Tag: انگریزی

آخر پاکستانی کھلاڑیوں کو سر کا خطاب کیوں نہیں ملتا ؟

تحریر محمد ذیشان بٹ
برطانیہ وہ عظیم سلطنت ہے جس نے پوری دنیا کو دو چیزیں ضرور دیں: ایک انگریزی زبان، اور دوسرا ’سر‘ کا خطاب۔ پہلا تو سب نے زبردستی سیکھ لیا، لیکن دوسرے کے لیے اب تک صرف وہی اہل ٹھہرے ہیں جن کے پاس یا تو ولایتی پاسپورٹ ہو، یا ولایتی واسطہ۔ باقی سب خواہ جتنے مرضی چھکے مار لیں، جتنے مرضی ورلڈ کپ جتوا دیں، ان کے حصے میں صرف واہ واہ ہی آئے گی، ’سر‘ کبھی نہیں۔

کرکٹ کی دنیا میں پہلا ’سر‘ جس نے ہم جیسے ناتمام کھلاڑیوں کی نیندیں اڑا دیں، وہ کوئی اور نہیں بلکہ خود سر ڈان بریڈمین تھے۔ جی ہاں، وہی آسٹریلوی جن کی بیٹنگ دیکھ کر گیند بازوں نے نوکری چھوڑ کر بیکریاں کھول لیں۔ انہوں نے 99.94 کی اوسط سے رنز بنا کر یہ ثابت کیا کہ بعض انسان دنیائے فانی میں بھی افسانہ بن سکتے ہیں۔ بادشاہ سلامت نے سوچا کہ ایسا بلے باز تو شاید اگلی صدی میں بھی پیدا نہ ہو، چنانچہ جھٹ سے تلوار نکالی اور ’سر‘ کا خطاب دے مارا۔

پھر یہ روایت چل نکلی۔ ویسٹ انڈیز والوں نے بھی کمال کر دکھایا۔ سر گارفیلڈ سوبرز، سر ویو رچرڈز، سر کلائیو لائیڈ، سر کرٹلی ایمبروز — گویا پوری ٹیم ہی ’سر‘ ہو گئی۔ ایک وقت تو ایسا بھی آیا کہ گیند باز وسیم اکرم نے کہا، “یار انگریز بلے بازوں سے نہیں، ان کے خطابوں سے ڈر لگتا ہے۔”

ادھر نیوزی لینڈ نے بھی اپنی قسمت آزمائی اور سر رچرڈ ہیڈلی کو آگے کر دیا۔ یہ وہ دور تھا جب صرف تیز گیند، سوئنگ اور ایک آدھ ہیٹ ٹرک کافی تھی ’سر‘ بننے کے لیے۔

پھر آیا انگلینڈ کا دور، جس میں سر ایان بوتھم، سر ایلکس اسٹیورٹ اور بعد میں سر ایلسٹر کک بھی شامل ہوئے۔ اب کک صاحب کو ’سر‘ بننے پر مرغی فروشوں نے خاص رعایت دی کیونکہ ان کا نام ہی کُک تھا، اور ’سر کک‘ کہنے میں جو مزہ ہے، وہ شاید ’سر تنویر‘ یا ’سر بشیر‘ میں نہیں۔

لیکن آئیے اب بات کریں برصغیر کی، جہاں سچن ٹنڈولکر کا نام سن کر بچے بھاگ کر بیٹ لینے لگتے تھے اور گیند باز بھاگ کر ویزا اپلائی کرنے۔ اگر ٹنڈولکر برطانوی ہوتے، تو یقینی طور پر ’سر‘ بننے کے بعد بکنگھم پیلس کے لان میں کرکٹ سکھا رہے ہوتے۔ لیکن کیا کریں، بندہ بھارتی ہے، سو صرف ’بھارت رتن‘ پر گزارا کرنا پڑا۔

اسی طرح وسیم اکرم، جس کی سوئنگ پر ابھی بھی ہوا کا دباؤ بگڑ جاتا ہے، اگر برطانوی ہوتا تو ’سر وسیم‘ بن کر لندن کی پارلیمنٹ میں ’’ریورس سوئنگ پر لیکچر‘‘ دے رہا ہوتا۔ لیکن چونکہ وہ پاکستانی ہے، تو اسے صرف کرکٹ بورڈ سے معطلی، سیاسی تجزیے، اور وکٹوں کی یادگاریں ہی ملی ہیں، ’سر‘ نہیں۔

