Tag: بجلی

وزیراعظم کا "اپنا میٹر، اپنی ریڈنگ” ایپ

ڈاکٹر رحمت  عزیز خان چترالی

پاکستان میں بجلی کی تقسیم اور بلنگ کا نظام گزشتہ کئی دہائیوں سے مسائل کا شکار رہا ہے۔ تقسیم کار کمپنیاں  ماضی سے اب تک میٹر ریڈنگ کے لیے میٹر ریڈرز پر انحصار کرتی آئی ہیں۔ ان میٹر ریڈرز کا کام صارفین کے گھروں، دفاتر یا اداروں میں لگے میٹروں سے بجلی کی استعمال شدہ مقدار کو پڑھ کر رپورٹ کرنا ہوتا ہے۔ یہ عمل اکثر تصاویر کے ذریعے ہوتا رہا، مگر اس میں انسانی غلطی، بدنیتی، رشوت ستانی اور اوور بلنگ جیسے مسائل جنم لیتے رہے۔

اوور بلنگ، اندازاً بل بھیجنے اور صارفین کی شکایات نے میٹر ریڈرز کے نظام پر سوالات کھڑے کیے۔ متعدد مواقع پر صارفین نے مظاہرے کیے، عدالتوں سے رجوع کیا اور عوامی سطح پر بجلی کے بلوں کو ’ڈاکا‘ قرار دیا۔ ایسے حالات میں یہ واضح تھا کہ بلنگ کے نظام میں شفافیت، خودکاریت اور اعتماد کی بحالی ضروری ہے۔

وزیراعظم شہباز شریف نے ایک اہم اور دیرینہ مسئلے کو جدید حل فراہم کرتے ہوئے "اپنا میٹر، اپنی ریڈنگ” کے نام سے ایک ڈیجیٹل ایپ کے آغاز کی منظوری دی ہے۔ اس اقدام کا مقصد میٹر ریڈرز کے کردار کو ختم کر کے بجلی کے بلنگ نظام کو شفاف اور خودکار بنانا ہے۔ یہ ایپ نہ صرف صارفین کو اپنی بجلی کی ریڈنگ خود اپ لوڈ کرنے کی سہولت دے گی بلکہ انہیں اس عمل میں شریک بنائے گی، جو کہ صارف اور ریاست کے درمیان باہمی اعتماد کو فروغ دے گا۔

یہ نظام ابتدائی طور پر کراچی الیکٹرک (K-Electric) کے دائرہ اختیار سے باہر پورے پاکستان میں متعارف کرایا جائے گا، کیونکہ کے الیکٹرک کی پالیسی اور ساخت وفاقی ڈسکوز سے مختلف ہے۔

وزیر اعظم نے پاور ڈویژن کو ہدایت دی ہے کہ یہ ایپ قومی زبان اردو کے ساتھ ساتھ چار علاقائی زبانوں،  پنجابی، سندھی، پشتو اور بلوچی   میں دستیاب ہو تاکہ ہر طبقے کا شہری اس کا استعمال کر سکے۔ اس فیصلے سے حکومت نے ڈیجیٹل شمولیت (Digital Inclusion) کی اہمیت کو تسلیم کیا ہے، جو کسی بھی قومی ڈیجیٹل پالیسی کے لیے ایک ناگزیر شرط ہے۔

ایپ کا سافٹ لانچ اس لیے ضروری سمجھا گیا ہے تاکہ تکنیکی خامیوں کو عوامی سطح پر مکمل اجراء سے پہلے دور کیا جا سکے۔ یہ ایک دانشمندانہ قدم ہے، کیونکہ پاکستان میں بیشتر ڈیجیٹل منصوبے بروقت جانچ کے بغیر لاگو کیے جانے کی وجہ سے ناکامی کا شکار ہوئے۔

