قائد اعظم

 احسان ترا بھول نہ پائیں گے کبھی ہم , اے قائد اعظم

تو نے ہمیں اک ارض وطن کا دیا پرچم , اے قائد اعظم

اس ارض پہ کیا صورتیں قربان ہوئی ہیں ,شعلوں میں جلی ہیں

اس ارض کے کنکر ہیں مرے واسطے نیلم , اے قائد اعظم

یہ ارض تری جانفشانی کا ثمر ہے, نایاب نگر ہے

اس ارض پہ اللہ کے انگنت ہیں انعم , اے قائد اعظم

ہر وادی میں اس کی بڑی مسرور فضائیں , جو دل کو لبھائیں

بہتے ہوئے دریاوں کا مسحور ترنم , اے قائد اعظم

کشمیر میں زہریلی ہوا ایسی چلی ہے , ہر شاخ جلی ہے

خوشیوں سے چہکتے ہوئے گھر بن گئے ماتم , اے قائد اعظم

تو نے تو اسے امن کا گہوارہ بنایا , خوشبو میں بسایا

غنچوں کو دیا تھا نیا انداز تبسم,  اے قائد اعظم

ہم نے ترے گہوارے کے ہر پیڑ کو چھانٹا , پھر حصوں میں بانٹا

اقرار ہے مجرم ترے افکار کے بھی ہم , اے قائد اعظم

وہ نوٹ کہ جن پر تری تصویر بنی ہے , خاموش کھڑی ہے

جیسے کہ تیری روح بھی ہم سے ہوئی برہم , اے قائداعظم

ہر شخص ترے ملک کو کھانے پہ تلا ہے , ان داتا بنا ہے

ہے کون جو اس ارض کے لٹنے کا کرے غم , اے قائد اعظم

اب تو یہی اللہ سے  ہر روز دعا ہے , جو بار الہ ہے

اس گھر کے دروبام کو رکھے سدا قائم , اے قائد اعظم

ممکن ہے تری روح کو تسکین ملے گی , ہر آس بندھے گی

ہر فرد اگر تھام لے گرتا ہوا پرچم ,اے قائد اعظم

سعادت حسن آس آف اٹک