Tag: کامل پور سیدان

کرنل (ر) سیّد سجاد نقوی سائیکا ٹرسٹ
برادر عزیز جنابِ مونس رضا کی عظیم کاوش پہ رائے دینا بالکل ایسے ہی ہے جیسے خود کو فاضل قرار دینا۔ بہرحال چند پرخلوص الفاظ نذر ہیں۔ 
علم الانساب بلاشبہ بہت محترم اور ہر دور کا رائج علم ہے، عرب ہی اس فن کے بانی اور اس علم میں ممتاز تھے، اجدادِ ختمی مرتبتؐ میں ہر دور میں اس علم کے ماہر موجود رہے، دورِ رسالت مآبﷺمیں حضرت ابو طالب علیہ السّلام علم الانساب کے ماہر اور نقیب تھے اور ان کے بعد جنابِ عقیل ابنِ ابوطالب علیہ السّلام اس علم کے وارث ہوئے۔
برصغیر میں یہ علم عرب سے ہجرت کر کے وارد ہونے والے سادات کے ذریعے ہی داخل ہوا، وہ لوگ اپنے شجرات اور تاریخ اپنے ساتھ لائے اور اسے مزید لکھتے بھی رہے، برصغیر میں انساب و تاریخ نویسی کی کتابی شکل میں ابتدا ساتویں صدی ہجری سے ملتی ہے مبارک شاہ حسینی نے قطب الدین ایبک کے دور میں بحرالانساب کے عنوان سے کتاب لکھی جسے برصغیر میں اس موضوع پر لکھی جانے والی پہلی کتاب تسلیم کیا جاتا ہے، اور پھر گذشتہ دو صدیوں میں تو یہ علم باقاعدہ ایک سائنس کی شکل اختیار کر چکا ہے اور جنابِ مونس رضا نے بھی جدید سائنسی خطوط پر تحقیق کی ہے جوکہ یقیناً قابلِ ستائش عمل ہے ۔

ہجرتوں کو مہاجر سے زیادہ بھلا کون جان سکتا ہے۔ ان کی ضرورت و افادیت کے ساتھ ساتھ کلفت و حزیمت۔۔۔۔گو کہ ہجرت کے بہت سارے رنگ و رخ ہیں۔ طََلَعَ الْبَدْرُعَلَیْنَا کی تھاپ میں یثرب کو مدینہ منورہ اور خون شہیداں سے نینوا کو کربلا معلی ہجرتوں نے ہی تو بنایا۔ میں خود ربع صدی قبل اٹک کی نگری میں بطور مہاجر وارد ہوا اور اس سرزمین اور اس کے باسیوں نے بالعموم اور کامل پور سیداں نے بالخصوص اپنائیت و اخوت کا سائبان تان دیا آج تک روح محبت و یگانگت کے رواں چشموں سے سیراب ہے۔ جناب مونس رضا کی ذات اس بستی کے علمی و ادبی ذوق کا ایک روشن عکس ہے۔ اس مختصرمگر انتہائی جامع کتاب میں انہوں نے نہ صرف معصومین علیہم السلام کی ہجرتوں کا اجمالی جائزہ پیش کیا بلکہ نئی نسل کو تاریخِ اجداد سے متعارف بھی کروایا۔۔۔اسلاف کی پہچان بلاشبہ اصلاح و عروج کا باعٹ بنتی ہے۔ تحریر کی روانی اور عربی و فارسی کا شیریں امتزاج بلا شبہ جنابِ مونس رضا کی اعلیٰ ادبی صلاحیتوں کا ثمر ہے۔ سو اس تاریخ و ادب کے چشمہ علم سے ہم بھی سیراب ہوئے۔ اور اُمید ہے کہ آپ بھی اِن شآء اللہ مُستفید ہوں گے، اللہ تعالی مونس بھائی کی علمی صلاحیتوں کو اور زیادہ جِلا بخشے اور ہمیں مزید علمی خزانوں سے آگاہی ہو۔                                                            

