Tag: بھکر

جاوید عباس جاوید : روشن چراغ

تحریر : مقبول ذکی مقبول ، بھکر

جاوید عباس جاوید : ضلع بھکر میں اُردو شعر و ادب کا روشن چراغ ہیں ۔
جاوید عباس جاوید بھکر شہر کے باسی ہیں اور اُردو شعری و نثری حوالوں سے پہچانے جاتے ہیں ۔ وہ اُردو زبان و ادب ، شاعری اور ثقافت کے حوالے سے اپنی ذات میں ایک مکمل حوالہ اور ادارہ ہیں ۔ شعر و ادب کے لیے ان کی خدمات بہت قیمتی اور لازوال ہیں ۔جاوید عباس کے والد غلام محمد متین کوٹلہ جامی ایک کہنہ مشق اُردو شاعر اور نثر نگار تھے ۔جاوید نے اپنے والدِ مرحوم کی تقلید میں اُردو شاعری اور نثرنگاری کو اپنا مشغلہ بنایا اور بچپن سے ہی شاعری اور نثر نگاری میں سکون محسوس کیا ۔ جس کا نتیجہ یہ نکلا کہ وہ محکمہ تعلیم میں بطورِ پرائمری مدرس بھرتی ہوئے اور اپنے شعری ذوق و شوق کی وجہ سے ترقی کرتے کرتے اُردو کے ایسوسی ایٹ پروفیسر بن گئے اور اسی عہدے سے گورنمنٹ کامرس کالج جھنگ سے ریٹائر ہوئے ۔ انھوں نے شعر و ادب کی دُنیا میں اپنی پہچان کرائی ۔ یہی پہچان آپ کا وسیلہِ روزگار بھی بن گئی اور آپ کی ذات میں چھپی ہوئی خوبیوں کو اجاگر بھی کر دیا ۔
جاوید نے بسلسلہِ ملازمت 2006ء میں ہمارے شہر منکیرہ میں سینئرانسٹرکٹر اُردو کے عہدے پر تعینات ہوئے ۔ وہ بھکر سے روزانہ منکیرہ آتے تھے اور کالج ٹائم کے بعد واپس جاتے تھے ۔ اُن دنوں میرا تعلق اُردو ادب کے سلسلے میں مرحوم علی شاہ کے ساتھ تھا ۔ میں علی شاہ ( مرحوم ) اور بلال مہدی ( مرحوم ) کے ہمراہ کامرس کالج بھکر میں گیا ۔جہاں میری اُن سے پہلی ملاقات ہوئی ۔ پھر اُن سے اکثر منکیرہ کے بس اسٹاپ پر ملاقات ہوتی رہتی تھی ۔ جہاں علی شاہ ( مرحوم ) بھی موجود ہوتے تھے ۔ چائے کی چُسکیوں کے ساتھ ادبی موضوعات پرباتیں ہوتیں اور گپ شپ بھی ہوتی تھی ۔ جاوید عباس جاوید کی ذات سادگی ، خلوص اور سچائی کا ایک مکمل نمونہ ہے ۔ اُن میں کوئی فخر ، بڑائی ، خود سرائی اور خوشامد پسندی کا جذبہ نہیں ہے ۔ سچی اور پرخلوص باتیں کرنا اُن کی شناخت ہے اور اپنی ذات میں موجود فنی خوبیوں اور دیگر اوصاف کے اظہار میں انھوں نے کبھی نہ حسد کیا ہے ، نہ تکبر کیا ہے اور نہ کبھی کسی سے اپنا مقابلہ یا موازنہ کیا ہے ۔ اُن کی ذات میں علم وآگہی کے جو دریا موجود ہیں اُن کے نمایاں کرنے میں وہ کبھی شوق نہیں رکھتے تھے ۔ دوسروں کا کلام اور باتیں بڑے شوق سے سنتے ہیں لیکن اپنی ذات اور فن کے اظہار کرنے میں وہ اکثرکسرِ نفسی سے کام لیتے ہیں ۔
جاوید نے بتایا کہ انھوں نے نثر لکھنے سے ابتدا کی تھی ۔ 1974 ء جب وہ کلورکوٹ ہائی سکول میں نویں جماعت میں پڑھتے تھے تو اُن کے لکھے ہوئے نثری کہانی نما افسانے لاہور سے شائع ہونے والے بچوں کے معروف رسالے ٫٫ کھلونا ،، میں چھپتی تھیں اور اُس وقت کے معروف اخبار ٫٫ امروز ،، کے بچوں کے ایڈیشن ٫٫ بچوں کی دنیا ،، میں اُن کی نظمیں اور مختصر تحریریں چھپتی تھیں ۔ ٫٫ امروز ،، اخبار میں اُن دنوں منو بھائی کا کالم چھپتا تھا ۔جس کا نام ٫٫ گریبان ،، تھا اور اس کالم میں اکثر منو بھائی کلورکوٹ کی اپنی یادوں کا ذکر کیا کرتے تھے ۔ جاوید کا بچپن اور جوانی کا ابتدائی حصّہ کلورکوٹ میں گزرا ہے ۔ جہاں اُن کے والد متین کوٹلہ جامی مارکیٹ کمیٹی کے سیکریٹری تھے ۔ چنانچہ جاوید عباس بھی اکثر کلورکوٹ کی یادوں کا ذکر کرتے رہتے ہیں ۔
جاوید بتاتے ہیں کہ :
٫٫ میرے والد گرامی اکثر اُردو ادب اور شاعری کی باتیں کرتے تھے اور ہم بہن بھائیوں میں بھی یہ عادت سرائیت کر گئی اور یوں ہم بھی اُردوشاعری اور نثر کی طرف راغب ہوئے ۔ غالباً 1971 – 1972ء کی بات ہے جب محلہ جھرولی کلورکوٹ میں ان کا گھر تھا اور ان کے بڑے بھائی اظہار الحسن المعروف حسن رضا نے کلورکوٹ کے ادب شناس ادیبوں لوگوں کے ساتھ مل کر وہاں اُردو کی پہلی انجمن بنائی ۔جس کا نام ٫٫ انجمن اسرارِ ادب ،، تھا ۔ اِس انجمن کے زیرِ انتظام ان کی بیٹھک میں تین مشاعرے ہوئے تھے ۔ جن میں کلورکوٹ کے شاعروں میں سے عبدالکریم مستانہ ، حمید اختر کاشف ، شبیر اختر ، لطیف عابدی ، تقی شاہ راغب ، اشک پٹیالوی ، ماسٹر عبدالعزیز آصف ، کرم حیدر بے کس ، غلام محمد تقی اور رانا جمیل و دیگر شعراء شریک ہوتے تھے ۔ اِس انجمن کے سرپرست رانا نذر محمد خان شمیم تھے ۔ ان مشاعروں میں دریا خان سے عابد سیمابی ، انجم عابدی ، قاضی اشتیاق اسیر جیسے شاعر بھی مدعو کیے گئے تھے ۔ اس انجمن کے زیرِ اہتمام دو کتابچے شائع ہوئے جو کلورکوٹ ( بھکر ) میں اُردو ادب پہلی تحریک تھی ۔ اس رسالے کا نام ٫٫ اسرارِ ادب ،، تھا اور اس کے دو ایڈیشن شائع ہوئے تھے ۔ اُن دنوں ڈیرہ اسماعیل جاکر اشک پٹیالوی یہ رسائل چھپوا کر آتے تھے ۔

