بو – Smell
صفدر علی حیدری
شروع شروع میں وہ میلی کچیلی رہتی تھی۔
نہانے دھونے کی عادی نہ تھی۔ صفائی کا خاص خیال نہیں رکھتی تھی۔ کپڑے اکثر بے ترتیب، شکن زدہ اور میلے ہوتے۔ بال الجھے رہتے اور جسم سے پسینے کی ہلکی سی باس بھی آتی تھی۔
مگر اس کے شوہر نے کبھی کوئی اعتراض نہ کیا۔ نہ کبھی ٹوکا، نہ کسی شکایت کا اظہار کیا۔
پھر وقت بدلا، یا شاید وہ خود بدل گئی۔
اس نے اپنے آپ پر توجہ دینا شروع کر دی۔ روز نہانے لگی، صاف ستھرے کپڑے پہننے لگی، بال سنوارنے لگی، خوشبو بھی لگانے لگی۔
مگر جوں جوں وہ سنورتی گئی، اس کا شوہر اس سے دور ہوتا گیا۔ اب وہ اسے عجیب نظروں سے دیکھتا اور اکثر خاموش رہتا۔
ایک دن وہ آئینے کے سامنے کھڑی بال درست کر رہی تھی کہ شوہر نے اچانک کہا:
"مجھے تمہارے جسم سے بو آتی ہے۔”
وہ ٹھٹک گئی ۔
کمرے میں ایک طویل خاموشی اتر آئی۔
پھر آہستہ آہستہ جیسے کوئی بو پھیلنے لگی۔
مگر یہ طے نہ ہو سکا کہ وہ بو کس سے آ رہی تھی۔
میرا نام صفدر علی حیدری ہے ۔ پیدائش علی پور ضلع مظفر گڑھ کی ہے لیکن پلا بڑھا اوچ شریف میں ہوں اور رہائش بھی اسی شہر میں ہے ۔ایم فل اردو ہوں ایک استاد ہوں اور پچھلے تیس سال سے پڑھا رہا ہوں ۔ لکھنے کا آغاز بچپن سے کیا ۔ کالم نگاری بھی کی نامہ نگاری بھی ،پھر افسانہ نگاری اور افسانچہ نگاری کی طرف متوجہ ہوا ۔اب تک میری بارہ کتب شائع ہو چکی ہیں پچیس کتب زیر طبع ہیں شائع شدہ کتب کی تفصیل حسب ذیل ہے میری ایک کتاب کالمز پر ہے ” شہر خواب ” ایک ناول ہے ” عمران بٹہ عمران ” چار کتابیں ادب اطفال پر ہیں ” گھڑی کی ٹک ٹک ” ” ایک پہیے کی سائیکل” ” کمزور چوزا ” ” منٹو میاں ” چار افسانوں پر ہیں "مٹھی میں کائنات” ” ناقابل اشاعت ” ” من و سلویٰ ” ” الف سے یے تک ” ایک افسانچوں پر ہے ” ایک صفحے کے افسانچے ” میری تمام کتابوں پر ایم فل ، ایم اے اور بی ایس کی سطح پر کام ہو چکا ہے
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
کیا آپ بھی لکھاری ہیں؟اپنی تحریریں ہمیں بھیجیں، ہم نئے لکھنے والوں کی حوصلہ افزائی کرتے ہیں۔iattockmag@gmail.com |
