Tag: علم

(  کائنات کی دیگر اشیاء کی طرح علم بھی نیا اور پرانا ہوسکتا ہے ۔ آئیے اس موضوع پر ایک نظر ڈال کر دیکھیں )

تحریر :

سیّدزادہ سخاوت بخاری

سب سے پہلے یہ بات سمجھ لیں کہ اصل علم صرف اللہ کے پاس ہے ۔ ہم مخلوق خدا ، اس کے حصول کی خاطر زندگی بھر سرگرداں رھتے ہیں ۔ ہر انسان یا طالب علم اپنی ذہنی صلاحیت ، سعی ، کوشش اور تڑپ کے صدقے اس میں سے کچھ حصہ حاصل کرلیتا ہے لیکن اسے مکمل علم نہیں کہا جاسکتا ۔۔ البتہ نوع انسانی میں  انبیاء کرام وہ اعلی ہستیاں ہو گزری ہیں کہ جنہھیں بنی آدم کی رہنمائی کے لئےخصوصی علم کے ایسے خزانے عطاء ہوئے کہ جن کی صلاحیت کبھی ختم نہ ہوئی یا یوں کہئیے کہ ان پر ایکسپائری ڈیٹ ( Expiry Date ) ہی نہ لکھی تھی ۔

انبیاء کے علم کو سمجھنے کے لئے آج کی ڈیجیٹل ٹیکنالوجی ( Digital Technology ) نے کام آسان کردیا اور ہمیں اس کا فوری ادراک حاصل ہوجاتا ہے  ورنہ مولوی صاحب ، سائینسی توجیع کی بجائے  ہمیشہ کی طرح ، ہمیں ان اعلی ہستیوں کے فقط روحانی مقام و مرتبے کی تشریع تک محدود رکھتے اور عام و خاص انسان ، الوہی ٹیکنالوجی ( Divine Technology ) سے ناآشناء ،  تقدیس (  Sense of deep respect ) کی ہوشرباء خوبصورت وادیوں میں گھومتے رہتے ۔

آج کے دور کا ایک بچہ بھی  مائیکرو چپ ( Microchip ) سے آشناء ہے ۔ آپ کے موبائیل فون کی سم ( Sim ) , شناختی کارڈ اور بینک کارڈ کے ایک کونے پر چسپاں سنہرے رنگ کی دبلی پتلی چپ ( Chip ) اپنے اندر معلومات کا خزانہ سمیٹے نظر آتی ہے ۔ اسی قسم کی ایک روحانی یا الوہی چپ اللہ نے انبیاء کے سینے میں نصب کردی لھذا وہ  کسی مدرسے یا استاد کے پاس گئے بغیر جملہ علوم و فنون کا مخزن بن گئے ۔

اب ہم اس نتیجے پر پہنچے کہ اللہ کا علم کلی اور اصل ہے ۔ انبیاء کرام کو عطاء ہوا اور عام انسان اسے حاصل کرنے کی کوشش کرتا ہے ۔ قرآن کے اندر سینکڑوں مرتبہ غور و فکر پر زور دیا گیا ۔ بار بار کہا گیا

” اور تم غور و فکر نہیں کرتے "

کئی ایک آیات میں غور و فکر کی طرف توجہ دلائی گئی تاکہ تم جان سکو ۔

غور و فکر سے متعلق آیات سے دو باتیں سمجھ میں آتی ہیں ۔ اولا یہ کہ کائنات پر غور کرنے سے اس کے راز  سمجھ پاؤگے ، دوئم یہ کہ ، اس غور و فکر کی کوئی حد مقرر نہیں ،  کائنات اور اس کے اندر اللہ کی مخلوقات کا حجم اور تعداد اتنی زیادہ ہے کہ ایک انسان ساری عمر غور کرتا رہے تو بھی حصول علم کی پیاس نہیں بجھتی ۔

 علامہ اقبال رحمة اللہ     کی کتاب ” بال جبریل ”  میں درج ایک غزل اسی فلسفہء غور و فکر کی امین ہے ، وہ کہتے ہیں ،

