Tag: قرآن

اسلامی تعلیمات اور جدید دور کے تقاضے

اسلام واقعی ایک آفاقی نظام عمل ہے تو اس کے عقائد اور تعلیمات کو ہر عہد کے تقاضوں اور ضروریات پر پورا اترنا چاہئیے۔ اسلام کے مطابق کامیاب زندگی گزارنے کے لیئے قرآن پاک دین اسلام اور اہل ایمان کا پہلا الہامی زریعہ ہے جس کی آیات مبارکہ اس مجوزہ معیار پر مکمل طور پر پورا اترتی ہیں جبکہ اسلامی تعلیمات کا دوسرا بڑا منبع احادیث نبوی ﷺ ہیں جو کئی ہزار کی تعداد میں ہو سکتی ہیں لیکن احادیث کی کل تعداد کا صحیح اندازہ کرنا مشکل ہے کیونکہ ان میں محدثین کے مختلف اقوال بھی شامل ہیں۔ محدثین کی اصطلاح میں صرف آپ ﷺ کے ارشادات کو حدیث نہیں کہا جاتا، بلکہ آپ ﷺ کے افعال، اخلاق، احوال اور آپ کی موجودگی میں لوگوں کے کئے ہوئے وہ کام جن پر آپ نے گرفت نہیں فرمائی، اور اس کے ساتھ صحابہ کے اقوال، ان کے مفتیوں کے فتاویٰ، زمانۂ خلافت میں ان کی عدالتوں کے فیصلے، بلکہ تابعین کے فتاویٰ اور جج ہونے کی حیثیت میں ان کے فیصلے، اور قرآنی آیات پر تشریحی نوٹس بھی احادیث میں شمار کئے گئے ہیں۔

اس کے باوجود کہ احادیث کی کل تعداد متعین نہیں ہے تاہم، احادیث کی مشہور کتب میں صحیح بخاری (بشمول تکرار) 9086 اور صحیح مسلم میں 7275 احادیث شامل ہیں۔ غیر مکرر احادیث کی تعداد بخاری میں 2,600 اور مسلم میں تقریباً 4,000 ہے۔ جبکہ قرآن مجید میں کل سورتوں اور آیات کی تعداد مخصوص ہے جس میں 114 سورتیں ہیں جن میں 86 مکی اور 28 مدنی سورتیں سرفہرست ہیں جبکہ  قرآن مجید میں کل آیات کی مشہور تعداد 6666 ہے، جبکہ محققین اور ماہرینِ قرآنیات کے مطابق صحیح تعداد 6236 ہے۔ یہ اختلاف آیات کو الگ الگ یا ملا کر گننے کی وجہ سے ہے، تاہم قرآنی متن اور پیغام میں کوئی تبدیلی نہیں ہے۔ چونکہ قرآن فرقان آخری نبی محمد الرسول اللہ ﷺ پر اترا اور نبی مکرم ﷺ کے بعد نبوت کے دروازے بند ہو گئے ہیں تو اب یہ اسلامی علمائے عظام، مفسرین، فقہاء، محدثین و مفکرین اور خاص طور پر مجددین کی ذمہ داری ہے کہ وہ اللہ ﷻ اور رسول اللہ ﷺ کی تعلیمات کی تشریح و تعبیر ہر عہد کے جدید سے جدید ترین علوم اور پیمانوں کی زبان اور معیار کے مطابق پیش کریں تاکہ جہاں اسلام کو آسانی سے سمجھا جا سکے وہاں اسے روزمرہ زندگی پر لاگو کرنا بھی آسان ہو جائے۔

الہامی پیغام اور تعلیمات و عقائد غیرمتبدل اور ہر عہد کا علم اور حالات متبدل ہوتے ہیں جن کے درمیان توازن قائم نہ کیا جائے یا اس کے تقاضوں کا لحاظ نہ رکھا جائے تو مذہبی علوم اور عقائد کے قدیم (آوٹ ڈیٹڈ) ہو جانے کا امکان پیدا ہو جاتا ہے جیسا کہ آج کی ترقی یافتہ دنیا اسلام اور مسلمانوں پر "دقیانوسی” اور "جہلا” وغیرہ کے الزامات لگانے کی کوشش کرتے ہیں۔ اس خلا کو پر کرنے کے لیئے محدثین اور مجددین اسلامی تعلیمات اور عقائد کا احیاء کرتے ہیں تاکہ "اسلامی ضابطہ حیات” جدید ذہن کی سمجھ میں آ سکے۔ اگر ایسا نہ کیا جائے یعنی اسلامی تعلیمات اور عقائد کے نئے مفاہیم اور مطالب کو عام نہ کیا جائے تو اسلام کا مکمل ادراک اور اسے ہر عہد میں عملی زندگی کا حصہ بنانا ناممکن نہیں تو تقریبا مشکل ہو جاتا ہے۔ اس کا بنیادی حل علماء اسلام، مسلم فقہاء، مفسرین، شارع اور مترجمین پیش کر سکتے ہیں جن کے ذہن کی رسائی جدید علوم مثلا کوانٹم سائنس، نفسیات اور مائنڈ سائنسز پر بھی ہو۔ جہاں ان سائنسی علماء کا مشاہدہ تیز ہو وہاں وہ مستقبل کے جدید علوم پر بھی نظر رکھ سکیں کہ انسان ان کے ذریعے کس بلندی تک ترقی کا سفر طے کر سکتا ہے اور اس میں دین اسلام کیا کردار ادا کر سکتا ہے مثال کے طور پر پاکستان کے قومی شاعر، مفکر اور فلسفی ڈاکٹر علامہ اقبال کا واقعہ معراج کے بارے یہ شعر ملاحظہ کریں، جس میں وہ فرماتے ہیں،
"سبق ملا ہے یہ معراج مصطفی سے مجھے
کہ عالم بشریت کی زد میں ہے گردوں ” 

