Tag: عمان

( صحرائے عرب میں صبح کس انداز سے نمودار ہوتی ہے ۔ نسیم صبح کے ناقابل یقین ، معطر اور مسحور کن جھونکوں کی کہانی )

تحریر :

سیّدزادہ سخاوت بخاری

اردو ادب سے دلچسپی رکھنے والے خواتین و حضرات نے صبح اودھ اور شام بنارس کا محاورہ کئی مرتبہ پڑھا ہوگا ۔ اودھ ( Awadd ) بھارت کی موجودہ ریاست اتر پردیش (UP) کے اندر ایک مسلمان ریاست تھی جس کا اولین دارالحکومت فیض آباد اور پھر لکھنوء بنا ، جو ابتک اترپردیش کا دارالحکومت ہے ۔

اسی طرح ہندووں کا قبلہ و کعبہ بنارس کا مشہور شہر بھی ، صوبہ یوپی کے اندر دریائے گنگا کے کنارے واقع ہے ۔ بنارس  کا نام بی جے پی ( BJP ) حکومت نے بدل کر وارانسی رکھ دیا ہے لیکن لکھنوء جو ابتک اپنے پرانے نام سے ہی پکارا جاتا ہے ، کبھی سابقہ ریاست اودھ کا دارالحکومت تھا لھذا محاورے میں اودھ سے مراد لکھنوء کا شہر لیا جاتا ہے ۔ ان دو تاریخی شہروں میں سے ، بنارس کی صبح اور لکھنوء ( اودھ ) کی شام نے ، اسقدر شہرت پائی  کہ محاورے کی حیثیت اختیار کرکے اردو ادب میں شامل ہوگئیں ۔

بنارس ، موجودہ وارانسی ، ہمارے مکہ اور مدینہ کی طرح ہندو مذہب کا پوتر (پاک اور مقدس ) شہر ہے ۔ یہاں سینکڑوں چھوٹے بڑے مندر ہیں ۔ یہ تاریخی اور مذہبی شہر اس دریائے گنگا کے کنارے آباد ہے جس میں ہندو عقیدے کے مطابق اشنان کرنے ( نہانے سے ) تمام سابقہ گناہ جھڑ جاتے ہیں ، جیسا کہ ہم مسلمان حج کرنے کے بعد اپنے آپ کو سابقہ گناہوں سے صاف شفاف اور پاک سمجھ لیتے ہیں حالانکہ ایسا ہے نہیں ۔ اگر گنگا میں اشنان اور حج کرنے سے سابقہ گناہ دھل جانا درست قرار دیا جائے تو پھر تمام چور ڈاکو اور مجرم ،  لوٹی ہوئی دولت سے ہر سال حج کرکے یوم حساب سے پہلے پہلے پاک صاف ہوکر ڈائریکٹ جنت میں داخل ہوجائینگے ۔ وضاحتا عرض کردوں کہ ادائے حج سے حقوق اللہ میں کی گئی کمی بیشی میں رعائت ضرور ملتی ہے لیکن حقوق العباد کا حساب جوں کا توں رہیگا ۔

معافی چاہتا ہوں بات کہاں سے کہاں نکل گئی ، بتا یہ رہا تھا کہ بنارس ہندووں کا مقدس شہر ہے جہاں کی صبح بہت سہانی ہوتی ہے ۔ مسلمانوں کی صبح کی آذان کے ساتھ ہی سینکڑوں مندروں سے پوجا پارٹ کے لئے گائے جانیوالے بھجنوں اور گھنٹیوں کی سریلی آوازیں فضاء میں موسیقی بھر دیتی ہیں ۔ جیسے ہی ٹنا ٹن کی موسیقی گونجتی ہے ، شہر بھر کے ہندو نیند چھوڑ کر ہاتھوں میں گیندے کے پھول اور گڑویاں اٹھائے ، گنگا ماتا کے اشنان کے لئے نکل پڑتے ہیں ۔ کہتے ہیں جب سورج دیوتا ، گنگا میں ڈبکی لگاکر اپنی پہلی کرن بنارس پر پھینکتا ہے تو سورج بنسی ( سورج دیوتا کے پجاری ) گڑویوں میں گنگا جل ( گنگا کا پانی ) بھر کر اس کی آرتی اتارتے ہیں ۔  جیسے ہی  پوجا مکمل ہوئی پجاری اپنے اپنے گھروں کو لوٹ چلے ۔

بنارس جہاں صبح کی گھنٹیوں اور پوجا پارٹ کے لئے مشہور ہے وہیں اس شہر کے مسلمان بافندوں ( کپڑا بنانے والوں )  کی کھڈی سے بنائی ہوئی ،  ریشمی ساڑھیاں ، دنیاء بھر میں پسند کی جاتی ہیں ۔  اسی طرح بنارسی ٹھگوں کے علاوہ ،  بنارس کا پان اسقدر  چٹخارے دار ہوتا ہے ، کہ اس پر نغمہ نگار  انجان  نے فلم ڈان کے لئے گیت لکھ ڈالا ۔ کشور کمار کی آواز میں گائے اس نغمے کے بول ہیں ،

او کھائی کے پان بنارس والا

کھل جائے  بند  عقل  کا  تالا

قصہ مختصر ، جہاں ہمیں ،  صبح بنارس ،   گھنٹیوں کی ٹنا ٹن موسیقی اور پوجا پارٹ کے جلوس میں ،  گیندے کے پھولوں سے لدی نارنجی ساڑھی پہنے ، گنگا کنارے نمودار ہوتی نظر آتی ہے ، وہیں  شام اودھ ( لکھنوء کی شام ) ، بال بکھرائے ،  گھنگھرووں کی چھنا چھن اور طبلے کی تھاپ پر طوائفوں کے کوٹھوں سے اترتی دکھائی دیتی ہے ۔ ریاست اودھ کے آخری تاجدار کنگ واجد علی شاہ کے دور تک لکھنوء جہاں علم و ادب اور تہذیب کا گہوارہ تھا وہیں اس کی طوائفیں ( بائیاں ) رقص سرود کے ساتھ ساتھ شرفاء اور نوابین کے بچوں کو تہذیب سکھانے کے اداروں کے طور پر جانی جاتی تھیں ۔ بڑے بڑے امراء اپنے بچوں کو آداب محفل سکھانے ان کے پاس بھیج دیتے ۔

شام ہوتی ہی بازار ، موتیے ، چنبیلی اور گلاب کے گجروں سے سج جاتے ۔ تازہ پھولوں کی خوشبو سے معطر ہر گلی کے چوباروں اور جھروکوں سے کسی امراؤ جان کی صداء بلند ہوتی ،

