Tag: فلسطین

مجلس اتحاد امت: فلسطینی کاز پر مذہبی جماعتوں  کا اتحاد

ڈاکٹر  رحمت عزیز خان چترالی

ان دنوں پاکستانی  سیاست میں ایک تازہ اور اہم پیش رفت اس وقت سامنے آئی ہے جب پاکستان کی دو بڑی مذہبی جماعتوں، جمعیت علمائے اسلام (ف) اور جماعت اسلامی نے غزہ پر اسرائیلی مظالم کے خلاف "مجلس اتحاد امت” کے نام سے ایک مشترکہ پلیٹ فارم تشکیل دیا ہے۔ اس اتحاد کے تحت 27 اپریل کو مینار پاکستان، لاہور میں ایک بڑا جلسہ اور احتجاجی مظاہرہ کیا جائے گا جس میں تمام مذہبی جماعتیں اور مکاتب فکر فلسطینی عوام سے اظہار یکجہتی کریں گے۔

پاکستانی سیاست میں مذہبی جماعتوں کے اتحاد کی روایت کوئی نئی بات نہیں۔ ماضی میں بھی متحدہ مجلس عمل کے پلیٹ فارم پر انہی دونوں جماعتوں نے یکجہتی کا مظاہرہ کیا تھا۔ 2002ء کے عام انتخابات میں ایم ایم اے کو غیر معمولی کامیابی حاصل ہوئی تھی جس نے نہ صرف خیبر پختونخوا میں حکومت بنائی بلکہ قومی اسمبلی میں بھی قابل ذکر نشستیں حاصل کیں۔

تاہم وقت کے ساتھ سیاسی مفادات اور داخلی نظریاتی اختلافات کی بنا پر یہ اتحاد تحلیل ہو گیا۔ لیکن فلسطینی مسئلے جیسے امت مسلمہ کے اجتماعی درد نے ایک مرتبہ پھر ان جماعتوں کو قریب لا کھڑا کیا ہے۔

مشترکہ پریس کانفرنس میں مولانا فضل الرحمن اور حافظ نعیم الرحمن نے واضح کیا کہ فلسطین کی موجودہ صورتحال امت مسلمہ کے لیے ایک آزمائش ہے۔ ان کا یہ بیان صرف مذہبی جذبات نہیں بلکہ عالمی سیاسی بےحسی پر ایک تنقید بھی ہے۔

ان رہنماؤں کا یہ بھی کہنا تھا کہ امت مسلمہ کو اپنے حکمرانوں کے غیر مؤثر کردار پر شدید اعتراض ہے کیونکہ وہ مظلوم فلسطینیوں کے حق میں عالمی سطح پر مؤثر سفارتی جدوجہد نہیں کر سکے۔

قابل ذکر پہلو یہ ہے کہ رہنماؤں نے تشدد کی راہ اختیار کرنے کو سختی سے رد کیا ہے۔ ان کا کہنا تھا کہ انٹرنیشنل فوڈ چینز یا املاک پر حملے کرنا  ملک کا اپنا نقصان ہے اور فلسطینی کاز کی خدمت نہیں۔

یہ رویہ اسلامی جمہوری سیاست میں پرامن اور باوقار احتجاجی کلچر کی ترویج کا مظہر ہے اور اس بات کی طرف اشارہ کرتا ہے کہ مذہبی سیاست اب صرف نعروں سے آگے بڑھ کر دانشمندی اور سفارتی تدبر کی طرف مائل ہو رہی ہے۔

اگرچہ دونوں جماعتوں نے اعلان کیا ہے کہ وہ اپنے اپنے پلیٹ فارم سے سیاسی جدوجہد جاری رکھیں گی  لیکن اس پریس کانفرنس میں ملکی مسائل جیسے صوبوں کے وسائل، نہری نظام، اور عوامی ملکیت جیسے موضوعات پر بھی گفتگو ہوئی۔ یہ اشارہ ہے کہ مجلس اتحاد امت مستقبل میں ایک بڑے سیاسی اتحاد یا اپوزیشن گرینڈ الائنس کی بنیاد بن سکتا ہے۔ اب سوال یہ بھی اٹھتا ہے کیا یہ اتحاد صرف دینی اتحاد ہے یا مذہبی اتحاد یا سیاسی اتحاد بھی ہے؟ اگر یہ سیاسی اتحاد ہے تو کیا اس میں سپاہ صحابہ اور اہل تشیع بھی  مستقبل میں شامل ہوسکتی ہیں؟

ن لیگ کے رہنما ملک محمد احمد خان نے اس اتحاد کو "سیاسی طور پر خوش آئند” قرار دیا ہے۔ ان کے مطابق یہ حکومت کے لیے کوئی خطرہ نہیں، لیکن سیاسی تجزیہ نگار اس رائے سے مکمل اتفاق نہیں رکھتے کیونکہ اگر مذہبی جماعتیں عوامی مسائل پر مشترکہ مؤقف اپناتی ہیں، تو وہ اپوزیشن کا مؤثر متبادل بن سکتی ہیں۔