اب سوال یہ ہے کہ آخر ایشیائیوں کا کیا قصور ہے؟ کیا ’سر‘ کا خطاب لینے کے لیے وکٹ کے ساتھ پاسپورٹ بھی برطانوی ہونا ضروری ہے؟ کیا چھکا لگانے کے بعد ’God Save The King‘ گانا بھی گانا لازمی ہے؟ اگر ایسا ہے تو ہمیں کرکٹ نہیں، انگریزی جھنڈا پکڑ کر چائے بیچنی چاہیے۔

دلچسپ بات یہ ہے کہ کچھ کھلاڑیوں کو "Honorary Knighthood” بھی دیا گیا، جیسے سچن ٹنڈولکر کو۔ لیکن مزے کی بات یہ ہے کہ وہ ’سر‘ نہیں کہلا سکتا، کیونکہ قانون کہتا ہے: "اگر تم ولایتی نہیں، تو تم صرف اعزازی ہو، باقاعدہ ’سر‘ نہیں!” یعنی خطاب بھی دیا، مگر استعمال کی اجازت نہیں۔ یہ کچھ ایسا ہی ہے جیسے بچے کو آئسکریم دے کر کہنا: "دیکھ تو سکتا ہے، کھا نہیں سکتا۔”

اب تک آخری کھلاڑی جسے ’سر‘ بنایا گیا، وہ سر ایلسٹر کک ہے — ایک شریف النفس اوپنر، جس کی بلے بازی بھی چائے کی پیالی کی طرح دھیمی مگر پائیدار تھی۔ اس کے بعد کچھ اور انگلش کھلاڑیوں کے نام زیرِ غور ہیں، لیکن کوئی ایشیائی فہرست میں نہیں۔ ہم لوگ بس تماشائی ہیں، جھاڑو دے کر ’سر‘ کہنے والے، اور وہ خطاب لے کر ’سر‘ بننے والے۔

آج بھی اگر کوئی پاکستانی بچہ اپنے نام کے آگے ’سر‘ لگائے، تو استاد کہتا ہے، “پہلے ہوم ورک تو مکمل کر لے، پھر ’سر‘ بننا!”

تو صاحبو، بات سیدھی سی ہے، کرکٹ تو کھیل سکتے ہو، دل بھی جیت سکتے ہو، لیکن ’سر‘ بننے کے لیے یا تو ولایتی ہو، یا ولایتیوں کے خاص بندے ہو۔ ہم تو بس یہی دعا کر سکتے ہیں کہ کبھی کسی دن عمران خان، ٹنڈولکر، سنگاکارا اور وسیم اکرم کے اعزاز میں کوئی ’عالمی سر کانفرنس‘ ہو، اور تب یہ سب بغیر پاسپورٹ کے ’سر‘ کہلائیں۔

جب تک ایسا نہیں ہوتا، ہم اپنے دل سے بس یہ کہتے رہیں گے:
سر! معاف کیجیے، ہم ابھی بھی پاکستانی ہیں۔

حسن نصیر سندھو:طنز و مزاح کا ایف 16

ڈاکٹر رحمت عزیز خان چترالی٭

(ورلڈ ریکارڈ ہولڈر)

