Tag: عمان

وزیر تجارت جام کمال خان کا دورہ عمان

پاکستان عمان اقتصادی و تجارتی تعلقات کو مضبوط بنانے کی جانب اہم قدم

تحریر: محمد عثمان ہاشمی
شائع کردہ: شاندار بخاری

تاریخ: 14-03-2025

پاکستان اور عمان کے درمیان اقتصادی تعلقات کو مزید مستحکم کرنے کے لیے وفاقی وزیر برائے تجارت، حِکومت پاکستان، جناب جام کمال خان نے عمان کا اہم دورہ کیا۔ اس دورے کا مقصد دونوں ممالک کے درمیان تجارتی تعلقات میں اضافہ اور اقتصادی تعلقات کی مزید مضبوطی تھا۔ وفاقی وزیر تجارت کو مسقط انٹرنیشنل ایئرپورٹ پر پہنچتے ہی پاکستانی سفارتخانے کے اعلیٰ حکام جن میں سفیر پاکستان محترم سید نوید صفدر بخاری، نائب سفیر جناب بلال حسن اور کمرشل قونصلر جناب عشرت حسین بھٹی اور اس کے علاوہ عمانی حکام بشمول منسٹر کونسلر راشد الراشدی اور ریلیشنشپ اسپیشلسٹ عبداللہ الجابری نے استقبال کیا۔

دورے کے دوران وفاقی وزیر برائے تجارت نے عمان کے اہم حکومتی رہنماؤں، صنعتی رہنماؤں اور دیگر اہم شخصیات کے ساتھ ملاقاتیں کیں جنہوں نے دونوں ممالک کے مابین تجارتی، سرمایہ کاری اور اسٹریٹجک تعاون کو مزید فروغ دینے کے عزم کا اظہار کیا۔

وفاقی وزیر جناب جام کمال خان کی ملاقات عمان کے وزیر براے تجارت، صنعت و سرمایہ کاری،

 عزت مآب قیس الیوسف سے ہوئی۔ اس ملاقات میں دو طرفہ تجارت کو بڑھانے، سرمایہ کاری کو فروغ دینے اور پاکستان کی صنعتی مہارت کو عمان کے وژن 2040 اقتصادی حکمت عملی میں شامل کرنے پر تبادلہ خیال کیا گیا اور اس بات پر زور دیا کہ پاکستان عمان کے لیے ایک اہم تجارتی راستہ بن سکتا ہے، جو وسطی ایشیائی ریاستوں تک تجارت کی سہولت فراہم کرے گا۔

پاکستانی وفد نے گوادر اور کراچی کی بندرگاہوں کو خطے کی اہم تجارتی گزرگاہوں کے طور پر اجاگر کیا، جو عمان کو وسیع مارکیٹ تک رسائی فراہم کرتی ہیں۔ ٹیکسٹائل، ایس ایم ایز، زراعت اور مینوفیکچرنگ جیسے اہم شعبوں میں مشترکہ منصوبوں اور پائیدار تجارتی شراکت داریوں کی تجاویز پر تبادلہ خیال کیا گیا۔

وفاقی وزیر نے عمان کے سرمایہ کاری کے حوالے سے دوستانہ ماحول کو دیکھنے کے لیے "انویسٹ عمان لاؤنج” کا دورہ کیا، جام کمال خان نے انویسٹ عمان کی تعریف کی اور پاکستان کے ون ونڈو انویسٹمنٹ فیسیلیٹیشن ماڈل سے اس کی مماثلت کو نوٹ کیا۔ انہوں نے انویسٹ عمان، عمان انویسٹمنٹ اتھارٹی اور پاکستان کی خصوصی سرمایہ کاری سہولت کونسل کے درمیان گہرے تعاون کی وکالت کی۔

 وفاقی وزیر تجارت جام کمال خان اور عزت مآب محمد بن سلیمان الکندی،  گورنر،نارتھ الباطنة، کے درمیان ایک اہم ملاقات ہوئی جس میں تجارت اور سرمایہ کاری کے مواقع کو بڑھانے پر بات چیت ہوئی۔ انہیں ملاقاتوں کے تسلسل میں، وفاقی وزیر جام کمال خان نے صحار پورٹ اور فری زون کا صنعتی دورہ کیا، جہاں انہوں نے صحار فری زون کے سی- ای- او جناب محمد الشزاوی اور دیگر سینئر حکام سے بات چیت میں ایشیائی اور وسطی ایشیائی مارکیٹس کے ساتھ زیادہ رابطے کی سہولت فراہم کرتے ہوئے پاکستان کے راستے تجارتی راستوں کو مضبوط بنانے کے لیے صحار کی جدید لاجسٹک صلاحیتوں سے فائدہ اٹھانے پر زور دیا گیا۔

