Tag: قرآن

پہلی قسط میں یہ بیان کر دیا گیا تھا کہ اللہ تعالیٰ ہی حقِّ مطلق ہے، جس کی حقیقت میں کسی بھی طرح کے ذرہ برابر بُطلان کی گُنجائش نہیں ہے، پس حق کُلی طور پر ذاتِ واجبُ الوجود میں ہی منحصر ہے اللہ تعالیٰ نے انبیاؑء کو پیغمبر گرامی صلی اللہُ علیہ وآلہ وسلم کو بھی حق قرار دیا ہے کیونکہ پیغمبروں کی نبوت بھی حقِّ مطلق کی طرف سے واقعیت اور حقیقت کی حامل ہے اور سورۃ قصص کی آیت 47، 48 میں پیغمبر کا حق کے مصداق کے طور پر تعارف ہوا ہے ارشاد باری تعالیٰ ہے کہ
رَبَّنا لَولآ اَرْسَلْتَ اِلَيْنَا رَسُوْلاً فَنَتَّبِعَ آيٰتِكَ وَ نَكُوْنَ مِنَ الْمُؤْمِنِيْنَ * فَلَمَّا جَآءَھُمُ الْحَقُّ مِنْ عِنْدِنَا قَالُوْا لَوْ لَا اُوْتِیَ مِثْلَ مَآ اُوْتِیَ مُوْسٰی ط اَوَلَمْ يَكْفُرُوْا بِمَآ اُوْتِیَ مُوْسٰی مِنْ قَبْلُ ج
وہ کہتے ہیں اے پروردگار ! تونے ہماری طرف کوئی پیغمبر کیوں نہیں بھیجا تاکہ ہم تیری آیات کی پیروی کرتے اور اس پر ایمان لے آتے ، لیکن جب ہماری طرف سے ان کے پاس حق (محمد صل اللہ علیہ وآلہ وسلم) آ گیا تو کہنے لگے کہ وہ موسیٰ جیسا معجزہ لے کر کیوں نہیں آیا، کیا انہوں نے موسیٰ علیہ السلام کے معجزہ کا بھی انکار نہیں کیا تھا

