Tag: لاہور

آزادی کی پھر بھی قدر کیجے

تحریر  محمد ذیشان بٹ

الحمدللہ! ہمارا پیارا ملک پاکستان 75 برس سے زیادہ کا سفر طے کر چکا ہے۔ یہ وہ ملک ہے جو لاکھوں جانوں کی قربانی، بے شمار آنسوؤں، لہو اور دعاؤں کے بعد وجود میں آیا۔ مگر افسوس کہ آج بھی ہمارے بنیادی مسائل تقریباً وہی ہیں جو آغاز میں تھے۔ غریب غریب تر اور امیر امیر تر ہوتا جا رہا ہے۔ بے روزگاری عروج پر ہے، مہنگائی نے عوام کی کمر توڑ دی ہے، بجلی و گیس کی کمی نے زندگی اجیرن کر دی ہے، اور نوجوان اپنی صلاحیتیں لے کر بیرونِ ملک جا رہے ہیں۔ یہ سب حقائق اپنی جگہ درست ہیں، لیکن اس کا مطلب ہرگز یہ نہیں کہ ہم آزادی کی اہمیت کو بھول جائیں یا اس کی قدر کم کر دیں۔

ہمیں یہ نہیں بھولنا چاہیے کہ یہ آزادی آسانی سے نہیں ملی۔ ہمارے آباؤ اجداد نے ایسی قربانیاں دی ہیں جن کا تصور بھی آج کے دور میں مشکل ہے۔ ہجرت کے وقت ہزاروں خاندان اپنا سب کچھ چھوڑ کر محض اس امید پر پاکستان آئے کہ یہ وہ زمین ہوگی جہاں وہ اپنے دین پر آزادی سے عمل کر سکیں گے۔ لاہور، دہلی، امرتسر، لدھیانہ اور دیگر شہروں سے قافلے نکلے جن پر راستے میں حملے ہوئے، عورتوں کو بے عزت کیا گیا، بچوں کو شہید کیا گیا، مگر لوگوں نے ہار نہیں مانی۔

پنجاب کے ایک گاؤں کی تاریخ میں درج ہے کہ وہاں کی بیٹیوں نے اپنی عزت بچانے کے لیے اجتماعی طور پر کنویں میں چھلانگیں لگا دیں۔ بعض کنویں خون اور لاشوں سے بھر گئے۔ گورداسپور سے آنے والے قافلے پر حملہ ہوا تو بزرگ مردوں نے نوجوانوں کو بھاگنے کا کہا اور خود دشمن کے سامنے ڈٹ گئے تاکہ قافلہ محفوظ نکل جائے۔ کئی مائیں اپنے بچوں کو گود میں لیے شہید ہو گئیں، مگر پاکستان پہنچنے کی خواہش ان کے چہروں پر لکھی رہی۔

یہ قربانیاں محض زمین کے ٹکڑے کے لیے نہیں تھیں، بلکہ ایک نظریے کے لیے تھیں۔ "لا الٰہ الا اللہ محمد رسول اللہ ﷺ” کے نام پر بننے والے ملک میں مسلمان اپنے دین کے مطابق زندگی گزار سکیں، یہی خواب تھا۔

آج ہم پاکستان میں جتنی بھی مشکلات کا ذکر کرتے ہیں، ایک لمحے کو ذرا اُن ملکوں کی حالت دیکھیں جہاں آزادی نہیں ہے۔ پڑوسی ملک بھارت میں مسلمان اپنی شناخت بچانے کے لیے ترس رہے ہیں۔ مشہور شاعر جاوید اختر اور سیاستدان اسد الدین اویسی کو محض اس لیے پاکستان کے خلاف بیان دینا پڑتا ہے کہ وہاں رہنا آسان ہو جائے، ورنہ جان کو خطرہ لاحق ہو جائے۔ کشمیر میں بہترین سڑکیں، تعلیمی ادارے، اور انٹرنیٹ ہونے کے باوجود لوگ آزاد نہیں، اپنے دین کی بات کھل کر نہیں کر سکتے۔ فلسطین میں معصوم بچے اور عورتیں روزانہ شہید ہو رہی ہیں، اور اپنی زمین پر بھی قیدی ہیں۔ عراق، شام، لیبیا — ہر جگہ مسلمانوں پر ظلم ہورہا ہے۔

