مقبول ذکی مقبول سے تعارف کچھ سال قبل ہوا ۔ جب انھوں نے قلم کاروں سے انٹرویو کرنے کا ایک سلسلہ شروع کیا ۔ میری خوش نصیبی کہ انھوں نے مجھ سے بھی اس حوالے سے انٹرویو کیا ۔ جو بعد ازاں ان کی کتاب ٫٫ سنہرے لوگ ،، میں شائع بھی ہوا ۔ یہاں سے مقبول ذکی مقبول نے ادبی حلقوں میں اپنی پہچان شاعری کے ساتھ ساتھ نثر نگاری میں بھی بنائی ۔ وہ ادبی دُنیا میں مضمون نگار ، نثر نگار اور شاعر کے طور پر معتبر ہیں ۔
ان کی کئی کتب منظر عام پر آ چکی ہیں ۔ مقبول ذکی مقبول دوستوں کے دوست ہیں وہ دوسروں کو سراہنے کا ہنر خوب جانتے ہیں ۔ ان کی زیرِ نظر کتاب ٫٫ حُسنِ بیان ،، بھی ایسے ہی مضامین پر مشتمل ہے جس میں ادبی شخصیات کو موضوع بنایا گیا ۔
مقبول ذکی مقبول کی ادبی نثر میں گوناگوں خوبیاں پائی جاتی ہیں ۔ ان کی ادبی تخلیقات میں ایک ایسی طاقت پوشیدہ ہے جو محض کلمات کا امتزاج نہیں بل کہ معنی و جمال کا رنگ بکھیرتی ہے ۔ ان کی ہر سطر میں تحقیقی سوچ نے لفظ کا خلعت پہنا ہے اور ہر جملہ ایک مضمون کی طرح تنقیدی غور و فکر کی قید و بند سے آزاد ہوتا ہے ۔ ان کے نثر پاروں میں الفاظ کا وزن ایسا ہے کہ ہر ترکیب ایک فلسفہ اور تنقید کا اثاثہ بن جاتی ہے اور مطالعہ ایک محققانہ سراغ رسانی میں تبدیل ہو جاتا ہے ۔
ان کی تحریر میں ادبیت و روشنی ایسی ہم آہنگ ہے کہ تحقیق و تنقید کے دونوں رخ بہ خوبی منور ہوتے چلے جاتے ہیں ۔ محض احساس و تصور نہیں بل کہ استدلال و استناد کی قوت بھی کلمات کا حصّہ ہوتی ہے اور یہی موازناتی بصیرت ان کی نثر نگاری کی خاص پہچان ہے ۔ الفاظ اپنی تمام کشش و طاقت کے ساتھ محقق کے تذکرہ و تفحص کا آلہ بنتے ہیں اور حقائقِ مرئی و غیر مرئی کے درمیان رابطے کا سکوں بخش ذریعہ فراہم کرتے ہیں ۔
قارئین جانتے ہیں کہ مقبول ذکی مقبول کا نثری اسلوب وہ زریں مسند ہے جہاں تحقیقی شعاعیں الفاظ کے عمائم میں سرفراز ہوتی ہیں اور قاری کو تصدیق و تجزیے کے سنجیدہ سفر پر گام زن کرتی ہیں ۔ ایک ایسی نثر جوبہ ذاتِ خود تحقیقی مضمون بن کر پیش ہوتی ہے ۔
مقبول ذکی مقبول کی نثر کا سب سے بڑا وصف یہ ہے کہ پڑھنے والے کو جملے کا بہاؤ کبھی نہیں رکنے دیتا ۔ جملوں کی ساخت سادہ مگر بامحاورہ ہوتی ہے اس لیے عام قاری بھی لطف لیتا ہے اور سنجیدہ قاری بھی گہرائی محسوس کرتا ہے ۔وہ غیر ضروری طوالت سے گریز کرتے ہیں ۔ کم الفاظ میں زیادہ بات کہنے کا ہنر اُن کی نثر کا خاصہ ہے لیکن اس اختصار میں معانی کا خلا پیدا نہیں ہوتا ۔
ان کے جملوں میں الفاظ ایسے برتے جاتے ہیں کہ قاری کے ذہن میں منظر واضح ہو جائے چاہے وہ کسی شہر کی گلی ہو ، کسی انسان کی حالت یا کسی سماجی المیے کا پس منظر لفظ تصویریں بناتے ہیں ۔