یہاں نبی اور معجزہ دونوں کو حق قرار دیا گیا ہے
قُرآنِ مجید روزِ قیامت کو حق قرار دیتا ہے کہ قبروں سے اُٹھنا، اعمال کا حساب و کتاب ، ایک نئی، مکمل اور ابدی زندگی کا آغاز ایسے حقائق ہیں جن کی تمام پیغمبروں نوید دی ہے، اور اس پر یقینِ کامل کے بغیر دین معنوی لحاظ سے تکمیل نہیں پاتا سورۃ شوریٰ کی 18 ویں آیت میں قُرآن یُوں گویا ہوا کہ
يَسْتَعْجِلُ بِھَاالَّذِيْنَ لَا يُؤْمِنُوْنَ بِھَا ج وَالَّذِيْنَ آمَنُوْا مُشْفِقُوْنَ مِنْھَا وَيَعْلَمُوْنَ اَنَّھَاالْحَقُّ ط
کافر لوگ قیامت کے برپا ہونے کا انکار کرتے ہیں اور ایمان لانے والے اس سے ڈرتے ہیں اور جانتے ہیں کہ یہ حق ہے،
اور سورۃ یونس کی آیت 53 میں ارشاد باری تعالیٰ ہے کہ
وَيَسْتَنبِعُوْنَكَ اَحَقٌّ ھُوَ ط قُلْ اِیْ وَ رَبِّیْ اِنَّه، لَحَقٌّ ط وَمَآ اَنْتُمْ بِمُعْجِزِيْنَ *
اے رسول صلی اللہُ علیہ وآلہ وسلم) وہ آپ سے سوال کرتے ہیں کہ کیا قیامت حق ہے کہہ دیجیئے کہ مجھے اپنے پروردگار کی قسم ہے کہ یہ (قیامت) حق ہے اور تمہارے لیے گریز کی کوئی راہ نہیں
اور حلال مال جو مقروض کے ذمہ واجب الادا ہے اسے قرض خواہ کا حق قرار دیتا ہے اور یہ حقِّ نسبی ہے کیونکہ اس مالِ حلال کے حاصل کرنے میں اس کے مالک نے جو کوشش اور محنت کی اُس نے اُسے اس مال کا حقدار بنایا ورنہ مالکِ حقیقی تو اللہ تعالیٰ ہی ہے چنانچہ سورۃ بقرۃ کی آیت 282 میں اسے حق قرار دیا گیا،
یہ تو ہوگئی حق و باطل کی تفصیل اب یہاں میرے ذہن میں یہ سوال اُبھر رہا ہے کہ کیا حقوق و فرائض بھی اسی زمرے میں داخل ہیں تو مجھے اس بات کا جواب بہت سی قُرآنی آیات سے ملا مثلاً سورۃ النساء آیت 17 میں ارشاد ہو رہا ہے کہ
یَا اَھلَ الکِتَابِ لَا تَغلُوا فِی دِینِکُم وَلَا تَقُولُوا عَلَی اللهِ اِلَّا الحَقّ
اے اہلِ کتاب اپنے دین میں غلو نہ کرو، اور اللہ کی طرف حق اور واقعیت کے علاوہ کوئی اور نسبت نہ دو،
اور سورۃ لقمان کی آیت 33 یوں راہنمائی کر رہی ہے کہ
اِنَّ وَعدَاللہِ حَقُُ فَلَا تَغُرَّنَّکُم الحَیاۃُ الدُّنْيَا
بےشک اللہ کے وعدے سچ اور واقعیت رکھتے ہیں، دنیاوی زندگی تمہیں کہیں دھوکہ نہ دے
ان آیات سے یہ بات واضح ہو رہی ہے کہ دنیاوی معاشرتی زندگی میں بننے والے قوانین کی بنیاد کہیں اپنی یا عوام کی خواہشات کے مطابق نہ رکھ لینا بلکہ وہ قوانین اللہ تعالیٰ کی مقرر کردہ انسانی سعادتوں کے امین ہوں جو فطرت و آفرینش کے خلاف نہ ہوں یعنی انسان کی ہر خواہش کو اس کا حق نہیں قرار دیا جا سکتا ، نشہ آور اشیاء چاہے تمام انسانوں کی خواہش ہو ان کا حق نہیں قرار دی جا سکتیں بلکہ ایسا قانون حقِّ مطلق اللہ کے ہاں باطل قرار پائے گا، قُرآن جس مقام پر بھی اللہ واحد و یکتا کی پرستش کے بارے میں بات کرتا ہے تو بلا فاصلہ فطرت و آفرینش کی بات کرتا ہے جیسا کہ سورۃ روم کی آیت 30 میں ارشاد ہوا
فَاَقِمْ وَجْھَكَ لِلدِّيْنِ حَنِيْفاً ط فِطْرَةَ اللهِ الَّتِیْ فَطَرَالنَّاسَ عَلَيْھَا ط لَا تَبْدِيْلَ لِخَلْقِ اللهِ ط ذَالِكَ الدِّيْنُ الْقَيِّمُ وَلٰكِنَّ اَكْثَرَالنَّاسِ لَا يَعْلَمُوْنَ *
اللہ کے سچے دین کی طرف رُخ کرو، وہ سچا دین جو اللہ کی آفرینش و خلقت ہے اور اُس نے اسی بنیاد پر انسانوں کو خلق کیا ہے، اللہ کی خلقت میں کوئی تبدیلی نہیں ہوتی، یہی محکم اور استوار دین ہے لیکن اکثر لوگ نہیں جانتے

یہ وہ منزِل ہے جہاں قُرآن و اسلام حقوق کے دیگر اداروں سے جُدا ہو جاتا ہے ہر وہ عمل جس سے قُرآن نے روک دیا اس سے رُک جانے میں ہی بھلائی ہے بےشک وہ کتنا ہی بھلا کیوں نہ لگے، اور ہر وہ کام جس کے کرنے کا حکم قُرآن نے دے دیا اُس پر عمل میں بھلائی اور خیر ہے چاہے وہ کتنا ہی بُرا کیوں نہ لگے، قُرآن کی نظر میں وہی قانون حق ہے جس پر عمل سے انسان اپنے رب کی قُربت کا حقدار ٹھہرے، اور وہی قانون فطرت پر مبنی ہو گا اور انسان کی سعادت اور خُوش بختی کا ضامن ہو گا، تو پس میرے محترم قاری قُرآنی قوانین، حقوق و فرائض کا منبع و مآخذ بھی حقِّ مطلق کی طرف سے انسانی سعادتوں کے لیے ہے اور منزل اُخروی و ابدی کامیابی ہے