اس پس منظر میں پاکستان کی قدر خودبخود واضح ہو جاتی ہے۔ یہ وہ ملک ہے جہاں آج بھی ہم کھل کر اذان دے سکتے ہیں، قرآن پڑھ سکتے ہیں، جمعے کا خطبہ سن سکتے ہیں، اور دینی تعلیم عام کر سکتے ہیں۔ یہاں آپ کو یہ حق ہے کہ اپنی بات کہہ سکیں، اختلافِ رائے رکھ سکیں، اور اپنی مرضی کا لباس پہن سکیں۔ یہ سب آزاد فضاؤں کا تحفہ ہے، اور اس کی حفاظت ہم سب کی ذمہ داری ہے۔

ہاں، مسائل ہیں، اور بہت ہیں۔ لیکن یہ گھر ہمارا ہے۔ گھر میں چاہے بھائی بہنوں کے بیچ جھگڑے ہوں، کوئی گھر چھوڑ کر اجنبی نہیں بن جاتا۔ بلکہ سمجھدار لوگ گھر کی اصلاح کے لیے آگے بڑھتے ہیں۔ پاکستان بھی ہمارا گھر ہے، اور یہاں کی بہتری کے لیے ہمیں ہی کردار ادا کرنا ہوگا۔ حکومت سے شکوے اپنی جگہ، مگر سوال یہ ہے کہ ہم میں سے ہر شخص خود اس ملک کے لیے کیا کر رہا ہے؟

ہماری نوجوان نسل کے پاس سب سے بڑی طاقت تعلیم ہے۔ اگر آپ ڈاکٹر بن رہے ہیں تو صرف اپنے کیریئر کے لیے نہیں، بلکہ اس نیت سے بنیں کہ آپ اپنی قوم کو صحت کی بہتر سہولت فراہم کر سکیں۔ اگر انجینئر بن رہے ہیں تو پاکستان کے انفراسٹرکچر، صنعت و ٹیکنالوجی میں ترقی لانے کے لیے کام کریں۔ اگر استاد ہیں تو اپنے شاگردوں کو نہ صرف علم بلکہ شعور دیں تاکہ وہ جہالت کے اندھیروں سے نکل سکیں۔ اگر امام مسجد ہیں تو اپنی تقریروں میں اتحاد، اخلاق اور محبت کا پیغام دیں، تاکہ یہ معاشرہ نفرت سے نکل کر بھائی چارے کی طرف آ سکے۔

پاکستان کے قیام کا مقصد صرف ایک جغرافیائی ملک نہیں تھا، بلکہ ایک اسلامی فلاحی ریاست کا قیام تھا۔ اگر آج ہم محنت، ایمانداری اور اخلاص کے ساتھ اپنے حصے کا کردار ادا کریں تو یہ خواب حقیقت کا روپ دھار سکتا ہے۔ آزادی کا اصل حق تب ادا ہوگا جب ہم اس ملک کو اپنے بزرگوں کے خوابوں کا پاکستان بنا سکیں — ایک ایسا پاکستان جو دنیا میں عزت و وقار کی مثال ہو۔

لہٰذا، 14 اگست صرف جشن منانے کا دن نہیں، بلکہ عہد کرنے کا دن ہے۔ آئیں یہ عہد کریں کہ ہم اپنی صلاحیتیں، اپنی محنت، اپنا وقت، اور اپنا جذبہ اس ملک کی تعمیر و ترقی کے لیے وقف کریں گے۔ یہ ملک ہمارا ہے، اور اس کی عزت و حفاظت ہم سب کی مشترکہ ذمہ داری ہے۔

بجلی کی تقسیم کار کمپنیوں کی ناقص کارکردگی

ڈاکٹر رحمت عزیز خان چترالی٭

پاکستان  میں بجلی کی تقسیم کار کمپنیوں کی ناقص کارکردگی اور اس کے نتیجے میں پیدا ہونے والے مسائل ملک  کی معیشت پر گہرے اثرات مرتب کر رہے ہیں۔ بجلی چوری، واجبات کی عدم وصولی اور بدعنوانیوں کے مختلف پہلو ملک کی معاشی مشکلات کو مزید پیچیدہ بنا رہے ہیں۔ ان مسائل کے حل کے لیے متعدد کوششیں کی گئیں لیکن سیاسی اور بیوروکریٹک مزاحمت کی وجہ سے یہ اصلاحات اب تک مؤثر ثابت نہیں ہو سکیں جوکہ غربت کی چکی میں پسی ہوئی عوام پر  ایک بہت بڑا بوجھ ہے۔