                                                         مجھے ” ہجرتوں کی داستان” پر کچھ لکھنے کو کہا گیا ہے جو مجھ جیسے کم علم کے لئے ایک آزمائش سے کم نہیں لیکن اعزاز حاصل کرنے کو جان جوکھم میں ڈالنا ہی پڑتی ہے سو میں اپنی سی کوشش کرونگا کہ کچھ سپرد قلم کرسکوں۔ زیر نظر کتاب تاریخ اور انساب پر لکھی گئی ہے اس لئے مجھے پہلے تاریخ و مورخین اور انساب  و علمائے انساب کو جاننا پڑے گا ۔آپ نے بھی اس مضمون کو پورا پڑھ لیا تو کتاب کا مطالعہ مزید دلچسپ و معلوماتی ہوجائے گا۔

                                                     تاریخ کیا ہے ؟ اس پر بے شمار اقوال موجود ہیں جن کا ذکر طوالت کا باعث ہوگا سادہ سے الفاظ میں ہر گزر جانے والا کل تاریخ ہوجاتا ہے۔ تاریخ کب سے ہے ؟ جب رات اور دن کی تخلیق ہوئی کیونکہ ہر گزرتا دن اور رات تاریخ بنتے گئے لہذا تاریخ کو ہم ابتدائے روز و شب سے شمار کریں گے۔ رہا سوال یہ کہ تاریخ نویسی کب سے شروع ہوئی تو اس کا جواب یہی ہے کہ مختلف ادوار میں الگ الگ کوششیں ضرور کی گئیں۔ کہیں دیواروں پر تو کہیں الواح پر تاریخی نوشتہ جات موجود ہیں۔ لیکن باقائدہ طور پر پہلا مورخ ہیروڈوٹس کو تسلیم کیا گیا اور اسے ابو التاریخ بھی کہا گیا ہے۔

                                           تاریخ پڑھنا جس قدر دلچسپ ہے تاریخ نویسی اتنا ہی مشکل کام ہے۔ ایک مورخ کس عرق ریزی اور محنت سے واقعات کو ایک لڑی میں پروتا ہے اس کا اندازہ پڑھنے والے کو کبھی ہو نہیں سکتا۔ ماضی کی اقوام و قبائل کے حالات و واقعات کا مسلسل اور منظم بیانیہ حال میں موجود رہ کر رقم کرنا لانا ہے جوئے شیر کا۔

                                     مورخ کی پہلی ذمہ داری اس کے ذاتی عقائد و ہمدردیوں کے خلاف ایک چوکیدار کی سی ہوتی ہے ، تاکہ وہ لکھا جائے جو ہوا تھا نہ کہ جو ہونا چاہئے تھا۔ مزید یہ کہ مورخ کو جغرافیہ ، تقویم، ہندسہ اور اپنے عہد کے چیدہ علوم پر بھی دسترس ہونا چاہیے، تاکہ واقعات و حالات کو جانچ پرکھ سکے اور منظم  رکھ سکے۔اسے زبان و بیان پر مکمل عبور ہو اور ایسا لکھ سکے جسے ہر ذہنی سطح کا شخص آسانی سے پڑھ اور سمجھ سکے۔

                                              یونانی ادیب ، جغرافیہ دان  اور مورخ ہیروڈوٹس (484-425 قبل مسیح) کو "بابائے تاریخ” ، کے نام سے موسوم کیا جاتا ہے ،  تاریخ نویسی کو بطور علم ایجاد کرنے کا سہرا اسی کے سر ہے، اس کا آغاز اس نے اپنے سفر ناموں اور رزمیہ داستانوں کی تحقیق سے کیا۔اپنی شاہکار تصنیف ، "تواریخ” کے آغاز میں وہ لکھتا ہے "ہمیں وقت کے ساتھ  ساتھ معدوم ہوتے  انسانی واقعات کے آثار کو مٹنے سے بچانا ہے۔” یعنی ہیروڈوٹس نے انسان کو اس طرف متوجہ کیا کہ اسلاف کے کارناموں اور واقعات کو محفوظ کرو۔ اپنی کتاب میں اس نے سندھ، پنجاب، فارس سے لیکر یونان تک کے ممالک کی تاریخ،تمدن اور ثقافت کا ذکر کیا ہے۔ تواریخ اپنے عہد کے حوالے سے بحیرہ روم اور مغربی ایشیاء کی تہذیب و تمدن پر ایک نادر دستاویز ہے۔

