مناظر 38

مقبول ذکی مقبول
۔۔۔۔۔۔۔۔۔۔۔۔
خاکہ

خاکہ نگار :
پروفیسر عاصم بخاری ( میانوالی )

منکیرہ ، بھکر سے ہیں ۔
کبھی ان کی پہچان منکیرہ ، بھکر سے تھی ۔ آج کل اپنی ادبی محنت لگن اور ریاضت کے بل بوتے پر منکیرہ ، بھکر کی دُنیائے ادب میں شناخت اور پہچان ہیں ۔ صحرائی بھی ہیں اور کربلائی بھی ۔ اہل ِبیت علیہ السّلام سے محبّت نہیں مودّت رکھتے ہیں ۔
رنگت سانولی ، صحرائی ہے ۔
صحراؤں ، ریتلے علاقوں آندھیوں اور مشکلوں میں ہنس کے جینے کا ہنر رکھتے ہیں ۔
قد ۔ نکلتا ہوا ۔
صاحبِ ریش ہیں ۔ پابندِ صوم و صلات ہیں ۔ تعلیم میں بڑی ڈگریاں تو نہیں رکھتے البتہ خالقِ لوح و قلم نے انہیں تہذیب اور شعور کی دولت سے مالا مال کیا ہے ۔ حق و باطل اور خیر و شر کی تمیز ضرور رکھتے ہیں ۔
سیدھا سادہ ہے مگر اتنا بھی سادہ نہیں کہ لفظ اور طباعت و اشاعت کی اہمیت و افادیت سے آشنا نہ ہو ۔
آئے روز مقامی سے لے کر بی الاقوامی اخبارات رسائل و جرائد میں چھپنا اس کے بایاں ہاتھ کا کھیل ہے ۔ ان تھک اور پُر عزم ایسا کہ ملک کے کونے کونے میں منعقد ہونے والی ادبی تقاریب اس کے بغیر مکمل نہیں ہوتیں ۔۔۔۔
عمر چالیس کے لگ بھگ ہے ۔ سر کے بال تیزی سے جھڑنے کے سبب فارغ البال ہیں ۔ اور اس فارغ البالی کو چھپانے اور جوان دکھائی دینے کی بھر پور ناکام کوشش کرتے دکھائی دیتے ہیں ۔ ناوسائلی اور طوفانی مہنگائی ان کی راہ حائل نہیں ہو سکی ۔ ہمت و حوصلے ، عزم اور استقلال کا استعارہ ہیں ۔
صحت کے شعبہ سے وابستہ ہونے کے ناتے صحت کی اہمیت سے ہی آشنا نہیں لفظی صحت کا بھی خاص خیال رکھتے ہیں ۔
نظم و نثر ، اُردُو سرائیکی دونوں زبانوں میں خوب طبع آزمائی کرتے ہیں ۔
نِت نئے نظمی و نثری تجربے ان کا مرغوب مشعلہ ہیں ۔ مصاحبہ نگاری کے میدان میں انھوں نے اپنا آپ منوایا ہے ۔بھکر کی ثقافت و روایت اور اپنی مٹی سے محبّت کا اظہار ٫٫ یہ میرا بھکر ،، میں انھوں نے منفرد اور اچھوتے انداز میں کرکے مقامیت میں بازی لے گئے ہیں ۔ محاکاتی انداز میں بھکر کی تاریخ چلتی پھرتی لفظی تصویریں پیش کر کے بھکر کے شعرا میں منفرد و ممتاز مقام حاصل کر لیا ہے ۔ سالانہ ادبی جائزہ ان کا معمول اور امتیاز ہے ۔ بھکر کی ادبی تاریخ مرتب کر رہے ہیں ۔