Tag: جنگ

پاک بھارت فضائی جنگ میں حکمت عملی کا کردار

جو شہر اور قصبے جنگی ہوائی اڈوں کے قریب واقع ہوں وہ زیادہ جانی اور مالی نقصان کے خطرے کی زد میں ہوتے ہیں۔ جن لوگوں نے 1971ء کی آخری بڑی جنگ کو آنکھوں سے دیکھا ہے وہ جانتے ہیں کہ کس طرح دن کی روشنی اور رات کی تاریکی میں ہندوستانی جنگی جہاز ان اڈوں کو نشانہ بنانے کی کوشش کرتے تھے۔ اس پرانی جنگی حکمت عملی کا مطالعہ کریں تو پتہ چلے گا کہ انڈین حملہ آور جہازوں کی پروازیں بہت نیچی ہوتی تھیں۔ اس کی بنیادی وجہ یہ ہے کہ نیچی پروازوں میں جنگی جہازوں کو نظر نہ آنے کی وجہ سے ڈیفیس سسٹم اور ریڈار وغیرہ کے زریعے جانچنا اور ڈیٹیکٹ کرنا کافی مشکل ہوتا ہے۔

اس کے باوجود پاکستانی ایئر فورس نے کمال مہارت کے ساتھ فرانس سے حاصل کیئے گئے جدید ترین بھارتی جنگی جہازوں "رافیل” کو مار گرایا۔ بھارت کے اس نقصان کی تصدیق خود رافیل جنگی جہاز بنانے والی فرانسیسی کمپنی "ڈسالٹ ایوی ایشن” (Dassault Aviation) نے کی ہے جس کے شیئرز میں نمایاں کمی واقع ہو گئی ہے۔

پاکستان کی جانب سے حالیہ دفاعی کارروائی میں بھارتی فضائیہ کے 3رافیل طیاروں سمیت مجموعی طور پر 5جنگی طیارے تباہ کئے جانے کی اطلاعات ہیں۔ بین الاقوامی خبر رساں ایجنسیوں کے مطابق، یورپی اسٹاک مارکیٹ میں ڈسالٹ کمپنی کے شیئرز منفی رجحان کا شکار ہو گئے ہیں، جسے تجزیہ کار بھارتی فضائیہ کی رافیل طیاروں میں ناکامی سے جوڑ رہے ہیں۔
رافیل طیارے جدید ترین ٹیکنالوجی کے حامل جنگی طیارے تصور کئے جاتے ہیں، جو بھارتی فضائیہ کے زیرِ استعمال ہیں۔ تاہم پاکستان کی جانب سے ان طیاروں کو مؤثر فضائی دفاعی نظام کے تحت نشانہ بنانا اس بات کی علامت ہے کہ خطے میں اسلحہ کی دوڑ میں صرف مہنگی ٹیکنالوجی فتح کی ضمانت نہیں ہے بلکہ پائلٹس کی بہادری اور مہارت بنیادی حیثیت رکھتی ہے۔ ذرائع کے مطابق پاکستان نے حالیہ دفاعی کارروائی میں انتہائی مہارت کے ساتھ دشمن کے 5 طیارے مار گرائے، جن میں 3 رافیل شامل ہیں۔ اس واقعہ کے بعد انٹرنیشنل میڈیا سمیت بھارت کی دفاعی پالیسی پر بھی سوالات اٹھنا شروع ہو گئے ہیں، جبکہ بھارت میں سوشل میڈیا اور بعض عسکری تجزیہ نگاروں نے بھی اس ناکامی پر بھارت کو تنقید کا نشانہ بناتے ہوئے آڑے ہاتھوں لیا ہے۔

چہ جائیکہ کے اب تک پاکستان کو اس فضائی جنگ میں بھاری برتری حاصل ہے اور پاکستان 7مئی کے بھارتی حملوں کا منہ توڑ جواب بھی دے چکا ہے جس میں انڈین فوجی چوکیوں اور اسلحہ کے ٹھکانوں کو تباہ کیا گیا اور ابھی تھوڑی دیر پہلے پاکستان نے مقبوضہ کشمیر میں بھی بھارتی فوجی چوکیوں پر شدید حملہ کیا ہے لیکن حیرت کا مقام ہے کہ پاکستان کی سٹریٹیجک وار پالیسی کے بارے میں کچھ حلقے سوالات اٹھا رہے ہیں کہ جب پاکستان کے بہاولپور، لاہور، کراچی، گوجرانوالہ اور راولپنڈی سمیت کم و بیش 7 شہروں پر بھارت نے میزائل حملے کیئے تو پاکستان کا ایئرڈیفینس ڈیٹیکٹو سسٹم کہاں اور کیوں سویا ہوا تھا اور ان میزائلوں کو ہوا ہی میں کیوں تباہ نہیں کیا گیا کہ پاکستان کو ان حملوں کی وجہ سے 25 شہادتوں کا نظرانہ پیش کرنا پڑا؟