ستاروں سے آگے جہاں اور بھی ہیں

ابھی عشق کے امتحاں اور بھی ہیں

تہی زندگی سے نہیں یہ فضائیں

یہاں سینکڑوں کارواں اور بھی ہیں

تو شاہیں ہے پرواز ہے کام تیرا

تیرے سامنے آسماں اور بھی ہیں

اسی روز وشب میں الجھ کرنہ رہ جا

کہ تیرے زمان و مکاں اور بھی ہیں

علامہ صاحب کا فلسفہ کائنات صرف مسلمانوں کے لئے نہیں بلکہ عمومی ہے ۔ وہ سب سے مخاطب ہوکر کہ رہے کہ ، یہ جو تمہیں جگمگ جگمگ کرتے ستارے نظر آرہے ہیں ، یہ کائنات کی سرحد نہیں ، اس سے آگے نظر دوڑاو کئی اور جہان نظر آئینگے ۔ اور یہ فضائیں جو بہ ظاہر خالی نظر آتی ہیں ۔ ایسا ہے نہیں بلکہ ان ہی فضاوں میں کئی کاروان زندگی رواں دواں ہیں ، غور تو کرو ۔ پھر شاہین سے کہتے ہیں کہ بلندیوں پر پہنچنے کا یہ مطلب نہیں کہ دنیاء کے کنارے تک پہنچ گئے ۔ تمہارا کام اڑنا ہے اڑتے رہو ، ابھی تو کئی اور آسمان باقی ہیں ۔ آخری شعر کا مطلب ہے ۔ اے انسان تو اس رات دن کے چکر میں کھوگیا ۔ سوتے ہو اٹھتے ہو ، کھاتے ہو پیتے ہو ، بس اسی کو زندگی سمجھ لیا ہے جبکہ تیرے مقدر میں بہت کچھ لکھا ہے ۔ تو اپنے لئے کئی اور زمانے اور ٹھکانے تلاش کرسکتا ہے ۔

الغرض ان کی یہ غزل ان قرآنی آیات کی تشریح ہے کہ جن میں غور و فکر تگ و دو اور تلاش و جستجو کا سبق دیا گیا ۔ یہاں نوٹ کرنے والا نقطہ یہ ہے کہ ، قرآنی آیات میں درج تلاش و جستجو کی ترغیب کسی خاص حد ، وقت یا مقام تک محدود نہیں بلکہ یہ حکم ہمیشہ کے لئے ہے یعنی جبتک دنیاء قائم ہے انسان تلاش کا سلسلہ جاری رکھے گا ۔ اور تاریخ انسانی بھی ہمیں ایسی ہی کہانی سناتی ہے ۔

ابتدائی انسان غاروں میں رہتا تھا ، آج عالی شان اور پر تعیش محلات میں مقیم ہے ۔ شروع میں پیدل ، پھر جانوروں پر سواری ، اور آج ہوائی جہاز اور لیموزین میں گھومتا نظر آتا ہے ۔ کیا یہ تلاش و جستجو کا نتیجہ نہیں کہ انسان ، پتھر ، کانسی ، لوہے ، لکڑی  اور الومینیم کے زمانے سے نکل کر اب فائیبر کی بنی اشیاء استعمال کررہا ہے ۔ ابھی کوئی نصف صدی پہلے تک گاؤں کا نائی ، غمی شادی کا پیغام لیکر جاتا تھا لیکن اب اس کی جگہ واٹس ایپ نے لے لی اور نائی کا کردار سرے سے غائب ہوگیا۔ اسی طرح ساری دنیاء میں خطوط رسانی کے لئے ڈاکیے ( Postman ) کا بے چینی سے انتظار کیا جاتا تھا ، اب شاید ہماری نئی نسل ڈاکیے کے نام سے بھی آشناء نہیں کہ یہ کون سا کردار ہے ۔ فون پہ میسیج کی ٹون بجی اور خط مل گیا ۔

اسی طرح ہمارے بچپن میں بزرگ کہتے تھے رات میں درخت کے نیچے مت بیٹھیں کیونکہ رات ہوتے ہی جنات درختوں پر بیٹھ جاتے ہیں ۔ جبکہ سائینس کہتی ہے ،  درخت دن میں آکسیجن اور رات میں کاربن ڈائی آکسائیڈ بناتے ہیں اس لئے ان سے رات میں دور رہا جائے ۔

یہ سب کیا ہے ؟

کیا تھا ؟

ان مثالوں سے ثابت ہوتا ہے کہ انسان مسلسل تگ و دو کررہا ہے ۔ وہ کتاب کائنات کی ورق گردانی میں مصروف ہے ۔ ہر روز ایک نئی بات سامنے آرہی ہے ۔ لھذا جو بات اسے کل صحیح لگتی تھی آج اسی کو غلط کہ رہا ہے جو اس بات کا واضع ثبوت ہے کہ تلاش و جستجو کی زد میں آکر   انسانی علم پرانا اور ناکارہ ( Invalid and Expired ) ہوجاتا ہے ۔ میری عمر کے لوگ آج موبائیل فون کا صحیح استعمال نہیں کرسکتے بلکہ پوتے ، پوتی یا نواسے نواسی کو بلاکر نمبر تلاش کرتے ہیں کیونکہ نئی جنریشن کا علم نیا اور ہمارا پرانا ہوچکا ہے ۔

سیّدزادہ سخاوت بخاری

سرپرست آئی اٹک e میگزین

از قلم
بینش احمد اٹک
کوئی بھی انسان دُنیا میں تنہا نہیں رہ سکتا ہے ہمیں کسی نہ کسی رشتے کی ضرورت ہوتی ہے-کچھ رشے خونی ہوتے ہیں جن میں ہمارے گھر والے ہمارے عزیز واقارب شامل ہیں جبکہ کچھ رشتے ایسے ہوتے ہیں جن سے ہمارا تعلق خونی تو نہیں ہوتا لیکن وہ اپنوں سے بڑھ کر ہوتے ہیں۔ انہی میں سے ایک رشتہ اُستاد کا ہے۔