واقعہ معراج کی ایک تشریح وہ ہے جو علمائے دین اللہ تعالی ﷻ سے نبی کریم ﷺ کی ملاقات اور دیدار کے حوالے سے کرتے ہیں اور دوسری وہ ہے جو علامہ اقبال کی نظر میں آسمان کی بلندیوں تک سائنسی علوم کی ترقی کے ذریعے ہے جس کی زد میں سات آسمان (گردوں) آتے ہیں۔ اس مد میں حضرت مجدد الف ثانی رحمتہ علیہ کی تعلیمات میں جدید اسلامی فکر کے نمایاں پہلو ملتے ہیں جبکہ مولانا مودودیؒ نے بھی اس میدان میں بے مثال خدمات انجام دیں۔ دور جدید سائنسی عروج کا عہد ہے اور نت نئی ایجادات نے قدیم انسانی تہذیب کے نمایاں عناصر کے بخیئے ادھیڑ دیئے ہیں۔

مولانا مودودیؒ اسلامی فکر کو ترویج دینے کے قائل تھے۔ انہوں نے اسلامی فکر کے مسلسل ارتقاء میں رہنے کا جو نظریہ دیا وہ قابل تعریف ہے اور یہی مسلمانوں میں علمی تعطل کا واحد حل بھی ہے۔   امام مودودیؒ فرماتے ہیں کہ، "مدینہ سے مماثلت پیدا کرنے کا مفہوم کہیں یہ نہ سمجھ لیا جائے کہ ہم ظاہری اشکال میں مماثلت پیدا کرنا چاہتے ہیں اور دنیا اس وقت تمدن کے جس مرتبے پر قائم ہے اس سے رجعت کر کے اس تمدنی مرتبے پر واپس جانے کے خواہش مند ہیں جو عرب میں ساڑھے تیرہ سو برس پہلے تھا۔ اتباع رسول صلی اللہ علیہ وآلہ وسلم و اصحابؓ کا یہ مفہوم سرے سے غلط ہے اور اکثر دین دار لوگ غلطی سے اس کا یہی مفہوم لیتے ہیں۔ ان کے نزدیک سلف صالح کی پیروی اس کا نام ہے کہ جیسا لباس وہ پہنتے تھے ویسا ہی ہم پہنیں جس قسم کے کھانے وہ کھاتے تھے اسی قسم کے کھانے ہم بھی کھائیں جیسا طرز معاشرت ان کے گھروں میں تھا بعینہٖ وہی طرز معاشرت ہمارے گھروں میں بھی ہو۔ تمدن و حضارت کی جو حالت ان کے عہد میں تھی اس کو ہم بلکل متحجر صورت میں قیامت تک باقی رکھنے کی کوشش کریں اور ہمارے اس ماحول سے باہر کی دنیا میں جو تغیرات واقع ہو رہے ہیں ان سب سے آنکھیں بند کر کے ہم اپنے دماغ اور اپنی زندگی کے اردگرد ایک حصار کھینچ لیں جس کی سرحد میں وقت کی حرکت اور زمانے کے تغیر کو داخل ہونے کی اجازت نہ ہو۔” 

دراصل وقت کی ضروریات اور تقاضوں کے مطابق اسلامی تعلیمات کا یہ جدید نقشہ پیش کرنا ان مجددین کا کام ہے جو اسلام کی تشریح ان جدید علوم کی روشنی میں کر سکیں جو درحقیقت ہر عہد کے جدید علوم کے معیار پر عین پورا اترتی ہیں۔ مولانا مودودیؒ اس مد میں فرماتے ہیں جس کا خلاصہ یہ ہے کہ اتباع کا یہ تصور جو دور انحطاط کی کئی صدیوں سے دین دار مسلمانوں کے دماغوں پر مسلط رہا ہے درحقیقت روح اسلام کے بالکل منافی ہے کیونکہ اسلام ایک مکمل ضابطہ حیات ہے جو وقت کے تقاضوں کے مطابق ہمیشہ متحرک رہتا ہے۔

