ زریں کے عنوانات بھی کافی معلوماتی ثابت ہوتے ہیں ۔ آپ نے عمل کی راہیں جس طرح آسان کی ہیں اور آنے والی مشکلات کا جس طور سامنا اور توڑ کیا ہے اس کا نقشہ قلندرِ لاہور ی ، حکیم الُا مت ، کلیمِ ثانی ، آشنائے راز اور عارف الحقائق علامہ ڈاکٹر محمد اِقبال ؒ نے اپنے ایک خوب صورت شعر میں کچھ اس طرح کھینچا ہے ۔
ہو حلقہ ٔ یاراں تو بریشم کی طرح نرم
رزمِ حق و باطل ہو تو فولاد ہے مومن
کسی بھی مقبول کتاب کی صفات کا جزو ِ لازم اور اتم خوبی ہوتی ہے کہ وہ ہمیں مختلف کرداروںسے ملاقات کا موقع فراہم کرتی ہے اور اگر اس کا مصنف فنی ارتقاء کے مراحل بخوبی طے کر چکا ہو تو پھر وہ ملاقات بالکل ایک بالمشافہ ملاقات کے مساوی ہے ۔ لطف و مسرت لیے ہوئے جہانِ دگر ، جہانِ نو اور خطہ ٔ خوش گوار کے سیاحتی گائیڈ کا سامان بھی کیے دیتے ہیں ۔ کتاب ’ ’قائد ؒنے فرمایا ‘‘ کے ذریعے محمد یوسف وحید نے جن یاقوت صفت کرداروں سے ہماری ملاقات کا اہتمام کیا ان کے اَسمائے گرامی درج ذیل ہیں ۔
مولا نا احتشام الحق تھانوی :مشہور عالم ِدین ، تاحیات ریڈیو پاکستان سے درس ِ قرآن دیتے رہے ۔
خواجہ اشرف احمد :آل انڈیا مسلم سٹو ڈنٹس کے ایک عہدہ دار ۔
سید اشفاق نقو ی :مسلم لیگ کا ایک کارکن
ایم اے ایچ اصفہانی :کیمبر ج یو نیورسٹی کے فارغ التحصیل ، پاکستان کے معروف تاجر اور صنعت کار ۔ کلکتہ کارپوریشن ، بنگال لیجسلیٹو اسمبلی اور پاکستان قانون ساز اسمبلی کے ممبر ۔ 1941ء تا 1947ء آل انڈیا مسلم لیگ کے مجلس ِ عاملہ کے رکن ۔ یو ایس اے اور یو این او میں پاکستان کے پہلے سفیر ۔ یو کے میں ہائی کمشنر ۔ وزیر صنعت و تجارت حکو مت پاکستان ۔ قائد ا عظم کے ایک قابل ، وفا شعار اور معتمد نائب ۔
ملک افتخار علی :قائد ا عظم کے ایک معتمد رفیق ملک بر کت علی ایڈووکیٹ کے فر زند ۔
مسز اکرام نتھینئل :لیڈی کمپائونڈر ، اگست 1947ء میں قائد ا عظم کی تیمار داری کے لیے انہیں سبی کے سول ہسپتال سے زیار ت میں بلایا گیا جہاں وہ پندرہ دن مقیم رہیں ۔
جی الانا :مشہور شاعر، مگر ادیب اور تاجر ۔ سند مسلم لیگ کے جنر ل سیکر ٹری ۔ آل پاکستان مسلم لیگ کے فنانس سیکر ٹری ۔ کراچی کے مئیر ۔ مغربی پاکستان قانون ساز اسمبلی کے رکن ۔ یو این او میں پاکستان کے نمائندے ۔صدر ایوان ِ صنعت و تجارت ۔
الہی بخش ، ڈاکٹر ، کرنل :زیار ت میں قائد ا عظم کے معالج ۔
الطا ف حسین :ہلال قائد ا عظم ، 1938ء تک مختلف کالجوں میں انگریزی کے اُستاد ۔ 1945ء میں ڈان دہلی اور بعد میں ڈان کراچی کے ایڈیٹر :1951ء میں اقوام ِ متحدہ کی جنرل اسمبلی میںنما ئندہ پاکستان کی حیثیت سے شریک ۔
پال ، جسٹس ذکی الدین :جسٹس (ریٹائر ڈ ) پنجاب مسلم سٹو ڈنٹس فیڈریشن کے ایک عہدہ دار ۔
دیوان چمن لال:وکیل ۔ممبر لیجسلیٹو اسمبلی ۔