اگرچہ وہ سنجیدہ موضوعات پر لکھتے ہیں مگر جہاں موقع ہو وہاں ہلکا سا طنز یا لطیف مزاح شامل کر کے نثر کو بوجھل ہونے سے بچا لیتے ہیں ۔ یہ مزاح کا تاثر کبھی پھکّا نہیں ہوتا بلکہ ادبی وقار برقرار رکھتا ہے ۔ان کی تحریر میں روزمرہ اور محاورے نہایت برجستگی سے استعمال ہوتے ہیں جس سے نثر میں جان آجاتی ہے ۔ بعض جگہ وہ کلاسیکی الفاظ کا بھی ایسا برمحل استعمال کرتے ہیں کہ نثر میں قدامت اور جدت دونوں کا توازن قائم رہتا ہے ۔
ان کے مضامین میں محض بیان نہیں بل کہ ایک فکری زاویہ بھی ہوتا ہے ۔ قاری کو تحریر ختم کرنے کے بعد سوچنے پر مجبور کر دینا اُن کے فن کی اہم کام یابی ہے ۔
مقبول ذکی مقبول موقع و محل کے مطابق سنجیدہ ، شگفتہ ، علامتی یا بیانیہ اسلوب اختیار کر سکتے ہیں ۔ یہی ان کے اسلوب کو تازگی اور تنوع عطا کرتا ہے ۔
حسبِ سابق امسال بھی ضلع بھکر کا نظم و نثر اور جملہ ادبی سرگرمیوں کا اجمالی جائزہ شائقین و قارئینِ ادب کی بارگاہ میں بہ صد خلوص و احترام پیشِ خدمت ہے ۔ جس سے باآسانی گزشتہ سالوں سے موازنہ ہو پائے گا ۔ کہ یہ سال ادبی حوالے سے کیسا رہا ۔
سرائیکی شاعر استاد الشعراء سئیں نذیر احمد نذیر ڈھالہ خیلوی ، محلہ سردار بخش بھکر شہر میں رہتے ہیں ۔ آپ سکول آف تھاٹ کا درجا رکھتے ہیں ۔ گزشتہ سال کی طرح 2024ء میں بھی آپ کی رہائش گاہ ( ڈیرہ کاکا خیل) پر شعراء و ادباء کا آنا جانا لگا رہا ہ ۔ شان دار ادبی نشستیں ہوتی رہیں اور تین مشاعرے بھی ہوئے ۔ اور ایک کتاب کی تقریب رونمائی بھی
ارشد حسین خوبصورت شاعر ہیں بھکر شہر سے ہیں حلقہ فروغِ ادب بھکر کے چیئرمین ہیں حلقہ فروغِ ادب کے زیرِ اہتمام 2 ذی الحجہ 2024ء کو ایک محفل مسالمہ منعقد ہوا ۔ زیرِ صدارت ڈاکٹر محمد افضل خان ڈھانڈلہ ( سابق ایم این اے) اور مہمانِ خصوصی استاد الشعراء سئیں نذیر احمد نذیر ڈھالہ خیلوی تھے مقامی شعرا نے بھرپور شرکت کی ۔ یہ محفل مسالمہ ارشد حسین بھٹی کی رہائش گاہ بھکر شہر میں منعقد ہوا اس کے بعد 2024ء میں کوئی اور ادبی کام سامنے نہ آ سکا۔
جاوید عباس جاوید کے قلم سے لکھے ہوئے چند مضامین مقامی اخبارات میں میں گزشتہ سال کی طرح 2024ء میں بھی شائع ہوتے رہے ہیں ۔
روزنامہ ٫٫ عوام کی عدالت ،، بھکر گزشتہ سال کی طرح 2024ء میں بھی اخبار نے مثبت کردار ادا کیا ہے سال 2024ء میں بھی شعرو شاعری میسج بک کے نام سے ڈیلی کی بنیاد پر نوجوانوں کے پسندیدہ منتخب اشعار شائع ہوتے رہے ہیں ۔ جولائی 2024ء سے تسلسل کے ساتھ انیل چوہان کی غزل شائع ہوتی رہی ہے ۔ راقم الحروف اور دیگر قلم کاروں کی تحریریں اور ادبی خبریں وغیرہ روزنامہ ٫٫ عوام کی عدالت ،، بھکر کی زینت بنتی رہی ہیں ۔
روزنامہ ٫٫ نوائے بھکر ،، بھکر روزنامہ ٫٫ بھکر ٹائمز ،، بھکر اور روزنامہ ٫٫ سچائی ،، بھکر اخبارات گزشتہ سال کی طرح 2024ء میں بھی ادبی مضامین و خبریں وغیرہ شائع کرنے میں مثبت کردار ادا کیا ہے ۔ اس طرح سے لکھاریوں کے حوصلے بلند ہوئے ہیں ۔
محفلِ مسالمہ 2 جولائی 2024ء کو گلشنِ مدینہ بھکر میں قلب عباس عابس کی رہائش گاہ پر منعقد ہوا ۔