کلورکوٹ کی اور بھی دیگر اہم باتیں وہ سناتے رہتے تھے ۔ بعد ازاں اُن کے تنقیدی مضامین ٫٫ ماہِ نو ،، لاہور ، ٫٫ تخلیق ،، لاہور ، ماہنامہ ٫٫ ارژنگ،، ،٫٫ طلوعِ اشک ،، لاہور ، ٫٫ اسالیب ،، سرگودھا ، ٫٫ نظریہِ پاکستان ،، لاہور اور ٫٫ حقیقت ،، بہاولپور میں شائع ہوتے رہے ۔ اس کے علاوہ انھوں نے بھکر سے شائع ہونے والے تمام مقامی اخبارات میں کالم نگاری کی ہے ۔ جس کا ریکارڈ اُن کے پاس محفوظ ہے ۔ بھکر کامرس کالج میں 1991ء میں انھوں نے پہلا میگزین ٫٫ الفلاح ،، کے نا م سے 1991ء میں شائع کیا اور یہ میگزین نوسال تک شائع ہوتا رہا ۔ بعد میں اس کا نام ٫٫ سرمایہ ،، رکھ دیا گیا ۔ اس رسالے کی معاونت میں ان کے ساتھ سعید عاصم اور قلبِ عباس بھی شامل تھے جوان دنوں کامرس کالج میں پڑھاتے تھے ۔ انھوں نے دیگر کامرس کالجزکے رسائل میں بھی شاعری اور مضامین شائع کیے ہیں ۔ ان کے بڑے بھائی ظفر عباس بھکر کے معروف شاعر ہیں ۔ ان کی چار شعری تصانیف شائع ہوچکی ہیں ۔انھیں شاعرِ ہفت بھی کہاجاتا ہے ۔ انھوں نے اُردو کے شاعری ساتھ ساتھ فارسی میں بھی شاعری کی جو ایرانی رسائل میں شائع ہوتی رہتی ہے ۔ اس طرح ان کا گھرانہ بھکر کے ادبی گھرانوں میں سرفہرست ہے ۔ ان کے تنقیدی مضامین بہت سی کتابوں میں شائع ہوئے ہیں ۔جن کے تذکرے کے لیے ایک الگ موضوع درکار ہے اور وہ بھکر کے نثرنگاروں میں کلیدی اہمیت کے حامل ہیں ۔ آپ کا ایم ۔ فل ( اُردو ) کا مقالہ بعنوان ٫٫ بھکر کے غزل گوشعراء 1947ء تا 2003 ء ،، ایک بہت نادر تحقیقی دستاویز ہے ۔جس سے بھکر کے شعر و ادب کے دلدادہ اور محققین بھرپور استفادہ کرتے ہیں ۔
2022ء میں اُن کا مجموعہِ کلام ٫٫ راستے آساں ہوئے ،، شائع ہوا ۔ اس میں حمد ، نعت ، مرثیہ ، نظمیں
( آزادوپابند ) ، قطعات اور 100 غزلیات ہیں ۔ وہ بھکر کے اکثر مشاعروں اور ادبی محفلوں میں شرکت کرتے رہے ہیں ۔ ان کے شاگردوں کی ایک کثیر تعداد موجود ہے جوان کی قدر جانتے ہیں اور آج بھی ان سے کسبِ فیض کرتے ہیں ۔ ان کی محفل علم و ادب کے متلاشیوں کے لیے ہمہ وقت حاضر ہے اور وہ یہ فریضہ بڑی خوشی اور توجہ سے کرتے ہیں ۔ان کے شاگردوں کے علاوہ ادبی محققین کی بڑی تعداد ان کے پاس اصلاح و مشاورت کے لیے آتے ہیں اور وہ ایم ۔ فل اور پی ۔ ایچ ۔ڈی سطح مقالہ جات کی تکمیل کے ساتھ اشعار کی اصلاح ، نثر نگاری کے عوامل اور ادبی معاملات میں رہنمائی کر کے خوشی محسوس کر تے ہیں ۔ اُن سے میری کافی عرصہ رفاقت رہی اور میں ان کے شاگردوں میں اپنا شمار کرنا اعزاز سمجھتا ہوں ۔ علاوہ ازیں بھکر کے نوجوان شعرا ء میں سے صفدر کربلائی ، مظہر مونس ، سعید عاصم ، شاہد بلال حسرت کاشمار بھی ان کے شاگردوں میں ہوتا ہے ۔
جہاں تک پروفیسر جاوید عباس جاوید کے نظریات اور ان کی شاعری کے موضوعات کا تعلق ہے ، میں نے یہ دیکھا ہے کہ ان کے کلام میں ایک تو اللّٰہ تعالیٰ کی ذات اور توحید کا بڑا ذکر ہے ۔ وہ یہ باتیں کر کے بہت خوش ہوتے ہیں ۔ وہ اپنے خُدا پر کامل یقین رکھتے ہیں ۔توحید ان کا پسندیدہ موضوع ہے ۔ ان کا کلام متنوع موضوعات کا احاطہ کرتا ہے ۔انھوں نے نظم ونثر کی کئی اصناف میں اسپِ قلم کے جوہر دکھائے ہیں ۔ بلاتشکیک جاوید عباس ایک مہان شاعر ، نفیس نثرنگار اور شفیق استاد کے تمام خصائل سے مالا مال ہیں ۔توحید پر ان کے یقینِ کامل کے تناظر میں اشعار ملاحظہ فرمائیں :

جاوید وقفِ سجدہ تھی واحد خُدا کی ذات
یہ کیا ہوا کہ سینکڑوں مسجود ہو گئے
——–٭———
میرے سچے خُدا کہاں ہے تُو
ناخداؤں میں پھنس گیا ہوں میں

جاوید عباس جاوید تھل دھرتی اور وسیب کے ماحول کو بھی اپنی شاعری میں یاد رکھتے ہیں اور اس سلسلے میں ان کے اشعار مقبول ہیں ۔ اپنی مٹی اور صحرا سے محبت کا ثبوت جاوید عباس اشعار کے پیرائے میں کچھ یوں پیش کرتے ہیں :

سنا ہے لوگ بستے ہیں پہاڑوں اور جھیلوں پر
ہمیں تو چین ملتا ہے فقط بھکر کے ٹیلوں پر
————٭——
قیامت کی تپش ، آندھی کے جھکڑ
یہی دیکھے سدا احوالِ بھکر
———–٭————–
تھل کے صحرا میں عجب آئی بہار
خشک ٹیلے مرکزِ باراں ہوئے

اُن کی شاعری میں اپنی ذات اور معاشرتی ناہمواروں کے حوالے سے خصوصاً ان کی غزلیات کے مقطع میں خوبصورت اشعار ملتے ہیں جس سے ان کی شاعری میں جدت و انفرادیت واضح جھلکتی ہے :

اپنے ہونے پر بہت نازاں ہوئے ………. ہم بھی اپنے دور کے انساں ہوئے
زندگانی کا سفر دشوار تھا ………. بندگی سے ٫٫ راستے آساں ہوئے ،،

وقت کی دُھند میں نہ کھوجانا ………. غمِ ہستی کے داغ دھوجانا
کبھی فرصت ملے اگر جاوید ………. گزرے وقتوں کی کھوج کو جانا