                                              ہیروڈوٹس کے بعد تاریخ نویسی باقائدہ ایک علم اور فن کی حیثیت اختیار کرتی گئی اس کے بعد قبل مسیح کے  قابل ذکر ناموں میں گزنفون، تاستیوس، تھوسی ڈائڈز(یونان)، تیتوس لییوس، تاسیتس(روم)، سیما چیان، بئن ژاہو (چین)، ہمارے یہاں ابن خلدون ، ابن إیاس ، ابن الأثیر الجزری، ابن تغری بردی ، ابن حیان القرطبی، ابن خلكان، ابن عبد الحكم ، البلاذری، الحسن بن زولاق،تقی الدین المقریزی ، لسان الدین بن الخطیب ، علی بن حزم الأندلسی، الواقدی، ابن الجوزی، الطبری ، ابو الفرج اصفہانی اور مزید بے شمار نام ہیں جو یہاں درج کرنا ممکن نہیں۔ اس ساری تمہید کا مقصد تاریخ اور مورخین سے تعارف تھا کیونکہ مجھے اپنے عہد کے مورخ تک جانا ہے۔ اور اپنے دور میں لکھی گئی تاریخ پر کچھ بات کرنا ہے۔ لیکن پہلے انساب پر کچھ بات ہوجائے۔

                                         علم الانساب  علوم اعلی میں سے ایک علم ہے جو لوگوں کے سلسلہ نسب کے مطالعے، تحقیق اور اس کے مقاصد سے متعلق ہے،اس کا بنیادی مقصد  تعین نسب کے معاملے میں  غلطیوں سے مبرا  دستاویزات  کا ریکارڈ مرتب کرنا ہے۔ چونکہ  نسبت نسل اہم مذہبی، معاشرتی اور ثقافتی  امور سے متعلق ہے ۔لہذا ، نسب کی اہمیت کے بارے میں پیغمبر اسلام صلی اللہ علیہ وآلہ وسلم اور ائمہ کرام  علیھماالسلام  کی طرف سے متعدد روایات اور بہت ساری ہدایات وارد ہوئی  ہیں۔

                                               رسول  گرامی ﷺ نے فرمایا  " تعلموا من انسابکم ما تصلون ارحامکم "، یعنی  اپنے نسب کو جانو اور اس کے ذریعے صلہ رحمی کرو۔ اور آپ ﷺ  بعض اوقات اپنے اصحاب سے فرماتے ” انا محمد بن عبد الله بن عبد المطلب بن هاشم (عبد الهاشم) بن عبد مناف بن قصی بن کلاب بن مره بن… ۔ شیخ طوسی اپنی کتاب امالی میں  امام رضا علیہ السلام کی روایت نقل کرتے ہیں کہ  رسول خدا ﷺ نے فرمایا   ” کل نسب و صهر منقطع يوم القيامة سترا من اللّه عليه الانسبي و سببي ” یعنی تمام انساب روز قیامت منقطع ہوجائیں گے سوائے میرے نسب اور سبب کے ۔ اور آپ دیکھئے  کہ روز بروز آنحضرت ﷺ کی  نسل مبارک  فراوان ہوتی جارہی ہے  کہ آیہ قرآن  انا اعطيناک الکوثر سے جو مقصود خدا تھا وہ آشکار تر ہوتا جا رہا ہے۔

                                                 نسب شناسی کی اہمیت کا اندازہ مولائے کائنات امیر المومنین علی المرتضیٰ علیہ السلام کی حیات مبارکہ کے  اس واقعے سے کیا جاسکتا ہے۔ سیّدہ کائنات  حضرت فاطمہ زہرا سلام اللہ علیہا کی شہادت کے بعد جناب امیر المومنین علیہ السلام نے اپنے بھائی جناب عقیل ؑ (جو اپنے عہد کے نامور نسب شناس تھے )سے فرمایا  کہ میرے لئے ایسی ہمسر کا انتخاب کرو جو عرب کے ممتاز ترین،شجاع ترین اور شریف ترین قبیلے سے ہو۔ جناب عقیلؑ نے  بانومجلله و مکرمه، يعني حضرت ام البنين سلام اللّه عليها کا انتخاب کیا جنہوں نے کائنات کو جناب ابوالفضل العباس علیہ السلام جیسا بطل جلیل عطا کیا جن کی بہادری، جاں نثاری اور وفاداری تاریخ کا ایک باب نہیں بلکہ خود ایک تاریخ ہے۔