ڈاکٹر خالد اسراں شاعر و ادیب ہیں اور ادبی تنظیم بزمِ ہادی کے بانی ہیں ۔ ان کی کُتب کا تفصیلی ذکر ادبی جائزہ سال 2023ء میں کیا گیا ہے ۔ بزمِ ہادی کے زیرِ اہتمام ہاشمی کلینک منڈی ٹاؤن بھکر دو ادبی نشستیں منعقد ہوئی ہیں ۔ اس بزمِ کے زیرِ اہتمام 2024ء میں ایک کتاب بھی شائع ہوچکی ہے ۔
ادبی مشاعرہ 7 اکتوبر 2024ء کو ( اونرالمدینہ بوائز ہاسٹل نزد لاری اڈا بھکر ) منعقد ہوا جس میں معروف شعراء کرام نے شرکت کی ۔
تحصیل بھکر کے قصبہ میں عابد علیم سہو ، اڈا جہان خان چک نمبر 46 میں مقیم ہیں ۔ اُردو پنجابی اور سرائیکی زبان میں شاعری کرتے ہیں ۔ بزمِ رفیق کے روحِ رواں ہیں ان کی بزمِ کے زیرِ اہتمام دو ادبی نشستیں 2024ء میں منعقد ہوئی ہیں ۔
12 اگست 2024ء کو سالانہ تقریب پرچم کشائی کے موقع پر محفل مشاعرہ واٹر سپلائی گراؤنڈ نزد گرلز کالج ، بہل میں منعقد ہوا جس میں بھرپور شعراء کرام نے شرکت کی اور عوام نے بھی کثیر تعداد میں شرکت کی ۔
9/10 نومبر 2024ء کی درمیانی شب جناح اسکول اینڈ کالج کیمپس دریا خان دوسرا سالانہ مشاعرہ منعقد ہوا ۔ بانیان محفل مشاعرہ ڈاکٹر محمد پروان انجم اور ملک نصیر پہوڑ تھے ۔
جاوید اختر فاروق تحصیل دریا خان کے گاؤں برکت والا کے رہائشی ہیں ۔ ادبی تنظیم بہارِ ادب کے روحِ رواں ہیں ۔ ادبی تنظیم بہارِ ادب کے زیرِ اہتمام جون 2024ء کو ادبی نشست کا اہتمام کیا گیا تھا ۔ اس تنظیم بہارِ ادب کے باقی ادبی پروگرام حالات کا شکار ہوگئے ہیں ۔
تحصیل دریا خان کا قصبہ دُلے والا شاہنواز ارشد (مرحوم) اور نجیب اللّٰہ خان نیازی (مرحوم) کی یاد میں ایک مشاعرہ 14 ستمبر 2024ء کو منعقد ہوا ( بمقام اسلام دال ملز ایم ایم روڈ دُلے والا) جس میں بھرپور شعراء اور سامعین نے شرکت کی منتظمین میں عبد الغفار نئر اور احسن حیات مغل تھے ۔
تحصیل کلورکوٹ بزمِ طاہر ، شاہ عالم نشیب بستی اکڑا کانجن 2024ء میں ہر ماہ کی پانچ تاریخ کو ادبی نشست ہوتی رہی ہے اور سالانہ مشاعرہ 4 اکتوبر 2024ء کو منعقد ہوا ہے ۔
تحصیل کلورکوٹ کے گاؤں غلاماں میں ادبی تنظیم بزمِ یاراں کے روحِ رواں فاروق احمد فاروق تھلہ ہیں ۔ ان کی بزمِ کے زیرِ اہتمام 2024ء میں ادبی نشستیں ہر ماہ کو باقاعدگی سے ہوتی رہی ہیں اور ایک شاندار و کامیاب مشاعرہ 23 نومبر 2024ء کو منعقد ہوا ہے اسی گاؤں کی ایک اور ادبی تنظیم بزمِ پارت ہے جس کے بانی و صدر ذوالفقار راقم ہیں ۔ 2024ء میں ان کی بزمِ نے ہر تین ماہ بعد ایک ادبی نشست کا اہتمام کیا ہے اور دو بڑے کامیاب مشاعرے بھی کرواچکی ہے ۔
28/29 ستمبر 2024ء کی درمیانی شب اکڑا کانجن تحصیل کلورکوٹ میں سرائیکی محفل مشاعرہ منعقد ہوا بانی مشاعرہ ملک محمد اشرف جوئیہ ، ملک غلام شبیر کانجن تھے ۔
تحصیل منکیرہ کے شمالی گاؤں گوہر والا میں بشیر گوندل کی ادبی تنظیم تھل سرائیکی چانناں کے زیرِ اہتمام۔ 5 ستمبر 2024ء کو گوہر والا میں ایک نشست منعقد ہوئی جس میں عصمت گرمانی ، کاظم حسین کاظم اور مقامی شعرا نے شرکت کی اسی تنظیم کا سالانہ مشاعرہ 5/6 اکتوبر 2024ء کی درمیانی شب تیمور چوک گوہر والا میں منعقد ہوا ۔