الغرض ! جاوید میرے محسن و مربی ہیں اور میں نے ان سے بہت کچھ سیکھا ہے ۔ خصوصاً ان کی ذات میں جو سادگی اور خلوص پایا جاتا ہے وہ مجھے بہت حوصلہ دیتا ہے ۔ میں ان سے ہر بات پر بے دھڑک مشورہ لیتا ہوں اور وہ کسی دباؤ یا کسی مطلب کے بغیر درست اور بہترین مشورہ دیتے ہیں ۔ بھکر میں ان کی موجودگی ایک ایسے درخت کی طرح ہے جس کا سایہ میرے جیسے نوآموز اور ادب دوست لکھاری اور شعراء کے لیے کسی نعمت سے کم نہیں ہے ۔ اللّٰہ تبارک تعالیٰ انھیں صحتِ کاملہ اور عمرِ خضر عطا فرمائے اور تشنگانِ شعر و ادب ان جیسے نخلِ تناور سے سیراب ہونے والوں کو فیضیاب کرے ۔آخر میں ان کا ایک شعر دیکھیں :

بہت سے کام کرنے کے ابھی جاوید رہتے ہیں
مگر یہ زندگانی بھی کہاں تک ساتھ دیتی ہے ۔
*

جاویدعباس جاوید:ضلع بھکر میں اردوشعروادب کا روشن چراغ

جاوید عباس جاوید : ضلع بھکر میں اُردو شعر و ادب کا روشن چراغ ہیں ۔
جاوید عباس جاوید بھکر شہر کے باسی ہیں اور اُردو شعری و نثری حوالوں سے پہچانے جاتے ہیں ۔ وہ اُردو زبان و ادب ، شاعری اور ثقافت کے حوالے سے اپنی ذات میں ایک مکمل حوالہ اور ادارہ ہیں ۔ شعر و ادب کے لیے ان کی خدمات بہت قیمتی اور لازوال ہیں ۔جاوید عباس کے والد غلام محمد متین کوٹلہ جامی ایک کہنہ مشق اُردو شاعر اور نثر نگار تھے ۔جاوید نے اپنے والدِ مرحوم کی تقلید میں اُردو شاعری اور نثرنگاری کو اپنا مشغلہ بنایا اور بچپن سے ہی شاعری اور نثر نگاری میں سکون محسوس کیا ۔ جس کا نتیجہ یہ نکلا کہ وہ محکمہ تعلیم میں بطورِ پرائمری مدرس بھرتی ہوئے اور اپنے شعری ذوق و شوق کی وجہ سے ترقی کرتے کرتے اُردو کے ایسوسی ایٹ پروفیسر بن گئے اور اسی عہدے سے گورنمنٹ کامرس کالج جھنگ سے ریٹائر ہوئے ۔ انھوں نے شعر و ادب کی دُنیا میں اپنی پہچان کرائی ۔ یہی پہچان آپ کا وسیلہِ روزگار بھی بن گئی اور آپ کی ذات میں چھپی ہوئی خوبیوں کو اجاگر بھی کر دیا ۔
جاوید نے بسلسلہِ ملازمت 2006ء میں ہمارے شہر منکیرہ میں سینئرانسٹرکٹر اُردو کے عہدے پر تعینات ہوئے ۔ وہ بھکر سے روزانہ منکیرہ آتے تھے اور کالج ٹائم کے بعد واپس جاتے تھے ۔ اُن دنوں میرا تعلق اُردو ادب کے سلسلے میں مرحوم علی شاہ کے ساتھ تھا ۔ میں علی شاہ ( مرحوم ) اور بلال مہدی ( مرحوم ) کے ہمراہ کامرس کالج بھکر میں گیا ۔جہاں میری اُن سے پہلی ملاقات ہوئی ۔ پھر اُن سے اکثر منکیرہ کے بس اسٹاپ پر ملاقات ہوتی رہتی تھی ۔ جہاں علی شاہ ( مرحوم ) بھی موجود ہوتے تھے ۔ چائے کی چُسکیوں کے ساتھ ادبی موضوعات پرباتیں ہوتیں اور گپ شپ بھی ہوتی تھی ۔ جاوید عباس جاوید کی ذات سادگی ، خلوص اور سچائی کا ایک مکمل نمونہ ہے ۔ اُن میں کوئی فخر ، بڑائی ، خود سرائی اور خوشامد پسندی کا جذبہ نہیں ہے ۔ سچی اور پرخلوص باتیں کرنا اُن کی شناخت ہے اور اپنی ذات میں موجود فنی خوبیوں اور دیگر اوصاف کے اظہار میں انھوں نے کبھی نہ حسد کیا ہے ، نہ تکبر کیا ہے اور نہ کبھی کسی سے اپنا مقابلہ یا موازنہ کیا ہے ۔ اُن کی ذات میں علم وآگہی کے جو دریا موجود ہیں اُن کے نمایاں کرنے میں وہ کبھی شوق نہیں رکھتے تھے ۔ دوسروں کا کلام اور باتیں بڑے شوق سے سنتے ہیں لیکن اپنی ذات اور فن کے اظہار کرنے میں وہ اکثرکسرِ نفسی سے کام لیتے ہیں ۔
جاوید نے بتایا کہ انھوں نے نثر لکھنے سے ابتدا کی تھی ۔ 1974 ء جب وہ کلورکوٹ ہائی سکول میں نویں جماعت میں پڑھتے تھے تو اُن کے لکھے ہوئے نثری کہانی نما افسانے لاہور سے شائع ہونے والے بچوں کے معروف رسالے ٫٫ کھلونا ،، میں چھپتی تھیں اور اُس وقت کے معروف اخبار ٫٫ امروز ،، کے بچوں کے ایڈیشن ٫٫ بچوں کی دنیا ،، میں اُن کی نظمیں اور مختصر تحریریں چھپتی تھیں ۔ ٫٫ امروز ،، اخبار میں اُن دنوں منو بھائی کا کالم چھپتا تھا ۔جس کا نام ٫٫ گریبان ،، تھا اور اس کالم میں اکثر منو بھائی کلورکوٹ کی اپنی یادوں کا ذکر کیا کرتے تھے ۔ جاوید کا بچپن اور جوانی کا ابتدائی حصّہ کلورکوٹ میں گزرا ہے ۔ جہاں اُن کے والد متین کوٹلہ جامی مارکیٹ کمیٹی کے سیکریٹری تھے ۔ چنانچہ جاوید عباس بھی اکثر کلورکوٹ کی یادوں کا ذکر کرتے رہتے ہیں ۔
جاوید بتاتے ہیں کہ :
٫٫ میرے والد گرامی اکثر اُردو ادب اور شاعری کی باتیں کرتے تھے اور ہم بہن بھائیوں میں بھی یہ عادت سرائیت کر گئی اور یوں ہم بھی اُردوشاعری اور نثر کی طرف راغب ہوئے ۔ غالباً 1971 – 1972ء کی بات ہے جب محلہ جھرولی کلورکوٹ میں ان کا گھر تھا اور ان کے بڑے بھائی اظہار الحسن المعروف حسن رضا نے کلورکوٹ کے ادب شناس ادیبوں لوگوں کے ساتھ مل کر وہاں اُردو کی پہلی انجمن بنائی ۔جس کا نام ٫٫ انجمن اسرارِ ادب ،، تھا ۔ اِس انجمن کے زیرِ انتظام ان کی بیٹھک میں تین مشاعرے ہوئے تھے ۔ جن میں کلورکوٹ کے شاعروں میں سے عبدالکریم مستانہ ، حمید اختر کاشف ، شبیر اختر ، لطیف عابدی ، تقی شاہ راغب ، اشک پٹیالوی ، ماسٹر عبدالعزیز آصف ، کرم حیدر بے کس ، غلام محمد تقی اور رانا جمیل و دیگر شعراء شریک ہوتے تھے ۔ اِس انجمن کے سرپرست رانا نذر محمد خان شمیم تھے ۔ ان مشاعروں میں دریا خان سے عابد سیمابی ، انجم عابدی ، قاضی اشتیاق اسیر جیسے شاعر بھی مدعو کیے گئے تھے ۔ اس انجمن کے زیرِ اہتمام دو کتابچے شائع ہوئے جو کلورکوٹ ( بھکر ) میں اُردو ادب پہلی تحریک تھی ۔ اس رسالے کا نام ٫٫ اسرارِ ادب ،، تھا اور اس کے دو ایڈیشن شائع ہوئے تھے ۔ اُن دنوں ڈیرہ اسماعیل جاکر اشک پٹیالوی یہ رسائل چھپوا کر آتے تھے ۔

