معراج سرکارﷺ دی

سرکار دو عالم ﷺ ہوراں نوں بعثت نیں داہویں سال وچ یعنی ہجرت توں ترے سال پہلے ستائیویں رجب نوں معراج ونجنے ناں سفر اِس واسے ہویا جے اللہ پاک جہڑا شہہ رگ توں وی نیڑے ایہا۔ آپڑیں محبوب آں آسماناں نی سیر کرا کے دُوئے بندیاں واسے ہک اُسوہ ترتیب دتہ جے تُسی وی خدا نے مظاہر ویکھو تے پوری کائنات تک اپڑو، نالے  آپڑیں قابو اچ کرو ۔کیوں جے دین اسلام ہک مسیتی اچ اَجڑیں ناں ناواں نئیں بلکہ سوچ وچار تے ڈُوہگھے راز ڈھوڈڑیں نا ناواں بی اے۔ کئی بندے آکھنن جے اللہ پاک حضورؐ نا وراگا تھی گیا ایہا ۔ تے اِس واسے حضورﷺ آں اِسی مبارک تے معنبر جُسے نال  آپڑیں کول سد گِھداس۔ ای کوئی سوچاں یا صرف روحے نی گل نئیں ایہی بلکہ ہِسے جُسے نال عرشے تے گئین۔ لیکن ای بی سوچو جِہڑا اللہ شہہ رگ توں وی نیڑے اُس سونڑیں آں کائیں نا وراگ ایہا۔  اللہ پاک آپڑیں حبیبؐ نوں دنیا نے کلاوے توں وی اُتے ’’قَابَ قَوْسَيْنِ‘‘ دا نیڑ  اور ’’أَوْ أَدْنَى مقامُہ‘‘  دا انام دے کے کئی ورہے کول رکھا تے زمین اُتے اللہ پاک نے وقت وی روکا تے گھرے نیں بوئے نی کنڈی وی آپڑیں “کُن” نی طاقت نال ہلینا ریہا اے۔

قرآن کریم  نے وچ سُورہ بنی اسرائیل نی پہلی آیت وچ  اللہ پیا آکھنا جے :

” اُو (ذات) پاک اے جِہڑی ہک راتی وچ آپڑیں بندے آں  مسجد الحرام یعنی (خانے کعبہ)  چُوں  اقصیٰ نی مسیتی ( یعنی بیت المقدس ) تک گِھن گیا۔ جِتھے آل دوالے اُس نے برکتاں ای برکتاں رکھیاں ہویان ۔ تاں جے اسی آپڑیاں (قدرت نیاں ) نشانڑیاں تکئی آں۔ کوئی شک ای نئیں جے اللہ سنڑنیں تے جانڑنیں آلا اے۔”

مسجد الحرام، مکہ مکرمہ
مسجد الحرام، مکہ مکرمہ

آکھنن ! جے آپ ﷺآں کافراں بہوں تنگ کیتا تے آپ ﷺآپڑِیں داد پوتری بھینڑوں  اُم ہانیؓ نیں گھرے دئیں لگے گئے تے اُتھے ونج کے سُکھے نا ساہ گھِدا۔ اُُتھے ای  اللہ نے حکم نال حضرت جبریلؑ پنجھاہ ہزار فرشتیاں نیں جمات تے براق سواری گِھن کے نبی اکرم ﷺنی خدمت اِچ حاضر ہوئے تے عرض کیتا:

اے اللہ نے رسولﷺ، تُڈا رب، تُڈی ملاقات چاہنا اے۔

نال ای براق نی سواری پیش کیتی۔ حضورؐ براق اُتے اَجڑیں اچ ڈِھل لائی تے جبرائیلؑ ہوراں پُچھا کہ کہڑیاں سوچاں اچ او حضورؐ۔

اگو سرکار آکھنن جے مینڈے اُتے تاں اللہ ناں بہوں کرم اے ۔پر مینڈی اُمت نا پلِ صراط اُتے کہ بنڑسی۔ اس گلاں نال ای فورا اللہ تعالیٰ خُش خبری دتی جے تُڈی اُمت واسے بہوں آسانی ہوسی پُلے اُتوں انج گزرسی جے پتہ ای نہ لگسی۔ ای گل سُن کے حضور ﷺبُراق اُتے سوار ہو گئے جبرائیل امین ہوراں نے رکاب تھمی ، میکائیلؑ فرشتے نے لگام نپی، اسرافیلؑ فرشتے نے زین سنبھالی جس دے نال پنجھاہ ہزار فرشتیاں دے سلاماں دی آواز ستاں آسماناں اُتے گُونجن لگ پئی۔

جس جس جگہ توں سرکار گزردے ایہے مرحبا مرحبا دیاں آوازاں آنیاں ایہاں۔نالے درود تے سلام بلند ہونے ایہے نوریاں نے قافلے وچ حضورؐ بالکل ہِک مراجھے نی طرح نظر آنے ہوسَن۔ ویکھڑیں آلے بی بہوں مقدراں آلے ہوسن جِنہاں آمنہ