حکومت نے صارفین کو اس نظام سے روشناس کرانے کے لیے وزارت اطلاعات و نشریات کے اشتراک سے ایک جامع میڈیا مہم کی منظوری دی ہے۔ اس مہم پر 31 کروڑ 60 لاکھ روپے مختص کیے گئے ہیں، جو ایک خطیر رقم ہے۔ اس کا مقصد یہ ہے کہ ہر پاکستانی شہری نہ صرف اس ایپ کے بارے میں آگاہ ہو، بلکہ اس کے فوائد سے بھی واقف ہو جائے۔

اس ایپ کے ذریعے اوور بلنگ کا سلسلہ محدود ہو جائے گا کیونکہ صارف خود ریڈنگ اپلوڈ کرے گا۔ میٹر ریڈرز کی رشوت خوری، جعلسازی اور من مانی ختم ہو گی۔ لاقائی زبانوں کی شمولیت حکومت کی جمہوری سوچ کی عکاس ہے۔ طویل مدت میں میٹر ریڈرز کی تنخواہوں اور بدعنوانیوں سے نجات بجٹ پر مثبت اثر ڈالے گی۔

پاکستان میں اب بھی دیہی علاقوں میں انٹرنیٹ، اسمارٹ فونز اور ایپس کے استعمال کی صلاحیت محدود ہے۔ بزرگ شہری، ناخواندہ یا غیر تکنیکی صارفین کو مشکلات پیش آ سکتی ہیں۔خود ریڈنگ کی اجازت بعض صارفین کو چالاکی کی راہ دکھا سکتی ہے۔ اس لیے نگرانی اور ڈیجیٹل ویلیڈیشن کی مؤثر حکمت عملی ناگزیر ہو گی۔ ایپ کے ذریعے صارفین کے گھریلو ڈیٹا تک رسائی حاصل ہو گی۔ اگر یہ ڈیٹا غیر محفوظ رہا تو سائبر خطرات پیدا ہو سکتے ہیں۔میٹر ریڈرز کی یونین یا ان کے حمایتی حلقے اس تبدیلی کی مزاحمت کر سکتے ہیں کیونکہ یہ ان کی ملازمتوں پر اثر انداز ہو گا۔ اس لیے مرحلہ وار اور شفاف عمل ناگزیر ہے۔

یہ اقدام پاکستان میں ڈیجیٹل گورننس کی طرف ایک اہم قدم ہے۔ اگر اس نظام کو مؤثر تربیت، عوامی شمولیت، اور تکنیکی فعالیت کے ساتھ نافذ کیا جائے تو یہ پاکستان کے بجلی کے شعبے میں ایک انقلاب لا سکتا ہے۔ ضرورت اس امر کی ہے کہ عوام کو استعمال کی تربیت دی جائے۔ ایپ کا بیک اپ سسٹم موجود ہو۔ غلط ریڈنگ کی صورت میں نظرثانی کا ایک آسان نظام قائم کیا جائے۔ ڈیجیٹل انفراسٹرکچر (مثلاً، انٹرنیٹ کی رسائی) کو مستحکم بنایا جائے۔

وزیراعظم شہباز شریف کا "اپنا میٹر، اپنی ریڈنگ” ایپ کا منصوبہ پاکستان میں ڈیجیٹل اصلاحات، شفافیت اور توانائی کے شعبے میں انقلابی تبدیلی کا مظہر ہے۔ یہ اقدام اگر درست طریقے سے نافذ کیا جائے تو صرف بجلی کے بلوں ہی نہیں، بلکہ ریاست اور عوام کے باہمی اعتماد کے سفر میں بھی ایک مثبت قدم ثابت ہو سکتا ہے۔ تاہم اس کے لیے حکمت، نگرانی، تربیت اور عوامی شمولیت لازم ہے۔ ورنہ یہ منصوبہ بھی محض ایک سیاسی اعلان بن کر فائلوں میں دب کر  رہ جائے گا۔

