Tag: مسقط

کاتب : شاندار بخاری

مقیم مسقط

میری آج کی یہ مختصر سی تحریر ایک اہم اور سنجیدہ مسلئے کے بارے میں ہے جو کہ عام طور پر مسئلہ لگتا نہیں مگر ہوتا ہے صرف ہماری جانب سے غفلت اور عدم توجہی کا شکار ہے۔

یہ بات آپ کے مشاہدے میں بھی آئی ہوگی کہ اکثر لوگ ایک دوسرے کا نام بگاڑ کر انہیں مخاطب کرتے ہیں جو کہ اکثر اوقات تو بڑے عجیب و غریب و معیوب ہوتے ہیں اور اکثر نہایت ہی منفرد ، بعض اوقات کچھ نام ہمیں تو عجیب لگتے ہیں مگر پکارنے والے اور پکارے جانے والے شخص کو بوجوہ پسند اور قبول ہوتے ہیں۔ مثال کے طور پر سن اسی کی دہائی میں جو عزت ماب سفیر صاحب یہاں تعینات تھے ان کا پورا اور اصل نام تو مجھے اس وقت یاد نہیں آرہا لیکن ان کو لوندخوڑ صاحب کہ کر پکارا جاتا تھا یہ نام جو کہ ان کی علاقائی نسبت کی وجہ سے تھا  لیکن جو لوگ مردان کے اس گاوں سے واقف نہیں تھے انہیں بڑا دلچسپ لگتا تھا۔ اسی طرح ہمارے معاشرے میں عموما عبدللہ کو دولا ، سلیم / سلمان کو سلو اسی طرح یاد آیا مشہور گلوکار نصرت فتح علی کا پیدایش کے بعد نام پرویز تھا جو کہ بعد میں بدل کر نصرت رکھا گیا اور ان کے پرانے دوست احباب آج بھی انہیں پرویز کا مختصر پیجی ( پے جی ) ہی کہ کر یاد کرتے ہیں۔

نام خواہ وہ کسی شخص کا ہو یہ پھر جگہ کا ہو اس سے اس کی پہچان ہوتی ہے ہمارے شہر اٹک کا نام جوکہ تاریخی اہمیت کا حامل ہے لیکن برٹش دور میں اس وقت کےفوجی افسر کیمپبل کے نام پر کیمپبل پور رکھ دیا گیا تھا اور سن ستر کی دہائی میں پھر سے بدل کر پرانا نام اٹک رکھ دیا گیا تو جیسے لوگوں کے نام اکثر بوجوہ بدل دیے جاتے ہیں اسی طرح کئی ملکوں اور شہروں کے نام بھی اب بدل چکے ہیں سبیل مثال ساہیوال کا پرانا نام منٹگومری تھا ، فیصل آباد کا پرانا نام لائل پور تھا اسی طرح دنیا کے بیشتر ممالک کے نام مختلف زبانوں میں مختلف ہیں یہاں عرب ممالک میں جرمنی کو المانیا کہتے ہیں ، اٹلی کو ایطالیا ، فرانس کو فرنسا اور آسٹریا کو نمسا کہتے ہیں ، سعودیہ عرب کا نام 1932 سے پہلے مملکہ حجاز و نجد تھا ، مدینہ منورہ کا پرانا نام یثرب تھا جوکہ رسول ﷺنے بدل کر مدینہ رکھ دیا یثرب میں بخار کی وباء عام تھی بڑی شدت کا بخار ہوتا تھا اکثر آنے والے اس میں مبتلا ہو جاتے تھے رسول ﷺنے یثرب کی مشقتیں جھیلنے پر جنت کی بشارت سنائی اور اس کا نام طیبہ رکھ دیا تو نام بدلنے کی برکت سے مدینہ منورہ کی فضاء اللہ کے فضل و کرم سے خوشگوار ہو گئی۔ رسول ﷺنے خواب میں دیکھا کہ کالی کلوٹی عورت مدینہ منورہ سے نکل کر حجفہ جہاں یہودیوں کی آبادی تھی کی طرف چلی گئی آپ ﷺنے فرمایا کہ وہ وباء جو ہوا کے خراب ہونے سے پھیلتی تھی یہاں سے منتقل ہو گئی ہے اس سے یہ بات واضح ہوتی ہے کے ناموں کا منفی ور مثبت اثر ہوتا ہے۔ اسی طرح آپ نے کئی صحابہ کرام کے نام بھی بدلے اور کئی صحابہ کرام اور اہل بیت کو پیار سے مختلف ناموں سے پکارا، بات نکلی ہے تو میں آپ کو چند ایک چیدہ چیدہ برگزیدہ ہستیوں کے اصل نام اور القاب بتاتا چلوں کیونکہ عربوں میں القاب یا کنیت کا بڑا روج رہا جو کہ آج بھی ہے ، سب سے پہلے شہید ہونےوالی صحابیہ ام عمار ( عمار کی والدہ ) کا اصل نام سیدتنا سمیہ ر۔ض تھا ، ابو ھریرہ ر۔ض  کا اصل نام عبدالحمن تھا ، حضور ﷺکے چچا اور حضرت علی کرم اللہ وجہہ کے والد حضرت ابی طالب کا اصل نام عمران تھا۔

شیکسپیئر نے کہا تھا ” نام میں کیا رکھا ہے ” لیکن ہم اس بات سے اتفاق نہیں کرتے کیونکہ نام سے ہی تو پہچان ہوتی ہے اور اسلام کے اصولوں کے مطابق کسی کا نام بگاڑنا ایک بڑا گناہ ہے۔   بحث کو سمیٹتے ہوئے حاصل یہی ہے کہ کسی شخص کو پکارتے ہوئے یا کسی جگہ کی نشاندھی یا حوالہ دیتے ہوئے اچھے اور مہذب الفاظ کا چناو کریں یہاں یاد آیا ایک مرتبہ ایک قانونی معاملہ کیلئیے جمع کروائے گئے فارم میں گواہ کا نام لکھنا تھا تو گواہ صاحب نے مجھ سے قلم مانگا اور اپنے نام سے پہلے حضرت مولانا فلاں بن فلاں لکھ دیا جو کہ بہت ہی تعجب کی بات تھی اور کسی شخص میں اتنی خود پسندی میں نے پہلے نہیں دیکھی تھی ، ایک اور واقع یاد آ گیا ہوا یوں کہ مجھے دفتر کے کام کے سلسے میں ایک جگہ جانے کا اتفاق ہوا اور وہاں کہ متعلقہ افسر نے میرے آتے ہی باآواز بلند کہا ٹھنڈا پانی ! میں نے ان کا شکریہ ادا کیا اور کہا کہ مجھے طلب نہیں ہے جس پر وہ صاحب مسکرائے اور کہا کہ مین تو اپنے دفتر کے ملازم کو بلا رہا ہوں جس کا اصل نام تو ڈنڈا پنی ہے لیکن اب بگڑ کر ٹھنڈا پانی ہوگیا ہے۔