پاکستان میں بجلی کی تقسیم کا نظام ہمیشہ سے مسائل کا شکار رہا ہے۔ 1990 کی دہائی میں بجلی کی نجکاری کے تحت تقسیم کار کمپنیوں کا شعبہ  قائم کیا گیا تاکہ بجلی کی ترسیل اور تقسیم کو بہتر بنایا جا سکے۔ تاہم  ان کمپنیوں کی ناقص کارکردگی، غیر پیشہ ورانہ رویے  اور بدعنوانی نے اس نظام کو مزید کمزور کر دیا۔ بجلی کی چوری اور بلوں کی عدم ادائیگی جیسے مسائل نے ان کمپنیوں کی کارکردگی کو بری طرح متاثر کیا۔

وفاقی حکومت نے چھ ماہ قبل ایک مؤثر حکمت عملی تیار کی جس کا مقصد بجلی کی تقسیم کار کمپنیوں  میں اصلاحات لانا تھا۔ اس حکمت عملی کے تحت ملتان اور سکھر سے آغاز کرتے ہوئے انٹیلی جنس، انویسٹی گیشن  اور قانون نافذ کرنے والے اداروں کے افسران کو تعینات کیا گیا۔ اس اقدام کا مقصد بدعنوانی کو ختم کرنا اور واجبات کی وصولی کو یقینی بنانا تھا۔ لاہور اور کوئٹہ میں بھی اس حکمت عملی کے مثبت نتائج سامنے آئے  لیکن سکھر الیکٹرک پاور کمپنی (سیپکو) میں اس فیصلے کے نفاذ میں بڑی رکاوٹیں درپیش رہیں۔

سیپکو کے حوالے سے وفاقی حکومت کو طویل سیاسی اور غیر سیاسی مزاحمت کا سامنا کرنا پڑا۔ تاہم  حالیہ دنوں میں حکومت نے سکھر میں بھی اصلاحات کے نفاذ کا سلسلہ شروع کر دیا ہے۔ ایک جاری کردہ اعلامیہ کے مطابق سیپکو کے سی ای او اور سول آرمڈ فورسز کے سیکٹر کمانڈر کو اہم ذمہ داریاں سونپی گئی ہیں۔ اس کے علاوہ، فیڈرل انویسٹی گیشن ایجنسی (ایف آئی اے)، ملٹری انٹیلی جنس (ایم آئی)  اور انٹر سروسز انٹیلی جنس (آئی ایس آئی) کے افسران کو ڈی ایس یو کے ممبران کے طور پر شامل کیا گیا ہے۔

ملتان اور لاہور میں اس حکمت عملی کے تحت حوصلہ افزا نتائج سامنے آئے ہیں۔ واجبات کی وصولی میں بہتری، بجلی چوری کی روک تھام  اور بدعنوانی کے خاتمے میں نمایاں کامیابیاں حاصل ہوئیں۔ کوئٹہ میں بھی اس اقدام کے مثبت اثرات دیکھنے کو ملے ہیں۔ ان کامیابیوں کو مدنظر رکھتے ہوئے سکھر میں بھی ان اصلاحات کو نافذ کرنے کا فیصلہ کیا گیا ہے۔

بجلی کے نظام کی درستگی اور معیشت کی بہتری کے لیے وفاقی حکومت کی کوششیں قابل ستائش ہیں  لیکن یہ مسئلہ صرف وفاقی سطح پر حل نہیں ہو سکتا۔ سندھ کی تمام بجلی کی تقسیم کار کمپنیوں میں بدعنوانی ختم کرنے کے لیے صوبائی حکومت کو بھی بھرپور کردار ادا کرنا ہوگا۔ یہ ضروری ہے کہ صوبائی حکومت وفاقی اقدامات کی حمایت کرے اور ان کے نفاذ کو یقینی بنائے۔

سیاسی اثر و رسوخ کے باعث اصلاحات کے نفاذ میں رکاوٹیں پیدا ہوتی ہیں۔ حکومت کو چاہیے کہ وہ اس معاملے میں غیر جانبدارانہ رویہ اپنائے اور تمام اسٹیک ہولڈرز کو اعتماد میں لے۔