Title Image by Gerd Altmann from Pixabay

مفت بجلی کی فراہمی، ملک کی تباہی

ڈاکٹر رحمت عزیز خان چترالی٭

مملک خداداد پاکستان میں بعض اداروں کو مفت بجلی فراہم کرکے ملک کو تباہی کے دہانے پر پہنچایا جارہا ہے جو کہ غربت اور مہنگائی کی چکی میں پسی ہوئی عوام کے ساتھ امتیازی سلوک کے مترادف ہے۔ وزارت توانائی کے تحت پبلک اور کارپوریٹ سیکٹر کے ملازمین کو سالانہ اربوں روپے کی مفت بجلی فراہم کیے جانے کا انکشاف ایک ایسے وقت میں ہوا ہے جب پاکستان کی معیشت سنگین بحرانوں کا شکار ہے۔ قومی اسمبلی میں پیش کی گئی دستاویزات کے مطابق دو لاکھ ملازمین کو 44 کروڑ 15 لاکھ یونٹ سالانہ مفت بجلی فراہم کی گئی  جس میں حاضر سروس ملازمین کو 30 کروڑ 82 لاکھ اور ریٹائرڈ ملازمین کو 13 کروڑ 32 لاکھ یونٹس دیے گئے۔

پاکستان میں توانائی کے شعبے کا آغاز قیامِ پاکستان کے فوراً بعد ہوا تھا۔ واپڈا (واٹر اینڈ پاور ڈویلپمنٹ اتھارٹی) 1958 میں قائم کی گئی تاکہ ملک میں پانی اور بجلی کے وسائل کو ترقی دی جا سکے۔ اگرچہ ابتدائی طور پر یہ ادارہ قومی ترقی میں ایک اہم ستون کے طور پر ابھرا  لیکن وقت کے ساتھ ساتھ انتظامی نااہلی، بدعنوانی ور غیر ضروری مراعات کے باعث یہ ادارہ مالی مسائل کا شکار ہو گیا۔

توانائی کے شعبے میں ملازمین کو مفت بجلی فراہم کرنے کی روایت کئی دہائیوں پرانی ہے جس سے عام آدمی پر مہنگی بجلی کا بوجھ پڑا۔ یہ مراعات ابتدا میں محدود پیمانے پر دی جاتی تھیں  لیکن وقت کے ساتھ ان کا دائرہ کار بڑھتا چلا گیا۔ 2023 کی رپورٹ کے مطابق سرکاری سطح پر سب سے زیادہ بجلی کا استعمال ہوتا ہے اور دفاتر میں ایئر کنڈیشنرز اور دیگر آلات کا غیر ضروری استعمال عام ہے۔ یہ صورتحال ظاہر کرتی ہے کہ توانائی کے وسائل کے ضیاع کو روکنے کے لیے کوئی مؤثر حکمت عملی موجود نہیں۔

پاکستان اس وقت مہنگی بجلی پیدا کر رہا ہے  اور اس کا بوجھ عام صارفین پر منتقل کر دیا گیا ہے۔ کم آمدنی والے افراد اور متوسط طبقے کے لیے بجلی کے بھاری بل ادا کرنا ایک مشکل امر بن چکا ہے۔ اس کے برعکس  توانائی کے شعبے کے ملازمین کو مفت بجلی کی فراہمی معاشی اور اخلاقی دونوں لحاظ سے قابلِ مذمت اور غریب آدمی کے ساتھ  امتیازی  سلوک کے زمرے میں آتا ہے۔

پاور سیکٹر کے گردشی قرضے ملکی معیشت کے لیے ایک بڑا چیلنج ہیں۔ گردشی قرضے وہ رقم ہے جو حکومت کو بجلی کی پیداوار اور ترسیل کے لیے ادا کرنی ہوتی ہے لیکن یہ صارفین سے وصول نہیں کی جا سکتی۔ اس کے اسباب میں بجلی چوری، لائن لاسز  اور مفت بجلی کی فراہمی شامل ہیں۔