کلورکوٹ کی اور بھی دیگر اہم باتیں وہ سناتے رہتے تھے ۔ بعد ازاں اُن کے تنقیدی مضامین ٫٫ ماہِ نو ،، لاہور ، ٫٫ تخلیق ،، لاہور ، ماہنامہ ٫٫ ارژنگ،، ،٫٫ طلوعِ اشک ،، لاہور ، ٫٫ اسالیب ،، سرگودھا ، ٫٫ نظریہِ پاکستان ،، لاہور اور ٫٫ حقیقت ،، بہاولپور میں شائع ہوتے رہے ۔ اس کے علاوہ انھوں نے بھکر سے شائع ہونے والے تمام مقامی اخبارات میں کالم نگاری کی ہے ۔ جس کا ریکارڈ اُن کے پاس محفوظ ہے ۔ بھکر کامرس کالج میں 1991ء میں انھوں نے پہلا میگزین ٫٫ الفلاح ،، کے نا م سے 1991ء میں شائع کیا اور یہ میگزین نوسال تک شائع ہوتا رہا ۔ بعد میں اس کا نام ٫٫ سرمایہ ،، رکھ دیا گیا ۔ اس رسالے کی معاونت میں ان کے ساتھ سعید عاصم اور قلبِ عباس بھی شامل تھے جوان دنوں کامرس کالج میں پڑھاتے تھے ۔ انھوں نے دیگر کامرس کالجزکے رسائل میں بھی شاعری اور مضامین شائع کیے ہیں ۔ ان کے بڑے بھائی ظفر عباس بھکر کے معروف شاعر ہیں ۔ ان کی چار شعری تصانیف شائع ہوچکی ہیں ۔انھیں شاعرِ ہفت بھی کہاجاتا ہے ۔ انھوں نے اُردو کے شاعری ساتھ ساتھ فارسی میں بھی شاعری کی جو ایرانی رسائل میں شائع ہوتی رہتی ہے ۔ اس طرح ان کا گھرانہ بھکر کے ادبی گھرانوں میں سرفہرست ہے ۔ ان کے تنقیدی مضامین بہت سی کتابوں میں شائع ہوئے ہیں ۔جن کے تذکرے کے لیے ایک الگ موضوع درکار ہے اور وہ بھکر کے نثرنگاروں میں کلیدی اہمیت کے حامل ہیں ۔ آپ کا ایم ۔ فل ( اُردو ) کا مقالہ بعنوان ٫٫ بھکر کے غزل گوشعراء 1947ء تا 2003 ء ،، ایک بہت نادر تحقیقی دستاویز ہے ۔جس سے بھکر کے شعر و ادب کے دلدادہ اور محققین بھرپور استفادہ کرتے ہیں ۔
2022ء میں اُن کا مجموعہِ کلام ٫٫ راستے آساں ہوئے ،، شائع ہوا ۔ اس میں حمد ، نعت ، مرثیہ ، نظمیں
( آزادوپابند ) ، قطعات اور 100 غزلیات ہیں ۔ وہ بھکر کے اکثر مشاعروں اور ادبی محفلوں میں شرکت کرتے رہے ہیں ۔ ان کے شاگردوں کی ایک کثیر تعداد موجود ہے جوان کی قدر جانتے ہیں اور آج بھی ان سے کسبِ فیض کرتے ہیں ۔ ان کی محفل علم و ادب کے متلاشیوں کے لیے ہمہ وقت حاضر ہے اور وہ یہ فریضہ بڑی خوشی اور توجہ سے کرتے ہیں ۔ان کے شاگردوں کے علاوہ ادبی محققین کی بڑی تعداد ان کے پاس اصلاح و مشاورت کے لیے آتے ہیں اور وہ ایم ۔ فل اور پی ۔ ایچ ۔ڈی سطح مقالہ جات کی تکمیل کے ساتھ اشعار کی اصلاح ، نثر نگاری کے عوامل اور ادبی معاملات میں رہنمائی کر کے خوشی محسوس کر تے ہیں ۔ اُن سے میری کافی عرصہ رفاقت رہی اور میں ان کے شاگردوں میں اپنا شمار کرنا اعزاز سمجھتا ہوں ۔ علاوہ ازیں بھکر کے نوجوان شعرا ء میں سے صفدر کربلائی ، مظہر مونس ، سعید عاصم ، شاہد بلال حسرت کاشمار بھی ان کے شاگردوں میں ہوتا ہے ۔
جہاں تک پروفیسر جاوید عباس جاوید کے نظریات اور ان کی شاعری کے موضوعات کا تعلق ہے ، میں نے یہ دیکھا ہے کہ ان کے کلام میں ایک تو اللّٰہ تعالیٰ کی ذات اور توحید کا بڑا ذکر ہے ۔ وہ یہ باتیں کر کے بہت خوش ہوتے ہیں ۔ وہ اپنے خُدا پر کامل یقین رکھتے ہیں ۔توحید ان کا پسندیدہ موضوع ہے ۔ ان کا کلام متنوع موضوعات کا احاطہ کرتا ہے ۔انھوں نے نظم ونثر کی کئی اصناف میں اسپِ قلم کے جوہر دکھائے ہیں ۔ بلاتشکیک جاوید عباس ایک مہان شاعر ، نفیس نثرنگار اور شفیق استاد کے تمام خصائل سے مالا مال ہیں ۔توحید پر ان کے یقینِ کامل کے تناظر میں اشعار ملاحظہ فرمائیں :

جاوید وقفِ سجدہ تھی واحد خُدا کی ذات
یہ کیا ہوا کہ سینکڑوں مسجود ہو گئے
——–٭———
میرے سچے خُدا کہاں ہے تُو
ناخداؤں میں پھنس گیا ہوں میں

جاوید عباس جاوید تھل دھرتی اور وسیب کے ماحول کو بھی اپنی شاعری میں یاد رکھتے ہیں اور اس سلسلے میں ان کے اشعار مقبول ہیں ۔ اپنی مٹی اور صحرا سے محبت کا ثبوت جاوید عباس اشعار کے پیرائے میں کچھ یوں پیش کرتے ہیں :