تحریر :سیدزادہ سخاوت بخاری 
ہماری نئی نسل تاریخ سے آگاہ نہیں ۔ نصابی کتابوں میں بھی اس بات کی کوشش نہیں کی گئی کہ آنیوالی نسلوں کو حقائق سے روشناس کرایا جاسکے ۔ یہی نہیں بلکہ 1971 کے بعد سے پاکستان میں جس سیاسی طرز عمل اور سوچ نے اودھم مچایا ، اس کے نتیجے میں سچ اور جھوٹ گڈ مڈ ہوکر رہ گیا اور آج کا ہمارا نوجوان یہی سمجھتا ہے کہ جنرل نیازی ڈرپوک تھا ، اس نے ھتھیار ڈال دئے ۔ یحیی خان غدار تھا اس نے ڈھاکہ ڈبو دیا ۔ ہمارے 90 ھزار فوجی قید کرلئے گئے وغیرہ ، جبکہ حقائق اس کے برعکس ہیں ۔ 
کہانی کو ٹاپ گئیر لگانے سے پہلے یہ بتانا ضروری ہے کہ دسمبر 71 میں جب سقوط ڈھاکہ ( Fall of Dhaka )ہوا تو میں پنجاب یونیورسٹی سے  گریجویشن کرچکا تھا لھذا بہ قائمی ہوش و حواس اس سارے منظر کا چشم دید گواہ ہوں ۔ میری باتیں کتابی اور سنی سنائی نہیں بلکہ آنکھوں دیکھا حال ہے ۔ 
آئیے تھوڑا سا پیچھے جاکر تاریخ سے پوچھتے ہیں کہ بنگال کی اصل کہانی ہے کیا ؟ اور وہ اس لئے کہ مغربی اور مشرقی پاکستان تو 1947 میں ، معرض وجود میں آئے جبکہ متحدہ بنگال کا  معاشرہ اور سیاست اس سے بہت پہلے سیاسی اتھل پتھل کا شکار ہوچکے تھے ۔
برطانوی ھند میں بنگال سب سے بڑا صوبہ تھا ۔ تقریبا 2 لاکھ مربع میل رقبہ اور ساڑھے آٹھ کروڑ آبادی لھذا اس وقت کے وائسرائے ھند لارڈ کرزن کی سفارش پر اسے 1905 میں ،  دو انتظامی حصوں ،  یعنی مشرقی اور مغربی بنگال میں تقسیم کردیا گیا کیونکہ اتنے بڑے علاقے اور آبادی کی صحیح طرح سے دیکھ بھال اور کنٹرول مشکل کام تھا ۔ یاد رہے متحدہ بنگال میں  عددی اکثریت ھندو ہی کی تھی لیکن مشرق میں مسلمان اکثریت میں آباد تھے لھذا جب مشرقی بنگال ( بعد میں مشرقی پاکستان ) وجود میں آیا تو مغربی بنگال / کلکتہ کا ھندو سٹپٹا اٹھا کیونکہ اس وقت صنعت ، تجارت ، وکالت اور صحافت پر ان کی مکمل اجارہ داری تھی لھذا انہیں خوف محسوس ہوا کہ اب مشرقی حصے کا مسلمان ، جو وھاں اکثریت میں تھا ،  ان تمام شعبوں میں آگے آکر ہمارے مالی مفادات کو نقصان پہنچائیگا ۔ ڈھاکہ ھائیکورٹ قائم ہوئی تو کلکتہ کے ھندو وکیل بے روزگار ہونگے ۔ نئے اخبارات شائع ہوئے تو کلکتہ کی صحافت گئی ۔ اسی طرح تجارت اور صنعت بھی الگ ہوگی تو ہم کہاں جائینگے ۔ ان سب عوامل کو لیکر بنگالی ھندو نے  واویلہ شروع کردیا اور انگریز کے اس فیصلے کے خلاف باقائدہ تحریک شروع ہوگئی جسے سودیشی تحریک کے نام سے یاد کیا جاتا ہے ۔ برطانیہ اور اس کے اتحادیوں کی مصنوعات کے بائیکاٹ کی مہم چلائی گئی تاکہ انگریزوں پر زور ڈال کر تقسیم کا فیصلہ منسوخ کرایا جاسکے ۔ مانچیسٹر چیمبر آف کامرس کو باقائدہ خط لکھ کر کہا گیا کہ اگر بنگال میں تجارت کرنی ہے تو برطانیہ اپنا یہ فیصلہ واپس لے ۔ جب اس پہ بھی بات نہ بنی تو ایک مذھبی کٹر پنتھی گروہ ، دھارمک چورن لیکر میدان میں آگیا کہ بنگال کی تقسیم دراصل ہماری ماں ” کالی ماتا ” کی تقسیم ہے جسے برداشت نہیں کیا جاسکتا ۔ آپ جانتے ہونگے کہ بنگال کا ھندو کالی ماتا ” کالی کلکتے والی ” کا پجاری ہے اور اس کے نزدیک سارا بنگال ماں کی سرزمین ہے ۔ قصہ مختصر مصنوعات کے بائیکاٹ اور ھنگاموں کے خوف سے انگریزوں کو  بالآخر 1911 میں تقسیم بنگال کا فیصلہ واپس لینا پڑا ۔ اسی عرصے میں جب مسلمانوں نے ھندووں کا یہ رویہ دیکھا کہ وہ ہمیں خوشحال نہیں دیکھ سکتے تو 1906 میں اپنے حقوق کے تحفظ کے لئے ، ڈھاکہ میں نواب سلیم اللہ خان کے گھر پر جمع ہوکر مسلم لیگ کے نام سے ایک جماعت قائم کرلی ۔ اس جماعت کے تاسیسی صدر نواب وقار الملک اور باقائدہ صدر سر آغا خان سوئم ( شش امامی ، اسماعیلی شیعہ)  منتخب ہوئے ۔ 
یہاں چند نکات قابل غور ہیں ۔
1. کلکتہ کےھندو نے ، مسلم اکثریتی علاقے مشرقی بنگال کی خود مختاری کو اپنے مفادات کے خلاف سمجھتے ہوئے قبول نہ کیا ۔