بِسْمِ اللهِ الْرَّحْمٰنِ الْرَّحِيْمِ*

وَلَا تَقْرَبُوْا مَالَ الْيَتِيْمِ اِلَّا بِالَّتِیْ ھِیَ اَحْسَنُ حَتیّٰ يَبْلُغَ اَشُدَّه، ج

اور یتیم کے مال کے قریب بھی نہ جاؤ، سوائے اس طریقہ کے کہ اس کے لیے بہتر ہو، یہاں تک کہ وہ اپنی جوانی کو پہنچ جائے ،

یتیم کے حقوق کے تحفظ کے حوالے سے قُرآن نے ہی ہمیں بتایا کہ گذشتہ تمام انبیاء اور شریعتوں میں بھی یہی قانونِ الٰہی تھا

منشورِ حیات کے اس چھٹے اصول سے یہ بات بالکل واضح اور عیاں ہے کہ بچہ انسانی معاشرے کی بنیاد کی خِشتِ اول ہے، بچے کی نگہداشت ، تربیت، درست بنیادوں پر پرورش بہترین اور توانا معاشرے کے لیے کس قدر اہم ہے اس کا اندازہ اس بات سے لگایا جا سکتا ہے کہ قرآن میں یتیم کے حقوق اور کیفیات کے بیان میں لفظِ یتیم اپنے دیگر مُشتقات کے ساتھ 23 مرتبہ استعمال ہوا ہے

بچہ دراصل اپنی کمزوری اور ناتوانی کی وجہ سے کسی ایسے ہمدرد سرپرست کا محتاج ہوتا ہے جو اتنی بڑی اور اجنبی دنیا میں اُس کا ساتھ دے اس کے مادی و روحانی حقوق کا محافظ ہو، باپ اس فطری ذمہ داری کو جتنا بھی اپنے کندھوں سے ہٹانا چاہے وہ ایسا کر نہیں پاتا  اسی طرح یتیم بھی ایسی سرپرستی اور شفقت ، مادی حقوق کی حفاظت کا مکمل حق رکھتا ہے لہٰذا قرآن مجید اس اہم ترین حق کی طرف متوجہ کرتے ہوئے اس کے مادی و روحانی حقوق کے تحفظ کا حکم دے کر معاشرے کی اہم ترین ذمہ داری کا تعین فرما رہا ہے کہ جو بچہ کسی بھی وجہ سے اپنے قدرتی و حقیقی سرپرست سے محروم ہو گیا ہو اُس کے قریبی اعزاء و اقارب اس کی سرپرستی و تربیت فریضے کی طرح ادا کریں، تاکہ بلوغت کے بعد وہ تمہارے معاشرے کا مفید فرد بن کر سامنے آئے،

وَ اَوْفُواالْكَيْلَ وَ الْمِيْزَانَ بِالْقِسْطِ ج

ناپ تول کا حق انصاف کے ساتھ پُورا کرو ؛

عدل و قسط اپنے اندر بے شمار معانی و مفاہیم لیے ہوئے ہے، اس کی وضاحت اور سمجھنے کے لیے ایک الگ نشست اور مضمون کی ضرورت ہے، البتہ یہاں چونکہ موضوع ناپ تول میں عدل و قسط ہے لہٰذا اسی پر مختصر بات کرتے ہیں،

قُرآن میں معاشی و اقتصادی انصاف معاشرے کا بنیادی ترین اصول قرار دیا گیا ہے ناپ تول میں کمی سے مراد اجناس کے علاوہ ہر طرح کی ثروت و دولت؛ قدرتی وسائل اور نعمتوں کی تقسیم بھی ہے، ایک عام شہری سے حکمران تک اس آیت میں اور قُرآن میں مخاطب ہیں کہ دولت چند ہاتھوں میں جمع نہ ہو، ذخیرہ اندوزی نہ کی جائے، ناپ تول میں کمی نہ کی جائے، کسی کے حق پر بےجا تصرف نہ کیا جائے، فقر و فاقہ اور طبقاتی امتیازات کو ختم کرنے کی کوشش کی جائے،