بزمِ اوجِ ادب یہ ادبی تنظیم منکیرہ شہر میں ہے ۔ اس کے بانی و چیئرمین مقبول ذکی مقبول ہیں ۔ گزشتہ سال کی طرح ماشاءاللہ سال 2024ء میں بزمِ اوجِ ادب نے اچھی خاصی کارگردی دکھائی ہے ۔ مرحوم شعراء کی یاد میں تعزیتی اجلاس 2024ء ایک علی شاہ (مرحوم) 16 جون 2024ء کو ہوا دوسرا شاہنواز ارشد (مرحوم) 22 اگست 2024ء کو ہوا مرحومین کے لیے قرآن خوانی کی گئی بلندیِ درجات کے لئے دعائیں کی گئیں اور شعراء نے خراجِ تحسین پیش کیا ۔ جون 2024ء کو نعتیہ نشست ہوئی گرد و نواح اور مقامی شعرا نے شرکت کی بزمِ اوجِ ادب نے ایک اسناد تقریب جھنگ سٹی میں منعقد کرائی 17 نومبر 2024ء کو ایک نعتیہ نشست 30 نومبر 2024ء کو منعقد ہوئی جس میں بہاولپور اور روہی سے شعراء کرام تشریف لائے اور منکیرہ کے مقامی شعرا نے شرکت کی 8 دسمبر 2024ء کو بزمِ اوجِ ادب نے 9 شعراء کرام کو انوارِ اہلبیت علیہ السّلام ایوارڈ پیش کیا ۔ بزمِ اوجِ ادب کے زیرِ اہتمام تین کتابیں بھی شائع ہو چکی ہیں ۔ راقم الحروف شاعری اور مضامین مقامی ملکی رسائل و جرائد و اخبارات میں گزشتہ سال کی طرح 2024ء میں بھی شائع ہوتے رہے ہیں ۔
انیل چوہان منڈی ٹاؤن بھکر میں رہائش پذیر ہیں ۔ ان کا اُردو غزلیات و نظمیات پر مشتمل مجموعہ ٫٫ زندگی نامہ ،، کے نام سے دسمبر 2024ء میں منصہء شہود پر آچکا ہے ۔
اردو اور سرائیکی شاعر جاوید دانش بھکر کی بستی اکبر آباد نشیب میں مقیم ہیں ۔ ان کی رثائی نظمیں پر مشتمل مجموعہ پلکوں پہ دیپ 2024ء کو لکھنؤ سے شائع ہوا ۔
قمر بخاری کا تعلق جھوک ٹبہ بھکر نشیب کے رہائشی ہیں ۔ان کا سرائیکی غزلیات پر مشتمل مجموعہ ٫٫ گنگے لوک ،، 2024ء شائع ہوا ۔
تحصیل دریا خان کے بستی چاہ اسراں والا چک نمبر TDA 18 میں رہائش پذیر ملک نعمان حیدر حامی ان کا افسانوی مجموعہ ٫٫ اے محبت مجھے معاف کر ،، 2024ء کو منصہء شہود آیا ہے ۔
تحصیل کلورکوٹ کے گاؤں غلاماں کے رہائشی عبد المجید آصف لودھرا کے 2024ء میں دو سرائیکی شاعری مجموعے شائع ہو چکے ہیں ۔ ایک نام ہے ٫٫ دھاڑیں ،، اور دوسرے نام ٫٫ ہکَل ،،
محمد اقبال بالم کا تعلق منکیرہ شہر سے ہے ۔ ان کے 2024ء میں دو شاعری مجموعے شائع ہوئے ہیں ایک ٫٫ گُدڑیاں ،، اور دوسرا ٫٫ ہیں آنکھیں نم اُسے کہنا ،،
مقبول ذکی مقبول کا تعلق منکیرہ شہر سے ہے ۔ 2024ء کو دو شعری مجموعے اور ایک نثر کی کتاب شائع ہو چکی ہے ۔ جن کے نام یہ ہیں ٫٫ یہ میرا بھکر ،، ٫٫اندازِ بیاں دیکھ ،، اور ٫٫ شذراتِ مقبول ،،
2024ء میں جو شعراء ہم سے بچھڑ گئے ہیں ۔ ان میں عاصم تنہا ( 5جنوری 2024ء) چاندنی چوک ، جمشید اقبال جمشید (4 اگست 2024ء) بھکر سیٹی ، سجاد ظفر کلیم (7 ستمبر 2024ء) دُلے والا
مجموعی طور پر یہ سال گذشتہ سالوں کے مقابلے میں ادبی لحاظ سے سرد رہا ۔سرگرمیاں ماند رہیں ۔ شاید مالی مشکلات غالب رہیں ۔