2. مسلم لیگ بنگالیوں نے ڈھاکہ میں بنائی اگرچہ اس میں ملک بھر کے مسلم ذعماء شریک تھے لیکن ان میں قائد اعظم کا نام شامل نہیں کیونکہ وہ بعد میں اس جماعت کے رکن بنے ۔ 
اوپر بیان کئے گئے تاریخی حقائق اور نکات کو ذھن میں رکھ کر آجائیے یوم آذادی 14 اگست 1947 تک ۔ پاکستان بن گیا لیکن زمینی لحاظ سے دو حصوں میں تقسیم اور ان دو ٹکڑوں کے درمیان ایک ھزار میل یا 1600 کلومیٹر کا فاصلہ ۔ ایک دوسرے سے کٹے ہوئے ، زبان الگ ، کلچر الگ ، موسم الگ ، خوراک الگ اس کے باوجود اگر کوئی رابطہ یا رشتہ ڈھونڈا جاسکتا ہے تو وہ تھا اسلام ۔ میرے خیال سے یہی سب سے بڑا رشتہ تھا،  اور ہے ، لیکن اے کاش ہم سچے مسلمان بھی ہوتے تو وہ دن نہ دیکھنا پڑتا جس کی یاد میں مجھے یہ سطور لکھنا پڑرہی ہیں ۔ یہاں یہ بتانا بھی ضروری ہے کہ تقسیم ھند کے فارمولے کو تسلیم کرتے وقت بعض مسلم ذعماء نے قائد اعظم سے کہا تھا کہ مشرقی بنگال کے بدلے دلی تک کا علاقہ لے لیں کیونکہ بنگال زمینی طور پر اس ٹکڑے سے جڑا ہوا نہیں جو مغرب میں ہمیں دیا جارھا ہے ، لیکن قائد کا جواب تھا کہ تحریک آذادی کی بنیاد بنگالی مسلمانوں  نے رکھی انہیں کس طرح چھوڑ دیا جائے ۔ 
آذادی کے بعد پہلا اختلاف قومی زبان پر اٹھا ۔ جب قائداعظم نے اردو کو واحد قومی زبان قرار دیا تو ڈھاکہ یونیورسٹی کے طلباء نے اس پر اعتراض اٹھادیا ۔ یاد رہے ان طلباء کی قیادت اس وقت کے طالب علم راھنماء اور بعد میں بنگلہ دیش کے بانی شیخ مجیب الرحمان کررہے تھے ۔ 
وجہء تناذعہ صرف زبان ہی نہ بنی بلکہ تقریبا پوری کی پوری بیوروکریسی ، تقسیم کے وقت وھاں مہاجر بن کر آنے والے بہاری اور اڑیسہ وغیرہ کے مسلمانوں سے لی جاتی یا مغربی پاکستان سے بھیجی جاتی رہی جن میں اردو اسپیکنگ اور پنجابی شامل ہوتے تھے ۔ اس بات کا برا نہ منایا جائے تو حقیقت یہی ہے کہ پاکستان کے ابتدائی ایام میں سول افسران کی اکثریت ان ہی لوگوں پر مشتمل تھی جو یو پی ، بھوپال ، بہار ، دلی ، حیدر آباد دکن اور مشرقی پنجاب سے ھجرت کرکے اپنے نئے وطن پاکستان آئے تھے اور یہ رسم آخر تک جاری رہی ۔ اس صورت حال میں بنگالی یہ سوچنے پر مجبور ہوئے کہ سفید انگریز گئے اور کالے یا بھورے آگئے ۔ آخر آذادی کہاں ہے ؟  دارالحکومت پہلے کراچی اور پھر اسلام آباد ۔ یہاں اس بات کا بھی ذکر کردوں کہ ہمارے نوجوان جو آج صدیق سالک ، صفدر محمود  اور کئی دیگر لکھاریوں کی کتابوں کے حوالے دیکر مشرقی پاکستان کی محرومیوں کا ذکر کرتے ہیں انہیں ان لکھاریوں سے یہ بھی پوچھ لینا چاھئے تھا کہ آپ پنجابی اور اردو اسپیکنگ ہوکر وھاں کیا لینےگئے تھے ۔ 
پنجابی اور اردو اسپیکنگ افسران کے بارے حقائق پیش کرتے ہوئے مجھے احساس ہے کہ بعض قارئین اس کا غلط مطلب بھی لے سکتے ہیں لیکن میں یہ بات بھی واضع کردینا چاھتا ہوں کہ ان ہی افسران نے اپنی قابلیت ، ذھانت اور تجربے کی بنیاد پر اس نوزائیداہ ملک کو اپنے پیروں پر کھڑا کیا ۔ یہاں بات بنگال کی ہورہی ہے کیونکہ وہاں معاملہ الگ تھا ۔ ایک مکمل بنگالی معاشرے پر آپ نے سب کے سب یا بھاری اکثریت میں وہ لوگ بٹھا دئیے جو  ان کی زبان جانتے ہیں ، ثقافت سے واقف ہیں اور نہ ہی وھاں کے رسم و رواج کا علم رکھتے تھے ۔  اور کیا بنگالی اتنے گئے گزرے تھے کہ سول افسر تک نہ بن سکیں ۔ کیا آج وہی بنگالی بنگلہ دیش کو نہیں چلا رہے ؟ 
اب آجائیں شروع میں بیان کی گئی تقسیم بنگال کی کہانی کی طرف ۔ جب بنگالیوں میں احساس محرومی بڑھنا شروع ہوا تو کالی ماتا کے پجاری جو انگریز کے زمانے سے تقسیم بنگال کے خلاف تھے ، بنگالیوں کے احساس محرومی کا ھتھیار لیکر  پروپیگنڈے کے میدان میں اتر آئے  ۔ انہوں نے پاکستانیت کے خلاف بنگالی نیشنل ازم کو ابھارا ، پیسے کے زور پر اپنے ایجنٹ پیدا کئے اور اس طرح علیحدگی پسندی پروان چڑھنا شروع ہوئی لیکن ہمارے سیاست دان خواب خرگوش کے مزے لیتے رہے ۔ کسی نے بنگالیوں کے دکھوں کا مداوا نہ کیا ۔ یہ کہ دینا تو آسان ہے کہ بنگالی غدار تھے ، شیخ مجیب شروع سے علیحدگی پسند خیال کا حامی تھا لیکن کیا کسی نے ان کو برابر کا پاکستانی بنانے کی بھی کوئی کوشش کی ؟  