                                                   یہ  علم  سادات ابوطالب ؑکے مابین اسلام کی تاریخ کے ساتھ ساتھ مروج رہا ہے ، اور جیسا کہ انساب کی کتابوں سے معلوم ہوتا ہےکہ  پہلی صدی ہجری سے اور خاص طور پر ہجرت اور کچھ نقل مکانیوں (امویوں اور عباسیوں کی وجہ سے) کی  بنا پر  خود سادات و دیگر مصنفین کتب انساب نے  اس پہلو پر خصوصی توجہ دی۔تاریخ کے اوراق سے  معلوم ہوتا ہے کہ  سادات نے  اپنے اپنے دور کے  حاکم وقت کے خلاف قیام کیا  مثلا   محمد نفس زکيه نے  مدينه  اور ان کے بھائی  ابراهيم باخمرا نے  بصره  میں قيام  کیا جس پر ظالم حکمرانوں نے ظلم کا ہر حربہ آزمایا  اور قیام شکست سے دوچار ہوئے؛ سادات کو نقل مکانی کرنا پڑی  اور انہوں نے دوسرے علاقوں میں جا سکونت اختیار کی۔ ہر وہ علاقہ جہاں سادات ظاہرا یا پوشیدہ موجود تھے ان کے ناموں کے اندراج کا باقائدہ رجسٹر تھا۔واضح رہے کہ ابتدا میں سادات کے ناموں کی رجسٹریشن مختلف طریقوں سے کی گئی تھی ، لیکن بعد میں ، ہر ایک خطے میں کچھ سادات  کی تجویز سے ، ایک شخص کو نقیب (سادات کا نگران) منتخب کیا گیا اور یہ اس کہ ذمہ داری قرار پائی۔لیکن ہر خاندان کی سطح پر بھی اس کا اہتمام رکھا گیا۔

                                             نسب شناسی  قبل از اسلام عربوں میں  شاخت قبائل میں اہم تھی۔  لیکن صدر اسلام اور  اس کے بعد   کے ادوار میں  پیغمبر اکرم ﷺ کی نسل مبارک میں  اضافے اور ان کے مختلف مقامات پر ہجرت کر جانے کی وجہ سے انساب سادات  کو خصوصی اہمیت حاصل ہوئی ۔ تاریخ اسلام کے اولین نسب شناس جناب عقیل بن ابو طالبؑ تھے۔

                                        فقہ  میں بھی نسب  کی اہمیت خصوصی ہے جیسا کہ   قرآن کریم میں اللہ ربّ العزت نے فرمایا        اِنَّمَا یُرِیْدُ اﷲِ لِیُذْھِبَ عَنْکُمُ الرِّجْسَ اَھْلَ الْبَیْتِ وَ یُطِھِّرَکُمْ تَطْھِیْرًا       اور فرمایا             قُل لَّا أَسْأَلُكُمْ عَلَيْہِ أَجْراً إِلَّا الْمَوَدَّةَ فِي الْقُرْبَى  یہ آیات واضح طور پر  جناب رسول خدا ﷺ کے خانوادہ کی عظمت و اہمیت نسب کی دلیل ہیں۔ اور  نسب سادات پر صدقہ  و زکوۃ  کا حرام ہونا   اور خمس کا ان کا حق ہونا، علمائے سادات کا سیاہ عمامہ  مخصوص ہونا،وجوب احترام سادات، اور ان کے لئے اپنی جگہ سے اٹھ کر کھڑا ہونا   نسب سادات کی خصوصی شرعی اہمیت  کو واضح کرتا ہے۔ اسی وجہ سے علماء و نسب شناسان سادات نے  اس خانوادے کی شجرہ نویسی و نسب شناسی پر ہر دور میں خصوصی توجہ رکھی اور انتہائی اہتمام و باریک بینی سے اس پر کام کیا۔