مجلس اتحاد امت کے قیام کو محض ایک علامتی یا وقتی احتجاجی عمل نہیں سمجھا جا سکتا، بلکہ یہ امت کے اجتماعی شعور کی بیداری اور اسلامی سیاسی وحدت کا مظہر ہے۔ اگر یہ اتحاد مستقل مزاجی، عوامی شمولیت، اور بین المسالک ہم آہنگی کو اپنی بنیاد بناتا ہے، تو یہ نہ صرف فلسطین کے مسئلے کو عالمی سطح پر اجاگر کرے گا، بلکہ پاکستانی سیاست میں ایک نئی اخلاقی اور نظریاتی تحریک کی بنیاد بن سکتا ہے۔

فلسطین کے حق میں احتجاج

ڈاکٹر رحمت عزیز خان چترالی

آج غزہ و فلسطین ایک بار پھر صیہونی بربریت کا نشانہ بنے ہوئے ہیں۔ لیکن ہم مسلمان ہونے کے باوجود خاموش ہیں۔ معصوم بچوں، خواتین اور عام شہریوں پر اندھا دھند بمباری اور فائرنگ کے واقعات نے پوری مسلم دنیا کو غم و غصے میں مبتلا کر رکھا ہے۔ لیکن ہم مسلمان ہونے کے باوجود خاموش ہیں۔ فلسطینی عوام پر ہونے والا ظلم کسی ایک قوم، مذہب یا علاقے کا مسئلہ نہیں رہا بلکہ انسانیت کے وقار اور ضمیر کا امتحان بن چکا ہے۔ لیکن ہم مسلمان ہونے کے باوجود خاموش ہیں۔ تاریخ کے اوراق میں جب بھی مظلومیت کا ذکر آئے گا فلسطین کی بے بسی اور امت مسلمہ کی خاموشی ایک کربناک باب کے طور پر لکھی جائے گی۔ لیکن ہم مسلمان ہونے کے باوجود خاموش ہیں۔
فلسطین پر یہودی ریاست کے قیام کی سازش 1917ء میں بالفور ڈیکلیئریشن سے شروع ہوئی جب برطانوی سامراج نے فلسطین کو یہودی وطن بنانے کا وعدہ کیا۔ 1948ء میں اسرائیل کے ناجائز قیام کے بعد سے آج تک فلسطینی قوم مسلسل تشدد، جبری ہجرت، نسل کشی اور انسانی حقوق کی خلاف ورزیوں کا شکار ہے۔ اقوام متحدہ کی قراردادوں کے باوجود اسرائیل کے توسیع پسندانہ عزائم تھم نہیں رہے۔ حالیہ مہینوں میں غزہ پر بمباری، اسپتالوں، اسکولوں، عبادت گاہوں اور رہائشی علاقوں کو نشانہ بنانے سے عالمی ضمیر بھی جھنجھوڑا جا رہا ہے۔ لیکن ہم مسلمان ہونے کے باوجود خاموش ہیں۔
مسلمانوں کے دل میں فلسطین کی حالت زار پر جو غم و غصہ ہے وہ فطری ہے۔ لیکن اس غصے کا اظہار حدود کے اندر رہتے ہوئے ہونا چاہیے۔ گزشتہ دنوں پاکستان کے مختلف شہروں میں غیر ملکی فوڈ چینز کے ریسٹورنٹس پر پرتشدد حملے، توڑ پھوڑ اور جان لیوا واقعات نے اس احتجاجی تحریک کو نقصان پہنچایا ہے۔ شیخوپورہ اور راولپنڈی کے واقعات میں نہ صرف قیمتی جانوں کا ضیاع ہوا بلکہ اس سے فلسطینی کاز کو نقصان پہنچا کیونکہ احتجاج کا رخ ظلم کے خلاف ہونا چاہیے، نہ کہ اپنے ہی معاشرے اور لوگوں کے خلاف ہونا چاہئیے۔
اسلامی نظریاتی کونسل کے چیئرمین ڈاکٹر راغب حسین نعیمی اور ممتاز عالم دین مفتی تقی عثمانی نے بجا طور پر اس امر کی وضاحت کی ہے کہ اسرائیل اور اس کی حمایت کرنے والی کمپنیوں کا بائیکاٹ ایک مؤثر اور شرعی طور پر جائز قدم ہے، لیکن اس کی آڑ میں کسی شخص یا ادارے کی املاک یا جان کو نقصان پہنچانا شریعت کی رو سے سختی سے منع ہے۔ قرآن و حدیث کی روشنی میں یہ واضح ہے کہ "لا ضرر ولا ضرار” (نہ خود نقصان پہنچاؤ اور نہ کسی کو نقصان دو) جیسے اصول پر عمل لازم ہے۔ جذبات میں آ کر توڑ پھوڑ اور فسادات اسلامی تشخص کے منافی ہیں۔