اک تم ہی نہیں تنہاء الفت میں میری رسوا

اس شھر میں تم جیسے دیوانے ہزاروں ہیں

اگرچہ لکھنوء کی شام کا یہ ایک تہذیبی پہلو ہے لیکن شاید اسی عیاشی اور فحاشی نے ہندوستان کی مسلمان ریاستوں کو نیست و نابود کرکے رکھ دیا ۔

بنارس اور لکھنوء کی یہ دلچسپ و دل آویز کہانی اس لئے سنانا پڑی  ،   کہ میراجب بھی صحرائے عرب سے گزر ہوا ،  وہاں کی صبح و شام کے سہانے پن نے اسقدر متاثر کیا کہ اردو ادب کا طالبعلم ہونے کے ناطے

 ” صبح بنارس – شام اودھ ”   کا محاورہ یاد آگیا ۔

گزشتہ تقریبا نصف صدی سے سرزمین عرب کے ملک سلطنت عمان میں مقیم ہوں ۔ متعدد مرتبہ پیشہ ورانہ امور کی انجام دہی کے لئے شہروں سے نکل کر صحراء میں گشت کیا ۔ یاد رہے عمان کے کل رقبے کا 82% ریگستان ، 15% پہاڑ اور صرف 3% ساحلی میدانوں پر مشتمل ہے ۔ ریگستان یا صحرائی رقبہ اگرچہ بہت زیادہ ہے لیکن اللہ نے اسی صحراء کے نیچے تیل و گیس کی جھیلیں چھپا رکھی ہیں اور ان ہی قدرتی خزانوں نے ، اس سلطنت کو ، دھن دولت سے مالا مال کررکھا ہے ۔ عمان کا مستطیل نماء ( Rectangular )  صحراء کم و بیش 1000 کلو میٹر طویل اور مختلف مقامات پر تقریبا 400 سے 500 کلومیٹرز تک چوڑا ہے ۔

جن لوگوں نے کبھی صحراء نہیں دیکھا ان کے علم کے لئے بتاتا چلوں کہ صحراء زیادہ تر ہموار میدان کی طرح ہوتا ہے ۔ تا حد نگاہ  ، ریت کا میدان لیکن کوئی سبزہ یا درخت نظر نہیں آتا ، البتہ کہیں کہیں صحرائی جڑی بوٹیاں اور صحراء کے پھول ، نہ جانے کن نگاھوں کے انتظار میں ، کسی دیہاتی حسینہ کی طرح ، شرماتے ، لجاتے اور لہلہاتے دکھائی دیتے ہیں ۔

یہاں مجھے علامہ اقبال کی ایک غزل کے دو اشعار یاد آگئے ، فرماتے ہیں ،

” پھول ہیں صحراء میں یا پریاں قطار اندر قطار

اودے اودے نیلے نیلے پیلے پیلے پیرہن

( مطلب :

صحراء کے پھولوں پر نظر پڑنے سے ایسا محسوس ہوتا ہے ، کہ جیسے ، خوبصورت پریاں ، پرپل ، نیلے اور پیلے لباس زیب تن کئے قطاریں بناکر کسی کے استقبال کے لئےکھڑی ہیں )

اسی غزل کے ایک اور شعر میں کہتے ہیں ،

” حسن بے پرواہ کو اپنی بے حجابی کے لئے

ہوں اگر شہروں سے بن پیارے تو شہر اچھے کہ بن

( مطلب :

 قدرتی حسن کے نظاروں کو اس لئے  ” حسن بے پرواہ ”  کہا جاتا ہے کہ وہ کسی سے داد طلب نہیں کرتے ، نہیں پوچھتے ہم کیسے لگ رہے ہیں ۔ اپنی ذات میں گم رہتے ہیں ۔

 کہا ، اگر حسن بے پرواہ کو اپنی نمائش کے لئے شہروں اور آبادیوں کی بجائے ،  بن ، یعنی جنگل اور ویرانے پسند ہوں تو بتائیے شہر اچھے یا جنگل اور ویرانے )

صحراء میں آبادی نہ ہونے کے برابر ہے ، لیکن بعض مقامات پر  خانہ بدوش بدو  ، اپنے اونٹ اور دیگر جانور لئے عارضی جھونپڑوں میں مقیم نظر آتے ہیں ۔  سمندر سے قریب علاقوں میں چند مستقل آبادیاں ، گاؤں اور ٹاون بھی ہیں ۔ جہاں کے لوگ اونٹ اور بھیڑ بکریاں پالنے کے ساتھ ساتھ ، سمندر سے مچھلیاں پکڑ کر کاروبار زندگی چلاتے ہیں ۔

کہانی طویل ہوتی جارہی ہے لیکن میرے معزز قارئیں اکثر و بیشتر شکوہ کناں رہتے ہیں کہ شاہ جی ، جب ہمیں تحریر اپنے سحر میں جکڑ لیتی ہے تو آپ اسے ختم کردیتے ہیں لھذا صحراء سے متعلق ، چند اور مشاہدات و تجربات بھی تحریر کئے دیتا ہوں ۔

عمان کے منطقہء شرقیہ ( Eastern Region ) میں ایک دور دراز شہر ، دقم ( Duqam )  کی سمت دوران سفر مجھے سڑک کنارے پانی کی ایک ننھی سی جھیل اور اس کے  آس پاس کھجور کے چند درخت ، آنے جانے والوں سے بے خبر و بے نیاز اپنی ذات میں گم ، کسی مست ملنگ کی طرح ،  ہواء کے جھونکوں پہ جھولتے اور جھومتے نظر آئے ۔ میرے لئے یہ نظارہ پرکشش اور حیران کن تھا  ۔ بے آب و گیاہ صحراء کے بیچوں بیچ پانی کی جھیل اور سرسبز درخت کہاں سے آگئے ۔

اپنے سکھ ڈرائیور سے کہا ،

 گاڑی روکو ، مجھے اس نظارے سے لطف اندوز  ہونا ہے ۔ سرجیت سنگھ نے گاڑی تو روک دی لیکن مجھے گاڑی سے اتر کر جھیل کے پاس جانے سے منع کردیا ۔ وجہ پوچھی ۔

 کہنے لگا ،

شاہ جی !