ابراہیم اسمعیٰل چندریگر:مشہور وکیل ۔ 1940ء تا 1945بمبئی مسلم لیگ کے صدر ۔ 1947ء میں وزیر صنعت و تجارت ۔ 1948ء میں افغانستان میں سفیر ۔ 1950ء میں سرحد اور بعد ازاں پنجا ب کے گور نر ۔
حاتم اے علوی :صحافی ۔ ماہر اقتصادیات ۔
مولا نا حسر ت مو ہانی : شاعر ، ادیب ، سیاستدان ۔
حسن اے شیخ:بمبئی مسلم لیگ کے ایک عہدہ دار ۔
این اے حسین :بر یگیڈیئر (ریٹائرڈ) 29جون 1948ء کو قائد ا عظم کے اے ڈی سی مقرر ہوئے اور ان کے آخری وقت تک اسی عہدہ پر قائم رہے ۔
حنیف مینار :بمبئی میں قائد ا عظم کے دیرینہ رفیق کار محمد علی مینار کے صاحبزادے ۔
ریئس احمد جعفری ندوی:بے شمار علی ، ادبی ، تاریخی اور تنقیدی کتب کے مصنف ۔
سعید اے ہارون :زعیم مسلملیگی حاجی سر عبد اللہ ہارون کے صاحبزادے ۔
سید شمس الحسن:آل انڈیا مسلم لیگ کے آفس سیکر ٹری ۔
نواب صدیق علی خاں :12سال تک مسلسل قائد ا عظم کے قریب رہے ، غیر منقسم ہندوستان کی مر کزی اسمبلی کے ممبر ، سالار ِاعلی آل انڈیا مسلم لیگ نیشنل گارڈ ۔ مصنف ۔ بے تیغ سپاہی
عاصم ملک :کو ئٹہ کے ایک ایڈووکیٹ
عباس محمود العقاد :مصر کے ایک ادیب
ڈاکٹر عبد السلام خورشید:مشہور صحافی اور فن خطابت کے استاد ۔ مصنف
سر شیخ عبد القادر :مدیر مخزن
عبد القادر لاکھانی :1935ء تا 1947ء بہائونگر سٹیٹ مسلم لیگ کے صدر
عزیز احمد :آئی سی ایس ۔ متعدد اہم سر کاری عہدوں پر فائر رہے۔
نواب غلام علی خاں :نواب آف کمالیہ ۔
فر خ امین :گورنر جنر ل کی حیثیت سے قائد ا عظم کے ڈپٹی پرایئویٹ سیکر ٹری کو ئٹہ اور زیارت میںقائد ا عظم کے ساتھ ان کے آخری دنوں کے ساتھی ،منصوبہ بندی کمیشن کے ڈپٹی سیکر ٹری ۔
کیمبل جانسن :صحافی ، مصنف ’’عہد ِ لارڈ موئنٹ بیٹن ‘‘۔
لیاقت علی خاں :پاکستا ن کے پہلے وزیر اعظم ،کل ہند مسلم لیگ کے جنر ل سیکر ٹری ۔ شہید ِملت ۔
بیگم لیاقت علی خاں: رعنا۔ پاکستان کے پہلے وزیر اعظم کی اہلیہ ۔ سفیر ِ پاکستان ۔
محبوب عالم عکس:مسلم سٹو ڈنٹس فیڈریشن کے ایک عہدہ دار ۔
محمد حنیف آزاد :قائد ا عظم کے ایک نجی ملازم ۔ ڈرایئور ۔ ادارکار ۔ فلمساز
حکیم محمدسعید دہلوی :چیئر مین ہمدرد ٹرسٹ
محمد شفیع :تحریک پاکستان ار مسلم لیگ کے نامور کارکن ۔ 1936ء میں پنجاب مسلم لیگ کے پرو پیگنڈا سیکر ٹری ۔ پنجاب مسلم سٹو ڈنٹس فیڈریشن کے پہلے نائب صدر ۔ انٹر کالجیٹ مسلم برادرہڈ کے صدر ۔ معروف صحافی ۔
چودھری محمد علی :ایم ایس سی ۔ پاکستان کے وزیر اعظم ۔ ماہر مالیات ، ممتاز سیاستدان ۔ 1947ء میں سیکر ٹری جنرل حکو مت پاکستان ۔ وزیر مالیات ۔
محمد مسعود :کھد ر پوش ۔ متعدد اہم سر کاری عہدوں پر فائز رہے ۔
محمد نعمان :آل انڈیا مسلم سٹو ڈنٹس فیڈریشن کے ایک عہدہ دار ۔
محمد یامین خاں :آل انڈیا مسلم لیگ کے ایک عہدہ دار ۔ مصنف ’’نامہ ء اعمال ‘‘۔
