تبصرہ :۔ میرے لفظ
تبصرہ نگار:۔ نیاز خان اعوان
کتابی سلسلہ (1)
خصوصی اشاعت نعت نمبر
فتح جنگ (اٹک)
سید حبدار قائم صاحب کی وساطت سے ادبی مجلہ میرے لفظ ( جنوری تا جون 2024 ء ) دیکھنے اور پڑھنے کا اتفاق ہوا۔
نہایت ہی خوشی کی بات ہے ، کہ اٹک کے مختلف مقامات سے روز بروز شعری مجموعے ، ادبی مجلے اور دوسری تصنیفات منظرِ عام پر آرہی ہیں اور شعرا و ادبا اپنا ، اٹک اور اپنے وطن کا نام روشن کر رہے ہیں۔ اس سلسلے میں میرے لفظ کی پوری ٹیم بھی داد ، حوصلہ افزائی اور مبارک باد کی مستحق ہے ۔
ادبی مجلے میں ارشاد علی ، داؤد تابش ، پروفیسر ریاض احمد قادری ، سید حبدار قائم ، نسیم سحر ، پروفیسر عاصم بخآری ، شمائلہ منیب شمائل ، آنسہ مظہر ، ریاض احمد قادری ، ڈاکٹر خاور چودھری ، سمیعہ ناز ، مقصود علی شاہ اور ڈاکٹر سید عطاءالمصظفٰٰی کے مضامین پڑھے ، جن سے کافی معلومات حاصل ہوئیں ۔ میری دعا ہے کہ اللّٰہ تعالٰی ان کے مضامین میں مزید نکھار لائے ، تاکہ قارئین کے علم میں اضافے کا باعث بنے اور ان سب لکھاریوں کو دنیاوی اور اخروی کامرانیاں نصیب فرمائے ۔
نعتیہ مشاعروں اور نعتیہ مجموعوں سے شعرا کو نعت کہنے کی تحریک ملتی ہے اور نعت گوئی کو فروغ حاصل ہوتا ہے ۔
مضامین کے علاؤہ چھیالیس نعت گو شعرا کی نعتیں پڑھنے کا موقع ملا ، جن سے ان نعت گوؤں کی رسول اکرم صلی اللّٰہ علیہ وآلہ وسلم سے والہانہ محبت ، عقیدت اور احترام کا اظہار ہوتا ہے ۔
اللّٰہ تعالٰی ان نعت گو شعرا کی کاوشوں اور رسول پاک صلی اللّٰہ علیہ وآلہ وسلم سے عقیدت و محبت کو منظور و قبول فرمائے اور انھیں جزائے خیر دے ۔
ان نعت گو شعرا کی نعتوں میں سے نعتیہ اشعار کے نمونے ملاحظہ فرمائیں :
ڈاکٹر ارشد محمود ناشاد
تیری توصیف رہے میرے لبوں پر ضّو ریز
اک اجالا سا مرے شام و سحر میں آجاتے
اکرم کنجاہی
ایسا کرم ہوا ہے یہ مجھ پر تمام رات
لب پر رہی ہے نعتِ پیمبر تمام رات
داؤد تابش
حشر میں پھر تیرے عصیاں کا ازالہ ہوگا
آج نسبت جو اگر ذاتِ پیمبر سے ہوئی
شمشیر حیدر
وہ جن کے نام پہ مرنے کے دعوٰی دار ہیں ہم
جب ان کی مرضی کا جینا نہیں تو کچھ بھی نہیں
جنید نسیم سیٹھی
تیری امت پہ عجب وقت ہے اے میرِ امم !
بےحسی فکر سے کردار تک آپہنچی ہے
نصرت یاب
ہے اعلٰی وارفع معظم تصور
حبیبِ خدا کا مکرم تصور
یاسر رشید یاسر
آپ کی نعت ہوئی جب سے لبوں کی زینت
ہوگیا میں بھی ہم آوازِ وجودِ ہستی
صدام فدا
گلاب عشقِ نبی کا کھلا ہے جو دل میں
فدا اسی سے تو مہکا ہے عطر دانِ حیات
محمد آصف قادری
وجہِ وجودِ شمس و قمر آپ ص ہی تو ہیں
حسنِ جہانِ باغ و ثمر آپ ص ہی تو ہیں
غلام صمدانی عافی قادری
ہمیں تو پیارے ہیں فضل خدا سے یہ دونوں
اے منکروں جہاں مکہ ہے یا مدینہ ہے
حافظ عبد الغفار واجد
معافی دس گناہوں کی فقط اک بار پڑھنے سے
ملیں پھر نیکیاں بھی دس درود ان پر سلام ان پر
رفیق لودھی
مری زبان نہیں تیرے ذکر کے قابل
کہاں حضور کی باتیں کہاں ہے میرا شمار
سید عطاءالمصظفٰٰی
بجز نعت کیسے میں سب کو عطا
سناتا دکھاتا کلیجے کی ٹھنڈ
عرش ہاشمی
مدحت حضورص آپ کی لب کھولیں تو کیسے
کیا اپنا تخیل ہےتو کیا اپنے تصور
سید تنویر احمد شاہ