بائیکاٹ ایک خاموش لیکن مضبوط ہتھیار ہے۔ جنوبی افریقہ کی نسل پرست حکومت کے خلاف معاشی بائیکاٹ کی کامیاب مثال ہمارے سامنے ہے۔ فلسطین کے حق میں اگر پوری دنیا کے مسلمان دانشمندانہ اور پُرامن طریقے سے اسرائیلی مصنوعات کا بائیکاٹ کریں تو یہ ان کے لیے زہرِ قاتل بن سکتا ہے۔ سوشل میڈیا، تعلیمی ادارے، مساجد اور علمی و ادبی حلقے اس شعور کی بیداری کے لیے کلیدی کردار ادا کر سکتے ہیں۔
فلسطینیوں سے یکجہتی صرف جذباتی نعرے بازی سے ممکن نہیں بلکہ شعور، علم، حکمت اور اسلامی تعلیمات کے عملی نفاذ سے ہی ممکن ہے۔ ہمیں ایسے ہر اقدام سے گریز کرنا چاہیے جس سے ہمارا احتجاج بدنام ہو یا دشمن کو اس کا فائدہ ملے۔ ایک طرف مظلوم فلسطینی بچہ خون میں لت پت ہے اور دوسری طرف ہم اپنی گلیوں میں اپنے ہی بھائیوں کے کاروبار کو نقصان پہنچا کر اُن مظلوموں کا مقدمہ کمزور کر رہے ہیں۔
اسلام ہمیں ظلم کے خلاف اٹھنے اور مظلوم کی حمایت کا حکم دیتا ہے، لیکن طریقہ کار وہی ہونا چاہیے جو نبی کریم حضرت محمد مصطفی ﷺ کی سیرت سے ہمیں ملتا ہے۔ صبر، حکمت، استقامت اور قانون کی پاسداری بہت ضروری ہے۔ فلسطین کے لیے ہماری دعا، ہماری آواز، ہمارا شعور، ہمارا قلم اور ہمارا بائیکاٹ ، سب کچھ لازم ہے مگر صرف اس حد تک جو اسلام اور انسانیت کے دائرہ اخلاق میں آتا ہو۔

دعا مومن کا ہتھیار ہے

تحریر محمد ذیشان بٹ

انسان کا اپنے رب سے وہ رشتہ ہے جو الفاظ سے زیادہ جذبات سے جُڑا ہوتا ہے۔ یہ وہ راستہ ہے جس پر چل کر ایک بندہ اپنے رب کے دربار میں حاضر ہوتا ہے، اپنی محرومیوں کا شکوہ کرتا ہے، اپنی امیدوں کا اظہار کرتا ہے، اور دل کی گہرائیوں سے مانگتا ہے۔ دعا، بندے کی کمزوری اور رب کی قدرت کا اعتراف ہے۔ جب کوئی بندہ کہتا ہے کہ "یا اللہ”، تو گویا وہ اپنی عاجزی، لاچاری اور ضرورت کو تسلیم کرتے ہوئے اُس ذاتِ باری تعالیٰ کو پکار رہا ہوتا ہے جو "کُن فیکون” کہنے پر قادر ہے۔
دعا محض زبان سے ادا کیے گئے الفاظ نہیں، بلکہ ایک روحانی کیفیت ہے۔ یہ ایک سچا تعلق ہے جو صرف اللہ کے ساتھ جڑتا ہے۔ یہ وہ دروازہ ہے جو کبھی بند نہیں ہوتا۔ اللہ تعالیٰ خود فرماتے ہیں کہ "مجھ سے مانگو، میں تمہاری دعا قبول کروں گا۔” اس میں نہ وقت کی قید ہے، نہ جگہ کی، نہ زبان کی شرط ہے، اور نہ ہی کوئی دُور رہنے کی حد۔ دعا وہ ذریعہ ہے جس سے ایک غریب، بادشاہ کے برابر ہو جاتا ہے اور ایک گناہ گار، ولیوں کی صف میں کھڑا ہو جاتا ہے۔
دعا کے لیے دل کا نرم ہونا ضروری ہے، آنکھوں کا نم ہونا ضروری ہے، اور سب سے بڑھ کر، رزق کا حلال ہونا بہت اہم ہے۔ ایک حدیثِ پاک ہے کہ ایک شخص سفر میں ہوتا ہے، گرد آلود ہوتا ہے، ہاتھ اٹھا کر دعا کرتا ہے: "یا رب، یا رب”، مگر اس کا کھانا حرام، لباس حرام، اور پیٹ حرام سے بھرا ہوا ہوتا ہے، تو اللہ کیسے اُس کی دعا قبول کرے؟ یہ حدیث ہمیں واضح پیغام دیتی ہے کہ دعا کے اثر میں رزقِ حلال کا کردار بنیادی ہے۔ اگر ہم چاہتے ہیں کہ ہماری دعائیں قبول ہوں، تو سب سے پہلے ہمیں اپنی کمائی کو پاک اور حلال بنانا ہوگا۔
حضرت امام احمد بن حنبل کا واقعہ بہت مشہور ہے۔ وہ ایک سفر میں تھے اور ایک مسجد میں رات گزارنے کا ارادہ کیا، مگر وہاں کے نگہبان نے اجازت نہ دی۔ امام صاحب نے بہت اصرار کیا مگر وہ نہ مانا۔ امام صاحب نے مسجد کے دروازے کے قریب ہی سونا چاہا، تو نگہبان نے انہیں وہاں سے بھی ہٹا دیا۔ بالآخر ایک نانبائی نے انہیں اپنے گھر لے جا کر مہمان بنایا۔ رات کو وہ نانبائی اپنے معمول کے مطابق آٹا گوندھتے ہوئے مسلسل استغفار کرتا رہا۔ امام صاحب نے حیرت سے پوچھا: "تم کب سے یہ عمل کر رہے ہو؟” نانبائی نے کہا: "برسوں سے، اور اللہ نے میری ہر دعا قبول کی ہے۔” امام صاحب نے پوچھا: "کیا کبھی کوئی دعا قبول نہ ہوئی ہو؟” نانبائی بولا: "بس ایک دعا ابھی باقی ہے، کہ امام احمد بن حنبل سے ملاقات ہو جائے۔” امام صاحب مسکرائے اور بولے: "اللہ نے تو تمہاری یہ دعا بھی قبول فرما دی، دیکھو میں خود تمہارے دروازے پر آیا ہوں۔” یہ واقعہ ہمیں بتاتا ہے کہ دعا کے لیے مسلسل استغفار، اللہ سے لو لگانا، اور دل سے مانگنا ضروری ہے۔ یہ محض الفاظ کا تکرار نہیں، بلکہ ایک روحانی سفر ہے، جس میں بندہ رب کے قریب ہوتا چلا جاتا ہے۔

