اَنّھِی مَا

ہر بندہ زندگی گزارنا تے سیانا ہونے توں گھِن کے مرنے تونڑیں باؤں ساریاں گلاں واقعات تے زندگی نے کئی موڑ اُساں یاد رہ وینن۔بندے نی زندگی اُتے ااُس نے اُرے پرے رہنے آلے لوگ بی اثر انداز ہونن۔کئی عام جیہاں گلاں بی بندے آں یاد رہ وینیان جیہڑیاں اُ س بندے واسے تاں خاص ہونیان پر لوکوں واسے عام گلاں ہونیان۔میں مثال دینا واں۔ہک واری نکیا ہونیاں میں گُڈی اڈانیاں اُڈانیاں ہک انھے کھوہے وِچ ونج لگاں۔میں بختاں آلاں ایّاں بئی اُس پاسے ہک مائی بھاری سٹنے آں آئی تے مینڈے رونے نی آواز سُن کے کھوئے کول آ گئی۔مانہہ ویکھ کے رولا پایاس لوک اکٹھے ہو گئے مانہہ کھوہے چوں باہر کڈیا نے۔میں گھار آ یاں تے گھرے آلیا ں پورے دو سیر گُڑ منگوایاتے میں مینڈے سر صدقے نے طور میں آپنے ہتھوں ونڈیا۔ایہجوں ای ہک واری سڑاں تے کُتا بی لڑیا۔ہک واری بیری آں وٹے مارنیا ہک وٹا سرے چ لگا تے بؤں لہو وگا۔
ہن مطلب نی گل کرنا واں۔اوہ جمنیا نی انھی ائی اکھیاں چِٹیاں شفید ایّاں س۔جیہا سوہنڑا نا ایّاس مانہہ ہُن مانہہ وسر گیا۔قرآن شریف نی حافظہ ائی اندُر ایہجا چالنا ایّاس جے سارے گرائیں چ پھِرنی ائی دروازہ کی کداں سوٹی لا کے دس چھوڑنی ائی کہ ای ملکاں نا گھار اے یا سیّداں نا گھار اے۔ہک واری میں اُسّاں دسیا میں ماسٹر شاہ فردوس ہوراں نا پُتر آں تے وت اُس توں بعد مانہہ دسنے نی لوڑ نئیں پئی۔میں اُس کولوں حال پُچھنا ایّاں تے اوہ مانہہ سیان وینی ائی۔
​جس گھار موت مرگ ہونی ائی تے لوک اُساں آنڑ کے بٹھا چھوڑنے ائے تے اوہ قرآن شریف نی تلاوت کرنی ائی۔اُچے اُچے کلمے بی پڑھنی ائی تے پرانی طرز نیاں نعتاں بی پڑھنی ائی۔کدے کسی اگے ہتھ نئیں دھریا ایاس۔ہر کیں آں سو سو دعاواں دینی ائی۔کیں بندے نال گلہ شکوہ بی کدے نئیں کیتا ایاس۔
​سن 1976ء نیاں وڈیاں بارشاں توں پہلے اسی کیمبلپور آگئے جے بابا جی نا تبادلہ پائیلٹ سکول وِچ ہو گیا ایا۔میں تاں چوتھی جماعتاں چ پڑھنا ایاں۔کوئی گرائیں نا بندہ مِل وینا ایا تے جِتھے ہور بندیاں نال حال حوال پُچھنا ایاں اُتھے انھی ماؤ نا بی پُچھنا ایاں وَت ہیلے ہیلے شہری ای ہو گئے آں گراں شراں تے اس نیاں یاداں مدھم پاؤں لگ پیان۔اُس دیہاڑے ماسٹر عارف ہوری ملین تے انھاں دسیا انھی ما غالباً 1997ء وچ فوت ہوئی۔اللہ تعالیٰ بخشس۔میں سمجھنا گرائیں وِچ اُس نال تے اوہجے ہور لوکاں نال بؤں وڈی برکت ائی۔ہُنے نی تے گَل ای نا نہہ کرو۔۔۔۔۔

ثقلین انجم
سیّد ثقلین انجمؔ – مدیر اعلی ششماہی پنجابی مجلہ ونگاں

ثقلین انجم

Next Post

قُرآن کی رُو سے حق اور باطل کیاِ ہے ؟ -1

جمعہ جنوری 15 , 2021
حق عربی زبان کا لفظ ہے ، مگر فارسی ، اُردو پنجابی میں بھی اس کے معانی و مطالب عربی سے چنداں مختلف نہیں ہیں
نوائے مونس

مزید دلچسپ تحریریں