بدعنوانی کے خاتمے کے لیے سخت قوانین اور ان کے مؤثر نفاذ کی ضرورت ہے۔ احتساب کے عمل کو مزید مضبوط بنایا جائے تاکہ بدعنوان عناصر کو انصاف کے کٹہرے میں لایا جا سکے۔

بجلی چوری اور بلوں کی عدم ادائیگی کے مسائل کو حل کرنے کے لیے عوام میں شعور بیدار کرنا ضروری ہے۔ میڈیا اور سماجی تنظیموں کے ذریعے عوام کو اس بات کا احساس دلایا جائے کہ یہ مسائل قومی معیشت کو نقصان پہنچا رہے ہیں۔

بجلی کی تقسیم کے نظام میں جدید ٹیکنالوجی کا استعمال کرکے چوری اور دیگر مسائل کو کم کیا جا سکتا ہے۔ اسمارٹ میٹرز اور خودکار نظام کے ذریعے بجلی کی ترسیل اور تقسیم کو بہتر بنایا جا سکتا ہے۔

بجلی کی تقسیم کار کمپنیوں کی ناقص کارکردگی اور بدعنوانی کے مسائل پاکستان کی معیشت کے لیے ایک بڑا چیلنج ہیں۔ اگرچہ وفاقی حکومت کی حالیہ کوششیں اصلاحات کی جانب ایک مثبت قدم ہیں لیکن ان کو کامیاب بنانے کے لیے سیاسی اور بیوروکریٹک مزاحمت کو ختم کرنا ہوگا۔ صوبائی حکومتوں اور عوام کا تعاون بھی ان مسائل کے حل کے لیے ناگزیر ہے۔ اگر ان اصلاحات کو مؤثر طریقے سے نافذ کیا جائے تو یہ نہ صرف بجلی کے نظام کو بہتر بنائے گا بلکہ ملکی معیشت کو بھی مستحکم کرے گا۔

لندن سے لاہور تک: کسانوں پر ٹیکسز کا نفاذ

تحریر: عبدالوحید خان، برمنگھم (یوکے)
پوری دنیا میں ایک طرف جہاں موسمیاتی تبدیلیوں کی وجہ سے ہر خاص و عام، چرند پرند، حیوانات، حشرات، نباتات اور انسان تیزی سے متاثر ہو رہے ہیں وہیں پر نیچرل انوائرمنٹ یعنی قدرتی ماحول کے حوالے سے ایک اہم اور بنیادی اکائی ”شعبہ زراعت“ اور اس سے متعلقہ کاشتکار اور کسان جو قدرتی ماحولیات کے غیر اعلانیہ محافظ اور نگہبان کا کردار ادا کرتے چلے آ رہے ہیں کو حکومتوں کیطرف سے سہارا دینے کی بجاۓ ان پر لندن سے لاہور تک نہ صرف ٹیکس لگانے کی باتیں ہو رہی ہیں بلکہ جنوری 2025 سے پاکستان کے سب سے بڑے صوبے پنجاب میں اور اپریل 2026 سے برطانیہ میں کسانوں کو مزید ٹیکس دینا پڑے گا-