جسٹس محمد یعقوب علی :چیف جسٹس (ریٹائر ڈ پاکستان سپریم کورٹ )
محمد یونس :ایک صحافی ، تحصیل مسلم لیگ کے ایک عہدہ دار ۔
مختار زمن :1944ء میں آل انڈیا مسلم سٹو ڈنٹس فیڈریشن کے جنرل سیکر ٹری ۔
مشتاق احمد خاں :نواب، نظام حیدر آباد دکن کے سفیر ۔
مصطفی کمال پاشا:آل انڈیا مسلم لیگ کے کو نسلر میاں فیروز الدین احمد کے فر زند ۔
سید مطلوب الحسن :قائد ا عظم کے پرائیو یٹ سیکر ٹری (1940ء تا 1944ء)پاکستان پرنٹنگ اکیو پمنٹ لمیٹیڈ کے مالک ۔ محمد علی جناح کے پو لیٹیکل سٹڈی کے مصنف ۔
ممتازحسن :منیجنگ ڈائر یکٹر نیشنل بینک آف پاکستان ۔ متعدد اہم سر کاری عہدوں پر فائز رہے ۔
منظور الٰہی :سی ایس پی افسر ۔ متعدد اہم سر کاری عہدوں پر فائز رہے ۔ ادیب ۔
چودھری نذیر احمد خاں:تحریک پاکستان کے ایک کار کن ۔ نامور اور کامیاب ترین قانو ن دان ۔ وزیر صنعت ۔ اٹارنی جنرل ۔ تنظیم اتحاد اسلامی الاحبا کے بانی ۔
بیگم نصرت عبد اللہ ہارون :لیڈ ی ہاررن ، سر عبد اللہ ہاورون ۔ قائد ا عظم کے ایک معتمد رفیق کی بیگم ۔
سید فقیر وحید الدین :تاجر، مصنف ’انجمن‘۔
سیٹھ ولی بھائی :تاجر ، مالک بمبئی کلاتھ ہائوس ۔
ہیکٹر بو لایئتھو : مشہور بر طانوی مؤرخ اور وقائع نگار ۔
فرخ اَمین :قائد اعظم ؒ کے پرائیویٹ سیکر ٹری
اس کے علاوہ اس کتاب کے مطالعہ کے دوران ہمارے پردۂ خیال پر خان پور کی قابلِ فخر شخصیات بھی اُبھرتی ہیں جس کا عکس خوش گوار یادوں کی خوشبوئوں اور رنگوں سے سجے گلدستے کی مانند ہے ۔ لیکن اپنے حُسنِ عمل اور محنت ِ شاقہ سے محمد یوسف وحید نے نہ صرف ارمغانِ ادب میں اپنا تذکرہ لازم منوا لیا ہے بلکہ الوحید ادبی اکیڈمی کو بھی نہایت قابلِ ذکر مقام دلوانے میں کامیابی حاصل کی ہے ۔

ریاست بہاول پور کا علمی ، ادبی ،روحانی ، عمرانی اور جغرافیائی مقام اوران سب حوالوں سے ہونے والے کارنامے اس کی تاریخ کو مثبت پیش رفت کے حوالے سے اسے وہ پذیرائی ،مقبولیت اور فکری سلامتی حاصل کرکے دیتے ہیں جس پر کسی بھی قوم کی سر بلندی کی اَسا س کھڑی ہوتی ہے ۔ ادبی تنظیموں کی بات کریں ، اہلِ قلم کی بات کریں ، ثقافتی اجتماعات ، میلے ٹھیلے ،کھیت کھلیان الغرض ہر حوالے سے بہاول پور کی دھرتی نہایت زرخیز ، فیاض اور مجاہدانہ مزاج سے متصف نظر آتی ہے ۔ ضلع رحیم یار خان کی تمام تحصیلیں اللہ کے فضل سے ادبی ، علمی اور اصلاحی حوالے سے نہایت سرگرم اور سبق رفتار نظر آتی ہیں ۔ بالخصوص اگر شخصیات کا ذکر کرلیں یا سرگرمیوں کا جائزہ لے لیں یا قلم و قرطاس کے جواہر پاروں پر نظر کر لیں جو منفرد اورنمایاں مقام تحصیل خان پور کو خصوصاً شہر خان پور کو حاصل ہے ، اہلِ دل اس کا ہمیشہ خواب دیکھتے آئے ہیں ۔