عمان چیمبر آف کامرس اینڈ انڈسٹری (OCCI) میں وفاقی وزیر براے تجارت نے چیئرمین شیخ فیصل عبداللہ الرواس سے ملاقات کی اور تجارتی تعلقات کو مظبوط کرنے کے مواقع پر بات چیت کی۔ ایک B2B نیٹ ورکنگ سیشن بھی منعقد کیا گیا جس میں پاکستانی کاروباری وفد کو عمانی سرمایہ کاروں سے متعارف کرایا گیا۔ OCCI کے حکام نے پاکستان کی عمان کو برآمدات بڑھانے کے عزم کا اعادہ کیا اور دونوں ممالک کے درمیان مشترکہ کاروباری کونسل کو فعال کرنے پر زور دیا۔

وفاقی وزیر جناب جام کمال  کی عمان کے وزیر برائے زراعت، ماہی گیری، اور آبی وسائل،  سعود بن حمود الحبسی المحترم  سے ملاقات بھی اہم رہی۔ اس ملاقات میں فوڈ سکیورٹی کے موضوع پر تبادلہ خیال کیا گیا، جہاں پاکستان کی زراعتی صلاحیت کو اجاگر کیا گیا اور دونوں ممالک کے درمیان زرعی تجارت اور سپلائی چین کی پائیداری پر بات کی گئی۔ عمان نے پاکستانی فوڈ پروسیسنگ کمپنیوں کو عمان میں اپنے آپریشنز کو بڑھانے کی دعوت دی، جس سے اس شعبے میں تجارتی مواقع کے بڑھنے کی امید ہے۔

پاکستانی سفارتخانے، عمان نے وفاقی وزیر براے تجارت کے اعزاز میں ایک افطار تقریب بھی منعقد کی، جس میں پاکستانی کمیونٹی کے رہنماؤں، تاجروں اور پیشہ ور افراد نے شرکت کی۔ وفاقی وزیر جام کمال خان نے پاکستان اور عمان کے درمیان دیرینہ تعلقات کو مزید مستحکم کرنے اور ثقافتی اور اقتصادی تعلقات کو فروغ دینے کی اہمیت پر زور دیا۔

وفاقی وزیر کا یہ دورہ پاکستان کے عمان میں اقتصادی تعاون کو مزید مستحکم کرنے کی علامت ہے۔ دونوں ممالک کے درمیان مشترکہ منصوبوں، تجارتی روابط اور سرمایہ کاری کے مواقع پر تعاون کی بدولت دونوں ممالک کے درمیان ایک مضبوط اور متحرک شراکت داری کے امکانات روشن ہیں۔

پاکستان اور عمان کے تعلقات میں مزید تعاون اور اقتصادی ترقی کی راہ ہموار ہو رہی ہے، اور اس کی بدولت دونوں ممالک کی ترقی اور خوشحالی کے لیے ایک نئے باب کا آغاز ہو رہا ہے۔ ہم  عمان میں پاکستان کے سفیر، عزت مآب سید نوید صفدر بخاری، کمرشل قونصلر جناب عشترت حسین بھٹی اور عمان میں پاکستانی سفارتخانے کی پوری ٹیم کو ان کی شاندار محنت اور تعلقات کو مزید مستحکم کرنے کی کوششوں پر بھرپور سراہتے ہیں۔

“خدمت خلق کا سفیر”