پاکستان میں بجلی چوری ایک خطرناک  مسئلہ کے طور پر ہمارے سامنے ہے  جو لاکھوں روپے سے بڑھ کر اربوں روپے تک پہنچ چکا ہے۔ماضی میں  اس مسئلے پر قابو پانے کے لیے متعدد منصوبے بنائے گئے لیکن یہ منصوبے  زیادہ تر ناکام رہے۔ بجلی چوری اور لائن لاسز کا بوجھ عام صارفین پر ڈال دیا جاتا ہے جس سے ان کی مشکلات میں اضافہ ہوتا ہے۔

توانائی کے شعبے کے ملازمین کو مفت بجلی کی فراہمی معاشرتی ناہمواری کو فروغ دیتی ہے۔ ایک طرف  غریب عوام کی اکثریت مہنگی بجلی کے بل ادا کرنے پر مجبور ہیں  تو دوسری طرف مخصوص طبقے کو بلا معاوضہ سہولیات فراہم کی جا رہی ہیں۔ یہ صورتحال معاشرتی تقسیم کو بڑھا رہی ہے اور عوام میں عدم اطمینان پیدا کر رہی ہے۔

پاکستان کو توانائی کے شعبے میں فوری اور مؤثر اصلاحات کی ضرورت ہے۔ توانائی کے شعبے کے ملازمین کو مفت بجلی کی فراہمی بند کی جائے اور ان سے بھی عام صارفین کی طرح بل وصول کیا جائے۔بجلی چوری کو روکنے کے لیے سخت قوانین نافذ کیے جائیں اور ان پر عملدرآمد یقینی بنایا جائے۔گردشی قرضوں کو کم کرنے کے لیے مؤثر حکمت عملی اپنائی جائے  جس میں بجلی کی قیمتوں کا تعین حقیقی بنیادوں پر کیا جائے۔عوام میں بجلی کے ضیاع کے حوالے سے شعور بیدار کیا جائے اور توانائی کے مؤثر استعمال کی ترغیب دی جائے۔

توانائی کے شعبے میں مفت بجلی کی فراہمی اور دیگر مراعات کا خاتمہ وقت کی اہم ضرورت ہے۔ یہ مسئلہ نہ صرف ملکی معیشت پر بوجھ ڈال رہا ہے بلکہ عوام میں بے چینی اور عدم مساوات کو بھی فروغ دے رہا ہے۔ اگر حکومت اور متعلقہ ادارے سنجیدگی سے واپڈا کے نظام میں  اصلاحات نافذ کریں تو یہ ممکن ہے کہ توانائی کے شعبے کو مالی طور پر مستحکم کیا جا سکے گا  اور عوام کو ریلیف فراہم کیا جا سکے گا۔

Title Image by Susana Cipriano from Pixabay

بجلی کی تقسیم کار کمپنیوں کی ناقص کارکردگی

ڈاکٹر رحمت عزیز خان چترالی٭

پاکستان  میں بجلی کی تقسیم کار کمپنیوں کی ناقص کارکردگی اور اس کے نتیجے میں پیدا ہونے والے مسائل ملک  کی معیشت پر گہرے اثرات مرتب کر رہے ہیں۔ بجلی چوری، واجبات کی عدم وصولی اور بدعنوانیوں کے مختلف پہلو ملک کی معاشی مشکلات کو مزید پیچیدہ بنا رہے ہیں۔ ان مسائل کے حل کے لیے متعدد کوششیں کی گئیں لیکن سیاسی اور بیوروکریٹک مزاحمت کی وجہ سے یہ اصلاحات اب تک مؤثر ثابت نہیں ہو سکیں جوکہ غربت کی چکی میں پسی ہوئی عوام پر  ایک بہت بڑا بوجھ ہے۔