موسمیاتی تبدیلیوں کے حوالے سے کام کرنے والی بڑی بڑی آرگنائزیشنز دنیا بھر کے مختلف ممالک میں بڑے بڑے عالی شان ہوٹلوں میں تقریبات اور کانفرنسز کے انعقاد پر اپنے بجٹ کا بڑا حصہ خرچ کر کے اس بات پر زور دیتی ہیں کہ معاشرے کو دن بدن بڑھتی گیسز کے اخراج اور انرجی کے مضرصحت اثرات سے کیسے بچانا ہے، آلودگی کو کیسے کم کرنا ہے اور موسمیاتی تبدیلیوں اور گلوبل وارمنگ کا کیسے مقابلہ کرنا ہے تاکہ اس کرہ ارض کو بچایا جا سکے لیکن اکثر ایسے پراجیکٹ اور منصوبے بناۓ جاتے ہیں کہ براہ راست کسان کو ان میں شامل نہیں کیا جاتا مثلاً کہا جاتا ہے کہ گلوبل وارمنگ یعنی عالمی تپش کو کم کرنے کیلئے شجرکاری کا عمل سب سے بہترین ہے اور اس مقصد کے لۓ اگر درخت لگانے ہیں تو براہ راست کسانوں کی مدد کر کے اس کو کامیاب کیا جا سکتا ہے کیونکہ کسان ہی ہیں جو تیزی سے بڑھتی ان تبدیلیوں سے متاثر ہونے کے باوجود انکے آگے ابھی تک ایک طرح سے بند باندھے کھڑے ہیں- اگرچہ تیزی سے رونما ہوتی ان موسمیاتی تبدیلیوں کے اسباب پیدا کرنے میں تو کسانوں کا حصہ کم ہے لیکن متاثرین میں وہ سب سے سے آگے ہونے کے باوجود براہ راست کسی قسم کی امداد سے محروم ہیں-
چاہئے تو یہ تھا کہ پاکستان میں زرعی زمینوں پر سیمنٹ، ریت، بجری اور سریے کے پہاڑ کھڑے کرنے والوں پر کوئی قدغن لگتی، قدرتی پہاڑوں، درختوں، ندی نالوں، آبشاروں کو کاٹ کھانے والوں پر پابندی نافذ ہوتی لیکن قدرتی وسائل کو تیزی سے ختم کرنے والوں پر تو کوئی خاص قدغن نہیں لیکن مغرب سے مشرق تک کسان نشانے پر ہیں جسکی واضح مثال برطانوی دارالحکومت لندن اور وطن عزیز پاکستان کے سب سے بڑے صوبہ پنجاب جو زراعت کے حوالے سے نہ صرف ایک خوبصورت ماضی کا حامل ہے بلکہ اس وقت بھی پورے ملک کو اجناس اور غلے کی فراہمی میں صفِ اول کا کردار ادا کر رہا ہے کے دارالحکومت لاہور میں کسانوں پر ٹیکس لگانے کے قوانین منظور کۓ گۓ ہیں جنہوں نے کسانوں کو احتجاج پر مجبور کر دیا ہے-
ماہِ نومبر میں لاہور شہر میں تو سموک اور فوگ کے مرکب ”سموگ“ کے ڈیرے تھے جس میں خوش آئند طور پر بتدریج کمی واقع ہوئی ہے لیکن سرمایہ دارانہ نظام نے اِس کا بھی سارا الزام کسانوں پر ہی دھرا کہ وہ اپنی فصلوں کی باقیات کو آگ جلا کر سموگ پیدا کرنے کے موجب ہیں جبکہ حقیقتاً فصلوں کی باقیات کی شرح ٹرانسپورٹ کے دھوئیں سے پھیلنے والی آلودگی سے بہت کم ہے-
پنجاب اسمبلی میں ایگریکلچرل انکم ٹیکس ایکٹ 1997 میں ترامیم اور کچھ نئی شقوں کے اضافے کے بعد ایگریکلچر انکم ٹیکس بل 2024 منظور کیا جا چکا ہے جسکے مطابق کسانوں پر دو طرح کے زرعی ٹیکس کا نفاذ کیا گیا ہے اور اس کو ”سپر ٹیکس“ کا نام دیا گیا ہے شاید اس ٹیکس کو سپر کا نام دینے کی وجہ یہ ہو کہ جب باقی چیزیں تنزلی کی طرف رواں دواں ہوں تو پھر ٹیکس ہی سپر رہ جاتا ہے جو عوام سے بزور وصول کر کے اپنی راجدھانی کو قائم رکھنے اور اس کو چلانے کے لۓ اور نظام کار چلانے والوں کے لۓ بیش بہا اخراجات پورے کۓ جاتے ہیں-
زرعی ٹیکس کو دو حصوں آمدن یا ایکڑ کے حساب سے جنوری 2025 سے وصول کرنے کا منصوبہ ہے جس کے مطابق چھ لاکھ روپے سالانہ آمدن والے کسان پر کوئی ٹیکس لاگو نہیں ہو گا جب کہ چھ لاکھ سے 12 لاکھ سالانہ آمدن پر چھ لاکھ کا 15 فی صد سالانہ، 12 لاکھ سے 16 لاکھ روپے پر 20 فی صد، 16 لاکھ سے 32 لاکھ تک 30 فی صد اور 32 لاکھ سے 56 لاکھ روپے تک سالانہ آمدن پر 40 فی صد کے حساب سے سالانہ ٹیکس وصول کیا جائے گا یہاں پر منافع کا ذکر نہیں ہے بلکہ حیران کن طور پر صرف آمدن کا ذکر ہے جس میں اخراجات پر سے صَرفِ نظر کیا گیا ہے جو نہیں ہونا چاہیے کہ پاکستان میں زرعی اخراجات پہلے ہی کسان کی پہنچ سے باہر ہو چکے ہیں اور اس ٹیکس کا نفاذ کسان کے ساتھ سراسر زیادتی