                                                 یونان ، روم، چین، مصر، اندلس، شام، ایران اور جزیرہ نما عرب سے ہوتا ہوا اب میں کیمبل پور پہنچ چکا ہوں ، اپنے عہد کے مورخ اور  نسب شناس تک ، اٹک (کیمبل پور) کے ارباب ذوق میں جناب مونس رضا صاحب کا نام نمایاں ترین ہے اور ان چند ناموں میں بھی سرفہرست ہے جو دامے،درمے،سخنے، قدمے صاحبان علم و دانش و اہل قلم کی بھرپور حوصلہ افزائی بلکہ سرپرستی بھی کرتے ہیں۔ وہ اکثر پرتکلف محافل سجاتے ہیں جس میں نامور محقق، ادیب، شاعر اور اساتذہ شریک ہوتے ہیں ساتھ وہ یہ مہربانی بھی کرتے ہیں کہ مجھ طالب علم کو بھی مدعو کرتے ہیں اور اس طرح مجھے اُن نابغہ شخصیات سے فیض کا شرف حاصل ہوتا ہے۔

                                           مونس رضا صاحب بنیادی طور پر علوم شرقیہ کے استاد ہیں لیکن ادبیات عالم، تحقیق اور سائنسی علوم پر بھی گہری نظر رکھتے ہیں۔ وہ دو اور دو چار کو تسلیم کرنے زیادہ اسے ثابت کرنے میں  دلچسپی رکھتے ہیں۔میں اکثر ان سے دینی اور شرعی مسائل کے حوالے سے گفتگو کرتا ہوں اور مجھے جو جواب ملتے ہیں وہ مکمل عالمانہ و عارفانہ ہوتے ہیں نہ کہ مولویانہ۔ میرے کئی سوالات کے جواب میں انہوں نے مکمل مضامین لکھے جو میرے ای میگزین پر شائع ہوئے اورعوام و خواص میں مقبول ہوئے۔

                                                   ہجرتوں کی داستان کو انہوں نے جس عرق ریزی سے مرتب کیا اور جس قدر مشقت اٹھائی اس کی مثالیں ہمارے ہاں کم کم ملتی ہیں۔ میں ان دنوں کا عینی شاہد ہوں جب وہ اس کار گراں میں ہمہ تن مصروف بلکہ غرق تھے۔ ایک ایک سطر پر ان کی توجہ ، تواریخ تقویم کی انتہائی باریکی سے کسی ماہر نجوم و فلکیات کی طرح جانچ پڑتال، زبان و بیان پر ماہر لسانیات جیسا دھیان، آھنگسازی صفحات پر کاتب و خطاط جیسی نظر ، سرورق اور پس ورق کی تیاری میں ایک مصور اور طراح گرافک جیسی دلچسپی انہی کا خاصہ ہے۔ ہجر رُتوں کی اس داستان کو دستاویز بنانے کی خاطر طویل سفر جیسے انہوں نے کیے میں کم از کم سوچ ہی سکتا ہوں۔

                                                   ہجرتوں کی داستان  پورے اہتمام سے لکھی گئی ہے۔ اس میں تواریخ کو سائنٹفک انداز میں جانچ پرکھ کر  ، واقعات کی صحت کو ہرممکن  تصدیق کے بعد اور انتہائی سلیس و شستہ زبان میں نہایت خوش اسلوبی کے ساتھ جمع کیا گیا ہے۔اگرچہ  یہ کتاب سادات بھاکری کے لئے بالعموم ایک اہم کتاب ہوگی  لیکن سادات کامل پور سیدان کے لئے   باالخصوص ایک ایسی قیمتی دستاویز ثابت ہوگی  جس  میں انہیں اپنے اسلاف کی تاریخ، تہذیب ، تکالیف و  مشکلات، ان کے علمی و روحانی کمالات و درجات سے آگہی   اور مکہ سے لیکر کامل پور سیدان تک کے اسفارہجرت کے احوال  ملیں گے اور اس کا بدل  شاید آئندہ کئی دہائیوں تک انہیں مل نہیں پائیگا۔