پاکستان میں بجلی کی تقسیم کا نظام ہمیشہ سے مسائل کا شکار رہا ہے۔ 1990 کی دہائی میں بجلی کی نجکاری کے تحت تقسیم کار کمپنیوں کا شعبہ  قائم کیا گیا تاکہ بجلی کی ترسیل اور تقسیم کو بہتر بنایا جا سکے۔ تاہم  ان کمپنیوں کی ناقص کارکردگی، غیر پیشہ ورانہ رویے  اور بدعنوانی نے اس نظام کو مزید کمزور کر دیا۔ بجلی کی چوری اور بلوں کی عدم ادائیگی جیسے مسائل نے ان کمپنیوں کی کارکردگی کو بری طرح متاثر کیا۔

وفاقی حکومت نے چھ ماہ قبل ایک مؤثر حکمت عملی تیار کی جس کا مقصد بجلی کی تقسیم کار کمپنیوں  میں اصلاحات لانا تھا۔ اس حکمت عملی کے تحت ملتان اور سکھر سے آغاز کرتے ہوئے انٹیلی جنس، انویسٹی گیشن  اور قانون نافذ کرنے والے اداروں کے افسران کو تعینات کیا گیا۔ اس اقدام کا مقصد بدعنوانی کو ختم کرنا اور واجبات کی وصولی کو یقینی بنانا تھا۔ لاہور اور کوئٹہ میں بھی اس حکمت عملی کے مثبت نتائج سامنے آئے  لیکن سکھر الیکٹرک پاور کمپنی (سیپکو) میں اس فیصلے کے نفاذ میں بڑی رکاوٹیں درپیش رہیں۔

سیپکو کے حوالے سے وفاقی حکومت کو طویل سیاسی اور غیر سیاسی مزاحمت کا سامنا کرنا پڑا۔ تاہم  حالیہ دنوں میں حکومت نے سکھر میں بھی اصلاحات کے نفاذ کا سلسلہ شروع کر دیا ہے۔ ایک جاری کردہ اعلامیہ کے مطابق سیپکو کے سی ای او اور سول آرمڈ فورسز کے سیکٹر کمانڈر کو اہم ذمہ داریاں سونپی گئی ہیں۔ اس کے علاوہ، فیڈرل انویسٹی گیشن ایجنسی (ایف آئی اے)، ملٹری انٹیلی جنس (ایم آئی)  اور انٹر سروسز انٹیلی جنس (آئی ایس آئی) کے افسران کو ڈی ایس یو کے ممبران کے طور پر شامل کیا گیا ہے۔

ملتان اور لاہور میں اس حکمت عملی کے تحت حوصلہ افزا نتائج سامنے آئے ہیں۔ واجبات کی وصولی میں بہتری، بجلی چوری کی روک تھام  اور بدعنوانی کے خاتمے میں نمایاں کامیابیاں حاصل ہوئیں۔ کوئٹہ میں بھی اس اقدام کے مثبت اثرات دیکھنے کو ملے ہیں۔ ان کامیابیوں کو مدنظر رکھتے ہوئے سکھر میں بھی ان اصلاحات کو نافذ کرنے کا فیصلہ کیا گیا ہے۔

بجلی کے نظام کی درستگی اور معیشت کی بہتری کے لیے وفاقی حکومت کی کوششیں قابل ستائش ہیں  لیکن یہ مسئلہ صرف وفاقی سطح پر حل نہیں ہو سکتا۔ سندھ کی تمام بجلی کی تقسیم کار کمپنیوں میں بدعنوانی ختم کرنے کے لیے صوبائی حکومت کو بھی بھرپور کردار ادا کرنا ہوگا۔ یہ ضروری ہے کہ صوبائی حکومت وفاقی اقدامات کی حمایت کرے اور ان کے نفاذ کو یقینی بنائے۔