rachitrali@gmail.com

حسن نصیر سندھوطنزیہ و مزاحیہ تحریریں لکھتے ہیں بہت اچھا لکھتے ہیں آپ کی تحریر قارئین کے چہرے پر مسکراہٹ لاتی ہے، آپ طنز و مزاح کے ایف 16 ہیں۔ آپ نے اپنی دلچسپ تحریر ”ماں بولی پنجابی” میں پنجابی زبان کی اہمیت اور اس کی چاشنی پر روشنی ڈالی ہے، آپ کی یہ تحریر ایک دلکش، طنزیہ، اور جذباتی انداز میں پنجابی زبان کی وکالت کرتی ہے۔ اس تحریر میں نہ صرف پنجابی زبان کی خوبصورتی کو اجاگر کیا گیا ہے بلکہ اس کے مقابلے میں انگریزی اور اردو کے استعماری اثرات کو بھی طنز کا نشانہ بھی بنایا گیا ہے۔حسن نصیر سندھو لکھتے ہیں”جیتے جی اگر اپنی ماں بولی پنجابی کے حسن پر نہ لکھا تو پھر کیا لکھا۔ اگرچہ میں بھی ان مظلوم بچوں میں سے تھا، جنہیں بچپن سے ہی یہ وہم دل میں ڈال دیا جاتا ہے، کہ اردو اور انگلش بولنے والے ہی صرف تہذیب یافتہ ہوتے ہیں اور پنجابی بولنے والے پینڈو۔ جب کہ میرے نزدیک پنجاب کا مطلب ہی یہ ہے، کہ پنجابی بولنے والوں کا علاقہ۔ خیر جب ہم ایف سی کالج لاہور گیارہویں جماعت میں ہاسٹل میں رہنے کے لیے گئے، تو مختلف علاقوں اور دیہاتوں سے آئے گبرو جوانوں کی پنجابی سن کر اس زبان کے گرویدہ ہو گئے۔اور پنجابی باقاعدہ سیکھی۔ اور اب عادت یہ ہے، کوئی انگلش میں بھی بات کر رہا ہو، تو جواب ہمارا پنجابی ہی ہوتا ہے۔ شروع شروع میں لاہور کی لڑکیوں نے ہمیں پینڈو پینڈو کہہ کر مجھے اور مجھ جیسوں کو احساس کمتری کا شکار کرنے کی کوشش ضرور کی، پر انہیں منہ کی کھانی پڑی، کیونکہ ہم لڑکوں میں اس احساس نامی چیز کی کمی اور oucre سے سفید لٹھا کا سیلا سوٹ اور بوٹس کی لمبے منہ والی جوتی پہننے کی لگن زیادہ تھی”۔

تحریر کا آغاز مصنف کے ذاتی تجربات سے ہوتا ہے جہاں وہ اپنے بچپن کے اُن لمحات کا ذکر کرتے ہیں جب پنجابی بولنے والے بچوں کو احساس کمتری کا شکار بنایا جاتا تھا۔ اس بیان سے وہ معاشرتی تعصب کو نمایاں کرتے ہیں جو مقامی زبانوں کے خلاف عام ہے۔ مصنف کا کہنا ہے کہ "پنجابی بولنے والے پینڈو” تصور کیے جاتے ہیں، اس بات کا غماز ہے کہ ہماری تہذیبی شناخت پر بیرونی اثرات نے کیسا گہرا اثر ڈالا ہے۔ حسن نصیر رقمطراز ہیں ” پنجابی میں ہم oh my God نہیں کہتے،بلکہ اپنے سینے پر ہاتھ مار کر ہائے او میرے ربا بولتے ہیں۔ پنجابی میں ہم Are you happy now نہیں بولتے کتے بلکہ بولتے ہیں ” پے گئی ہن تھنڈ کلیجے نوں” ۔

پنجابی میں ہمbuzz off نہیں بولتے بلکہ منہ کو تھوڑا سا اوپر کر کے "در فٹے منہ” بولتے ہیں۔ پنجابی میں ہم Get off my back نہیں کہتے،بلکہ اپنے دائیں ہاتھ کو ہوا میں نچاں کر کہتے ہیں "جا مگروں وی لے جا”۔ پنجابی میں ہم To each their own نہیں کہتے، بلکہ سکھ کا سانس لیتے ہوئے کہتے ہیں "سانوں کی”۔ ایک دوسرے سے ملتے ہیں پنجابی میں ہم what’s upنہیں کہتے، بلکہ "ہور کوئی نوی تازی سنا ویرا ” کہتے ہیں۔”

حسن نصیر سندھو نے پنجابی اور انگریزی/اردو کے عام الفاظ اور جملوں کا دلچسپ تقابل کیا ہے، جو تحریر کو دلکش اور مزاحیہ بناتا ہے۔ مثلاً:”Oh My God” کے مقابلے میں "ہائے او میرے ربا”، "Get off my back” کے بدلے "جا مگروں وی لے جا”، "Social distancing” کو "پراں مر” سے بدلنا، یہ مثالیں نہ صرف پنجابی زبان کے جاندار اور فطری اظہار کی عکاس ہیں بلکہ زبان کی ثقافتی جڑوں کو بھی اجاگر کرتی ہیں۔ مصنف نے یہ واضح کیا ہے کہ پنجابی اپنی منفرد مٹھاس اور طنز کے ذریعے انسانی جذبات کو زیادہ قریب سے بیان کرتی ہے۔ مصنف لکھتے ہیں ” پنجابی میں ہم Behave yourself نہیں کہتے بلکہ "بندے دا پتر بن جا” کہتے ہیں۔ پنجابی میں ہم That’s more than sufficient نہیں کہتے،بلکہ "جناب ہور کی چاہیدا” کہتے ہیں۔پنجابی میں ہم All the bestنہیں کہتے بلکہ پورے مان کے ساتھ بولتے "او چک دے پھٹے”۔ پنجابی میں ہم Get out نہیں بولتے بلکہ سادگی سے بولتے "دفع ہوجا” ۔ پنجابی میں ہم Leave it be نہیں بولتے مجھے بلکل کہ معاملے کو ختم کرنے کے لیے بقول مسلم لیگ ق کے صدر چوہدری شجاعت حسین "مٹی پاؤ جی” کہتے ہیں۔