مجھ سے عاصی کے لیے یہ عزت و اعزاز ہے
جب دعاؤں کی مدینے میں پزیرائی ہوئی
ڈاکٹر نزرِِ عابد
صحابہ رض نے تری تعلیم اور حسنِ عمل سے
بہ ہر صورت سجائے ہیں ترے محراب و منبر
ڈاکٹر جمیل حیات
جس طرف جائیے جہاں جائے پزیرائی ہو
جس کی احمد کے گھرانے سے شناسائی ہو
سمیعہ ناز
ان کے پیکر کی جو توصیف بیاں کی میں نے
ہر کسی کو مرے افکار سے خوشبو آئی
گوہر رحمٰن گہر مردانوی
تعریفِ مصطفٰی میں بھی الفاظ کم پڑیں
اس کم سخن کو کلمہء مہمل پہ دسترس
عابد علی عابد
خیال یہ بھی نہ آیا یزیدی لشکر کو
کہ کاروان میں ننھی سکینہ ع شامل ہے
عنایت علی عنایت
جس نے سمجھا طریقِ احمد کو
پاگیا زندگی کے مقصد کو
سعادت حسن آس
مانتے ہیں آپ سا آیا نہ آئے گا نبی
برملا مہرِ نبوت ہے نشانی آپ کی
انعام الحق معصوم صابری
جس کی سنت کی آگہی ہوگی
اس کی روشن یہ زندگی ہوگی
الحاج منیر احمد
نبی سے ملنا اگر ہوگا تم کو کوثر ہے
خدا سے وعدوں کی بس پیروی ضروری ہے
سید خورشید نواز لائق بخآری
جو ضامن ہیں ہماری بخشش و رشد و ہدایت کے
ہم ان کی پاک سیرت پر درودِ پاک پڑھتے ہیں
علامہ الماس عباسی
ہو غیر یا عزیز کرو بات تم لزیز
ایسے تھے پارسا ص کے خیالات بے مثال
لیاقت بھٹہ جتوئی
زمانے بھر کا وہ محور مدینہ یاد آتا ہے
نہیں جس کا کوئی ہمسر مدینہ یاد آتا ہے
حافظ محبوب احمد
محشر کی بھی گرمی مجھے جھلسا نہ سکے گی
گر رحمتِ سرکار کا سایہ ہو میسر
شبیر حسین شبیر
بات سج آج بھی جن کی دیکھی گئی
ایسا ہے وہ مدبر ہمارا نبی
زاہد حسین
نعتِ۔ رسولِ پاک ہے تسکینِ قلب و جاں
لطف و سرور خاص اسی شاعری میں ہے
سید مختار گیلانی قادری
مدینے میں جاکر میں مر جاؤں واللہ
میں واپس نہ آؤں یہ دل کہہ رہا ہے
امجد حمید محسن
لب پہ ہو ان کی نعت اے محسن
اور برسائیں پھر گہر آنکھیں
پروفیسر سید رضا گیلانی
معراج کا تو واقعہ سب جانتے ہی ہیں ٹ
جنت کی سیر رب نے کرائی ہے کس طرح
ذوالفقار ہمدم اعوان
بلایا ہے معراج پر دیکھنے کو
خدا کے ہیں پیارے صنم کملی والے ص
پروفیسر عاصم بخآری میانوالی
سولی پہ چڑھنا پڑتا ہے ہر لمحہ دم بہ دم
مرنے کے مرحلے سے بھی دشوار نعت ہے
عبد الغنی مبارکپوری
فرمانِ مصطفٰی کا جو منکر ہے دھر میں
وہ ہی یہاں بھی خار وہاں بھی ذلیل ہے
شفیق رائے پوری انڈیا
لکھ رہا ہے اور لکھتا ہی رہے گا عمر بھر
آپ کی تعریف میں خامہ امام الانبیاء
حمزہ ارشد
التجا ہے کہ محشر کے دن ساتھ ہوں
جن کے صدقے یہ ارض و سما نور ہے
استاد انور بھٹی
نبی کا ذکر ہی بعد از خدا ہر دم کریں تازہ
دعا ہے کہ کرے اللّٰہ پھر ایسی زباں پیدا
محمد احمد زاہد
جس گھڑی ذکر کرلیا ان کا
ختم سب اضطراب دیکھا ہے
حافظ محمد سعادت علی سعادت قادری
ہو جاتی ہے ناموس ِ رسالت پہ جو قرباں
ممکن ہی نہیں جان وہ آزار میں آوے
مظہر علی کھثٹڑ مہورہ
رحمت ہے برستی جو دن رات مدینے میں
دیکھی ہے وہ خوشبو کی برسات مدینے میں
جنید آصف
ہر لمحہ بسا رکھتا ہوں میں قلب و نظر میں
ہر کیف ترے در کی فضا شاہِ مدینہ ص
عزیر حاشر
شکر صد شکر مجھے نعت عطا ہوتی ہے
عشقِ احمد میں ہنر اور نکھر جاتا ہے
تمام تحریریں لکھاریوں کی ذاتی آراء ہیں۔ ادارے کا ان سے متفق ہونا ضروری نہیں۔