      لَا  نُکَلِّفُ  نَفساً  اِلَّا  وُسعَھَا ج

ہم کسی انسان کو اُس کی طاقت سے بڑھ کر ذمہ داری نہیں دیتے

یہاں پر تو بظاہر ان الفاظ کا تعلق پچھلی بات سے بنتا ہے یعنی اقتصادی عدل؛ ناپ تول میں عدل و قسط یہ اتنا مشکل کام نہیں کہ جسے تم کر نہ سکو لیکن یہی بات سُورۃ بقرۃ کی آیت 233؛ سُورۃ اعراف کی آیۃ 42 ؛ سُورۃ مومنون آیت 62 میں مختلف معانی میں کہی گئی ہے، جس کا لب لباب یہ بنتا ہے کہ اسلام بطورِ دین اپنے اندر انسانیت کے لیے آسانیاں سمیٹے ہوئے ہے، اس پر عمل کرنے میں کوئی تنگی نہیں ہے، اور اسلام کوئی ایسا حکم نہیں دیتا جس پر عمل  کرنے میں انسان کے لیے تنگی اور مشکل پیدا ہو،

وَ اِذَا  قُلْتُم  فَاعدِلُوا  وَلَو کَانَ ذَا قُربی  ج

اور جب بات کرو تو عدل کرو خواہ وہ قرابت دار کے بارے میں ہی ہو

عدل ایک ایسا بنیادی منبع و ستون ہے کہ جس پر انسانی معاشرے کی بنیاد پُختہ ہوتی ہے، اور اللہ تعالیٰ یہاں اور قُرآن میں دیگر مقامات پر یہ واضح اصول دے رہا ہے کہ جب تم فیصلہ کرنے لگو تو کوئی رشتہ کوئی لالچ، کوئی خوف تمہیں حق پر فیصلہ کرنے سے نہ روک پائے اور قُرآن نے متعدد مقامات پر ہوا و ہوس اور نفسانی خواہشات کی پیروی کو عدل کی راہ میں سب سے بڑی رکاوٹ قرار دیا ہے،

وَ بِعَھْدِ اللهِ اَوْفُوْا ط ذٰلِكُمْ وَصّٰكُمْ بِهٖ لَعَلَّكُمْ تَذَكَّرُوْنَ * 

اور اللہ سے کیا گیا وعدہ پورا کرو ؛ اللہ نے تمہیں اس کی تاکید کی ہے تاکہ تم ذکر کرتے رہو،

عہد و پیمان اور وعدہ وفائی ایک فطری خُوبصُورتی ہے، اخلاقی بلندی؛ اعتماد اور معاشرتی اعلیٰ ظرفی کا واضح ثبوت ہے، جبکہ وعدہ و پیمان شکنی اخلاقی پستی کی مظہر ہے، وعدہ وفائی کی اہمیت کا اندازہ اس بات سے لگا لیجیے کہ قُرآن مجید میں اس کا ذکر 45 مرتبہ ہوا ہے، اور آیت کے آخری الفاظ تاکید کی گئی ہے کہ اس پر عمل کرو اور ان مندرجہ بالا امور کو دہراتے رہو، ذکر کرتے رہو،

اور اس سے اگلی آیت 153 میں ارشاد رَبُّ العِزَّت ہو رہا ہے کہ

وَاَنَّ ھٰذَا صِرَاطِیْ مُسْتَقِيْماً فَاتَّبِعُوْهُ ط وَلَا تَتَّبِعُوْاالسُّبُلَ فَتَفَرَّقَ بِكُمْ عَنْ سَبَيْلِهٖ ط ذٰلِكُمْ وَصّٰكُمْ بِهٖ لَعَلَّكُمْ تَتَّقُوْنَ  *

یہ ہے ہمارا سیدھا راستہ اسی پر چلتے جاؤ اور دوسرے راستوں پر نہ چلو

کہ وہ تم کو اللہ کے راستے سے بھٹکا کر متفرق کر دیں گے یہ ہیں وہ باتیں جن کا اللہ تمہیں حکم دیتا ہے،

صراطِ مستقیم کے متلاشیو! دنیا و آخرت کی کامیابی چاہنے والو ! قُرآن میں تلاش کرو تمہیں دنیا میں جنت مل جائے گی، مگر لالچ، ہوس ، بہتات کی حرص ، شہوت جیسے شیطان بھی تو صراطِ مستقیم کے اوپر بیٹھے ہوئے ہیں، جو انسانوں کو اللہ کے راستے سے بھٹکا تے ہیں اور انسان اپنے کریم رب سے دوری اختیار کر لیتا ہے، حالانکہ وہ کریم رب قدم قدم پر انسانوں کی راہنمائی فرما رہا ہے،