تحریر:سجاد احمد
شائع کرد: شاندار بخاری

تاریخ /19/12/2024

میری اٹھاراں سالہ زندگی جو عمان میں ہو گئی ہے بہت سے ایمبیسڈرز آئے اور گئے، بہت سوں کی فیئر ویل مجھے یاد پڑتی ہے اور سارے خیالات نقوش کی طرح میرے ذہن میں ابھر آتے ہیں جیسے جیسے میں ان کے آخری دنوں کو یاد کرتا ہوں۔ پاکستانی کمیونٹی جو کہ عمان میں مقیم ہے انہوں نے ہمیشہ دل کھول کے آنے والی شخصیات ہوں یا جانے والی سب کے لیے بے پناہ محبت بانٹی ہے۔ اور ہر فرد نے اپنے تئیں چاہے فیملی پروگرام ہو یا عام پروگرام ہو کے لیے دل کھولا ہے۔

عمران علی چوہدری صاحب سے پہلے جناب احسن وگن صاحب تھے اور ان سے پہلے جناب علی جاوید صاحب تھے۔ سب نے اس کمیونٹی کے لیے بہت کچھ کیا کچھ ہمیں یاد ہے اور کچھ بھلا دیا یہ ہماری اپنی غلطی ہے اور علی جاوید صاحب ہوں یا احسن وگن صاحب ہماری کمیونٹی کے بڑوں نے بہت دل کھول کر انکا ساتھ دیا اور انہوں نے بھی اسی طرح اس کمیونٹی کا ساتھ نبھایا۔ ان کے کارنامے اس لیے بیان نہیں کرسکتا کیونکہ میں خود اس وقت اتنا متحرک نہیں تھا لیکن کمیونٹی سے ان کے اچھے کاموں کا ذکر سنا ہے اور ان کی سلامتی کی دعائیں بھی۔ اب بات آتی ہے عمران علی چوہدری صاحب کی تو ان کے لیے میں پورے و ثوق سے بات کر سکتا ہوں۔ ان کے تین سال ایسے گزرے جیسے چند لمہات ہوں۔ اُن کے کارناموں کی ایک طویل لسٹ ہے۔ جن میں کمیونٹی اسکول 62000 ہزار عمانی ریال کے خسارے سے نکال کے 524000 پانچ لاکھ چوبیس ہزار عمانی ریالز کے پرافٹ میں بدلنا (یہ ڈیٹا اسکول کے آڈٹ رپورٹ سے لیا گیا ہے) نئے اسکول کے لیے معبیلہ میں آٹھ ایکڑ زمین لینا، ایمبیسی کا ٹائم بڑھانا، ٹوکن سسٹم کو زیادہ موئثر اور فعال بنانا، کھلی کچہریوں کا انتظام ، کمیونٹی کی مدد سے ماربل فلورینگ، ایمبیسی میں مسجد کا اہتمام، ہیومن ٹریفکنگ مافیا سے کمیونٹی کے بچوں اور بچیوں کی بازیابی، ڈیتھ کیسز میں مافیاز کے کنٹرول کا خاتما، صلالہ ، بریمی اور صحار کے بعد نزوی اور صور میں کلیکشن سنٹرز کا قیام، مشکل وقت میں پاکستانیوں کے لیے ہیلپ کرنا، پاکستان ھاوس اور ایمبیسی کی رسائی، وادی کبیر سانحے میں کمیونٹی کے ساتھ کھڑا ہونا، پاکستان عمان کے مابین بزنس کانفرنس کا انعقاد کروانا جو کہ ڈراؤنا خواب تھا وہ بھی پورا کر دیا۔ (ڈراؤنا خواب اس لیے کہ اس کے لیے فنڈز کہاں سے آئیں گے) اس کے علاوہ اَن گنت ایسے کام ہیں جو ہماری نظروں سے اوجھل ہیں۔ پوری کمیونٹی کی دعائیں آپ کے ساتھ ہیں۔ بات کہاں سے نکلی اور کہاں چلی گئی۔ خیر آپ کی رخصتی پہ بہت سی فیئر ویل تقریبات ہوئیں۔ صلالہ کمیونٹی ہو یا صحار کمیونٹی سب نے بڑھ چڑھ کے حصہ لیا۔ سوشل کلب عمان کے قائم مقام عہدیدران کے ساتھ اور بہت سے لوگوں نے آپ کے لیے تقریبات سجائیں، سید فیاض شاہ صاحب ہوں یا میاں ریاض صاحب یا چوہدری اسلم صاحب سب نے محبتیں بکھیریں۔
سب تقریبات ہی یاد گار رہیں لیکن جو تقریب زاہد شکور چوہدری نے پاکستان اسکول کے بڑے ہال میں عمران علی چوہدری کے لیے رکھی وہ ہمیشہ ہمارے دلوں میں زندہ رہے گی۔ اس تقریب میں زاہد چوہدری کے ساتھ ساتھ کمیونٹی کے بہت سے لوگوں نے دن رات کام کیا۔ ان کے نام لوں گا تو فہرست ختم نہیں ہو گی۔ ہر آنکھ نمدیدہ اور افسردہ تھی۔ ہال فیملز سے کچھا کچھ بھرا ہوا تھا لوگ ہال کے علاوہ بہت بڑی تعداد میں باہر بھی موجود تھے۔ تقریب تقریبا چار گھنٹے جاری لوگوں کے خیالات اور ان کے جذبات ایسے تھے کہ ختم ہونے کو نا آتے۔ وقت بھاگ رہا تھا انسان کی یادیں رہ جاتیں ہیں۔ پورا ہال افسردہ تھا۔ دعائیں دلوں سے نکل رہیں تھیں۔ پتہ نہیں ایسے انسان جو انسانیت کے لیے اپنے آپ کو وقف کردیں کیوں اتنی جلدی انکا سروس ٹائم ختم ہو جاتا ہے۔ علی عمران چوہدری کو بہت سی محبتوں ، دعاوں اور نمدیدہ آنکھوں سے رخصت کیا گیا۔ اللہ سے دعا ہے علی عمران چوہدری ہمیشہ خوش و آباد رہیں۔

