چائے کا ایک ٹھنڈا کپ

صفدر علی حیدری

وہ ہمیشہ چائے کے دو کپ بناتا تھا۔

ایک ظاہر ہے اپنے لیے، اور دوسرا…

دوسرا کسی کے لیے نہیں۔

بس ویسے ہی۔

ایک کپ اٹھا کر وہ ہونٹوں سے لگا لیتا اور دوسرا کپ اس کے سامنے دھرا رہتا تھا۔ چائے ٹھنڈی ہو جاتی لیکن کوئی اس کو اپنے ہونٹوں کے قریب نہیں لے جاتا تھا، وہ بھی نہیں۔

پہلے پہل لوگوں نے پوچھا بھی۔

"دو کپ کیوں بناتے ہو؟”

وہ مسکرا کر بات ٹال دیتا۔

"عادت ہے۔”

حالاں کہ یہ عادت نہیں تھی، یاد تھی۔

ایسی یاد جو انسان کے گھر سے زیادہ اس کے اندر آباد ہوتی ہے۔

کبھی اس میز کے دوسری طرف بھی کوئی بیٹھا کرتا تھا۔ چائے کی بھاپ کے ساتھ باتیں اٹھتی تھیں، ہنسی بکھرتی تھی، شکایتیں جنم لیتی تھیں اور پھر انہی کپوں کے درمیان دم توڑ دیتی تھیں۔

پھر ایک دن وہ شخص چلا گیا، ہمیشہ کے لیے۔

لیکن عجیب بات یہ تھی کہ جانے والا تو چلا گیا، اس کے لیے رکھا جانے والا کپ نہیں گیا۔

سال گزر گئے۔

کپ بدلتے رہے، چائے کی پتی بدلتی رہی، موسم بدلتے رہے، مگر دوسرا کپ اپنی جگہ قائم رہا۔

اس روز بھی اس نے دو کپ بنائے۔

ایک سے چائے پیتا رہا اور دوسرا یونہی سامنے رکھا رہا۔

اچانک اس کی نظر ٹھنڈی ہوتی چائے پر پڑی تو وہ مسکرا دیا۔

ایک اداس، تھکی ہوئی مسکراہٹ۔

"کتنی عجیب بات ہے…”

وہ خود سے بولا۔

"اب مجھے تمہارا انتظار بھی نہیں، لیکن تمھارے حصے کی چائے بنانا آج بھی نہیں بھولا۔”

اور اسے پہلی بار احساس ہوا کہ بعض لوگ زندگی سے چلے جاتے ہیں، مگر روزمرہ کی چند معمولی چیزوں میں ہمیشہ کے لیے رہ جاتے ہیں۔

جیسے پرانی کتاب میں رکھا ہوا سوکھا پھول۔

جیسے کسی دروازے پر لٹکتی خاموش دستک۔

اور جیسے ہر صبح میز پر رکھا ہوا…

چائے کا ایک ٹھنڈا کپ۔

.

صفدر حیدری اُچ شریف

میرا نام صفدر علی حیدری ہے ۔ پیدائش علی پور ضلع مظفر گڑھ کی ہے لیکن پلا بڑھا اوچ شریف میں ہوں اور رہائش بھی اسی شہر میں ہے ۔ایم فل اردو ہوں ایک استاد ہوں اور پچھلے تیس سال سے پڑھا رہا ہوں ۔ لکھنے کا آغاز بچپن سے کیا ۔ کالم نگاری بھی کی نامہ نگاری بھی ،پھر افسانہ نگاری اور افسانچہ نگاری کی طرف متوجہ ہوا ۔اب تک میری بارہ کتب شائع ہو چکی ہیں پچیس کتب زیر طبع ہیں شائع شدہ کتب کی تفصیل حسب ذیل ہے میری ایک کتاب کالمز پر ہے ” شہر خواب ” ایک ناول ہے ” عمران بٹہ عمران ” چار کتابیں ادب اطفال پر ہیں ” گھڑی کی ٹک ٹک ” ” ایک پہیے کی سائیکل” ” کمزور چوزا ” ” منٹو میاں ” چار افسانوں پر ہیں "مٹھی میں کائنات” ” ناقابل اشاعت ” ” من و سلویٰ ” ” الف سے یے تک ” ایک افسانچوں پر ہے ” ایک صفحے کے افسانچے ” میری تمام کتابوں پر ایم فل ، ایم اے اور بی ایس کی سطح پر کام ہو چکا ہے