ریاض، سعودی عرب کے مشہور آرتھوپیڈک سرجن ڈاکٹر احمد کا ایک واقعہ بھی بہت سبق آموز ہے۔ وہ ایک بار ایک شدید زخمی مریض کا آپریشن کر رہے تھے، مریض کی حالت نازک تھی۔ ڈاکٹر احمد نے بتایا کہ انہوں نے اس وقت اپنے تمام تر تجربے کے باوجود خود کو بے بس محسوس کیا، اور دل ہی دل میں اللہ سے دعا کی: "یا اللہ، تُو ہی شفا دینے والا ہے، میری کوشش کو قبول فرما۔” اس کے بعد مریض کی حالت بہتر ہونے لگی اور آپریشن کامیاب ہوا۔ ڈاکٹر احمد نے یہ واقعہ کئی بار بیان کیا ہے کہ ایک وقت آتا ہے جب علم، مہارت اور تجربہ سب ایک حد تک کام آتے ہیں، مگر اصل سہارا دعا کا ہوتا ہے۔ انسان کتنا ہی قابل ہو، مگر جب رب کی مدد شامل نہ ہو تو کامیابی ممکن نہیں۔
سب سے مقبول دعا درود شریف ہے۔ امامِ کعبہ الشیخ صالح پر دل کا آپریشن ہوا، مگر کامیاب نہ ہو سکا۔ حالت مزید بگڑ گئی، اور ڈاکٹرز دوبارہ آپریشن کی تیاری کرنے لگے۔ اسی دوران ایک لبنانی نرس آئی اور ادب سے کہا: "یا شیخ، کیا آپ نے نبی کریم صلی اللہ علیہ وآلہ وسلم پر درود پڑھنا شروع کیا؟” امام صاحب نے فوراً درود شریف کا ورد شروع کیا — "اللهم صل على محمد وعلى آل محمد” — اور مسلسل پڑھتے رہے۔ کچھ دیر بعد دل کو سکون ملنے لگا، طبیعت بہتر ہوئی، اور جب ڈاکٹرز نے دوبارہ جانچ کی تو حیران رہ گئے: دل نارمل ہو چکا تھا۔ دوسرا آپریشن منسوخ کر دیا گیا۔ امام صاحب خود کہتے ہیں کہ یہ شفا درود شریف کی برکت سے ملی۔ یہ واقعہ درود کی روحانی طاقت، دعا اور نبی کریم صلی اللہ علیہ وآلہ وسلم سے تعلق کی عظمت کو ظاہر کرتا ہے۔
صحابہ کرام اور تابعین کا عمل دعا کے معاملے میں مثالی تھا۔ حضرت عمر بن خطاب رضی اللہ عنہ فرماتے تھے: "مجھے اپنی دعا کی قبولیت کی فکر نہیں، بلکہ مجھے دعا کرنے کی توفیق کی فکر ہوتی ہے، کیونکہ دعا کی توفیق ملنا ہی اللہ کی طرف سے قبولیت کی نشانی ہے۔” حضرت علی کرم اللہ وجہ فرمایا کرتے تھے کہ "دعا مؤمن کا ہتھیار ہے۔” تابعین رات کی تنہائی میں اٹھ کر رب کو یاد کرتے، دروازے بند کر کے، دل کھول کر گڑگڑاتے، روتے اور مانگتے۔ ان کے پاس دنیاوی وسائل کم تھے، مگر رب کی رحمت کے خزانے اُن کے لیے ہر وقت کھلے تھے۔
دعا کے اوقات بھی اہم ہوتے ہیں۔ اللہ تعالیٰ ہر رات کے آخری پہر آسمانِ دنیا پر نزول فرماتے ہیں اور آواز دیتے ہیں: "ہے کوئی مانگنے والا کہ میں اسے عطا کروں؟” یہ وقت دعا کی قبولیت کا خاص لمحہ ہوتا ہے۔ اسی طرح اذان کے بعد، فرض نماز کے بعد، جمعہ کے دن کی آخری گھڑیاں، روزے کی حالت میں، افطار کے وقت، بارش کے وقت، والدین کی دعا، مظلوم کی فریاد، مسافر کی پکار — یہ سب ایسے مواقع ہیں جب دعا رد نہیں کی جاتی۔
اللہ تعالیٰ انسان کی دعا کو کئی طریقوں سے قبول فرماتا ہے۔ یا تو وہ مانگی ہوئی چیز فوراً دے دیتا ہے، یا اس سے بہتر چیز دیتا ہے، یا کوئی مصیبت ٹال دیتا ہے، یا آخرت کے لیے ذخیرہ کر دیتا ہے۔ ہر صورت میں بندے کا فائدہ ہی ہوتا ہے۔
آخر میں ایک نہایت اہم بات یہ ہے کہ دعا کسی سے زبردستی نہیں لی جا سکتی۔ اکثر لوگ کہتے ہیں: "ہمارے لیے دعا کریں” — حالانکہ دعا دل سے نکلتی ہے، محض زبانی درخواست پر دعا مانگی نہیں جاتی، وہ لی جاتی ہے۔ یعنی انسان ایسا عمل کرے، ایسا اخلاق اختیار کرے کہ دوسروں کے دل سے اس کے لیے دعا خود بخود نکلے۔ دعا لینے کے لیے دل جیتنا پڑتا ہے، محبت بانٹنی پڑتی ہے، اور سب سے بڑھ کر عاجزی اختیار کرنی پڑتی ہے۔
دعا میں ایک عجیب طاقت ہے۔ یہ وہ راستہ ہے جو کبھی بند نہیں ہوتا۔ یہ وہ دروازہ ہے جو ہر حال میں کھلا رہتا ہے۔ انسان جب سب طرف سے مایوس ہو جائے تو دعا ہی وہ سہارا ہے جو اسے امید کی نئی روشنی دیتا ہے۔ یہ وہ تحفہ ہے جو ہر وقت، ہر جگہ اور ہر حال میں ممکن ہے، بس دل کو نرم کرنے اور لبوں کو سچا بنانے کی دیر ہے۔ رب تو کہتا ہے، مانگنے والا چاہیے — اور وہ دینے والا بن کر منتظر ہے۔
رب ہمیں اپنی بارگاہ میں سچی دعا کرنے کی توفیق عطا فرمائے، فلسطین سمیت پوری دنیا میں مظلوم مسلمانوں کے لیے دل سے دعائیں کرنے کی توفیق عطا فرمائے اور ہماری دعاؤں کو اپنی رحمت سے قبول فرمائے، آمین۔