سنا ہے لوگ بستے ہیں پہاڑوں اور جھیلوں پر
ہمیں تو چین ملتا ہے فقط بھکر کے ٹیلوں پر
————٭——
قیامت کی تپش ، آندھی کے جھکڑ
یہی دیکھے سدا احوالِ بھکر
———–٭————–
تھل کے صحرا میں عجب آئی بہار
خشک ٹیلے مرکزِ باراں ہوئے

اُن کی شاعری میں اپنی ذات اور معاشرتی ناہمواروں کے حوالے سے خصوصاً ان کی غزلیات کے مقطع میں خوبصورت اشعار ملتے ہیں جس سے ان کی شاعری میں جدت و انفرادیت واضح جھلکتی ہے :

اپنے ہونے پر بہت نازاں ہوئے ………. ہم بھی اپنے دور کے انساں ہوئے
زندگانی کا سفر دشوار تھا ………. بندگی سے ٫٫ راستے آساں ہوئے ،،

وقت کی دُھند میں نہ کھوجانا ………. غمِ ہستی کے داغ دھوجانا
کبھی فرصت ملے اگر جاوید ………. گزرے وقتوں کی کھوج کو جانا

الغرض ! جاوید میرے محسن و مربی ہیں اور میں نے ان سے بہت کچھ سیکھا ہے ۔ خصوصاً ان کی ذات میں جو سادگی اور خلوص پایا جاتا ہے وہ مجھے بہت حوصلہ دیتا ہے ۔ میں ان سے ہر بات پر بے دھڑک مشورہ لیتا ہوں اور وہ کسی دباؤ یا کسی مطلب کے بغیر درست اور بہترین مشورہ دیتے ہیں ۔ بھکر میں ان کی موجودگی ایک ایسے درخت کی طرح ہے جس کا سایہ میرے جیسے نوآموز اور ادب دوست لکھاری اور شعراء کے لیے کسی نعمت سے کم نہیں ہے ۔ اللّٰہ تبارک تعالیٰ انھیں صحتِ کاملہ اور عمرِ خضر عطا فرمائے اور تشنگانِ شعر و ادب ان جیسے نخلِ تناور سے سیراب ہونے والوں کو فیضیاب کرے ۔آخر میں ان کا ایک شعر دیکھیں :

بہت سے کام کرنے کے ابھی جاوید رہتے ہیں
مگر یہ زندگانی بھی کہاں تک ساتھ دیتی ہے ۔

مقبول ذکی مقبول ایک درویش صفت ادبی لکھاری

تحریر : ممتاز عارف
( ریڈیو پاکستان سرگودھا )

سوشل میڈیا کے مثبت اور منفی اثرات سے انکار نہیں کیا جا سکتا ، اس کے جہاں بے شمار فوائد ہیں وہاں بہت سے نقصانات بھی ہیں ، لیکن ایک تو ماننا پڑے گا کہ جدید سائنسی ایجادات کی بدولت دُنیا اس وقت صیح معنوں میں گلوبل ویلج بن چکی ہے ۔ انٹرنیٹ نے معلومات تک رسائی اتنی آسان بنا دی ہے کہ بیسویں صدی میں اس کا تصوّر بھی نہیں کیا جا سکتا تھا ۔ رابطے آسان ہو گئے ہیں اورفاصلے سمٹ گئے ہیں ۔ ایک وقت تھا جب ایک دوسرے کی خیریت دریافت کرنے اور ایک دوسرے کا حال معلوم کرنے کے لئے خطوط لکھے جاتے تھے ، پھر سائنس نے ترقی کی تو ٹیلی فون کی سہولت سے ایک دوسرے کے حال سے باخبر رہنے لگے ۔ مزید ترقی ہوئی تو موبائل فون کا سیلاب اور انٹرنیٹ کا انقلاب آ گیا جس نے رابطے اس قدر آسان اور سہل کر دیئے کہ چند سال قبل تک کوئی اس کے بارے میں سوچ بھی نہیں سکتا تھا ۔ انٹرنیٹ کے کرشمے سے انسان جب چاہے اپنی مرضی سے معلومات تک رسائی حاصل کر لیتا ہے ۔ شاعروں اور ادیبوں کے درمیان رابطے رکھنا انتہائی آسان ہو گیا ہے ۔ لمحوں میں افکار و خیالات کا تبادلہ ہو جاتا ہے ، واٹس ایپ کے ذریعے آپ ادبی مواد اور شاعری بڑی آسانی سے اپنے مطلوبہ ہدف تک پہنچا سکتے ہیں ۔ آج کا شاعر و ادیب انٹرنیٹ اور سوشل میڈیا کے ذریعے پوری دُنیا سے جڑُا ہوا ہے ۔ ایک دوسرے سے تعارف اور روابط بہت آسان ہو گئے ہیں ۔ سیکڑوں میل دُور بیٹھے اگر کسی شاعر سے ملاقات کا سبب نہیں بن پا رہا تو واٹس ایپ ، موبائل فون اور فیس بُک کے ذریعے آپ اُس سے روابط بھی قائم کر سکتے ہیں اوربات بھی کر لیتے ہیں ۔
مقبول ذکی مقبول سے اگرچہ میری ملاقات تو نہیں لیکن ان کے ادبی قد کاٹھ سے ضرور واقف ہوں ۔ میرا ان سے تعارف سوشل میڈیا ہی کے ذریعے ہوا ۔فیس بُک اور واٹس ایپ پر مختلف ادبی پروگراموں میں بھکر کی ادبی سرگرمیوں کو دیکھنے کا اتفاق ہوا ۔ اُن میں مقبول ذکی مقبول کو بے حد نمایاں اور غیر معمولی طور پر متحرک پایا ۔ حالیہ دنوں میں سرگودھا رائٹرز کلب کی سرگرمیوں سے آگاہی کے بعد انہوں نے کال کرکے مجھے بتایا کہ پروفیسر ڈاکٹر ہارون الرشید تبسم کی وساطت سے مجھے ٫٫ رنگِ تبسم ،، کے نام سے آپ کی کتاب ملی ہے ۔ سوچا کال کر کے آپ کو دِلی طور پر مبارکباد پیش کروں ۔ یوں ہمارے درمیان رابطے اور مکالمے کا آغاز ہوا ۔ رابطوں کا سلسلہ مزید آگے بڑھا تو معلوم ہوا کہ مقبول ذکی مقبول کئی کتابوں کے مصنّف ہیں ۔ ایک پختہ گو شاعر اور عمدہ نثر نگار ہیں ۔ وہ ایک ادبی لکھاری ہونے کے ساتھ ساتھ ایک ادبی کار کن بھی ہیں ۔ ادب کی ترقی وترویج ان کا مشن ہے منکیرہ ( بھکر ) کو ایک معتبر دبستان بنانے کے لئے گزشتہ کئی سال سے سرگرم عمل ہیں ۔ وہ ایک درویش صفت انسان اور عشقِ محمد و آلِ محمد صلی اللّٰہ علیہ وآلہ وسلّم سے سرشار ہیں ۔
ذکرِ حضرت امام حسین علیہ السّلام اور ذکرِ کربلا تو ان کی رگ رگ میں سمایا ہوا ہے ۔ وہ واقعہء کربلا اور شہادتِ حضرت امام حسین علیہ السّلام کو دین کا چہرہ تصوّر کرتے ہیں اور اس چہرے کی تلاوت ان کے ایمان کی رُوح ہے ۔ وہ ذکرِ حضرت امام حسین علیہ السّلام کو عبادت کا درجہ دیتے ہیں اور سچ تو یہ ہے کہ وہ یہ عبادت خُوب اور جی بھر کے کر رہے ہیں ۔ واقعہء کربلا اور سیرت و کردارِ حضرت امام حسین علیہ السّلام ان کے ہاں ایک مستقل استعارے کے طور پر جھلملا رہے ہیں ۔