میرے رائے میں بھی اسلام کی یہ تعلیم ہرگز نہیں ہے کہ ہم جیتے جاگتے آثار قدیمہ بن کر رہیں اور اپنی زندگی کو قدیم تمدن کا ایک تاریخی ڈرامہ بنائے رکھیں۔ اسلامی فکر ہمیں رہبانیت اور قدامت پرستی نہیں سکھاتی ہے۔ اسلامی ضابطہ اور جدید تعلیمات کا مقصد دنیا میں ایک ایسی قوم پیدا کرنا نہیں ہے جو تغیر و ارتقا کی راہ میں رکاوٹ بن جائے، بلکہ اسلام کا مطلب و مقصود اس کے بالکل برعکس ہے اور اسلام مسلمانوں کو ایک ایسی قوم بنانا چاہتا ہے جو تغیر و ارتقا کو غلط راستوں سے پھیر کر صحیح راستے پر چلانے کی کوشش کرے یعنی جدید علوم کا حصول ممکن بنا کر خود بھی ترقی کرے اور دوسری اقوام کو بھی کروائے۔

دین اسلام میں "امامت” کا مفہوم دوسروں کے لیئے خیر کا باعث بننا ہے۔ ایک حدیث نبوی ﷺ کا مفہوم یہ ہے کہ، "تم میں سے بہترین انسان وہ ہے جو دوسروں کے لیئے منافع بخش ہو۔” اسلام کا اجتماعی درس بھی یہی ہے کہ جو امت کو قالب نہیں دیتا بلکہ روح دیتا ہے اور چاہتا ہے کہ زمان و مکان کے تغیرات سے زندگی کے جتنے بھی مختلف قالب قیامت تک پیدا ہوں ان سب میں امت مسلمہ یہی روح بھرتی چلی جائے۔ مسلمان ہونے کی حیثیت سے دنیا میں امت نبوی ﷺ کا مشن یہ ہے کہ مسلمان "امت خیر” بنے رہیں، جنہیں اس لیئے پیدا کیا گیا ہے کہ وہ ارتقاء کے راستے پر چلیں اور اس سلسلے میں وہ دوسروں کی بھی امامت اور رہنمائی کرتے چلے جائیں۔

بلوغت اور ذہنی پختگی

اپنی روحانی اور شخصی کمزوریوں پر قابو پانے کے بعد ہی انسان کی روح میں ارتقاء پیدا ہونے کا آغاز ہوتا ہے جس کی اگلی منازل اس کا نافع علم طے کرواتا ہے۔

نافع علم بتدریج وہ آگہی ہے جس کے زریعے انسان اپنے اور دوسروں کے لیئے منافع بخش ثابت ہوتا ہے اور زندگی میں آسانیاں پیدا کرنے کے کام آتا ہے۔ چونکہ انسان کی روح خالق کائنات کا پرتو ہے اور کائنات کی ایک ہی وحدت کا جزو ہے، اس لیئے خود انسان کی روح بھی اسی صورت میں ترقی کرے گی اور اس میں ارتقاء پیدا ہو گا جب انسان کائنات اور انسانیت کی تعمیر میں حصہ لے گا ورنہ وہ فساد کا باعث بنے گا اور اس کی روح بھی ترقی کرنے کی بجائے تنزلی کا شکار ہو جائے گی۔

بنیادی طور پر بنی نوع انسان دیگر انواع کے مقابلے میں اپنی جسمانی ساخت، زبان اور عقل کے باعث "احسن تقویم” اور "اشرف المخلوقات” کا درجہ رکھتا ہے کہ جب تک وہ اپنی تخلیق کی ان اضافی عطاعتوں اور خوبیوں کے باعث اپنے مقام اور مرتبہ کا لحاظ رکھتا ہے، تزکیہ نفس برقرار و قائم رکھتا ہے اور اپنے قول و عمل سے خود کو اپنے اور معاشرے کے لیئے بہتر انسان کے طور پر پیش کرتا ہے تو خدا کی نظر میں وہ افضل اور پسندیدہ مخلوق ٹھہرتا ہے، بصورت دیگر قرآن پاک ہی کی زبان میں وہ "اَسْفَلَ سٰفِلِیْنَ” کی مذلت میں گر جاتا ہے اور کائنات کی بدترین مخلوق ثابت ہونے لگتا ہے۔