یہ سچ ہے کہ شیخ مجیب الرحمان شروع سے بنگالی نیشنل ازم کے پرچارک تھے لیکن اگر انہیں قومی دھارے میں لے آیا جاتا تو وہ کبھی بھی علیحدگی کی طرف نہ جاتے ۔ ھندوستان  ابتداء  سے پاکستان کے وجود کے مخالف تھا اور اب بنگالیوں تئیں ہمارے غیر منصفانہ روئییے نے اس کے ھاتھ میں بنگالی کارڈ تھما دیا ،  جسے اس نے خوب خوب کھیلا ۔ اگرچہ ایوب خان کے دور میں ہماری خفیہ ایجنسی نے مغربی بنگال کے شھر اگر تلہ میں ایک پاکستان مخالف تحریک کا سراغ لگالیا جس کے نتیجے میں شیخ مجیب کو اگرتلہ سازش کیس میں گرفتار کرلیا گیا لیکن اس وقت کے تمام سیاست دانوں نے ایوب خان پر پریشر ڈال کر اسے رھائی دلادی ۔ اگر اس وقت شیخ مجیب کو رہا کرانے کی بجائے مشرقی پاکستان میں اصلاحات کی جاتیں , بنگالیوں کو سول سروس اور دیگر ذمہ داریوں پر بٹھا دیا جاتا ، ان کے جائز مطالبات مان لئے جاتے تو شیخ مجیب کے غبارے سے ہوا نکل جاتی اور آگے چل کر صورت حال مختلف ہوسکتی تھی ۔ 
نہائت اختصار کے ساتھ لکھ رہا ہوں لیکن بات طویل ہوتی چلی جارہی ہے ۔ ایوب خان رخصت ہوئے ، جنرل یحیی خان تشریف لائے اور 1970 کے الیکشن میں شیخ مجیب نے مشرقی پاکستان سے دو کے علاوہ تمام نشستیں جیت لیں ۔ مغربی پاکستان سے ذوالفقار علی بھٹو کی پارٹی بڑی جماعت بن کر ابھری ۔ اب یہاں کل پاکستان کی سطح پر شیخ مجیب کی جماعت پہلے نمبر پر تھی اور پیپلزپارٹی دوسرے نمبر پر لیکن بھٹو مرحوم نے نعرہ لگایا ، ” ادھر ہم ادھر تم ” اور اسی ہم تم نے کام تمام کردیا ۔ 
اس وقت کے تمام سیاسی تبصرہ نگاروں کا خیال تھا کہ اگر شیخ مجیب کو وزیراعظم بنا دیا جاتا تو سانحہ مشرقی پاکستان سے بچا جا سکتا تھا لیکن ہمارے یہاں کے سیاسی راھنماوں کو اس کے 6 نکات پر اعتراض تھا کہ اس سے فیڈریشن کمزور ہوجائیگی ۔ یہ الگ بات کہ بعد میں ملک ہی ٹوٹ گیا ۔ کیا یہ بہتر نہ ہوتا کہ ہم شیخ مجیب کو ساتھ رکھ کر ایک ڈھیلی ڈھالی کنفیڈریشن بنالیتے تاکہ ہمارے دو قومی نظریئے کا بھرم قائم رھتا ۔ پاکستان ٹوٹنے سے بچ جاتا اور اندرا گاندھی کو یہ کہنے کا موقع نہ ملتا کہ ، 
” آج ہم نے دو قومی نظریئے کو خلیج بنگال میں ڈبودیا ” 
قصہ کوتاہ ، فلم ” ادھرہم ادھر تم ” اور ہماری آپسی لڑائی کے  منظرنامے پر ھندوستان کی گہری نظر تھی لھذا انہوں نے پہلے سے اپنے زر خرید ھندو و مسلم بنگالیوں پر مشتمل جو خفیہ تنظیم ،  ” مکتی باھنی ” یا نجات دھندہ قائم کرکے پاکستان مخالف پروپیگنڈہ شروع کررکھا تھا اسی کے ذریعے گوریلا وار کی ابتداء کردی ۔ ہماری فوج پر حملے ہونے لگے ۔ پلوں کو اڑایا جانے لگا ۔ اور بالآخر جنرل جگجیت سنگھ اروڑا کی قیادت میں بھارتی فوج مشرقی پاکستان میں داخل ہوگئی کیونکہ وہ زمینی طور پر جڑے ہوئے تھے جبکہ ہم 1000 میل دور بیٹھ کر کچھ بھی کرنے کے قابل نہ تھے ان حالات میں  جنرل نیاذی کے پاس ھتھیار پھینکنے کے علاوہ کوئی چارہ نہ تھا ۔ انہیں بزدل اور ڈرپوک کا طعنہ دینا اس لئے مناسب نہیں کہ ایک تو انڈیا کے مقابلے میں وھاں ہماری فوج بہت کم تھی دوسرا کمک پہنچانے کا کوئی راستہ نہ تھا تیسرا اور اہم عنصر یہ کہ بھٹو مرحوم نے ادھر ہم ادھر تم کا نعرہ لگاکر بنگالیوں کو ،  جو الیکشن جیت چکے تھے ،  یہ پیغام دیدیا کہ تمہارا وزیر اعظم نہیں بن سکتا ۔ بنانا ہے تو وہیں بنالو ۔ اس بات پر بنگالی بپھر گئے ۔