اور زراعت دشمنی ہے- اسی طرح ایکڑ کے حساب سے ساڑھے بارہ ایکڑ تک زمین سے اوپر یعنی ساڑھے بارہ سے 25 ایکڑ زمین تک زمیندار کو 3900 روپے سے 7500 روپے، 25 سے 50 ایکڑ پر دس ہزار سے 20 ہزار روپے، 50 ایکڑ سے زیادہ رقبے والے زمیندار سے 25 ہزار روپے سالانہ ٹیکس وصول کیا جائے گا جبکہ لائیو سٹاک یعنی جانوروں پر اور پھلوں کے درختوں کے باغات پر الگ سے ٹیکس ہونگے جن پر کسانوں کی تنظیموں نے اخباری بیانات اور میڈیا ٹاک کی حد تک اظہار ناراضگی کیا اور ٹیکس واپس نہ ہونے کی صورت میں باقاعدہ احتجاج کے اعلانات کۓ تھے-
اسی طرح پاکستان سے ہزاروں میل دُور برطانیہ میں لیبر پارٹی کی حکومت نے پارلیمنٹ سے منظوری کے بعد کسانوں پر ”وراثتی ٹیکس“ نافذ کر دیا ہے جس پر یہاں کے کسانوں نے ماہِ نومبر میں ہی لندن کے یخ بستہ موسم میں باقاعدہ اپنے ٹریکٹرز لیکر پارلیمنٹ کے سامنے بھرپو احتجاج کیا تھا جہاں انکے بچے بھی اپنے کھلونے ٹریکٹرز لیکر احتجاج میں شامل ہوۓ تھے تاہم لیبر پارٹی کی حکومت نے اس ٹیکس کو واپس لینے سے انکار کرتے ہوۓ کہا ہے کہ ٹیکس وصولی اور عوام کو سہولیات کی فراہمی پر خرچ ہونے والی رقم میں جو خساره ہے اس کو اس ٹیکس سے پورا کیا جاۓ گا-
کسانوں کی نمائندہ تنظیم ”نیشنل فارمرز یونین“ اپنے احتجاج کے ذریعے وراثتی ٹیکس کے خاتمے کا مطالبہ کر رہی ہے انہوں نے 19 دسمبر کو بینر ڈے کے طور پر منایا تھا اور فیملی ٹیکس کے خاتمے کے مطالبے پر مبنی ملک بھر میں دیہی علاقوں میں بینر لگاۓ گۓ ہیں جبکہ اس سے پہلے ماہ دسمبر میں ہی لندن سمیت مختلف شہروں میں باقاعدہ احتجاج اور سیمینارز بھی کۓ گۓ ہیں اور اب 25 جنوری کو ملک بھر میں تمام کسانوں کا متحد ہو کر احتجاج کا پروگرام ہے-
زرعی وراثتی ٹیکس جسے کسان اور انکی تنظیمیں اب فیملی ٹیکس کا نام دے رہے ہیں کے خاتمے کے مطالبے کی اقتدار سے الگ ہونے والی کنزرویٹو پارٹی اور لبرل ڈیموکریٹک پارٹی بھی حمایت کر رہی ہیں- کنزرویٹو پارٹی کی نئی سربراه کیمی بیڈینوچ نے ماہ نومبر کے لندن مظاہرے میں شامل ہو کر نہ صرف بلند آواز میں پرجوش نعرے لگواۓ تھے بلکہ اس ٹیکس کو "فیملی فارمز ٹیکس” کا نام دیا تھا، انہوں نے اسے ظالمانہ ٹیکس قرار دیتے ہوۓ برسراقتدار آ کر اس کو ختم کرنے کا وعدہ بھی کیا اور کہا کہ یہ ٹیکس اور اس ٹیکس کا نفاذ کرنے والے اس ملک سے "کھیتی باڑی کو تباہ کرنا چاہتے ہیں لیکن ہم ایسا ہونے نہیں دیں گے”۔
لبرل ڈیموکریٹس نے بھی اس ٹیکس پر تنقید کی ہے اور حکومت کی اس توجیح کو "کچرہ“ کہا ہے کہ اس سے صرف 500 امیر ترین کسانوں کی جائیدادیں متاثر ہوں گی۔ پارٹی کے ماحولیات کے ترجمان ٹم فیرون کا کہنا ہے کہ وراثتی ٹیکس کی ادائیگی کرنے کا واحد طریقہ کسانوں کے لۓ فارم سے چھٹکارا حاصل کرنا ہے یعنی اپنے زرعی فارم کو بیچ کر ٹیکس ادا کر دیں اور یوں کارپوریٹ سیکٹر انہیں خرید لیں گے۔
برسر اقتدار لیبر پارٹی کے لیڈر اور موجودہ حکومت کے وزیراعظم سر کئیر سٹارمر بھی اپنے ٹیکس اقدام کا دفاع کرتے ہوۓ کہہ رہے ہیں کہ اس وراثتی ٹیکس سے صرف پانچ سو بڑے کسان متاثر ہونگے جبکہ چھوٹے کسانوں کو زیادہ فرق نہیں پڑے گا لیکن کسان یہ ماننے کو تیار نہیں ہیں اور وراثتی ٹیکس کو واپس لینے کا پرزور مطالبہ کر رہے ہیں-
نیشنل فارمرز یونین (NFU) اور کنٹری لینڈ اینڈ بزنس ایسوسی ایشن (CLA) کا اندازہ ہے کہ ایک ملین پونڈ سے زیادہ مالیت کے ستر ھزار فارمز متاثر ہو سکتے ہیں۔
نئے قوانین کے تحت ایک ملین پاؤنڈ سے زیادہ مالیت کا فارم وراثت میں حاصل کرنے والے کو 20 فیصد وراثتی ٹیکس دینا پڑے گا۔ کسانوں کا کہنا ہے کہ اگرچہ ان کی زمینیں اور زرعی آلات قیمتی ہیں، لیکن منافع کا اصل مارجن کم ہے، یعنی ان کے بچوں کو ٹیکس ادا کرنے کے لیے زمین بیچنی پڑ سکتی ہے۔