پنجابی میں ہم Mind your own business نہیں کہتے بلکہ ہم آنکھوں میں آنکھیں ڈال کر کہتے ہیں "تینوں کی”۔ پنجابی میں ہم Welcome نہیں بولتے بلکہ دونوں بازو اور سینہ کشادہ کر کے "جی آیاں نوں” بولتے ہیں۔ پنجابی میں ہم Social distancing نہیں بولتے بلکہ پیار سے بولتے ہیں "پراں مر”۔ اور بقول پاکستانی فلم سٹار میرا ہم Kill the waves نہیں کہتے بلکہ "موجاں مار” کہتے ہیں۔”

مصنف نے زبان کے ذریعے تہذیبی شناخت کو اجاگر کرنے کی کوشش کی ہے۔ وہ بتاتے ہیں کہ کس طرح پنجابی بولنے والے نوجوانوں کو معاشرتی سطح پر کمتر سمجھا گیا، لیکن انہوں نے اس احساس کو اپنی زبان سے محبت میں بدل دیا۔ لاہور کی لڑکیوں کے "پینڈو” کہنے پر طنزیہ ردعمل اور خود کو پنجابی زبان کے لیے وقف کرنا ایک مضبوط پیغام ہے کہ اپنی جڑوں سے جڑے رہنا کتنا ضروری ہے۔حسن نصیر لکھتے ہیں ” ہم چھوٹے بچے کو Baby بےبی نہیں بولتے بلکہ کا بولتے ہیں اور لڑکیوں کی تعریف کے لیے Such a Gorgeous lady نہیں بولتے بلکہ "دودھ تے مکھن نال پلی مٹیارے” بولتے ہیں۔
اگر یہ تحریر پڑھ کر آپ کو سمجھ آئی ہے یا نہیں آئی۔ پر اگر اپکے دل کو لگی تو سمجھ لیں آپ کے اندر بھی ایک چھوٹا سا پینڈو زندہ ہے اس لئے ہم آپ کو Congratulate نہیں کہتے بلکہ تہانوں ودھائی ہو کہتے ہیں۔اور اگر آپ کو مزہ نہیں آیا تو ہم پنجابی لوگ ہیں ہمیں جتنا مزہ یہ کہنے میں آتا ہے کہ "میری جوتی نو وی پرواہ نہیں” اتنا I don’t care کہنے میں نہیں آتا۔”

حسن نصیر سندھو کا اندازِ بیان دلکش اور طنزیہ ہے۔ وہ قاری کو ہنساتے ہوئے ایک اہم معاشرتی پیغام بھی دیتے ہیں۔ پنجابی زبان کی اصطلاحات اور انگریزی جملوں کے مابین فرق کو مزاحیہ انداز میں پیش کرنا قاری کو غور و فکر کرنے پر مجبور کرتا ہے کہ کیوں ہم اپنی زبان کو کمتر سمجھتے ہیں۔

خلاصہ کلام یہ ہے کہ حسن نصیر سندھو کی یہ تحریر صرف پنجابی زبان کی وکالت نہیں کرتی بلکہ ہر مقامی زبان کے تحفظ اور فروغ کی ضرورت پر زور دیتی ہے۔نصیر سندھو نے اپنی ماں بولی کے حسن کو اس خوبصورتی سے پیش کیا ہے کہ قاری اپنے اندر کے "پینڈو” کو زندہ محسوس کرتا ہے اور اپنی زبان سے محبت کا ایک نیا پہلو دریافت کرتا ہے۔ تحریر کا سب سے اہم پہلو یہ ہے کہ یہ قاری کو نہ صرف ہنساتی ہے بلکہ سوچنے اور غور و فکر کرنے پر بھی مجبور کرتی ہے کہ زبان صرف الفاظ کا مجموعہ نہیں بلکہ تہذیب اور ثقافت کی زندہ تصویر ہے۔