دراصل انسان کی روح اس کا وہ مرکزہ ہے جس سے اس کے مادی جسم اور شخصیت کے خدوخال ابھرتے ہیں۔ اپنی ذات سے آگاہی باقاعدہ علم ہے جس کے بارے علامہ اقبال نے خودی کا تصور پیش کرتے ہوئے فرمایا تھا، "خودی کو کر بلند اتنا کہ ہر تقدیر سے پہلے، خدا بندے سے خود پوچھے بتا تیری رضا کیا ہے۔” اپنی خودی سے آگاہ ایک عظیم المرتبت انسان کی مثال ایسے ہی ہے کہ جیسے کسی پھلدار درخت کا بیج ہو کہ جس کو زمین میں بونے سے وہی درخت پیدا ہو جس کا وہ بیج ہو، جو سایہ بھی دیتا ہو اور پھل بھی دیتا ہو۔ یہ احسن تقویم انسان کی مختصر تفہیم ہے جو دوسرے انسانوں اور چیزوں کو فائدہ پہنچانے والے علم سے پختہ ہوتی ہے اور آگے سے آگے کی منازل طے کرواتی ہے مگر چونکہ روح جسم میں قید ہوتی ہے تو کبھی ایسا بھی ہوتا ہے کہ انسان کی روح دائرہ جسم سے باہر نہ نکل سکے تو وہ جسمانی ضروریات ہی کی غلام ہو کر رہ جاتیہے اور پھر اس حد تک بھی گر جاتی ہے کہ انسان میں منفی عادات پیدا ہو جاتی ہیں جس کا شکار ہو کر انسان اَسْفَلَ سٰفِلِیْنَ کا نمونہ پیش کرنے لگتا ہے۔

انسان اپنی ہوش سنبھالنے کے بعد شعوری طور پر اس وقت بلوغت میں قدم رکھتا ہے جب وہ خود کو اپنے اعمال کا ذمہ دار ٹھہراتا ہے۔ ذہنی بلوغت اسی کا نام ہے کہ آپ کو معلوم ہونا شروع ہو جائے کہ آپ کے لیئے دنیا اور آخرت کے حوالے سے کونسے اعمال فائدہ مند ہیں اور کون سے نقصان دہ ہیں۔ یہ اسی صورت میں ممکن ہے جب آپ اپنی سوچ و خیالات اور اعمال پر نظر رکھتے ہیں۔ یعنی بلوغت صرف عمر اور جسمانی اعضاء کی بڑھوتری کا نام نہیں ہے بلکہ اصل بلوغت ایسی ذہنی پختگی کا عمل ہے جب آپ منفی یا غیر تعمیری خیالات اور کیفیات کے ہاتھوں استعمال نہ ہونے کا فن سیکھ جاتے ہیں۔

آپ نے یہ محاورہ اکثر سنا ہو گا کہ انسان بوڑھا ہو کر دوبارہ بچہ بن جاتا ہے یا فلاں آدمی تو پڑھا لکھا بے وقوف ہے، اس کی وجہ یہ ہے کہ ان دونوں صورتوں میں انسان کی خود آگہی کی طاقت کم ہو جاتی ہے یعنی وہ یہ جاننے سے محروم ہو جاتا ہے کہ وہ کیا سوچ رہا ہے یا کیا اعمال انجام دے رہا ہے۔ ایسی صورت میں ایک بوڑھے آدمی کی یادداشت کم ہو جاتی ہے اور پڑھے لکھے کی کامن سینس گھٹ جاتی ہے۔

دبئی قونصلیٹ امارات

ڈاکٹر عطاء الرحمن کا دستخط شدہ ایک "ڈیتھ سرٹیفکیٹ” میرے سامنے ہے۔ ڈاکٹر موصوف، آفس آف پلگرمز افیئرز پاکستان، مکہ مکرمہ میں میڈیکل آفیسر (حج) ہیں۔ یہ ڈیتھ سرٹیفکیٹ دبئی کی رہائشی ایک پاکستانی برٹش خاتون کا ہے جو امسال حج کے دوران مکہ مکرمہ میں 3جون کو فوت ہوئیں۔ یہ ڈیتھ سرٹیفکیٹ 8جون کو جاری کیا گیا۔ لیکن لواحقین کو یہ تفصیل نہیں بتائی گئی کہ دبئی، برطانیہ یا پاکستان میں اسے استعمال کرنے کے لیئے اس سرٹیفکیٹ کو پہلے پاکستان قونصلیٹ جدہ اور پھر فارن آفس (جسے مختصرا "موفا” کہتے ہیں) سے اٹیسٹ کروانا بھی ضروری ہے۔ اول ایسے کسی ڈاکومنٹ کی موفا تصدیق ہی ایک تھکا دینے والی جدوجہد ہے۔ دوم جب اس کاغذ کو متحدہ عرب امارات، دبئی (یا کسی دیگر ملک وغیرہ) میں استعمال کرنا ہو تو دبئی قونصلیٹ سے کونٹر اٹیسٹیشن کروانا پڑتی ہے، جس کے بعد دبئی سے بھی دوبارہ موفا اٹیسٹیشن ہوتی ہے، اور دبئی قونصلیٹ کسی ایسے ڈاکومنٹ کی اس وقت تک تصدیق کرنے نہیں کرتا ہے جب تک اسے واپس سعودی عرب لے جا کر پاکستان قونصلیٹ جدہ اور موفا سے تصدیق نہ کروایا جائے۔