پیپلز پارٹی کے موجودہ جیالے اس بات کی نفی کرتے ہیں لیکن میں (راقم ) اس وقت پیپلز پارٹی کے بانی و متحرک اراکین میں شامل اور عھدیدار تھا اس لئے بھٹو مرحوم کا یہ بیان براہ راست ان کی زبان سے سنا ۔ یہی نہیں بلکہ جب یحیی خان نے منتخب قومی اسمبلی کا اجلاس ڈھاکہ میں بلانے کا اعلان کیا تو یہ بھٹو صاحب ہی تھے جنہوں نے جلسہء عام میں کہا کہ جو ممبر ڈھاکہ جائیگا اس کی ٹانگیں توڑ دی جائینگی ۔ رہی یحیی خان کی بات کہ وہ کیا کررہے تھے تو عرض ہے ایک تو سیاست دانوں نے ملکی حالات کو اس مقام پر پہنچادیا تھا کہ جہاں سے واپسی ممکن نہ تھی دوسرا یہ ،  کہ ،  اس محمد شاہ رنگیلا ثانی کو گجرات کی حسینہ اقلیم اختر رانی عرف جنرل رانی سے فرصت ہی کب تھی کہ اس طرف توجہ دیتے ۔  یہاں آپ کے علم کے لئے یہ بھی بتاتا چلوں کہ آج کا معروف گلوکار و اداکار فخر عالم ، اسی اقلیم اختر رانی کا نواسہ ہے ۔ 
اس حقیقت کے باوجود کہ یحیی خان ، شراب اور شباب کا رسیا تھا ،  ایک فرد کی کوتاہی کو پوری پاک فوج کے کھاتے میں نہیں ڈالا جاسکتا کیونکہ ہمارے بہادر افسروں اور سپاھئیوں نے مشرقی پاکستان کی حفاظت کے لئے اپنی جانوں کے نذرانے پیش کئے اور زندہ بچ جانیوالوں نے دو سال تک  بحیثیت جنگی قیدی ، بھارت کے کیمپوں میں گزارے ۔ میرا تعلق فوجی خطے سے ہے اور میں ایسے متعدد فوجیوں کے بارے جانتا ہوں کہ جو مشرقی محاذ سے کبھی واپس نہ لوٹ سکے ۔ ان کی مائیں اپنے بیٹوں کا انتظار کرتے کرتے اس دنیاء سے رخصت ہوگئیں ۔ میرے دو چچا زاد بھائی  سرور حسین شاہ اور اصغر علی شاہ جو پاک نیوی میں خدمات انجام دے رہے تھے ۔ مشرقی پاکستان کی فوجی بندرگاہ چاندپور سے گرفتار ہوکر جنگی قیدیوں کی حیثیت سے کیمپ نمبر 94 رام گڑھ بھارت پہنچ گئے ۔ مجھے وہ لمحات یاد ہیں جب ہمارے گھروں میں خواتین آہ و بکا کرتی تھیں ۔ 
مختصرا یوں سمجھ لیں کہ سانحہ مشرقی پاکستان کی بنیادی وجوھات میں ، بھارت کا روز اول سے پاکستان کو توڑنے کا خواب ، شیخ مجیب کے اندر علیحدگی کے جراثیم ، جنہیں بنگالیوں کے ساتھ ہمارے روئیے نے توانائی بخشی ، اور ذولفقار علی بھٹو کی حوس اقتدار ، اس سانحےکو ، منطقی انجام تک لے گئی ۔ عجیب اتفاق ہے کہ پاکستان کو توڑنے میں مددگار ثابت ہونے والے یہ تین کردار ، اندرا گاندھی ، شیخ مجیب الرحمن اور ذوالفقار علی بھٹو میں سے کوئی بھی طبعی موت نہیں مرا ، بلکہ شیخ مجیب کو خود بنگالی میجر ڈالم نے ، ان کی دھان منڈی ڈھاکہ والی ، رھائیش گاہ کے اندر گھس کر ، پورے خاندان سمیت گولیوں سے بھون ڈالا ۔صرف حسینہ واجد بیرون ملک ہونیکی وجہ سے بچ گئیں جو اب شیخ مجیب کی  اکلوتی بیٹی اور نشانی ہیں ۔ اندرا گاندھی کو ان کے سکھ باڈی گارڈز نے ،  دربار صاحب امرتسر پر فوج کشی کرنے کی پاداش میں ،  ان کی رھائیش گاہ صفدر جنگ روڈ دلی کے احاطے میں اسٹین گن سے موت کے گھاٹ اتار دیا اور ذوالفقار علی بھٹو ، نواب محمد احمد خان قصوری کے قتل کا حکم دینے کے الزام میں ، تارا مسیح کے ھاتھوں پنڈی جیل میں سولی پر لٹکا دئے گئے ۔ میں نہیں جانتا کہ ذوالفقار علی بھٹو گنہگار تھے یا بے گناہ لیکن تاریخ اسی طرح رقم ہوئی ۔ 
یہاں ایک غلط فہمی کا اذالہ بھی کرتا چلوں ، کہ ، مشرقی پاکستان میں ہماری فوج کی تعداد  زیادہ نہ تھی . 90 ھزار قیدی ،  سویلین افسران ، ان کے اھلخانہ اور دیگر پاکستانیوں کو ملا کر بنتے ہے ، یہ سب لڑاکا فوجی نہ تھے ۔
آخر میں اس طرف  اشارہ کرتا چلوں کہ ھندوستان یا کالی ماتا کے پجاری اب بلوچستان میں بھی وہی کھیل کھیل رہے ہیں ۔ ہماری فوج کے خلاف پروپیگنڈہ بھارت ہی کے ایجنڈے کا حصہ ہے ۔ یہی کام انہوں نے مشرقی پاکستان میں کیا جو اب یہاں کیا جارہا ہے ۔ وھاں مکتی باھنی جیسی تنظیم قائم کی گئی اور بلوچستان میں BLA یا بلوچ لبریشن آرمی تشکیل پائی ہے ۔ اس بات کو سمجھنے کی ضرورت ہے لیکن ہم نادان بنے ہوئے ہیں ۔ خود ہمارے اپنے لوگ جرنیلوں کے نام لے لے کر عوام کو فوج کے خلاف گمراہ کررہے ہیں ۔ ہمیں جاگ جانا چاھئیے ورنہ کسی اور سانحے کا سامنا ہوسکتا ہے اور پھر ،  اللہ نہ کرے ، پوچھتے پھرینگے 
” پاکستان کیوں ٹوٹا "