مقبول ذکی مقبول ، منکیرہ ( بھکر ) کے ادبی افق پر اس قدر نمایاں طور پر جھلملا رہے ہیں کہ وہ دوسروں کے لئے نشانِ منزل بن گئے ہیں ۔ وہ تخلیقی ، تنقیدی اور تحقیقی شعور ، بصیرت اور صلاحیت سے مالا مال ہیں ۔ ایک اچھے تجزیہ نگار کے طور پر بھی علمی و ادبی حلقوں میں خاصے مقبول ہیں ۔ ان کے نثر پارے ادبی دُنیا میں خاص پہچان اور مقام رکھتے ہیں ۔ ٫٫ سجدہ ،، اور ٫٫ منتہائے فکر ،، جیسی کتابیں ان کا تخلیقی معیار متعین کرنے اور ان کی شاعرانہ عظمت کے لئے کافی ہیں ۔
٫٫ عاصم بخاری : شخص اور شاعر ،، جیسی کتاب لکھ کے تحقیق اور تنقید کی دُنیا میں انہوں نے اپنا لوہا منوا لیا ہے ۔ عاصم بخاری ادب میں ہمہ جہت شخصیت کے مالک ہیں اور انہوں نے مختلف اصنافِ سخن میں اتنی عمدگی سے طبع آزمائی کی ہے کہ پڑھنے والا عش عش کر اُٹھتا ہے ۔ سچ تو یہ ہے کہ اتنے ہمہ جہت ادبی لکھاری پر قلم اُٹھانا کوئی آسان کام نہیں تھا لیکن مقبول ذکی مقبول نے عاصم بخاری کا اتنی گہرائی سے مطالعہ کیا ہے اور ان کی شخصیت کے مختلف پہلوؤں اور ان کی فنی جہات کا اتنی عرق ریزی سے مشاہدہ کیا ہے کہ یوں محسوس ہوتا ہے جیسے مقبول ذکی مقبول نے عاصم بخاری کی شخصیت اور فن کا عطر کشید کر کے اسے لفظوں کے روپ میں قارئینِ علم و ادب تک منتقل کردیا ہے ۔ ان کی تخلیقی ، تنقیدی اور تحقیقی بصیرت تو قابلِ تحسین ہے ہی ، شاعرانہ اسلوب اور طرزِ نگارش بھی لائقِ تعریف ہے ۔ اُن کا اسلوب اتنا دلکش اور متاثر کن ہے کہ پڑھنے والا اس کے سحر میں کھو جاتا ہے ۔ ان کی شاعری روایت اور جدت کا حسین سنگم ہے ۔ شاعرانہ اسلوب اتنا سادہ ، سہل ، عمدہ اور پر تاثیر ہے کہ ان کے افکار و خیالات کی خوشبو فوری طور پر پڑھنے والے کے رگ و پے میں اتر جاتی ہے ۔ عقیدتوں سے معمور ان کے سلام و منقبت کی مہک پڑھنے والے کو روح کی گہرائی تک سرشار کر دیتی ہے ۔ ان کے یہاں سہل ممتنع کی عمدہ مثالیں بھی موجود ہیں اور ان کی شاعری پڑھ کر تازگی کا بھی احساس ہوتا ہے ۔ مقبول ذکی مقبول ادبی مراکز سے دُور منکیرہ ( بھکر ) جیسے مضافاتی شہر میں ادب کی جو شمع روشن کئے ہوئے ہیں ۔ اس کی کِرنیں نہ صرف منکیرہ ( بھکر ) کے ادبی افق کو منوّر کر رہی ہیں بلکہ بھکر کےاردگرد کے علاقوں کی ادبی فضا میں بھی جھلملاہٹ پیدا کررہی ہیں ۔
مقبول ذکی کا شعری آہنگ اِس کی صاف و شفاف شخصیت کی طرح سچا ، سُچا اور کھرا ہے ۔ رثائی ادب میں مقبول کی ایک خاص پہچان اور مقام ہے ۔ میری دُعا ہے کہ اللّٰہ تعالیٰ مقبول ذکی مقبول کے قلم میں اور زور اور تحریریں میں مزید تاثیر پیدا کرے ( آمین)

ممتاز عارف

 ریڈیو پاکستان سرگودھا

مقبول ذکی مقبول خوش قسمت شاعر

تحریر : ہمایوں جاوید ( لاہور )

گھر میں کسی شاعر یا ادیب کا ہونا کسی خاص بخشش یا نعمت سے کم نہیں بلکہ یہ بڑی خُوش نصیبی کی بات ہے کہ اُن کے رابطے اُن کی اولاد کو بھی میسر آتے ہیں اور اُن کا میل جول بڑے بڑے لوگوں سے رہتا ہے ۔ میں عمر میں چھوٹا ہی تھا جب سے مجھے میرے والد صاحب جاوید صدیق بھٹی کی وساطت سے نیشنل بلکہ انٹر نیشنل شخصیات سے ملنے کے مواقع ملے مجھے یاد ہے کہ جب کبھی نعیم واعظ اور عمانوئیل نذیر مانی ( انگلینڈ سے ) مظہر جاوید حسن ( آزاد کشمیر سے ) جن ایم فلیکس ( کراچی سے ) چودھری کرم علی کیفی ( پاک پتن سے ) قیصر ہاشمی ( ملتان سے ) پرویز اختر شاد ( اسلام آباد سے ) صابر نار ( پشاور سے ) اور ڈاکٹر شاہد ایم شاہد ( واہ کینٹ سے ) لاہور تشریف لاتے تو میرے والد صاحب سے ملنے ہمارے گھر ضرور آتے ۔ اسی بہانے مجھے بھی ملنے کا موقع ملتا یہ بالکل ایسے ہی ہوتا جیسے
٫٫ جھونے دے پج ڈیلے نوں پانی آؤ ندا اے ،،
چند روز قبل والد محترم کے ایک ادیب شاعر دوست مقبول ذکی مقبول ، منکیرہ ( بھکر ) سے تشریف لائے گپ شپ کے بعد انہوں نے اپنا بیک کھولا اور اپنی کتاب ٫٫ سُنہرے لوگ ،، والد صاحب کو پیش کی اور مجھے موبائل پر کتاب پیش کرتے ہوئے تصویر بنانے کو کہا جو انہوں نے بننے کے بعد فیس بُک پر بھی لگا دی اُن کے جانے کے بعد میں نے کتاب پڑھی تو پڑھتا ہی چلا گیا یہ کتاب شاعروں ادیبوں کے انٹرویو پر مبنی کتاب تھی اس کتاب میں ستائیس 27 انٹرویوز ہیں اِس خُوب صورت کتاب پر نام ور شاعروں ادیبوں نے رائے دی ہے ۔
دیباچہ پروین سجل نے لکھا ہے ۔ 160 صفحات کی یہ کتاب ادب میں خُوب صورت اضافہ ہے ۔ مقبول ذکی مقبول خُوب صورت شخصیت کے مالک ہیں وہ بہت سی خُوبیوں کے مالک ہیں وہ شاعر ، ادیب ، صحافی اور سماجی کار کن ہیں ۔