سیاسی اثر و رسوخ کے باعث اصلاحات کے نفاذ میں رکاوٹیں پیدا ہوتی ہیں۔ حکومت کو چاہیے کہ وہ اس معاملے میں غیر جانبدارانہ رویہ اپنائے اور تمام اسٹیک ہولڈرز کو اعتماد میں لے۔

بدعنوانی کے خاتمے کے لیے سخت قوانین اور ان کے مؤثر نفاذ کی ضرورت ہے۔ احتساب کے عمل کو مزید مضبوط بنایا جائے تاکہ بدعنوان عناصر کو انصاف کے کٹہرے میں لایا جا سکے۔

بجلی چوری اور بلوں کی عدم ادائیگی کے مسائل کو حل کرنے کے لیے عوام میں شعور بیدار کرنا ضروری ہے۔ میڈیا اور سماجی تنظیموں کے ذریعے عوام کو اس بات کا احساس دلایا جائے کہ یہ مسائل قومی معیشت کو نقصان پہنچا رہے ہیں۔

بجلی کی تقسیم کے نظام میں جدید ٹیکنالوجی کا استعمال کرکے چوری اور دیگر مسائل کو کم کیا جا سکتا ہے۔ اسمارٹ میٹرز اور خودکار نظام کے ذریعے بجلی کی ترسیل اور تقسیم کو بہتر بنایا جا سکتا ہے۔

بجلی کی تقسیم کار کمپنیوں کی ناقص کارکردگی اور بدعنوانی کے مسائل پاکستان کی معیشت کے لیے ایک بڑا چیلنج ہیں۔ اگرچہ وفاقی حکومت کی حالیہ کوششیں اصلاحات کی جانب ایک مثبت قدم ہیں لیکن ان کو کامیاب بنانے کے لیے سیاسی اور بیوروکریٹک مزاحمت کو ختم کرنا ہوگا۔ صوبائی حکومتوں اور عوام کا تعاون بھی ان مسائل کے حل کے لیے ناگزیر ہے۔ اگر ان اصلاحات کو مؤثر طریقے سے نافذ کیا جائے تو یہ نہ صرف بجلی کے نظام کو بہتر بنائے گا بلکہ ملکی معیشت کو بھی مستحکم کرے گا۔

سوچو ذرا۔۔۔!

محمد فاروق خان
بجلی کے بلوں نے یکدم اپ کو مشتعل کر دیا ہے اور آپ بجلی کے بلوں کو جلانے کے فوٹو سیشن کے مرحلے سے بھی أگے بڑھ کر بل نہ جمع کرانے کم منزل پہ پہنچنے کی جستجو میں ہیں۔آپ کی خواہش ہے کہ بجلی کے مفت خورو ں سے سہولت واپس لے لی جاۓ۔اپ چاہتے ہیں کہ بجلی کے بل کم کر دیے جائیں۔اپ کسی تحریک کا حصہ بن کر اپنی طاقت کے مظاہرے کے لیۓ بے چین ہیں۔اپ سوشل میڈیا پر انقلابی پوسٹ شیئر کر رہے ہیں۔اپ نگرانوں کے ہنی مون پیریڈ کو ہنگامہ خیز بنانے کا ارادہ کر چکے ہیں اور ان سے مہنگائ اور بجلی کے بلوں میں اضافےکی صورت میں کیۓ جانے والے غیر مقبول فیصلوں کو بدلوانا چاہتے ہیں۔اپ سوچتے ہیں کہ بجلی کے بل آمدن سے زیادہ نہ ہوں۔
صاحبو۔۔۔! اپ کا غصہ اور برہمی اپنی جگہ لیکن یہ بھی تو سوچو کہ بجلی کے زیادہ بلوں کی وجہ سے اپ فوری طور پر متبادل توانائی کے حصول کا سو چنے لگے ۔ہو سکتا ہے آپ کئی سال سولر انرجی کی افادیت پر نہ تو غور کر تے اور نہ ہی شفٹ ہوتےسوچیں متبال توانائ کو قومی سطح پر سپورٹ کرنے اور توانائ کے بحران پر قابو پانے میں تاریخ میں اپ کا کیا کردار بننے جا رہا ہے جس پرائیندہ نسلیں فخر کر سکیں گیں ۔آپ کے ساتھ ایک بھلائی یہ بھی کی گئ کہ اپ اپنے اخراجات پورا کرنے اور اپنی امدن بڑ ھانے سے مجرمانہ طور پر غافل تھےجس کی وجہ سے اپ بجلی کے بلوں میں اضافے کو ظلم قرار دے رہے ہیں اب جب اپ کے سامنے بجلی کے بلوں کو جمع کرانے کا ٹارگٹ ہوگا تو اپ سستی چھوڑیں گے زیادہ محنت کرکے اپنی امدن میں اضافہ کر لیں گے جس کا سب سے بڑا فائدہ یہ ہوگا کہ آپ بجلی کے بلوں سے خوف زدہ نہیں یوں گے۔ پہلے مہینے شاید اپ بجلی کا بل جمع کرانے میں مشکل محسوس کریں لیکن آگےچل کر آپ ایسا نہیں سوچیں گے۔