تحقیق : شاندار بخاری

مسقط

1442 ھ

آج کل موسم بدل رہا ہے اور میں کیونکہ ایک گرم ملک میں مقیم ہوں اس لئیے کچھ زیادہ ہی ٹھنڈ محسوس کرتا ہوں اس بات سے یہ ثابت کرنا چاہتا ہوں کہ جانے انجانے چاہتے نا چاہتے ہمارے ماحول کا ہم پر اثر ہوتا ہے ۔ صفائی نصف ایمان ہے یہ ہمیں بچپن سے دکھایا جاتا ہے لیکن اس کا عملی نمونہ ہمیں وہاں دکھائی دیتا ہے جہاں دکھا یا نہیں جاتا تو نتیجہ یہ نکلا کے کہنے اور کرنے میں فرق ہے یہ مثال بھی آج اپنی اصل شکل میں میں آپ کےسامنے لے آیا ہوں شکریہ آپ کی تالیوں کا ۔ اگر ہم اپنے ماحول کو صاف رکھیں تو ماحول خوشگوار ہونے کیساتھ ساتھ ہمارے مزاج کا موسم بھی خوشگوار رہے گا اور اس کا مثبت اثر ہم سے جڑے لوگوں اور ان کے ہمارے ساتھ اور آگے ان سے جڑے لوگوں کیساتھ رویوں پر بھی پڑتا ہے ۔اگر آپ دفتر یا گھر میں کسی کو جھڑک دیں گے تو اس شخص میں اگر آپ کو جواب دینے کی ہمت نہیں احترام یا باعث مجبوری تو وہ آگے اپنے ماتحتوں سے بھی اسی رویے سے پیش اے گا اور ایک سلسلہ چل پڑے گا اب بجائے مسئلہ حل ہونے کہ مسائل میں تبدیل ہوجائے گا اور سب کا دن بڑا گزرے گا تو بات کرتے ہوئے کسی مسئلہ کو حل کرتے ہوئے اسے افھام و تفہیم سے حل کریں بےشک اگر کسی کی غلطی ہو اسے پہلے سن ہیں پورا موقع دیں اور پھر دانشمندی سے فیصلہ کریں کہ بات سمجھ میں آ جائے اور کسی کی دل ازاری بھی نا ہو مجھے یہاں ایک شاعر کا واقع یاد آگیا ” رسولِ خدا  صلی اللہ علیہ وآلہ وسلم کے مدنی دور میں کسی گستاخ شاعر نے نبی کریؐم کی شان کے خلاف گستاخانہ اشعار لکھے ۔ اصحاب نے اس گستاخ شاعر کو پکڑ کر بوری میں بند کر کے حضور صلی اللہ علیہ وآلہ وسلم کے سامنے پھینک دیا ۔

سرکار دوعالم صلی اللہ علیہ و آلہ وسلم نے حکم دیا ” اس کی زبان کاٹ دو "

تاریخ لرز گئی ، مکہ میں جو پتھر مارنے والوں کو معاف کرتا تھا. کوڑا کرکٹ پھینکنے والی کی تیمار داری کرتا تھا اسے مدینے میں آکے آخر ہو کیا گیا ۔

بعض صحابہ کرام نے عرض کی یا رسول اللہ صلی اللی علیہ وآلہ وسلم، میں اس کی زبان کاٹنے کی سعادت حاصل کروں؟

حضور صلی اللی علیہ وآلہ وسلم نے فرمایا نہیں ، تم نہیں

تب رسولِ خدا صلی اللی علیہ وآلہ وسلم نے حضرت علی علیہ السلام کو حکم دیا اس کی زبان کاٹ دو ، حضرت علی علیہ السلام بوری اٹھا کر شہر سے باہر نکلے اور حضرت قنبر سے کہ کہ میرا اونٹ لے کر آئیے اونٹ آیا مولا نے اونٹ کے پیروں سے رسی کھول دی اور شاعر کو بھی کھولا اور 2000 درہم اس کے ہاتھ میں دیے اور اس کو اونٹ پہ بیٹھایا ، پھر فرمایا تم بھاگ جاؤ ان کو میں دیکھ لونگا اب جو لوگ تماشا دیکھنے آئے تھے حیران رہ گئے کہ یا اللہ ، حضرت علی علیہ السلام نے تو رسول صلی اللی علیہ وآلہ وسلم کی نافرمانی کیی رسول خدا صلی اللہ علیہ وآلہ وسلم کے پاس شکایت لے کر پہنچ گئے یا رسول اللہ صلی اللہ علیہ وآلہ وسلم، آپ نے فرمایا تھا زبان کاٹ دو ، علی علیہ السلام نے اس گستاخ شاعر کو 2000 درہم دیے اور آزاد کر دیا حضور صلی اللہ  علیہ وآلہ وسلم مسکرائے اور فرمایا علی علیہ السلام میری بات سمجھ گئے افسوس ہے کہ تمہاری سمجھ میں نہیں آئی ۔ وہ لوگ پریشان ہوکر یہ کہتے چل دیے کہ یہی تو کہا تھا کہ زبان کاٹ دو علی علیہ السلام نے تو کاٹی ہی نہیں اگلے دن صبح، فجر کی نماز کو جب گئے تو کیا دیکھتا ہے وہ شاعر وضو کررہا ہے پھر وہ مسجد میں جا کر حضرت محمد صلی اللہ علیہ و آلہ وسلم کے پاؤں چومنے لگتا ہے ۔ جیب سے ایک پرچہ نکال کر کہتا ہے حضور صلی اللہ  علیہ وآلہ وسلم آپ کی شان میں نعت لکھ کر لایا ہوں اور یوں ہوا کہ حضرت علی علیہ السلام نے گستاخ رسول صلی اللہ علیہ و آلہ وسلم کی گستاخ زبان کو کاٹ کر اسے مدحتِ رسالت والی زبان میں تبدیل کردیا "