اطلاعات کے مطابق بھارت نے پاکستان سول آبادی پر جو میزائل داغے یا ڈرونز بھیجے وہ اسرائیلی ساخت کے تھے جن کے بارے اطلاعات ہیں کہ وہ "ہاروپ” (Harop) ڈرونز ہیں جو جدید ترین لوئٹرنگ مونیشنز (Loitering Munitions) میں شمار ہوتے ہیں، جن کا بنیادی مقصد دور دراز کے علاقوں میں نگرانی کرنا اور انتہائی درستگی کے ساتھ ہدف کو نشانہ بنانا ہے۔ ہاروپ ڈرونز کو خاص طور پر خطرناک بنانے والی بات یہ ہے کہ ان کا کنٹرول ہیڈکوارٹر، جو بھارت میں واقع ہے، سے مسلسل بروقت ڈیٹا لنک قائم رہتا ہے۔ جیسے ہی یہ ڈرون کسی فوجی یا حساس تنصیب کا سراغ لگاتے ہیں، یہ چند سیکنڈز میں ہائی ڈیفینیشن انٹیلی جنس، مقام، ساخت (Configuration)، اور نقل و حرکت کی معلومات کمانڈ سینٹر کو منتقل کر دیتے ہیں۔ ایسے ڈرونز کی اطلاعات پر اپنے دفاعی نظام کو متحرک (Activate) کرنا خود پاکستان کے دفاعی نظام پر مزید خطرناک حملوں کا باعث بن سکتا تھا جس وجہ سے پاکستان نے انہیں براہ راست فضا سے فضا میں گرانے کی بجائے انہیں اپنی "اسمارٹ دفاعی حکمتِ عملی”
کا استعمال کر کے تباہ کیا۔

اس خاموش جنگی حکمت عملی اور اپنے پانچ لڑاکا طیاروں کے نقصان اور حالیہ فضائی جھڑپ میں شرمناک شکست کے بعد، بھارت اب پاکستانی فضائی حدود میں نہ تو جلد لڑاکا طیارے بھیجنے کا رسک لینے کے قابل رہا ہے اور نہ ہی کسی قسم کی جارحیت کے لئے ان کا استعمال کرنے کی جلد بازی کر سکتا ہے۔ اس شرمناک صورتِ حال کے پیشِ نظر بھارت نے بعد میں جدید ٹیکنالوجی سے لیس نگرانی کرنے والے ڈرونز کا سہارا لینا شروع کر دیا۔ گزشتہ بھارتی حملے میں جو لاہور کے قریب والٹن کے علاقے میں کچھ ڈرونز فائر کئے گئے، انہیں پاکستان کے فضائی دفاعی نظام نے فوراً ہی شناخت کر لیا تھا۔

چونکہ یہ محض فضائی نگرانی کرنے والے آلات نہیں بلکہ ایک مکمل ذہین جنگی ہتھیار ہیں، جن کا مقصد دشمن کے دفاعی نظام کی مکمل خاکہ سازی (Mapping) کرنا ہوتا ہے۔ یہ ڈرون دشمن کی دفاعی ساخت کو سمجھنے، کمزوریاں تلاش کرنے، اور بعد ازاں حملے کی منصوبہ بندی میں انتہائی مؤثر کردار ادا کرتے ہیں جس وجہ سے پاکستان کی مسلح افواج نے ان ڈرونز کو طویل فاصلے تک مار کرنے والے میزائلوں یا براہِ راست فضائی حملوں سے فوری طور پر تباہ نہیں کیا تھا۔ اگر ان ڈرونز کو فوراً مار گرایا جائے، تو تباہ ہونے سے پہلے یہ بھارت کو اہم مقامات کے کوآرڈینیٹس اور الیکٹرانک سگنلز بھیج سکتے ہیں۔

یہ چند لمحے ہی دشمن کے تجزیہ کاروں کے لئے کافی ہوتے ہیں کہ وہ پاکستان کے ریڈار سسٹمز، زمینی کمانڈ اینڈ کنٹرول مراکز، اور فضائی دفاعی ڈھانچے سے متعلق کارآمد انٹیلی جنس حاصل کر لیں۔ اسی لئے پاکستانی افواج نے ان ڈرونز کے خلاف نہایت حکمت عملی سے کام لیا، تاکہ دشمن کو کم سے کم معلومات حاصل ہو سکیں اور قومی سلامتی کو لاحق خطرات کا بروقت تدارک کیا جا سکے۔