Title Image by Mohamed Hassan from Pixabay

فلسطین: ایک درد، ایک دکھاوا

تحریر محمد ذیشان بٹ
یہ انتقام ہے یا احتجاج ہے کیا ہے
یہ لوگ دھوپ میں کیوں ہیں شجر کے ہوتے ہوئے
“جب احتجاج بھی مفاد کا ذریعہ بن جائے، تو ظلم کو طاقت ملتی ہے، مظلوم مزید تنہا ہو جاتا ہے۔”
فلسطین کا دکھ نیا نہیں، پرانا ہے۔ مسلسل دہائیوں سے جاری یہ زخم آج بھی تازہ ہے۔ ہر بمباری، ہر شہادت، ہر آنسو ہمیں ایک لمحے کے لیے جھنجھوڑتا ضرور ہے، لیکن پھر ہم اپنی دنیا میں مگن ہو جاتے ہیں۔ فلسطین کا مسئلہ اب ایک نعرہ بن چکا ہے، ایک علامت، جسے جب چاہا استعمال کیا، اور پھر رکھ دیا۔ پاکستانی معاشرہ بھی اسی روش پر چل نکلا ہے۔ یہاں ہر شخص، ہر تنظیم، ہر جماعت، فلسطین کے نام پر صرف اپنی دکان چمکانے میں مصروف نظر آتی ہے۔
سیاسی جماعتیں جلسے کرتی ہیں، بڑی بڑی اسکرینوں پر فلسطینی پرچم لہراتی ہیں، مگر ان کے منشور میں فلسطین کا کوئی مقام نہیں ہوتا۔ مذہبی تنظیمیں خطبے دیتی ہیں، ریلیاں نکالتی ہیں،فلسطین کے نام پر چندے وصول کر کے اپنا الو سیدھا کرتے ہیں لیکن ان کا اتحاد صرف سوشل میڈیا پر نظر آتا ہے، حقیقت میں نہیں۔ مشہور شخصیات، سوشل میڈیا ایکٹوسٹس، یوٹیوبرز، سب فلسطین کے لیے ویڈیوز بناتے ہیں، تاکہ اپنی ریٹنگز حاصل کر سکیں مگر انہی اسرائیلی مصنوعات کے برانڈ ایمبیسیڈر بھی ہوتے ہیں جن کے بائیکاٹ کی تلقین عوام کو کرتے ہیں۔
یہ دوغلا پن صرف فرد کی سطح پر نہیں، حکومتی سطح پر بھی ہے۔ آج جن سے فلسطین کے لیے آواز بلند کرنے کی امید رکھی جا رہی ہے، وہ خود ہی مفاداتی معاہدوں کی پیداوار ہیں۔ جب ان کی اپنی صداقت مشکوک ہو، تو وہ کسی مظلوم کے حق میں کہاں تک جا سکتے ہیں؟ ان سب کو قائد اعظم کا فرمان یاد رکھنا چاہے اسرائیل امت مسلمہ کے دل میں گھونپا گیا خنجر ہے ۔ یہ ایک ناجائز ریاست ہے جسے پاکستان کبھی تسلیم نہیں کرے گا۔