شخصیت پسندی بھی ان کا ایک حوالہ ہے وہ نام ور شخصیات پر مضامین بھی لکھتے ہیں اور ان کے انٹرویو کر کے ان کو اخبارات میں بھی شائع کرواتے ہیں اُن کی بہت سی کُتب شائع ہو کر قارئینِ ادب سے داد کی سند وصول کر چکی ہیں کئی کتابوں پر کام کر رہے ہیں جو جلد شائع ہو جائیں گی ۔ ان کو بہت سے ادبی اداروں اور تنظیموں نے ادبی کام پر ایوارڈ اور گولڈ میڈل بھی دیئے ہیں وہ اپنے علاقے کیا پورے ملک میں ادبی محفلوں اور مشاعروں میں شرکت کرتے ہیں ۔ خاص طور پر لاہور جو ادب کا مرکز اور گڑھ ہے یہاں بھی وہ تقریباً ہر بڑے پروگرام میں مدعو ہوتے ہیں لیکن شرکت وہ مہینے میں ایک آدھ پروگرام میں کرتے ہیں پورے ملک میں بسنے والے شاعروں اور شاعرات سے ان کے روابط ہیں وہ شاعری کم کرتے ہیں نثر کی طرف اُن کا رُجحان زیادہ ہے ۔
مقبول ذکی مقبول اچھی سلجھی شخص کے مالک ہیں سادہ اندازِ بیاں کے قائل ہیں وہ گفتار اور تحریر میں دِلکش انداز رکھتے ہیں بات کو سادہ اور سلیس کرنے کے عادی ہیں ۔ بات کو گنجلک بنانے کی کوشش نہیں کرتے ہمیشہ سچائی اور حق گوئی کی بات کرتے ہیں جھوٹ سے اجتناب کرتے ہیں ان کے قول اور فعل میں تضاد نہیں جو بات کرتے ہیں اس کو پورا کرتے ہیں ان کی تحریروں میں بھی ان کی شخصیت کا عکس دکھائی دیتا ہے ان کا مطالعہ اور مشاہدہ وسیع ہے اسی لئے ان کے نظریات ( Cancept ) واضح ہوتے ہیں وہ اعلیٰ خیال کے مالک ہیں ان کی تحریروں میں پڑھنے والوں کو اچھے اچھے خیال ملتے ہیں جس سے پڑھنے والوں کو بہت کچھ سیکھنے کا موقع ملتا ہے ۔ وہ دوستوں کے دوست ہیں دوستوں سے محبت کرنا اور اُن کے کام آنا مقبول ذکی مقبول کی ذات کا خاصا ہے ۔ ادب سے ان کو بہت بلکہ جُنوں کی حد تک لگاؤ ہے ہر وقت کتابیں پڑھنا اور ادب کے بارے میں سوچنا ان کی ذات کا حصّہ ہے وہ ادب پرور ہیں وہ جس طرح ادبی کاموں کی پرموشن چاہتے ہیں بعض اسی طرح ادیبوں شاعروں کی حوصلہ افزائی بھی وہ اپنا فرض سمجھ کر کرتے ہیں ۔ مقبول ذکی مقبول کی اس عادت اور رویے کی وجہ سے سبھی دوست احباب ان کی عزت اور ان سے محبت کرتے ہیں ۔ وہ تو لوگوں کے دلوں کی قدر کرتے ہیں ۔
ایک ادبی تنظیم بزمِ اوجِ ادب کے نام سے چلا رہے ہیں جس کے پلیٹ فارم سے کئی کتابیں شائع ہوچکی ہیں ۔ مشاعرے ، ایوارڈ تقریب ، اسناد تقریب ، نعتیہ نسستیں ، محفل مسالمہ اور مرحومین شعراء و ادباء کے ایصال ثواب کے لئے قرآن خوانی کی محفلیں بھی کرواتے رہتے ہیں ۔ بزمِ اوجِ ادب ، منکیرہ ( بھکر ) کے بانی و چئیرمن مقبول ذکی مقبول فروغِ ادب کے لئے کوشاں اور متحرک نظر آتے ہیں ۔

ہمایوں جاوید
 لاہور

مقبول ذکی مقبول اچھا اور سچا شاعر

تحریر : گُلشن آراء طارق ( لاہور )

مقبول ذکی مقبول سے میری پہلی ملاقات ناصر باغ چوپال میں ہوئی جب وہ ایک ایوارڈ تقریب میں ایوارڈ وصول کرنے کے لیے لاہور تشریف لائے تھے ۔ نام ور شاعر اور پبلشر عقیل شافی خُوبصورت لہجے میں تقریب کی نظامت کر رہے تھے ۔ مجھے اچھی طرح یاد ہے کہ وہاں اس پروگرام میں مجھے اور مقبول ذکی مقبول کو اکٹھے ایوارڈ ملا تھا ۔ بعد میں بھی ان سے گاہے بگاہے ادبی پروگراموں اور مشاعروں میں ملاقات کا شرف حاصل ہوا ۔ مقبول ذکی مقبول اچھے بھلے مانس اور شریف شخص ہیں ۔ لوگوں کی عزت کرتے اور اُن سے کرواتے ہیں ۔ ان کا یہ سلسلہ عام لوگوں کے لیے بھی ہے چاہے وہ شاعر ہوں یا نہ ہوں میں اُن کی شاعری اور نثر دونوں کی مداح ہوں وہ قلم اور کاغذ سے بھی اپنا رشتہ نِبھا رہے ہیں اور شاعروں اور شاعرات سے بھی ۔ وہ پورے مُلک میں سبھی شاعروں ، ادیبوں اور شاعرات سے مراسم قائم رکھے ہوئے ہیں ۔ ان سے روابط رکھنا وہ اپنا فرض سمجھتے ہیں کیونکہ وہ کہتے ہیں کہ یہ ادب قبیلہ میری فیملی ہے میرا خاندان ہے وہ لوگوں کے دُکھ سُکھ میں بھی شامل ہوتے ہیں ۔