اس خطرے سے نمٹنے کے لیئے پاکستان نے ایک ہوشمند دفاعی حکمتِ عملی اپنائی ہے۔ پاکستان نے طویل فاصلے سے نشانہ بنانے کی بجائے، "سافٹ کل” (Soft Kill) نظام استعمال کیا، جن میں جیمنگ ٹیکنالوجی شامل ہے جو فضاء میں ہی ڈرونز کے نیویگیشن اور کمیونیکیشن سسٹمز کو ناکارہ بنا دیتی ہے۔
اس کے علاوہ، ان ڈرونز کو دانستہ طور پر قریبی حدود میں داخل ہونے دیا جاتا ہے تاکہ انہیں اینٹی ایئرکرافٹ گنز یا قریبی فاصلے کے دفاعی میزائلوں سے انتہائی درستگی کے ساتھ مار گرایا جا سکے۔ یہ اسٹریٹجک تاخیر اس بات کو یقینی بناتی ہے کہ دشمن کو کوئی اہم معلومات منتقل نہ ہوں اور ڈرونز کو بھی مکمل طور پر غیر مؤثر بنا کر تباہ کیا جا سکے۔

یہ حکمتِ عملی نہ صرف تکنیکی برتری کو ظاہر کرتی ہے بلکہ دشمن کی جدید جنگی ٹیکنالوجی کے خلاف ایک مؤثر اور محفوظ دفاع بھی فراہم کرتی ہے۔ سادہ الفاظ میں بات کی جائے تو جیسے ہی یہ ڈرونز پاکستانی سرحد کے قریب آتے ہیں، انہیں پاکستانی ریڈارز فوراً شناخت کر لیتے ہیں، مگر فوری ردِعمل دینے کے بجائے، مسلح افواج انہیں سخت نگرانی کے تحت قریب آنے دیتی ہیں اور جیسے ہی یہ ایک خاص، قابو میں رکھے گئے فاصلے تک پہنچتے ہیں، انہیں اس مہارت سے نشانہ بنایا جاتا ہے کہ وہ کسی بھی حساس دفاعی معلومات کو دشمن تک منتقل نہ کر سکیں۔

یہ جذبات کی بجائے ذہانت سے کام لینے کی ایک بہترین مثال ہے جس کا مقصد نہ صرف دشمن کی فضائی دراندازی کو انتہائی درستگی سے ناکام بنانا ہے بلکہ پاکستان کے دفاعی نظام کی ترتیب اور پوزیشن کو بھی مکمل طور پر پوشیدہ رکھنا ہے۔

پاکستان کی جانب سے فرانسیسی ساختہ رافیل اور اسرائیلی ہاروپ ڈرونز کے مار گرائے جانے کے دنیا میں یہ پہلے واقعات رپورٹ ہوئے ہیں.
یوں حالیہ فضائی جنگ میں انڈیا کی طرف سے روس، فرانس، اور اسرائیل کے بلند بانگ قسم کے وار ہارڈویئر کو ذلیل کروانے اور پاکستان کی طرف سے ان ٹیکنالوجیز کو خاک میں ملانے کے "ورلڈ ریکارڈ” قائم ہوئے ہیں جس کے بارے بی بی سی ویریفائی نے مختلف ماہرین، نمائندگان سے بات کرنے کے بعد طیاروں کی تباہی کے حوالے سے اپنی رپورٹ بھی جاری کی ہے۔ بی بی سی نے اگرچہ احتیاط سے کام لیا، مگر بین السطور بہت واضح ہے کہ پاکستانی دعوے درست اور وزنی ہیں جبکہ بھارتی الزام اور دعوے ماضی میں بھی غلط ثابت ہوئے اور اب بھی جھوٹ کا پلندہ ہیں جیسا کہ جب ابھینندن کا طیارہ تباہ ہوا تھا تو تب بھارت نے دعویٰ کیا تھا کہ اس نے پاکستان کا ایک ایف سولہ طیارہ تباہ کر دیا ہے۔

بی بی سی نے امریکی سورس کو کوٹ کر کے کہا کہ امریکیوں نے پاکستانی ایف سولہ طیاروں کی گنتی کی اور وہ پورے پائے گئے۔ جس طرح ماضی میں بھارت کا ایف سولہ طیارے کی تباہی کا دعویٰ غلط تھا، اسی طرح گزشتہ روز والا بھارتی دعویٰ بھی دروغ گوئی پر مبنی ہے، اس لئے کہ پاکستانی ایف سولہ طیارہ حملہ آور ہوا ہی نہیں تو وہ تباہ کیسے ہو جائے گا؟