اس وقت ہمارا احتجاج صرف "ردعمل” ہے، "عمل” نہی اگر ہم دنیا کی زندہ قوموں کو دیکھیں، تو وہ احتجاج کو ایک مؤثر ہتھیار کے طور پر استعمال کرتی ہیں۔ وہ سڑکوں پر صرف نعرے نہیں لگاتیں، منظم تحریکیں چلاتی ہیں۔ ان کے احتجاج میں یکجہتی، قیادت، تسلسل اور حکمت عملی ہوتی ہے۔ وہ احتجاج کو مقصد سے جوڑتی ہیں، نہ کہ مفاد سے۔
ہمیں یہ سمجھنا ہوگا کہ احتجاج تب مؤثر ہوتا ہے جب:
اس میں صرف جذبات نہیں بلکہ شعور ہو
قیادت خالص اور دیانت دار ہو
قوم خود بیدار ہو، صرف ہدایت کی محتاج نہ ہو
احتجاج محض ریلی یا واک نہ ہو بلکہ پالیسی تبدیلی کا محرک بنے
ہمیں فلسطین کے لیے صرف جذباتی نہیں، عقلی، اخلاقی اور عملی سطح پر کھڑا ہونا ہوگا۔ ہمیں اپنا طرزِ زندگی بدلنا ہوگا۔ بائیکاٹ صرف سوشل میڈیا کی حد تک نہیں بلکہ روزمرہ زندگی میں نظر آنا چاہیے۔ ہمیں اپنی اولاد کو فلسطین کی اصل تاریخ سکھانی ہوگی، تاکہ وہ اگلی نسلیں بھی اس کاز کو زندہ رکھ سکیں۔ ہمیں اپنے حکمرانوں سے حقیقی اقدام کا مطالبہ کرنا ہوگا، خالی بیانات نہیں۔ ووٹ دیتے وقت اگر آپ کی سوچ نلکے یا سڑک پکی کروانے تک ہو گئی تو ان حکمرانوں سے توقع مت رکھیں کہ یہ فلسطین کے لیے آواز اٹھائیں گے
یہ وہ وقت ہے جب ہمیں صرف ہجوم نہیں بلکہ قوم بننا ہے۔ اگر ہم واقعی چاہتے ہیں کہ ہماری آواز مظلوموں کے ساتھ ہو، تو ہمیں اپنے اندر وہ اخلاص، وحدت اور عمل پیدا کرنا ہوگا جو کسی بھی احتجاج کو زندہ اور طاقتور بنا دیتا ہے۔ اور روزانہ انفرادری طور پر نماز کے بعد گڑگڑا کر اللّہ پاک کے حضور صدق دل سے فلسطین کے لیے یہ کہ کر دعا کریں کے مولا ہم تو بے بس ہیں جس طرح ممکن تھا بایکاٹ بھی کیا مال بھی لگایا توانائی بھی صرف کی تو مولا اپنے غیب سے فلسطین کے مسلمانوں کی مدد فرما بھیج پھر کوئی صلاح الدین ایوبی جو بیت المقدس کو آزاد کروانے
ورنہ ہماری ریلیاں، نعرے، اور ہیش ٹیگز، صرف ایک اور موسمی جذبہ بن کر رہ جائیں گے، اور فلسطین کا زخم یونہی رسے گا، یونہی بہتا رہے گا۔ بات فلسطین تک نہیں رکے گی انڑ نیٹ کا استعمال کر کے گریٹر اسرائیل کا منصوبہ بھی پڑھ لے تھوڑا نہیں مکمل غور کیجے

Title Image by hosny salah from Pixabay

تَذليل نہیں، حُسنِ سُلوک 

تحریر: عبدالوحید خان، برمنگھم (یوکے)

وطن عزیز پاکستان میں سب سے بڑے صوبہ پنجاب میں حالیہ دنوں میں ستھرا پنجاب پروگرام کے تحت نہ صرف بازاروں ، سڑکوں اور راستوں کی صفائیاں کی جارہی ہیں بلکہ تجاوزات بھی ہٹائی جا رہی ہیں اور جن لوگوں نے اپنی دکانوں کے باہر بڑے بڑے تھڑے یا چھجے بنا رکھے ہیں وہ بھی مختلف شہروں کے بازاروں میں گرا دئیے گئے ہیں اور بتدریج یہ مہم دوسرے شہروں میں بھی جا رہی ہے- اسی طرح قبضہ کی گئی جگہ پر بنائے گئے مختلف ہوٹل، دکانیں اور بزنس بھی مسمار کر دئیے گئے ہیں جس کی عوامی سطح پر تعریف کی جا رہی ہے لیکن کچھ حلقوں کی طرف سے بجا طور پر یہ اعتراض اور سوال بھی اٹھایا جا رہا ہے کہ جب قبضے اور تجاوزات ہو رہی ہوتی ہیں تو سرکاری مشینری کہاں غائب ہوتی ہے اور کیوں چپ رہتی ہے جسکی وجہ سے یوں نہ صرف غلط کام کی حوصلہ افزائی ہوتی ہے بلکہ مختلف وسائل بشمول وقت، محنت اور سرمائے کا ضیاع بھی ہوتا ہے جس طرف یقیناً پالیسی سازوں کو توجہ دینے کی ضرورت ہے- 