میں اس علاقے میں پہلے بھی کام کرچکا ہوں ۔ اس پانی کو علاقے کے لوگ

 ” جنات کی جھیل "

کہتے ہیں ۔ یہاں جنات کا ڈیرہ ہے ۔ جو پانی کے قریب جائے واپس زندہ نہیں لوٹتا ۔ اپنی بات کو آگے بڑھاتے ہوئے کہنے لگا ،

جب اس علاقے میں ترقیاتی کام شروع ہوئے تو ایک پاکستانی نے ، اپنے واٹر ٹینکر کے ذریعے یہاں سے پانی بھر کر ادھر ادھر بیچنا شروع کردیا جس پر جنات نے اسے کئی مرتبہ سامنے آکر کہا کہ دوبارہ اس طرف مت آنا لیکن وہ نہ مانا اور باالآخر ایک دن اسی جھیل کنارے ،  ٹینکر کے پاس ، اس کی لاش پڑی ملی ۔ وہ دن اور آج کا دن کوئی مقامی یا خارجی شخص اس پانی کے قریب نہیں جاتا ۔ بلکہ تمام ڈرائیورز تیزی سے گاڑی بھگا کر یہاں سے گزر جاتے ہیں ۔

اس روائت میں کتنا سچ ہے میں نہیں جانتا لیکن اکثر لوگوں سے یہی کہانی سنی ۔ ویسے یہ پانی کسی عجوبے سے کم نہیں ۔ لق و دق  صحراء کے بیچوں بیچ ، کھڑے پانی کا یہ ذخیرہ دیکھ کر عقل دنگ رہ جاتی ہے ۔

بات چل نکلی ہے تو یہ بھی جان لیجئے کہ سمندر کی طرح صحراء میں بھی ہواء کے زور سے ریت کے طوفان اٹھتے ہیں ۔ ہم دو دوست   ، ایک صحرائی سڑک پر سفر کررہے تھے کہ دور افق پر ہمیں کالی آندھی ہماری سمت آتی دکھائی دی ۔ سمجھ گئے ریت کا طوفان آرہا ہے ۔ گاڑی ایک طرف کھڑی کرکے شیشے بند کرلئے ۔ چند ہی لمحوں میں طوفان نے ہمیں آن لیا ۔ ریت ، گاڑی کی ونڈ اسکرین اور شیشوں سے چھو کر ایسے گزر رہی تھی جیسا کہ تیز بارش کا پانی بہتا چلا جاتا ہے ۔ کم و بیش 20 منٹ میں جب یہ طوفان گزر گیا تو جان میں جان آئی اور ہم نے سفر دوبارہ شروع کیا ۔

صحراء میں طوفانی ہواوں کے علاوہ ایسی فنکار ہوائیں بھی پائی جاتی ہیں جو ریت کو اڑا کر ٹیلے کی شکل دے دیتی ہیں ۔ آپ ایک ہی سڑک سے بارہا گزریں ، سڑک کے ارد گرد کے مناظر بدلے ہوئے ملینگے ۔ کبھی چھوٹے چھوٹے ٹیلوں کی قطاریں  تو کبھی ایک بڑا ٹیلا ۔ ایسا محسوس ہوتا ہے کہ کسی ماہر انجنیئر نے بڑی مہارت سے ٹیلے بنائے ہوں  ۔ یہی نہیں بلکہ فرصت کے اوقات میں ، ہواء ، ان ٹیلوں پر گل کاری بھی کرتی ہے ۔ ایسے ایسے نقش و نگار بنے نظر آتے ہیں کہ انسان دیکھتا رہ جائے ۔ صحراء کی ایسی ہی ایک تصویر جب میں نے اردو کے معروف شاعر مرحوم شبنم رومانی کو مسقط میں دکھائی تو بے ساختہ بول پڑے ،

بخاری صاحب یہ ہواء کی شاعری ہے۔

اسی صحراء میں مجھے مٹیالے بلکہ ہو بہو ریت کی رنگت کا سانپ دیکھنے کو ملا ۔ تقریبا ڈیڑھ فٹ لمبا ، یہ انتہائی زہریلا سانپ ،  شکار کو پھانسنے کے لئے اپنا پورا بدن ریت میں چھپا لیتا ہے ۔ صرف سر کا تھوڑا سا حصہ اور آنکھیں باہر رکھتا ہے ۔ آپ اسے نہیں دیکھ سکتے مگر یہ سب کو دیکھ رہا ہوتا ہے ۔ جیسے ہی کسی انسان یا جانور نے اس کے قریب پاوں رکھا ، ڈس لیتا ہے ۔ یہی وجہ ہے کہ آئل کمپنیوں کے اہلکار اور وہ لوگ جو صحراء میں کسی بھی کام سے جائیں ان کے لئے لانگ سیفٹی بوٹ پہننا لازمی ہوتا ہے تاکہ ان سانپوں سے محفوظ رہ سکیں ۔

صحراء کا سب سے بڑا اور عام پایا جانیوالا جانور اونٹ ہے جو آپ کو جا بجاء چلتا پھرتا دکھائی دے گا ۔ کبھی کبھی یہ حضرت پکی سڑک پر آکر بیٹھ جاتے ہیں اور رات کے وقت کئی مرتبہ ،  کسی اندھے موڑ پر گاڑیوں سے ٹکرا کر بڑے حادثات کا باعث بنتے ہیں ۔

جیسا کہ پہلے بیان کیا ، اسی صحراء کے نیچے اللہ نے تیل اور قدرتی گیس کے خزانے چھپا رکھے ہیں لھذا صحراء کے طول و عرض میں حکومتی کمپنی ، پیٹرولیم ڈیویلپمنٹ عمان ( PDO ) کے زیر اہتمام آئل اینڈ گیس فیلڈز ( Oil & Gas Fields ) کے کیمپس قائم ہیں ۔

مجھے اپنے فرائض منصبی کے سلسلے میں اکثر مختلف فیلڈز اورکیمپس میں جانے اور وہیں قیام کرنے کا موقع ملا جو صحراء کے اندر ، سمندر کے جزیروں کی طرح بیابان میں الگ تھلگ بنائے گئے ہیں ۔

پہلی مرتبہ جانا ہوا  تو ڈرائیور نے کہا ،

 شاہ جی !  صبح سویرے اٹھیئے گا آپ کو ایک نظارہ دکھاونگا ۔ چنانچہ فجر کی آذان سے پہلے ہی جاگ کر تیار ہوگیا ۔ ڈرائیور نے دروازے پہ دستک دی ۔ باہر آیا تو ہواء کے خوشگوار جھونکوں نے استقبال کیا۔

قارئین کرام

مجھے اپنی زندگی میں ایسی خوشگوار ہوا کا تجربہ اس سے پہلے کبھی نہیں ہوا جو اس صحراء کے اندر خراماں خراماں رواں دواں تھی ۔ ہم کیمپس کی کھلی راہداریوں میں چکر کاٹ کر اس ریشمی ہوا سے لطف اندوز ہوتے رہے ۔ اس کے بعد سے تو ہر مرتبہ صبح کاذب کی سیر میرا معمول بن گئی ۔

ریشم کا ذکر آتے ہی ہمارے ذہن میں نرماہٹ اور ملائمت کا تصور پیدا ہوتا ہے ۔ یقین جانئیے اس ہوا کو اس سے بھی زیادہ  ملائم ، خوشگوار اور اسقدر معطر پایا کہ روح تازہ ہوگئی

بقول پروین شاکر ،

” روح تک آگئی تاثیر مسیحائی کی "