Title Image by Defence-Imagery from Pixabay

مودی کا جنگی جنون اور پاکستان میں بزدلانہ دراندازی

ایسا لگتا ہے کہ بھارتی پردھان منتری نریندر مودی اوقات میں رہ کر عالمی برادری میں اپنی عزت بحال نہیں رکھنا چاہتے ہیں۔ 6سمتبر 1965ء کی طرح اعلان جنگ کیئے بغیر گزشتہ روز بھارت نے ایک بار پھر پاکستان پر فضائی حملہ کیا، ہوا میں زبردست ڈاگ فائٹ ہوئی جس کے بعد بہاولپور کے نزدیک پاکستان کے جے10سی فائٹر جیٹ نے بھارتی رافیل طیارہ مار گرایا۔ مودی گجرات کے وزیراعلٰی تھے تو دنیا نے انہیں گجرات میں مسلمانوں کا قتل عام کرتے دیکھا۔ اب وہ وزیراعظم ہیں تو بھارت اور گجرات سے باہر ان کی نظر پاکستانی مسلمانوں پر ہے مگر پاکستان انہیں اپنے ہاتھ خون سے رنگنے کا موقع نہیں دے رہا ہے۔ ایسا لگتا ہے تقدیر کو انہیں رسوا کرنا منظور ہے کہ وہ اپنی عادت سے مجبور ہو کر بار بار سرحدی دراندازی کرنے کی کوشش کر رہے ہیں۔

تازہ ترین اطلاعات کے مطابق بھارت نے آزاد کشمیر میں بھی دراندازی کی، جہاں ایک بھارتی ہیلی کاپٹر کو پاکستانی ائیرفورس نے تباہ کر دیا۔ بھارت کی جلد بازی میں کی گئی ان دہشت گردانہ حرکات سے یہ امکان پیدا ہو گیا ہے کہ بھارت کسی وقت بھی زمینی جنگ شروع کرنے کی غلطی کر سکتا یے۔ پاکستان کے وزیر دفاع خواجہ آصف نے 24گھنٹے قبل آگاہ کیا تھا کہ بھارت سے تصادم کسی بھی وقت ہو سکتا ہے۔ انہوں نے خبردار کیا تھا کہ بھارت نے پانی روکنے کے لئے تعمیرات کیں تو تباہ کر دیں گے۔
نریندر مودی کا جنگی جنون کسی سے ڈھکا چھپا نہیں، وہ جارحیت کے جس خمار میں مبتلا ہیں اس سے پاکستان بے خبر نہیں ہے جس کے پیش نظر پاکستان نے گزشتہ روز ایک ایٹمی میزائل کا کامیاب تجربہ کیا۔ اس پر امریکہ نے بھی پاکستان اور بھارت کے درمیان اشتعال انگیز صورتحال کو انتہائی سنجیدہ اور پیچیدہ قرار دیا۔ امریکی رکن کانگریس مین کیتھ سیلف نے بھی گزشتہ روز کہا کہا کہ ایٹمی طاقتوں پاکستان اور بھارت کے درمیان جنگ ناقابل تصور ہے، کوئی بھی جنگ ایک بار شروع ہو جائے تو آپ اسے کنٹرول نہیں کر سکتے۔ امریکی ری پبلکن اراکین کانگریس جیک برگمین اور کیتھ سیلف کے اعزاز میں نیویارک کے ہوٹل میں تقریب کا اہتمام کیا گیا تھا جس میں پاکستانی کمیونٹی کی نامور شخصیات نے شرکت کی تھی، شرکا نے پہلگام واقعہ سے پیدا کشیدگی اور بھارت کے جنگی جنون کی جانب اراکین کانگریس کی توجہ دلائی تو اراکین کانگریس نے اعتراف کیا کہ قیام پاکستان سے اب تک پاکستان کے خلاف بھارت کئی "فالس فلیگ آپریشنز” میں ملوث رہا ہے۔ انہوں نے تصدیق کی کہ اس بار بھی پہلگام واقعہ کے 10منٹ کے اندر ہی ایف آئی آر درج کر لی گئی جب کہ جس جگہ فائرنگ کی گئی تھی وہاں سے پولیس اسٹیشن کا ایک گھنٹے کا فاصلہ تھا۔ یہی نہیں الزام بھی پاکستان پر عائد کر دیا گیا مگر ثبوت نہیں دیئے گئے۔

وزیراعظم نریندر مودی ممکن ہے یہ بات بھول گئے ہیں کہ ماضی میں بھی ایسی بھارتی جارحیتیں بے نتیجہ ثابت ہوتی رہی ہیں جس کی آخری مثال ابھی نیندن ہیں جب 27 فروری 2019ء کو پاکستان ایئرفورس نے پاکستانی حدود میں داخل ہونے کی کوشش پر 2 بھارتی طیارے مار گرائے تھے اور ابھی نندن نے اپنی گرفتاری کے 2سال بعد اپنے ایک بیان میں تسلیم کیا تھا کہ پاکستانی آرمی ایک پروفیشنل فوج ہے، میں پاک فوج کی بہادری سے بہت متاثر ہوا ہوں، لڑائی تب ہوتی ہے جب امن نہیں ہوتا، میں یہ چاہتا ہوں ہمارے دیس میں امن رہے اور ہم سکوں سے رہ سکیں۔ انہوں نے کشمیریوں کے بارے کہا تھا کہ، "نہ آپ کو پتہ ہے اور نہ مجھے معلوم ہے کہ وہاں کیا ہو رہا یے۔”