( پاکستان کا مرثیہ )

تحریر :

سیدزادہ سخاوت بخاری

یوں تو پاکستان میں کئی علاقائی بولیاں بولی جاتی ہیں لیکن اردو ہماری قومی زبان اور لسانی پہچان ہے ۔ اس کا جنم مغل شہنشاہ شاہ جہان کے زمانے میں دلی میں ہوا اور بقول محمود خان شیرانی ، اردو دلی میں جنمی ، اترپردیش میں بیاہی گئی اور اب بڑھاپا پنجاب میں کاٹ رہی ہے ۔ یہ بات درست ہے یا غلط ، اس بحث میں الجھے بغیر ماننا پڑے گا کہ دنیاء کی قدیم زبانوں کے مقابلے میں اس نوزائیدہ زبان نے جملہ اصناف ادب ، نثر و نظم میں ایسے ایسے روشن ستارے پیدا کئے کہ جو ابدی کہکشاؤں میں ضم ہوجانے کے باوجود آج بھی دنیائے اردو کے آکاش پر جگمگ جگمگ کرتے نظر آتے ہیں ۔

اگر شعراء کی بات کی جائے تو اس زبان کے اولین شعراء ، ولی دکنی اور سراج اورنگ آبادی سے غالب ، میر اور اقبال تک ایک طویل فہرست بنتی ہے ، کہ جن کا کلام اردو ادب کا اثاثہ ہے ، لیکن اس میدان میں کچھ ایسے شاہسوار بھی وارد ہوئے جو آندھی کی طرح آئے اور بگولہ بن کر نظروں سے اوجھل ہوگئے ۔ میرا اشارہ ان شاعروں اور ادیبوں کی طرف ہے جو عین جوانی میں یا جوانی کی طرف قدم بڑھاتے ہوئے اس دار فانی سے رخصت ہوگئے ۔  اگرچہ یہ لوگ اساتذہ کے درجے پر فائز نہیں لیکن اس قلیل مدتی زندگی میں انہوں نے جو نقوش شاہراہ اردو ادب پر ثبت کئے ، انمٹ اور انمول ہیں ۔ سعادت حسن منٹو جیسا شہنشاہ افسانہ نگاری اور انوکھی طرز تحریر کا مالک وقت سے بہت پہلے چل تو دیا لیکن ہمارے لئے عقل و خرد اور معاشرے کے ضمیر کو جھنجھوڑ دینے والی ایسی تحریریں چھوڑ گیا کہ اگر ہم ان پر غور کریں تو بہت ساری گھتھیاں سلجھ سکتی ہیں ۔  ۔ اس دیوتا نے تو کسی طرح زندگی کی پانچویں دھائی میں قدم رکھ ہی لیا تھا جبکہ ملتان کا آنس معین ابھی بارھویں جماعت میں ہی تھا کہ سکھر کے ایک مشاعرے میں جب اس نے اپنا یہ شعر پڑھا ،

” ممکن ہے کہ صدیوں بھی نظر آئے نہ سورج

اس بار اندھیرا میرے اندر سے اٹھا ہے "

تو ، صدر مشاعرہ حضرت جوش ملیح آبادی نے اٹھ کر اس کے ماتھے کو چوما اور سامعین سے مخاطب ہوکر کہا اس بچے کا خیال رکھنا ، وقت سے پہلے اس دنیاء میں آگیا ہے اور پھر کچھ ہی عرصے بعد اس بچے نے ٹرین کے نیچے لیٹ کر خود کشی کرلی ۔ بات یہیں پر ختم نہیں ہوتی بلکہ آج کے مضمون کا عنوان بھی ایک ایسے ہی جوہر قابل کی شاعری سے منتخب کیا ہے کہ جو فقط 32 برس اس دنیاء میں مقیم رھا ۔

شکیب جلالی بدایوں کا رہنے والا تھا  ہجرت کرکے پاکستان آگیا ۔ پنڈی اور لاھور سے ہوتا ہوا سرگودھا پہنچا اور آنس معین ہی کی طرح نوعمری میں ریل کے آگے لیٹ کر جان دیدی ۔

اس جوانمرگ شاعر کو اہل ادب تو جانتے ہیں لیکن عام آدمی کو علم نہیں کہ نصرت فتح علی خان مرحوم کی گائی ہوئی جس غزل پر وہ سر دھنتے ہیں وہ در اصل اسی شکیب جلالوی کا پیغام ہے ۔ اسی غزل کے مطلعے یا پہلے شعر کا دوسرا مصرعہ میرا آج کا موضوع سخن ہے ، شعر ملاحظہ فرمائیں :

” سوچتا ہوں کہ وہ کتنے معصوم تھے

کیا سے کیا ہوگئے دیکھتے دیکھتے "

قارئین کرام !