                                      میری دعا ہے کہ ربّ کریم صدقہ محمدؐ و آل محمدؐ جناب مونس رضا صاحب کو اس عظیم کام پر جزائے خیر عطا فرمائے، ان کی صحت، عمر اور علم میں برکت عطا کرتے ہوئے ان کی توفیقات میں مزید اضافہ فرمائے تاکہ  ایسے مزید کار ہائے نمایاں انجام دے سکیں اور آنے والی نسلوں کے لئے بہترین علمی اثاثہ  تیار کرتے رہیں۔

حضرت علی ہجویری المعروف داتا گنج بخش رحمۃاللہ علیہ نے کہیں فرمایا ہے کہ ’’کتاب کی تصنیف و تالیف کا اس کے سوا اور کوئی مقصد نہیں ہوتا کہ مصنف کا نام زندہ رہے اور اس سے روشنی و علم پانے والے اس کے لیے دعا کرتے رہیں‘‘ ظاہر ہے کسی کتاب سے جو روشنی، علم، فلاح اور راہنمائی حاصل ہوتی ہے اُس سے صاحبِ تصنیف کو نہ صرف دعائیں ملتی ہیں بلکہ انسانیت کا وقار قائم ہوتا ہے اور علم کی شمع سدا کے لیے روشن ہو جاتی ہے۔
ایک طویل زمانے سے میرے ذہن میں بلکہ اکثر ذہنوں میں یہ سوال اُٹھتا تھا کہ ہمارے شہر کیمپبلپور کے دل کے اندر ایک ایسی بستی آباد ہے جسے سب لوگ (گراں یا گاؤں) کہتے ہیں یہ کب وجود میں آئی؟ اور اس کے باسی کیا پس منظر رکھتے ہیں؟ میں اور شہر کے سب لوگ انہیں,, شاہ جی،، کہا کرتے ہیں اس بستی کے بچے میرے پاس پڑھا کرتے، ان میں کچھ ایسی خصوصیات ہوتی تھیں جو شہر یا آس پاس سے آنے والے دوسرے بچوں سے قطعی مختلف تھیں مثلاً وہ بولنے میں بے باک اور پوچھے گئے کسی بھی سوال کا نہایت صاف اور عمدہ زبان میں جواب دیتے، کسی موضوع پر چند فقرے روانی سے کہہ لیتے تھے، قدرتی طور پر تجسس ہوتا کہ ایسا کیوں کر ہے جبکہ یہ بھی اپنے آپ کو,, گراں،، سے وابستہ کہتے ہیں، اس گراں سے وابستہ بزرگوں سے بھی میرا تعلق رہا لیکن اس سوال کا جواب مجھے تسلی بخش نہ مل سکا، یہاں کے بچے سب اساتذہ کی نسبت میرے پاس زیادہ  تعداد میں پڑھے، پھر میرے ہم جماعتوں میں سے میرے قریب ترین لڑکے اسی ’’گراں‘‘ کے تھے بلکہ لڑکپن سے جوانی تک میرے ’’شاہ جی‘‘ حضرات سے نہ ٹوٹنے والے تعلقات رہے اور ہیں، کالج میں شروع سے آخر تک میرے بہترین دوست سید سیفی احمد نقوی تھے، سید محمد حسنین شاہ، سید ذوالفقار علی شاہ، سید یاور شاہ اور بے شمار سید برادران ہم نوالہ و ہم پیالہ رہے، میں سیفی احمد کے گھر اکثر جایا کرتا وہاں سیفی کی بیٹھک میں بیٹھے اکثر اُن کے والد میر صاحب احمد علی شاہ (خُدا اُن پر اپنی رحمتیں نازل کرتا رہے) سے ملاقات ہوتی کیا ہی رعب دار شخصیت تھی، میری سیفی احمد سے زندگی بھر مذہب پر بات نہ ہوئی۔
لیکن سوال اُسی طرح ذہن میں رہا کہ یہ ’’گراں‘‘ کیسے آباد ہوا؟ اس کا احسن اور مدلل جواب جنابِ مونس رضا نے (ہجرتوں کی داستاں) میں تفصیل سے دیا ہے، انہوں نے اس جواب کے لیے بہت تگ و دَو کی ہے اور کہاں کہاں سرگرداں رہے لیکن خوشی یہ ہے کہ انہیں اپنے سوال کا پہلا جواب گورنمنٹ کالج کیمپبل پور کے درویش صفت لائبریرین نذر صابریؒ کے تحقیقی مقالے ’’حضرت سخی سلطان اٹکیؒ‘‘ سے ملا ان کی مزید جستجو کی داستان علیحدہ ہے۔
اس سے پہلے مونس رضا نے اس طرح کی کوئی تحریر نہیں لکھی نہ ہی گفتگو میں اشارتاً کبھی اپنے پس منظر کا  ذکر کیا جبکہ میرے ان سے برسوں پر محیط تعلقات تھے اور میں جانتا ہوں کہ وہ علم و ادب اور شعر و شاعری کے رسیا ہیں انہوں نے سکول و کالج کے بچوں کے لیے اعلیٰ اور معیاری تقاریر لکھیں، تیار کروائیں مگر ان کی تحقیق کی جستجو سے ناواقف تھا ۔
جب یہ کتاب مجھے ملی تو بے حد دلچسپی سے میں نے ایک ہی نشست میں اسے پڑھ ڈالا، پھر کئی دن بار بار پڑھتا رہا بعض حصے تو میں نے یوں پڑھے کہ زبانی یاد ہو گئے، یہ وہ کتاب ہے جس سے میری حکمت و دانش، رشد و ہدایت، علم و فضل اور معلومات میں بیش بہا اضافہ ہوا،یہ ایک انقلاب کی داستان ہے جو صدیوں پرانی ہے لیکن ہنوز تازہ ہے، امید، عمل، بیداری، خود شناسی، جنون اور لہو سے مزیّن داستانِ انقلاب کبھی پرانی نہیں ہو سکتی، اس انقلاب کو دائمی حیثیت حضرت امام حسین علیہ السلام اور ان کے عظیم ساتھیوں کے پاکیزہ لہو نے بخشی۔