اس پیچیدہ عمل پر طرفہ لطیفہ یہ ہے کہ دبئی قونصلیٹ میں ایسا کوئی انتظام نہیں ہے کہ سعودی عرب جانے کے لیئے ویزہ، ریٹرن ٹکٹ اور ہوٹل وغیرہ پر خرچ سے بچنے کے لیئے دبئی قونصلیٹ ہی میں، پلگرمز افیئرز پاکستان، مکہ مکرمہ (یا مدینہ) کے ایسے ڈاکومنٹ کو تصدیق کر دیا جائے، یعنی آپ عدم معلومات کی وجہ سے ایسا ڈاکومنٹ لے کر دبئی آ گئے ہیں تو آپ کو سعوی عرب کا کم و بیش دو ہفتوں کا دوبارہ چکر لگانا پڑے گا جس پر آپ کا کل ملا کر مبلغ 20 ہزار درہم تک خرچہ اٹھے گا، جو کہ پاکستانی روپے میں تقریبا 16 لاکھ بنتا ہے۔

اس ڈاکومنٹ کی دبئی قونصلیٹ سے تصدیق کے لیئے مجھ سے مرحومہ کے خاوند نے رابطہ کیا تو یہ تلخ اور مشکل معلومات میرے علم میں آئیں۔ میں چار پانچ دفعہ پاکستانی سفارت خانہ ابوظہبی گیا ہوں جہاں میری ملاقات پاکستانی سفیر سید فیصل نیاز ترمذی صاحب سے ہوئی، اور پاکستان قونصلیٹ بھی بہت دفعہ چکر لگا ہے۔ ان دونوں جگہوں پر درجنوں پاکستانیوں کو تپتی دھوپ پر کھڑے دیکھا، اور ان کو سنا بھی، جس وجہ سے مجھے وہاں فائلیں اور کاغذات اٹھائے سائلین کے ساتھ پیش آنے والے مسائل کا علم ہے۔ خاص طور پر دبئی قونصلیٹ کے باہر جو پاکستانی نیشنلز پاسپورٹ اور شناختی کارڈ رینیو کروانے آتے ہیں انہیں بہت زیادہ مشکلات سے گزرنا پڑتا ہے۔ ابوظہبی سفارت خانہ اور دبئی قونصلیٹ میں ایک تو انفارمیشن ڈیسک اور "آوٹ سائڈ” انتظار گاہیں نہیں ہیں، دوسرا وہاں آنے والوں کو یہاں پہنچ کر پتہ چلتا ہے کہ پاسپورٹ اور شناختی کارڈ رینیو کروانے کے لیئے، پہلے آن لائن اپونٹمنٹ بک کروانی پڑتی ہے جو بعض دفعہ ایک ہفتہ سے لے کر ایک ماہ تک ملتی ہے۔ دوبئی کونسلیست کے باہر کچھ ایجنٹ بھی یہ کام کرتے ہیں اور اس کے سامنے ایک ٹائپنگ سنٹر بھی اپونٹمنٹ لے کر دیتا ہے۔ لیکن ان کی فیس تین سو پچاس درہم تک ہے اور ارجنٹ اپونٹمنٹ لو تو فیس دگنی سے بھی زیادہ ہو جاتی ہے۔ پھر ان کو منہ مانگے پیسے دو تو اسی دن کی بکنگ بھی ہو جاتی ہے۔ اب یہ معلوم نہیں کہ وہ یہ اپونٹمنٹ لینے کے لیئےقونصلیٹ میں کیا "ذریعہ” استعمال کرتے ہیں یا اس میں کون اہل کار ملوث ہیں۔ اگر اپونٹمنٹ اپنے طور پر لی جائے اور زیادہ وقت لگے تو اس دوران بعض سائلین کے ویزے ختم ہو جاتے ہیں اور ان کا جرمانہ شروع ہو جاتا ہے، پاسپورٹ کی ارجنٹ فیس پر دس دن اور نارمل فیس پر رینیوول کے لیئے ایک ماہ لگتا ہے۔ شناختی کارڈ کی رینیول کے لیئے بھی تقریبا اتنا ہی وقت لگتا یے۔ پاسپورٹ اور شناختی کارڈ دونوں اسلام آباد سے پرنٹ ہو کر آتے ہیں۔ حالانکہ ایک سو درہم یا مناسب فیس بڑھا کر پاسپورٹ اور شناختی کارڈ رینیول اور پرنٹنگ کا احتمام ابوظہبی اور دبئی میں بھی کیا جا سکتا ہے۔ مقامی پرنٹنگ سے ایک تو حکومت کی آمدنی میں اضافہ ہو گا دوسرا سائلین کو بھی بروقت ڈلیوری ہو گی۔ اسی طرح ڈیتھ سرٹیفکیٹ کی تصدیق کے لیئے بھی دبئی اور ابوظہبی میں سعودی عرب کے سفارت خانوں سے آن لائن تصدیق کا احتمام کیا جا سکتا ہے جس سے وقت اور اخراجات میں بھی کمی آئے گی اور حکومت کی انکم میں بھی مزید اضافہ ہو گا۔