شاعر اور ادیب کسی بھی معاشرے کا دماغ ہوتے ہیں ۔ فلسفےکی زبان میں انہیں تیسری آنکھ یا

Third Eye of the Society

بھی کہا جاتا ہے ۔ یہ اپنی اضافی خداداد صلاحیتوں کی بدولت وہ کچھ دیکھ لیتے ہیں جو عام آدمی کو نظر نہیں آتا ۔ اس درجے پر فائز لوگ مستقبل بین ہوتے ہیں انہیں پہلے سے علم ہوجاتا ہے کہ آنیوالا وقت کیا پیغام لیکر آرھا ہے ۔

شکیب جلالی نے اپنے شعر میں آج سے کئی برس قبل آج کے پاکستان اور پاکستانیوں کی بات کی تھی ۔ آپ مجھ سے اختلاف کرسکتے ہیں کہ ،  ایسا نہیں بلکہ شکیب نے تو اپنے محبوب کو سامنے رکھ کر شعر کہا ، تو حضور والا چونکہ میرا محبوب ، میرا وطن پاکستان ہے لھذا میں اس شعر کی تشریح موجودہ پاکستان اور اس میں موجود پاکستانیوں کو ہی سامنے رکھ کر کرونگا ۔

کیا یہ حقیقت نہیں کہ تقسیم ہند سے قبل ہماری سیاسی سوچ اتنی پاک صاف اور معصومانہ تھی کی ہم ایک پنجابی اقبال کے سپنے کو حقیت جان کر اس کی طرف لپکے ، کیا ہم واقعی معصوم نہیں تھے جب ایک اثناء عشری شیعہ محمد علی جناح کو قائد مانا ۔ کیا یہ درست نہیں کہ ہم نے کرنال کے ایک نواب کو قائد ملت کا خطاب دیا ۔ کیا ہم نے ایک بلوچ قاضی عیسی کو تحریک پاکستان کا رہبر نہیں مانا ۔ کیا ہم  ایک پٹھان  سردار عبد الرب نشتر کی راھنمائی میں آگے نہیں بڑھے ۔ کیا ہم نے ایک شش امامی اسماعیلی شیعہ کو پاکستان کی خالق جماعت مسلم لیگ کا پہلا صدر منتخب نہیں کیا ۔ ایسی لاتعداد مثالیں اس بات کا ثبوت ہیں کہ ہمارے ذہن اس وقت ان سیاسی غلاظتوں سے ایسے  پاک تھے  کہ ہمارے اندر کوئی شیعہ تھا نہ سنی ، پنجابی تھا نہ کوئی پٹھان ، مہاجر تھا نہ کوئی سندھی ، بلوچ تھا اور نہ کوئی گلگتی یا بلتی بلکہ ہم سب ایک قوم پہ یقین رکھتے تھے اور یہی وہ خوبی اور قوت تھی کہ جس نے ہمیں انگریز اور ہندو کی دوہری غلامی سے نجات دلائی اور یہاں آکر شکیب کے پہلے مصرعے کی تشریح مکمل ہوجاتی ہے جس میں اس نے کہا ،

سوچتا ہوں کہ وہ کتنے معصوم تھے

اور

اب

اگلا مصرعہ

” کیا سے کیا ہوگئے دیکھتے دیکھتے "