مجھے اکثر ایسے لگا کہ شاید یہ جنت کی ہواء ہے  یا ماں کے دوپٹے کی ہواء ہے ۔۔

آپ کے علم کے لئے بتاتا چلوں کہ اسی ہوا کو عربوں نے ” نسیم ” کا نام دیا ۔ ہمارے ہاں نسیم نام عام ہے ۔ یہ دراصل صحراء میں جنت سے آنیوالی ہوا کا عربی نام ہے ۔

اسی نسیم کو لیکر مسلمان شعراء نے اردو ، پنجابی ، عربی اور فارسی زبان میں سینکڑوں اشعار کہے ،

مثال کے طور پر ، معروف فارسی شاعر ، عاشق رسول ، حضرت مولانا

عبدالرحمن جامی رحمة اللہ کی نعت کا یہ شعر کس نے نہیں سنا ،

وہ نسیم صبح سے مخاطب ہوکر کہتے ہیں ،

” نسیما ! جانب بطحاء گزر کن 

 ز احوالم محمدؐ   را  خبر  کن "

مطلب :

اے نسیم ! تو بطحاء یعنی مدینہ شریف کی طرف چل اور میرے آقا و مولا حضرت محمد ﷺ   کو میرا حال بتا کہ میں ان کے ہجر میں کسقدر بےچین اور ملنے کے لئے بیتاب ہوں ۔

انوکھی اداء رکھنے والی  باد نسیم ،  صبح کاذب یا فجر کی آذان سے پہلے  ، کسی ریشم پوش شہزادی کی طرح  دبے پاوں چلنا شروع کردیتی ہے  لیکن شاید اس کی سورج دیوتا کی بیٹی کرن سے نہیں بنتی لھذا پہلی کرن کے صحراء پر قدم رکھتے ہی ، حیران کن طور پر ، ایسے غائب ہوجاتی ہے کہ جیسے کسی نے بٹن دباکر پنکھا بند کردیا ہو ۔ ادھر پہلی کرن نمودار ہوئی ادھر میڈم نسیم ایسے روپوش جیسے بالاخانے کی کھڑکی سے جھانکتی حسینہ ، کسی اجنبی کو دیکھ کر فورا دریچہ بند کرلیتی ہے ۔

یوپی والوں نے صبح بنارس اور شام اودھ تو بیشک ڈھونڈھ لی ،  لیکن نسیم صبح کے تجربے سے محروم رہے ورنہ بنارس کے مندروں میں فجر کے وقت بجنے والی گھنٹیوں کی موسیقی ، گنگا ماتا کی روانی اور لکھنوء کی گجروں سے سجی شامیں   اور  امراو جان کے مدھر تانوں پر کئے جانیوالے کتھک ڈانس کو بھول جاتے ۔

تحریر : شاندار بخاری

مقیم مسقط

سلطنت عُمان اور پاکستان کے آپسی تعلقات برادرانہ اور آپسی تعاون پر مبنی ہیں۔ عمان کا اسلام آباد میں سفارت خانہ اور کراچی میں قونصلیٹ جنرل ہے، جب کہ مسقط میں پاکستان کا سفارت خانہ ہے۔

عرب ممالک میں عُمان پاکستان کا سب سے قریب تر ہمسایہ ہے اور یہاں سے کراچی تک کا سفر صرف 1 گھنٹہ اور 15 منٹ کا ہے، اور دونوں ممالک کی ایک دوسرے کے ساتھ سمندری حدود مشترک ہیں۔ اس وقت کم و بیش 3 لاکھ پاکستانی سلطنت عمان میں مقیم ہیں۔ بلوچستان کی اہم بندرگاہ گوادر ایک مدت تک عُمان کا حصہ تھا۔ سنہ 2001 میں مرحوم بادشاہ سلطان قابوس کے پاکستان کے دورے کے بعد ان کی تجارتی تعلقات کو مزید تقویت ملی اللہ سلطان الخالد سلطان قابوس کے درجات بلند کرئے آمین اور موجودہ بادشاہ سلطان ھیثم بن طارق بن تیمور کو اپنے حفظ و امان میں رکھے آمین جنہوں نے ہم پردیسیوں کیلئیے روزگار کے مواقع فراہم کئیے ، ویزے کے نرخوں میں کمی اور دیگر سہولیات فراہم کیں۔

کچھ دن قبل کا واقع ہے کہ عُمان کے صوبے شرقیہ کے ایک گاوں الاشخرہ جو کہ ساحل سمندر سے ملحقہ آبادی ہے اور وہاں زیادہ تر لوگ ماہی گیری سے وابستہ ہیں کے 2 مقامی ماہی گیر علی الجعفری اور سالم الجعفری اپنی کشتی پر سوار سمندر میں محو سفر تھے کے ان کی کشتی (مخصوص طرز کی فشنگ بَوٹ) کا انجن فیل ہوگیا اور واپس لوٹ نہیں سکے نا ہی ان کے پاس کمیونیکیشن کی کوئی سہولت تھی کہ اپنے عزیز و اقارب سے رابطہ کر کے مدد طلب کرتے، اگلے ہی دن سارے شہر اور اس کے بعد ملک میں ان کی گمشدگی کی خبر آگ کی طرح پھیل گئی اور ہر آنکھ اشکبار تھی اور ہاتھ دعا کیلئیے اٹھ رہے تھے کے یہ دونوں صحیح سلامت واپس آ جائیں لیکن کوئی خبر نہیں آئے دن گزرتے گہے اور ہفتہ گزر گیا لیکن نا تو ان کے اہل خانہ نے امید کا دامن چھوڑا نا ہی عوام الناس نے سوشل میڈیا پر رہ طرف انہی کی خبریں تھیں اور سمندر کے طول و عرض میں ان کی تلاش جاری تھی کہ اسی اثناء میں نویں / 9 دن ایک خوش آئند خبر ایک انجانے نمبر سے کال کی صورت میں موصول ہوئی کہ دونوں ماہی گیر مل گئے ہیں اور اس وقت پاکستان کی بحری حدود میں ہیں اس خبر کا آنا تھا اور پورے ملک میں سجدہ شکر ادا کئیے گئے اور یر طرف پاکستان زندہ باد کے نعرے بلند ہونے لگے سوشل میڈیا پر تو ایک طوفان سا آگیا اور ہر شخص اس طرح خوش تھا جیسے عید کا سماں ہو۔

١٩ جون کی صبح دفتر جاتے ہوئے ایک کال موصول ہوئی دوسری جانب سے پیغام موصول ہوا کہ ہمارے سینئیر صحافی کو فورا پا کستان کیلئیے روانہ ہونا ہے تاکہ سالم اور علی کے پہنچتے ہی ان کا انٹرویو ریکارڈ کریں اور شئیر کریں تاکہ سارا ملک جو پریشان تھا ان کیلئیے انہیں تسلی ملے۔ میں نے فورا محترم ویزا کونسلر امجد ملک صاحب جو کہ نہایت ہی شفیق اور نفیس طبیعت کے مالک ہیں ان کو کال ملائی اور انہوں نے ریسیو کی حال احوال پوچھا اس کے بعد میں نے عرض کی تو انہوں نے بھر پور تعاون کی یقین دھانی کروائی اور ملنے کا وقت طہ پا گیا اس دوران میں نے سینئیر صحافی محمد العلوی کو پک کیا اور اپنے ہمراہ سفارت خانہ پاکستان لے گیا وہاں ویزا پراسس خوش اسلوبی سے طےپا گیا اور شام کی فلایٹ کراچی کیلئیے براستہ قطر بُک کر لی گئی.