ہم سب جانتے ہیں کہ حج اور عمرے کے دوران ہر سال سینکڑوں حاجی مکہ اور مدینہ میں وفات پاتے ہیں جن کی اموات کے کاغذات کی تیاری اور تصدیق ایک بہت بڑا مسئلہ ہے۔ اس معاملے میں ‘ڈیتھ سرٹیفکیٹ’ جائیداد کی ٹرانسفرز وغیرہ کے حوالے سے بہت اہم ڈاکومنٹ ہے جس کا مقامی انتظام کرنے سے جعل سازی، رشوت اور بہت سی دیگر پیچیدگیوں سے بچا جا سکتا ہے۔ بعض دفعہ ایسے واقعات بھی پیش آئے ہیں کہ زندوں کو "مردہ” اور مردوں کو "زندہ” ثابت کر دیا جاتا ہے۔ خاص طور سفارش اور رشوت کی بیماری عام ہونے کی وجہ سے اس سے بچنا بذات خود ایک مشکل کام ہے، چہ جائیکہ بہت سے "اینجٹس” دے دلا کر ناممکن کام کو بھی ممکن بنا دیتے ہیں۔

میں پاکستان کی بیوروکریسی، اس کے "فائل سسٹم ” اور "ایز پر پروسیجرز” کے بارے میں کافی جانتا ہوں۔ لطف کی بات ہے کہ میں نے اس ڈیتھ سرٹیفکیٹ کی تصدیق کے لیئے جو بھاگ دوڑ کی ہے اس سے بہت سارے دیگر حیران کن حقائق بھی میرے سامنے آئے، جن میں متحدہ عرب امارات کی ریاست راس الخیمہ میں "پاکستان سنٹر” کی تعمیر اور اس کا "ناجائز استعمال” بھی شامل ہے۔ یہ معاملہ بھی کافی پیچیدہ، بلکہ گھناونا ہے کیونکہ لگتا ہے کہ اس میں گزشتہ سفارت کار کرپشن میں ملوث تھے۔ اس حوالے سے دبئی قونصلیٹ کے سی جی محمد حسین سے بھی میری دو دفعہ بات ہوئی ہے۔ وہ کافی ذمہ دار سفارت کار ہیں اور اس معاملے پر انہوں نے ایک تین رکنی کمیٹی بھی بنائی ہے۔تاہم اس موضوع پر کچھ مزید تحقیق کی ضرورت ہے، جس پر کسی اگلی نشست میں بات ہو گی۔

حج کی فرضیت اور اہمیت قرآن و حدیث میں بڑی واشگاف الفاظ میں بیان ہوئی ہے۔ قرآن مقدس میں اللہ پاک نے حکم دیا یے: ’’جو استطاعت رکھے اس پر اس گھر کا حج فرض ہے اور جو کوئی انکار (کفر) کرے تو اللہ عالم والوں سے بے پرواہ ہے‘‘ ( آل عمران:۹۷)۔ اسی طرح ایک حدیث شریف کے مطابق نبی کریم ﷺ نے فرمایا کہ، ’’اسلام کی بنیاد پانچ چیزوں پر ہے۔ توحید و رسالت، نماز کا قیام، زکوٰۃ کی ادائیگی، حج کرنا اور رمضان کے روزے رکھنا‘‘

یوں حج کرنا اسلام کے بنیادی فرائض میں شامل ہے مگر اس کے لیئے جہاں اسطاعت رکھنا لازم ہے وہاں مکمل طور پر صحتمند اور سفر کے قابل ہونا بھی ضروری ہے۔ بہت سے مسلمان مکہ اور مدینہ میں دفن ہونے کی خواہش کرتے ہیں مگر وہاں مرنے کی تمنا کرنا برحق نہیں ہے۔ اللہ پاک ہم سب کو دین اسلام کو سمجھنے اور اس پر عمل کرنے کی توفیق عطا فرمائے۔

عرب ممالک کی دفاعی ترجیحات

ممکن ہے کہ اپنے ملکی دفاع کے حوالے سے قطر پر 10 اکتوبر کا اسرائیلی حملہ خلیجی برادر مسلم ممالک کی آنکھیں کھول دے۔ ملکی دفاع کا معاملہ خالصتا خودانحصاری کا تقاضا کرتا ہے۔ اگر دفاع کے انتظامات اور انہیں آپریٹ کرنے کا اختیار اور کنٹرول آپ کے یا آپ کے سچے خیرخواہوں کے ہاتھ میں نہ ہو تو یہ دفاعی نظام خواہ جتنا بھی مہنگا اور جدید ترین ہو وہ آپ کی ملکی سلامتی اور خودمختاری کی ضمانت فراہم نہیں کر سکتا ہے۔