اس کے علاوہ بھی قُرآن نے چار مقامات پر تسلسل کے ساتھ اپنے منشور کو واضح بیان فرمایا ہے، یہ سُورۃ بنی اسرائیل کی 22 ویں آیہ سے 39 ویں آیۃ تک 18 آیات ہیں اور پھر سُورۃ مومنون یہلی 10 آیات میں سات 7 بنیادی اصول بیان کیئے گئے

سُورۃ فُرقان کی آیت 63 تا 77 میں 14 اصول پیش ہوئے جبکہ سُورۃ لقمان آیات 13 تا 19 میں بھی 12 اخلاقی و معاشرتی اصول بیان کیئے گئے ہیں ؛ ان تمام مشترکہ نکات کو ایک جگہ جمع کر کے مطالعہ کیا جائے تو قُرآن مجید کی حقانیت و حکمت کے سارے راز کھلتے ہیں، وہ حکیمِ مطلق دراصل نوعِ بشر کو سعادت و خوش بختی کی کن منازلِ پر دیکھنا چاہتا ہے قُرآن کو بطورِ منشورِ حیات اگر پڑھا اور سمجھا جائے اور عمل کی کوشش کی جائے تو سب کچھ آشکار ہوتا چلا جاتا ہے،

سُورۃ بنی اسرائیل کی آیات 22 تا 39  میں بیان کردہ  منشورِ حیات کے 14 نکات یہ ہیں

1 – لَا تَجعَل مَعَ اللہِ اِلٰھاً  آخَرَ

اللہ کے ساتھ دوسرا شریک قرار نہ دیا جائے

2  –  وَقَضٰی رَبُّكَ اَلَّا تَعْبُدُوْا اِلَّا اِيَّاهُ

تمہارے پروردگار کا فرمان ہے کہ عبادت فقط اسی کی کرو

3  – وَ بَالوَالِدَینِ اِحْسَاناً

اور ماں باپ کے ساتھ نیکی کرو

4  – وَاٰتِ ذَاالْقُرْبیٰ حَقَّه، وَالْمِسْكِيْنَ وَابْنِ الْسَبِيْلِ

اپنے قریبی رشتہ داروں؛ مسکینوں اور مسافروں کا حق ادا کرو

5  – وَلَا تُبَذَِّر تَبذِیراً 

اسراف اور فضول خرچی نہ کرو

6 – وَلَا تَجْعَلْ يَدَكَ مَغْلُوْلَةً اَلیٰ عُنُقِكَ  وَلَا تَبْسُطْھَا كُلَّ الْبَسْطِ

نہ اپنے ہاتھوں کو بالکل گردن سے باندھ لو اور نہ ہی بالکل کُھلا چھوڑ دو (نہ کنجوسی؛ نہ فضول خرچی بلکہ میانہ روی)

7 – وَلَا تَقْتُلُوْا اَوْلَادَكُمْ خَشیَۃَ  اِمْلَاقٍ

اور نہ بھوک کے خوف سے اپنی اولادوں کو قتل کرو

8 –  وَلَا تَقْرَبُواالزِّنیٰ

زنا (بدکاری) کے قریب مت جاؤ

9  – وَلَا تَقْتُلُواالنَّفْسَ الَّتِیْ حَرَّمَ اللهُ اِلَّا بِالْحَقّ

اللہ نے ناحق خون بہانے (قتل) کو حرام قرار دیا ہے

10  – وَ لَا تَقْرَبُوْا مَالَ الْيَتِيْمِ اِلَّا بِالَّتِیْ ھِیَ اَحْسَنُ

احسن صورت کے علاوہ یتیم کے مال کے قریب بھی نہ جاؤ

11  – وَ اَوْفُوْا بِالعَھدِ

اور اپنے وعدے ایفاء کیا کرو

12  – وَ اَوْفُواالْكَيْلَ اِذَا کِلتُم وَزِنُوا بِالْقِسْطَاسِ المُستَقِیمِ

پیمانہ صحیح رکھو اور بالکل درست ترازو سے وزن کیا کرو

13  – وَلَا تَقْفُ مَا لَيْسَ لَكَ بِهٖ عِلْمٌ ط اِنَّ السَّمْعَ وَالْبَصَرَ وَالْفُؤَادَ كُلَّ اُولٰئِكَ كَانَ عَنْهُ مَسئُولاً

جس چیز کے بارے میں نہیں جانتے ہو اُس کی پیروی نہ کرو، کان؛ آنکھ ؛ اور دل جواب دہ ہوں گے