عمان سے مقامی صحافی پاکستان کیلئیے روانہ ہوئے اور وہاں علی اور سالم کا پہنچنے پر پاکستان نیوی ، عمان قونصل خانہ کے ممبران ، پاک میری ٹائم کے عملے نے پُرتپاک استقبال کیا اس کیساتھ ہی پاکستانی ماہی گیروں کے ایک ٹولے سے بھی متعارف کروایا گیا جو کہ تلاش روزگار میں محو تھے اور دوران سفر انہوں نے اس کشتی کو سمندر کی بے رحم موجوں کی بیچ ہچکولے کھاتے دیکھا جس میں 9 دن سے تپتی دھوپ میں بے یار و مددگار علی اور سالم موجود تھے اور انہیں فورا ریسکیو کیا ان کی اپنے سیٹلائیٹ فون کے ذریعے گھر بات کروائی اور پاکستان نیوی کو مطلع کیا جنہوں نے فورا ان کو وہاں پنچ کر طبی امداد دی اور عزت و وقار کیساتھ کراچی شہر میں مہمان بنایا ، واقعی اس دن یہ پاکستانی ماہی گیر فرشتہ ثابت ہوئے اللہ کیطرف سے مدد ملی اور یہ گیارہویں دن بذریعہ پی آئی اے اپنے وطن عُمان واپس آئے جہاں ان کا پرتپاک استقبال کیا گیا۔

اس وقت تمام ملک میں جشن کا سماں ہے ہر مرد و زن جو اردو زبان سے ناواقف ہیں لیکن ” پاکستان زندہ باد ” کا نعرہ بلند کر رہے ہیں۔ سالم الجعفری کے والد اور علی الجعفری کے بھائی اور ان کے رشتے داروں کیطرف سے اعلان کیا گیا ہے کہ ان کی کشتی جو کہ تقریبا 10،000 ڈالر مالیت کی ہے جمع کیش رقم 10،000 ڈالر اجمالی طور پر 20،000 دالر ان ماہی گیروں کو تحفے میں دئیے جائیں گےجنہوں نے ان کو سمندر میں تلاش کیا اور بحفاظت کراچی تک لے گئے۔

عُمان پاکستان بھائی چارہ زندہ باد ♡🇴🇲🇵🇰 ♡

تحریر :ناصر معروف

ہم زندہ قوم ہیں عمان پاکستان دوستی زندہ باد، محبتوں کے سفیر پاک وطن کے ماہی گیر پائندہ باد

صبح اٹھا تو حسب عادت فون کو ڈھونڈنا شروع کیا ایسے جیسے کمزور نظروں والے چشمہ ڈھونڈتے ہیں خیر یہ تو روز کی عادت بن چکی ہے کیونکر دن کا آغاز ہی موبائل سے ہوتا ہے ۔ویسے لوگ کتنے بھلے ہیں جو فون کو اب تک بھی سمارٹ فون سمجھتے ہیں اصل میں تو یہ بہت ساری چیزوں کو نگل چکا ہے
خدا خدا کر کے فون ہاتھ آیا تو دیکھا کہ آج سوشل میڈیا پر 2 عمان سے تعلق رکھنے والوں شہریوں کی ویڈیو کچھ پاکستانی ماہی گیروں کے ساتھ خوب دھوم مچا رہی رہے کچھ تجسّس بڑھا تو مزید جاننے کی کوشش کی ۔
تو یاد آیا کہ ایک ہفتہ پہلے عمان کے سمندر سے لاپتہ ہونے والے یہ وہی عمانی شہری ہیں جن کی سلامتی کے لئے عمان میں اور مختلف سوشل میڈیا پلیٹ فارمز پر خصوصی دعائیں مانگی جا رہیں تھی
ان کا تعلق عُمان کے صوبے شرقیہ کے ایک گاوں الاشخرہ سے ہے جو کی ساحل سمندر کے قریب واقع ہے یہ دو مقامی ماہی گیر علی الجعفری اور سالم الجعفری اپنی کشتی پر سوار سمندر روزمرہ کے کام سرانجام دے رہے تھے اور وہیں ان کی کشتی کا انجن فیل ہوگیا اور یہ کشتی سمندر کی بے رحم لہروں کے سہارے پر تھی کیونکہ یہ دو لوگ ہی کشتی پر سوار تھے اور ان کے پاس کمیونیکیشن کی کوئی سہولت موجود نہیں تھی اور جو موبائل تھے ان پر سگنل نہیں موصول ہو رہے تھے اس لیے ان کا کسی سے رابطہ نہ ہو سکا ، اگلے ہی دن سارے شہر اور اس کے بعد ملک بھر میں ان کی گمشدگی کی خبر آگ کی طرح پھیل گئی اور ہر آنکھ اشکبار تھی اور ہاتھ دعا کیلئیے اٹھ رہے تھے کے یہ دونوں صحیح سلامت واپس آ جائیں لیکن کوئی خبر نہیں آئی کئی دن گزرتے گئے یہاں تک کہ پورا ہفتہ گزر گیا لیکن ان کے اہل خانہ نے امید کا دامن نہیں چھوڑا اور نا ہی عمان کے اداروں نے ہمت ہاری بلکہ سمندرکے طول و عرض میں تلاش جاری رکھی

اسی اثناء میں نویں دن ایک خوشخبری ایک فون کال کی صورت میں موصول ہوئی کہ دونوں ماہی گیر مل گئے ہیں اور اس وقت پاکستان کی بحری حدود میں ہیں انہیں پاکستانی ماہی گیروں کی ایک کشتی نے دیکھا اور ان کو اس بے سروسامانی کی حالت میں دیکھ کر ان کی مدد کو آ پہنچے اور جس طرح پاکستانی ماہی گیروں نے ان کی جان بچائی اور اور ان کو پاکستان میری ٹائم سکیورٹی کے حوالے کیا اور میری ٹائم سکیورٹی نے جس طرح اپنی پیشہ ورانہ مہارتیں بروئے کار لاتے ہوئے انھیں طبی امداد دی اور باحفاظت کراچی پہنچایا اور نئی زندگی دی اس کی مثال نہیں ملتی۔
اس خبر کا آنا تھا اور پورے عمان ملک میں سجدہ شکر ادا کئے گئے اور ہر طرف پاکستان زندہ باد کے نعرے بلند ہونے لگے سوشل میڈیا پر تو ایک طوفان سا برپا ہو گیا اور ہر شخص اس طرح خوش تھا جیسے عید کا سماں ہو۔یا ان کا اپنا باپ بیٹے یا بھائی کی خبر ہو۔