آپ فہم و دانش کے مالک ہیں اپ بخوبی جانتے ہیں کہ ملک ٹیکس پر اگے بڑھتے ہیں ٹیکس بڑھے گا تو تمھارا ملک بھی آگے بڑھے گا۔آپ کو اس پر ٹھنڈے دل سے غور کرنا ہوگا کی اسلامی ملک ہونے کے ناطے ہم پر قرض کی ادائیگی کی کتنی بڑی ذمہ داری ہے ہم نے قرض غیر مسلموں سے لے رکھا ہے وہ ہمارے عملی کردار کے متعلق کیا سوچیں گے اس سلسلے میں مذہبی ذمہ داری کا ثبوت دیتے ہوے اس بل کو جمع کرا کر ائندہ بجلی کے بلوں میں اضافے کو بخوشی قبول کرنے کی ہمت کریں۔ ریاست ماں کی طرح ہوتی ہے ماں کب اپنی اولاد کو تکلیف دے سکتی ہے یہ سب تمھاری بھلائی کے لئے کیا جا ریا ہے ہو سکتا ہے کہ کوئ تمہیں بجلی کے بلوں کی وجہ سےتمھاری ماں سے بد گمان کر رہا ہو تو تمھیں سمجھداری کا ثبوت دینا ہوگا۔ موٹر وے کے ٹیکس کو بھی کچھ لوگ ہوا دے رہے ہیں سوچنا ہو گا کہ اس سے ہمیں کتنی سفری سہولتیں میسر ہوئ ہیں حکومت ایسی ہی سہولتوں میں اضافہ کرنا چاہتی ہے اور نئی موٹر ویز تعمیر کا ارادہ رکھتی ہے اپ بڑا سوچیں اس خوشحالی اور ترقی پر غور کریں جو مستقبل قریب میں اپ کا مقدر ہونے والی ہے۔ اپ کس قدر خوش قسمت ہیں کہ صاف و شفاف ہوا اپ کو مفت میسر ہے۔اپ مفت پیدل سفر کرتے پھرتے ہیں ۔سورج اپنی روشنی مفت دینے پر متعین ہے۔اس ملک و قوم کو بے وقوف بنا کر ورغلانے والے شاید زیادہ ہو رہے ہیں اس لئے شاید یہ بے چینی دیکھنے میں آ رہی ہے۔
خدمت کے اس سفر سے ابھی بد گمان نہ ہونا۔۔۔
ابھی سول نا فرمانی کی طرف نہ بڑھنا۔۔۔
ابھی رقص جنون شروع نہ کرنا۔ کوئ اعتبار جودے رہا ہے۔۔۔
کہ میں اوں گا اور بدل کے رکھ دوں گا۔