14  – وَلَا تَمْشِ فِی الاَرْضِ مَرَحاً

اور تکبر و غرور کے ساتھ زمین پر نہ چلو

قُرآنِ مجید اللہ تعالیٰ کے آخری پیغمبر نبیِ مکرم محمد مصطفیٰ صلی اللہُ علیہ وآلہ وسلم پر نازل ہونے والی آخری آسمانی کتاب ہے، قُرآن ایک دائمی معجزہ ہے سرکارِ رسالت مآب صلی اللہُ علیہ وآلہ وسلم کی حقانیت کا ، کیونکہ اسلام دائمی و جاودانی دین ہے تو قُرآن کو بھی  قیامت تک کے لیے ہر دور اور زمانے میں سند اور دلیل کا حامل ہونا چاہیے، اور قُرآن کا دعویٰ بھی یہی ہے ،  وَلَا رَطبٍ وَّلَا یَابِسٍ اِلَّا فِی کِتَابٍ مُّبِینٍ * کوئی خُشک و تَر ایسا نہیں جس کا ذکر قُرآن مجید میں موجود نہ ہو، قُرآن کہتا ہے کہ وہ ھُدًی لِّلنَّاس ہے ؛ قُرآن جامِ صفاء و نُورِ خُدا ہے ، گنجِ سعادت فی الدُّنْيَا اور سامانِ عُقبیٰ ہے، قُرآن فلاحِ نَوعِ انسانی کا نُسخہءِ کیمیا ہے ، لہٰذا سُورۃ الجاثیہ کی آیت نمبر 20 میں فرمایا جا رہا ہے کہ

ھٰذَا بَصَأ ئِرُ لِلنَّاسِ وَھُدًی وَّ رَحْمَةٌ لِّقَوْمٍ يُّوقِنُوْنَ *

یہ (قُرآن) لوگوں کی ہدایت کے لیے دلیلوں کا مجموعہ اور یقین کرنے والوں کے لئے ہدایت و رحمت ہے،

تو پھر سوال یہ پیدا ہوتا ہے کہ ہم اس قُرآن سے مکمل استفادہ کرنے میں ناکام کیوں ہیں، اس کی سب سے بڑی وجہ تو یہ ہے کہ قُرآن کو سمجھنے کا فریضہ ہم نے مولویوں کے لیے رکھ چھوڑا ہے، اور اب مولوی بھی عام آدمی کو اس طرف جانے سے مانع ہے کیونکہ یہ اس کی روزی روٹی کا ذریعہ ہے حالانکہ سُورۃ القمر کی 17 ویں آیت میں قُرآن سب کو پکارتے ہوئے گویا ہے کہ

وَلَقَدْ يَسَّرْنَا الْقُرْأنَ لِلذِّكْرِ فَھَلْ مَنْ مُّدَّكِرٍ *

اور ہم نے تو قُرآن کو نصیحت حاصل کرنے کے واسطے آسان کر دیا ہے تو کوئی ہے جو نصیحت حاصل کرے

اب اس مُختصر سی تمہید(جو کہ بذات خود مکمل مضمون کی متقاضی ہے) کے بعد آئیے ہم اپنے اصل موضوع کی طرف آتے ہیں اور اس کے لیے  بہت زیادہ آیات کا حوالہ دینے کی بجائے آج کی اس گفتگو میں ہم سُورۃُ الانعام کی آیت نمبر 151 اور 152 کا سہارا لیتے ہیں جن میں اللہ تعالیٰ نے منشورِ حیات کے دس 10 اہم ترین نکات واضح اور صریح انداز میں بیان فرمائے ہیں، اور یاد رہے کہ معمولی رد و بدل کے ساتھ تورات میں بھی یہی 10 نکات موجود ہیں، اور انہی دس نکات کی بنیاد پر یہودی معاشرہ فخر بھی کرتا ہے اور اپنی مذہبی حیثیت برقرار بھی رکھے ہوئے ہے، چونکہ یہ تفصیلی آیات ہیں اس لیے ایک ایک نکتے کو لے کر مختصر تشریح کے ساتھ آگے بڑھیں گے،

قُلْ تَعَالَوْا اَتْلُ مَا حَرَّمَ رَبُّكُم عَلَيْكُم اَلَّا تُشْرِكُوْا بِهٖ شَيْئاً وَّ بِالْوَالِدَيْنِ اِحْسَاناً