سلطنتِ عمان، پاکستان کا اسلامی دوست اور سمندری لحاظ سے ہمسایہ ملک ھے۔ سلطنت عمان کے زیادہ تر لوگ خوش مزاج اور طبیعتا ھمدرد ھیں
سلطنت عُمان اور پاکستان کے درمیان برادرانہ تعلقات موجود ہیں ۔
اور دونوں ممالک کی ایک دوسرے کے ساتھ سمندری حدود مشترک ہیں۔ اس وقت کم و بیش 2 لاکھ پاکستانی سلطنت عمان میں مقیم ہیں۔ سنہ 2001 میں مرحوم بادشاہ صاحب جلالہ سلطان قابوس کے پاکستان کے دورے کے بعد دونوں ممالک میں تجارتی تعلقات کو مزید تقویت ملی جو آج تک قائم و دائم ہے سلطنت عُمان سے کچھ مقامی صحافی پاکستان کیلئے روانہ ہوئے اور انہوں نے علی الجعفری اور سالم الجعفری سے خصوصی ملاقات کی اور اس کے ساتھ ساتھ پاکستانی کے ان مقامی ماہی گیروں سے بھی ملاقات کی جنہوں نے ان کی جان بچانے میں کلیدی کردار ادا کیا اور علی اور سالم نے اپنی کشتی جس کی مالیت 10000 ہزار ڈالر کے لگ بھگ ہے تحفے کےطور پر پاکستان ماہی گیروں کو دے دی اور اس طرح حادثاتی ملاقات کو دوستی میں بدل دیا ۔
اور پھر گیارہویں دن بذریعہ پی آئی اے اپنے وطن عُمان واپس پہنچے جہاں ان کا استقبال دیدنی تھا عمان کے لوگ پاکستان زندہ باد کے نعرے لگا رہے تھے اور یوں لگ رہا تھا جیسے پورا عمان ہی ائیرپورٹ امڈ آیا ہو۔
اور میں آخر میں یہ کہنا چاہوں گا اے میرے وطن کے ماہی گیروں آپ نے عمان کے لوگوں جو عمدہ سلوک کیا ہے اس سے ہم تارکین وطن کا سر بھی فخر سے بلند ہو ا ہے آج آپ کے حسن سلوک کی بدولت ہم جیسے کی توقیرمیں مزید اضافہ ہوا ہے ۔اسے میرے وطن ماہی گیروں ہم بھی آپ کے تہہ دل سے مشکور ہیں

پاکستان عمان دوستی زندہ باد۔
میرے ماہی گیر پائندہ باد

تحریر و تحقیق: مقبول احمد شیخ، مسقط، سلطنت عمان
سلطنتِ عمان، پاکستان کا دوست ملک ھے اور ھماری دو لاکھ سے زیادہ افرادی قوت سلطنت عمان کے مختلف شھروں میں روزگار کے سلسلے میں قیام پذیر ھے۔ سلطنت عمان کے زیادہ تر لوگ بھت نرم طبیعت، شیریں زبان اور ھمدرد ھیں یہاں سمندر کے قریب علاقوں میں بسنے والوں کا ذریعہ معاش زیادہ تر ماھی گیری ھے۔ گذشتہ ھفتے عمان کے ایک علاقے أشخره جو کہ عمان کے صوبہ الشرقیہ میں واقع ھے کے دو ماھی گیر علی بن سالم الجعفری اور سالم بن سعید الجعفری حسب معمول اپنی انجن والی کشتی میں ماھی گیری کی غرض سے سمندر میں روانہ ھوئے جب ان کی کشتی بیچ سمندر میں پہنچی تو کشتی کا انجن خراب ہوگیا اور ان کی کشتی لہروں کے ساتھ بہنے لگی وہ ساحل سے اس قدر دور نکل گئے تھے کہ موبائل فون کا نیٹ ورک بھی دستیاب نہیں تھا اب رات ھو چکی تھی اور کشتی کسی نامعلوم سمت میں بہتی جا رھی تھی ساری رات گذر گئی صبح دوپہر میں بدلی پھر شام پھر رات ہوگئی اس اثناء میں کوئی دوسرا جہاز یا کشتی ان کو سمندر میں ان کے قریب نظر نہیں آئی اسی طرح دن گزرتے گئے کھانے پینے کی اشیاء ختم ہو نے کو آگئیں مایوسیوں نے ڈیرے ڈال دیئے ایک ھفتہ گذر گیا ادھر ان کے گھر والوں نے پولیس کو مطلع کیا پولیس کی کشتیوں نے عمان کی سمندری حدود چھان مارا لیکن گم شدہ کشتی کا کوئی سراغ نہ مل سکا علی اور سالم کے گھر والے ان کی واپسی کی امید چھوڑ بیٹھے ان کو علی اور سالم کی موت کا یقین ھونے لوگ ان کے گھر والوں سے افسوس کرنے لگے 9 دن گذر گئے عجیب بات یہ ھے کہ مسقط سے کراچی کی سمندری حدود تقریباً 469 ناٹیکل میل ھے اور 9 دن اور راتوں میں کسی جہاز کی اس کشتی پر نظر نہیں پڑی دسویں دن کراچی میں واقع عمان کے سفارت خانے سے حکومت عمان کو اطلاع دی گئی کہ علی اور سالم بہ قید حیات اور سلامتی سے مل گئے ھیں تفصیل یوں ھے کہ کراچی کے سمندر میں پاکستانی ماھی گیر مچھلی کا شکار کر رھے تھے کہ انہیں ایک لاوارث کشتی نظر آئی جس میں سے دو اشخاص ھاتھ ہلا کر مدد کے لیے پکار تھے۔