‘ زندگی لفظوں کی شطرنج ہے ‘ ابنِ صفی نے زندگی کی عملی تفسیر پانچ لفظوں میں بیان کردی تھی سارا کھیل ہی لفظوں کا ہے پہلی بازی سے آخری چال تک نیکی بدی ،  دِن رات ، روشنی تاریکی کی طرح لفظوں کے سفید و سیاہ مُہرے اپنی مثبت اور منفی چالوں کے ساتھ ہمارے اندر اور ہمارے باہر ہمیں مضبوط یا کم زور بنارہے ہیں ۔ شاطر کھلاڑیوں کو علم ہوتا ہے کہ کب کون سی چال چلنی ہے اور اناڑی سوچتے رہ جاتے ہیں ۔ ’’ہاں‘‘  یا  ’’نہیں‘‘  میں اُلجھے رہتے ہیں اور بازی ہار جاتے ہیں لفظوں کی طاقت مثبت بھی ہوتی ہے اور منفی بھی ۔ دنیا کا سب سے طاقت ور منفی لفظ ’’No‘‘  ’’نہیں‘‘ ہے۔ اور سب سے طاقتور مثبت لفظ ’’Yes‘‘  ’’ہاں‘‘ ہے ۔ ہمارے اطراف کا ماحول اگر اچھا ہوتا ہے اور ہم شروع سے اچھی باتیں سنتے اور اچھے رویّے دیکھتے آتے ہیں تو شعور سنبھالنے کے ساتھ ہم لاشعوری طور پر زندگی کے اچھے راستوں پر چلنا شروع کردیتے ہیں، لیکن اگر ہم نے بچپن سے ہی بُری زبان اور گالی گلوچ سنا ہو اور اپنے بڑوں کو ہمیشہ آپس میں لڑتے جھگڑتے دیکھا ہو اور ہمارے چاروں طرف ہر چھوٹا بڑا اپنی اپنی زبان کے تیروں بھالوں اور تلواروں سے ہر کسی کو مجروح کرتا ہوا ملا ہو تو بچپن، لڑکپن اور نوجوانی کے بار بار کے سُنے ہوئے منفی الفاظ اور برتے ہوئے کسیلے رویّے ہمارے دل و دماغ میں ہمیشہ کے لیے پیوست ہوجاتے ہیں اور ہم اپنے آپ اور اپنے ماحول کو بدلنے کے بجائے، سنوارنے کی بجائے معاشرے کے اُسی اُلٹے گھومنے والے منفی نظام / پہیے کا حصّہ بن جاتے ہیں سوچے سمجھے بِنا جو بات کی جاتی ہے، اس میں اکثر اوقات ایسے لفظ، ایسے جُملے شامل ہوجاتے ہینَ جو سامع کا دل دُکھا دیتے ہیں یا اسے پسند نہیں آتے۔ اسی لیے دنیا کے ہر مذہب، ہر تہذیب، ہر قوم، ہر نسل کے دانا اور بزرگ یہی کہتے آئے ہیں کہ ’’ پہلے تولو، پھر بولو ‘‘ اور یہ کہ ’’ جوں جوں دانائی بڑھتی ہے، گفتگو کم ہوتی جاتی ہے۔‘‘ اور یہ کہ ’’جو زیادہ بولتا ہے وہ اپنے راز کھولتا ہے ۔ اور جو اپنے راز کھولتا ہے وہ اپنے ارادوں میں ناکام ہوتا ہے ‘‘ اور یہ کہ ’’ تلوار کا گھاؤ بھر سکتا ہے ، زبان کا گھاؤ نہیں بھرسکتا ‘‘ اور اسی نوعیت کی ہزاروں حکمت و فراست سے بھرپور باتیں ۔

بولے گئے اور لکھے گئے لفظ دُنیا کے ہر خطّے کے ہر انسان کو براہِ راست یا بالواسطہ طور پر متاثر کرتے ہیں۔ بچپن سے لے کر بڑھاپے تک ہمارا، ایک دوسرے سے رابطہ، بات چیت، گفتگو یا تحریروں سے رہتا ہے۔ ڈھائی تین سال کی عمر سے بچّے کو بولنا اور پڑھنا سکھایا جاتا ہے، حرف سے لفظ اور الفاظ سے جملوں تک۔ پیار، محبت ، توجہ اور خیال سے بچّے کو ایک ایک لفظ سکھا کر بولنا سکھایا جاتا ہے۔ بچّے کا دماغ، سادہ سلیٹ کی طرح ہوتا ہے۔ وہ جس زبان میں جو الفاظ سنتا ہے، وہ اُس کے دماغ میں محفوظ ہوتے چلے جاتے ہیں ۔ چرچل کی بات یاد آئی کہ نازیبا الفاظ نگل لینے سے آج تک کسی کا معدہ خراب نہیں ہوا ۔ شیریں کلامی سے دُنیا مُسخّر ہوجاتی ہے اور بد زبانی سے سب بیزار ہوجاتے ہیں ۔

اس کیساتھ مجھے دو بہت ہی دلچسپ اقوال یاد آ رہے ہیں ،

1۔ ہمارسوچ ہمارے الفاظ بن جاتے ہین ، ہمارے الفاظ ہماری بات ، ہماری بات ہمارا عمل اور ہمارا عمل ہمارا کردار بن کر سامنے آتا ہے ۔