سرکاری افسران و اہلکاروں کو بھی اس بات کا ادراک ہونا بہت ضروری ہے کہ جب وہ تجاوزات ہٹانے جیسے اقدامات کرتے ہیں تو انہیں بہرحال صبر و تحمل کیساتھ متعلقہ لوگوں کے ساتھ پیش آنا چاہئے کیونکہ جب وہ لوگوں کے خلاف اقدامات کر رہے ہوتے ہیں تو انہیں متاثرہ لوگ پھولوں کے ہار تو نہیں پہنائیں گے اس لئے انہیں متعلقہ لوگوں کے خلاف قانونی طریقہ کار کے مطابق کاروائی کرتے ہوئے اخلاق کا دامن نہیں چھوڑنا چاہئے ان دنوں مختلف سوشل میڈیا کلپس میں دیکھا جا سکتا ہے کہ کیسے افسرشاہی اور سرکاری اہلکار عوام کے ساتھ انتہائی دھونس اور رعونت سے پیش آتے ہیں- تجاوزات ہٹانے کے علاوہ غلط پارکنگ پر جہاں صرف جرمانہ کرنا چاہئے وہاں لوگوں کی گاڑیوں کو نقصان پہنچایا جا رہا ہوتا ہے، کئ ایسے کلپس گردش کر رہے ہیں جن میں مختلف گاڑیوں کے ٹائر پھوڑے جا رہے ہیں جو یقیناً کچھ اچھا تاثر نہیں دیتے کہ بہرحال سرکاری محکموں کا کام قانون کے نفاذ کے ساتھ ساتھ عوام کے جان و مال کا تحفظ بھی ہے – 

جس طرح سرکاری سکولوں میں کچھ سال پہلے ”مار نہیں پیار “ کا سلوگن رائج کیا گیا تھا اور طلبإ و طالبات کو پڑھاتے ہوئے مارنے کی سختی سے ممانعت کر دی گئی ہے اسی طرح وطن عزیز کے مختلف سرکاری محکموں اور عام زندگی میں بھی ”تذلیل نہیں، حسن سلوک“ کے سلوگن کو رائج اور عام کرنے کی اشد ضرورت ہے جبکہ اس نعرے کی بنیاد پر وفاقی و صوبائی حکومتیں اور مقامی سطح پر انتظامیہ، عدلیہ، پولیس اور دیگر تمام شعبہ جات میں اصلاحات کی جانی چاہئیں ویسے بھی بطور مسلمان ہمیں حکم ہے کہ ہم دوسروں سے ہمیشہ حسن سلوک سے پیش آئیں اور دوسروں کی دل آزاری سے بچیں لیکن بدقسمتی سے ہمارے معاشرے میں بہت تیزی سے اچھی روایات اور عمدہ انسانی قدریں دم توڑتی جا رہی ہیں اور پرتشدد واقعات میں مسلسل اضافہ ہو رہا ہے- 

برطانیہ میں رہتے ہوئے ہم دیکھتے ہیں کے مختلف معاملات اور مسئلے مسائل پر جب جلسے جلوس ہوتے ہیں تو نہ صرف منظم طریقے سے اکثر لوگ اکٹھے ہوتے ہیں، اور نہ ہی کوئی پکڑ دھکڑ ہوتی ہے بلکہ بڑے بڑے مظاہرے بھی یوں ہوتے ہیں کہ لاکھوں کی تعداد میں لوگ نکلتے ہیں لیکن بامقصد اور پر امن طریقے سے لوگ اپنی بات کہتے ہیں اور پھر اپنے اپنے گھروں کو چلے جاتے ہیں- اسی طرح جب فلسطین میں غزہ کی صورتحال کے خلاف یہاں مظاہروں کا سلسلہ شروع ہوا تھا تو پولیس کو کہا گیا کہ وہ ان مظاہروں کی اجازت نہ دیں اور مظاہرین کو بزور روکا جائے لیکن پولیس نے قانونی طریقہ کار کے مطابق حکومت کو بتایا کہ وہ مظاہرین کو نہیں روکیں گے اور پھر ایسا ہی ہوا جس کی وجہ سے بغیر کسی لمبی چوڑی کشیدگی کے لوگوں نے بڑے اور بھرپور مظاہرے کئے تھے اور اپنا احتجاج ریکارڈ کروایا تھا- 

ہندوستان میں جب انگريز حکومت کر رہے تھے تو وہاں دفعہ 144 کا ایک ایسا قانون متعارف کروایا تھا کہ جو پاکستان میں اب تک لاگو ہے اور بدقسمتی سے ہر حکومت خواہ وہ آمریت ہو یا جمہوریت کی پیداوار اس دفعہ 144 کو بے دریغ استعمال کیا جاتا ہے اور اپنے مخالفین کا جی بھر کر مکو ٹھپا جاتا ہے جبکہ مختلف قوانین کا سہارا لے کر انہیں ہر ممکن حد تک دبانے کی ہر ممکن کوشش کی جاتی ہے کہ گلیاں ہو جان سنجیاں تے وچ مرزا یار پھرے کے مصداق ماحول بنے اور مخالف آوازیں کہیں بھی سنائی نہ دیں لیکن جو یہ سوچ کر اپنی گلیاں خالی کروا رہے ہوتے ہیں وقت کا پہیہ یوں چلتا ہے کہ وقت گزرنے کا احساس ہی نہیں ہوتا اور یار لوگوں کے چل چلاٶ کا وقت آ جاتا ہے اور پھر وقت کی سوئی جب الٹا چلنا شروع کرتی ہے تو وہ بھی رگڑے میں آ جاتے ہیں جو دوسروں کو رگڑے پے رگڑا دھر رگڑا لگا رہے ہوتے ہیں- 