پاکستان اور بھارت کے درمیان ہونے والی جنگوں کی تاریخ بتاتی ہے کہ ان دونوں ممالک کے درمیان اب تک جتنی بڑی جنگیں اور محدود جھڑپیں ہوئی ہیں، ان کا بنیادی مرکز و محور عموماً ریاست جموں و کشمیر رہا ہے۔ 1947 میں برصغیر کی تقسیم کے فوراً بعد ہی بھارت اور پاکستان کے درمیان پہلی جنگ چھڑ گئی، جسے 1947-48 کی جنگ کہا جاتا ہے۔ یہ جنگ جموں و کشمیر کے الحاق کے مسئلے پر ہوئی، جہاں مہاراجہ ہری سنگھ نے بھارت سے الحاق کا اعلان کیا، جس کے جواب میں پاکستان نے قبائلی لشکروں کی مدد سے کشمیر پر حملہ کیا تھا۔ بھارت نے فوری طور پر اپنی فوجیں کشمیر بھیج کر حملہ روکا اور ریاست کے بڑے حصے پر کنٹرول حاصل کیا۔ یہ جنگ بالآخر اقوام متحدہ کی مداخلت پر رکی، اور ایک لائن آف کنٹرول قائم کی گئی جس کے نتیجے میں کشمیر دو حصوں میں تقسیم ہو گیا۔ ایک حصہ بھارت کے پاس ہے جو جموں و کشمیر ہے اور دوسرا پاکستان کے پاس ہے جو آزاد کشمیر ہے۔

دوسری جنگ 1965 میں ہوئی جو کہ کشمیر کے تنازعہ پر ہی دوبارہ بھڑکی جب پاکستان نے "آپریشن جبرالٹر” کا آغاز کیا جس کے تحت کشمیر میں پاکستان نے بغاوت ابھارنے کی کوشش کی، جس کے جواب میں بھارت نے بھرپور فوجی ردعمل دیا۔ دونوں ممالک کے درمیان مغربی سرحد پر شدید لڑائی ہوئی، خاص طور پر لاہور، سیالکوٹ اور راجستھان کے محاذوں پر۔ اس جنگ میں دونوں ممالک نے دعویٰ کیا کہ وہ کامیاب رہے، لیکن دونوں طرف سے کسی واضح فتح کا اعلان نہ ہو سکا۔ اس جنگ کا اختتام سویت یونین کی ثالثی سے ہونے والے "تاشقند معاہدے” پر ہوا، جس میں دونوں ملکوں نے جنگ سے پہلے کی حدود پر واپس جانے پر رضامندی ظاہر کی۔
1971ء کی جنگ پاکستان اور بھارت کے درمیان ہونے والی سب سے فیصلہ کن اور بڑی جنگ تھی۔ اس جنگ کا آغاز مشرقی پاکستان (موجودہ بنگلہ دیش) میں سیاسی بحران، عوامی لیگ کی اکثریت کے باوجود اقتدار نہ ملنے، اور پاکستانی فوج کے سخت گیر آپریشن سے ہوا۔ لاکھوں مہاجرین بھارت میں داخل ہوئے جس کے بعد بھارت نے سیاسی مفادات کی بنیاد پر مشرقی پاکستان میں فوجی مداخلت کی۔ دسمبر 1971ء میں شروع ہونے والی اس جنگ میں بھارتی افواج نے محض 13 دن میں فیصلہ کن برتری حاصل کر کے ڈھاکہ پر قبضہ کر لیا، اور پاکستانی فوج کے 90 ہزار سے زائد فوجیوں نے مصلحتا ہتھیار ڈال دیئے۔ اس کے نتیجے میں نیا ملک بنگلہ دیش معرضِ وجود میں آیا۔ یہ جنگ اگرچہ بھارت کی ایک بڑی سیاسی، فوجی اور سفارتی کامیابی کے طور پر یاد کی جاتی ہے، اور اس میں پاکستان کو شکست ہوئی۔ لیکن اسی جنگ کے مابعد نتائج کی وجہ سے 1999ء میں ایک اور بڑی فوجی جھڑپ کارگل کی پہاڑیوں میں ہوئی، جسے کارگل جنگ کہا جاتا ہے۔ اس میں پاکستانی فوج اور جنگجوؤں نے لائن آف کنٹرول عبور کر کے بھارتی علاقے میں گھس کر اہم پوسٹوں پر قبضہ کر لیا تھا۔ اس دوران شدید جھڑپیں ہوئی تھیں، لیکن عالمی دباؤ اور خاص طور پر امریکہ کی جانب سے مداخلت کی بناء پر پاکستان کو اپنی فوجیں پیچھے ہٹانی پڑی تھیں۔