قطری حکومت نے اپنے فضائی دفاع کے لیے 19 ارب ڈالرز کی لاگت سے دنیا کے جدید ترین چار سسٹم خریدے، جس میں امریکی پیٹریاٹ پیک3، ناروے کا ناسامز 2, برطانیہ کا ریپائر اور فرانس و جرمنی کے رولینڈ میزائلز شامل تھے۔ یہ سارا دفاعی نظام قطر نے برادر دوست ملک پاکستان، چین یا روس سے خریدنے کی بجائے مغربی ممالک سے خریدنے کو ترجیح دی۔ جب اسرائیل نے حملہ کیا تو دنیا کے اس قیمتی ترین دفاعی نظام کے یہ سارے خطرناک میزائل قطر کے دارالحکومت دوحہ کے "العدید ائیربیس” پر موجود تھے، مگر یہ سارے کا سارا دفاعی نظام اسرائیلی حملے کے سامنے ریت کی دیوار ثابت ہوا۔ اسرائیلی حملے کو انٹرسییپٹ نہ کرنے کی وجہ یہ نہیں تھی کہ اسرائیلی حملہ آور جہاز اس نظام سے زیادہ جدید اور طاقتور تھے، بلکہ اس کی وجہ یہ تلخ حقیقت ہے کہ اس کا سارا کنٹرول محب وطن قطریوں کی بجائے اسرائیل نواز امریکی فوجیوں کے پاس تھا جنہوں نے اس نظام کو متحرک کرنے کی بجائے غیرفعال کر دیا۔

اسرائیل کے چینل14 نے رپورٹ کیا کہ دوحہ قطر میں حماس کی قیادت پر حملے کے لیے منگل کو 10اسرائیلی طیاروں نے اُڑان بھری۔ ان کا ہدف 18سو کلومیٹر دور تھا۔ ایک برطانوی ہوائی آئل ٹینکر نے دوحہ سے ہی ٹیک آف کیا اور اسرائیلی لڑاکا طیاروں کو دورانِ پرواز ایندھن فراہم کر کے واپس قطر اتر گیا۔ ستم ظریفی دیکھئے اور قطر کی بے بسی ملاحظہ کریں کہ قطر پر حملے کے لیے برطانوی آئل ٹینکر قطر سے اڑا اور واپس قطر میں ہی لینڈ کر گیا۔ جبکہ اسرائیل کے دس F-35 لڑاکا طیارے جس فضائی حدود سے پرواز کرتے ہوئے قطر میں دوحہ پر حملہ آور ہوئے تھے حملے کے بعد وہ اسی فضائی راستے سے ہوتے ہوئے اسرائیل میں اتر گئے، اور واپسی کے سفر میں امریکی آئل ٹینکر طیاروں نے اسرائیلی لڑاکا طیاروں کو فضا میں ایندھن فراہم کیا۔

اسرائیلی حملے میں امریکہ اور برطانیہ سے قطر کی دیرینہ دوستی کی ایفائے عہد و وفا کی یہ تازہ ترین مثال ہے۔ لیکن اسے قطر کی سادہ دلی سمجھیں یا کوئی دوسری مجبوری قرار دیں، قطری حکام نے پلٹ کر اسرائیل پر حملہ کرنے کی بجائے امریکی صدر ڈونلڈ ٹرمپ سے ملاقات کی ہے اور اقوام متحدہ کا دروازہ کھٹکھٹایا ہے۔ قطر کی اس حکمت عملی کا جو بھی نتیجہ نکلے گا اس کا دارومدار مشرق وسطی میں قیام امن سے بلکل نہیں ہو گا۔ بلکہ اس واقعہ سے یہ حقیقت روز روشن کی طرح واضح ہو گئی ہے کہ قطر کی طرح دیگر خلیجی ممالک کا وہ دفاعی نظام بھی اسرائیل کے خلاف بے کار ثابت ہو گا جس کا دارومدار امریکی ہتھیاروں پر ہو گا۔

قطر کے علاوہ تقریبا تمام بڑے عرب ممالک کے دفاع کا نظام امریکی اسلحہ سے لیس ہے۔ لیکن ان مبینہ ممالک کے ایئر ڈیفیس کی تلخ حقیقت بھی یہ ہے کہ اس کو آپریٹ کرنے کا اختیار اور کنٹرول خود عرب ممالک کے پاس نہیں ہے۔ جیسا کہ قطر کا دنیا کا جدید ترین دفاعی نظام اسرائیلی حملہ آور جہازوں کے سامنے ڈھیر ہوا ہے، اب دیگر عرب ممالک کو بھی خطرہ لاحق ہے کہ اگر کل کلاں اسرائیل (ایران یا یمن) ان پر حملہ کرتا ہے تو ان کا دفاعی نظام بھی اسی طرح کا "مخالفانہ ردعمل” دے گا۔