جنابِ مونس رضا کی کتاب دائمی سچائیوں سے بھری پڑی ہے، اس سچائی کے سارے باب بہت روشن تھے، لیکن (ہجرتوں کی داستاں) میں آ کر اس کے کئی نئے پرت کھلے، شاہ صاحب کو مدتوں مختلف علاقوں میں بھٹکنا پڑا ایک پاکیزہ اور وسیع و عریض ورقِ تاریخ جو صدیوں پہلے کہیں رونما ہوا اُس میں ہر دور کے آئمہ کرام اپنے دینی فریضے، حق پرستی اور علم و ہنر کی تلاش میں سرگرداں رہے، یہ طاغُوتی قوتیں تھیں جو اقتدار اور ملوکیت کے زُعم میں آئمہ کرام کو صرف اس لیے ظُلم و ستم کا نشانہ بناتیں کہ وہ زُہد و تقویٰ، حُسن اخلاق اور غُرباء و مساکین کی خدمت کے سبب مقبولیتِ عام حاصل کر لیتے اور یہ دنیاوی حکمرانوں کو کسی صورت منظور نہ تھا پس ایک طرف دنیاوی جاہ و حشمت تھی اور زیادہ سے زیادہ مال کی ہوس جبرو استبداد پر مجبور کرتی تھی تو دوسری طرف صبر و برداشت، فقیری و درویشی، اعلیٰ ترین حُسنِ اخلاق، حلم و حُسنِ سلوک کا مظاہرہ تھا یہ سلسلہ ازل سے آج تک بغیر کسی فرق کے جاری و ساری ہے اسی لیے حضرت علامہ اقبال نے فرمایا تھا:
ستیزہ کار رہا ہے ازل سے تا امروز
چراغِ مُصطفوی سے شرارِ بُو لَہبی
میں نے پوری تاریخ میں دیکھا کہ بنو امیہ ہوں یا بنو عباس، ہر ایک ظلم کی مٹی سے بنا تھا آئمہ کرام کو دیکھتے ہوئے مجھے اُن کی بہادری اور صبر کی انتہا پر بار بار وہ پرانا مصرعہ یاد آتا رہا ’’تو تیر آزما میں جگر آزماؤں‘‘ جس طرح مشہور فلسفی ’’کانت‘‘ نے مابعدالطبیعات میں ایک تہلکہ خیز انقلاب برپا کر دیا تھا اسی طرح آئمہ کرام نے تاریخ انسانیت میں قدم بہ قدم، زمانہ بہ زمانہ تہذیب و تمدن کو علمی و فکری نکھار بخشا حضرت علی کی نہج البلاغہ کو ہی دیکھ لیجیے کوئی نظیر مل سکتی ہے؟ حق گوئی اور حقیقت شناسی اسی کو ہی تو کہتے ہیں ان کی درویش صفت اولادیں بھی علم و حکمت کے چراغ لے کر ایک علاقہ سے دوسرے علاقے میں روشنی پھیلاتے رہے دشوار گزار پہاڑی راستے اور صحرا ان کے قدموں کی دھول بنتے رہے جب ایک علاقے کے لوگوں تک پیغامِ حق پہنچا دیتے تو نئے علاقوں کی طرف نکل پڑتے اور پھر انہی بزرگوں کی اولاد سفر کرتے ہوئے مرزا اور کامل پور سیداں تک آ پہنچے ۔