2۔ کوئی بات کہنی ہو تو اسے سب سے پہلے ان تین دروازوں سے گزاری ۔۔ کیا یہ بات درست ہے ؟ کیا اس بات کے کرنے کی ضرورت ہے ؟ کیا یہ بات اس بات سے کوئی مثبت رد عمل ہوگا ؟ اگر نہیں تو پھر پاکستان میں ایک دور میں جب ٹیلیفون کمپینوں کے اشتہارات کی بھرمار تھی تو ہر روز ایک دوسرے کے مقابلے میں کم سے کم ریٹ کے اعلان ہوتے تھے جس سے تنگ آ کر اس معاملے کو ختم کرنے کیلئیے ایک کمپنی نے کیا ہی زبردست اعلان / اشتہار بنایا

 ‘ اس سے سستی ۔۔  صرف خاموشی ‘

آخر میں اتنا کہوں گا کہ منفی لفظ کانٹوں کی مانند ہوتے ہیں اور کسی کے راستے میں یوں کانٹے نا بچھاہین کہ کہیں اچانک وقت بدلے اور آپ کو اسی راستے پر چل کر اس شخص کے پاس جانا پڑے اور آپ جا نہ سکیں ۔

ناطق ؔ لکھنوی نے کیا خوب کہا تھا

کہہ رہا ہے شور دریا سے سمندر کا سکوت

جس کا جتنا ظرف ہے اتنا ہی وہ خاموش ہے

ایک جگہ سے دوسری جگہ یا ایک وطن سے کسی نئے وطن کی طرف منتقل ہوجانے کو ہجرت کہا جاتا ہے۔

منٹو نے بھی اس موضوع پر ٹوبہ ٹیک سنگھ کے اس پاگل خانے کی داستان لکھی تھی جسمیں تقسیم کے بعد مذہبی بنیادوں پر زیر علاج لوگوں کو زبردستی ملک بدر کر دیا گیا تھا ، کہنے کو تو وہ دنیا والوں کی نظروں میں پاگل تھے مگر اپنی مٹی سے جڑے ہوئے تھے اور اسی طرح محبت کرتے تھے جیسے ہم کرتے ہیں. ہجرت خود اختیاری عمل نہیں ہے بلکہ آدمی بہت سے مذہبی ، سیاسی اور معاشی حالات سے مجبور ہوکر ہجرت کرتا ہے ۔ میں نے اس مختصر تحریر میں ہجرت کی مجبوریاں اور اس کے دکھ درد کو موضوع بنایا ہے۔

دیار غیر میں مقیم کئی ہم وطنوں اور پردیسیوں کو اس تلخ تجربے سے گزرنا پڑتا ہے۔ کئی سال کہیں رہنے کے بعد ہم اس ماحول سے مانوس ہو جاتے ہیں اپنی تہذیب کے رنگوں میں اس دیس کے رنگ بھی شامل کر لیتے ہین اور ان رنگوں میں رنگ جاتے ہیں رچ بس جاتے ہیں۔

اس سال کرونا نے جہاں کئی پیاروں کو لقمہ اجل بنایا وہیں لاک ڈاون کی وجہ سے کئی کاروبار متاثر ہوئے اور کمپنیاں بند ہو گئیں جس کی وجہ سے کئی گھروں کے چولہے بھی بجھ گہے شو مئی قسمت اس کی زد میں میرے ایک دیرینہ ساتھی بھی شامل ہیں جو پچھلی چار دہایوں سے یہاں مقیم تھے ہنستا بستا گھر تھا اور ایک دن اچانک نوکری سے فارغ کر دئیے گئے ، کہیں اور کام بھی نہیں ملا کوئی تعلق کام نا آیا ویزہ ختم ہوگیا اور سواے واپس جانے کے اور کوئی راستہ بھی نہیں بچا گھر کا سامان بک گیا اور کچھ تقسیم کر دیا گیا مجھ سے کہنے لگے یار ایک پل میں سب کچھ چھن گیا سب ختم ہوگیا گھر والے بہت پریشان تھے لیکن اب تسلی دیتے ہیں بچے اس وقت ایکسائیٹڈ ہیں اور طرح طرح کے سوال پوچھتے ہیں ۔میں اپنے وطن تو جا رہا ہوں لیکن میں وہاں کبھی رہا نہیں مجھے تو یہ جگہ اپنا وطن لگتا ہے نہ مجھے کوئی وہاں جانتا ہے نہ میں راستوں سے واقف ہوں اپنے ملک جا کر بھی اجنبیت محسوس کروں گا اس لمحے مجھے برصغیر اور دنیا کی تاریخ کی اب تک کی سب سے بڑی انسانی ہجرت کا خیال آیا کہ اسی طرح لاکھوں لوگ در بدر ہوے قربانیاں دیں اور اب ان کی تیسری نسل اس دکھ اور عذاب سے نا آشنا ہیں جس سے ان کے بزرگ گزرے اور ہر روز کسی راستے کسی شخص کسی چیز کو دیکھ کر ان کو ان کا آبائی وطن یاد آتا ہوگا۔

اب جب کہ میرا وہ دوست جا چکا ہے لیکن رابطے میں ہے اور اپنے پرانے ساتھیوں کی خبر لیتا ہے ، وہاں ایڈجسٹ نہیں ہو پا رہا لیکن وقت گزر رہا ہے اس تلخ حقیقت کو وہ قبول کر رہا ہےاور کہتا ہے کہ اکثر سوچوں میں گم تصور میں ہم وہاں بیٹھ کر چائے پیتے ہیں گیا وقت کچھ دیر کیلئیے پلٹ آتا ہے اور دل بہل جاتا ہے مجھے بھی آتے جاتے وہ محلہ جہاں وہ رہتا تھا وہ گلی اور وہ پیار سے سجایا ہوا گھر جو اسی کی یاد سے اب بھی آباد ہے اسی کی یاد دلاتا ہے جیسے مغل بادشاہ تو نہ رہے لیکن تاریخ میں اب بھی موجود ہیں ان عمارتوں ان کھنڈروں میں ۔

شاندار بخاری

مسقط

۱۴۴۲