دوحہ پر اسرائیلی حملے نے خلیجی ممالک کے امریکہ پر اعتماد کو متزلزل کیا ہے۔ اگر سعودی عرب نے امریکہ سے دفاعی معاہدے کی کوششیں روک دیں، تو دیگر ممالک مثلا متحدہ عرب امارات، اومان، کویت اور بحرین وغیرہ بھی اس کی پیروی کریں گے۔

مزید افسوسناک امر یہ ہے کہ دوحہ پر حالیہ حملہ امریکی صدر ڈونلڈ ٹرمپ کی اشیر باد سے ہوا۔ حملے کے فورا بعد اسرائیلی وزیراعظم نے حماس کی قیادت کو نشانہ بنانے کے لیئے دوبارہ حملے کی دھمکی دی جس کی تائید میں امریکی صدر نے بھی حماس کو ختم کرنے کی بات کی۔ یہ وہی ٹرمپ ہیں جنہوں نے چند ماہ قبل ہی قطری حکمرانوں سے ایک قیمتی جہاز کے تحفے سمیت 1.2 ٹریلین ڈالر قطر کے دفاع کی مد میں وصول کیے تھے اور بظاہر دوستی کے وعدے کیے تھے۔ لیکن جب عملی وقت آیا تو نہ اربوں ڈالر کا دیا گیا اسلحہ قطر کے کام آیا، اور نہ ہی اربوں کا سرمایہ امریکی حمایت خرید سکا۔

تاریخی حقائق کی بنیاد پر تجزیہ کیا جائے تو پتہ چلتا ہے کہ اگر قطر جیسی دولت مند ریاست، جو امریکہ کو مہنگے ترین تحائف اور کھربوں ڈالر کی سرمایہ کاری دے چکی ہے، پھر بھی اس کا اعتماد حاصل نہیں کر سکی تو اس کی وجہ محض مفاد نہیں، بلکہ اس کی اصل حقیقت یہ ہے کہ امریکہ اور اسرائیل کے تعلقات کسی وقتی مصلحت یا لین دین پر قائم نہیں، بلکہ ایک گہرے "عقیدے” اور "نظریئے” کے رشتے پر استوار ہیں۔ بدقسمتی یہ ہے کہ ہم مسلمان ابھی تک یہ بنیادی حقیقت سمجھنے میں ناکام ہیں۔ حالانکہ اس کا ذکر قرآن پاک میں بھی موجود ہے جس کا مفہوم یہ ہے کہ یہودی و نصاری تمھارے دوست نہیں ہو سکتے ہیں۔ پاکستان اس لحاظ سے عرب ممالک کے زیادہ قریب ہے اور ان کی حفاظت کی ذمہ داری بھی بحسن خوبی نبھا سکتا ہے۔ ممکن ہے اس دفعہ قطر پر اسرائیلی حملہ ان کی آنکھیں کھول دے۔

اسرائیل کا کہنا ہے کہ دوحہ میں ایک کمپلیکس پر حملہ ’درست‘ تھا۔ اس رہائشی سکیم میں حماس کی مذاکراتی ٹیم موجود تھی۔ اسرائیلی وزیراعظم بنیامین نیتن یاہو کے مطابق حماس کی قیادت پر حملہ دو روز قبل یروشلم میں 6 افراد کے قتل اور 7 اکتوبر 2023 کو اسرائیل پر حملے کے جواب میں کیا گیا تھا۔ قطر میں حماس کی قیادت پر اسرائیلی حملے نے خطے میں کشیدگی کو خطرناک حد تک بڑھا دیا ہے اور تجزیہ کاروں کا ماننا ہے کہ اس نے نہ صرف غزہ میں جنگ بندی کی کوششوں کو تباہ کیا ہے بلکہ اس سے مشرقِ وسطیٰ میں امریکہ کے کسی نئے اتحاد کے امکانات بھی مانند پڑ گئے ہیں۔

قطر کے العدید ائیربیس کا مکمل کنٹرول امریکی فوجیوں کے پاس ہے۔ سوال یہ ہے کہ قطر نے یہ فوجی اڈا ایران کے خطرے کے باعث امریکہ کے حوالے کیا تھا ناکہ اس کا مقصد اسے اسرائیل کے خلاف بے اثر کرنا تھا۔ قطر سمیت دوسری بہت سی خلیجی قوتیں اب تک امریکہ کے ساتھ کھڑی تھیں اور امریکہ پہلے بھی سیہونی اسرائیل کے ساتھ کھڑا تھا اور اس وقت تک کھڑا رہے گا جب تک عرب ممالک اپنی دفاعی ترجیحات بدلنے کے لیئے سنجیدہ نہیں ہوتے ہیں۔