طوفان ٹل جانے کے بعد

تحریر
شاندار بخاری – مقیم مسقط

طوفان جسے زبان عام میں تیز بارشوں، ہواؤں کا سلسلہ کہتے ہیں لغت میں اس کے درج ذیل معانی بھی ہیں؛ (شور و غوغا، باد و باراں کی زیادتی، آندھی، سیلاب، بہتان، تہمت، طغیانی، آفت، قہر، گھپ اندھیرا، مرگ عام وبا، ناگہانی موت، قتل، ظلم) غرض کے باد و باراں کے علاؤہ طوفان کو ان مصطلحات میں بھی استعمال کیا جاتا ہے۔ مثال کے طور پر فلاں صاحب نے تو طوفان برپا کر دیا، اس طرح یہ امر ربانی سے معرض وجود میں آیا قدرتی آفات کا مرکب انسانی حوالوں میں بھی ضرب الامثال کے طور استعمال ہوتا ہے۔طوفان یوں سمجھیے کہ ایک بے وطن ، سٹیٹ لیس ، بنجارہ بادشاہ ہے جو کہ ازل سے ابد تک سفر میں ہے اس کا کوئی مستقل ٹھکانہ نہیں خواہ وہ ہزاروں سال قبل طوفان نوح کےوقت کا واقع ہو، فرعون کے دریا میں غرق ہونے سے لیکر موجودہ ادوار کے گونُو، کترینہ وغیرہ بھی اسی کی نسل سے چلے آ رہے ہیں اور جب یہ صدیوں کا آوارہ مزاج اپنے قافلے سمیت آسمانوں کی سیر کرتے ہوئے زمین پر اترتا ہے تو اپنے محور میں جہاں وہ تخت نشیں ہوتا ہے ایسے ساتھیوں کو اتارتا ہے جو ہر سمت خوف و ہراس برپا کردیتے ہیں، یہ ساتھی وہ گمنام سپاہی ہیں جو توڑ پھوڑ، قتل و غارت اور لوٹ مار کا بازار سجاتے ہیں ان سپاہیوں کیوجہ سے جتنا خوف پھیلتا ہے طوفان بادشاہ اس کی خوشی میں پھولتا پھلتا ہے اور تقویت پاتا ہے۔کچھ دن زمیں کی سیر کر کے نظام قدرت میں مخل ہو کر افراتفری اور نقصان پہنچا کر اپنے مقصد میں کامیاب ہو کر طوفان بادشاہ اپنے قافلے اور قبیل کے ہمراہ کسی اور منزل کیطرف اڑان بھرتا ہے اور رخت سفر باندھ لیتا ہے۔ جسے عرف عام میں ہم یوں کہتے ہیں کہ طوفان تھم گیا ہے یا ٹل گیا ہے۔