اس ٹیکس کو واپس لینے کیلئے ایک پٹیشن بھی سائن کی جا رہی ہے جس پر اڑھائی لاکھ سے زیادہ برطانوی دستخط کر چکے ہیں جبکہ کسانوں کے خدشات ہیں کہ وراثتی فارم کی ملکیت جب متوفی سے اس کے جائز ورثا کو منتقل کی جاۓ گی تو انہیں بھاری رقوم بطور ٹیکس دینا پڑیں گی جو سراسر زیادتی ہے اور فارمنگ کو ختم کرنے کے مترادف ہے کیونکہ کسان اور انکی فیملیز تو پہلے ہی کیش کی کمی کا شکار ہوتے ہیں تو سوال پیدا ہوتا ہے کہ کیا اب کسان اپنی زرعی مشینری اور زمینیں بیچ کر ٹیکس دیں گے- (ختم شد)

جیل اصلاحات:لاہور ہائیکورٹ کا تاریخی فیصلہ

ڈاکٹر رحمت عزیز خان چترالی*

ایک بہت ہی اچھی عدالتی خبر ہے کہ لاہور ہائیکورٹ نے اپنے حالیہ فیصلے میں پنجاب کی جیلوں کے نظام فیصلہ جاری کیا ہے جس سے میں جیل خانہ جات میں اصلاحات کرنے کا ایک نیا باب کھل گیا ہے۔ اس فیصلے میں قیدیوں کے بنیادی حقوق کے تحفظ، خواتین قیدیوں کے لیے الگ جیلوں کے قیام، اور ذہنی امراض میں مبتلا قیدیوں کے علاج و معالجے کو یقینی بنانے جیسے اہم نکات شامل ہیں۔ یہ فیصلہ نہ صرف جیلوں کے نظام کو بہتر بنانے کی طرف ایک اہم قدم ہوگا بلکہ انسانی حقوق کے تحفظ اور قیدیوں کی بحالی کے لیے ایک جامع حکمت عملی بھی فراہم کرے گا۔