ان جنگوں کے علاوہ سیاچن گلیشیئر پر بھی 1984ء سے کشیدگی جاری ہے۔ بھارت نے آپریشن میگھدوت کے تحت سیاچن پر قبضہ کیا۔ 2019ء میں ایک اور محدود مگر اہم واقعہ اس وقت پیش آیا جب پلوامہ حملے کے بعد بھارت نے پاکستان کے علاقے بالاکوٹ میں فضائی حملہ کیا، جس میں بھارت نے دہشت گرد کیمپوں کو نشانہ بنانے کا دعویٰ کیا۔ پاکستان نے جوابی کارروائی کرتے ہوئے بھارتی طیارہ مار گرایا اور پائلٹ ابھی نندن کو گرفتار کر لیا، جسے بعد میں امن کی علامت کے طور پر رہا کر دیا گیا۔ اس واقعے میں دونوں ممالک نے اپنی کامیابی کے دعوے کئے، لیکن بین الاقوامی سطح پر کوئی فیصلہ کن فاتح سامنے نہیں آیا۔

اگر پاک بھارت جنگوں کی یہ تاریخ بتاتی ہے کہ ان میں کوئی بھی ملک ایک دوسرے پر یکسر اور مکمل برتری ثابت نہیں کر سکا تو اب جبکہ دونوں ممالک "ایٹمی قوت” ہیں اور ایک دوسرے کو فتح نہیں کر سکتے ہیں بلکہ اس کا تصور تک نہیں کر سکتے تو کیوں نہ اس جنگی جنون سے باہر آیا جائے؟ نریندر مودی کو اس بات کا ادراک کرنا چایئے کہ بھارت اور پاکستان دونوں کے پاس خطرناک ترین "کیمیائی ہتھیار” اور "ایٹم بمز” ہیں مگر سرحد کے دونوں اطراف عوام میں بھوک اور مفلسی ناچ رہی ہے۔ جنگ کسی مسئلے کا حل نہیں ہوتی، بلکہ دونوں ملکوں کے عوام کو نقصان ہی پہنچاتی ہے تو بھارتی وزیراعظم نریندر مودی صاحب کو چایئے کہ وہ اپنے اس جنگی جنون سے باہر آئیں۔ پاکستان کو بھی چایئے کہ اب وہ باہمی اختلافات کو مذاکرات، تجارت اور سفارتکاری کے ذریعے حل کرے، تاکہ خطے میں پائیدار امن قائم ہو جائے اور جو بجٹ جنگی جنون پر خرچ ہو رہا اسے غربت کی چکی میں پستی عوام پر لگایا جائے تاکہ وہ سکھ کا سانس لیں اور وہ بھی پیٹ بھر روٹی کھا سکیں۔

