جس پہ سرکار ﷺ کا ہو جائے کرَم
جس پہ سرکار ﷺ کا ہو جائے کرَم، وہ خوش بخت
بھول جاتا ہے سبھی رنج و الَم، وہ خوش بخت
جو ہدیّے میں اُنھیں بھیجے دُرودوں کے گلاب
یوں لگا لے جو شفاعت کی قلَم، وہ خوش بخت
جو بھی لپکے ترے روضے کی طرف، وہ خوش ذوق
تیری دہلیز پہ رکھے جو قدَم، وہ خوش بخت
تشنہء دید کو مل جائے اگر شربتِ دید
جی اٹھے ساقیء کوثر کی قسَم، وہ خوش بخت
جس کو محبوب وہی طُولِ نمازِ شب ہو
جس کے پیروں میں چلا آئے ورَم، وہ خوش بخت
اُس کی قسمت میں کوئی پیچ نہیں رہ سکتا
جس کا جیون ہو تری زلف کا خَم، وہ خوش بخت
گوہرِ نعت جو یاورؔ کو عطا ہو گیا ہے
اب کسی بات کا کرتا نہیں غَم، وہ خوش بخت
Title Photo by Hatice
اس ویب سائٹ پر شائع ہونے والی تحریروں میں بیان کردہ خیالات متعلقہ لکھاریوں کے اپنے ہیں۔ ضروری نہیں کہ iAttock.com کے مدیر یا انتظامیہ ان سے اتفاق کرتے ہوں۔