بات یہیں پر نہیں رکتی بلکہ زبوں حال معیشت کے حامل پیارے ملک میں ایک دوسرے کے خلاف ذاتی انتقام کے لئے سرکاری وسائل کو بے دریغ استعمال کرکے ایسے ایسے مقدمات بنائے جاتے ہیں کہ سارا سسٹم کسی ایک فریق کے خلاف لٹھ لے کر چڑھ دوڑتا ہے اور یوں ریاست کے وہ ادارے جنہوں نے ملک اور عوام کو ایک پرامن، خوشگوار اور خوشحال ماحول فراہم کرنا ہوتا ہے وہ خود انتقامی کاروائیوں کی آلودگی کا شکار ہو جاتے ہیں اور گورننس کا سسٹم جو پہلے ہی گڈگورننس کے حوالے سے کوئی اچھا اور قابل تعریف معیار نہیں رکھتا مزید مسائل کا شکار ہو جاتا ہے اور جہاں سسٹم اچھے طریقے سے نہ چل رہا ہو وہاں بلاشبہ مسائل حل نہیں ہوتے بلکہ وقت کیساتھ ساتھ ان میں اضافہ ہوتا رہتا ہے جبکہ دنیا میں مسائل کو حل کیا جاتا ہے نہ کہ کسی پہلے سے موجود مسئلے میں سے مزید مسائل کشید کئے جائیں- 

یہاں برطانیہ میں لکھا ہوا آئین نہ ہونے کے باوجود آئین و قانون کی پاسداری کی جاتی ہے ایک وزیراعظم قبل ازوقت انتخابات کا اعلان کرتا ہے تو اس پر ہاہاکار نہیں مچتی، نہ ہی کوئی کورٹ کچہریوں میں جاتا ہے بلکہ تمام سیاسی جماعتیں اور سیاستدان انتخابات کی تیاریوں میں لگ جاتے ہیں اور تو اور کوئی نگران حکومت بھی معرض وجود میں نہیں آتی کیونکہ یہاں کے لوگوں کو یہاں کے سسٹم پر اعتماد ہوتا ہے اور لوگ اگر ایک دوسرے کی مخالفت بھی کرتے ہیں تو اس میں بھی شائستگی اور حسن سلوک کا دامن نہیں چھوڑا جاتا بلکہ یہاں تک کہ کوئی کسی پر بے سروپا الزامات نہیں لگا سکتا- یہاں پر ہتک عزت اور ڈیٹا پروٹیکشن ”مواد کی حفاظت“ کے بڑے سخت قوانین رائج ہیں جن پر ہر کوئی سختی سے کاربند ہے کہ یہاں بصورت دیگر دوسروں کی پگڑی اچھالنے والوں کو لینے کے دینے پڑ سکتے ہیں- 

بیوروکریسی کا جس طرح کا مضبوط، طاقتور اور اختیارات کا حامل ڈھانچہ وطن عزیز پاکستان میں موجود ہے مثلاً کمشنرز، ڈپٹی کمشنرز اور اسسٹنٹ کمشنرز پر مشتمل کوئی عہدے اور عہدیدار یہاں پر موجود ہی نہیں ہیں لیکن ہر ادارہ اپنے کام، اپنی کارکردگی اور اپنی کوتاہی کا خود ہی ذمہ دار ہے اسی طرح بیوروکریسی کا ڈھانچہ محدود اور مختصر ہے کہیں پر کوئی کھلی کچہریاں نہیں لگ رہی ہوتی ہیں، نہ ہی کوئی ون ونڈو آپریشن اور نہ ہی کوئیک ریسپانس سروس کے جھمیلے ہیں، نہ آٹے کے تھیلوں پر کسی کی تصویر اور نہ صحت کارڈ یا کسی بھی طرح کے سہولت کارڈ ہیں اور نہ ہی ان پر کسی رہنما کی تصویر بلکہ یہاں تو شہریوں کے پاس شناختی کارڈ بھی نہیں ہیں لیکن اس سب کے باوجود ہر شخص اور ہر محکمہ بشمول صحت، تعلیم، پولیس، بلدیات اور حکومت اپنے اپنے دائرہ کار میں اپنا اپنا کام کر رہے ہوتے ہیں اور اپنی کارکردگی کیلئے ہر سطح پر عوام کو اور میڈیا کو جواب دہ ہوتے ہیں جبکہ عدالتیں اور پارلیمنٹ اپنا کام کرتے ہیں اور تو اور عدالتوں میں سیاسی مقدمات نہ ہونے کے برابر ہیں جبکہ آئین اور قانون کی تشریح کے نام پر اعلیٰ عدلیہ میں سرکاری خرچے پر لمبی لمبی بیٹھکیں نہیں لگائی جاتی ہیں اور سچ پوچھیں تو عام فہم الفاظ میں نہ تو کوئی بریکنگ نیوز کی چیختی چنگھاڑتی سرخیاں اور نہ ہی شام سے رات گئے تک سیاسی پروگراموں کی بہتات ہوتی ہے بس یوں سمجھ لیں کہ آجکل کے سرد اور ٹھنڈے موسم کی طرح یہاں کا سیاسی درجہ حرارت بھی سرد ہی ہے لیکن ہر کوئی اپنے کام سے کام رکھتا ہے اور زندگی کا پہیہ رواں دواں رہتا ہے اور اسی میں انکی کامیابی ہے

Title Image by CARLOS MEDELLIN from Pixabay