فیصلے میں لاہور، راولپنڈی، اور فیصل آباد میں خواتین قیدیوں کے لیے الگ جیلوں کے قیام کی ہدایت دی گئی ہے۔ یہ اقدام خواتین قیدیوں کے بنیادی حقوق کے تحفظ کو یقینی بنانے کے لیے نہایت اہم ہے۔ موجودہ نظام میں خواتین قیدیوں کو مرد قیدیوں کے ساتھ مشترکہ جیلوں میں رکھا جاتا تھا جس سے ان کے لیے کئی مشکلات پیدا ہوتی تھیں۔ الگ جیلوں کا قیام ان کے لیے محفوظ اور بہتر ماحول فراہم کرے گا۔

عدالتی فیصلے میں یہ بھی کہا گیا ہے کہ لمبے عرصے تک قید میں رہنے والے قیدیوں کو دوبارہ معاشرے کا مہذب شہری بنانے کے لیے اقدامات کیے جائیں۔ یہ نکتہ جیل کے روایتی تصور کو چیلنج کرتا ہے اور قیدیوں کی بحالی اور معاشرتی انضمام کی اہمیت کو اجاگر کرتا ہے۔ اس مقصد کے لیے تربیتی پروگرامز، تعلیمی مواقع، اور نفسیاتی مدد فراہم کی جا سکتی ہے۔

فیصلے میں اوپن جیلز کے قیام کی تجویز دی گئی ہے، جہاں کم سکیورٹی کے ساتھ قیدیوں کو رکھا جائے گا۔ یہ نظام قیدیوں کی بحالی کے لیے ایک جدید تصور ہوگا جو انہیں ذمہ داری اور خود انحصاری کا احساس دلانے میں مددگار ثابت ہو سکتا ہے۔

ذہنی امراض میں مبتلا قیدیوں کے لیے خصوصی وارڈز کی تعمیر اور ان کے علاج و معالجے کے لیے پنجاب انسٹی ٹیوٹ آف مینٹل ہیلتھ میں منتقلی کی ہدایت دی گئی ہے۔ یہ اقدام ذہنی صحت کے مسائل کو جیلوں کے نظام میں ایک اہم مسئلے کے طور پر تسلیم کرنے کی طرف اشارہ کرتا ہے۔ ملتان اور راولپنڈی جیلوں میں قیدیوں کے علاج کو یقینی بنانا بھی اس فیصلے کا حصہ ہے۔

فیصلے میں راولپنڈی جیل میں اسلام آباد کے 3200 قیدیوں کی موجودگی کو ایک اہم مسئلہ قرار دیا گیا ہے اور اسلام آباد میں جیل کے قیام کی تجویز دی گئی ہے۔ یہ اقدام نہ صرف راولپنڈی جیل کے رش کو کم کرے گا بلکہ قیدیوں کے لیے بہتر سہولیات فراہم کرنے میں بھی مددگار ثابت ہوگا۔

حکومت پنجاب کو پروبیشن آفیسرز کی تربیت پر کام کرنے کی ہدایت دی گئی ہے تاکہ وہ قیدیوں کی بحالی اور ان کے مسائل کے حل میں مؤثر کردار ادا کر سکیں۔ یہ تربیت خاص طور پر ذہنی امراض، منشیات کی لت، اور دیگر پیچیدہ مسائل سے نمٹنے کے لیے ضروری ہے۔

خلاصہ کلام یہ ہے کہ لاہور ہائیکورٹ کا یہ فیصلہ انسانی حقوق کے تحفظ اور جیلوں کے نظام میں اصلاحات کے حوالے سے ایک اہم پیش رفت ہے۔ اس فیصلے پر عمل درآمد سے نہ صرف قیدیوں کی زندگیوں میں بہتری آئے گی بلکہ معاشرے میں جرائم کی شرح کو کم کرنے اور قیدیوں کو کارآمد شہری بنانے میں بھی مدد ملے گی۔ یہ فیصلہ ایک ایسا ماڈل فراہم کرتا ہے جسے دیگر صوبے بھی اپنا سکتے ہیں۔

_{Title Image by Booth Kates from Pixabay}