طوفان تھم جانے کے بعد جب اگلے دن سورج کی پَو پھوٹنا شروع ہوتی ہے، گرد بیٹھنے لگتی یے، دھندلائے سے منظر نظر میں بیٹھنے لگتے ہیں، کھلے اور دور تک دکھتے صاف آسمان پر قوس قزح کے پار پرندے اڑتے دکھائی دیتے ہیں تو آسمان کے اس حَسِین منظر کے بر عکس زمیں پر دو طرح کے سینیریو پیش ہوتے ہیں؛

نمبر 1۔ امیر شہر یا صاحب ثروت کو اپنے دریچوں سے لہلہاتے درخت نکھرے ہوئے دالان اس میں رنگ برنگ پھول، چڑیوں کی چہچہاہٹ سنائی دیتی اور یہ دلفریب مناظر دکھائی دیتے ہیں۔

نمبر2۔ فقیر شہر کو اپنی جھوپڑی کی اُڑی ہوئی چھت، مویشیوں کی لاشیں، گدلے پانی کے بہتے نالے اور مال و اسبابِ زندگی لُٹ جانے، بہہ جانے پر بین کرتے نالے سنائی دیتے ہیں۔ جو متائے حیات تھی لُٹ جانے کا صدمہ انہیں بھی لقمہ اجل بنا دیتا ہے لوگ یہ صدمہ برداشت نہیں کر پاتے اور زہنی دباؤ برین سٹروک، فالج یا جان سے بھی گزر جاتے ہیں۔

چند روز قبل یہاں رونما ہونے والے مسجد میں دہشتگردی کے ناخوشگوار واقعے کو بھی سینیریو نمبر دو سے مماثلت کے بناء پر طوفان سے تشبیہ دے رہا ہوں اور یہ کیسا طوفان تھا جو جا کر بھی نہیں گیا اور اب آنے والے کئی دنوں، مہینوں اور سالوں تک اس کا اثر ہماری زندگیوں میں شامل رہے گا۔ جو ہمارے محبی اس اندوہناک واقعے میں شہادت کے رتبے پر فائز ہوئے وہ کبھی زندگی سے بھرپور ہوا کرتے تھے، ان کے بھی سپنے تھے، وعدے تھے جو پورا کرنے تھے، خواہشیں تھیں جو کے دل میں لئیے وہ محنت کرتے تھے ان کے پیاروں کے دلاسے تھے جو انہیں تقویت بخشتے تھے، ان کے والدین، بیوی بچے، بہن بھائی اور دوستوں کی راہ تکتی اکھیاں اب پتھرا جائیں گی لیکن وہ اب کبھی نہیں مل پائیں گے، وہ اپنے پیاروں کو عید پر گلے نہیں لگا پائیں گے، ان کا ہاتھ تھام نہیں سکیں گے، گھر والے ان سے فون پر آخری بات کو یاد کریں گے وہ گلے شکوے انہیں یاد آئیں گے لیکن جانے والے واپس نہیں آئیں گے۔ سب سے بڑھ کو جو دُکھ ہے وہ یہ کہ یہ سب شہید محنت کش افراد تھے اپنے گھر کے واحد کفیل تھے لیکن اب وہ سلسلہ روزگار بھی ان کیساتھ راہیِ مُلکِ عَدَم ہوا۔جو زخمی ہوئے کچھ ان میں سے اب بھی ہسپتالوں میں زیر علاج ہیں اور جو گھر آگئے ہیں ڈسچارج ہو کر وہ کم سے کم تین ماہ کیلئے بستر پر ہیں یعنی ان کو معاون کی ضرورت ہے دیکھ بھال کیلئے پٹیوں کی تبدیلی، بروقت دوا دینا، ان کی صفائی ستھرائی نیز کے واشروم تک خود نہیں جاسکتے تو ایک بیمار کیساتھ ایک معاون پابند ہے اگر تیس زخمی ہیں تو معاون ملا کر ساٹھ لوگ اس صورتحال سے متاثر ہیں اور سب سے بڑھ کر اب جبکہ یہ مریض تین سے چار ماہ کیلئے بستر پر ہیں تو کام پر بھی نہیں جا سکتے سلسلہ روزگار بھی ان کا منقطع ہے تو اداروں سے اپیل ہے کہ علاج کیساتھ کچھ بیسک سٹائیپنڈ / سیلری / ماہانہ خرچ انہیں دیا جائے جس سے ان کے پیچھے گھروں میں بیٹھے والدین یا بیوی بچے اپنا گزر بسر کر سکیں کیونکہ یہ سب محنت کش طبقے سے ہیں تو روزانہ کی بنیادوں پر ان کی زندگیوں کا سٹرکچر کچھ ایسی گاڑی جیسا ہے کہ جس میں پیچھے والے پہیے روزگار کے زور پر گھومتے ہیں تو جب ان کے کام کا پہیہ گھومتا ہے تو آگے والے جو زندگی کا پہیے ہیں وہ تب ہی گھومتے ہیں اور اس گاڑی کو آگے بڑھاتے ہیں۔

