لالچی  – Greedy

صفدر علی حیدری 

شہر کا وہ تعلیمی ادارہ اپنی بہترین شہرت کی وجہ سے پہچانا جاتا تھا، مگر اس کا پرنسپل، شاکر صاحب، ایک عجیب مزاج کا آدمی تھا۔

وہ اساتذہ کی عزت کرنے پر یقین نہیں رکھتا تھا۔ تنخواہ پوری دینا تو جیسے اس کے اصولوں کے خلاف تھا۔ کبھی معمولی شکایت پر کٹوتی، کبھی ایک دن کی چھٹی پر کٹوتی، کبھی کسی معمولی بہانے سے چند ہزار روپے کاٹ لیتا۔ اگر کہیں سے کوئی نیا استاد دو چار ہزار روپے کم تنخواہ پر مل جاتا تو برسوں سے خدمات انجام دینے والے سینئر استاد کو ذرا سی بات پر بے عزت کرکے فارغ کر دیتا۔

ایک دن اس کا پرانا دوست اس سے ملنے آیا۔ شاکر صاحب غیر معمولی طور پر پریشان دکھائی دے رہے تھے۔

دوست نے پوچھا، "خیریت ہے؟ آج بڑے اُداس لگ رہے ہو۔”

شاکر صاحب نے ٹھنڈی سانس بھری۔

"ہمارا سب سے بہترین استاد آج استعفا دے کر چلا گیا۔ اسی کی محنت سے ہر سال ادارے کا بہترین رزلٹ آتا تھا۔”

دوست نے کہا، "اس نے جانے کی کوئی وجہ تو بتائی ہوگی؟”

شاکر صاحب نے ہونٹ سکیڑتے ہوئے جواب دیا،

"اور کیا وجہ ہوگی؟ کہیں دو چار ہزار روپے زیادہ مل گئے ہوں گے۔ لالچی کہیں کا! یہ ٹیچر ہوتے ہی ایسے ہیں۔ جتنی عزت کرو، اتنا ہی سر پر چڑھتے ہیں۔”

دوست خاموشی سے اسے دیکھتا رہا۔

اسے معلوم تھا کہ دو چار ہزار روپے کے لیے بہترین اساتذہ کھونے والا شخص کسی اور کو نہیں، اپنے ہی عکس کو لالچی کہہ رہا تھا۔

صفدر حیدری اُچ شریف

میرا نام صفدر علی حیدری ہے ۔ پیدائش علی پور ضلع مظفر گڑھ کی ہے لیکن پلا بڑھا اوچ شریف میں ہوں اور رہائش بھی اسی شہر میں ہے ۔ایم فل اردو ہوں ایک استاد ہوں اور پچھلے تیس سال سے پڑھا رہا ہوں ۔ لکھنے کا آغاز بچپن سے کیا ۔ کالم نگاری بھی کی نامہ نگاری بھی ،پھر افسانہ نگاری اور افسانچہ نگاری کی طرف متوجہ ہوا ۔اب تک میری بارہ کتب شائع ہو چکی ہیں پچیس کتب زیر طبع ہیں شائع شدہ کتب کی تفصیل حسب ذیل ہے میری ایک کتاب کالمز پر ہے ” شہر خواب ” ایک ناول ہے ” عمران بٹہ عمران ” چار کتابیں ادب اطفال پر ہیں ” گھڑی کی ٹک ٹک ” ” ایک پہیے کی سائیکل” ” کمزور چوزا ” ” منٹو میاں ” چار افسانوں پر ہیں "مٹھی میں کائنات” ” ناقابل اشاعت ” ” من و سلویٰ ” ” الف سے یے تک ” ایک افسانچوں پر ہے ” ایک صفحے کے افسانچے ” میری تمام کتابوں پر ایم فل ، ایم اے اور بی ایس کی سطح پر کام ہو چکا ہے