پاکستانی ماھی گیر مدد کو لپکے اور انہیں باحفاظت اپنے ساتھ کنارے تک لے آئے اور مقامی میری ٹائم سیکیورٹی ایجنسی سے رابطہ کیا جنہوں نے اپنے افسران کے ذریعے علی اور سالم کو کراچی میں واقع عمان کے سفارت خانے کے حوالے کر دیا جیسے ھی یہ اطلاع حکومت عمان کو پہنچی وھاں خوشی کی لہر دوڑ گئی اور جشن شروع ہوگیا۔ علی اور سالم کے گھر والوں کی حالت دیدنی تھی اللہ کا شکر ادا کیا اور پاکستانیوں کا ڈنکا بجنے لگا پاکستان ژندہ باد کے نعرے گونجنے لگے اور پاکستانیوں کا سر فخر سے بلند ھوگیا۔
پھر وہ گھڑی بھی آگئی جب علی اور سالم کراچی سے رخصت ہوئے اور مسقط ائیر پورٹ پہنچ گئے جہاں ایک جم غفیر ان کا منتظر تھا اور سارا مسقط ائیرپورٹ پاکستان زندہ باد کے نعروں سے گونج رھا تھا۔ دوسرے دن علی اور سالم کے گھر والوں نے پاکستانی ماھی گیروں کے لئے جنہوں نے یہ کارنامہ انجام دیا تھا یہ اعلان کیا کہ وہ کشتی بمع انجن اور اس کے ساتھ 10 ھزار ڈالر کیش انعام کراچی کے ان ماھی گیروں کو دیا جائے گا جنہوں نے یہ بے مثال کارنامہ انجام دیا ھے۔ ٹوئیٹر ، فیس بک اور سوشل میڈیا پاکستانیوں کے ترانے گا رھے ھیں لیکن افسوس کی بات یہ ھے کی پاکستانی اخباروں، میڈیا یا سندہ حکومت نے اس سلسلے میں کوئی پیش رفت نہیں کی اور مکمل خاموشی اختیار کی ھوئی ھے یہ عمل قابل افسوس ھے۔ اس طرح کے مواقع جہاں پاکستان کا نام دیگر اقوام میں بلند ھو رھا ھو بالکل ضائع نہیں کرنے چاہئیں۔

راقم – شاندار بخاری
مقیم مسقط

سلطنت عُمان میں حال ہی میں تعینات ہونے والے پاکستانی سفیر عزت مآب جناب عمران علی چوہدری صاحب سے میری پہلی ملاقات 15 فروری 2022 بروز منگل وینڈیم گارڈن ہوٹل میں ہوئی جہاں میرے بھائیوں جیسے پیارے دوست عزیزم قمر ریاض نے سفیر صاحب کے مہمان اور پاکستان سے آئی ادبی شخصیت پروفیسر توفیق بٹ صاحب کے اعزاز میں ایک ادبی محفل کا اہتمام کیا تھا جس میں مجھے بھی بطور دست راست مدعو کیا گیا تھا ۔

دعوت نامہ پر پروگرام کا وقت 7 بجے کا لکھا تھا اور میرا دفتر چونکہ شہر سے باہر تقریبا 45 منٹ کی مسافت پر ہے اور 6 بجے چھٹی ہوتی ہے تو واجبات سے فارغ ہو کر جلدی جلدی تقریب میں شرکت کیلئیے روانہ ہو گیا کہ کہیں پہنچنے میں تاخیر نا ہو جائے لیکن شو مئی قسمت کے راستے میں ایک مقام پر کافی بھیڑ کا سامنا کرنا پڑا ابھی اس محاذ سے نمٹا ہی تھا کہ گاڑی کی تیل کی بتی روشن ہو گئی خیر اب اس مرحلہ کو بھی عبور کر کے جب میں ہال میں پہنچا تو پتا چلا کہ مہمانوں کو وقت پر اکٹھا کرنے کیلئیے یہ 7 بجے کا جال بچھایا گیا تھا ۔

عزیزم قمر ریاض جو کہ خود ایک مشہور ادبی اور سماجی شخصیت ہیں اور ان کو حال ہی مین گورنر پنجاب چوہدری سرور صاحب نے ‘ ایکسٹرا آرڈنری سیٹیزن ‘ کے ایوارد سے نوازا ہے انہوں نے پرتپاک استقبال کیا اور مجھے ایک نہیں بلکہ دو گلدستے پیش کئیے میں ابھی الفاظ تلاش کر ہی رہا تھا کہ اتنی محبت کیسے سمیٹوں قمر نے اپنائیت سے کہا یار جلدی آنا تھا یہ لو گلدستے اور جو مہمان آہیں انہیں پیش کرنا خیر یہ بھی محبت کا ایک انداز ہے ، وہاں موجود دوستوں سے ملاقات ہوئی اور مہمانوں کے آنے کا سلسلہ شروع ہو گیا اور ایک ایک کر کے مہمانوں کی آمد کا تانتا بندھ گیا ، کرونا کی وجہ سے کافی عرصہ کے بعد ایسی محفل کا انعقاد کیا گیا تھا اور کئی لوگوں سے کافی عرصہ کے بعد ملاقات ہوئی جس کی بہت خوشی بھی ہو رہی تھی مجھے کبھی مہمانوں کو ان کی نشستوں پر بٹھانے ہال کے اندر جانا پڑتا کبھی مہمانوں کو خوش آمدید کہنے باہر آنا پڑتا اور میں دل ہی دل میں اسی شش و پنج میں تھا کہ کہیں سفیر صاحب کی آمد نا ہو جائے اور مجھے جو گلدستہ انہیں پیش کرنے کی ذمہ داری دی گئی تھی وہ نہ رہ جائے اسی اثناء میں باہر آتے ہی لفٹ کا دروازہ کھلا اور اس میں سے ایک تروتازہ گلاب جیسا مسکراتا ہوا شخص باہر نکلا جس نے مجھے ملتے ہی ایسے مخاطب کیا جیسے برسوں کی بے تکلف آشنائی ہو اور ہاتھ ملاتے ہوئے میری لال بَو ٹائی کی تعریف کی اور ساتھ ہی میں گلدستے کیلئیے لپکا ہی تھا کہ انہوں نے کہا آپ سب کی یہاں موجودگی ہی اصل گلدستہ ہے اور ہال میں داخل ہو گئے ۔

تقریب کی صدارت قمر ریاض نے کی اور باقاعدہ کاروائی غلام مرتضی قادری صاحب کی پرسوز آواز میں کلام ربانی اور مدح رسول ﷺ سے کیا گیا اس کے بعد شعر و شاعری کے دور کا آغاز ہوا جس میں راقم کے والد سیّد زادہ سخاوت علی شاہ کے علاوہ پنجابی کے مشہور شاعر محمد علی فضل اور اردو میں عمران اسعد نے اپنے شعر پیش کی اور بے پناہ داد وصول کی ۔ اس کے بعد ہم نے مہمان اعزاز جناب توفیق بٹ صاحب کو سنا اور ان کے مدھم انداز میں گفتگو اور زندگی کے تجربات سے سبق آموز واقعات سنے جس کا اپنا ہی مزا تھا ۔