طوفان بادشاہ تو کب کا جا چکا لیکن اس طوفان کی نسل سے چھوٹے چھوٹے طوفان اب بھی باقی ہیں جو کہ وفات پانے والے اور بچ جانے والے لیکن زخمیوں اور ان کے عون و مددگاروں کی زندگیوں میں مسلسل ہلچل مچائے ہوئے ہیں جس سے ہم سب کو ملکر انہیں نکالنا ہے ان چھوٹے عفریتوں کا مقابلہ کرنا ہے ہمت کیساتھ، یک جہتی کیساتھ، رب العالمین اور اس کے محبوب صلی اللّٰہ علیہ و آلہ وسلم سے دعا کا استغاثہ کے ذریعے سے۔ یہاں دیار غیر میں مقیم ہم سب مختلف بیک گراؤنڈ کے باوجود ایک خاندان ہیں ہمارے دکھ اور سکھ سانجھے ہیں اپنا بازو ٹوٹتا ہے تو اپنے ہی گلے میں آتا ہے آج ان کی آنکھیں ہماری راہ تکتی ہیں تو کل ہمیں بھی کسی کا انتظار ہوگا۔ صلح رحمی کے احکامات کو مد نظر رکھتے ہوئے اور سب سے بڑھ کر انسانیت کیلئے آہیں ہم سب ملکر کر ایک ہو کر جانے والوں اور بچ جانے والوں کے حامی و ناصر بنیں۔ اس زمن میں ہمارے سفارت خانے اور بالخصوص سفیر پاکستان عزت مآب سفیر پاکستان اور یہاں سلطنت عمان کے مقامی قانون نافذ کرنے والوں اداروں نے ہر ممکنہ سہولت فراہم کی جس پر ہم ان کے شکر گزار ہیں لیکن وہ شکریہ کے جواب میں کہتے ہیں یہ ہم پر واجب ہے یہ کہنا کتنا خوبصورت احساس ہے اور عزت افزا ہے۔

تحریر کے آخر میں شہداء اور اس روز وہاں موجود افراد ، غائبانہ طور پر موجود (جو فون پر رابطے میں رہے) اور بالخصوص مسجد کی انتظامیہ و والنٹیئرز کی ٹیم کو خراجِ تحسین پیش کرتا ہوں، زخمی جو کہ اب غازی ہیں ان کے نام بوجوہ درج نہیں کر رہا کیونکہ ہم دیار غیر میں رہتے ہیں اور فی الحال بیشتر کے گھر والوں کو اس سانحہ میں ان کے زخمی ہو نے کا علم نہیں ورنہ وہ غم سے نڈھال اور پریشان ہوں گے اس لئیے آپ سب سے بھی گزارش ہے کے زخمیوں کی حوصلہ افزائی کیلئے آگے آہیں اور یہ بات اپنے تئیں رکھیں تصویر بنائیں تو شئیر نا کریں کیونکہ تصویریں آگے پہنچ جاتی ہیں اور پریشانی کا باعث بنتی ہیں۔

راہِ حق کے شہدائے 15 جولائی کے نام مندرجہ ذیل ہیں
رائل عُمان پولیس ڈپارٹمنٹ کے رقیب – یوسف الندابي (سلطنت عُمان)
باشا جان علي حُسین (ہندوستان)
حسن عباس (پاکستان)
غلام عباس (پاکستان)
سیّد قیصر عباس (پاکستان)
سلمان نواز (پاکستان)

_{Title Image by Myriams-Fotos from Pixabay}