اے رسول صلی اللہُ علیہ وآلہ وسلم ان سے کہہ دیجئے کہ آؤ جو چیزیں اللہ نے تُم پر حرام کر دی ہیں وہ تمہیں پڑھ کر سنا دوں وہ یہ کہ کسی بھی شے کو اللہ کا شریک نہ بناؤ اور ماں باپ کے ساتھ نیک سلوک کرو؛

قُرآن کے ہی بیان کے مطابق ہر زمانے میں اللہ تعالیٰ کی طرف سے مبعوث تمام انبیاء علیہم السلام کی دعوت کی بنیاد یہ رہی ہے کہ تمام انسان ایک واحد اللہ کی عبادت کریں ، ایک حاکم کی حاکمیت کو تسلیم کر لینے میں حکمت یہ ہے کہ انسان کو غیر اللہ کی غلامی سے نجات دلائی جائے ، اور قُرآن مجید بھی توحید و یکتا پرستی کو ساری آسمانی شریعتوں کے درمیان مشترکہ بنیاد کے طور پر متعارف کرواتے ہوئے سُورۃ آلِ عمران کی 64 ویں آیۃ میں فرما رہا ہے کہ

قُلْ يَا اَھْلَ الْكِتَابِ تَعَالَوْا اِلیٰ كَلِمَةٍ سَوَاءٍ بَيْنَنَا وَ بَيْنَكُمْ اَلَّا نَعْبُدَ اِلَّا اللهَ وَلَا نُشْرِكَ بِهٖ شَيْعاً وَّ لَا يَتَّخِذَ بَعْضُنَا بَعْضاً اَرْبَاباً مِّنْ دُوْنِ اللهِ ط

اے میرے رسول صلی اللہُ علیہ وآلہ وسلم ان سے کہہ دیجئے کہ اے اہلِ کتاب ! اُس بات کی طرف آؤ جو ہمارے اور تمہارے درمیان یکساں ہے وہ یہ کہ اللہ کے سوا کسی کی عبادت نہ کریں، اور اُس کے لیے کسی کو بھی شریک و مثیل نہ بنائیں، اور اللہ کے سوا ہم میں سے کسی کو پروردگار نہ مانیں ،

مختصراً عقیدہءِ توحید قُرآن کی رُو سے پہلا اور بنیادی ترین منشور ہے

والدین کے مقام کو قُرآن مجید میں اللہ تعالیٰ کی توحید و یکتائی اور ربوبیت کے فوراً بعد بیان کرنا ان کے مقام و مرتبہ کی بلندی کا عکاس ہے اور یہ بات یعنی توحید کے فوراً بعد والدین کے ساتھ بھلائی کو قُرآن میں مزید تین بار دہرایا ہے سُورۃ النساء آیت 36؛ سُورۃ بنی اسرائیل آیت 23 اور سُورۃ لَقمان آیت 14 میں ؛ والدین کی خدمت ، ایثار و جانثاری کو قُرآن نے کائنات کی سب سے بڑی قُربانی و نیکی فرمایا ہے، یہ اپنی جگہ ایک مکمل موضوع ہے جس پر بے شمار کتابیں لکھی جا چکی ہیں، اور جتنا میں نے دیکھا ہے اور کمزور ترین جانکاری کے اقرار کے ساتھ قُرآن مجید میں کم از کم 14 آیات میں اولاد کے لیے والدین کی خدمت؛ عزت؛ فرمانبرداری کے واضح احکامات موجود ہیں؛

وَلَا تَقْتُلُوْا اَوْلَادَكُمْ مِّنْ اِمْلَاقٍ ط نَحْنُ نَرْزُقُكُمْ وَ اِيَّاھُمْ ط

اور مُفلسی کے خوف سے اپنی اولادوں کو نہ مار ڈالنا، ہم ہیں جو اُنہیں بھی اور تمہیں بھی رزق دیتے ہیں،