قیس قلم قبیلہ ، بزمِ اُردو ، بزمِ فرید ، فرید ادبی فورم ، ارشد ادبی سنگت ، بزمِ معارف ، الوحید ادبی اکیڈمی ، بزم اِدراک ، بزمِ راز ، تانگھ ادبی سنگت ، عالم ادبی فورم پاکستان اور دیگر کئی ایسے نامور فورمز کا ماخذخان پورکا علمی ، ادبی ماحول رہا ہے ۔ انہی ادبی اثاثوں میں سے ایک علمی ، ادبی اور ثقافتی تنظیم الوحید ادبی اکیڈمی بھی ہے جس میں روحِ رواں کا کردار محمد یوسف وحید نہایت اَحسن طریق سے نبھا رہے ہیں اور نت نئی خوشخبریاں دیتے چلے جار ہے ہیں ۔ نہایت مناسب ہوگا کہ الوحید ادبی اکیڈمی کا مختصر تعارف پیش کر دیا جائے اور اہلِ ذوق طبقہ کے لیے سکونِ قلب کا سامان کیا جائے۔
الوحید ادبی اکیڈمی ، ادبی پروانوں کے شہر خان پور میں موجود سیٹلائٹ ٹائون میں واقع ہے ۔ جس کے بانی کے علمی، ادبی اور عمرانی قد کاٹھ کا اندازہ لگانے کے لیے اتنا کافی ہے کہ وہ لمحہ لمحہ مستعد عمرِ عزیز کے پچاس سال محکمہ تعلیم سے منسلک رہتے ہوئے بطورہیڈ ماسٹر ریٹائر ہوئے تو سرکاری یا پرائیویٹ ہر دو سطوح پر علم کا ہر جویا ، ادب کا ہر پروانہ اور علم کاہر متلاشی نہایت ادب ، احترام اور علمی جاہ و جلال کو تسلیم کرتے ہوئے ان کا نام لیوا تھا ۔ آج بھی آپ کسی انجمن یا انفرادی ملاقات میں ایم عبد الواحد افغانؔ صاحب کا نامِ نامی ، اسمِ گرامی لے لیں‘ ہمارے کہے سنے ، لکھے بولے حرف حرف کی صداقت کی شہادت آپ کو مل جائے گی ۔ ان ہی کے قابلِ فخر سپوت محمد یوسف وحید کی محنت ِ شاقہ نے الوحید ادبی اکیڈمی کی عملی اُٹھان کی ذمہ داری لے رکھی ہے جسے وہ خوب تر انداز میں نبھاتے چلے جار ہے ہیں ۔ محمد یوسف وحید ‘ الوحید ادبی اکیڈمی کے جنرل سیکرٹری بھی ہیں ۔ شعر و ادب کے دلدادہ بھی ہیں ۔ جہانِ ادب کے نہایت متحرک اور فعال فرد ہیں ۔نہایت کامیاب ادیب ، متحمل دانشور ہونے کے ساتھ ساتھ گزشتہ چودہ سال سے شائع ہونے والا ، جنوبی پنجاب میں ادب ِ اطفال کا واحد نمائندہ مجلہ ’’ بچے من کے سچے ‘‘ کے ایڈیٹر بھی ہیں ۔
علمی و ادبی تنظیم ’’الوحید ادبی اکیڈمی ‘‘ ۲۰۰۴ء میں معرضِ وجود میں آئی اور اس کی بنیاد ایم عبد الواحد افغان ؔ نے رکھی ۔

تنظیم کو نامور محقق العصر ، مترجم ، حق شناس اور راقم الحروف کے مرشد ِ کریم علامہ سیّد محمد فاروق القادریؒ ، ہر دلعزیز اُستاد الشعراء حفیظ شاہدمرحوم اور دواُردو شعری مجموعوں کے خالق رفیق راشد مرحوم کی سرپرستی حاصل رہی ۔
محمد یوسف وحید کو کتاب ’’ قائد ؒنے فرمایا ‘‘ کی ترتیب و تدوین پر ڈھیروں مبارک باد ۔دُعا ہے کہ فروغِ علم و ادب کے لیے روز افزوں ترقی کرتے رہیں ۔ محمد یوسف وحید کے عزم و حوصلے کی نذر توفیق الحسن کا ایک شعر
یہ تو اپنا اپنا ہے حوصلہ یہ تو اپنی اپنی اڑان ہے
کوئی اُڑ کے رہ گیا بام تک کوئی کہکشاں سے گزر گیا
٭٭٭

محمد صادق جاوید