مجھے اچھی طرح یاد ہے چند سال قبل جب میں طبیعت خراب ہونے کی وجہ سے ہسپتال میں داخل تھی تو مجھے تواتر کے ساتھ مقبول ذکی مقبول کا فون آتا تھا ۔ یہ اُن کے احساس ہمدردی اور سنجیدہ ہونے کی ایک چھوٹی سی مثال ہے ۔ آج کل اُن کے شب و روز ادب کے فروغ کے لیے مختلف سکیمیں سوچنے اور اُن پر عمل کرکے کامیاب کرنے پر گُزرتے ہیں ۔ اِن دونوں وہ دھڑا دھڑ ادبی کام کر رہے ہیں ۔ بہت تھوڑے عرصہ میں اُنہوں نے بہت سا ادبی کام کر لیا ہے ۔ ان کی بہت سی کتابیں شائع ہوچکی ہیں ۔ یہ کتابیں نہ صِرف شائع ہوچکی ہیں بلکہ علمی ادبی اور عوامی حلقوں سے خُوب کامیابی اور پسندیدگی کی سند بھی حاصل کر چکی ہیں ۔ ان کا طرزِ اسلوب سادہ مگر دِلکش ہے ۔ ان کی تحریروں کو جب کوئی پڑھنا شروع کرتا ہے تو پڑھتا ہی چلا جاتا ہے وہ سچ بولتے ہیں سچ لکھتے ہیں وہ اچھے اور سچے لکھاری ہیں ۔ ان کے قول اور فعل میں تضاد نہیں ۔ جو کہتے ہیں وہی کرتے ہیں اُن کے لکھنے کا انداز منفرد اور دلچسپ ہے ان کا مطالعہ اور مشاہدہ وسیع ہے جو ان تحریروں میں نمایاں دکھائی دیتا ہے ۔ مقبول ذکی مقبول اچھے اخلاق کے مالک ہیں عاجزی اور انکساری بھی ان کی ذات کا خاصا ہے مغرور لوگوں کو وہ اچھا نہیں سمجھتے وہ سب کو پیار ، محبت ، اخلاق اور امن کا درس دیتے ہیں ان کے خیال میں مختصر سی زندگی کو پیار ، محبت اور امن سے گزارنا عقل مندی ہے ۔
آخر میں مقبول ذکی مقبول کے مجموعہ کلام ٫٫ اندازِ بیاں دیکھ ،، میں سے دو فرد قارئین کی نظر کرتی ہوں جو وطن کے حوالے سے ہیں ۔

بڑا خُوب صورت وطن ہے ہمارا
خُدا کے کرم سے بنے یہ نظارے

سبز ہلالی پرچم نے ہی
دی ہے سچ میں عظمت ہم کو

عابد علیم سہو: شخصیت و فن

ڈاکٹر رحمت عزیز خان چترالی*

عابد علیم سہو ایک منفرد لب و لہجے کے شاعر ہیں جو اردو، پنجابی اور سرائیکی زبانوں میں اپنی شاعری کے ذریعے ادب کی خدمت میں مصروف ہیں۔ انہوں نے نہایت کم عرصے میں نمایاں مقام حاصل کیا ہے۔ وہ بزمِ رفیق انٹرنیشنل پاکستان بھکر کے بانی ہیں اور اپنی تخلیقی صلاحیتوں کو مختلف اصنافِ سخن میں پیش کرنے کا ہنر رکھتے ہیں۔ ان کی شاعری کا دائرہ کافی وسیع ہے جس میں حمد، نعت ، نظم ، گیت اور قومی و سماجی موضوعات پر غزلیں شامل ہیں۔ ان کے اشعار میں جذبات کی گہرائی، انسانی تجربات کی عکاسی اور الفاظ کی سادگی کے ساتھ معنوی گہرائی نظر آتی ہے۔

عابد علیم سہو کا تعلق بھکر، پنجاب، پاکستان سے ہے۔ ان کی شخصیت میں عاجزی اور ادب سے محبت نمایاں طور پر نظر آرہی ہے۔ وہ محبت اور امن کے سفیر ہیں اور اپنی شاعری کے ذریعے نفرتوں کو مٹانے اور محبت کو عام کرنے کا خواب رکھتے ہیں۔ ان کی پنجابی شاعری کو ہندوستان میں گرمکھی زبان میں ترجمہ کیا جا چکا ہے جو ان کے کلام کی مقبولیت کا ثبوت ہے۔ ان کا پہلا شعری مجموعہ جلد منظرِ عام پر آنے والا ہے جو ان کے ادبی سفر میں ایک اہم سنگ میل ہوگا۔

انہوں نے مختلف موضوعات پر قلم اٹھایا ہے۔ ان کی شاعری میں جذبات کی صداقت، فلسفیانہ سوچ اور روحانی تعلق کا امتزاج موجود ہے۔ ان کی غزلوں میں روایتی طرزِ سخن کے ساتھ ساتھ جدت کی جھلک نظر بھی آتی ہے۔ ان کے اشعار انسانی جذبات کے مختلف پہلوؤں، عشق، جدائی اور زندگی کے کٹھن تجربات کو بیان کرتے ہیں۔

عابد علیم سہو کی غزل گوئی میں کلاسیکی روایات کے ساتھ موجودہ دور کے مسائل کا عکس بھی جابجا ملتا ہے مثلاً:

"کسی کو اور میں اب آزما نہیں سکتا

ہیں زخم اتنے کہ تجھ کو دکھا نہیں سکتا”

علیم اپنے اس شعر میں محبت میں ٹوٹے ہوئے دل کی کیفیت کو بیان کرتا ہے، جہاں شاعر اعتماد کے فقدان اور جذبات کی شدت کو سادہ مگر دلکش انداز میں پیش کرتا ہے۔ یہ شعر ملاحظہ کیجیے:

"یہ بحر عشق ہے عابد یہاں طوفان پنہاں ہیں

بہت سے حادثوں سے ہوگئے دوچار پانی تک”

اس شعر میں شاعر نے عشق کی شدت اور زندگی کے سخت تجربات کو بحر و طوفان کے استعارے سے خوبصورتی سے بیان کرنے کی کوشش کی ہے۔

ان کی نعتیہ شاعری عقیدت اور روحانیت کا بہترین اظہار ہے مثلاً:

"جاں فزا ہے شہرِ طیبہ کی فضاء

دل کشا ہے شہرِ طیبہ کی فضاء”

شہرِ طیبہ کے تقدس اور محبت کو بیان کرتے ہوئے ان کے اشعار دل کو چھو لیتے ہیں۔

عابد علیم سہو کے اشعار میں قومی محبت، انسانی ہمدردی اور معاشرتی مسائل کا ذکر بھی ملتا ہے مثال کے طور پر:

"تمام نفرتیں جڑ سے اکھاڑ پھینکوں گا

میرا طریق محبت کو عام کرنا ہے”

یہ شعر ان کے فکری رجحان اور امن کے پیغام کو ظاہر کرتا ہے۔

عابد علیم سہو کے کلام میں روانی، سادگی اور برجستگی نمایاں طور پر محسوس کی جاسکتی ہے۔ ان کے ہاں تشبیہات اور استعارات کا استعمال عمدگی سے کیا گیا ہے جو قاری کو جذبات کی گہرائی میں لے جاتا ہے۔ ان کا اندازِ بیان سادہ مگر پراثر ہے، جس کی وجہ سے ان کے اشعار قارئین کے دل میں اتر جانے کی صلاحیت رکھتے ہیں۔

عابد علیم سہو جدید اردو شاعری کا ایک اہم نام ہیں، جنہوں نے اپنی تخلیقات کے ذریعے ادب میں نمایاں کردار ادا کیا ہے۔ وہ شاعری میں جذبات کی ترجمانی کے ساتھ ساتھ محبت و امن کا پیغام بھی دیتے ہیں۔ ان کے کلام کا تنوع اور معنوی گہرائی انہیں معاصر شعراء میں منفرد مقام عطا کرتی ہے۔ ان کا شعری مجموعہ ان کے فن کو مزید بلندیوں پر لے جائے گا اور ادبی حلقوں میں پذیرائی حاصل کرے گا۔