آخر میں مہمان خصوصی اور شمع محفل سفیر پاکستان عزت ماب جناب عمران علی چوہدری صاحب کو خطاب کیلئیے بلایا گیا اور ان کے منفرد انداز گفتگو جس میں انہوں نے تمام حاضرین محفل اور شرکاء یہاں تک کہ ہر شاعر کو اس کے مقبول شعر سنا کر مخاطب کیا جس سے تمام سامعین اور حاضرین محفل پر ایک سحر سا طاری ہو گیا اور ان کی حس مزاح کا تو جواب نہیں بظاہر سادہ لباس میں ملبوس عمران علی چوہدری صاحب کی شخصیت کی جازبیت ایسی ہی کہ ان سے بات کر کے یوں لگتا ہے جیسے وقت رک گیا ہو اور اس وقت کی قید سے نکل کر ان کے ساتھ کہکشاوں میں بسنے والے کسی اور عالم کی سیر کو نکل گہے ہوں لیکن اس مسحور کن گفتگو کیساتھ ساتھ جو انہوں نے عمان آتے ہی کمیونٹی کی سہولت کیلئیے تمام اہم شعبوں کے واٹسآپ نمبر کا اجراء کیا ہے اس سے دور دراز علاقوں میں بسنے والے ہم وطنوں کو سفری پریشانیوں سے نجات ملے گی اور اپنے گھر اور اپنے علاقے سے مطلوبہ معلومات حاصل کر سکیں گے ۔ اب بظاہر تو یہ ایک چھوٹا سا کام ہے آج کل کے اس ٹیکنالوجی کے دور میں واٹسآپ کا نمبر جاری کرنا کون سا جوئے شیر لانے کے مترادف ہے لیکن یہ چھوٹا کام یہ رابطہ کروانا یہ کنکٹ ایک اتنی بڑی سہولت ہے جس کا کوئ بدل نہیں یہاں مجھے اشفاق احمد مرحوم کے پروگرام زاویہ میں کہی ایک بات یاد آ گئی جس میں وہ بتاتے ہیں کہ میں اپنے پیر اپنے بابا کے پاس گیا اور ان سے کہا کے مجھے کوئی بات سکھائیں تو بابا جی نے فرمایا کہ سوئی میں دھاگہ ڈالنا سیکھو ۔ اب یہ بڑا مشکل کام ہے ۔ میں کبھی ایک آنکھ بند کرتا اور کبھی دوسری آنکھ کانی کرتا ، لیکن اس میں دھاگہ نہیں ڈلتا تھا ۔ خیر ! میں نےان سے کہا کہ اچھا جی دھاگہ ڈال لیا اس کا فائدہ ؟ کہنے لگے اس کا یہ فائدہ ہے کہ اب تم کسی کا پھٹا ہوا کپڑا کسی کی پھٹی ہوئی پگڑی سی سکتے ہو ۔ جب تک تمہیں لباس سینے کا فن نہیں آئے گا تم انسانوں کو کیسے سیئو گے ۔ تم تو ایسے ہی رہو گے ، جیسے لوگ تقریریں کرتے ہیں ۔ بندہ تو بندے کے ساتھ جڑے گا ہی نہیں ۔ یہ سوئی دھاگہ کا فن آنا چاہیے ۔ ہماری مائیں ، بہنیں ، بیبیاں جو لوگوں کو جوڑے رکھتی تھیں وہ یہ چھوٹے چھوٹے کاموں سے کرتیں تھیں تو بظاہر یہ چھوٹا سا کام بہت بڑا کام ہے اور کیوں نا ہو سفیر صاحب کا جیسا نام ویسے ان کے کام بھی ہیں کہتے ہیں نام کا شخصیت پر بہت گہرا اثر ہوتا ہے اور ان کے نام کی مطابقت سے قرآن مجید میں سورہ آل عمران کی ایک آیت ( نمبر 4) میں ایک عبارت ( هُدًى لِّلنَّاسِ ) کا مفہوم میرے ذہن سے گزرا جس کے معنی ہیں ‘ لوگوں کے لیے راہ نما ہیں ‘ اور سفیر پاکستان واقعی اس ترجمہ پر پورا اترتے ہیں عوام الناس کی فلاح اور ان کیلئیے آسانیاں ڈھونڈنا اور تقسیم کرنے کا فن وہ بخوبی جانتے ہیں یہاں انہوں نے کمیونٹی کو آپسی رنجشوں سے بالا تر ہو کر آپس میں مل کر ایک ہو کر کام کرنے کرنے کی تلقین کی جو کہ ایک خوش آہیند اقدام ہے اور ایک ہونے اور جڑے رہنے میں ہی بقاء ہے

‘موج ہے دریا میں بیرون دریا کچھ نہیں ‘

( 18 فروری 2022 بروز جمعہ )

گزشتہ روز ایک دوست کی والدہ اس جہاں فانی سے رحلت فر ما گئیں اللہ ان کے درجات بلند کرے اور گھر والوں کو صبر عطاء کرئے ، آمین ۔۔ اطلاع ملنے پر میں دفتر سے اجازت لیکر اسپتال پہنچ گیا اور اس وقت تک کوئی اور نہیں پہنچا تھا خیر میں نے ان کو تلاش کیا اور حسب توقع مرحومہ کے گھر والوں کو حواس باختہ پایا ڈاکٹر سے معاملات دریافت کئیے اور چند لوگوں کو کال کی ان سے کاغذی کاروائ کا طریقہ کار پوچھا الحمدلله انہوں نے بھر پور ساتھ دیا اور کچھ ہی گھنٹوں کی بھاگ دوڑ کے بعد ایمبیسی ، وزارت صحت ، پولیس سب سے اجازت نامے مل گئے اب اگلا مرحلہ تدفین کا تھا اور وہ بھی فورا ہی حل ہوگیا لیکن گورکن کے ایک سوال نے مجھے شدید حیرت میں ڈال دیا وہ یہ کہ بھائی جان قبر تیار ہو جائے گی غسل کا انتظام بھی ہے لیکن ” کیا آپ کے پاس اپنا کفن ہے ؟ ” یا ہم مہیا کریں۔ ۔ ۔ اس لمحے مجھے یہ خیال آیا کہ کچھ دن پہلے میں نے اپنی ایک دیرینہ خواہش کو پایہ تکمیل تک پہنچانے کیلئیے ورجن اٹلانٹک سے کلاسیکی انداز میں بنا گراموفون لیا تھا اور یہ سوچ رہا تھا کہ اب اس کے بعد میری خواہشات کی لسٹ میں لینے کو اور کیا بچا ہے مگر کچھ یاد نہیں آیا لیکن یہ تو کبھی سوچا ہی نہیں تھا کہ میں نے کبھی مانگ کر کپڑے نہیں پہنے مگر وقت رحلت اگر کفن مانگنا پڑے گا تو کون دے گا ۔۔ تو دوستوں بات مختصر ہے کہ دنیاوی معاملات کیساتھ ساتھ آخرت کے سفر کا بھی انتظام ہونا چاہیے ۔ ۔