Title Image by ThePixelman from Pixabay

تیسری عالمی جنگ ہو گی یا نہیں؟

اسرائیل پر ایرانی بیلسٹک میزائل حملہ کے بعد روسی صدر ولادیمیر پیوٹن نے کہا کہ اگر تیسری عالمی جنگ ہوئی تو 2فریق ہوں گے ایک روس، چین، ایران، یمن اور شمالی کوریا ہو گا اور دوسرا نیٹو، امریکہ، اسرائیل اور برطانیہ ہوں گے۔ روسی صدر نے یہ بات 24 فروری 2022 ء کو نہیں کی جب روس نے اپنے توسیع پسندانہ عزائم کی تکمیل کے لیئے یوکرائن پر حملہ کیا تھا۔ روس اور یوکرائن کی جنگ کا آغاز 2014 ء میں ہوا۔ جبکہ صدر پیوٹن روسی تاریخ کے طویل ترین صدر ہیں جو روس کی کرسی صدارت پر یہ جنگ شروع ہونے سے پہلے 2012 ء میں متمکن ہوئے۔ یوکرائن روس کے بعد مشرقی یورپ کا سب سے بڑا ملک ہے جس کی سرحدیں شمال مشرق تک پھیلی ہوئی ہیں اور جس کی پشت پناہی پر بھی وہی ممالک کھڑے ہیں جو تیسری ممکنہ عالمی جنگ میں امریکہ اور یورپ کے نیٹو ممالک میں شامل ہیں۔ پہلی دونوں عالمی جنگیں (پہلی 2014ء اور دوسری 1939 ء ) کے تلخ اور تباہ کن اثرات زیادہ تر یورپ نے بھگتے اور دونوں عالمی جنگوں کا آغاز بھی یورپ سے ہی ہوا۔ تیسری عالمی جنگ اگر ہوئی تو اس کا آغاز فلسطین اسرائیل تنازعہ کی وجہ سے مشرقی وسطی ٰکے ممالک سے ہو گا۔ ویسے تو تیسری عالمی جنگ کی باتیں اسرائیل پر حماس کے 7 اکتوبر 2023 ء کے پہلے حملہ کے بعد مسلسل ہو رہی ہیں مگر روسی صدر ولادیمیر پیوٹن نے ایران کے اسرائیل پر حملے کو ایک خصوصی رنگ دیا جس کا درپردہ مقصد اسرائیل، امریکہ اور نیٹو ممالک کو دھمکی دینا نہیں بلکہ سیاسی طور پر ان کی آنکھیں کھولنا ہے۔
اسرائیل ایران کو جنگ میں گھسیٹنے میں دلچسپی رکھتا ہے تاکہ امریکہ اور نیٹو ممالک سے اسے تازہ اور خصوصی کمک مل سکے۔ اس مقصد کو حاصل کرنے کے لئے اسرائیل نے 2اپریل کو دمشق میں ایرانی قونصلیٹ پر میزائل حملہ کیا تھا۔ ایران کے لئے یہ صورتحال کافی مشکل تھی کہ وہ اپنی سرخ لکیر قائم رکھنے کے لیئے اسرائیلی حملے کا جواب کس انداز میں دے۔ جب کسی خود مختار ملک پر ایسا حملہ ہوتا ہے تو وہ اس کا جواب 48گھنٹوں ہی میں چکتا کرتا ہے جیسا کہ فروری 2019 ء میں پاکستان نے انڈیا کو 24گھنٹوں میں جوابی حملے کا نشانہ بنایا یا جیسے بلوچستان میں ایرانی حملے کا جواب پاکستان نے ایران پر میزائل حملہ کر کے 24گھنٹوں میں دیا۔ ایرانی کونسلیٹ پر اسرائیل نے 2اپریل کو حملہ کیا تھا جس میں ایرانی پاسداران انقلاب کے لیڈر سمیت 12 افراد شہید ہو گئے تھے۔ اس حملے کے بعد ایرانی فوجی سربراہ جنرل حمد حسین نے شام میں ایرانی قونصل خانے پر اسرائیلی حملے کا بھرپور جواب دینے کا اعلان کیا تھا۔ اس کے باوجود ایران نے اسرائیل پر 13اپریل کو حملہ کیا۔ اتنی دیر کے بعد جوابی حملہ کی کئی مجوزہ وجوہات ہو سکتی ہیں جن میں اس حملہ کے بارے دنیا بھر میں ہونے والے تبصروں سے بھی اندازہ لگایا جا سکتا ہے کہ اسرائیل پر ایرانی حملے کے پس پردہ اصل حقائق کیا ہو سکتے ہیں۔