قائد اعظم ،  قائد ملت اور تحریک پاکستان کے عظیم راہنماوں کی رخصتی کے بعد ، قوم ، گدھ نماء مردہ خوروں ، چوروں ، ڈاکووں ، لٹیروں ، مفاد پرستوں اور ملک دشمنوں کے نرغے میں آگئی ۔ سب سے پہلا وار  ایک قوم کے نظریئے پر ہوا ۔ بنگالی قومیت کو ہوا دی گئی اور پاکستان بننے کے صرف 25 سال کے اندر آدھا ملک ٹوٹ کر بنگلہ دیش بن گیا ۔ اب یہ کہنا کہ غلطی کس کی تھی ایک لمبی بحث ہے ۔ اس کا مختصر ترین جواب یہ ہے کہ ہم مخلص ،  ایماندار اور محب وطن قیادت سے محروم تھے ورنہ اختلاف کہاں نہیں ہوتا ۔ مغربی پاکستان اور مشرقی پاکستان کا جھگڑا پیدا کرکے ان بنگالیوں سے جان چھڑائی کہ جنہوں نے مسلم لیگ بنائی تھی ۔ اس کام سے فارغ ہوئے تو مغربی پاکستان یا موجودہ ملک میں قومیتوں کے جھگڑے شروع کرادئیے  ۔ سندھی ، پختون ، بلوچی ، سرائیکی اور پنجابی ازم کے بیج بوئے گئے ۔ اس پہ بھی تسلی نہ ہوئی تو مولوی صاحب نے میدان میں آکر کفر کے فتوے بانٹنے شروع کردئے تاکہ جو کسر باقی ہے وہ بھی نکال دی جائے ۔

غور کیجئیے کتنی منظم سازش ہے پاکستان کو کم زور کرنے کی ۔ پہلے لسانی اور علاقائی بنیادوں پر قوم کو بانٹا گیا اور پھر ان لسانی اکائیوں کو مزید ٹکڑے ٹکڑے کرنے کے لئے شیعہ ، سنی ، وھابی ، دیوبندی اور بریلوی کے خانوں میں تقسیم کیا جارھا ہے ۔ اور اب تو نوبت یہاں تک آن پہنچی ہے کہ کھلے عام صحابہ کرام اور اہلبیت اطہار کی شان میں تقریریں کی جارہی ہیں ۔ حالیہ دنوں میں جو امیر یزید زندہ باد کے نعرے لگے ، کیا یہ محض اتفاق ہے ؟

ایسا نہیں بلکہ ایک سوچی سمجھی سازش کے تحت فرقہ وارانہ آگ بھڑکانے کا منصوبہ تیار ہوا ہے تاکہ ملک کو افراتفری اور مکمل انتشار میں دھکیل دیا جائے ۔

صرف یہی نہیں کہ لسانی اور فرقہ وارانہ جنگوں کے منصوبے بنائے جارہے ہیں بلکہ ان کے ساتھ ساتھ  ایک مدت سے پاک فوج کے خلاف انتہائی نفرت انگیز مہم چلائی جارہی ہے تاکہ اگر حالات بگڑیں تو فوج اندرونی اور بیرونی دونوں محاذوں پر ناکام ہو ۔

پاکستانیو !

خدا را دشمن کی ان چالوں کو سمجھو ۔ ہمارے بعض سیاست دان اور کچھ حلوہ خور مُلاں دشمن کی بولی بول رہے ہیں ۔ یاد رکھو مسئلہ عمران خان کا نہیں ، ملک کی سلامتی کا ہے ۔ عمران خان آج ہے کل نہیں ہوگا ۔ ہمیں ملک کی فکر کرنی چاھئیے ۔ لسانی اور مذہبی بنیادوں پر اپنے آپ کو تقسیم مت کرو ۔ اپنی ہی فوج کو گالیاں مت دو ورنہ برا وقت آنے میں دیر نہیں لگتی ۔ کہیں ایسا نہ ہو کہ دشمن کامیاب ہوجائے اور ہم سب معصوم لوگ مہاجر کیمپوں میں بیٹھے ہوں کیونکہ ان جعلی سیاستدانوں نے تو اپنے گھر ، دولت اور آل اولاد سب کو بیرون ملک محفوظ کررکھا ہے اگر ملک ٹوٹا تو برباد عام آدمی ہوگا ۔ میری باتوں پر غور کرو ۔ آذادی اس وقت ملی جب ہم سب صرف مسلمان تھے اور پاکستانی تھے اب اگر اس آذادی کو برقرار رکھنا ہے تو وہی روش اپنانی ہوگی جو تحریک پاکستان کے وقت اپنائی تھی ورنہ ملک گنوا بیٹھوگے اور شکیب جلالی کا یہ مصرعہ یاد آئیگا ۔

” کیا سے کیا ہوگئے دیکھتے دیکھتے "

سیّدزادہ سخاوت بخاری

سرپرست

اٹک ویب میگزین