کتاب کا آخری حصہ خاص طور پر لائقِ مطالعہ ہے جس سے تمام سوالات کے جوابات مل جاتے ہیں، مونس رضا نے شروع سے آخر تک اُمتِ مسلمہ کو جوڑنے کی سعی کی ہے انہوں نے کسی قسم کے متنازعہ امور کو چھیڑنے سے گریز کیا ہے میں جانتا ہوں کہ وہ اس حقیقت سے کماحقہ، واقف ہیں کہ مذہبی اور مسلکی فرق کو کوئی کتنا ہی باعلم کیوں نہ ہو نہیں مٹا سکتا بالآخر ربِ کائنات خود ہی حق و باطل کا فیصلہ فرمائے گا جب ہم فیصلہ کر نہیں سکتے تو نزاع کیوں پیدا کیا جائے، مونس رضا نے جس مہارت سے نزاعی معاملات سے پہلو تہی کی ہے کہ مجھے ساحر لدھیانوی کی وہ نظم یاد آتی رہی جس کا نکتہئِ آغاز ہے ’’چلو اک بار پھر سے اجنبی بن جائیں ہم دونوں‘‘ جس میں شاعر آگے چل کر ایک معرکۃ الآراء شعر کہتا ہے کہ
وہ افسانہ جسے انجام تک لانا نہ ہو ممکن
اسے اک خُوبصُورت موڑ دے کر چھوڑنا اچھا
سو مونس رضا نے ہر ایسا موڑ ایسی مشاقی سے مڑا کہ داد دینا بنتی ہے، یہ پہلی تصنیف ہے جس میں کاملپور سیداں کیمپبلپور (جسے بعد میں بدقسمتی سے اٹک کے نام سے موسوم کر دیا گیا) کے لوگوں کے آباء و اجداد اور دیگر بزرگوں کا تذکرہ ملتا ہے، جن بزرگوں کا میرے زمانے سے تعلق ہے اور میں ان سے ملا ہوں وہ سبھی نہایت علم دوست، وسیع النظر، اعلیٰ ظرف اور بااخلاق لوگ تھے ہمارے بزرگوں کے بھی کامل پور سیداں کے بزرگوں سے بہترین تعلقات تھے کاش میں سب کا ذکر کر سکتا مگر بابو سید تصدق حُسین کربلائی صاحب؛ الحاج محبت حسین شاہ صاحب، بہترین شاعر اور نستعلیق شخصیات سید مشتاق حسین فیضی اور سید محمد عباس نقوی صاحب، حاجی مختیار حسین شاہ صاحب ایسے مہربان نام ہیں جنہیں ہمیشہ یاد رکھتا ہوں ۔
اللہ تعالیٰ ہمارے کیمپبلپور کے باسیوں کے درمیان یہ محبت، یہ ہم آہنگی ہمیشہ قائم رکھے اور اہلبیت سے محبت انہیں آپس میں شیر و شکر رکھے، آمین