اساتذہ ہمارے روحانی والدین بھی کہلاتے ہیں – اسلام میں اُستاد کا رشتہ والدین کے رشتے کے برابر قرار دیا گیا ہے کیونکہ اُستاد ہی ایسی واحد شخصیت ہے جو والدین کے بعد بچوں کی تربیت میں اہم کردار ادا کرتا ہیں – اُستاد ہی ہے جو ہمیں معاشرے میں رہنے کے طور طریقے سکھاتا ہے اور ہمیں کتابوں کا علم پڑھاتا ہے-حضرت علیؑ نے فرمایا:
’’اگر تم بادشاہ ہو تو بھی اپنے اْستاد اور والد کی تعظیم میں کھڑے ہو جاؤ’‘
اس بات سے اُستاد کی حیثیت کا بخوبی اندازہ لگایا جا سکتا ہے- ایک اُستاد ہی ہے جو کوئلے سے ہیرا بناتا ہے- اُستاد کا کام صرف طلباء کو کتابی سبق ہی پڑھانا نہیں بلکہ وہ طلباء کو زمانے کی تمام اُونچ نیچ کے بارے میں سکھاتا ہے اور معاشرے میں رہنے کے طور طریقوں سے بھی آگاہی فراہم کرتا ہے-اُستاد کے احترام اور اس کی مناسب تربیت کے بغیر کوئی بھی انسان کامیابی حاصل نہیں کر سکتا-
مشہور محاورہ ہے کہ: ‘با ادب با نصیب’، ‘بے ادب بے نصیب’
جو انسان اپنے اساتذہ کا ادب و احترام نہیں کرتا وہ منہ کے بَل گرتا ہے-آپ پوری دْنیا میں نظر دوڑا کر دیکھ لیں کوئی بھی ایسا رشتہ نہیں ہوگا جو بغیر مطلب کے آپ کے ساتھ ہو-
آج کل کے رشتے صرف اور صرف مطلب کی بنیاد پہ قائم ہیں مطلب ختم تو رشتہ بھی ختم-لیکن ہمارے والدین اور اساتذہ ایسی واحد شخصیات ہیں جو بنا مطلب کے ہمارا ساتھ دیتے ہیں اور چاہتے ہیں کہ اْن کے بچے اْن سے بھی ذیادہ آگے جائیں اور مزید ترقی کریں –
ہمارے پیارے نبی حضرت محمدؐ کو تمام انسانوں کیلئے معلم بنا کر بھیجا گیا ہے- جب آپ صحابہ کرام رضی اللہ عنہا سے خطاب کیا کرتے تھے تو صحابہ کرام اس قدر خاموشی سے بیٹھتے تھے کہ اپنے سروں کو حرکت تک نہیں دیتے تھے بیشک اُن کے سروں پہ پرندے آ کر کیوں نہ بیٹھے رہیں اور ایک موجودہ دور کے طلباء ہیں کہ اْنہوں نے اْستاد کے ادب و احترام کو بالکل ایک طرف کر کے رکھ دیا ہے- طلباء اپنے اْستاد کے سامنے تن کر کھڑے ہو جاتے ہیں اْن سے اونچی آواز میں بحث و مباحثہ کرتے ہیں -اکثر دکھائی دیتا ہے کہ وہ ان کے ساتھ جھگڑا بھی کرتے ہیں جو کہ بے حد نا مناسب طرز عمل ہے۔
میرے لیے میرے تمام اساتذہ قابلِ عزت ہیں – میں نے جب سے اس شعبے میں قدم رکھا ہے تو ہر قسم کے لوگوں سے میرا واسطہ پڑا ہے- لیکن دو ایسی شخصیات ہیں جو میرے لئے بہت ہی ذیادہ قابلِ احترام ہیں۔ آپ کو دنیا میں ایسے بہت کم لوگ ملیں گے جو بغیر کسی صلہ اور مطلب کے آپ کی مدد کریں گے- یہ میرے ایسے اْستاد ہیں جن سے مجھے وہ سب کچھ سیکھنے کا موقع مل رہا ہے جو شاید میں نے اپنی بائیس سالہ زندگی میں بھی نہیں سیکھا ہے۔ میں ان کے نام ظاہر نہیں کروں گی لیکن اللہ تعالیٰ سے ہر پل میری یہی دْعا رہتی ہے کہ میرے اللہ تعالیٰ ان اساتذہ کو مزید ترقی عطا فرمائیں، اْن کو لمبی زندگی دیں اور اسی طرح وہ دوسروں کو روشنی کی طرف لاتے رہیں۔آمین ثم آمین