اولاد کو والدین کے ساتھ بھلائی کا حکم دینے کے بعد والدین کو مخاطب کرتے ہوئے حکمِ ربّی ہو رہا ہے کہ دیکھو رزق کے خوف سے اپنی اولاد کو قتل نہ کرو ، تمہارا بھی اور تمہاری اولاد کا بھی رازق اللہ ہی ہے، اسلام سے قبل زمانہءِ جاہلیت میں لوگ اپنی اولادوں خصوصاً بیٹیوں کو قتل کر دیا کرتے تھے، وہ زمانہ سائنسی وسائل نہیں رکھتا تھا اس لیے پیدائش کے بعد قتل کیا جاتا تھا اور آج کا جدید انسان سائنسی ترقی کے ذریعے پہلے سے جان لیتا ہے اور اسقاط کے ذریعے ایسے کبیرہ گناہ کا مرتکب ہوتا ہے، قُرآن اولاد کے ساتھ مہر و محبت، شفقت اور حُسنِ سلوک کا حکم دیتا ہے،

وَلَا تَقْرَبُواالْفَوَاحِشَ مَا ظَهَرَ مِنْھَا وَمَا بَطَنَ ج

اور بدکاریوں کے قریب بھی مت جاؤ خواہ وہ ظاہر ہوں یا چھپ کر؛

لفظِ فواحش اپنے اندر وسیع تر معانی رکھتا ہے مثلاً جھوٹ، عہد شکنی، وغیرہ ، لیکن اگر وسیع تر معانی کو سمیٹنا ہو تو ہم (جنسی اعمال میں بے راہ روی) کہہ سکتے ہیں جنسی میلانات انسانی جَبِلَّت میں موجود ہیں، اور انسان بہرصُورت ایک معاشرتی حیوان ہے  لہٰذا معاشرے کے تحفظ کے لئے لازم ہے کہ جنسی فواحش کو قابو میں رکھا جائے قُرآنِ مجید میں عورت اور مرد کے خلافِ شرع جنسی اختلاط کو فاحشہ کہا گیا ؛ قومِ لوط کے عمل کو فاحشہ کہا گیا؛ پاک دامن عورتوں پر الزام کو فاحشہ کہا گیا، مختصر یہ کہ لفظِ فاحشہ قُرآن میں 13 مرتبہ اور فواحش 4 مرتبہ استعمال ہوا ہے اور چونکہ اس سے بے شمار مفاسد پیدا ہوتے ہیں، معاشرہ عدم تحفظ کا شکار ہوتا ہے اور سب سے بڑھ کر عفت و حیاء اور پاکدامنی کے خاتمے کا سبب بنتا ہے،

وَلَا تَقْتُلُواالْنَّفْسَ الَّتِیْ حَرَّمَ اللهُ بِالْحَقِّ ط ذٰلِكُمْ وَصّٰكُمْ بِهٖ لَعَلَّكُمْ تَعْقِلُوْنَ *

جس انسان کو اللہ نے محترم قرار دیا ہے اُسے ناحق قتل نہ کرو  یہ وہ باتیں ہیں جن پر عمل کا اللہ تمہیں حکم دیتا ہے تا کہ تم سمجھو  !

قُرآنِ مجید میں اللہ تعالیٰ نے انسان کو سب مخلوقات سے جُدا، اعلیٰ و ارفع مقام سے نوازا ہے، قُرآن نے انسان کو اللہ کا خلیفہ و جانشین قرار دیا  جو امامت کا بار اُٹھانے کی صلاحیت رکھتا ہے، انسان اللہ تعالیٰ کا متعلم اور فرشتوں کا معلم قرار پایا، خُشکی اور دریاؤں کو مسخر کرنے والا اور سب سے بڑھ کر احسنِ تقویم  پیدا کیا گیا ، یہی وجہ ہے کہ اس قدر مثبت مقام و اقدار کی بنیاد پر اس کا خون، جان و مال اور عزت و آبرو یہاں تک کہ میت کو بھی محترم قرار دیا گیا ہے، قُرآن نفسِ انسانی کے احترام کو ذہنوں میں راسخ کرنے کے لیے اس ذکر کو مختلف انداز اور الفاظ سے بار بار دہراتا ہے، مختلف سزاؤں کے تعین اور آخرت کی جزاء و سزا کے بیان سے انسانی معاشرے کا امن اور قتل و خون ریزی سے روکنا مقصود ہے،

یہاں سُورۃُ الانعام کی آیت 151 کا اختتام ہو رہا ہے اور اللہ رَبُّ العِزَّت اس آیت میں بیان شدہ پانچ 5 نکات کو اپنی وصیت/حکم قرار دے کر انسان کو عمومی طور پر غور و فکر کی دعوت دے رہا ہے ، اگلی نشست میں ان شآء اللہ قُرآنی منشور کےاگلے پانچ نکات پر گفتگو ہو گی

جاری …