یورپی میڈیا کی اطلاعات کے مطابق اسرائیل پر ایرانی حملہ میں الفتح نے 6 منٹ میں 2 بیلسٹک میزائلوں کے ذریعے اسرائیل کے شمال مغربی ہدف کو نشانہ بنایا۔ اب ایران اسرائیل پر یہ حملہ کر کے اپنے اہداف حاصل کرنے اور بدلا لینے میں کتنا کامیاب ہوا اس کے بارے یورپی میڈیا کا صرف اتنا کہنا ہے کہ اسرائیل کا دفاعی نظام ’’آئرن ڈوم‘‘اس حملہ کو روکنے میں ناکام ہو گیا۔ عرب میڈیا نے بھی اس سے ملتے جلتے تبصرے کیئے اور کہا کہ اسرائیل نے فوجی اڈے خالی کر دیئے۔ ایرانی حملے سے اسرائیل میں خوف و ہراس اور بھگدڑ کو تو ریکارڈ کیا گیا۔ لیکن اس حملہ میں اسرائیل کے ہونے والے جانی، فوجی یا سول نقصان کی کوئی اطلاعات نہیں ملی ہیں۔ تاہم اس حملہ کی آڑ میں امریکی صدر جوبائیڈن کی دفاعی انتظامیہ پینٹاگون نے اسرائیل کی فوجی مدد اور شام، عراق اور دیگر خلیجی ممالک میں موجود اپنے ٹھکانوں کی حفاظت کے لیئے اپنا دفاعی نظام مزید مضبوط کرنے کا اعلان کیا۔ خبر رساں ایجنسی ’’سی این این‘‘کے مطابق پینٹاگون تیزی سے اپنے فضائی نظام کو طاقتور بنا رہا ہے۔ امریکہ میں انتخابات نزدیک ہیں جو اسی سال 5نومبر 2024 ء کو ہونے جا رہے ہیں۔ امریکی صدر جوبائیڈن یوکرائن کے معاملے میں پہلے ہی منہ کی کھا چکے ہیں اور وہ فلسطین اسرائیل کی جنگ میں کوئی مزید ہزیمت اٹھانے کی پوزیشن میں نہیں ہیں۔
اسرائیل نے ایرانی حملے کے بعد حفظ ماتقدم کے طور پر 2روز تک تعلیمی سرگرمیوں کے لیئے سکول بند رکھنے اور اجتماعات پر پابندی لگائی ہے اور 28ممالک میں اپنے سفارتخانے بھی بند رکھنے کا اعلان کیا یے جس میں سیکورٹی خدشات کے پیش نظر نظرثانی کا بھی امکان ہے۔ اس ضمن میں اسرائیل کے فوجی ترجمان ڈینیئل ہیگری نے ٹیلی ویژن پر اپنے ایک بیان میں کہا کہ اسرائیل کا ایئر ڈیفنس تیار ہے تو کیا اس کا یہ مطلب لیا جانا چایئے کہ ایران اسرائیل پر مزید کوئی حملہ کرے گا یا خود اسرائیل اگلے چند دنوں میں ایران پر جوابی حملہ کرنے جا رہا ہے۔
اس وقت دنیا 2024 ء سے گزر رہی ہے، یہ سال 1914 ء ہے اور نہ ہی 1939ء ہے کہ اب عالمی طاقتیں تیسری عالمی جنگ (Third World War) میں کودنے کی حماقت کریں۔ دو ملکوں کے درمیان کوئی عام جنگ ہو یا چند فریقوں کے درمیان عالمی جنگ ہو دو بنیادی وجوہات کی بنا پر لڑی جاتی ہے جب طاقت کا توازن بگڑ جائے اور یا پھر طاقت کا توازن موجود ہو۔ پہلی دونوں عالمی جنگیں مغربی تہذیبوں پر قہر بن کر ٹوٹی تھیں جس میں تقریبا ًسارا نقصان اہل مغرب ہی کا ہوا۔ دوسری عالمی جنگ میں روس آخری وقت پر پیچھے ہٹ گیا تھا جس کا خمیازہ جاپان کو دو ایٹم بمبوں کی صورت میں بھگتنا پڑا۔ جرمنی بھی تباہ ہوا مگر یہ دونوں ملک مکمل طور پر دوبارہ اپنے پاں پر کھڑے ہو چکے ہیں۔ پہلے روس کا نام ’’سوویت سوشلسٹ ریپبلکس‘‘ تھا جو 26 دسمبر 1991 ء میں مختلف ریاستوں میں تقسیم ہو کر بکھر گیا اور روس ابھی تک معاشی طور پر اس پوزیشن میں نہیں جا سکا ہے کہ وہ تیسری عالمی جنگ کا سامنے کرنے کے لئے سیدھا کھڑا ہو سکے جبکہ چین عالمی جنگ اپنی معیشت کو بہتر بنانے کے لیئے لڑ رہا ہے اور چین امریکہ اور روس کی طرز کا جارح ملک بھی نہیں ہے کہ وہ فریق ثانی کے طور پر امریکہ اور نیٹو کے مغربی ممالک کو چیلنج کرے۔
پاکستان سعودی عرب کا دفاعی شراکت دار ہے جبکہ سعودی عرب امریکی اور اسرائیلی اتحادی ہے۔ چائنا نے ایران اور سعودی عرب کی آپسی دشمنی بھی ختم کرانے کا آغاز کرایا۔ سعودی عرب اور ترکی بھی قریب آ رہے ہیں۔ اسی طرح ایران بھارت کا دفاعی پارٹنر ہے اور بھارت امریکہ کا سٹریٹیجک پارٹنر ہے۔ متحدہ عرب امارات اور سعودی عرب بھی ایک دوسرے کے دفاعی اتحادی ہیں جبکہ متحدہ عرب امارات فلسطین کے لیئے امدادی سامان لے جانے والے عملہ پر اسرائیلی حملے کی وجہ سے پہلے ہی اسرائیل سے اپنا سفیر واپس بلا چکا ہے۔
اس پس منظر میں خود فلسطین (یا حماس) اس سفارتی پوزیشن میں نہیں ہیں کہ ان کے کوئی جنگی اتحادی ہوں یا وہ تیسری عالمی جنگ لڑنے کے لیئے اپنے حق میں اتنی بڑی ہمدردیاں سمیٹ سکے۔ اگر پھر بھی ایسا کوئی امکان ہے تو وہ صرف اتنا ہے کہ فلسطین میں 31184 شہادتوں اور 72889 زخمیوں جس میں خواتین، بچے، بوڑھے اور جوان بھی شامل ہیں، اس کے بدلے میں کسی طور فلسطین کو آزادی نصیب ہو جائے۔ گو آنے والے دنوں میں کیا ہو گا یہ کسی کو معلوم نہیں مگر یہ موقع ضرور ہے کہ تیسری عالمی جنگ کو رد کر کے اس مسئلہ کا کوئی پرامن حل نکالا جائے۔