 بی بی ؓ دا لال آپڑیاں اکھیاں نال تکا ہوسی اللہ پاک وی عرشِ معلیٰ اُتے انتظار کر کے دنیا آلیاں لوگاں واسے سبق چھوڑا  جے اللہ نیں محبوب واسے انتظار دا آپڑاں ای مزہ اے۔جس نی چس ہر کینڈے نصیباں اچ نئیں ہونی۔ اج کسی نا محبوب آوے تے کنج سجاوٹ کیتی وینی۔ مانہہ تے حضرت آمنہ بی بیؓ دے لال نا آسماناں تے وَنجڑاں بہوں وکھرا تے نویکلا نظر آنا جے پتہ نئیں رب آسماناں کِتڑاں سونہڑاں سجایا ہوسی ۔کِسراں خوشبوآں سَٹیاں ہوسُس کِسراں پُھل وچھائے ہوسُس۔ جائی جائی تے حُوراں،فرشتے تے غِلمان نُوری پُھل چا کے کَھلوتے ہوسن۔ مرحبا مرحبا آکھ کے نوریاں نیں نعتاں پڑھیاں ہوسن۔ تے سونہڑیں پاک محمدؐ نیں  سُنڑ سُنڑ کے سونہڑیاں وِیسِیاں نال دیدار دتہ ہوسی۔

مسجد اقصی، قدیم شہر یروشلیم
مسجد اقصی، قدیم شہر یروشلیم

حدیث وچ آیا اے جے :۔

“بُراق نی تیز رفتاری اِنج ایہی جے جتھو تائیں  نظر نی حد ایہی ، اُو اُتھے تک قدم رکھنا ایہا۔ بُراق نا سفر اِنج تیز ی نال ہویا جس تک انسان نی عقل پہنچ ہی نہیں سکنی۔ اِنج لگنا ایہا جِنج ہر طرف موسم بہار آگیا ہووے۔ آل دوالے نور ہی نور کِھنڈنا گیا وے ۔”

حدیثاں وچ ملناں جے اس سفرے وچ  آپﷺمکہ توں مسجدِ اقصیٰ  گئے اور اُتھے تمام انبیائے کرام ؑ آں نمازاں اچ امامت کرائی۔ پھر آپ ﷺ آسماناں اُتے اللہ پاک نال ملاقات کرنے تشریف لے گئے۔ اُتھے اللہ تعالٰی نے آپ ﷺہوراں نوں  جنت اور دوزخ وکھایا۔ اُتھے انبیائے کرامؑ نال ملاقات وی ہوئی اے ۔ اِسی سفرچ  نماز بی فرض ہوئی اے۔

نمازاں نے فرضاں نی تعداد پہلے  زیادہ رکاتاں نی صورت اچ ایہی جِساں حضورﷺ نی محبت وچ کم کیتا گیا۔ پنج رکاتاں اُتے آ کے گل مکمل ہوئی جِہڑی اَج تیکر فرض سمجھ کے مومنین ادا پئے کرینن۔

حضورؐ نیں رب نال بہوں گلاں کیتیاں تے امت واسے رج رج دعائیں کیتیاں تے بخشش نے سامان کیتے ۔اللہ پاک نے حضورؐ نوں جنت تے جہنم دوہیں وکھائیاں۔ مجرماں نال کیہو جیا سلوک ہونا ۔ ای بی وکھایا جے امت نوں دس کے برائی توں منع کرو تے اچھائی نی ترغیب دیو۔ اگر واقعات لکھن لگ پواں تے ہک کتاب “قیامت کا منظر” ای بہوں تھی پوسی۔ صرف یاد دہانی ای کافی اے۔

حضور پاکؐ جس ویلے واپس آئین تے معراج نا واقعہ آپڑیں اہل بیتؑ تے نال ای صحابؓہ نوں سُنڑایا ۔ تے ساریاں ممارکھ دتی نالے تصدیق کیتی۔

حضورؐ نے معراج نے حوالے نال ای مسلماناں دسا جے اگر تُسی وی معراج کرنا چاہنے او تے تُسی” نماز قائم کرو”۔ کیوں جے ” نماز مومن نی معراج اے”۔

صحابہ پچھیا جے ای درجہ اَسی کِسراں حاصل کرئیے۔ تے آپؐ نے فرمایا۔

” جے تُسی نماز اِنج پڑھو جِنج تُسی اللہ پاک نوں ویکھنے پئے ہووو۔ اگر اِنج نہ کر سکو تے نمازاں اچ انج سوچو جے اللہ پاک تساں ویکھنا پیا وے تے ای معراج اے لیکن ای ایمان نا گَھٹ درجہ اے “

معراج توں بعد ای ثابت ہو گیا جے آسمان نیاں بلندیاں تے خلا نیاں وسعتاں بندے توں دور نئیں جے بندہ کوشش کرے۔ نالے اِنہاں نوں تسخیر بی کرے۔

اللہ تعالیٰ اَساں مسلمانڑاں  سمجھنڑ  تے عمل کرنے نی توفیق دئے۔

 میری طرفوں آقا پاکؐ، اہل بیت عظامؑ، صحابہ کرامؓ ، اولیائے کرامؒ ، تمام مومنین اور مسلمانڑاں بھراواں معراج نیاں سونہڑیاں گھڑیاں نی بہوں بہوں ممارکھ ہووے۔

سید حبدار قائم آف اٹک

حبدار قائم

سیّد حبدار قائم

اٹک

حبدار قائم

میرا تعلق پنڈیگھیب کے ایک نواحی گاوں غریبوال سے ہے میں نے اپنا ادبی سفر 1985 سے شروع کیا تھا جو عسکری فرائض کی وجہ سے ١1989 میں رک گیا جو 2015 میں دوبارہ شروع کیا ہے جس میں نعت نظم سلام اور غزل لکھ رہا ہوں نثر میں میری دو اردو کتابیں جبکہ ایک پنجابی کتاب اشاعت آشنا ہو چکی ہے

Next Post

رب کے حضور بندہء رحمٰن چل پڑا

جمعرات مارچ 11 , 2021
رب کے حضور بندہء رحمٰن چل پڑا
iattock